| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၈. နိရောဓနိဗ္ဗာနပဉ္ဟော
8. Nirodhanibbānapañho
၈. ရာဇာ အာဟ ‘‘ဘန္တေ နာဂသေန, နိရောဓော နိဗ္ဗာန’’န္တိ? ‘‘အာမ, မဟာရာဇ, နိရောဓော နိဗ္ဗာန’’န္တိ။ ‘‘ကထံ, ဘန္တေ , နာဂသေန, နိရောဓော နိဗ္ဗာန’’န္တိ? ‘‘သဗ္ဗေ ဗာလပုထုဇ္ဇနာ ခော, မဟာရာဇ, အဇ္ဈတ္တိကဗာဟိရေ အာယတနေ အဘိနန္ဒန္တိ အဘိဝဒန္တိ အဇ္ဈောသာယ တိဋ္ဌန္တိ, တေ တေန သောတေန ဝုယ္ဟန္တိ, န ပရိမုစ္စန္တိ ဇာတိယာ ဇရာယ မရဏေန သောကေန ပရိဒေဝေန ဒုက္ခေဟိ ဒောမနသ္သေဟိ ဥပာယာသေဟိ န ပရိမုစ္စန္တိ ဒုက္ခသ္မာတိ ဝဒာမိ။ သုတဝာ စ ခော, မဟာရာဇ, အရိယသာဝကော အဇ္ဈတ္တိကဗာဟိရေ အာယတနေ နာဘိနန္ဒတိ နာဘိဝဒတိ နာဇ္ဈောသာယ တိဋ္ဌတိ, တသ္သ တံ အနဘိနန္ဒတော အနဘိဝဒတော အနဇ္ဈောသာယ တိဋ္ဌတော တဏ္ဟာ နိရုဇ္ဈတိ, တဏ္ဟာနိရောဓာ ဥပာဒာနနိရောဓော, ဥပာဒာနနိရောဓာ ဘဝနိရောဓော, ဘဝနိရောဓာ ဇာတိနိရောဓော, ဇာတိနိရောဓာ ဇရာမရဏံ သောကပရိဒေဝဒုက္ခဒောမနသ္သုပာယာသာ နိရုဇ္ဈန္တိ, ဧဝမေတသ္သ ကေဝလသ္သ ဒုက္ခက္ခန္ဓသ္သ နိရောဓော ဟောတိ, ဧဝံ ခော, မဟာရာဇ, နိရောဓော နိဗ္ဗာန’’န္တိ။
8. Rājā āha ‘‘bhante nāgasena, nirodho nibbāna’’nti? ‘‘Āma, mahārāja, nirodho nibbāna’’nti. ‘‘Kathaṃ, bhante , nāgasena, nirodho nibbāna’’nti? ‘‘Sabbe bālaputhujjanā kho, mahārāja, ajjhattikabāhire āyatane abhinandanti abhivadanti ajjhosāya tiṭṭhanti, te tena sotena vuyhanti, na parimuccanti jātiyā jarāya maraṇena sokena paridevena dukkhehi domanassehi upāyāsehi na parimuccanti dukkhasmāti vadāmi. Sutavā ca kho, mahārāja, ariyasāvako ajjhattikabāhire āyatane nābhinandati nābhivadati nājjhosāya tiṭṭhati, tassa taṃ anabhinandato anabhivadato anajjhosāya tiṭṭhato taṇhā nirujjhati, taṇhānirodhā upādānanirodho, upādānanirodhā bhavanirodho, bhavanirodhā jātinirodho, jātinirodhā jarāmaraṇaṃ sokaparidevadukkhadomanassupāyāsā nirujjhanti, evametassa kevalassa dukkhakkhandhassa nirodho hoti, evaṃ kho, mahārāja, nirodho nibbāna’’nti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
နိရောဓနိဗ္ဗာနပဉ္ဟော အဋ္ဌမော။
Nirodhanibbānapañho aṭṭhamo.
