| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৩৪. নিরোধসমাপত্তিঞাণনিদ্দেসো
34. Nirodhasamāpattiñāṇaniddeso
৮৩. কথং দ্ৰীহি বলেহি সমন্নাগতত্তা তযো চ সঙ্খারানং পটিপ্পস্সদ্ধিযা সোল়সহি ঞাণচরিযাহি নৰহি সমাধিচরিযাহি ৰসিভাৰতা পঞ্ঞা নিরোধসমাপত্তিযা ঞাণং?
83. Kathaṃ dvīhi balehi samannāgatattā tayo ca saṅkhārānaṃ paṭippassaddhiyā soḷasahi ñāṇacariyāhi navahi samādhicariyāhi vasibhāvatā paññā nirodhasamāpattiyā ñāṇaṃ?
দ্ৰীহি বলেহীতি দ্ৰে বলানি – সমথবলং, ৰিপস্সনাবলং। কতমং সমথবলং? নেক্খম্মৰসেন চিত্তস্সেকগ্গতা অৰিক্খেপো সমথবলং। অব্যাপাদৰসেন চিত্তস্সেকগ্গতা অৰিক্খেপো সমথবলং। আলোকসঞ্ঞাৰসেন চিত্তস্সেকগ্গতা অৰিক্খেপো সমথবলং। অৰিক্খেপৰসেন চিত্তস্সেকগ্গতা অৰিক্খেপো সমথবলং…পে॰… পটিনিস্সগ্গানুপস্সী অস্সাসৰসেন চিত্তস্সেকগ্গতা অৰিক্খেপো সমথবলং। পটিনিস্সগ্গানুপস্সী পস্সাসৰসেন চিত্তস্সেকগ্গতা অৰিক্খেপো সমথবলং।
Dvīhibalehīti dve balāni – samathabalaṃ, vipassanābalaṃ. Katamaṃ samathabalaṃ? Nekkhammavasena cittassekaggatā avikkhepo samathabalaṃ. Abyāpādavasena cittassekaggatā avikkhepo samathabalaṃ. Ālokasaññāvasena cittassekaggatā avikkhepo samathabalaṃ. Avikkhepavasena cittassekaggatā avikkhepo samathabalaṃ…pe… paṭinissaggānupassī assāsavasena cittassekaggatā avikkhepo samathabalaṃ. Paṭinissaggānupassī passāsavasena cittassekaggatā avikkhepo samathabalaṃ.
সমথবলন্তি কেনট্ঠেন সমথবলং? পঠমেন ঝানেন নীৰরণে ন কম্পতীতি – সমথবলং। দুতিযেন ঝানেন ৰিতক্কৰিচারে ন কম্পতীতি – সমথবলং। ততিযেন ঝানেন পীতিযা ন কম্পতীতি – সমথবলং। চতুত্থেন ঝানেন সুখদুক্খে ন কম্পতীতি – সমথবলং। আকাসানঞ্চাযতনসমাপত্তিযা রূপসঞ্ঞায পটিঘসঞ্ঞায নানত্তসঞ্ঞায ন কম্পতীতি – সমথবলং। ৰিঞ্ঞাণঞ্চাযতনসমাপত্তিযা আকাসানঞ্চাযতনসঞ্ঞায ন কম্পতীতি – সমথবলং। আকিঞ্চঞ্ঞাযতনসমাপত্তিযা ৰিঞ্ঞাণঞ্চাযতনসঞ্ঞায ন কম্পতীতি – সমথবলং। নেৰসঞ্ঞানাসঞ্ঞাযতনসমাপত্তিযা আকিঞ্চঞ্ঞাযতনসঞ্ঞায ন কম্পতীতি – সমথবলং। উদ্ধচ্চে চ উদ্ধচ্চসহগতকিলেসে চ খন্ধে চ ন কম্পতি ন চলতি ন ৰেধতীতি – সমথবলং। ইদং সমথবলং।
Samathabalanti kenaṭṭhena samathabalaṃ? Paṭhamena jhānena nīvaraṇe na kampatīti – samathabalaṃ. Dutiyena jhānena vitakkavicāre na kampatīti – samathabalaṃ. Tatiyena jhānena pītiyā na kampatīti – samathabalaṃ. Catutthena jhānena sukhadukkhe na kampatīti – samathabalaṃ. Ākāsānañcāyatanasamāpattiyā rūpasaññāya paṭighasaññāya nānattasaññāya na kampatīti – samathabalaṃ. Viññāṇañcāyatanasamāpattiyā ākāsānañcāyatanasaññāya na kampatīti – samathabalaṃ. Ākiñcaññāyatanasamāpattiyā viññāṇañcāyatanasaññāya na kampatīti – samathabalaṃ. Nevasaññānāsaññāyatanasamāpattiyā ākiñcaññāyatanasaññāya na kampatīti – samathabalaṃ. Uddhacce ca uddhaccasahagatakilese ca khandhe ca na kampati na calati na vedhatīti – samathabalaṃ. Idaṃ samathabalaṃ.
