| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೬. ನಿರೋಧಸುತ್ತವಣ್ಣನಾ
6. Nirodhasuttavaṇṇanā
೧೬೬. ಛಟ್ಠೇ ಅತ್ಥೇತಂ ಠಾನನ್ತಿ ಅತ್ಥಿ ಏತಂ ಕಾರಣಂ। ನೋ ಚೇ ದಿಟ್ಠೇವ ಧಮ್ಮೇ ಅಞ್ಞಂ ಆರಾಧೇಯ್ಯಾತಿ ನೋ ಚೇ ಇಮಸ್ಮಿಂಯೇವ ಅತ್ತಭಾವೇ ಅರಹತ್ತಂ ಪಾಪುಣೇಯ್ಯ। ಕಬಳೀಕಾರಾಹಾರಭಕ್ಖಾನಂ ದೇವಾನನ್ತಿ ಕಾಮಾವಚರದೇವಾನಂ। ಅಞ್ಞತರಂ ಮನೋಮಯಂ ಕಾಯನ್ತಿ ಝಾನಮನೇನ ನಿಬ್ಬತ್ತಂ ಅಞ್ಞತರಂ ಸುದ್ಧಾವಾಸಬ್ರಹ್ಮಕಾಯಂ। ಉದಾಯೀತಿ ಲಾಳುದಾಯೀ। ಸೋ ಹಿ ‘‘ಮನೋಮಯ’’ನ್ತಿ ಸುತ್ವಾ ‘‘ಆರುಪ್ಪೇ ನ ಭವಿತಬ್ಬ’’ನ್ತಿ ಪಟಿಬಾಹಿ। ಥೇರೋ ‘‘ಸಾರಿಪುತ್ತೋ ಕಿಂ ಜಾನಾತಿ, ಯಸ್ಸ ಸಮ್ಮುಖಾ ಏವಂ ಭಿಕ್ಖೂ ವಚನಂ ಪಟಿಕ್ಕೋಸನ್ತೀ’’ತಿ ಏವಂ ಬಾಲಾನಂ ಲದ್ಧಿಉಪ್ಪತ್ತಿಪಟಿಬಾಹನತ್ಥಂ ತಂ ವಚನಂ ಅನಧಿವಾಸೇತ್ವಾ ಯೇನ ಭಗವಾ ತೇನುಪಸಙ್ಕಮಿ।
166. Chaṭṭhe atthetaṃ ṭhānanti atthi etaṃ kāraṇaṃ. No ce diṭṭheva dhamme aññaṃ ārādheyyāti no ce imasmiṃyeva attabhāve arahattaṃ pāpuṇeyya. Kabaḷīkārāhārabhakkhānaṃ devānanti kāmāvacaradevānaṃ. Aññataraṃ manomayaṃ kāyanti jhānamanena nibbattaṃ aññataraṃ suddhāvāsabrahmakāyaṃ. Udāyīti lāḷudāyī. So hi ‘‘manomaya’’nti sutvā ‘‘āruppe na bhavitabba’’nti paṭibāhi. Thero ‘‘sāriputto kiṃ jānāti, yassa sammukhā evaṃ bhikkhū vacanaṃ paṭikkosantī’’ti evaṃ bālānaṃ laddhiuppattipaṭibāhanatthaṃ taṃ vacanaṃ anadhivāsetvā yena bhagavā tenupasaṅkami.
