| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৬. ছট্ঠৰগ্গো
6. Chaṭṭhavaggo
(৫৭) ৫. নিরোধসমাপত্তিকথা
(57) 5. Nirodhasamāpattikathā
৪৫৭. নিরোধসমাপত্তি অসঙ্খতাতি? আমন্তা। নিব্বানং তাণং লেণং সরণং পরাযনং অচ্চুতং অমতন্তি? ন হেৰং ৰত্তব্বে…পে॰… নিরোধসমাপত্তি অসঙ্খতা, নিব্বানং অসঙ্খতন্তি? আমন্তা। দ্ৰে অসঙ্খতানীতি? ন হেৰং ৰত্তব্বে…পে॰… দ্ৰে অসঙ্খতানীতি? আমন্তা। দ্ৰে তাণানি…পে॰… অন্তরিকা ৰাতি? ন হেৰং ৰত্তব্বে…পে॰…।
457. Nirodhasamāpatti asaṅkhatāti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… nirodhasamāpatti asaṅkhatā, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe….
নিরোধসমাপত্তি অসঙ্খতাতি? আমন্তা। অত্থি কেচি নিরোধং সমাপজ্জন্তি পটিলভন্তি উপ্পাদেন্তি সমুপ্পাদেন্তি উট্ঠপেন্তি সমুট্ঠপেন্তি নিব্বত্তেন্তি অভিনিব্বত্তেন্তি জনেন্তি সঞ্জনেন্তীতি? আমন্তা। অত্থি কেচি অসঙ্খতং সমাপজ্জন্তি পটিলভন্তি উপ্পাদেন্তি সমুপ্পাদেন্তি উট্ঠপেন্তি সমুট্ঠপেন্তি নিব্বত্তেন্তি অভিনিব্বত্তেন্তি জনেন্তি সঞ্জনেন্তীতি? ন হেৰং ৰত্তব্বে…পে॰…।
Nirodhasamāpatti asaṅkhatāti? Āmantā. Atthi keci nirodhaṃ samāpajjanti paṭilabhanti uppādenti samuppādenti uṭṭhapenti samuṭṭhapenti nibbattenti abhinibbattenti janenti sañjanentīti? Āmantā. Atthi keci asaṅkhataṃ samāpajjanti paṭilabhanti uppādenti samuppādenti uṭṭhapenti samuṭṭhapenti nibbattenti abhinibbattenti janenti sañjanentīti? Na hevaṃ vattabbe…pe….
৪৫৮. নিরোধা ৰোদানং ৰুট্ঠানং পঞ্ঞাযতীতি? আমন্তা। অসঙ্খতা ৰোদানং ৰুট্ঠানং পঞ্ঞাযতীতি ? ন হেৰং ৰত্তব্বে…পে॰… নিরোধং সমাপজ্জন্তস্স পঠমং নিরুজ্ঝতি ৰচীসঙ্খারো, ততো কাযসঙ্খারো, ততো চিত্তসঙ্খারোতি? আমন্তা। অসঙ্খতং সমাপজ্জন্তস্স পঠমং নিরুজ্ঝতি ৰচীসঙ্খারো, ততো কাযসঙ্খারো, ততো চিত্তসঙ্খারোতি? ন হেৰং ৰত্তব্বে…পে॰… নিরোধা ৰুট্ঠহন্তস্স পঠমং উপ্পজ্জতি চিত্তসঙ্খারো, ততো কাযসঙ্খারো, ততো ৰচীসঙ্খারোতি? আমন্তা । অসঙ্খতা ৰুট্ঠহন্তস্স পঠমং উপ্পজ্জতি চিত্তসঙ্খারো, ততো কাযসঙ্খারো, ততো ৰচীসঙ্খারোতি? ন হেৰং ৰত্তব্বে…পে॰…।
458. Nirodhā vodānaṃ vuṭṭhānaṃ paññāyatīti? Āmantā. Asaṅkhatā vodānaṃ vuṭṭhānaṃ paññāyatīti ? Na hevaṃ vattabbe…pe… nirodhaṃ samāpajjantassa paṭhamaṃ nirujjhati vacīsaṅkhāro, tato kāyasaṅkhāro, tato cittasaṅkhāroti? Āmantā. Asaṅkhataṃ samāpajjantassa paṭhamaṃ nirujjhati vacīsaṅkhāro, tato kāyasaṅkhāro, tato cittasaṅkhāroti? Na hevaṃ vattabbe…pe… nirodhā vuṭṭhahantassa paṭhamaṃ uppajjati cittasaṅkhāro, tato kāyasaṅkhāro, tato vacīsaṅkhāroti? Āmantā . Asaṅkhatā vuṭṭhahantassa paṭhamaṃ uppajjati cittasaṅkhāro, tato kāyasaṅkhāro, tato vacīsaṅkhāroti? Na hevaṃ vattabbe…pe….
নিরোধা ৰুট্ঠিতং তযো ফস্সা ফুসন্তি – সুঞ্ঞতো ফস্সো, অনিমিত্তো ফস্সো, অপ্পণিহিতো ফস্সোতি? আমন্তা। অসঙ্খতা ৰুট্ঠিতং তযো ফস্সা ফুসন্তি – সুঞ্ঞতো ফস্সো, অনিমিত্তো ফস্সো, অপ্পণিহিতো ফস্সোতি? ন হেৰং ৰত্তব্বে…পে॰…।
Nirodhā vuṭṭhitaṃ tayo phassā phusanti – suññato phasso, animitto phasso, appaṇihito phassoti? Āmantā. Asaṅkhatā vuṭṭhitaṃ tayo phassā phusanti – suññato phasso, animitto phasso, appaṇihito phassoti? Na hevaṃ vattabbe…pe….
নিরোধা ৰুট্ঠিতস্স ৰিৰেকনিন্নং চিত্তং হোতি ৰিৰেকপোণং ৰিৰেকপব্ভারন্তি? আমন্তা। অসঙ্খতা ৰুট্ঠিতস্স ৰিৰেকনিন্নং চিত্তং হোতি ৰিৰেকপোণং ৰিৰেকপব্ভারন্তি? ন হেৰং ৰত্তব্বে…পে॰…।
Nirodhā vuṭṭhitassa vivekaninnaṃ cittaṃ hoti vivekapoṇaṃ vivekapabbhāranti? Āmantā. Asaṅkhatā vuṭṭhitassa vivekaninnaṃ cittaṃ hoti vivekapoṇaṃ vivekapabbhāranti? Na hevaṃ vattabbe…pe….
৪৫৯. ন ৰত্তব্বং – ‘‘নিরোধসমাপত্তি অসঙ্খতা’’তি? আমন্তা। সঙ্খতাতি? ন হেৰং ৰত্তব্বে…পে॰… তেন হি নিরোধসমাপত্তি অসঙ্খতাতি।
459. Na vattabbaṃ – ‘‘nirodhasamāpatti asaṅkhatā’’ti? Āmantā. Saṅkhatāti? Na hevaṃ vattabbe…pe… tena hi nirodhasamāpatti asaṅkhatāti.
নিরোধসমাপত্তিকথা নিট্ঠিতা।
Nirodhasamāpattikathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৫. নিরোধসমাপত্তিকথাৰণ্ণনা • 5. Nirodhasamāpattikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৫. নিরোধসমাপত্তিকথাৰণ্ণনা • 5. Nirodhasamāpattikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৫. নিরোধসমাপত্তিকথাৰণ্ণনা • 5. Nirodhasamāpattikathāvaṇṇanā
