| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. நிருத்திபத²ஸுத்தவண்ணனா
10. Niruttipathasuttavaṇṇanā
62. த³ஸமே நிருத்தியோவ நிருத்திபதா², அத² வா நிருத்தியோ ச தா நிருத்திவஸேன விஞ்ஞாதப்³பா³னங் அத்தா²னங் பத²த்தா பதா² சாதி நிருத்திபதா². ஸேஸபத³த்³வயேபி ஏஸேவ நயோ. தீணிபி சேதானி அஞ்ஞமஞ்ஞவேவசனானேவாதி வேதி³தப்³பா³னி. அஸங்கிண்ணாதி அவிஜஹிதா, ‘‘கோ இமேஹி அத்தோ²’’தி வத்வா அச²ட்³டி³தா. அஸங்கிண்ணபுப்³பா³தி அதீதேபி ந ஜஹிதபுப்³பா³. ந ஸங்கீயந்தீதி ஏதரஹிபி ‘‘கிமேதேஹீ’’தி ந ச²ட்³டீ³யந்தி. ந ஸங்கீயிஸ்ஸந்தீதி அனாக³தேபி ந ச²ட்³டீ³யிஸ்ஸந்தி. அப்படிகுட்டா²தி அப்படிபா³ஹிதா. அதீதந்தி அத்தனோ ஸபா⁴வங் ப⁴ங்க³மேவ வா அதிக்கந்தங். நிருத்³த⁴ந்தி தே³ஸந்தரங் அஸங்கமித்வா தத்தே²வ நிருத்³த⁴ங் வூபஸந்தங். விபரிணதந்தி விபரிணாமங் க³தங் நட்ட²ங். அஜாதந்தி அனுப்பன்னங். அபாதுபூ⁴தந்தி அபாகடீபூ⁴தங்.
62.Dasame niruttiyova niruttipathā, atha vā niruttiyo ca tā niruttivasena viññātabbānaṃ atthānaṃ pathattā pathā cāti niruttipathā. Sesapadadvayepi eseva nayo. Tīṇipi cetāni aññamaññavevacanānevāti veditabbāni. Asaṃkiṇṇāti avijahitā, ‘‘ko imehi attho’’ti vatvā achaḍḍitā. Asaṃkiṇṇapubbāti atītepi na jahitapubbā. Na saṃkīyantīti etarahipi ‘‘kimetehī’’ti na chaḍḍīyanti. Na saṃkīyissantīti anāgatepi na chaḍḍīyissanti. Appaṭikuṭṭhāti appaṭibāhitā. Atītanti attano sabhāvaṃ bhaṅgameva vā atikkantaṃ. Niruddhanti desantaraṃ asaṅkamitvā tattheva niruddhaṃ vūpasantaṃ. Vipariṇatanti vipariṇāmaṃ gataṃ naṭṭhaṃ. Ajātanti anuppannaṃ. Apātubhūtanti apākaṭībhūtaṃ.
உக்கலாதி உக்கலஜனபத³வாஸினோ. வஸ்ஸப⁴ஞ்ஞாதி வஸ்ஸோ ச ப⁴ஞ்ஞோ ச. த்³வேபி ஹி தே மூலதி³ட்டி²க³திகா. அஹேதுகவாதா³திஆதீ³ஸு ‘‘நத்தி² ஹேது நத்தி² பச்சயோ’’தி க³ஹிதத்தா அஹேதுகவாதா³. ‘‘கரோதோ ந கரீயதி பாப’’ந்தி க³ஹிதத்தா அகிரியவாதா³. ‘‘நத்தி² தி³ன்ன’’ந்திஆதி³க³ஹணதோ நத்தி²கவாதா³. தத்த² இமே த்³வே ஜனா, திஸ்ஸோ தி³ட்டி²யோ, கிங் ஏகேகஸ்ஸ தி³யட்³டா⁴ ஹோதீதி? ந ததா², யதா² பன ஏகோ பி⁴க்கு² படிபாடியா சத்தாரிபி ஜா²னானி நிப்³ப³த்தேதி , ஏவமெத்த² ஏகேகோ திஸ்ஸோபி தி³ட்டி²யோ நிப்³ப³த்தேஸீதி வேதி³தப்³போ³. ‘‘நத்தி² ஹேது நத்தி² பச்சயோ’’தி புனப்புனங் ஆவஜ்ஜெந்தஸ்ஸ ஆஹரந்தஸ்ஸ அபி⁴னந்த³ந்தஸ்ஸ அஸ்ஸாதெ³ந்தஸ்ஸ மக்³க³த³ஸ்ஸனங் விய ஹோதி. ஸோ மிச்ச²த்தனியாமங் ஓக்கமதி, ஸோ ஏகந்தகாளகோதி வுச்சதி. யதா² பன அஹேதுகதி³ட்டி²யங், ஏவங் ‘‘கரோதோ ந கரீயதி பாபங், நத்தி² தி³ன்ன’’ந்தி இமேஸுபி டா²னேஸு மிச்ச²த்தனியாமங் ஓக்கமதி.
