| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
20. වීසතිමවග්‌ගො
20. Vīsatimavaggo
(196) 3. නිරයපාලකථා
(196) 3. Nirayapālakathā
866. නත්‌ථි නිරයෙසු නිරයපාලාති? ආමන්‌තා. නත්‌ථි නිරයෙසු කම්‌මකාරණාති? න හෙවං වත්‌තබ්‌බෙ…පෙ.… අත්‌ථි නිරයෙසු කම්‌මකාරණාති? ආමන්‌තා. අත්‌ථි නිරයෙසු නිරයපාලාති? න හෙවං වත්‌තබ්‌බෙ…පෙ.….
866. Natthi nirayesu nirayapālāti? Āmantā. Natthi nirayesu kammakāraṇāti? Na hevaṃ vattabbe…pe… atthi nirayesu kammakāraṇāti? Āmantā. Atthi nirayesu nirayapālāti? Na hevaṃ vattabbe…pe….
අත්‌ථි මනුස්‌සෙසු කම්‌මකාරණා, අත්‌ථි ච කාරණිකාති? ආමන්‌තා. අත්‌ථි නිරයෙසු කම්‌මකාරණා, අත්‌ථි ච කාරණිකාති? න හෙවං වත්‌තබ්‌බෙ…පෙ.… අත්‌ථි නිරයෙසු කම්‌මකාරණා, නත්‌ථි ච කාරණිකාති? ආමන්‌තා. අත්‌ථි මනුස්‌සෙසු කම්‌මකාරණා, නත්‌ථි ච කාරණිකාති? න හෙවං වත්‌තබ්‌බෙ…පෙ.….
Atthi manussesu kammakāraṇā, atthi ca kāraṇikāti? Āmantā. Atthi nirayesu kammakāraṇā, atthi ca kāraṇikāti? Na hevaṃ vattabbe…pe… atthi nirayesu kammakāraṇā, natthi ca kāraṇikāti? Āmantā. Atthi manussesu kammakāraṇā, natthi ca kāraṇikāti? Na hevaṃ vattabbe…pe….
867. අත්‌ථි නිරයෙසු නිරයපාලාති? ආමන්‌තා. නනු වුත්‌තං භගවතා –
867. Atthi nirayesu nirayapālāti? Āmantā. Nanu vuttaṃ bhagavatā –
‘‘න වෙස්‌සභූ නොපි ච පෙත්‌තිරාජා,
‘‘Na vessabhū nopi ca pettirājā,
සොමො යමො වෙස්‌සවණො ච රාජා;
Somo yamo vessavaṇo ca rājā;
සකානි කම්‌මානි හනන්‌ති තත්‌ථ, ඉතො පණුන්‌නං 1 පරලොකපත්‌ත’’න්‌ති.
Sakāni kammāni hananti tattha, ito paṇunnaṃ 2 paralokapatta’’nti.
අත්‌ථෙව සුත්‌තන්‌තොති? ආමන්‌තා. තෙන හි නත්‌ථි නිරයෙසු නිරයපාලාති.
Attheva suttantoti? Āmantā. Tena hi natthi nirayesu nirayapālāti.
868. නත්‌ථි නිරයෙසු නිරයපාලාති? ආමන්‌තා. නනු වුත්‌තං භගවතා – ‘‘තමෙනං, භික්‌ඛවෙ , නිරයපාලා පඤ්‌චවිධබන්‌ධනං නාම කාරණං කාරෙන්‌ති 3 – තත්‌තං අයොඛීලං හත්‌ථෙ ගමෙන්‌ති, තත්‌තං අයොඛීලං දුතියෙ හත්‌ථෙ ගමෙන්‌ති, තත්‌තං අයොඛීලං පාදෙ ගමෙන්‌ති, තත්‌තං අයොඛීලං දුතියෙ පාදෙ ගමෙන්‌ති, තත්‌තං අයොඛීලං මජ්‌ඣෙඋරස්‌මිං ගමෙන්‌ති; සො තත්‌ථ දුක්‌ඛා තිබ්‌බා කටුකා වෙදනා වෙදෙති; න ච තාව කාලං කරොති යාව න තං පාපකම්‌මං බ්‍යන්‌තීහොතී’’ති 4! අත්‌ථෙව සුත්‌තන්‌තොති? ආමන්‌තා. තෙන හි අත්‌ථි නිරයෙසු නිරයපාලාති.
868. Natthi nirayesu nirayapālāti? Āmantā. Nanu vuttaṃ bhagavatā – ‘‘tamenaṃ, bhikkhave , nirayapālā pañcavidhabandhanaṃ nāma kāraṇaṃ kārenti 5 – tattaṃ ayokhīlaṃ hatthe gamenti, tattaṃ ayokhīlaṃ dutiye hatthe gamenti, tattaṃ ayokhīlaṃ pāde gamenti, tattaṃ ayokhīlaṃ dutiye pāde gamenti, tattaṃ ayokhīlaṃ majjheurasmiṃ gamenti; so tattha dukkhā tibbā kaṭukā vedanā vedeti; na ca tāva kālaṃ karoti yāva na taṃ pāpakammaṃ byantīhotī’’ti 6! Attheva suttantoti? Āmantā. Tena hi atthi nirayesu nirayapālāti.
