| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༦. ནིརོདྷསུཏྟཾ
6. Nirodhasuttaṃ
༡༦༦. ཏཏྲ ཁོ ཨཱཡསྨཱ སཱརིཔུཏྟོ བྷིཀྑཱུ ཨཱམནྟེསི…པེ॰… ‘‘ཨིདྷཱཝུསོ, བྷིཀྑུ སཱིལསམྤནྣོ སམཱདྷིསམྤནྣོ པཉྙཱསམྤནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི 1 – ཨཏྠེཏཾ ཋཱནཾ། ནོ ཙེ དིཊྛེཝ དྷམྨེ ཨཉྙཾ ཨཱརཱདྷེཡྻ, ཨཏིཀྐམྨེཝ ཀབལཱི༹ཀཱརཱཧཱརབྷཀྑཱནཾ 2 དེཝཱནཾ སཧབྱཏཾ ཨཉྙཏརཾ མནོམཡཾ ཀཱཡཾ ཨུཔཔནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ཨཏྠེཏཾ ཋཱན’’ནྟི།
166. Tatra kho āyasmā sāriputto bhikkhū āmantesi…pe… ‘‘idhāvuso, bhikkhu sīlasampanno samādhisampanno paññāsampanno saññāvedayitanirodhaṃ samāpajjeyyāpi vuṭṭhaheyyāpi 3 – atthetaṃ ṭhānaṃ. No ce diṭṭheva dhamme aññaṃ ārādheyya, atikkammeva kabaḷīkārāhārabhakkhānaṃ 4 devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyāpi vuṭṭhaheyyāpi – atthetaṃ ṭhāna’’nti.
ཨེཝཾ ཝུཏྟེ ཨཱཡསྨཱ ཨུདཱཡཱི ཨཱཡསྨནྟཾ སཱརིཔུཏྟཾ ཨེཏདཝོཙ – ‘‘ཨཊྛཱནཾ ཁོ ཨེཏཾ, ཨཱཝུསོ སཱརིཔུཏྟ, ཨནཝཀཱསོ ཡཾ སོ བྷིཀྑུ ཨཏིཀྐམྨེཝ ཀབལཱི༹ཀཱརཱཧཱརབྷཀྑཱནཾ དེཝཱནཾ སཧབྱཏཾ ཨཉྙཏརཾ མནོམཡཾ ཀཱཡཾ ཨུཔཔནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ནཏྠེཏཾ ཋཱན’’ནྟི།
Evaṃ vutte āyasmā udāyī āyasmantaṃ sāriputtaṃ etadavoca – ‘‘aṭṭhānaṃ kho etaṃ, āvuso sāriputta, anavakāso yaṃ so bhikkhu atikkammeva kabaḷīkārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyāpi vuṭṭhaheyyāpi – natthetaṃ ṭhāna’’nti.
དུཏིཡམྤི ཁོ…པེ॰… ཏཏིཡམྤི ཁོ ཨཱཡསྨཱ སཱརིཔུཏྟོ བྷིཀྑཱུ ཨཱམནྟེསི – ‘‘ཨིདྷཱཝུསོ, བྷིཀྑུ སཱིལསམྤནྣོ སམཱདྷིསམྤནྣོ པཉྙཱསམྤནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ཨཏྠེཏཾ ཋཱནཾ། ནོ ཙེ དིཊྛེཝ དྷམྨེ ཨཉྙཾ ཨཱརཱདྷེཡྻ, ཨཏིཀྐམྨེཝ ཀབལཱི༹ཀཱརཱཧཱརབྷཀྑཱནཾ དེཝཱནཾ སཧབྱཏཾ ཨཉྙཏརཾ མནོམཡཾ ཀཱཡཾ ཨུཔཔནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ཨཏྠེཏཾ ཋཱན’’ནྟི།
Dutiyampi kho…pe… tatiyampi kho āyasmā sāriputto bhikkhū āmantesi – ‘‘idhāvuso, bhikkhu sīlasampanno samādhisampanno paññāsampanno saññāvedayitanirodhaṃ samāpajjeyyāpi vuṭṭhaheyyāpi – atthetaṃ ṭhānaṃ. No ce diṭṭheva dhamme aññaṃ ārādheyya, atikkammeva kabaḷīkārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyāpi vuṭṭhaheyyāpi – atthetaṃ ṭhāna’’nti.
