| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༣༤. ནིརོདྷསམཱཔཏྟིཉཱཎནིདྡེསོ
34. Nirodhasamāpattiñāṇaniddeso
༨༣. ཀཐཾ དྭཱིཧི བལེཧི སམནྣཱགཏཏྟཱ ཏཡོ ཙ སངྑཱརཱནཾ པཊིཔྤསྶདྡྷིཡཱ སོལ༹སཧི ཉཱཎཙརིཡཱཧི ནཝཧི སམཱདྷིཙརིཡཱཧི ཝསིབྷཱཝཏཱ པཉྙཱ ནིརོདྷསམཱཔཏྟིཡཱ ཉཱཎཾ?
83. Kathaṃ dvīhi balehi samannāgatattā tayo ca saṅkhārānaṃ paṭippassaddhiyā soḷasahi ñāṇacariyāhi navahi samādhicariyāhi vasibhāvatā paññā nirodhasamāpattiyā ñāṇaṃ?
དྭཱིཧི བལེཧཱིཏི དྭེ བལཱནི – སམཐབལཾ, ཝིཔསྶནཱབལཾ། ཀཏམཾ སམཐབལཾ? ནེཀྑམྨཝསེན ཙིཏྟསྶེཀགྒཏཱ ཨཝིཀྑེཔོ སམཐབལཾ། ཨབྱཱཔཱདཝསེན ཙིཏྟསྶེཀགྒཏཱ ཨཝིཀྑེཔོ སམཐབལཾ། ཨཱལོཀསཉྙཱཝསེན ཙིཏྟསྶེཀགྒཏཱ ཨཝིཀྑེཔོ སམཐབལཾ། ཨཝིཀྑེཔཝསེན ཙིཏྟསྶེཀགྒཏཱ ཨཝིཀྑེཔོ སམཐབལཾ…པེ॰… པཊིནིསྶགྒཱནུཔསྶཱི ཨསྶཱསཝསེན ཙིཏྟསྶེཀགྒཏཱ ཨཝིཀྑེཔོ སམཐབལཾ། པཊིནིསྶགྒཱནུཔསྶཱི པསྶཱསཝསེན ཙིཏྟསྶེཀགྒཏཱ ཨཝིཀྑེཔོ སམཐབལཾ།
Dvīhibalehīti dve balāni – samathabalaṃ, vipassanābalaṃ. Katamaṃ samathabalaṃ? Nekkhammavasena cittassekaggatā avikkhepo samathabalaṃ. Abyāpādavasena cittassekaggatā avikkhepo samathabalaṃ. Ālokasaññāvasena cittassekaggatā avikkhepo samathabalaṃ. Avikkhepavasena cittassekaggatā avikkhepo samathabalaṃ…pe… paṭinissaggānupassī assāsavasena cittassekaggatā avikkhepo samathabalaṃ. Paṭinissaggānupassī passāsavasena cittassekaggatā avikkhepo samathabalaṃ.