কতমং ৰিপস্সনাবলং? অনিচ্চানুপস্সনা ৰিপস্সনাবলং। দুক্খানুপস্সনা ৰিপস্সনাবলং। অনত্তানুপস্সনা ৰিপস্সনাবলং। নিব্বিদানুপস্সনা ৰিপস্সনাবলং। ৰিরাগানুপস্সনা ৰিপস্সনাবলং । নিরোধানুপস্সনা ৰিপস্সনাবলং। পটিনিস্সগ্গানুপস্সনা ৰিপস্সনাবলং। রূপে অনিচ্চানুপস্সনা ৰিপস্সনাবলং …পে॰… রূপে পটিনিস্সগ্গানুপস্সনা ৰিপস্সনাবলং। ৰেদনায…পে॰… সঞ্ঞায… সঙ্খারেসু… ৰিঞ্ঞাণে… চক্খুস্মিং…পে॰… জরামরণে অনিচ্চানুপস্সনা ৰিপস্সনাবলং…পে॰… জরামরণে পটিনিস্সগ্গানুপস্সনা ৰিপস্সনাবলং।
Katamaṃ vipassanābalaṃ? Aniccānupassanā vipassanābalaṃ. Dukkhānupassanā vipassanābalaṃ. Anattānupassanā vipassanābalaṃ. Nibbidānupassanā vipassanābalaṃ. Virāgānupassanā vipassanābalaṃ . Nirodhānupassanā vipassanābalaṃ. Paṭinissaggānupassanā vipassanābalaṃ. Rūpe aniccānupassanā vipassanābalaṃ …pe… rūpe paṭinissaggānupassanā vipassanābalaṃ. Vedanāya…pe… saññāya… saṅkhāresu… viññāṇe… cakkhusmiṃ…pe… jarāmaraṇe aniccānupassanā vipassanābalaṃ…pe… jarāmaraṇe paṭinissaggānupassanā vipassanābalaṃ.
ৰিপস্সনাবলন্তি কেনট্ঠেন ৰিপস্সনাবলং? অনিচ্চানুপস্সনায নিচ্চসঞ্ঞায ন কম্পতীতি – ৰিপস্সনাবলং। দুক্খানুপস্সনায সুখসঞ্ঞায ন কম্পতীতি – ৰিপস্সনাবলং। অনত্তানুপস্সনায অত্তসঞ্ঞায ন কম্পতীতি – ৰিপস্সনাবলং। নিব্বিদানুপস্সনায নন্দিযা ন কম্পতীতি – ৰিপস্সনাবলং। ৰিরাগানুপস্সনায রাগে ন কম্পতীতি – ৰিপস্সনাবলং। নিরোধানুপস্সনায সমুদযে ন কম্পতীতি – ৰিপস্সনাবলং। পটিনিস্সগ্গানুপস্সনায আদানে ন কম্পতীতি – ৰিপস্সনাবলং। অৰিজ্জায চ অৰিজ্জা সহগতকিলেসে চ খন্ধে চ ন কম্পতি ন চলতি ন ৰেধতীতি – ৰিপস্সনাবলং। ইদং ৰিপস্সনাবলং।
Vipassanābalanti kenaṭṭhena vipassanābalaṃ? Aniccānupassanāya niccasaññāya na kampatīti – vipassanābalaṃ. Dukkhānupassanāya sukhasaññāya na kampatīti – vipassanābalaṃ. Anattānupassanāya attasaññāya na kampatīti – vipassanābalaṃ. Nibbidānupassanāya nandiyā na kampatīti – vipassanābalaṃ. Virāgānupassanāya rāge na kampatīti – vipassanābalaṃ. Nirodhānupassanāya samudaye na kampatīti – vipassanābalaṃ. Paṭinissaggānupassanāya ādāne na kampatīti – vipassanābalaṃ. Avijjāya ca avijjā sahagatakilese ca khandhe ca na kampati na calati na vedhatīti – vipassanābalaṃ. Idaṃ vipassanābalaṃ.
