| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
3. நிரயபாலகதா²வண்ணனா
3. Nirayapālakathāvaṇṇanā
866-868. நேரயிகே நிரயே பாலெந்தி, ததோ நிக்³க³ந்துங் அப்பதா³னவஸேன ரக்க²ந்தீதி நிரயபாலா. நிரயபாலதாய வா நேரயிகானங் நரகது³க்கே²ன பரியோனத்³தா⁴ய அலங் ஸமத்தா²தி நிரயபாலா. கிங் பனேதே நிரயபாலா நேரயிகா, உதா³ஹு அனேரயிகாதி. கிஞ்செத்த² – யதி³ தாவ நேரயிகா, நிரயஸங்வத்தனியேன கம்மேன நிப்³ப³த்தாதி ஸயம்பி நிரயது³க்க²ங் பச்சனுப⁴வெய்யுங், ததா² ஸதி அஞ்ஞேஸங் நேரயிகானங் யாதனாய அஸமத்தா² ஸியுங், ‘‘இமே நேரயிகா, இமே நிரயபாலா’’தி வவத்தா²னஞ்ச ந ஸியா. யே ச யே யாதெந்தி, தேஹி ஸமானரூபப³லப்பமாணேஹி இதரேஸங் ப⁴யஸந்தாஸா ந ஸியுங். அத² அனேரயிகா, தேஸங் தத்த² கத²ங் ஸம்ப⁴வோதி? வுச்சதே – அனேரயிகா நிரயபாலா அனிரயக³திஸங்வத்தனியகம்மனிப்³ப³த்தா. நிரயூபபத்திஸங்வத்தனியகம்மதோ ஹி அஞ்ஞேனேவ கம்முனா தே நிப்³ப³த்தந்தி ரக்க²ஸஜாதிகத்தா. ததா² ஹி வத³ந்தி –
866-868. Nerayike niraye pālenti, tato niggantuṃ appadānavasena rakkhantīti nirayapālā. Nirayapālatāya vā nerayikānaṃ narakadukkhena pariyonaddhāya alaṃ samatthāti nirayapālā. Kiṃ panete nirayapālā nerayikā, udāhu anerayikāti. Kiñcettha – yadi tāva nerayikā, nirayasaṃvattaniyena kammena nibbattāti sayampi nirayadukkhaṃ paccanubhaveyyuṃ, tathā sati aññesaṃ nerayikānaṃ yātanāya asamatthā siyuṃ, ‘‘ime nerayikā, ime nirayapālā’’ti vavatthānañca na siyā. Ye ca ye yātenti, tehi samānarūpabalappamāṇehi itaresaṃ bhayasantāsā na siyuṃ. Atha anerayikā, tesaṃ tattha kathaṃ sambhavoti? Vuccate – anerayikā nirayapālā anirayagatisaṃvattaniyakammanibbattā. Nirayūpapattisaṃvattaniyakammato hi aññeneva kammunā te nibbattanti rakkhasajātikattā. Tathā hi vadanti –
‘‘கோத⁴னா குரூரகம்மந்தா, பாபாபி⁴ருசினோ ததா²;
‘‘Kodhanā kurūrakammantā, pāpābhirucino tathā;
து³க்கி²தேஸு ச நந்த³ந்தி, ஜாயந்தி யமரக்க²ஸா’’தி.
Dukkhitesu ca nandanti, jāyanti yamarakkhasā’’ti.
தத்த² யதே³கே வத³ந்தி ‘‘யாதனாது³க்க²ஸ்ஸ அப்படிஸங்வேத³னதோ, அஞ்ஞதா² புன அஞ்ஞமஞ்ஞங் யாதெய்யு’’ந்தி ச ஏவமாதி³, தயித³ங் ஆகாஸரோமட்ட²னங் நிரயபாலானங் நேரயிகபா⁴வஸ்ஸேவ அபா⁴வதோ. யே பன வதெ³ய்யுங் – யதி³பி அனேரயிகா நிரயபாலா, அயோமயாய பன ஆதி³த்தாய ஸம்பஜ்ஜலிதாய ஸஜோதிபூ⁴தாய நிரயபூ⁴மியா பரிவத்தமானா கத²ங் நாம து³க்க²ங் நானுப⁴வந்தீதி? கம்மானுபா⁴வதோ. யதா² ஹி இத்³தி⁴மந்தோ சேதோவஸிப்பத்தா மஹாமொக்³க³ல்லானாத³யோ நேரயிகே அனுகம்பந்தா இத்³தி⁴ப³லேன நிரயபூ⁴மிங் உபக³தா தத்த² தா³ஹது³க்கே²ன ந பா³தீ⁴யந்தி, ஏவங் ஸம்பத³மித³ங் த³ட்ட²ப்³ப³ங்.
