| Library / Tipiṭaka / တိပိဋက • Tipiṭaka / ပဉ္စပကရဏ-အနုဋီကာ • Pañcapakaraṇa-anuṭīkā |
၁၀. ဒသမဝဂ္ဂော
10. Dasamavaggo
၁. နိရောဓကထာဝဏ္ဏနာ
1. Nirodhakathāvaṇṇanā
၅၇၁-၅၇၂. သကသမယေ ‘‘ပုရိမစိတ္တသ္သ နိရောဓာနန္တရံ ပစ္ဆိမစိတ္တံ ဥပ္ပဇ္ဇတီ’’တိ ဣစ္ဆိတံ, ပရဝာဒီ ပန ‘‘ယသ္မိံ ခဏေ ဘဝင္ဂစိတ္တံ, တသ္မိံယေဝ ခဏေ ကိရိယမယစိတ္တံ ဥပ္ပဇ္ဇတီ’’တိ ဝဒတိ။ ဧဝံ သတိ ပုရိမပစ္ဆိမစိတ္တာနံ သဟဘာဝောပိ အနုညာတော ဟောတိ။ တေနာဟ ‘‘ဘင္ဂက္ခဏေန သဟေဝာ’’တိ။ တထာ စ သတိ ဝိပာကကိရိယက္ခန္ဓာနံ ဝိယ ကိရိယဝိပာကက္ခန္ဓာနံ ဝိပာကဝိပာကက္ခန္ဓာနံ ကိရိယကိရိယက္ခန္ဓာနဉ္စ ဝုတ္တနယေန သဟဘာဝော ဝတ္တဗ္ဗောတိ ဣမမတ္ထံ ဒသ္သေန္တော ‘‘ဘဝင္ဂစိတ္တသ္သာ’’တိအာဒိမာဟ။ တတ္ထ ဥပပတ္တိဘဝဘာဝေန ဧသိယာ ဣစ္ဆိတဗ္ဗာတိ ဥပပတ္တေသိယာ ဝိပာကက္ခန္ဓာ, တေ စ ယေဘုယ္ယေန ဘဝင္ဂပရိယာယကာတိ အဋ္ဌကထာယံ ဝုတ္တံ ‘‘ဥပပတ္တေသိယန္တိ သင္ခံ ဂတသ္သ ဘဝင္ဂစိတ္တသ္သာ’’တိ။ အာဒိပရိယောသာနမတ္တဉ္ဟိ တသ္သ ပဋိသန္ဓိစုတိစိတ္တံ, တဒာရမ္မဏံ ဘဝင္ဂန္တ္ဝေဝ ဝုစ္စတီတိ။ စက္ခုဝိညာဏာဒီနံ ကိရိယာဝေမဇ္ဈေ ပတိတတ္တာ ကိရိယာစတုက္ခန္ဓဂ္ဂဟဏေန ဂဟဏံ ယုတ္တန္တိ ဝုတ္တံ။ စက္ခုဝိညာဏာဒီနန္တိ ဟိ အာဒိ-သဒ္ဒေန န သောတဝိညာဏာဒီနံယေဝ ဂဟဏံ, အထ ခော သမ္ပဋိစ္ဆနသန္တီရဏာနမ္ပီတိ ဒဋ္ဌဗ္ဗံ။
571-572. Sakasamaye ‘‘purimacittassa nirodhānantaraṃ pacchimacittaṃ uppajjatī’’ti icchitaṃ, paravādī pana ‘‘yasmiṃ khaṇe bhavaṅgacittaṃ, tasmiṃyeva khaṇe kiriyamayacittaṃ uppajjatī’’ti vadati. Evaṃ sati purimapacchimacittānaṃ sahabhāvopi anuññāto hoti. Tenāha ‘‘bhaṅgakkhaṇena sahevā’’ti. Tathā ca sati vipākakiriyakkhandhānaṃ viya kiriyavipākakkhandhānaṃ vipākavipākakkhandhānaṃ kiriyakiriyakkhandhānañca vuttanayena sahabhāvo vattabboti imamatthaṃ dassento ‘‘bhavaṅgacittassā’’tiādimāha. Tattha upapattibhavabhāvena esiyā icchitabbāti upapattesiyā vipākakkhandhā, te ca yebhuyyena bhavaṅgapariyāyakāti aṭṭhakathāyaṃ vuttaṃ ‘‘upapattesiyanti saṅkhaṃ gatassa bhavaṅgacittassā’’ti. Ādipariyosānamattañhi tassa paṭisandhicuticittaṃ, tadārammaṇaṃ bhavaṅgantveva vuccatīti. Cakkhuviññāṇādīnaṃ kiriyāvemajjhe patitattā kiriyācatukkhandhaggahaṇena gahaṇaṃ yuttanti vuttaṃ. Cakkhuviññāṇādīnanti hi ādi-saddena na sotaviññāṇādīnaṃyeva gahaṇaṃ, atha kho sampaṭicchanasantīraṇānampīti daṭṭhabbaṃ.
နိရောဓကထာဝဏ္ဏနာ နိဋ္ဌိတာ။
Nirodhakathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၉၅) ၁. နိရောဓကထာ • (95) 1. Nirodhakathā
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၁. နိရောဓကထာဝဏ္ဏနာ • 1. Nirodhakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁. နိရောဓကထာဝဏ္ဏနာ • 1. Nirodhakathāvaṇṇanā