Ukkalāti ukkalajanapadavāsino. Vassabhaññāti vasso ca bhañño ca. Dvepi hi te mūladiṭṭhigatikā. Ahetukavādātiādīsu ‘‘natthi hetu natthi paccayo’’ti gahitattā ahetukavādā. ‘‘Karoto na karīyati pāpa’’nti gahitattā akiriyavādā. ‘‘Natthi dinna’’ntiādigahaṇato natthikavādā. Tattha ime dve janā, tisso diṭṭhiyo, kiṃ ekekassa diyaḍḍhā hotīti? Na tathā, yathā pana eko bhikkhu paṭipāṭiyā cattāripi jhānāni nibbatteti , evamettha ekeko tissopi diṭṭhiyo nibbattesīti veditabbo. ‘‘Natthi hetu natthi paccayo’’ti punappunaṃ āvajjentassa āharantassa abhinandantassa assādentassa maggadassanaṃ viya hoti. So micchattaniyāmaṃ okkamati, so ekantakāḷakoti vuccati. Yathā pana ahetukadiṭṭhiyaṃ, evaṃ ‘‘karoto na karīyati pāpaṃ, natthi dinna’’nti imesupi ṭhānesu micchattaniyāmaṃ okkamati.
ந க³ரஹிதப்³ப³ங் நப்படிக்கோஸிதப்³ப³ங் அமஞ்ஞிங்ஸூதி எத்த² ‘‘யதே³தங் அதீதங் நாம, நயித³ங் அதீதங், இத³மஸ்ஸ அனாக³தங் வா பச்சுப்பன்னங் வா’’தி வத³ந்தோ க³ரஹதி நாம. தத்த² தோ³ஸங் த³ஸ்ஸெத்வா ‘‘கிங் இமினா க³ரஹிதேனா’’தி? வத³ந்தோ படிக்கோஸதி நாம. இமே பன நிருத்திபதே² தேபி அச்சந்தகாளகா தி³ட்டி²க³திகா ந க³ரஹிதப்³பே³ ந படிக்கோஸிதப்³பே³ மஞ்ஞிங்ஸு. அதீதங் பன அதீதமேவ, அனாக³தங் அனாக³தமேவ, பச்சுப்பன்னங் பச்சுப்பன்னமேவ கத²யிங்ஸு. நிந்தா³க⁴ட்டனப்³யாரோஸஉபாரம்ப⁴ப⁴யாதி விஞ்ஞூனங் ஸந்திகா நிந்தா³ப⁴யேன ச க⁴ட்டனப⁴யேன ச தோ³ஸாரோபனப⁴யேன ச உபாரம்ப⁴ப⁴யேன ச. இதி இமஸ்மிங் ஸுத்தே சதுபூ⁴மிகக²ந்தா⁴னங் பண்ணத்தி கதி²தாதி. த³ஸமங்.
Na garahitabbaṃ nappaṭikkositabbaṃ amaññiṃsūti ettha ‘‘yadetaṃ atītaṃ nāma, nayidaṃ atītaṃ, idamassa anāgataṃ vā paccuppannaṃ vā’’ti vadanto garahati nāma. Tattha dosaṃ dassetvā ‘‘kiṃ iminā garahitenā’’ti? Vadanto paṭikkosati nāma. Ime pana niruttipathe tepi accantakāḷakā diṭṭhigatikā na garahitabbe na paṭikkositabbe maññiṃsu. Atītaṃ pana atītameva, anāgataṃ anāgatameva, paccuppannaṃ paccuppannameva kathayiṃsu. Nindāghaṭṭanabyārosaupārambhabhayāti viññūnaṃ santikā nindābhayena ca ghaṭṭanabhayena ca dosāropanabhayena ca upārambhabhayena ca. Iti imasmiṃ sutte catubhūmikakhandhānaṃ paṇṇatti kathitāti. Dasamaṃ.
உபயவக்³கோ³ ச²ட்டோ².
Upayavaggo chaṭṭho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. நிருத்திபத²ஸுத்தங் • 10. Niruttipathasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. நிருத்திபத²ஸுத்தவண்ணனா • 10. Niruttipathasuttavaṇṇanā