ཏཏིཡམྤི ཁོ ཨཱཡསྨཱ ཨུདཱཡཱི ཨཱཡསྨནྟཾ སཱརིཔུཏྟཾ ཨེཏདཝོཙ – ‘‘ཨཊྛཱནཾ ཁོ ཨེཏཾ, ཨཱཝུསོ སཱརིཔུཏྟ , ཨནཝཀཱསོ ཡཾ སོ བྷིཀྑུ ཨཏིཀྐམྨེཝ ཀབལཱི༹ཀཱརཱཧཱརབྷཀྑཱནཾ དེཝཱནཾ སཧབྱཏཾ ཨཉྙཏརཾ མནོམཡཾ ཀཱཡཾ ཨུཔཔནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ནཏྠེཏཾ ཋཱན’’ནྟི།
Tatiyampi kho āyasmā udāyī āyasmantaṃ sāriputtaṃ etadavoca – ‘‘aṭṭhānaṃ kho etaṃ, āvuso sāriputta , anavakāso yaṃ so bhikkhu atikkammeva kabaḷīkārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyāpi vuṭṭhaheyyāpi – natthetaṃ ṭhāna’’nti.
ཨཐ ཁོ ཨཱཡསྨཏོ སཱརིཔུཏྟསྶ ཨེཏདཧོསི – ‘‘ཡཱཝཏཏིཡཀམྤི 5 ཁོ མེ ཨཱཡསྨཱ ཨུདཱཡཱི པཊིཀྐོསཏི, ན ཙ མེ ཀོཙི བྷིཀྑུ ཨནུམོདཏི། ཡཾནཱུནཱཧཾ ཡེན བྷགཝཱ ཏེནུཔསངྐམེཡྻ’’ནྟི། ཨཐ ཁོ ཨཱཡསྨཱ སཱརིཔུཏྟོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ སཱརིཔུཏྟོ བྷིཀྑཱུ ཨཱམནྟེསི – ‘‘ཨིདྷཱཝུསོ, བྷིཀྑུ སཱིལསམྤནྣོ སམཱདྷིསམྤནྣོ པཉྙཱསམྤནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ཨཏྠེཏཾ ཋཱནཾ། ནོ ཙེ དིཊྛེཝ དྷམྨེ ཨཉྙཾ ཨཱརཱདྷེཡྻ, ཨཏིཀྐམྨེཝ ཀབལཱི༹ཀཱརཱཧཱརབྷཀྑཱནཾ དེཝཱནཾ སཧབྱཏཾ ཨཉྙཏརཾ མནོམཡཾ ཀཱཡཾ ཨུཔཔནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ཨཏྠེཏཾ ཋཱན’’ནྟི།
Atha kho āyasmato sāriputtassa etadahosi – ‘‘yāvatatiyakampi 6 kho me āyasmā udāyī paṭikkosati, na ca me koci bhikkhu anumodati. Yaṃnūnāhaṃ yena bhagavā tenupasaṅkameyya’’nti. Atha kho āyasmā sāriputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā sāriputto bhikkhū āmantesi – ‘‘idhāvuso, bhikkhu sīlasampanno samādhisampanno paññāsampanno saññāvedayitanirodhaṃ samāpajjeyyāpi vuṭṭhaheyyāpi – atthetaṃ ṭhānaṃ. No ce diṭṭheva dhamme aññaṃ ārādheyya, atikkammeva kabaḷīkārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyāpi vuṭṭhaheyyāpi – atthetaṃ ṭhāna’’nti.
ཨེཝཾ ཝུཏྟེ ཨཱཡསྨཱ ཨུདཱཡཱི ཨཱཡསྨནྟཾ སཱརིཔུཏྟཾ ཨེཏདཝོཙ – ‘‘ཨཊྛཱནཾ ཁོ ཨེཏཾ, ཨཱཝུསོ སཱརིཔུཏྟ, ཨནཝཀཱསོ ཡཾ སོ བྷིཀྑུ ཨཏིཀྐམྨེཝ ཀབལཱི༹ཀཱརཱཧཱརབྷཀྑཱནཾ དེཝཱནཾ སཧབྱཏཾ ཨཉྙཏརཾ མནོམཡཾ ཀཱཡཾ ཨུཔཔནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ནཏྠེཏཾ ཋཱན’’ནྟི།
Evaṃ vutte āyasmā udāyī āyasmantaṃ sāriputtaṃ etadavoca – ‘‘aṭṭhānaṃ kho etaṃ, āvuso sāriputta, anavakāso yaṃ so bhikkhu atikkammeva kabaḷīkārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyāpi vuṭṭhaheyyāpi – natthetaṃ ṭhāna’’nti.
