| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
10. த³ஸமவக்³கோ³
10. Dasamavaggo
1. நிரோத⁴கதா²வண்ணனா
1. Nirodhakathāvaṇṇanā
571-572. இதா³னி நிரோத⁴கதா² நாம ஹோதி. தத்த² யேஸங் ‘‘உபபத்தேஸியந்தி ஸங்க²ங் க³தஸ்ஸ ப⁴வங்க³சித்தஸ்ஸ ப⁴ங்க³க்க²ணேன ஸஹேவ கிரியாதி ஸங்க²ங் க³தா குஸலா வா அகுஸலா வா சத்தாரோ க²ந்தா⁴ சித்தஸமுட்டா²னரூபஞ்சாதி பஞ்சக்க²ந்தா⁴ உப்பஜ்ஜந்தி. தேஸு ஹி அனுப்பன்னேஸு ப⁴வங்கே³ நிருத்³தே⁴ ஸந்ததிவிச்சே²தோ³ ப⁴வெய்யா’’தி லத்³தி⁴, ஸெய்யதா²பி அந்த⁴கானங்; தே ஸந்தா⁴ய உபபத்தேஸியேதி புச்சா² ஸகவாதி³ஸ்ஸ, படிஞ்ஞா இதரஸ்ஸ. தத்த² உபபத்தேஸியேதி சதூஸுபி பதே³ஸு ப³ஹுவசனபு⁴ம்மத்தே² ஏகவசனபு⁴ம்மங். உபபத்தேஸியேஸு பஞ்சஸு க²ந்தே⁴ஸு அனிருத்³தே⁴ஸூதி அயஞ்ஹெத்த² அத்தோ². த³ஸன்னந்தி உபபத்தேஸியக²ந்தா⁴னஞ்ச கிரியக²ந்தா⁴னஞ்ச வஸேன வுத்தங். தத்த² பட²மபஞ்ஹே க²ந்த⁴லக்க²ணவஸேன கிரியவஸேன ச பஞ்சேவ நாம தே க²ந்தா⁴தி படிக்கி²பதி. து³தியபஞ்ஹே புரிமபச்சி²மவஸேன உபபத்தேஸியகிரியவஸேன ச நானத்தங் ஸந்தா⁴ய படிஜானாதி. த்³வின்னங் பன ப²ஸ்ஸானங் சித்தானஞ்ச ஸமோதா⁴னங் புட்டோ² ஸுத்தலேஸாபா⁴வேன படிக்கி²பதி.
571-572. Idāni nirodhakathā nāma hoti. Tattha yesaṃ ‘‘upapattesiyanti saṅkhaṃ gatassa bhavaṅgacittassa bhaṅgakkhaṇena saheva kiriyāti saṅkhaṃ gatā kusalā vā akusalā vā cattāro khandhā cittasamuṭṭhānarūpañcāti pañcakkhandhā uppajjanti. Tesu hi anuppannesu bhavaṅge niruddhe santativicchedo bhaveyyā’’ti laddhi, seyyathāpi andhakānaṃ; te sandhāya upapattesiyeti pucchā sakavādissa, paṭiññā itarassa. Tattha upapattesiyeti catūsupi padesu bahuvacanabhummatthe ekavacanabhummaṃ. Upapattesiyesu pañcasu khandhesu aniruddhesūti ayañhettha attho. Dasannanti upapattesiyakhandhānañca kiriyakhandhānañca vasena vuttaṃ. Tattha paṭhamapañhe khandhalakkhaṇavasena kiriyavasena ca pañceva nāma te khandhāti paṭikkhipati. Dutiyapañhe purimapacchimavasena upapattesiyakiriyavasena ca nānattaṃ sandhāya paṭijānāti. Dvinnaṃ pana phassānaṃ cittānañca samodhānaṃ puṭṭho suttalesābhāvena paṭikkhipati.
கிரியா சத்தாரோதி ரூபேன வினா குஸலா அகுஸலா வா சத்தாரோ க³ஹிதா. கிரியாஞாணந்தி பரவாதி³னா சக்கு²விஞ்ஞாணஸமங்கி³க்க²ணே அரஹதோ அனுஞ்ஞாதங் அனாரம்மணஞாணங். நிருத்³தே⁴ மக்³கோ³ உப்பஜ்ஜதீதி புச்சா² பரவாதி³ஸ்ஸ, அனிருத்³தே⁴ அனுப்பஜ்ஜனதோ படிஞ்ஞா ஸகவாதி³ஸ்ஸ. மதோ மக்³க³ங் பா⁴வேதீதி ச²லேன புச்சா² பரவாதி³ஸ்ஸ. யஸ்மா பன படிஸந்தி⁴தோ யாவ சுதிசித்தா ஸத்தோ ஜீவதியேவ நாம, தஸ்மா ஸகவாதீ³ ந ஹேவந்தி படிக்கி²பதி.
Kiriyā cattāroti rūpena vinā kusalā akusalā vā cattāro gahitā. Kiriyāñāṇanti paravādinā cakkhuviññāṇasamaṅgikkhaṇe arahato anuññātaṃ anārammaṇañāṇaṃ. Niruddhe maggo uppajjatīti pucchā paravādissa, aniruddhe anuppajjanato paṭiññā sakavādissa. Mato maggaṃ bhāvetīti chalena pucchā paravādissa. Yasmā pana paṭisandhito yāva cuticittā satto jīvatiyeva nāma, tasmā sakavādī na hevanti paṭikkhipati.
நிரோத⁴கதா²வண்ணனா.
Nirodhakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (95) 1. நிரோத⁴கதா² • (95) 1. Nirodhakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 1. நிரோத⁴கதா²வண்ணனா • 1. Nirodhakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 1. நிரோத⁴கதா²வண்ணனா • 1. Nirodhakathāvaṇṇanā
