| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
6. ඡට්‌ඨවග්‌ගො
6. Chaṭṭhavaggo
(57) 5. නිරොධසමාපත්‌තිකථා
(57) 5. Nirodhasamāpattikathā
457. නිරොධසමාපත්‌ති අසඞ්‌ඛතාති? ආමන්‌තා. නිබ්‌බානං තාණං ලෙණං සරණං පරායනං අච්‌චුතං අමතන්‌ති? න හෙවං වත්‌තබ්‌බෙ…පෙ.… නිරොධසමාපත්‌ති අසඞ්‌ඛතා, නිබ්‌බානං අසඞ්‌ඛතන්‌ති? ආමන්‌තා. ද්‌වෙ අසඞ්‌ඛතානීති? න හෙවං වත්‌තබ්‌බෙ…පෙ.… ද්‌වෙ අසඞ්‌ඛතානීති? ආමන්‌තා. ද්‌වෙ තාණානි…පෙ.… අන්‌තරිකා වාති? න හෙවං වත්‌තබ්‌බෙ…පෙ.….
457. Nirodhasamāpatti asaṅkhatāti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… nirodhasamāpatti asaṅkhatā, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe….
නිරොධසමාපත්‌ති අසඞ්‌ඛතාති? ආමන්‌තා. අත්‌ථි කෙචි නිරොධං සමාපජ්‌ජන්‌ති පටිලභන්‌ති උප්‌පාදෙන්‌ති සමුප්‌පාදෙන්‌ති උට්‌ඨපෙන්‌ති සමුට්‌ඨපෙන්‌ති නිබ්‌බත්‌තෙන්‌ති අභිනිබ්‌බත්‌තෙන්‌ති ජනෙන්‌ති සඤ්‌ජනෙන්‌තීති? ආමන්‌තා. අත්‌ථි කෙචි අසඞ්‌ඛතං සමාපජ්‌ජන්‌ති පටිලභන්‌ති උප්‌පාදෙන්‌ති සමුප්‌පාදෙන්‌ති උට්‌ඨපෙන්‌ති සමුට්‌ඨපෙන්‌ති නිබ්‌බත්‌තෙන්‌ති අභිනිබ්‌බත්‌තෙන්‌ති ජනෙන්‌ති සඤ්‌ජනෙන්‌තීති? න හෙවං වත්‌තබ්‌බෙ…පෙ.….
Nirodhasamāpatti asaṅkhatāti? Āmantā. Atthi keci nirodhaṃ samāpajjanti paṭilabhanti uppādenti samuppādenti uṭṭhapenti samuṭṭhapenti nibbattenti abhinibbattenti janenti sañjanentīti? Āmantā. Atthi keci asaṅkhataṃ samāpajjanti paṭilabhanti uppādenti samuppādenti uṭṭhapenti samuṭṭhapenti nibbattenti abhinibbattenti janenti sañjanentīti? Na hevaṃ vattabbe…pe….
458. නිරොධා වොදානං වුට්‌ඨානං පඤ්‌ඤායතීති? ආමන්‌තා. අසඞ්‌ඛතා වොදානං වුට්‌ඨානං පඤ්‌ඤායතීති ? න හෙවං වත්‌තබ්‌බෙ…පෙ.… නිරොධං සමාපජ්‌ජන්‌තස්‌ස පඨමං නිරුජ්‌ඣති වචීසඞ්‌ඛාරො, තතො කායසඞ්‌ඛාරො, තතො චිත්‌තසඞ්‌ඛාරොති? ආමන්‌තා. අසඞ්‌ඛතං සමාපජ්‌ජන්‌තස්‌ස පඨමං නිරුජ්‌ඣති වචීසඞ්‌ඛාරො, තතො කායසඞ්‌ඛාරො, තතො චිත්‌තසඞ්‌ඛාරොති? න හෙවං වත්‌තබ්‌බෙ…පෙ.… නිරොධා වුට්‌ඨහන්‌තස්‌ස පඨමං උප්‌පජ්‌ජති චිත්‌තසඞ්‌ඛාරො, තතො කායසඞ්‌ඛාරො, තතො වචීසඞ්‌ඛාරොති? ආමන්‌තා . අසඞ්‌ඛතා වුට්‌ඨහන්‌තස්‌ස පඨමං උප්‌පජ්‌ජති චිත්‌තසඞ්‌ඛාරො, තතො කායසඞ්‌ඛාරො, තතො වචීසඞ්‌ඛාරොති? න හෙවං වත්‌තබ්‌බෙ…පෙ.….