ಅತ್ಥಿ ನಾಮಾತಿ ಅಮರಿಸನತ್ಥೇ ನಿಪಾತೋ। ತೇನೇವ ಚೇತ್ಥ ‘‘ಅಜ್ಝುಪೇಕ್ಖಿಸ್ಸಥಾ’’ತಿ ಅನಾಗತವಚನಂ ಕತಂ। ಅಯಞ್ಹೇತ್ಥತ್ಥೋ – ಆನನ್ದ, ತುಮ್ಹೇ ಥೇರಂ ಭಿಕ್ಖುಂ ವಿಹೇಠಿಯಮಾನಂ ಅಜ್ಝುಪೇಕ್ಖಥ, ನ ವೋ ಏತಂ ಮರಿಸಯಾಮಿ ನ ಸಹಾಮಿ ನಾಧಿವಾಸೇಮೀತಿ। ಕಸ್ಮಾ ಪನ ಭಗವಾ ಆನನ್ದಥೇರಂಯೇವ ಏವಮಾಹಾತಿ? ಧಮ್ಮಭಣ್ಡಾಗಾರಿಕತ್ತಾ। ಧಮ್ಮಭಣ್ಡಾಗಾರಿಕಸ್ಸ ಹಿ ಏವಂ ವದನ್ತೋ ಪಟಿಬಾಹಿತುಂ ಭಾರೋ। ಅಪಿಚೇಸ ಸಾರಿಪುತ್ತತ್ಥೇರಸ್ಸ ಪಿಯಸಹಾಯೋ, ತೇನಾಪಿಸ್ಸ ಏಸ ಭಾರೋ। ತತ್ಥ ಕಿಞ್ಚಾಪಿ ಭಗವಾ ಆನನ್ದತ್ಥೇರಂ ಗರಹನ್ತೋ ಏವಮಾಹ, ನ ಪನೇಸಾ ತಸ್ಸೇವ ಗರಹಾ, ಸಮ್ಮುಖೀಭೂತಾನಂ ಸಬ್ಬೇಸಂಯೇವ ಗರಹಾತಿ ವೇದಿತಬ್ಬಾ। ವಿಹಾರನ್ತಿ ಗನ್ಧಕುಟಿಂ।
Atthi nāmāti amarisanatthe nipāto. Teneva cettha ‘‘ajjhupekkhissathā’’ti anāgatavacanaṃ kataṃ. Ayañhetthattho – ānanda, tumhe theraṃ bhikkhuṃ viheṭhiyamānaṃ ajjhupekkhatha, na vo etaṃ marisayāmi na sahāmi nādhivāsemīti. Kasmā pana bhagavā ānandatheraṃyeva evamāhāti? Dhammabhaṇḍāgārikattā. Dhammabhaṇḍāgārikassa hi evaṃ vadanto paṭibāhituṃ bhāro. Apicesa sāriputtattherassa piyasahāyo, tenāpissa esa bhāro. Tattha kiñcāpi bhagavā ānandattheraṃ garahanto evamāha, na panesā tasseva garahā, sammukhībhūtānaṃ sabbesaṃyeva garahāti veditabbā. Vihāranti gandhakuṭiṃ.
ಅನಚ್ಛರಿಯನ್ತಿ ನ ಅಚ್ಛರಿಯಂ। ಯಥಾತಿ ಕಾರಣವಚನಂ। ಆಯಸ್ಮನ್ತಂಯೇವೇತ್ಥ ಉಪವಾನಂ ಪಟಿಭಾಸೇಯ್ಯಾತಿ ಏತ್ಥ ಭಗವತಾ ಚ ಏವಂ ಏತದೇವ ಕಾರಣಂ ಆರಬ್ಭ ಉದಾಹಟೇ ಆಯಸ್ಮತೋಯೇವ ಉಪವಾನಸ್ಸ ಪಟಿವಚನಂ ಪಟಿಭಾತು ಉಪಟ್ಠಾತೂತಿ ದೀಪೇತಿ। ಸಾರಜ್ಜಂ ಓಕ್ಕನ್ತನ್ತಿ ದೋಮನಸ್ಸಂ ಅನುಪವಿಟ್ಠಂ। ಸೀಲವಾತಿಆದೀಹಿ ಖೀಣಾಸವಸೀಲಾದೀನಿಯೇವ ಕಥಿತಾನಿ। ಖಣ್ಡಿಚ್ಚೇನಾತಿಆದೀನಿ ಸಕ್ಕಾರಾದೀನಂ ಕಾರಣಪುಚ್ಛಾವಸೇನ ವುತ್ತಾನಿ। ಕಿಂ ಖಣ್ಡಿಚ್ಚಾದೀಹಿ ಕಾರಣೇಹಿ ತಂ ತಂ ಸಬ್ರಹ್ಮಚಾರಿಂ ಸಕ್ಕರೇಯ್ಯುನ್ತಿ ಅಯಞ್ಹೇತ್ಥ ಅಧಿಪ್ಪಾಯೋ।
Anacchariyanti na acchariyaṃ. Yathāti kāraṇavacanaṃ. Āyasmantaṃyevettha upavānaṃ paṭibhāseyyāti ettha bhagavatā ca evaṃ etadeva kāraṇaṃ ārabbha udāhaṭe āyasmatoyeva upavānassa paṭivacanaṃ paṭibhātu upaṭṭhātūti dīpeti. Sārajjaṃ okkantanti domanassaṃ anupaviṭṭhaṃ. Sīlavātiādīhi khīṇāsavasīlādīniyeva kathitāni. Khaṇḍiccenātiādīni sakkārādīnaṃ kāraṇapucchāvasena vuttāni. Kiṃ khaṇḍiccādīhi kāraṇehi taṃ taṃ sabrahmacāriṃ sakkareyyunti ayañhettha adhippāyo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೬. ನಿರೋಧಸುತ್ತಂ • 6. Nirodhasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೬. ನಿರೋಧಸುತ್ತವಣ್ಣನಾ • 6. Nirodhasuttavaṇṇanā