Tattha yadeke vadanti ‘‘yātanādukkhassa appaṭisaṃvedanato, aññathā puna aññamaññaṃ yāteyyu’’nti ca evamādi, tayidaṃ ākāsaromaṭṭhanaṃ nirayapālānaṃ nerayikabhāvasseva abhāvato. Ye pana vadeyyuṃ – yadipi anerayikā nirayapālā, ayomayāya pana ādittāya sampajjalitāya sajotibhūtāya nirayabhūmiyā parivattamānā kathaṃ nāma dukkhaṃ nānubhavantīti? Kammānubhāvato. Yathā hi iddhimanto cetovasippattā mahāmoggallānādayo nerayike anukampantā iddhibalena nirayabhūmiṃ upagatā tattha dāhadukkhena na bādhīyanti, evaṃ sampadamidaṃ daṭṭhabbaṃ.
தங் இத்³தி⁴விஸயஸ்ஸ அசிந்தெய்யபா⁴வதோதி சே? இத³ம்பி தங்ஸமானங் கம்மவிபாகஸ்ஸ அசிந்தெய்யபா⁴வதோ. ததா²ரூபேன ஹி கம்முனா தே நிப்³ப³த்தா யதா² நிரயது³க்கே²ன அபா³தி⁴தா ஏவ ஹுத்வா நேரயிகே யாதெந்தி, ந செத்தகேன பா³ஹிரவிஸயாபா⁴வோ விஜ்ஜதி இட்டா²னிட்ட²தாய பச்சேகங் த்³வாரபுரிஸேஸு விப⁴த்தஸபா⁴வத்தா. ததா² ஹி ஏகச்சஸ்ஸ த்³வாரஸ்ஸ புரிஸஸ்ஸ இட்ட²ங் ஏகச்சஸ்ஸ அனிட்ட²ங், ஏகச்சஸ்ஸ ச அனிட்ட²ங் ஏகச்சஸ்ஸ இட்ட²ங் ஹோதி. ஏவஞ்ச கத்வா யதே³கே வத³ந்தி ‘‘நத்தி² கம்மவஸேன தேஜஸா பரூபதாபன’’ந்திஆதி³, தத³பாஹதங் ஹோதி. யங் பன வத³ந்தி ‘‘அனேரயிகானங் தேஸங் கத²ங் தத்த² ஸம்ப⁴வோ’’தி நேரயிகானங் யாதகபா⁴வதோ. நேரயிகஸத்தயாதனாயொக்³க³ஞ்ஹி அத்தபா⁴வங் நிப்³ப³த்தெந்தங் கம்மங் தாதி³ஸனிகந்திவினாமிதங் நிரயட்டா²னேயேவ நிப்³ப³த்தேதி. தே ச நேரயிகேஹி அதி⁴கதரப³லாரோஹபரிணாஹா அதிவிய ப⁴யானகஸந்தாஸகுரூரதரபயோகா³ ச ஹொந்தி. ஏதேனேவ தத்த² காகஸுனகா²தீ³னம்பி நிப்³ப³த்தி ஸங்வண்ணிதாதி த³ட்ட²ப்³ப³ங்.