458. Nirodhā vodānaṃ vuṭṭhānaṃ paññāyatīti? Āmantā. Asaṅkhatā vodānaṃ vuṭṭhānaṃ paññāyatīti ? Na hevaṃ vattabbe…pe… nirodhaṃ samāpajjantassa paṭhamaṃ nirujjhati vacīsaṅkhāro, tato kāyasaṅkhāro, tato cittasaṅkhāroti? Āmantā. Asaṅkhataṃ samāpajjantassa paṭhamaṃ nirujjhati vacīsaṅkhāro, tato kāyasaṅkhāro, tato cittasaṅkhāroti? Na hevaṃ vattabbe…pe… nirodhā vuṭṭhahantassa paṭhamaṃ uppajjati cittasaṅkhāro, tato kāyasaṅkhāro, tato vacīsaṅkhāroti? Āmantā . Asaṅkhatā vuṭṭhahantassa paṭhamaṃ uppajjati cittasaṅkhāro, tato kāyasaṅkhāro, tato vacīsaṅkhāroti? Na hevaṃ vattabbe…pe….
නිරොධා වුට්‌ඨිතං තයො ඵස්‌සා ඵුසන්‌ති – සුඤ්‌ඤතො ඵස්‌සො, අනිමිත්‌තො ඵස්‌සො, අප්‌පණිහිතො ඵස්‌සොති? ආමන්‌තා. අසඞ්‌ඛතා වුට්‌ඨිතං තයො ඵස්‌සා ඵුසන්‌ති – සුඤ්‌ඤතො ඵස්‌සො, අනිමිත්‌තො ඵස්‌සො, අප්‌පණිහිතො ඵස්‌සොති? න හෙවං වත්‌තබ්‌බෙ…පෙ.….
Nirodhā vuṭṭhitaṃ tayo phassā phusanti – suññato phasso, animitto phasso, appaṇihito phassoti? Āmantā. Asaṅkhatā vuṭṭhitaṃ tayo phassā phusanti – suññato phasso, animitto phasso, appaṇihito phassoti? Na hevaṃ vattabbe…pe….
නිරොධා වුට්‌ඨිතස්‌ස විවෙකනින්‌නං චිත්‌තං හොති විවෙකපොණං විවෙකපබ්‌භාරන්‌ති? ආමන්‌තා. අසඞ්‌ඛතා වුට්‌ඨිතස්‌ස විවෙකනින්‌නං චිත්‌තං හොති විවෙකපොණං විවෙකපබ්‌භාරන්‌ති? න හෙවං වත්‌තබ්‌බෙ…පෙ.….
Nirodhā vuṭṭhitassa vivekaninnaṃ cittaṃ hoti vivekapoṇaṃ vivekapabbhāranti? Āmantā. Asaṅkhatā vuṭṭhitassa vivekaninnaṃ cittaṃ hoti vivekapoṇaṃ vivekapabbhāranti? Na hevaṃ vattabbe…pe….
459. න වත්‌තබ්‌බං – ‘‘නිරොධසමාපත්‌ති අසඞ්‌ඛතා’’ති? ආමන්‌තා. සඞ්‌ඛතාති? න හෙවං වත්‌තබ්‌බෙ…පෙ.… තෙන හි නිරොධසමාපත්‌ති අසඞ්‌ඛතාති.
459. Na vattabbaṃ – ‘‘nirodhasamāpatti asaṅkhatā’’ti? Āmantā. Saṅkhatāti? Na hevaṃ vattabbe…pe… tena hi nirodhasamāpatti asaṅkhatāti.
නිරොධසමාපත්‌තිකථා නිට්‌ඨිතා.
Nirodhasamāpattikathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 5. නිරොධසමාපත්‌තිකථාවණ්‌ණනා • 5. Nirodhasamāpattikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 5. නිරොධසමාපත්‌තිකථාවණ්‌ණනා • 5. Nirodhasamāpattikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 5. නිරොධසමාපත්‌තිකථාවණ්‌ණනා • 5. Nirodhasamāpattikathāvaṇṇanā
