| Library / Tipiṭaka / তিপিটক • Tipiṭaka / পঞ্চপকরণ-অনুটীকা • Pañcapakaraṇa-anuṭīkā |
৩. নিরযপালকথাৰণ্ণনা
3. Nirayapālakathāvaṇṇanā
৮৬৬-৮৬৮. নেরযিকে নিরযে পালেন্তি, ততো নিগ্গন্তুং অপ্পদানৰসেন রক্খন্তীতি নিরযপালা। নিরযপালতায ৰা নেরযিকানং নরকদুক্খেন পরিযোনদ্ধায অলং সমত্থাতি নিরযপালা। কিং পনেতে নিরযপালা নেরযিকা, উদাহু অনেরযিকাতি। কিঞ্চেত্থ – যদি তাৰ নেরযিকা, নিরযসংৰত্তনিযেন কম্মেন নিব্বত্তাতি সযম্পি নিরযদুক্খং পচ্চনুভৰেয্যুং, তথা সতি অঞ্ঞেসং নেরযিকানং যাতনায অসমত্থা সিযুং, ‘‘ইমে নেরযিকা, ইমে নিরযপালা’’তি ৰৰত্থানঞ্চ ন সিযা। যে চ যে যাতেন্তি, তেহি সমানরূপবলপ্পমাণেহি ইতরেসং ভযসন্তাসা ন সিযুং। অথ অনেরযিকা, তেসং তত্থ কথং সম্ভৰোতি? ৰুচ্চতে – অনেরযিকা নিরযপালা অনিরযগতিসংৰত্তনিযকম্মনিব্বত্তা। নিরযূপপত্তিসংৰত্তনিযকম্মতো হি অঞ্ঞেনেৰ কম্মুনা তে নিব্বত্তন্তি রক্খসজাতিকত্তা। তথা হি ৰদন্তি –
866-868. Nerayike niraye pālenti, tato niggantuṃ appadānavasena rakkhantīti nirayapālā. Nirayapālatāya vā nerayikānaṃ narakadukkhena pariyonaddhāya alaṃ samatthāti nirayapālā. Kiṃ panete nirayapālā nerayikā, udāhu anerayikāti. Kiñcettha – yadi tāva nerayikā, nirayasaṃvattaniyena kammena nibbattāti sayampi nirayadukkhaṃ paccanubhaveyyuṃ, tathā sati aññesaṃ nerayikānaṃ yātanāya asamatthā siyuṃ, ‘‘ime nerayikā, ime nirayapālā’’ti vavatthānañca na siyā. Ye ca ye yātenti, tehi samānarūpabalappamāṇehi itaresaṃ bhayasantāsā na siyuṃ. Atha anerayikā, tesaṃ tattha kathaṃ sambhavoti? Vuccate – anerayikā nirayapālā anirayagatisaṃvattaniyakammanibbattā. Nirayūpapattisaṃvattaniyakammato hi aññeneva kammunā te nibbattanti rakkhasajātikattā. Tathā hi vadanti –
‘‘কোধনা কুরূরকম্মন্তা, পাপাভিরুচিনো তথা।
‘‘Kodhanā kurūrakammantā, pāpābhirucino tathā;
দুক্খিতেসু চ নন্দন্তি, জাযন্তি যমরক্খসা’’তি॥
Dukkhitesu ca nandanti, jāyanti yamarakkhasā’’ti.
তত্থ যদেকে ৰদন্তি ‘‘যাতনাদুক্খস্স অপ্পটিসংৰেদনতো, অঞ্ঞথা পুন অঞ্ঞমঞ্ঞং যাতেয্যু’’ন্তি চ এৰমাদি, তযিদং আকাসরোমট্ঠনং নিরযপালানং নেরযিকভাৰস্সেৰ অভাৰতো। যে পন ৰদেয্যুং – যদিপি অনেরযিকা নিরযপালা, অযোমযায পন আদিত্তায সম্পজ্জলিতায সজোতিভূতায নিরযভূমিযা পরিৰত্তমানা কথং নাম দুক্খং নানুভৰন্তীতি? কম্মানুভাৰতো। যথা হি ইদ্ধিমন্তো চেতোৰসিপ্পত্তা মহামোগ্গল্লানাদযো নেরযিকে অনুকম্পন্তা ইদ্ধিবলেন নিরযভূমিং উপগতা তত্থ দাহদুক্খেন ন বাধীযন্তি, এৰং সম্পদমিদং দট্ঠব্বং।
Tattha yadeke vadanti ‘‘yātanādukkhassa appaṭisaṃvedanato, aññathā puna aññamaññaṃ yāteyyu’’nti ca evamādi, tayidaṃ ākāsaromaṭṭhanaṃ nirayapālānaṃ nerayikabhāvasseva abhāvato. Ye pana vadeyyuṃ – yadipi anerayikā nirayapālā, ayomayāya pana ādittāya sampajjalitāya sajotibhūtāya nirayabhūmiyā parivattamānā kathaṃ nāma dukkhaṃ nānubhavantīti? Kammānubhāvato. Yathā hi iddhimanto cetovasippattā mahāmoggallānādayo nerayike anukampantā iddhibalena nirayabhūmiṃ upagatā tattha dāhadukkhena na bādhīyanti, evaṃ sampadamidaṃ daṭṭhabbaṃ.