སམཐབལནྟི ཀེནཊྛེན སམཐབལཾ? པཋམེན ཛྷཱནེན ནཱིཝརཎེ ན ཀམྤཏཱིཏི – སམཐབལཾ། དུཏིཡེན ཛྷཱནེན ཝིཏཀྐཝིཙཱརེ ན ཀམྤཏཱིཏི – སམཐབལཾ། ཏཏིཡེན ཛྷཱནེན པཱིཏིཡཱ ན ཀམྤཏཱིཏི – སམཐབལཾ། ཙཏུཏྠེན ཛྷཱནེན སུཁདུཀྑེ ན ཀམྤཏཱིཏི – སམཐབལཾ། ཨཱཀཱསཱནཉྩཱཡཏནསམཱཔཏྟིཡཱ རཱུཔསཉྙཱཡ པཊིགྷསཉྙཱཡ ནཱནཏྟསཉྙཱཡ ན ཀམྤཏཱིཏི – སམཐབལཾ། ཝིཉྙཱཎཉྩཱཡཏནསམཱཔཏྟིཡཱ ཨཱཀཱསཱནཉྩཱཡཏནསཉྙཱཡ ན ཀམྤཏཱིཏི – སམཐབལཾ། ཨཱཀིཉྩཉྙཱཡཏནསམཱཔཏྟིཡཱ ཝིཉྙཱཎཉྩཱཡཏནསཉྙཱཡ ན ཀམྤཏཱིཏི – སམཐབལཾ། ནེཝསཉྙཱནཱསཉྙཱཡཏནསམཱཔཏྟིཡཱ ཨཱཀིཉྩཉྙཱཡཏནསཉྙཱཡ ན ཀམྤཏཱིཏི – སམཐབལཾ། ཨུདྡྷཙྩེ ཙ ཨུདྡྷཙྩསཧགཏཀིལེསེ ཙ ཁནྡྷེ ཙ ན ཀམྤཏི ན ཙལཏི ན ཝེདྷཏཱིཏི – སམཐབལཾ། ཨིདཾ སམཐབལཾ།
Samathabalanti kenaṭṭhena samathabalaṃ? Paṭhamena jhānena nīvaraṇe na kampatīti – samathabalaṃ. Dutiyena jhānena vitakkavicāre na kampatīti – samathabalaṃ. Tatiyena jhānena pītiyā na kampatīti – samathabalaṃ. Catutthena jhānena sukhadukkhe na kampatīti – samathabalaṃ. Ākāsānañcāyatanasamāpattiyā rūpasaññāya paṭighasaññāya nānattasaññāya na kampatīti – samathabalaṃ. Viññāṇañcāyatanasamāpattiyā ākāsānañcāyatanasaññāya na kampatīti – samathabalaṃ. Ākiñcaññāyatanasamāpattiyā viññāṇañcāyatanasaññāya na kampatīti – samathabalaṃ. Nevasaññānāsaññāyatanasamāpattiyā ākiñcaññāyatanasaññāya na kampatīti – samathabalaṃ. Uddhacce ca uddhaccasahagatakilese ca khandhe ca na kampati na calati na vedhatīti – samathabalaṃ. Idaṃ samathabalaṃ.
ཀཏམཾ ཝིཔསྶནཱབལཾ? ཨནིཙྩཱནུཔསྶནཱ ཝིཔསྶནཱབལཾ། དུཀྑཱནུཔསྶནཱ ཝིཔསྶནཱབལཾ། ཨནཏྟཱནུཔསྶནཱ ཝིཔསྶནཱབལཾ། ནིབྦིདཱནུཔསྶནཱ ཝིཔསྶནཱབལཾ། ཝིརཱགཱནུཔསྶནཱ ཝིཔསྶནཱབལཾ ། ནིརོདྷཱནུཔསྶནཱ ཝིཔསྶནཱབལཾ། པཊིནིསྶགྒཱནུཔསྶནཱ ཝིཔསྶནཱབལཾ། རཱུཔེ ཨནིཙྩཱནུཔསྶནཱ ཝིཔསྶནཱབལཾ …པེ॰… རཱུཔེ པཊིནིསྶགྒཱནུཔསྶནཱ ཝིཔསྶནཱབལཾ། ཝེདནཱཡ…པེ॰… སཉྙཱཡ… སངྑཱརེསུ… ཝིཉྙཱཎེ… ཙཀྑུསྨིཾ…པེ॰… ཛརཱམརཎེ ཨནིཙྩཱནུཔསྶནཱ ཝིཔསྶནཱབལཾ…པེ॰… ཛརཱམརཎེ པཊིནིསྶགྒཱནུཔསྶནཱ ཝིཔསྶནཱབལཾ།
Katamaṃ vipassanābalaṃ? Aniccānupassanā vipassanābalaṃ. Dukkhānupassanā vipassanābalaṃ. Anattānupassanā vipassanābalaṃ. Nibbidānupassanā vipassanābalaṃ. Virāgānupassanā vipassanābalaṃ . Nirodhānupassanā vipassanābalaṃ. Paṭinissaggānupassanā vipassanābalaṃ. Rūpe aniccānupassanā vipassanābalaṃ …pe… rūpe paṭinissaggānupassanā vipassanābalaṃ. Vedanāya…pe… saññāya… saṅkhāresu… viññāṇe… cakkhusmiṃ…pe… jarāmaraṇe aniccānupassanā vipassanābalaṃ…pe… jarāmaraṇe paṭinissaggānupassanā vipassanābalaṃ.