তযো চ সঙ্খারানং পটিপ্পস্সদ্ধিযাতি কতমেসং তিণ্ণন্নং সঙ্খারানং পটিপ্পস্সদ্ধিযা? দুতিযং ঝানং সমাপন্নস্স ৰিতক্কৰিচারা ৰচীসঙ্খারা পটিপ্পস্সদ্ধা হোন্তি। চতুত্থং ঝানং সমাপন্নস্স অস্সাসপস্সাসা কাযসঙ্খারা পটিপ্পস্সদ্ধা হোন্তি। সঞ্ঞাৰেদযিতনিরোধং সমাপন্নস্স সঞ্ঞা চ ৰেদনা চ চিত্তসঙ্খারা পটিপ্পস্সদ্ধা হোন্তি। ইমেসং তিণ্ণন্নং সঙ্খারানং পটিপ্পস্সদ্ধিযা ।
Tayo ca saṅkhārānaṃ paṭippassaddhiyāti katamesaṃ tiṇṇannaṃ saṅkhārānaṃ paṭippassaddhiyā? Dutiyaṃ jhānaṃ samāpannassa vitakkavicārā vacīsaṅkhārā paṭippassaddhā honti. Catutthaṃ jhānaṃ samāpannassa assāsapassāsā kāyasaṅkhārā paṭippassaddhā honti. Saññāvedayitanirodhaṃ samāpannassa saññā ca vedanā ca cittasaṅkhārā paṭippassaddhā honti. Imesaṃ tiṇṇannaṃ saṅkhārānaṃ paṭippassaddhiyā .
৮৪. সোল়সহি ঞাণচরিযাহীতি কতমাহি সোল়সহি ঞাণচরিযাহি? অনিচ্চানুপস্সনা ঞাণচরিযা, দুক্খানুপস্সনা ঞাণচরিযা, অনত্তানুপস্সনা ঞাণচরিযা, নিব্বিদানুপস্সনা ঞাণচরিযা, ৰিরাগানুপস্সনা ঞাণচরিযা, নিরোধানুপস্সনা ঞাণচরিযা, পটিনিস্সগ্গানুপস্সনা ঞাণচরিযা, ৰিৰট্টনানুপস্সনা ঞাণচরিযা, সোতাপত্তিমগ্গো ঞাণচরিযা, সোতাপত্তিফলসমাপত্তি ঞাণচরিযা, সকদাগামিমগ্গো ঞাণচরিযা, সকদাগামিফলসমাপত্তি ঞাণচরিযা, অনাগামিমগ্গো ঞাণচরিযা, অনাগামিফলসমাপত্তি ঞাণচরিযা, অরহত্তমগ্গো ঞাণচরিযা, অরহত্তফলসমাপত্তি ঞাণচরিযা – ইমাহি সোল়সহি ঞাণচরিযাহি।
84.Soḷasahi ñāṇacariyāhīti katamāhi soḷasahi ñāṇacariyāhi? Aniccānupassanā ñāṇacariyā, dukkhānupassanā ñāṇacariyā, anattānupassanā ñāṇacariyā, nibbidānupassanā ñāṇacariyā, virāgānupassanā ñāṇacariyā, nirodhānupassanā ñāṇacariyā, paṭinissaggānupassanā ñāṇacariyā, vivaṭṭanānupassanā ñāṇacariyā, sotāpattimaggo ñāṇacariyā, sotāpattiphalasamāpatti ñāṇacariyā, sakadāgāmimaggo ñāṇacariyā, sakadāgāmiphalasamāpatti ñāṇacariyā, anāgāmimaggo ñāṇacariyā, anāgāmiphalasamāpatti ñāṇacariyā, arahattamaggo ñāṇacariyā, arahattaphalasamāpatti ñāṇacariyā – imāhi soḷasahi ñāṇacariyāhi.
