| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১১. নিরোধকথাৰণ্ণনা
11. Nirodhakathāvaṇṇanā
৩৫৩. ইদানি নিরোধকথা নাম হোতি। তত্থ যেসং অপ্পটিসঙ্খানিরোধঞ্চ পটিসঙ্খানিরোধঞ্চ দ্ৰেপি একতো কত্ৰা নিরোধসচ্চন্তি লদ্ধি, সেয্যথাপি এতরহি মহিসাসকানঞ্চেৰ অন্ধকানঞ্চ; তে সন্ধায দ্ৰে নিরোধাতি পুচ্ছা সকৰাদিস্স, পটিঞ্ঞা পরৰাদিস্স । দ্ৰে দুক্খনিরোধাতি পঞ্হেসু যস্মা দ্ৰে দুক্খসচ্চানি ন ইচ্ছতি, তস্মা পটিক্খিপতি। যস্মা দ্ৰীহাকারেহি দুক্খং নিরুজ্ঝতীতি ইচ্ছতি, তস্মা পটিজানাতি। দ্ৰে নিরোধসচ্চানীতিপঞ্হেসু দ্ৰিন্নং দুক্খসচ্চানং নিরোধৰসেনঅনিচ্ছন্তো পটিক্খিপতি। দ্ৰীহাকারেহি দুক্খস্স নিরুজ্ঝনতো পটিজানাতি। দ্ৰে তাণানীতিআদীসুপি এসেৰ নযো।
353. Idāni nirodhakathā nāma hoti. Tattha yesaṃ appaṭisaṅkhānirodhañca paṭisaṅkhānirodhañca dvepi ekato katvā nirodhasaccanti laddhi, seyyathāpi etarahi mahisāsakānañceva andhakānañca; te sandhāya dve nirodhāti pucchā sakavādissa, paṭiññā paravādissa . Dve dukkhanirodhāti pañhesu yasmā dve dukkhasaccāni na icchati, tasmā paṭikkhipati. Yasmā dvīhākārehi dukkhaṃ nirujjhatīti icchati, tasmā paṭijānāti. Dve nirodhasaccānītipañhesu dvinnaṃ dukkhasaccānaṃ nirodhavasenaanicchanto paṭikkhipati. Dvīhākārehi dukkhassa nirujjhanato paṭijānāti. Dve tāṇānītiādīsupi eseva nayo.
অত্থি দ্ৰিন্নং নিব্বানানন্তিআদীসু পুচ্ছাসু উচ্চনীচতাদীনি অপস্সন্তো পটিক্খিপতি।
Atthi dvinnaṃ nibbānānantiādīsu pucchāsu uccanīcatādīni apassanto paṭikkhipati.
অপ্পটিসঙ্খানিরুদ্ধেতি যে পটিসঙ্খায লোকুত্তরেন ঞাণেন অনিরুদ্ধা সুদ্ধপকতিকত্তা ৰা উদ্দেসপরিপুচ্ছাদীনং ৰা ৰসেন ন সমুদাচরণতো নিরুদ্ধাতি ৰুচ্চন্তি, তে সঙ্খারে। পটিসঙ্খা নিরোধেন্তীতি। লোকুত্তরঞাণেন নিরোধেন্তি অনুপ্পত্তিভাৰং গমেন্তি। ননু অপ্পটিসঙ্খানিরুদ্ধা সঙ্খারাতি পুচ্ছা পরৰাদিস্স । তত্থ ভগ্গানং পুন অভঞ্জনতো অপ্পটিসঙ্খানিরুদ্ধানং ৰা অরিযমগ্গে উপ্পন্নে তথা নিরুজ্ঝনতোৰ সকৰাদী অচ্চন্তভগ্গতং পটিজানাতি। সেসমেত্থ উত্তানত্থমেৰাতি।
Appaṭisaṅkhāniruddheti ye paṭisaṅkhāya lokuttarena ñāṇena aniruddhā suddhapakatikattā vā uddesaparipucchādīnaṃ vā vasena na samudācaraṇato niruddhāti vuccanti, te saṅkhāre. Paṭisaṅkhā nirodhentīti. Lokuttarañāṇena nirodhenti anuppattibhāvaṃ gamenti. Nanu appaṭisaṅkhāniruddhā saṅkhārāti pucchā paravādissa . Tattha bhaggānaṃ puna abhañjanato appaṭisaṅkhāniruddhānaṃ vā ariyamagge uppanne tathā nirujjhanatova sakavādī accantabhaggataṃ paṭijānāti. Sesamettha uttānatthamevāti.
নিরোধকথাৰণ্ণনা।
Nirodhakathāvaṇṇanā.
দুতিযো ৰগ্গো।
Dutiyo vaggo.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (২০) ১১. নিরোধকথা • (20) 11. Nirodhakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১১. নিরোধকথাৰণ্ণনা • 11. Nirodhakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১১. নিরোধকথাৰণ্ণনা • 11. Nirodhakathāvaṇṇanā