ཝིཔསྶནཱབལནྟི ཀེནཊྛེན ཝིཔསྶནཱབལཾ? ཨནིཙྩཱནུཔསྶནཱཡ ནིཙྩསཉྙཱཡ ན ཀམྤཏཱིཏི – ཝིཔསྶནཱབལཾ། དུཀྑཱནུཔསྶནཱཡ སུཁསཉྙཱཡ ན ཀམྤཏཱིཏི – ཝིཔསྶནཱབལཾ། ཨནཏྟཱནུཔསྶནཱཡ ཨཏྟསཉྙཱཡ ན ཀམྤཏཱིཏི – ཝིཔསྶནཱབལཾ། ནིབྦིདཱནུཔསྶནཱཡ ནནྡིཡཱ ན ཀམྤཏཱིཏི – ཝིཔསྶནཱབལཾ། ཝིརཱགཱནུཔསྶནཱཡ རཱགེ ན ཀམྤཏཱིཏི – ཝིཔསྶནཱབལཾ། ནིརོདྷཱནུཔསྶནཱཡ སམུདཡེ ན ཀམྤཏཱིཏི – ཝིཔསྶནཱབལཾ། པཊིནིསྶགྒཱནུཔསྶནཱཡ ཨཱདཱནེ ན ཀམྤཏཱིཏི – ཝིཔསྶནཱབལཾ། ཨཝིཛྫཱཡ ཙ ཨཝིཛྫཱ སཧགཏཀིལེསེ ཙ ཁནྡྷེ ཙ ན ཀམྤཏི ན ཙལཏི ན ཝེདྷཏཱིཏི – ཝིཔསྶནཱབལཾ། ཨིདཾ ཝིཔསྶནཱབལཾ།
Vipassanābalanti kenaṭṭhena vipassanābalaṃ? Aniccānupassanāya niccasaññāya na kampatīti – vipassanābalaṃ. Dukkhānupassanāya sukhasaññāya na kampatīti – vipassanābalaṃ. Anattānupassanāya attasaññāya na kampatīti – vipassanābalaṃ. Nibbidānupassanāya nandiyā na kampatīti – vipassanābalaṃ. Virāgānupassanāya rāge na kampatīti – vipassanābalaṃ. Nirodhānupassanāya samudaye na kampatīti – vipassanābalaṃ. Paṭinissaggānupassanāya ādāne na kampatīti – vipassanābalaṃ. Avijjāya ca avijjā sahagatakilese ca khandhe ca na kampati na calati na vedhatīti – vipassanābalaṃ. Idaṃ vipassanābalaṃ.
ཏཡོ ཙ སངྑཱརཱནཾ པཊིཔྤསྶདྡྷིཡཱཏི ཀཏམེསཾ ཏིཎྞནྣཾ སངྑཱརཱནཾ པཊིཔྤསྶདྡྷིཡཱ? དུཏིཡཾ ཛྷཱནཾ སམཱཔནྣསྶ ཝིཏཀྐཝིཙཱརཱ ཝཙཱིསངྑཱརཱ པཊིཔྤསྶདྡྷཱ ཧོནྟི། ཙཏུཏྠཾ ཛྷཱནཾ སམཱཔནྣསྶ ཨསྶཱསཔསྶཱསཱ ཀཱཡསངྑཱརཱ པཊིཔྤསྶདྡྷཱ ཧོནྟི། སཉྙཱཝེདཡིཏནིརོདྷཾ སམཱཔནྣསྶ སཉྙཱ ཙ ཝེདནཱ ཙ ཙིཏྟསངྑཱརཱ པཊིཔྤསྶདྡྷཱ ཧོནྟི། ཨིམེསཾ ཏིཎྞནྣཾ སངྑཱརཱནཾ པཊིཔྤསྶདྡྷིཡཱ །
Tayo ca saṅkhārānaṃ paṭippassaddhiyāti katamesaṃ tiṇṇannaṃ saṅkhārānaṃ paṭippassaddhiyā? Dutiyaṃ jhānaṃ samāpannassa vitakkavicārā vacīsaṅkhārā paṭippassaddhā honti. Catutthaṃ jhānaṃ samāpannassa assāsapassāsā kāyasaṅkhārā paṭippassaddhā honti. Saññāvedayitanirodhaṃ samāpannassa saññā ca vedanā ca cittasaṅkhārā paṭippassaddhā honti. Imesaṃ tiṇṇannaṃ saṅkhārānaṃ paṭippassaddhiyā .
