| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
২০. ৰীসতিমৰগ্গো
20. Vīsatimavaggo
(১৯৬) ৩. নিরযপালকথা
(196) 3. Nirayapālakathā
৮৬৬. নত্থি নিরযেসু নিরযপালাতি? আমন্তা। নত্থি নিরযেসু কম্মকারণাতি? ন হেৰং ৰত্তব্বে…পে॰… অত্থি নিরযেসু কম্মকারণাতি? আমন্তা। অত্থি নিরযেসু নিরযপালাতি? ন হেৰং ৰত্তব্বে…পে॰…।
866. Natthi nirayesu nirayapālāti? Āmantā. Natthi nirayesu kammakāraṇāti? Na hevaṃ vattabbe…pe… atthi nirayesu kammakāraṇāti? Āmantā. Atthi nirayesu nirayapālāti? Na hevaṃ vattabbe…pe….
অত্থি মনুস্সেসু কম্মকারণা, অত্থি চ কারণিকাতি? আমন্তা। অত্থি নিরযেসু কম্মকারণা, অত্থি চ কারণিকাতি? ন হেৰং ৰত্তব্বে…পে॰… অত্থি নিরযেসু কম্মকারণা, নত্থি চ কারণিকাতি? আমন্তা। অত্থি মনুস্সেসু কম্মকারণা, নত্থি চ কারণিকাতি? ন হেৰং ৰত্তব্বে…পে॰…।
Atthi manussesu kammakāraṇā, atthi ca kāraṇikāti? Āmantā. Atthi nirayesu kammakāraṇā, atthi ca kāraṇikāti? Na hevaṃ vattabbe…pe… atthi nirayesu kammakāraṇā, natthi ca kāraṇikāti? Āmantā. Atthi manussesu kammakāraṇā, natthi ca kāraṇikāti? Na hevaṃ vattabbe…pe….
৮৬৭. অত্থি নিরযেসু নিরযপালাতি? আমন্তা। ননু ৰুত্তং ভগৰতা –
867. Atthi nirayesu nirayapālāti? Āmantā. Nanu vuttaṃ bhagavatā –
‘‘ন ৰেস্সভূ নোপি চ পেত্তিরাজা,
‘‘Na vessabhū nopi ca pettirājā,
সোমো যমো ৰেস্সৰণো চ রাজা।
Somo yamo vessavaṇo ca rājā;
সকানি কম্মানি হনন্তি তত্থ, ইতো পণুন্নং 1 পরলোকপত্ত’’ন্তি॥
Sakāni kammāni hananti tattha, ito paṇunnaṃ 2 paralokapatta’’nti.
অত্থেৰ সুত্তন্তোতি? আমন্তা। তেন হি নত্থি নিরযেসু নিরযপালাতি।
Attheva suttantoti? Āmantā. Tena hi natthi nirayesu nirayapālāti.
৮৬৮. নত্থি নিরযেসু নিরযপালাতি? আমন্তা। ননু ৰুত্তং ভগৰতা – ‘‘তমেনং, ভিক্খৰে , নিরযপালা পঞ্চৰিধবন্ধনং নাম কারণং কারেন্তি 3 – তত্তং অযোখীলং হত্থে গমেন্তি, তত্তং অযোখীলং দুতিযে হত্থে গমেন্তি, তত্তং অযোখীলং পাদে গমেন্তি, তত্তং অযোখীলং দুতিযে পাদে গমেন্তি, তত্তং অযোখীলং মজ্ঝেউরস্মিং গমেন্তি; সো তত্থ দুক্খা তিব্বা কটুকা ৰেদনা ৰেদেতি; ন চ তাৰ কালং করোতি যাৰ ন তং পাপকম্মং ব্যন্তীহোতী’’তি 4! অত্থেৰ সুত্তন্তোতি? আমন্তা। তেন হি অত্থি নিরযেসু নিরযপালাতি।
868. Natthi nirayesu nirayapālāti? Āmantā. Nanu vuttaṃ bhagavatā – ‘‘tamenaṃ, bhikkhave , nirayapālā pañcavidhabandhanaṃ nāma kāraṇaṃ kārenti 5 – tattaṃ ayokhīlaṃ hatthe gamenti, tattaṃ ayokhīlaṃ dutiye hatthe gamenti, tattaṃ ayokhīlaṃ pāde gamenti, tattaṃ ayokhīlaṃ dutiye pāde gamenti, tattaṃ ayokhīlaṃ majjheurasmiṃ gamenti; so tattha dukkhā tibbā kaṭukā vedanā vedeti; na ca tāva kālaṃ karoti yāva na taṃ pāpakammaṃ byantīhotī’’ti 6! Attheva suttantoti? Āmantā. Tena hi atthi nirayesu nirayapālāti.
