| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៦. ឆដ្ឋវគ្គោ
6. Chaṭṭhavaggo
(៥៧) ៥. និរោធសមាបត្តិកថា
(57) 5. Nirodhasamāpattikathā
៤៥៧. និរោធសមាបត្តិ អសង្ខតាតិ? អាមន្តា។ និព្ពានំ តាណំ លេណំ សរណំ បរាយនំ អច្ចុតំ អមតន្តិ? ន ហេវំ វត្តព្ពេ…បេ.… និរោធសមាបត្តិ អសង្ខតា, និព្ពានំ អសង្ខតន្តិ? អាមន្តា។ ទ្វេ អសង្ខតានីតិ? ន ហេវំ វត្តព្ពេ…បេ.… ទ្វេ អសង្ខតានីតិ? អាមន្តា។ ទ្វេ តាណានិ…បេ.… អន្តរិកា វាតិ? ន ហេវំ វត្តព្ពេ…បេ.…។
457. Nirodhasamāpatti asaṅkhatāti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… nirodhasamāpatti asaṅkhatā, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe….
និរោធសមាបត្តិ អសង្ខតាតិ? អាមន្តា។ អត្ថិ កេចិ និរោធំ សមាបជ្ជន្តិ បដិលភន្តិ ឧប្បាទេន្តិ សមុប្បាទេន្តិ ឧដ្ឋបេន្តិ សមុដ្ឋបេន្តិ និព្ពត្តេន្តិ អភិនិព្ពត្តេន្តិ ជនេន្តិ សញ្ជនេន្តីតិ? អាមន្តា។ អត្ថិ កេចិ អសង្ខតំ សមាបជ្ជន្តិ បដិលភន្តិ ឧប្បាទេន្តិ សមុប្បាទេន្តិ ឧដ្ឋបេន្តិ សមុដ្ឋបេន្តិ និព្ពត្តេន្តិ អភិនិព្ពត្តេន្តិ ជនេន្តិ សញ្ជនេន្តីតិ? ន ហេវំ វត្តព្ពេ…បេ.…។
Nirodhasamāpatti asaṅkhatāti? Āmantā. Atthi keci nirodhaṃ samāpajjanti paṭilabhanti uppādenti samuppādenti uṭṭhapenti samuṭṭhapenti nibbattenti abhinibbattenti janenti sañjanentīti? Āmantā. Atthi keci asaṅkhataṃ samāpajjanti paṭilabhanti uppādenti samuppādenti uṭṭhapenti samuṭṭhapenti nibbattenti abhinibbattenti janenti sañjanentīti? Na hevaṃ vattabbe…pe….
៤៥៨. និរោធា វោទានំ វុដ្ឋានំ បញ្ញាយតីតិ? អាមន្តា។ អសង្ខតា វោទានំ វុដ្ឋានំ បញ្ញាយតីតិ ? ន ហេវំ វត្តព្ពេ…បេ.… និរោធំ សមាបជ្ជន្តស្ស បឋមំ និរុជ្ឈតិ វចីសង្ខារោ, តតោ កាយសង្ខារោ, តតោ ចិត្តសង្ខារោតិ? អាមន្តា។ អសង្ខតំ សមាបជ្ជន្តស្ស បឋមំ និរុជ្ឈតិ វចីសង្ខារោ, តតោ កាយសង្ខារោ, តតោ ចិត្តសង្ខារោតិ? ន ហេវំ វត្តព្ពេ…បេ.… និរោធា វុដ្ឋហន្តស្ស បឋមំ ឧប្បជ្ជតិ ចិត្តសង្ខារោ, តតោ កាយសង្ខារោ, តតោ វចីសង្ខារោតិ? អាមន្តា ។ អសង្ខតា វុដ្ឋហន្តស្ស បឋមំ ឧប្បជ្ជតិ ចិត្តសង្ខារោ, តតោ កាយសង្ខារោ, តតោ វចីសង្ខារោតិ? ន ហេវំ វត្តព្ពេ…បេ.…។
458. Nirodhā vodānaṃ vuṭṭhānaṃ paññāyatīti? Āmantā. Asaṅkhatā vodānaṃ vuṭṭhānaṃ paññāyatīti ? Na hevaṃ vattabbe…pe… nirodhaṃ samāpajjantassa paṭhamaṃ nirujjhati vacīsaṅkhāro, tato kāyasaṅkhāro, tato cittasaṅkhāroti? Āmantā. Asaṅkhataṃ samāpajjantassa paṭhamaṃ nirujjhati vacīsaṅkhāro, tato kāyasaṅkhāro, tato cittasaṅkhāroti? Na hevaṃ vattabbe…pe… nirodhā vuṭṭhahantassa paṭhamaṃ uppajjati cittasaṅkhāro, tato kāyasaṅkhāro, tato vacīsaṅkhāroti? Āmantā . Asaṅkhatā vuṭṭhahantassa paṭhamaṃ uppajjati cittasaṅkhāro, tato kāyasaṅkhāro, tato vacīsaṅkhāroti? Na hevaṃ vattabbe…pe….
