| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
10. нируд̇д̇ибат̇асуд̇д̇аван̣н̣анаа
10. Niruttipathasuttavaṇṇanā
62. нируд̇д̇ияова нируд̇д̇ибат̇аад̇и бат̇а-сад̣̇д̣̇зна бад̣̇авад̣дханамааха яат̇аа ‘‘б̣ийж̇ааниязва б̣ийж̇аж̇аад̇ааний’’д̇и. нируд̇д̇ивасзнаад̇и ниб̣б̣ажанавасзна. бат̇аа жа ад̇т̇аануруубабхаавад̇о . д̇ийн̣ибийд̇и нируд̇д̇иад̇хиважанабан̃н̃ад̇д̇ибат̇абад̣̇аани. д̇ат̇аа хи ‘‘пусад̇ийд̇и пассо’’д̇иаад̣̇инаа нийхарид̇ваа важанам̣ нируд̇д̇и, ‘‘сирийвад̣дхаго д̇ханавад̣дхаго’’д̇иаад̣̇инаа важанамад̇д̇амзва ад̇хигаарам̣ гад̇ваа бавад̇д̇ам̣ ад̇хиважанам̣, ‘‘д̇агго вид̇агго’’д̇иаад̣̇инаа д̇ам̣д̇ам̣багаарзна н̃аабанад̇о бан̃н̃ад̇д̇и. ат̇а ваа д̇ам̣д̇ам̣ад̇т̇аббагаасанзна нижчид̇ам̣, нияад̇ам̣ ваа важанам̣ нируд̇д̇и. ад̇хи-сад̣̇д̣̇о убарибхааг̇з, убари важанам̣ ад̇хиважанам̣. гасса убари? багаасзд̇аб̣б̣асса ад̇т̇ассаад̇и баагадояамад̇т̇о. ад̇хийнам̣ важанам̣ ад̇хиважанам̣. гзна ад̇хийнам̣? ад̇т̇зна. ад̇т̇асса бан̃н̃аабанад̇т̇зна бан̃н̃ад̇д̇ийд̇и звам̣ нируд̇д̇иаад̣̇ибад̣̇аанам̣ саб̣б̣аважанзсу бавад̇д̇и взд̣̇ид̇аб̣б̣аа. ан̃н̃ат̇аа ‘‘пусад̇ийд̇и пассо’’д̇иаад̣̇иббагаарзна нид̣̇д̇хааран̣аважанаанам̣язва нируд̇д̇ид̇аа, сиривад̣дхагад̇ханавад̣дхагабагаараанамзва абхилаабанам̣ ад̇хиважанад̇аа. ‘‘д̇агго вид̇агго’’д̇и звам̣багаараанамзва згамзва ад̇т̇ам̣ д̇зна д̇зна багаарзна н̃аабзнд̇аанам̣ важанаанам̣ бан̃н̃ад̇д̇ид̇аа жа аабаж̇ж̇зяяа. асам̣гин̣н̣аад̇и на сам̣гин̣н̣аа. д̇знааха ‘‘авиж̇ахид̇аа…бз… ачад̣д̣ид̇аа’’д̇и. на сам̣гийяанд̇ийд̇и на сам̣гирийяанд̇и, на сам̣гийяиссанд̇и на сам̣гирийяиссанд̇ийд̇и ад̇т̇о. аббадигудтаад̇и на бадигкид̇д̇аа. яасмаа бхан̇г̇ам̣ ад̇игганд̇ам̣ уббаад̣̇аад̣̇и ад̇игганд̇амзва ход̇и, д̇асмаа вуд̇д̇ам̣ ‘‘бхан̇г̇амзваа’’д̇и. яасмаа д̣̇зсанд̇арам̣ сан̇ганд̇оби ад̇игганд̇анд̇и вужжад̇и, д̇асмаа д̇ад̣̇аабхаавам̣ д̣̇ассзд̇ум̣ ‘‘д̣̇зсанд̇арам̣ асан̇гамид̇ваа’’д̇и вуд̇д̇ам̣. яад̇т̇а яад̇т̇а хи сан̇каараа уббаж̇ж̇анд̇и, д̇ад̇т̇а д̇ад̇т̇зва бхиж̇ж̇анд̇и нируж̇жханд̇и вибарин̣аманд̇и винаасам̣ аабаж̇ж̇анд̇и. д̇знааха ‘‘вибарин̣ад̇анд̇и…бз… надта’’нд̇и. абаагадийбхууд̇ам̣ аж̇аад̇ад̇д̇аа зва.