དུཏིཡམྤི ཁོ…པེ॰… ཏཏིཡམྤི ཁོ ཨཱཡསྨཱ སཱརིཔུཏྟོ བྷིཀྑཱུ ཨཱམནྟེསི – ‘‘ཨིདྷཱཝུསོ, བྷིཀྑུ སཱིལསམྤནྣོ སམཱདྷིསམྤནྣོ པཉྙཱསམྤནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ཨཏྠེཏཾ ཋཱནཾ ། ནོ ཙེ དིཊྛེཝ དྷམྨེ ཨཉྙཾ ཨཱརཱདྷེཡྻ, ཨཏིཀྐམྨེཝ ཀབལཱི༹ཀཱརཱཧཱརབྷཀྑཱནཾ དེཝཱནཾ སཧབྱཏཾ ཨཉྙཏརཾ མནོམཡཾ ཀཱཡཾ ཨུཔཔནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ཨཏྠེཏཾ ཋཱན’’ནྟི།
Dutiyampi kho…pe… tatiyampi kho āyasmā sāriputto bhikkhū āmantesi – ‘‘idhāvuso, bhikkhu sīlasampanno samādhisampanno paññāsampanno saññāvedayitanirodhaṃ samāpajjeyyāpi vuṭṭhaheyyāpi – atthetaṃ ṭhānaṃ . No ce diṭṭheva dhamme aññaṃ ārādheyya, atikkammeva kabaḷīkārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyāpi vuṭṭhaheyyāpi – atthetaṃ ṭhāna’’nti.
ཏཏིཡམྤི ཁོ ཨཱཡསྨཱ ཨུདཱཡཱི ཨཱཡསྨནྟཾ སཱརིཔུཏྟཾ ཨེཏདཝོཙ – ‘‘ཨཊྛཱནཾ ཁོ ཨེཏཾ, ཨཱཝུསོ སཱརིཔུཏྟ, ཨནཝཀཱསོ ཡཾ སོ བྷིཀྑུ ཨཏིཀྐམྨེཝ ཀབལཱི༹ཀཱརཱཧཱརབྷཀྑཱནཾ དེཝཱནཾ སཧབྱཏཾ ཨཉྙཏརཾ མནོམཡཾ ཀཱཡཾ ཨུཔཔནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ནཏྠེཏཾ ཋཱན’’ནྟི།
Tatiyampi kho āyasmā udāyī āyasmantaṃ sāriputtaṃ etadavoca – ‘‘aṭṭhānaṃ kho etaṃ, āvuso sāriputta, anavakāso yaṃ so bhikkhu atikkammeva kabaḷīkārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyāpi vuṭṭhaheyyāpi – natthetaṃ ṭhāna’’nti.
ཨཐ ཁོ ཨཱཡསྨཏོ སཱརིཔུཏྟསྶ ཨེཏདཧོསི – ‘‘བྷགཝཏོཔི ཁོ མེ སམྨུཁཱ ཨཱཡསྨཱ ཨུདཱཡཱི ཡཱཝཏཏིཡཀཾ པཊིཀྐོསཏི, ན ཙ མེ ཀོཙི བྷིཀྑུ ཨནུམོདཏི། ཡཾནཱུནཱཧཾ ཏུཎྷཱི ཨསྶ’’ནྟི། ཨཐ ཁོ ཨཱཡསྨཱ སཱརིཔུཏྟོ ཏུཎྷཱི ཨཧོསི།
Atha kho āyasmato sāriputtassa etadahosi – ‘‘bhagavatopi kho me sammukhā āyasmā udāyī yāvatatiyakaṃ paṭikkosati, na ca me koci bhikkhu anumodati. Yaṃnūnāhaṃ tuṇhī assa’’nti. Atha kho āyasmā sāriputto tuṇhī ahosi.