৮৫. নৰহি সমাধিচরিযাহীতি কতমাহি নৰহি সমাধিচরিযাহি? পঠমং ঝানং সমাধিচরিযা, দুতিযং ঝানং সমাধিচরিযা, ততিযং ঝানং সমাধিচরিযা, চতুত্থং ঝানং সমাধিচরিযা, আকাসানঞ্চাযতনসমাপত্তি…পে॰… ৰিঞ্ঞাণঞ্চাযতনসমাপত্তি… আকিঞ্চঞ্ঞাযতনসমাপত্তি… নেৰসঞ্ঞানাসঞ্ঞাযতনসমাপত্তি সমাধিচরিযা। পঠমং ঝানং পটিলাভত্থায ৰিতক্কো চ ৰিচারো চ পীতি চ সুখঞ্চ চিত্তেকগ্গতা চ…পে॰… নেৰসঞ্ঞানাসঞ্ঞাযতনসমাপত্তিং পটিলাভত্থায ৰিতক্কো চ ৰিচারো চ পীতি চ সুখঞ্চ চিত্তেকগ্গতা চ – ইমাহি নৰহি সমাধিচরিযাহি।
85.Navahi samādhicariyāhīti katamāhi navahi samādhicariyāhi? Paṭhamaṃ jhānaṃ samādhicariyā, dutiyaṃ jhānaṃ samādhicariyā, tatiyaṃ jhānaṃ samādhicariyā, catutthaṃ jhānaṃ samādhicariyā, ākāsānañcāyatanasamāpatti…pe… viññāṇañcāyatanasamāpatti… ākiñcaññāyatanasamāpatti… nevasaññānāsaññāyatanasamāpatti samādhicariyā. Paṭhamaṃ jhānaṃ paṭilābhatthāya vitakko ca vicāro ca pīti ca sukhañca cittekaggatā ca…pe… nevasaññānāsaññāyatanasamāpattiṃ paṭilābhatthāya vitakko ca vicāro ca pīti ca sukhañca cittekaggatā ca – imāhi navahi samādhicariyāhi.
ৰসীতি পঞ্চ ৰসিযো। আৰজ্জনৰসী, সমাপজ্জনৰসী, অধিট্ঠানৰসী , ৰুট্ঠানৰসী, পচ্চৰেক্খণাৰসী। পঠমং ঝানং যত্থিচ্ছকং যদিচ্ছকং যাৰতিচ্ছকং আৰজ্জতি; আৰজ্জনায দন্ধাযিতত্তং নত্থীতি – আৰজ্জনৰসী। পঠমং ঝানং যত্থিচ্ছকং যদিচ্ছকং যাৰতিচ্ছকং সমাপজ্জতি; সমাপজ্জনায দন্ধাযিতত্তং নত্থীতি – সমাপজ্জনৰসী। পঠমং ঝানং যত্থিচ্ছকং যদিচ্ছকং যাৰতিচ্ছকং অধিট্ঠাতি ; অধিট্ঠানে দন্ধাযিতত্তং নত্থীতি – অধিট্ঠানৰসী। পঠমং ঝানং যত্থিচ্ছকং যদিচ্ছকং যাৰতিচ্ছকং ৰুট্ঠাতি; ৰুট্ঠানে দন্ধাযিতত্তং নত্থীতি – ৰুট্ঠানৰসী। পঠমং ঝানং যত্থিচ্ছকং যদিচ্ছকং যাৰতিচ্ছকং পচ্চৰেক্খতি; পচ্চৰেক্খণায দন্ধাযিতত্তং নত্থীতি – পচ্চৰেক্খণাৰসী।