নত্থি নিরযেসু নিরযপালাতি? আমন্তা। ননু ৰুত্তং ভগৰতা – ‘‘তমেনং, ভিক্খৰে, নিরযপালা সংৰেসেত্ৰা কুঠারীহি 7 তচ্ছন্তি…পে॰… তমেনং, ভিক্খৰে, নিরযপালা উদ্ধম্পাদং অধোসিরং ঠপেত্ৰা ৰাসীহি তচ্ছন্তি…পে॰… তমেনং , ভিক্খৰে, নিরযপালা রথে যোজেত্ৰা আদিত্তায পথৰিযা সম্পজ্জলিতায সজোতিভূতায 8 সারেন্তিপি পচ্চাসারেন্তিপি…পে॰… তমেনং, ভিক্খৰে, নিরযপালা মহন্তং অঙ্গারপব্বতং আদিত্তং সম্পজ্জলিতং সজোতিভূতং আরোপেন্তিপি ওরোপেন্তিপি…পে॰… তমেনং, ভিক্খৰে, নিরযপালা উদ্ধম্পাদং অধোসিরং গহেত্ৰা তত্তায লোহকুম্ভিযা পক্খিপন্তি আদিত্তায সম্পজ্জলিতায সজোতিভূতায। সো তত্থ ফেণুদ্দেহকং পচ্চতি, সো তত্থ ফেণুদ্দেহকং পচ্চমানো সকিম্পি উদ্ধং গচ্ছতি, সকিম্পি অধো গচ্ছতি, সকিম্পি তিরিযং গচ্ছতি। সো তত্থ দুক্খা তিব্বা কটুকা ৰেদনা ৰেদযতি, ন চ তাৰ কালং করোতি যাৰ ন তং পাপকম্মং ব্যন্তীহোতি। তমেনং, ভিক্খৰে, নিরযপালা মহানিরযে পক্খিপন্তি! সো খো পন, ভিক্খৰে, মহানিরযো –
Natthi nirayesu nirayapālāti? Āmantā. Nanu vuttaṃ bhagavatā – ‘‘tamenaṃ, bhikkhave, nirayapālā saṃvesetvā kuṭhārīhi 9 tacchanti…pe… tamenaṃ, bhikkhave, nirayapālā uddhampādaṃ adhosiraṃ ṭhapetvā vāsīhi tacchanti…pe… tamenaṃ , bhikkhave, nirayapālā rathe yojetvā ādittāya pathaviyā sampajjalitāya sajotibhūtāya 10 sārentipi paccāsārentipi…pe… tamenaṃ, bhikkhave, nirayapālā mahantaṃ aṅgārapabbataṃ ādittaṃ sampajjalitaṃ sajotibhūtaṃ āropentipi oropentipi…pe… tamenaṃ, bhikkhave, nirayapālā uddhampādaṃ adhosiraṃ gahetvā tattāya lohakumbhiyā pakkhipanti ādittāya sampajjalitāya sajotibhūtāya. So tattha pheṇuddehakaṃ paccati, so tattha pheṇuddehakaṃ paccamāno sakimpi uddhaṃ gacchati, sakimpi adho gacchati, sakimpi tiriyaṃ gacchati. So tattha dukkhā tibbā kaṭukā vedanā vedayati, na ca tāva kālaṃ karoti yāva na taṃ pāpakammaṃ byantīhoti. Tamenaṃ, bhikkhave, nirayapālā mahāniraye pakkhipanti! So kho pana, bhikkhave, mahānirayo –
‘‘চতুক্কণ্ণো চতুদ্ৰারো, ৰিভত্তো ভাগসো মিতো।
‘‘Catukkaṇṇo catudvāro, vibhatto bhāgaso mito;
অযোপাকারপরিযন্তো, অযসা পটিকুজ্জিতো॥
Ayopākārapariyanto, ayasā paṭikujjito.
‘‘তস্স অযোমযা ভূমি, জলিতা তেজসা যুতা।
‘‘Tassa ayomayā bhūmi, jalitā tejasā yutā;
সমন্তা যোজনসতং, ফরিত্ৰা তিট্ঠতি সব্বদা’’তি 11॥
Samantā yojanasataṃ, pharitvā tiṭṭhati sabbadā’’ti 12.
অত্থেৰ সুত্তন্তোতি? আমন্তা। তেন হি অত্থি নিরযেসু নিরযপালাতি।
Attheva suttantoti? Āmantā. Tena hi atthi nirayesu nirayapālāti.
নিরযপালকথা নিট্ঠিতা।
Nirayapālakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৩. নিরযপালকথাৰণ্ণনা • 3. Nirayapālakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৩. নিরযপালকথাৰণ্ণনা • 3. Nirayapālakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৩. নিরযপালকথাৰণ্ণনা • 3. Nirayapālakathāvaṇṇanā