ཨཐ ཁོ བྷགཝཱ ཨཱཡསྨནྟཾ ཨུདཱཡིཾ ཨཱམནྟེསི – ‘‘ཀཾ པན ཏྭཾ, ཨུདཱཡི, མནོམཡཾ ཀཱཡཾ པཙྩེསཱི’’ཏི? ‘‘ཡེ ཏེ, བྷནྟེ, དེཝཱ ཨརཱུཔིནོ སཉྙཱམཡཱ’’ཏི། ‘‘ཀིཾ ནུ ཁོ ཏུཡ྄ཧཾ, ཨུདཱཡི, བཱལསྶ ཨབྱཏྟསྶ བྷཎིཏེན! ཏྭམྤི ནཱམ བྷཎིཏབྦཾ མཉྙསཱི’’ཏི! ཨཐ ཁོ བྷགཝཱ ཨཱཡསྨནྟཾ ཨཱནནྡཾ ཨཱམནྟེསི – ‘‘ཨཏྠི ནཱམ, ཨཱནནྡ, ཐེརཾ བྷིཀྑུཾ ཝིཧེསིཡམཱནཾ ཨཛ྄ཛྷུཔེཀྑིསྶཐ ། ན ཧི ནཱམ, ཨཱནནྡ, ཀཱརུཉྙམྤི བྷཝིསྶཏི ཐེརམྷི 7 བྷིཀྑུམྷི ཝིཧེསིཡམཱནམྷཱི’’ཏི།
Atha kho bhagavā āyasmantaṃ udāyiṃ āmantesi – ‘‘kaṃ pana tvaṃ, udāyi, manomayaṃ kāyaṃ paccesī’’ti? ‘‘Ye te, bhante, devā arūpino saññāmayā’’ti. ‘‘Kiṃ nu kho tuyhaṃ, udāyi, bālassa abyattassa bhaṇitena! Tvampi nāma bhaṇitabbaṃ maññasī’’ti! Atha kho bhagavā āyasmantaṃ ānandaṃ āmantesi – ‘‘atthi nāma, ānanda, theraṃ bhikkhuṃ vihesiyamānaṃ ajjhupekkhissatha . Na hi nāma, ānanda, kāruññampi bhavissati theramhi 8 bhikkhumhi vihesiyamānamhī’’ti.
ཨཐ ཁོ བྷགཝཱ བྷིཀྑཱུ ཨཱམནྟེསི – ‘‘ཨིདྷ, བྷིཀྑཝེ, བྷིཀྑུ སཱིལསམྤནྣོ སམཱདྷིསམྤནྣོ པཉྙཱསམྤནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ཨཏྠེཏཾ ཋཱནཾ། ནོ ཙེ དིཊྛེཝ དྷམྨེ ཨཉྙཾ ཨཱརཱདྷེཡྻ , ཨཏིཀྐམྨེཝ ཀབལཱི༹ཀཱརཱཧཱརབྷཀྑཱནཾ དེཝཱནཾ སཧབྱཏཾ ཨཉྙཏརཾ མནོམཡཾ ཀཱཡཾ ཨུཔཔནྣོ སཉྙཱཝེདཡིཏནིརོདྷཾ སམཱཔཛྫེཡྻཱཔི ཝུཊྛཧེཡྻཱཔི – ཨཏྠེཏཾ ཋཱན’’ནྟི། ཨིདམཝོཙ བྷགཝཱ། ཨིདཾ ཝཏྭཱན སུགཏོ ཨུཊྛཱཡཱསནཱ ཝིཧཱརཾ པཱཝིསི།
Atha kho bhagavā bhikkhū āmantesi – ‘‘idha, bhikkhave, bhikkhu sīlasampanno samādhisampanno paññāsampanno saññāvedayitanirodhaṃ samāpajjeyyāpi vuṭṭhaheyyāpi – atthetaṃ ṭhānaṃ. No ce diṭṭheva dhamme aññaṃ ārādheyya , atikkammeva kabaḷīkārāhārabhakkhānaṃ devānaṃ sahabyataṃ aññataraṃ manomayaṃ kāyaṃ upapanno saññāvedayitanirodhaṃ samāpajjeyyāpi vuṭṭhaheyyāpi – atthetaṃ ṭhāna’’nti. Idamavoca bhagavā. Idaṃ vatvāna sugato uṭṭhāyāsanā vihāraṃ pāvisi.