༨༤. སོལ༹སཧི ཉཱཎཙརིཡཱཧཱིཏི ཀཏམཱཧི སོལ༹སཧི ཉཱཎཙརིཡཱཧི? ཨནིཙྩཱནུཔསྶནཱ ཉཱཎཙརིཡཱ, དུཀྑཱནུཔསྶནཱ ཉཱཎཙརིཡཱ, ཨནཏྟཱནུཔསྶནཱ ཉཱཎཙརིཡཱ, ནིབྦིདཱནུཔསྶནཱ ཉཱཎཙརིཡཱ, ཝིརཱགཱནུཔསྶནཱ ཉཱཎཙརིཡཱ, ནིརོདྷཱནུཔསྶནཱ ཉཱཎཙརིཡཱ, པཊིནིསྶགྒཱནུཔསྶནཱ ཉཱཎཙརིཡཱ, ཝིཝཊྚནཱནུཔསྶནཱ ཉཱཎཙརིཡཱ, སོཏཱཔཏྟིམགྒོ ཉཱཎཙརིཡཱ, སོཏཱཔཏྟིཕལསམཱཔཏྟི ཉཱཎཙརིཡཱ, སཀདཱགཱམིམགྒོ ཉཱཎཙརིཡཱ, སཀདཱགཱམིཕལསམཱཔཏྟི ཉཱཎཙརིཡཱ, ཨནཱགཱམིམགྒོ ཉཱཎཙརིཡཱ, ཨནཱགཱམིཕལསམཱཔཏྟི ཉཱཎཙརིཡཱ, ཨརཧཏྟམགྒོ ཉཱཎཙརིཡཱ, ཨརཧཏྟཕལསམཱཔཏྟི ཉཱཎཙརིཡཱ – ཨིམཱཧི སོལ༹སཧི ཉཱཎཙརིཡཱཧི།
84.Soḷasahi ñāṇacariyāhīti katamāhi soḷasahi ñāṇacariyāhi? Aniccānupassanā ñāṇacariyā, dukkhānupassanā ñāṇacariyā, anattānupassanā ñāṇacariyā, nibbidānupassanā ñāṇacariyā, virāgānupassanā ñāṇacariyā, nirodhānupassanā ñāṇacariyā, paṭinissaggānupassanā ñāṇacariyā, vivaṭṭanānupassanā ñāṇacariyā, sotāpattimaggo ñāṇacariyā, sotāpattiphalasamāpatti ñāṇacariyā, sakadāgāmimaggo ñāṇacariyā, sakadāgāmiphalasamāpatti ñāṇacariyā, anāgāmimaggo ñāṇacariyā, anāgāmiphalasamāpatti ñāṇacariyā, arahattamaggo ñāṇacariyā, arahattaphalasamāpatti ñāṇacariyā – imāhi soḷasahi ñāṇacariyāhi.
