| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၃. နိရယပာလကထာဝဏ္ဏနာ
3. Nirayapālakathāvaṇṇanā
၈၆၆. ဣဒာနိ နိရယပာလကထာ နာမ ဟောတိ။ တတ္ထ ‘‘နိရယေ နေရယိကကမ္မာနေဝ နိရယပာလရူပဝသေန ဝဓေန္တိ, နတ္ထိ နိရယပာလာ နာမ သတ္တာ’’တိ ယေသံ လဒ္ဓိ, သေယ္ယထာပိ အန္ဓကာနံ; တေ သန္ဓာယ ပုစ္ဆာ သကဝာဒိသ္သ, ပဋိညာ ဣတရသ္သ။ အထ နံ ‘‘ယဒိ တတ္ထ နိရယပာလာ န သိယုံ, ကမ္မကာရဏာပိ န ဘဝေယ္ယုံ။ ကာရဏိကေသု ဟိ သတိ ကာရဏာ’’တိ စောဒေတုံ နတ္ထိ နိရယေသူတိအာဒိမာဟ။
866. Idāni nirayapālakathā nāma hoti. Tattha ‘‘niraye nerayikakammāneva nirayapālarūpavasena vadhenti, natthi nirayapālā nāma sattā’’ti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Atha naṃ ‘‘yadi tattha nirayapālā na siyuṃ, kammakāraṇāpi na bhaveyyuṃ. Kāraṇikesu hi sati kāraṇā’’ti codetuṃ natthi nirayesūtiādimāha.
၈၆၇-၈၆၈. အတ္ထိ မနုသ္သေသူတိ ပစ္စက္ခေန ဉာပနတ္ထံ။ ယထာ ဟိ မနုသ္သေသု သတိ ကာရဏိကေသု ကာရဏာ, ဧဝံ တတ္ထာပီတိ အယမေတ္ထ အဓိပ္ပာယော။ အတ္ထိ နိရယေသူတိ ပုစ္ဆာ ပရဝာဒိသ္သ, ပဋိညာ ဣတရသ္သ။ န ဝေသ္သဘူ နောပိ စ ပေတ္တိရာဇာတိ ပရဝာဒိနာ သကသမယတော သုတ္တံ အာဘတံ။ တံ ပန သာသနာဝစရိကန္တိ သကဝာဒိနာ အနုညာတံ။ တတ္ထ ဝေသ္သဘူတိ ဧကော ဒေဝော။ ပေတ္တိရာဇာတိ ပေတ္တိဝိသယေ ပေတမဟိဒ္ဓိကော။ သောမာဒယော ပာကဋာ ဧဝ။ ဣဒံ ဝုတ္တံ ဟောတိ – အတ္တနော ကမ္မေဟိ ဣတော ပဏုန္နံ ပရလောကံ ပတ္တံ ပုရိသံ န ဧတေ ဝေသ္သဘူအာဒယော ဟနန္တိ။ ယေဟိ ပန သော ကမ္မေဟိ တတ္ထ ပဏုန္နော, တာနိ သကာနိ ကမ္မာနိယေဝ နံ တတ္ထ ဟနန္တီတိ ကမ္မသ္သကတံ ဒီပေတိ, န နိရယပာလာနံ အဘာဝံ။ သကဝာဒိနာ ပန တမေနံ, ဘိက္ခဝေတိ အာဘတာနိ သုတ္တပဒာနိ နီတတ္ထာနေဝာတိ။
867-868. Atthi manussesūti paccakkhena ñāpanatthaṃ. Yathā hi manussesu sati kāraṇikesu kāraṇā, evaṃ tatthāpīti ayamettha adhippāyo. Atthi nirayesūti pucchā paravādissa, paṭiññā itarassa. Na vessabhū nopi ca pettirājāti paravādinā sakasamayato suttaṃ ābhataṃ. Taṃ pana sāsanāvacarikanti sakavādinā anuññātaṃ. Tattha vessabhūti eko devo. Pettirājāti pettivisaye petamahiddhiko. Somādayo pākaṭā eva. Idaṃ vuttaṃ hoti – attano kammehi ito paṇunnaṃ paralokaṃ pattaṃ purisaṃ na ete vessabhūādayo hananti. Yehi pana so kammehi tattha paṇunno, tāni sakāni kammāniyeva naṃ tattha hanantīti kammassakataṃ dīpeti, na nirayapālānaṃ abhāvaṃ. Sakavādinā pana tamenaṃ, bhikkhaveti ābhatāni suttapadāni nītatthānevāti.
နိရယပာလကထာဝဏ္ဏနာ။
Nirayapālakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၉၆) ၃. နိရယပာလကထာ • (196) 3. Nirayapālakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၃. နိရယပာလကထာဝဏ္ဏနာ • 3. Nirayapālakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၃. နိရယပာလကထာဝဏ္ဏနာ • 3. Nirayapālakathāvaṇṇanā