Taṃ iddhivisayassa acinteyyabhāvatoti ce? Idampi taṃsamānaṃ kammavipākassa acinteyyabhāvato. Tathārūpena hi kammunā te nibbattā yathā nirayadukkhena abādhitā eva hutvā nerayike yātenti, na cettakena bāhiravisayābhāvo vijjati iṭṭhāniṭṭhatāya paccekaṃ dvārapurisesu vibhattasabhāvattā. Tathā hi ekaccassa dvārassa purisassa iṭṭhaṃ ekaccassa aniṭṭhaṃ, ekaccassa ca aniṭṭhaṃ ekaccassa iṭṭhaṃ hoti. Evañca katvā yadeke vadanti ‘‘natthi kammavasena tejasā parūpatāpana’’ntiādi, tadapāhataṃ hoti. Yaṃ pana vadanti ‘‘anerayikānaṃ tesaṃ kathaṃ tattha sambhavo’’ti nerayikānaṃ yātakabhāvato. Nerayikasattayātanāyoggañhi attabhāvaṃ nibbattentaṃ kammaṃ tādisanikantivināmitaṃ nirayaṭṭhāneyeva nibbatteti. Te ca nerayikehi adhikatarabalārohapariṇāhā ativiya bhayānakasantāsakurūratarapayogā ca honti. Eteneva tattha kākasunakhādīnampi nibbatti saṃvaṇṇitāti daṭṭhabbaṃ.
கத²மஞ்ஞக³திகேஹி அஞ்ஞக³திகபா³த⁴னந்தி ச ந வத்தப்³ப³ங் அஞ்ஞத்தா²பி ததா² த³ஸ்ஸனதோ. யங் பனேகே வத³ந்தி ‘‘அஸத்தஸபா⁴வா நிரயபாலா நிரயஸுனகா²த³யோ சா’’தி, தங் தேஸங் மதிமத்தங் அஞ்ஞத்த² ததா² அத³ஸ்ஸனதோ. ந ஹி காசி அத்தி² தாதி³ஸீ த⁴ம்மப்பவத்தி, யா அஸத்தஸபா⁴வா, ஸம்பதிஸத்தேஹி அப்பயோஜிதா ச அத்த²கிச்சங் ஸாதெ⁴ந்தீ தி³ட்ட²புப்³பா³. பேதானங் பானீயனிவாரகானங் த³ண்டா³தி³ஹத்த²புரிஸானம்பி அஸத்தபா⁴வே விஸேஸகாரணங் நத்தி². ஸுபினூபகா⁴தோபி அத்த²கிச்சஸமத்த²தாய அப்பமாணங் த³ஸ்ஸனாதி³மத்தேனபி தத³த்த²ஸித்³தி⁴தோ. ததா² ஹி ஸுபினே ஆஹாரூபபோ⁴கா³தி³னா ந அத்த²ஸித்³தி⁴ அத்தி², நிம்மானரூபங் பனெத்த² லத்³த⁴பரிஹாரங் இத்³தி⁴விஸயஸ்ஸ அசிந்தெய்யபா⁴வதோ. இதா⁴பி கம்மவிபாகஸ்ஸ அசிந்தெய்யபா⁴வதோதி சே? தங் ந, அஸித்³த⁴த்தா. நேரயிகானங் கம்மவிபாகோ நிரயபாலாதி அஸித்³த⁴மேதங், வுத்தனயேன பன நேஸங் ஸத்தபா⁴வோ ஏவ ஸித்³தோ⁴. ஸக்கா ஹி வத்துங் ஸத்தஸங்கா²தா நிரயபாலஸஞ்ஞிதா த⁴ம்மப்பவத்தி ஸாபி⁴ஸந்தி⁴கா பரூபகா⁴தி அத்த²கிச்சஸப்³பா⁴வதோ ஓஜாஹாராதி³ரக்க²ஸஸந்ததி வியாதி. அபி⁴ஸந்தி⁴புப்³ப³கதா செத்த² ந ஸக்கா படிக்கி²பிதுங் ததா² ததா² அபி⁴ஸந்தி⁴யா யாதனதோ, ததோ ஏவ ந ஸங்கா⁴டபப்³ப³தாதீ³ஹி அனேகந்திகதா. யே பன வத³ந்தி ‘‘பூ⁴தவிஸேஸா ஏவ தே வண்ணஸண்டா²னாதி³விஸேஸவந்தோ பே⁴ரவாகாரா நரகபாலாதி ஸமஞ்ஞங் லப⁴ந்தீ’’தி, தத³ஸித்³த⁴ங். உஜுகமேவ பாளியங் ‘‘அத்தி² நிரயே நிரயபாலா’’தி வாத³ஸ்ஸ பதிட்டா²பிதத்தா.