ཨཐ ཁོ ཨཱཡསྨཱ ཨཱནནྡོ ཨཙིརཔཀྐནྟསྶ བྷགཝཏོ ཡེནཱཡསྨཱ ཨུཔཝཱཎོ ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ ཨུཔཝཱཎཾ ཨེཏདཝོཙ – ‘‘ཨིདྷཱཝུསོ ཨུཔཝཱཎ, ཨཉྙེ ཐེརེ བྷིཀྑཱུ ཝིཧེསེནྟི། མཡཾ ཏེན ན མུཙྩཱམ། ཨནཙྪརིཡཾ ཁོ, པནེཏཾ ཨཱཝུསོ ཨུཔཝཱཎ, ཡཾ བྷགཝཱ སཱཡནྷསམཡཾ པཊིསལླཱནཱ ཝུཊྛིཏོ ཨེཏདེཝ ཨཱརབྦྷ ཨུདཱཧརེཡྻ ཡཐཱ ཨཱཡསྨནྟཾཡེཝེཏྠ ཨུཔཝཱཎཾ པཊིབྷཱསེཡྻ། ཨིདཱནེཝ ཨམྷཱཀཾ སཱརཛྫཾ ཨོཀྐནྟ’’ནྟི། ཨཐ ཁོ བྷགཝཱ སཱཡནྷསམཡཾ པཊིསལླཱནཱ ཝུཊྛིཏོ ཡེན ཨུཔཊྛཱནསཱལཱ ཏེནུཔསངྐམི; ཨུཔསངྐམིཏྭཱ པཉྙཏྟེ ཨཱསནེ ནིསཱིདི། ནིསཛྫ ཁོ བྷགཝཱ ཨཱཡསྨནྟཾ ཨུཔཝཱཎཾ ཨེཏདཝོཙ –
Atha kho āyasmā ānando acirapakkantassa bhagavato yenāyasmā upavāṇo tenupasaṅkami; upasaṅkamitvā āyasmantaṃ upavāṇaṃ etadavoca – ‘‘idhāvuso upavāṇa, aññe there bhikkhū vihesenti. Mayaṃ tena na muccāma. Anacchariyaṃ kho, panetaṃ āvuso upavāṇa, yaṃ bhagavā sāyanhasamayaṃ paṭisallānā vuṭṭhito etadeva ārabbha udāhareyya yathā āyasmantaṃyevettha upavāṇaṃ paṭibhāseyya. Idāneva amhākaṃ sārajjaṃ okkanta’’nti. Atha kho bhagavā sāyanhasamayaṃ paṭisallānā vuṭṭhito yena upaṭṭhānasālā tenupasaṅkami; upasaṅkamitvā paññatte āsane nisīdi. Nisajja kho bhagavā āyasmantaṃ upavāṇaṃ etadavoca –
‘‘ཀཏཱིཧི ནུ ཁོ, ཨུཔཝཱཎ, དྷམྨེཧི སམནྣཱགཏོ ཐེརོ བྷིཀྑུ སབྲཧྨཙཱརཱིནཾ པིཡོ ཙ ཧོཏི མནཱཔོ ཙ གརུ ཙ བྷཱཝནཱིཡོ ཙཱ’’ཏི? ‘‘པཉྩཧི, བྷནྟེ, དྷམྨེཧི སམནྣཱགཏོ ཐེརོ བྷིཀྑུ སབྲཧྨཙཱརཱིནཾ པིཡོ ཙ ཧོཏི མནཱཔོ ཙ གརུ ཙ བྷཱཝནཱིཡོ ཙ། ཀཏམེཧི པཉྩཧི? ཨིདྷ, བྷནྟེ, ཐེརོ བྷིཀྑུ སཱིལཝཱ ཧོཏི…པེ॰… སམཱདཱཡ སིཀྑཏི སིཀྑཱཔདེསུ; བཧུསྶུཏོ ཧོཏི…པེ॰… དིཊྛིཡཱ སུཔྤཊིཝིདྡྷཱ; ཀལྱཱཎཝཱཙོ ཧོཏི ཀལྱཱཎཝཱཀྐརཎོ པོརིཡཱ ཝཱཙཱཡ སམནྣཱགཏོ ཝིསྶཊྛཱཡ ཨནེལགལཱཡ 9 ཨཏྠསྶ ཝིཉྙཱཔནིཡཱ; ཙཏུནྣཾ ཛྷཱནཱནཾ ཨཱབྷིཙེཏསིཀཱནཾ དིཊྛདྷམྨསུཁཝིཧཱརཱནཾ ནིཀཱམལཱབྷཱི ཧོཏི ཨཀིཙྪལཱབྷཱི ཨཀསིརལཱབྷཱི; ཨཱསཝཱནཾ ཁཡཱ…པེ॰… སཙྪིཀཏྭཱ ཨུཔསམྤཛྫ ཝིཧརཏི། ཨིམེཧི ཁོ, བྷནྟེ, པཉྩཧི དྷམྨེཧི སམནྣཱགཏོ ཐེརོ བྷིཀྑུ སབྲཧྨཙཱརཱིནཾ པིཡོ ཙ ཧོཏི མནཱཔོ ཙ གརུ ཙ བྷཱཝནཱིཡོ ཙཱ’’ཏི།