༨༥. ནཝཧི སམཱདྷིཙརིཡཱཧཱིཏི ཀཏམཱཧི ནཝཧི སམཱདྷིཙརིཡཱཧི? པཋམཾ ཛྷཱནཾ སམཱདྷིཙརིཡཱ, དུཏིཡཾ ཛྷཱནཾ སམཱདྷིཙརིཡཱ, ཏཏིཡཾ ཛྷཱནཾ སམཱདྷིཙརིཡཱ, ཙཏུཏྠཾ ཛྷཱནཾ སམཱདྷིཙརིཡཱ, ཨཱཀཱསཱནཉྩཱཡཏནསམཱཔཏྟི…པེ॰… ཝིཉྙཱཎཉྩཱཡཏནསམཱཔཏྟི… ཨཱཀིཉྩཉྙཱཡཏནསམཱཔཏྟི… ནེཝསཉྙཱནཱསཉྙཱཡཏནསམཱཔཏྟི སམཱདྷིཙརིཡཱ། པཋམཾ ཛྷཱནཾ པཊིལཱབྷཏྠཱཡ ཝིཏཀྐོ ཙ ཝིཙཱརོ ཙ པཱིཏི ཙ སུཁཉྩ ཙིཏྟེཀགྒཏཱ ཙ…པེ॰… ནེཝསཉྙཱནཱསཉྙཱཡཏནསམཱཔཏྟིཾ པཊིལཱབྷཏྠཱཡ ཝིཏཀྐོ ཙ ཝིཙཱརོ ཙ པཱིཏི ཙ སུཁཉྩ ཙིཏྟེཀགྒཏཱ ཙ – ཨིམཱཧི ནཝཧི སམཱདྷིཙརིཡཱཧི།
85.Navahi samādhicariyāhīti katamāhi navahi samādhicariyāhi? Paṭhamaṃ jhānaṃ samādhicariyā, dutiyaṃ jhānaṃ samādhicariyā, tatiyaṃ jhānaṃ samādhicariyā, catutthaṃ jhānaṃ samādhicariyā, ākāsānañcāyatanasamāpatti…pe… viññāṇañcāyatanasamāpatti… ākiñcaññāyatanasamāpatti… nevasaññānāsaññāyatanasamāpatti samādhicariyā. Paṭhamaṃ jhānaṃ paṭilābhatthāya vitakko ca vicāro ca pīti ca sukhañca cittekaggatā ca…pe… nevasaññānāsaññāyatanasamāpattiṃ paṭilābhatthāya vitakko ca vicāro ca pīti ca sukhañca cittekaggatā ca – imāhi navahi samādhicariyāhi.
ཝསཱིཏི པཉྩ ཝསིཡོ། ཨཱཝཛྫནཝསཱི, སམཱཔཛྫནཝསཱི, ཨདྷིཊྛཱནཝསཱི , ཝུཊྛཱནཝསཱི, པཙྩཝེཀྑཎཱཝསཱི། པཋམཾ ཛྷཱནཾ ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ ཨཱཝཛྫཏི; ཨཱཝཛྫནཱཡ དནྡྷཱཡིཏཏྟཾ ནཏྠཱིཏི – ཨཱཝཛྫནཝསཱི། པཋམཾ ཛྷཱནཾ ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ སམཱཔཛྫཏི; སམཱཔཛྫནཱཡ དནྡྷཱཡིཏཏྟཾ ནཏྠཱིཏི – སམཱཔཛྫནཝསཱི། པཋམཾ ཛྷཱནཾ ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ ཨདྷིཊྛཱཏི ; ཨདྷིཊྛཱནེ དནྡྷཱཡིཏཏྟཾ ནཏྠཱིཏི – ཨདྷིཊྛཱནཝསཱི། པཋམཾ ཛྷཱནཾ ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ ཝུཊྛཱཏི; ཝུཊྛཱནེ དནྡྷཱཡིཏཏྟཾ ནཏྠཱིཏི – ཝུཊྛཱནཝསཱི། པཋམཾ ཛྷཱནཾ ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ པཙྩཝེཀྑཏི; པཙྩཝེཀྑཎཱཡ དནྡྷཱཡིཏཏྟཾ ནཏྠཱིཏི – པཙྩཝེཀྑཎཱཝསཱི།