Vasīti pañca vasiyo. Āvajjanavasī, samāpajjanavasī, adhiṭṭhānavasī , vuṭṭhānavasī, paccavekkhaṇāvasī. Paṭhamaṃ jhānaṃ yatthicchakaṃ yadicchakaṃ yāvaticchakaṃ āvajjati; āvajjanāya dandhāyitattaṃ natthīti – āvajjanavasī. Paṭhamaṃ jhānaṃ yatthicchakaṃ yadicchakaṃ yāvaticchakaṃ samāpajjati; samāpajjanāya dandhāyitattaṃ natthīti – samāpajjanavasī. Paṭhamaṃ jhānaṃ yatthicchakaṃ yadicchakaṃ yāvaticchakaṃ adhiṭṭhāti ; adhiṭṭhāne dandhāyitattaṃ natthīti – adhiṭṭhānavasī. Paṭhamaṃ jhānaṃ yatthicchakaṃ yadicchakaṃ yāvaticchakaṃ vuṭṭhāti; vuṭṭhāne dandhāyitattaṃ natthīti – vuṭṭhānavasī. Paṭhamaṃ jhānaṃ yatthicchakaṃ yadicchakaṃ yāvaticchakaṃ paccavekkhati; paccavekkhaṇāya dandhāyitattaṃ natthīti – paccavekkhaṇāvasī.
দুতিযং ঝানং…পে॰… নেৰসঞ্ঞানাসঞ্ঞাযতনসমাপত্তিং যত্থিচ্ছকং যদিচ্ছকং যাৰতিচ্ছকং আৰজ্জতি; আৰজ্জনায দন্ধাযিতত্তং নত্থীতি – আৰজ্জনৰসী। নেৰসঞ্ঞানাসঞ্ঞাযতনসমাপত্তিং যত্থিচ্ছকং যদিচ্ছকং যাৰতিচ্ছকং সমাপজ্জতি…পে॰… অধিট্ঠাতি… ৰুট্ঠাতি… পচ্চৰেক্খতি; পচ্চৰেক্খণায দন্ধাযিতত্তং নত্থীতি – পচ্চৰেক্খণাৰসী। ইমা পঞ্চ ৰসিযো। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘দ্ৰীহি বলেহি সমন্নাগতত্তা তযো চ সঙ্খারানং পটিপস্সদ্ধিযা সোল়সহি ঞাণচরিযাহি নৰহি সমাধিচরিযাহি ৰসীভাৰতা পঞ্ঞা নিরোধসমাপত্তিযা ঞাণং’’।
Dutiyaṃ jhānaṃ…pe… nevasaññānāsaññāyatanasamāpattiṃ yatthicchakaṃ yadicchakaṃ yāvaticchakaṃ āvajjati; āvajjanāya dandhāyitattaṃ natthīti – āvajjanavasī. Nevasaññānāsaññāyatanasamāpattiṃ yatthicchakaṃ yadicchakaṃ yāvaticchakaṃ samāpajjati…pe… adhiṭṭhāti… vuṭṭhāti… paccavekkhati; paccavekkhaṇāya dandhāyitattaṃ natthīti – paccavekkhaṇāvasī. Imā pañca vasiyo. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘dvīhi balehi samannāgatattā tayo ca saṅkhārānaṃ paṭipassaddhiyā soḷasahi ñāṇacariyāhi navahi samādhicariyāhi vasībhāvatā paññā nirodhasamāpattiyā ñāṇaṃ’’.
নিরোধসমাপত্তিঞাণনিদ্দেসো চতুত্তিংসতিমো।
Nirodhasamāpattiñāṇaniddeso catuttiṃsatimo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৩৪. নিরোধসমাপত্তিঞাণনিদ্দেসৰণ্ণনা • 34. Nirodhasamāpattiñāṇaniddesavaṇṇanā
