| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
11. නිරොධකථාවණ්‌ණනා
11. Nirodhakathāvaṇṇanā
353. ඉදානි නිරොධකථා නාම හොති. තත්‌ථ යෙසං අප්‌පටිසඞ්‌ඛානිරොධඤ්‌ච පටිසඞ්‌ඛානිරොධඤ්‌ච ද්‌වෙපි එකතො කත්‌වා නිරොධසච්‌චන්‌ති ලද්‌ධි, සෙය්‍යථාපි එතරහි මහිසාසකානඤ්‌චෙව අන්‌ධකානඤ්‌ච; තෙ සන්‌ධාය ද්‌වෙ නිරොධාති පුච්‌ඡා සකවාදිස්‌ස, පටිඤ්‌ඤා පරවාදිස්‌ස . ද්‌වෙ දුක්‌ඛනිරොධාති පඤ්‌හෙසු යස්‌මා ද්‌වෙ දුක්‌ඛසච්‌චානි න ඉච්‌ඡති, තස්‌මා පටික්‌ඛිපති. යස්‌මා ද්‌වීහාකාරෙහි දුක්‌ඛං නිරුජ්‌ඣතීති ඉච්‌ඡති, තස්‌මා පටිජානාති. ද්‌වෙ නිරොධසච්‌චානීතිපඤ්‌හෙසු ද්‌වින්‌නං දුක්‌ඛසච්‌චානං නිරොධවසෙනඅනිච්‌ඡන්‌තො පටික්‌ඛිපති. ද්‌වීහාකාරෙහි දුක්‌ඛස්‌ස නිරුජ්‌ඣනතො පටිජානාති. ද්‌වෙ තාණානීතිආදීසුපි එසෙව නයො.
353. Idāni nirodhakathā nāma hoti. Tattha yesaṃ appaṭisaṅkhānirodhañca paṭisaṅkhānirodhañca dvepi ekato katvā nirodhasaccanti laddhi, seyyathāpi etarahi mahisāsakānañceva andhakānañca; te sandhāya dve nirodhāti pucchā sakavādissa, paṭiññā paravādissa . Dve dukkhanirodhāti pañhesu yasmā dve dukkhasaccāni na icchati, tasmā paṭikkhipati. Yasmā dvīhākārehi dukkhaṃ nirujjhatīti icchati, tasmā paṭijānāti. Dve nirodhasaccānītipañhesu dvinnaṃ dukkhasaccānaṃ nirodhavasenaanicchanto paṭikkhipati. Dvīhākārehi dukkhassa nirujjhanato paṭijānāti. Dve tāṇānītiādīsupi eseva nayo.
අත්‌ථි ද්‌වින්‌නං නිබ්‌බානානන්‌තිආදීසු පුච්‌ඡාසු උච්‌චනීචතාදීනි අපස්‌සන්‌තො පටික්‌ඛිපති.
Atthi dvinnaṃ nibbānānantiādīsu pucchāsu uccanīcatādīni apassanto paṭikkhipati.
අප්‌පටිසඞ්‌ඛානිරුද්‌ධෙති යෙ පටිසඞ්‌ඛාය ලොකුත්‌තරෙන ඤාණෙන අනිරුද්‌ධා සුද්‌ධපකතිකත්‌තා වා උද්‌දෙසපරිපුච්‌ඡාදීනං වා වසෙන න සමුදාචරණතො නිරුද්‌ධාති වුච්‌චන්‌ති, තෙ සඞ්‌ඛාරෙ. පටිසඞ්‌ඛා නිරොධෙන්‌තීති. ලොකුත්‌තරඤාණෙන නිරොධෙන්‌ති අනුප්‌පත්‌තිභාවං ගමෙන්‌ති. නනු අප්‌පටිසඞ්‌ඛානිරුද්‌ධා සඞ්‌ඛාරාති පුච්‌ඡා පරවාදිස්‌ස . තත්‌ථ භග්‌ගානං පුන අභඤ්‌ජනතො අප්‌පටිසඞ්‌ඛානිරුද්‌ධානං වා අරියමග්‌ගෙ උප්‌පන්‌නෙ තථා නිරුජ්‌ඣනතොව සකවාදී අච්‌චන්‌තභග්‌ගතං පටිජානාති. සෙසමෙත්‌ථ උත්‌තානත්‌ථමෙවාති.
Appaṭisaṅkhāniruddheti ye paṭisaṅkhāya lokuttarena ñāṇena aniruddhā suddhapakatikattā vā uddesaparipucchādīnaṃ vā vasena na samudācaraṇato niruddhāti vuccanti, te saṅkhāre. Paṭisaṅkhā nirodhentīti. Lokuttarañāṇena nirodhenti anuppattibhāvaṃ gamenti. Nanu appaṭisaṅkhāniruddhā saṅkhārāti pucchā paravādissa . Tattha bhaggānaṃ puna abhañjanato appaṭisaṅkhāniruddhānaṃ vā ariyamagge uppanne tathā nirujjhanatova sakavādī accantabhaggataṃ paṭijānāti. Sesamettha uttānatthamevāti.
නිරොධකථාවණ්‌ණනා.
Nirodhakathāvaṇṇanā.
දුතියො වග්‌ගො.
Dutiyo vaggo.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (20) 11. නිරොධකථා • (20) 11. Nirodhakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 11. නිරොධකථාවණ්‌ණනා • 11. Nirodhakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 11. නිරොධකථාවණ්‌ණනා • 11. Nirodhakathāvaṇṇanā