Vasīti pañca vasiyo. Āvajjanavasī, samāpajjanavasī, adhiṭṭhānavasī , vuṭṭhānavasī, paccavekkhaṇāvasī. Paṭhamaṃ jhānaṃ yatthicchakaṃ yadicchakaṃ yāvaticchakaṃ āvajjati; āvajjanāya dandhāyitattaṃ natthīti – āvajjanavasī. Paṭhamaṃ jhānaṃ yatthicchakaṃ yadicchakaṃ yāvaticchakaṃ samāpajjati; samāpajjanāya dandhāyitattaṃ natthīti – samāpajjanavasī. Paṭhamaṃ jhānaṃ yatthicchakaṃ yadicchakaṃ yāvaticchakaṃ adhiṭṭhāti ; adhiṭṭhāne dandhāyitattaṃ natthīti – adhiṭṭhānavasī. Paṭhamaṃ jhānaṃ yatthicchakaṃ yadicchakaṃ yāvaticchakaṃ vuṭṭhāti; vuṭṭhāne dandhāyitattaṃ natthīti – vuṭṭhānavasī. Paṭhamaṃ jhānaṃ yatthicchakaṃ yadicchakaṃ yāvaticchakaṃ paccavekkhati; paccavekkhaṇāya dandhāyitattaṃ natthīti – paccavekkhaṇāvasī.
དུཏིཡཾ ཛྷཱནཾ…པེ॰… ནེཝསཉྙཱནཱསཉྙཱཡཏནསམཱཔཏྟིཾ ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ ཨཱཝཛྫཏི; ཨཱཝཛྫནཱཡ དནྡྷཱཡིཏཏྟཾ ནཏྠཱིཏི – ཨཱཝཛྫནཝསཱི། ནེཝསཉྙཱནཱསཉྙཱཡཏནསམཱཔཏྟིཾ ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ སམཱཔཛྫཏི…པེ॰… ཨདྷིཊྛཱཏི… ཝུཊྛཱཏི… པཙྩཝེཀྑཏི; པཙྩཝེཀྑཎཱཡ དནྡྷཱཡིཏཏྟཾ ནཏྠཱིཏི – པཙྩཝེཀྑཎཱཝསཱི། ཨིམཱ པཉྩ ཝསིཡོ། ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘དྭཱིཧི བལེཧི སམནྣཱགཏཏྟཱ ཏཡོ ཙ སངྑཱརཱནཾ པཊིཔསྶདྡྷིཡཱ སོལ༹སཧི ཉཱཎཙརིཡཱཧི ནཝཧི སམཱདྷིཙརིཡཱཧི ཝསཱིབྷཱཝཏཱ པཉྙཱ ནིརོདྷསམཱཔཏྟིཡཱ ཉཱཎཾ’’།
Dutiyaṃ jhānaṃ…pe… nevasaññānāsaññāyatanasamāpattiṃ yatthicchakaṃ yadicchakaṃ yāvaticchakaṃ āvajjati; āvajjanāya dandhāyitattaṃ natthīti – āvajjanavasī. Nevasaññānāsaññāyatanasamāpattiṃ yatthicchakaṃ yadicchakaṃ yāvaticchakaṃ samāpajjati…pe… adhiṭṭhāti… vuṭṭhāti… paccavekkhati; paccavekkhaṇāya dandhāyitattaṃ natthīti – paccavekkhaṇāvasī. Imā pañca vasiyo. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘dvīhi balehi samannāgatattā tayo ca saṅkhārānaṃ paṭipassaddhiyā soḷasahi ñāṇacariyāhi navahi samādhicariyāhi vasībhāvatā paññā nirodhasamāpattiyā ñāṇaṃ’’.
ནིརོདྷསམཱཔཏྟིཉཱཎནིདྡེསོ ཙཏུཏྟིཾསཏིམོ།
Nirodhasamāpattiñāṇaniddeso catuttiṃsatimo.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༣༤. ནིརོདྷསམཱཔཏྟིཉཱཎནིདྡེསཝཎྞནཱ • 34. Nirodhasamāpattiñāṇaniddesavaṇṇanā