‘‘Katīhi nu kho, upavāṇa, dhammehi samannāgato thero bhikkhu sabrahmacārīnaṃ piyo ca hoti manāpo ca garu ca bhāvanīyo cā’’ti? ‘‘Pañcahi, bhante, dhammehi samannāgato thero bhikkhu sabrahmacārīnaṃ piyo ca hoti manāpo ca garu ca bhāvanīyo ca. Katamehi pañcahi? Idha, bhante, thero bhikkhu sīlavā hoti…pe… samādāya sikkhati sikkhāpadesu; bahussuto hoti…pe… diṭṭhiyā suppaṭividdhā; kalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagalāya 10 atthassa viññāpaniyā; catunnaṃ jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; āsavānaṃ khayā…pe… sacchikatvā upasampajja viharati. Imehi kho, bhante, pañcahi dhammehi samannāgato thero bhikkhu sabrahmacārīnaṃ piyo ca hoti manāpo ca garu ca bhāvanīyo cā’’ti.
‘‘སཱདྷུ སཱདྷུ, ཨུཔཝཱཎ! ཨིམེཧི ཁོ, ཨུཔཝཱཎ, པཉྩཧི དྷམྨེཧི སམནྣཱགཏོ ཐེརོ བྷིཀྑུ སབྲཧྨཙཱརཱིནཾ པིཡོ ཙ ཧོཏི མནཱཔོ ཙ གརུ ཙ བྷཱཝནཱིཡོ ཙ། ཨིམེ ཙེ, ཨུཔཝཱཎ, པཉྩ དྷམྨཱ ཐེརསྶ བྷིཀྑུནོ ན སཾཝིཛྫེཡྻུཾ, ཏཾ སབྲཧྨཙཱརཱི ན སཀྐརེཡྻུཾ ན གརུཾ ཀརེཡྻུཾ ན མཱནེཡྻུཾ ན པཱུཛེཡྻུཾ ཁཎྜིཙྩེན པཱལིཙྩེན ཝལིཏྟཙཏཱཡ། ཡསྨཱ ཙ ཁོ, ཨུཔཝཱཎ, ཨིམེ པཉྩ དྷམྨཱ ཐེརསྶ བྷིཀྑུནོ སཾཝིཛྫནྟི, ཏསྨཱ ཏཾ སབྲཧྨཙཱརཱི སཀྐརོནྟི གརུཾ ཀརོནྟི མཱནེནྟི པཱུཛེནྟཱི’’ཏི། ཚཊྛཾ།
‘‘Sādhu sādhu, upavāṇa! Imehi kho, upavāṇa, pañcahi dhammehi samannāgato thero bhikkhu sabrahmacārīnaṃ piyo ca hoti manāpo ca garu ca bhāvanīyo ca. Ime ce, upavāṇa, pañca dhammā therassa bhikkhuno na saṃvijjeyyuṃ, taṃ sabrahmacārī na sakkareyyuṃ na garuṃ kareyyuṃ na māneyyuṃ na pūjeyyuṃ khaṇḍiccena pāliccena valittacatāya. Yasmā ca kho, upavāṇa, ime pañca dhammā therassa bhikkhuno saṃvijjanti, tasmā taṃ sabrahmacārī sakkaronti garuṃ karonti mānenti pūjentī’’ti. Chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. ནིརོདྷསུཏྟཝཎྞནཱ • 6. Nirodhasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦. ནིརོདྷསུཏྟཝཎྞནཱ • 6. Nirodhasuttavaṇṇanā