62.Niruttiyova niruttipathāti patha-saddena padavaḍḍhanamāha yathā ‘‘bījāniyeva bījajātānī’’ti. Niruttivasenāti nibbacanavasena. Pathā ca atthānurūpabhāvato . Tīṇipīti niruttiadhivacanapaññattipathapadāni. Tathā hi ‘‘phusatīti phasso’’tiādinā nīharitvā vacanaṃ nirutti, ‘‘sirīvaḍḍhako dhanavaḍḍhako’’tiādinā vacanamattameva adhikāraṃ katvā pavattaṃ adhivacanaṃ, ‘‘takko vitakko’’tiādinā taṃtaṃpakārena ñāpanato paññatti. Atha vā taṃtaṃatthappakāsanena nicchitaṃ, niyataṃ vā vacanaṃ nirutti. Adhi-saddo uparibhāge, upari vacanaṃ adhivacanaṃ. Kassa upari? Pakāsetabbassa atthassāti pākaṭoyamattho. Adhīnaṃ vacanaṃ adhivacanaṃ. Kena adhīnaṃ? Atthena. Atthassa paññāpanatthena paññattīti evaṃ niruttiādipadānaṃ sabbavacanesu pavatti veditabbā. Aññathā ‘‘phusatīti phasso’’tiādippakārena niddhāraṇavacanānaṃyeva niruttitā, sirivaḍḍhakadhanavaḍḍhakapakārānameva abhilāpanaṃ adhivacanatā. ‘‘Takko vitakko’’ti evaṃpakārānameva ekameva atthaṃ tena tena pakārena ñāpentānaṃ vacanānaṃ paññattitā ca āpajjeyya. Asaṃkiṇṇāti na saṃkiṇṇā. Tenāha ‘‘avijahitā…pe… achaḍḍitā’’ti. Na saṃkīyantīti na saṃkirīyanti, na saṃkīyissanti na saṃkirīyissantīti attho. Appaṭikuṭṭhāti na paṭikkhittā. Yasmā bhaṅgaṃ atikkantaṃ uppādādi atikkantameva hoti, tasmā vuttaṃ ‘‘bhaṅgamevā’’ti. Yasmā desantaraṃ saṅkantopi atikkantanti vuccati, tasmā tadābhāvaṃ dassetuṃ ‘‘desantaraṃ asaṅkamitvā’’ti vuttaṃ. Yattha yattha hi saṅkhārā uppajjanti, tattha tattheva bhijjanti nirujjhanti vipariṇamanti vināsaṃ āpajjanti. Tenāha ‘‘vipariṇatanti…pe… naṭṭha’’nti. Apākaṭībhūtaṃ ajātattā eva.
васабхан̣аг̇од̇д̇ад̇ааяа вассабхан̃н̃аа. муулад̣̇идтиг̇ад̇игаад̇и муулабхууд̇аа д̣̇идтиг̇ад̇игаа, имасмим̣ габбз саб̣б̣абатамам̣ д̇аад̣̇исад̣̇идтисамуббаад̣̇агаа. бунаббунам̣ ааваж̇ж̇знд̇ассаад̇и ахзд̇уваад̣̇абадисам̣яуд̇д̇аг̇ант̇ам̣ уг̇г̇ахзд̇ваа барияаабун̣ид̇ваа д̇ад̣̇ад̇т̇ам̣ виймам̣санд̇асса ‘‘над̇т̇и хзд̇у, над̇т̇и бажжаяо сад̇д̇аанам̣ сам̣гилзсааяаа’’д̇иаад̣̇инаяаббавад̇д̇ааяа лад̣̇д̇хияаа аарамман̣з мижчаасад̇и санд̇идтад̇и, ‘‘над̇т̇и хзд̇уу’’д̇иаад̣̇ивасзна ануссавуубалад̣̇д̇хз ад̇т̇з д̇ад̣̇аагаарабаривид̇агганзхи савиг̇г̇ахз вияа саруубад̇о жид̇д̇асса бажжубадтид̇з жирагаалабарижаязна ‘‘звамзд̇а’’нд̇и ниж̇жхаанагкамабхаавуубаг̇аманзна ниж̇жхаанагканд̇ияаа д̇ат̇ааг̇ахид̇з бунаббунам̣ д̇ат̇зва аасзванд̇асса б̣ахулийгаронд̇асса мижчаавид̇аггзна самаад̣̇ияамаанаа мижчаавааяаамуубад̇т̇амбхид̇аа ад̇ам̣сабхаавам̣ ‘‘д̇ам̣сабхаава’’нд̇и г̇ан̣ханд̇ий мижчаасад̇ийд̇и лад̣̇д̇ханаамаа д̇ам̣лад̣̇д̇хисахаг̇ад̇аа д̇ан̣хаа санд̇идтад̇и. яат̇аасагам̣ вид̇аггаад̣̇ибажжаяалаабхзна д̇асмим̣ аарамман̣з ад̇хидтид̇ад̇ааяа анзгаг̇г̇ад̇ам̣ бахааяа жид̇д̇ам̣ згаг̇г̇ад̇ам̣ аббид̇ам̣ вияа ход̇и мижчаасамаад̇хинаа. соби хи бажжаяависзсзхи лад̣̇д̇хабхааванааб̣ало ийд̣̇исз таанз самаад̇хаанабад̇ируубагижжагаро ход̇иязва ваалавиж̇жханаад̣̇ийсу вияаад̇и д̣̇адтаб̣б̣ам̣. д̇ат̇аа хи анзгагкад̇д̇ум̣ д̇знаагаарзна буб̣б̣абхааг̇иязсу ж̇аванаваарзсу бавад̇д̇зсу саб̣б̣абажчимз ж̇аванаваарз сад̇д̇а ж̇аванаани ж̇аванд̇и. д̇ад̇т̇а батамз сад̇згижчо ход̇и, д̇ат̇аа д̣̇уд̇ияаад̣̇ийсу. сад̇д̇амз бана ж̇аванз самбад̇д̇з ад̇згижчо ход̇и. д̇знааха ‘‘ассаад̣̇знд̇ассаа’’д̇иаад̣̇и. имзсубийд̇и д̣̇вийсуби таанзсу.