তং ইদ্ধিৰিসযস্স অচিন্তেয্যভাৰতোতি চে? ইদম্পি তংসমানং কম্মৰিপাকস্স অচিন্তেয্যভাৰতো। তথারূপেন হি কম্মুনা তে নিব্বত্তা যথা নিরযদুক্খেন অবাধিতা এৰ হুত্ৰা নেরযিকে যাতেন্তি, ন চেত্তকেন বাহিরৰিসযাভাৰো ৰিজ্জতি ইট্ঠানিট্ঠতায পচ্চেকং দ্ৰারপুরিসেসু ৰিভত্তসভাৰত্তা। তথা হি একচ্চস্স দ্ৰারস্স পুরিসস্স ইট্ঠং একচ্চস্স অনিট্ঠং, একচ্চস্স চ অনিট্ঠং একচ্চস্স ইট্ঠং হোতি। এৰঞ্চ কত্ৰা যদেকে ৰদন্তি ‘‘নত্থি কম্মৰসেন তেজসা পরূপতাপন’’ন্তিআদি, তদপাহতং হোতি। যং পন ৰদন্তি ‘‘অনেরযিকানং তেসং কথং তত্থ সম্ভৰো’’তি নেরযিকানং যাতকভাৰতো। নেরযিকসত্তযাতনাযোগ্গঞ্হি অত্তভাৰং নিব্বত্তেন্তং কম্মং তাদিসনিকন্তিৰিনামিতং নিরযট্ঠানেযেৰ নিব্বত্তেতি। তে চ নেরযিকেহি অধিকতরবলারোহপরিণাহা অতিৰিয ভযানকসন্তাসকুরূরতরপযোগা চ হোন্তি। এতেনেৰ তত্থ কাকসুনখাদীনম্পি নিব্বত্তি সংৰণ্ণিতাতি দট্ঠব্বং।
Taṃ iddhivisayassa acinteyyabhāvatoti ce? Idampi taṃsamānaṃ kammavipākassa acinteyyabhāvato. Tathārūpena hi kammunā te nibbattā yathā nirayadukkhena abādhitā eva hutvā nerayike yātenti, na cettakena bāhiravisayābhāvo vijjati iṭṭhāniṭṭhatāya paccekaṃ dvārapurisesu vibhattasabhāvattā. Tathā hi ekaccassa dvārassa purisassa iṭṭhaṃ ekaccassa aniṭṭhaṃ, ekaccassa ca aniṭṭhaṃ ekaccassa iṭṭhaṃ hoti. Evañca katvā yadeke vadanti ‘‘natthi kammavasena tejasā parūpatāpana’’ntiādi, tadapāhataṃ hoti. Yaṃ pana vadanti ‘‘anerayikānaṃ tesaṃ kathaṃ tattha sambhavo’’ti nerayikānaṃ yātakabhāvato. Nerayikasattayātanāyoggañhi attabhāvaṃ nibbattentaṃ kammaṃ tādisanikantivināmitaṃ nirayaṭṭhāneyeva nibbatteti. Te ca nerayikehi adhikatarabalārohapariṇāhā ativiya bhayānakasantāsakurūratarapayogā ca honti. Eteneva tattha kākasunakhādīnampi nibbatti saṃvaṇṇitāti daṭṭhabbaṃ.
কথমঞ্ঞগতিকেহি অঞ্ঞগতিকবাধনন্তি চ ন ৰত্তব্বং অঞ্ঞত্থাপি তথা দস্সনতো। যং পনেকে ৰদন্তি ‘‘অসত্তসভাৰা নিরযপালা নিরযসুনখাদযো চা’’তি, তং তেসং মতিমত্তং অঞ্ঞত্থ তথা অদস্সনতো। ন হি কাচি অত্থি তাদিসী ধম্মপ্পৰত্তি, যা অসত্তসভাৰা, সম্পতিসত্তেহি অপ্পযোজিতা চ অত্থকিচ্চং সাধেন্তী দিট্ঠপুব্বা। পেতানং পানীযনিৰারকানং দণ্ডাদিহত্থপুরিসানম্পি অসত্তভাৰে ৰিসেসকারণং নত্থি। সুপিনূপঘাতোপি অত্থকিচ্চসমত্থতায অপ্পমাণং দস্সনাদিমত্তেনপি তদত্থসিদ্ধিতো। তথা হি সুপিনে আহারূপভোগাদিনা ন অত্থসিদ্ধি অত্থি, নিম্মানরূপং পনেত্থ লদ্ধপরিহারং ইদ্ধিৰিসযস্স অচিন্তেয্যভাৰতো। ইধাপি কম্মৰিপাকস্স অচিন্তেয্যভাৰতোতি চে? তং ন, অসিদ্ধত্তা। নেরযিকানং কম্মৰিপাকো নিরযপালাতি অসিদ্ধমেতং, ৰুত্তনযেন পন নেসং সত্তভাৰো এৰ সিদ্ধো। সক্কা হি ৰত্তুং সত্তসঙ্খাতা নিরযপালসঞ্ঞিতা ধম্মপ্পৰত্তি সাভিসন্ধিকা পরূপঘাতি অত্থকিচ্চসব্ভাৰতো ওজাহারাদিরক্খসসন্ততি ৰিযাতি। অভিসন্ধিপুব্বকতা চেত্থ ন সক্কা পটিক্খিপিতুং তথা তথা অভিসন্ধিযা যাতনতো, ততো এৰ ন সঙ্ঘাটপব্বতাদীহি অনেকন্তিকতা। যে পন ৰদন্তি ‘‘ভূতৰিসেসা এৰ তে ৰণ্ণসণ্ঠানাদিৰিসেসৰন্তো ভেরৰাকারা নরকপালাতি সমঞ্ঞং লভন্তী’’তি, তদসিদ্ধং। উজুকমেৰ পাল়িযং ‘‘অত্থি নিরযে নিরযপালা’’তি ৰাদস্স পতিট্ঠাপিতত্তা।
