| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༣. ནིརཡཔཱལཀཐཱཝཎྞནཱ
3. Nirayapālakathāvaṇṇanā
༨༦༦. ཨིདཱནི ནིརཡཔཱལཀཐཱ ནཱམ ཧོཏི། ཏཏྠ ‘‘ནིརཡེ ནེརཡིཀཀམྨཱནེཝ ནིརཡཔཱལརཱུཔཝསེན ཝདྷེནྟི, ནཏྠི ནིརཡཔཱལཱ ནཱམ སཏྟཱ’’ཏི ཡེསཾ ལདྡྷི, སེཡྻཐཱཔི ཨནྡྷཀཱནཾ; ཏེ སནྡྷཱཡ པུཙྪཱ སཀཝཱདིསྶ, པཊིཉྙཱ ཨིཏརསྶ། ཨཐ ནཾ ‘‘ཡདི ཏཏྠ ནིརཡཔཱལཱ ན སིཡུཾ, ཀམྨཀཱརཎཱཔི ན བྷཝེཡྻུཾ། ཀཱརཎིཀེསུ ཧི སཏི ཀཱརཎཱ’’ཏི ཙོདེཏུཾ ནཏྠི ནིརཡེསཱུཏིཨཱདིམཱཧ།
866. Idāni nirayapālakathā nāma hoti. Tattha ‘‘niraye nerayikakammāneva nirayapālarūpavasena vadhenti, natthi nirayapālā nāma sattā’’ti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Atha naṃ ‘‘yadi tattha nirayapālā na siyuṃ, kammakāraṇāpi na bhaveyyuṃ. Kāraṇikesu hi sati kāraṇā’’ti codetuṃ natthi nirayesūtiādimāha.
༨༦༧-༨༦༨. ཨཏྠི མནུསྶེསཱུཏི པཙྩཀྑེན ཉཱཔནཏྠཾ། ཡཐཱ ཧི མནུསྶེསུ སཏི ཀཱརཎིཀེསུ ཀཱརཎཱ, ཨེཝཾ ཏཏྠཱཔཱིཏི ཨཡམེཏྠ ཨདྷིཔྤཱཡོ། ཨཏྠི ནིརཡེསཱུཏི པུཙྪཱ པརཝཱདིསྶ, པཊིཉྙཱ ཨིཏརསྶ། ན ཝེསྶབྷཱུ ནོཔི ཙ པེཏྟིརཱཛཱཏི པརཝཱདིནཱ སཀསམཡཏོ སུཏྟཾ ཨཱབྷཏཾ། ཏཾ པན སཱསནཱཝཙརིཀནྟི སཀཝཱདིནཱ ཨནུཉྙཱཏཾ། ཏཏྠ ཝེསྶབྷཱུཏི ཨེཀོ དེཝོ། པེཏྟིརཱཛཱཏི པེཏྟིཝིསཡེ པེཏམཧིདྡྷིཀོ། སོམཱདཡོ པཱཀཊཱ ཨེཝ། ཨིདཾ ཝུཏྟཾ ཧོཏི – ཨཏྟནོ ཀམྨེཧི ཨིཏོ པཎུནྣཾ པརལོཀཾ པཏྟཾ པུརིསཾ ན ཨེཏེ ཝེསྶབྷཱུཨཱདཡོ ཧནནྟི། ཡེཧི པན སོ ཀམྨེཧི ཏཏྠ པཎུནྣོ, ཏཱནི སཀཱནི ཀམྨཱནིཡེཝ ནཾ ཏཏྠ ཧནནྟཱིཏི ཀམྨསྶཀཏཾ དཱིཔེཏི, ན ནིརཡཔཱལཱནཾ ཨབྷཱཝཾ། སཀཝཱདིནཱ པན ཏམེནཾ, བྷིཀྑཝེཏི ཨཱབྷཏཱནི སུཏྟཔདཱནི ནཱིཏཏྠཱནེཝཱཏི།
867-868. Atthi manussesūti paccakkhena ñāpanatthaṃ. Yathā hi manussesu sati kāraṇikesu kāraṇā, evaṃ tatthāpīti ayamettha adhippāyo. Atthi nirayesūti pucchā paravādissa, paṭiññā itarassa. Na vessabhū nopi ca pettirājāti paravādinā sakasamayato suttaṃ ābhataṃ. Taṃ pana sāsanāvacarikanti sakavādinā anuññātaṃ. Tattha vessabhūti eko devo. Pettirājāti pettivisaye petamahiddhiko. Somādayo pākaṭā eva. Idaṃ vuttaṃ hoti – attano kammehi ito paṇunnaṃ paralokaṃ pattaṃ purisaṃ na ete vessabhūādayo hananti. Yehi pana so kammehi tattha paṇunno, tāni sakāni kammāniyeva naṃ tattha hanantīti kammassakataṃ dīpeti, na nirayapālānaṃ abhāvaṃ. Sakavādinā pana tamenaṃ, bhikkhaveti ābhatāni suttapadāni nītatthānevāti.
ནིརཡཔཱལཀཐཱཝཎྞནཱ།
Nirayapālakathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༡༩༦) ༣. ནིརཡཔཱལཀཐཱ • (196) 3. Nirayapālakathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༣. ནིརཡཔཱལཀཐཱཝཎྞནཱ • 3. Nirayapālakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༣. ནིརཡཔཱལཀཐཱཝཎྞནཱ • 3. Nirayapālakathāvaṇṇanā
