| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
8. නිරොධනිබ්‌බානපඤ්‌හො
8. Nirodhanibbānapañho
8. රාජා ආහ ‘‘භන්‌තෙ නාගසෙන, නිරොධො නිබ්‌බාන’’න්‌ති? ‘‘ආම, මහාරාජ, නිරොධො නිබ්‌බාන’’න්‌ති. ‘‘කථං, භන්‌තෙ , නාගසෙන, නිරොධො නිබ්‌බාන’’න්‌ති? ‘‘සබ්‌බෙ බාලපුථුජ්‌ජනා ඛො, මහාරාජ, අජ්‌ඣත්‌තිකබාහිරෙ ආයතනෙ අභිනන්‌දන්‌ති අභිවදන්‌ති අජ්‌ඣොසාය තිට්‌ඨන්‌ති, තෙ තෙන සොතෙන වුය්‌හන්‌ති, න පරිමුච්‌චන්‌ති ජාතියා ජරාය මරණෙන සොකෙන පරිදෙවෙන දුක්‌ඛෙහි දොමනස්‌සෙහි උපායාසෙහි න පරිමුච්‌චන්‌ති දුක්‌ඛස්‌මාති වදාමි. සුතවා ච ඛො, මහාරාජ, අරියසාවකො අජ්‌ඣත්‌තිකබාහිරෙ ආයතනෙ නාභිනන්‌දති නාභිවදති නාජ්‌ඣොසාය තිට්‌ඨති, තස්‌ස තං අනභිනන්‌දතො අනභිවදතො අනජ්‌ඣොසාය තිට්‌ඨතො තණ්‌හා නිරුජ්‌ඣති, තණ්‌හානිරොධා උපාදානනිරොධො, උපාදානනිරොධා භවනිරොධො, භවනිරොධා ජාතිනිරොධො, ජාතිනිරොධා ජරාමරණං සොකපරිදෙවදුක්‌ඛදොමනස්‌සුපායාසා නිරුජ්‌ඣන්‌ති, එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස නිරොධො හොති, එවං ඛො, මහාරාජ, නිරොධො නිබ්‌බාන’’න්‌ති.
8. Rājā āha ‘‘bhante nāgasena, nirodho nibbāna’’nti? ‘‘Āma, mahārāja, nirodho nibbāna’’nti. ‘‘Kathaṃ, bhante , nāgasena, nirodho nibbāna’’nti? ‘‘Sabbe bālaputhujjanā kho, mahārāja, ajjhattikabāhire āyatane abhinandanti abhivadanti ajjhosāya tiṭṭhanti, te tena sotena vuyhanti, na parimuccanti jātiyā jarāya maraṇena sokena paridevena dukkhehi domanassehi upāyāsehi na parimuccanti dukkhasmāti vadāmi. Sutavā ca kho, mahārāja, ariyasāvako ajjhattikabāhire āyatane nābhinandati nābhivadati nājjhosāya tiṭṭhati, tassa taṃ anabhinandato anabhivadato anajjhosāya tiṭṭhato taṇhā nirujjhati, taṇhānirodhā upādānanirodho, upādānanirodhā bhavanirodho, bhavanirodhā jātinirodho, jātinirodhā jarāmaraṇaṃ sokaparidevadukkhadomanassupāyāsā nirujjhanti, evametassa kevalassa dukkhakkhandhassa nirodho hoti, evaṃ kho, mahārāja, nirodho nibbāna’’nti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
නිරොධනිබ්‌බානපඤ්‌හො අට්‌ඨමො.
Nirodhanibbānapañho aṭṭhamo.