නත්‌ථි නිරයෙසු නිරයපාලාති? ආමන්‌තා. නනු වුත්‌තං භගවතා – ‘‘තමෙනං, භික්‌ඛවෙ, නිරයපාලා සංවෙසෙත්‌වා කුඨාරීහි 7 තච්‌ඡන්‌ති…පෙ.… තමෙනං, භික්‌ඛවෙ, නිරයපාලා උද්‌ධම්‌පාදං අධොසිරං ඨපෙත්‌වා වාසීහි තච්‌ඡන්‌ති…පෙ.… තමෙනං , භික්‌ඛවෙ, නිරයපාලා රථෙ යොජෙත්‌වා ආදිත්‌තාය පථවියා සම්‌පජ්‌ජලිතාය සජොතිභූතාය 8 සාරෙන්‌තිපි පච්‌චාසාරෙන්‌තිපි…පෙ.… තමෙනං, භික්‌ඛවෙ, නිරයපාලා මහන්‌තං අඞ්‌ගාරපබ්‌බතං ආදිත්‌තං සම්‌පජ්‌ජලිතං සජොතිභූතං ආරොපෙන්‌තිපි ඔරොපෙන්‌තිපි…පෙ.… තමෙනං, භික්‌ඛවෙ, නිරයපාලා උද්‌ධම්‌පාදං අධොසිරං ගහෙත්‌වා තත්‌තාය ලොහකුම්‌භියා පක්‌ඛිපන්‌ති ආදිත්‌තාය සම්‌පජ්‌ජලිතාය සජොතිභූතාය. සො තත්‌ථ ඵෙණුද්‌දෙහකං පච්‌චති, සො තත්‌ථ ඵෙණුද්‌දෙහකං පච්‌චමානො සකිම්‌පි උද්‌ධං ගච්‌ඡති, සකිම්‌පි අධො ගච්‌ඡති, සකිම්‌පි තිරියං ගච්‌ඡති. සො තත්‌ථ දුක්‌ඛා තිබ්‌බා කටුකා වෙදනා වෙදයති, න ච තාව කාලං කරොති යාව න තං පාපකම්‌මං බ්‍යන්‌තීහොති. තමෙනං, භික්‌ඛවෙ, නිරයපාලා මහානිරයෙ පක්‌ඛිපන්‌ති! සො ඛො පන, භික්‌ඛවෙ, මහානිරයො –
Natthi nirayesu nirayapālāti? Āmantā. Nanu vuttaṃ bhagavatā – ‘‘tamenaṃ, bhikkhave, nirayapālā saṃvesetvā kuṭhārīhi 9 tacchanti…pe… tamenaṃ, bhikkhave, nirayapālā uddhampādaṃ adhosiraṃ ṭhapetvā vāsīhi tacchanti…pe… tamenaṃ , bhikkhave, nirayapālā rathe yojetvā ādittāya pathaviyā sampajjalitāya sajotibhūtāya 10 sārentipi paccāsārentipi…pe… tamenaṃ, bhikkhave, nirayapālā mahantaṃ aṅgārapabbataṃ ādittaṃ sampajjalitaṃ sajotibhūtaṃ āropentipi oropentipi…pe… tamenaṃ, bhikkhave, nirayapālā uddhampādaṃ adhosiraṃ gahetvā tattāya lohakumbhiyā pakkhipanti ādittāya sampajjalitāya sajotibhūtāya. So tattha pheṇuddehakaṃ paccati, so tattha pheṇuddehakaṃ paccamāno sakimpi uddhaṃ gacchati, sakimpi adho gacchati, sakimpi tiriyaṃ gacchati. So tattha dukkhā tibbā kaṭukā vedanā vedayati, na ca tāva kālaṃ karoti yāva na taṃ pāpakammaṃ byantīhoti. Tamenaṃ, bhikkhave, nirayapālā mahāniraye pakkhipanti! So kho pana, bhikkhave, mahānirayo –
‘‘චතුක්‌කණ්‌ණො චතුද්‌වාරො, විභත්‌තො භාගසො මිතො;
‘‘Catukkaṇṇo catudvāro, vibhatto bhāgaso mito;
අයොපාකාරපරියන්‌තො, අයසා පටිකුජ්‌ජිතො.
Ayopākārapariyanto, ayasā paṭikujjito.
‘‘තස්‌ස අයොමයා භූමි, ජලිතා තෙජසා යුතා;
‘‘Tassa ayomayā bhūmi, jalitā tejasā yutā;
සමන්‌තා යොජනසතං, ඵරිත්‌වා තිට්‌ඨති සබ්‌බදා’’ති 11.
Samantā yojanasataṃ, pharitvā tiṭṭhati sabbadā’’ti 12.
අත්‌ථෙව සුත්‌තන්‌තොති? ආමන්‌තා. තෙන හි අත්‌ථි නිරයෙසු නිරයපාලාති.
Attheva suttantoti? Āmantā. Tena hi atthi nirayesu nirayapālāti.
නිරයපාලකථා නිට්‌ඨිතා.
Nirayapālakathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 3. නිරයපාලකථාවණ්‌ණනා • 3. Nirayapālakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 3. නිරයපාලකථාවණ්‌ණනා • 3. Nirayapālakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 3. නිරයපාලකථාවණ්‌ණනා • 3. Nirayapālakathāvaṇṇanā