Kathamaññagatikehi aññagatikabādhananti ca na vattabbaṃ aññatthāpi tathā dassanato. Yaṃ paneke vadanti ‘‘asattasabhāvā nirayapālā nirayasunakhādayo cā’’ti, taṃ tesaṃ matimattaṃ aññattha tathā adassanato. Na hi kāci atthi tādisī dhammappavatti, yā asattasabhāvā, sampatisattehi appayojitā ca atthakiccaṃ sādhentī diṭṭhapubbā. Petānaṃ pānīyanivārakānaṃ daṇḍādihatthapurisānampi asattabhāve visesakāraṇaṃ natthi. Supinūpaghātopi atthakiccasamatthatāya appamāṇaṃ dassanādimattenapi tadatthasiddhito. Tathā hi supine āhārūpabhogādinā na atthasiddhi atthi, nimmānarūpaṃ panettha laddhaparihāraṃ iddhivisayassa acinteyyabhāvato. Idhāpi kammavipākassa acinteyyabhāvatoti ce? Taṃ na, asiddhattā. Nerayikānaṃ kammavipāko nirayapālāti asiddhametaṃ, vuttanayena pana nesaṃ sattabhāvo eva siddho. Sakkā hi vattuṃ sattasaṅkhātā nirayapālasaññitā dhammappavatti sābhisandhikā parūpaghāti atthakiccasabbhāvato ojāhārādirakkhasasantati viyāti. Abhisandhipubbakatā cettha na sakkā paṭikkhipituṃ tathā tathā abhisandhiyā yātanato, tato eva na saṅghāṭapabbatādīhi anekantikatā. Ye pana vadanti ‘‘bhūtavisesā eva te vaṇṇasaṇṭhānādivisesavanto bheravākārā narakapālāti samaññaṃ labhantī’’ti, tadasiddhaṃ. Ujukameva pāḷiyaṃ ‘‘atthi niraye nirayapālā’’ti vādassa patiṭṭhāpitattā.
அபிச யதா² அரியவினயே நரகபாலானங் பூ⁴தமத்ததா அஸித்³தா⁴, ததா² பஞ்ஞத்திமத்தவாதி³னோபி தேஸங் பூ⁴தமத்ததா அஸித்³தா⁴வ. ந ஹி தஸ்ஸ பூ⁴தானி நாம ஸந்தி. யதி³ பரமத்த²ங் க³ஹெத்வா வோஹரதி, அத² கஸ்மா வேத³னாதி³கே ஏவ படிக்கி²பதீதி? திட்ட²தேஸா அனவட்டி²ததக்கானங் அப்பஹீனஸம்மோஹவிபல்லாஸானங் வாத³வீமங்ஸா, ஏவங் அத்தே²வ நிரயபாலாதி நிட்ட²மெத்த² க³ந்தப்³ப³ங். ஸதி ச நேஸங் ஸப்³பா⁴வே, அஸதிபி பா³ஹிரே விஸயே நரகே விய தே³ஸாதி³னியமோ ஹோதீதி வாதோ³ ந ஸிஜ்ஜ²தி ஏவாதி த³ட்ட²ப்³ப³ங்.
Apica yathā ariyavinaye narakapālānaṃ bhūtamattatā asiddhā, tathā paññattimattavādinopi tesaṃ bhūtamattatā asiddhāva. Na hi tassa bhūtāni nāma santi. Yadi paramatthaṃ gahetvā voharati, atha kasmā vedanādike eva paṭikkhipatīti? Tiṭṭhatesā anavaṭṭhitatakkānaṃ appahīnasammohavipallāsānaṃ vādavīmaṃsā, evaṃ attheva nirayapālāti niṭṭhamettha gantabbaṃ. Sati ca nesaṃ sabbhāve, asatipi bāhire visaye narake viya desādiniyamo hotīti vādo na sijjhati evāti daṭṭhabbaṃ.
நிரயபாலகதா²வண்ணனா நிட்டி²தா.
Nirayapālakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (196) 3. நிரயபாலகதா² • (196) 3. Nirayapālakathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 3. நிரயபாலகதா²வண்ணனா • 3. Nirayapālakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 3. நிரயபாலகதா²வண்ணனா • 3. Nirayapālakathāvaṇṇanā