Kathamaññagatikehi aññagatikabādhananti ca na vattabbaṃ aññatthāpi tathā dassanato. Yaṃ paneke vadanti ‘‘asattasabhāvā nirayapālā nirayasunakhādayo cā’’ti, taṃ tesaṃ matimattaṃ aññattha tathā adassanato. Na hi kāci atthi tādisī dhammappavatti, yā asattasabhāvā, sampatisattehi appayojitā ca atthakiccaṃ sādhentī diṭṭhapubbā. Petānaṃ pānīyanivārakānaṃ daṇḍādihatthapurisānampi asattabhāve visesakāraṇaṃ natthi. Supinūpaghātopi atthakiccasamatthatāya appamāṇaṃ dassanādimattenapi tadatthasiddhito. Tathā hi supine āhārūpabhogādinā na atthasiddhi atthi, nimmānarūpaṃ panettha laddhaparihāraṃ iddhivisayassa acinteyyabhāvato. Idhāpi kammavipākassa acinteyyabhāvatoti ce? Taṃ na, asiddhattā. Nerayikānaṃ kammavipāko nirayapālāti asiddhametaṃ, vuttanayena pana nesaṃ sattabhāvo eva siddho. Sakkā hi vattuṃ sattasaṅkhātā nirayapālasaññitā dhammappavatti sābhisandhikā parūpaghāti atthakiccasabbhāvato ojāhārādirakkhasasantati viyāti. Abhisandhipubbakatā cettha na sakkā paṭikkhipituṃ tathā tathā abhisandhiyā yātanato, tato eva na saṅghāṭapabbatādīhi anekantikatā. Ye pana vadanti ‘‘bhūtavisesā eva te vaṇṇasaṇṭhānādivisesavanto bheravākārā narakapālāti samaññaṃ labhantī’’ti, tadasiddhaṃ. Ujukameva pāḷiyaṃ ‘‘atthi niraye nirayapālā’’ti vādassa patiṭṭhāpitattā.
অপিচ যথা অরিযৰিনযে নরকপালানং ভূতমত্ততা অসিদ্ধা, তথা পঞ্ঞত্তিমত্তৰাদিনোপি তেসং ভূতমত্ততা অসিদ্ধাৰ। ন হি তস্স ভূতানি নাম সন্তি। যদি পরমত্থং গহেত্ৰা ৰোহরতি, অথ কস্মা ৰেদনাদিকে এৰ পটিক্খিপতীতি? তিট্ঠতেসা অনৰট্ঠিততক্কানং অপ্পহীনসম্মোহৰিপল্লাসানং ৰাদৰীমংসা, এৰং অত্থেৰ নিরযপালাতি নিট্ঠমেত্থ গন্তব্বং। সতি চ নেসং সব্ভাৰে, অসতিপি বাহিরে ৰিসযে নরকে ৰিয দেসাদিনিযমো হোতীতি ৰাদো ন সিজ্ঝতি এৰাতি দট্ঠব্বং।
Apica yathā ariyavinaye narakapālānaṃ bhūtamattatā asiddhā, tathā paññattimattavādinopi tesaṃ bhūtamattatā asiddhāva. Na hi tassa bhūtāni nāma santi. Yadi paramatthaṃ gahetvā voharati, atha kasmā vedanādike eva paṭikkhipatīti? Tiṭṭhatesā anavaṭṭhitatakkānaṃ appahīnasammohavipallāsānaṃ vādavīmaṃsā, evaṃ attheva nirayapālāti niṭṭhamettha gantabbaṃ. Sati ca nesaṃ sabbhāve, asatipi bāhire visaye narake viya desādiniyamo hotīti vādo na sijjhati evāti daṭṭhabbaṃ.
নিরযপালকথাৰণ্ণনা নিট্ঠিতা।
Nirayapālakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১৯৬) ৩. নিরযপালকথা • (196) 3. Nirayapālakathā
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৩. নিরযপালকথাৰণ্ণনা • 3. Nirayapālakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৩. নিরযপালকথাৰণ্ণনা • 3. Nirayapālakathāvaṇṇanā