និរោធា វុដ្ឋិតំ តយោ ផស្សា ផុសន្តិ – សុញ្ញតោ ផស្សោ, អនិមិត្តោ ផស្សោ, អប្បណិហិតោ ផស្សោតិ? អាមន្តា។ អសង្ខតា វុដ្ឋិតំ តយោ ផស្សា ផុសន្តិ – សុញ្ញតោ ផស្សោ, អនិមិត្តោ ផស្សោ, អប្បណិហិតោ ផស្សោតិ? ន ហេវំ វត្តព្ពេ…បេ.…។
Nirodhā vuṭṭhitaṃ tayo phassā phusanti – suññato phasso, animitto phasso, appaṇihito phassoti? Āmantā. Asaṅkhatā vuṭṭhitaṃ tayo phassā phusanti – suññato phasso, animitto phasso, appaṇihito phassoti? Na hevaṃ vattabbe…pe….
និរោធា វុដ្ឋិតស្ស វិវេកនិន្នំ ចិត្តំ ហោតិ វិវេកបោណំ វិវេកបព្ភារន្តិ? អាមន្តា។ អសង្ខតា វុដ្ឋិតស្ស វិវេកនិន្នំ ចិត្តំ ហោតិ វិវេកបោណំ វិវេកបព្ភារន្តិ? ន ហេវំ វត្តព្ពេ…បេ.…។
Nirodhā vuṭṭhitassa vivekaninnaṃ cittaṃ hoti vivekapoṇaṃ vivekapabbhāranti? Āmantā. Asaṅkhatā vuṭṭhitassa vivekaninnaṃ cittaṃ hoti vivekapoṇaṃ vivekapabbhāranti? Na hevaṃ vattabbe…pe….
៤៥៩. ន វត្តព្ពំ – ‘‘និរោធសមាបត្តិ អសង្ខតា’’តិ? អាមន្តា។ សង្ខតាតិ? ន ហេវំ វត្តព្ពេ…បេ.… តេន ហិ និរោធសមាបត្តិ អសង្ខតាតិ។
459. Na vattabbaṃ – ‘‘nirodhasamāpatti asaṅkhatā’’ti? Āmantā. Saṅkhatāti? Na hevaṃ vattabbe…pe… tena hi nirodhasamāpatti asaṅkhatāti.
និរោធសមាបត្តិកថា និដ្ឋិតា។
Nirodhasamāpattikathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៥. និរោធសមាបត្តិកថាវណ្ណនា • 5. Nirodhasamāpattikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៥. និរោធសមាបត្តិកថាវណ្ណនា • 5. Nirodhasamāpattikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៥. និរោធសមាបត្តិកថាវណ្ណនា • 5. Nirodhasamāpattikathāvaṇṇanā