Vasabhaṇagottatāya vassabhaññā. Mūladiṭṭhigatikāti mūlabhūtā diṭṭhigatikā, imasmiṃ kappe sabbapaṭhamaṃ tādisadiṭṭhisamuppādakā. Punappunaṃ āvajjentassāti ahetuvādapaṭisaṃyuttaganthaṃ uggahetvā pariyāpuṇitvā tadatthaṃ vīmaṃsantassa ‘‘natthi hetu, natthi paccayo sattānaṃ saṃkilesāyā’’tiādinayappavattāya laddhiyā ārammaṇe micchāsati santiṭṭhati, ‘‘natthi hetū’’tiādivasena anussavūpaladdhe atthe tadākāraparivitakkanehi saviggahe viya sarūpato cittassa paccupaṭṭhite cirakālaparicayena ‘‘evameta’’nti nijjhānakkhamabhāvūpagamanena nijjhānakkhantiyā tathāgahite punappunaṃ tatheva āsevantassa bahulīkarontassa micchāvitakkena samādiyamānā micchāvāyāmūpatthambhitā ataṃsabhāvaṃ ‘‘taṃsabhāva’’nti gaṇhantī micchāsatīti laddhanāmā taṃladdhisahagatā taṇhā santiṭṭhati. Yathāsakaṃ vitakkādipaccayalābhena tasmiṃ ārammaṇe adhiṭṭhitatāya anekaggataṃ pahāya cittaṃ ekaggataṃ appitaṃ viya hoti micchāsamādhinā. Sopi hi paccayavisesehi laddhabhāvanābalo īdise ṭhāne samādhānapatirūpakiccakaro hotiyeva vālavijjhanādīsu viyāti daṭṭhabbaṃ. Tathā hi anekakkhattuṃ tenākārena pubbabhāgiyesu javanavāresu pavattesu sabbapacchime javanavāre satta javanāni javanti. Tattha paṭhame satekiccho hoti, tathā dutiyādīsu. Sattame pana javane sampatte atekiccho hoti. Tenāha ‘‘assādentassā’’tiādi. Imesupīti dvīsupi ṭhānesu.
бажжуббаннам̣ ваад̇и зд̇т̇а ид̇и-сад̣̇д̣̇о аад̣̇иад̇т̇о. д̇зна ‘‘яад̣̇зд̇ам̣ анааг̇ад̇ам̣ наама, наяид̣̇ам̣ анааг̇ад̇а’’нд̇иаад̣̇игам̣ сан̇г̇ан̣хаад̇и. д̇збийд̇и д̇з вассабхан̃н̃ааби на ман̃н̃им̣су логасаман̃н̃ааяа анад̇иггаманийяад̇о. д̇знааха ‘‘ад̇ийд̇ам̣ банаа’’д̇иаад̣̇и. канд̇хаанам̣ убари нирул̣хаа бан̣н̣ад̇д̇и.
Paccuppannaṃ vāti ettha iti-saddo ādiattho. Tena ‘‘yadetaṃ anāgataṃ nāma, nayidaṃ anāgata’’ntiādikaṃ saṅgaṇhāti. Tepīti te vassabhaññāpi na maññiṃsu lokasamaññāya anatikkamanīyato. Tenāha ‘‘atītaṃ panā’’tiādi. Khandhānaṃ upari niruḷhā paṇṇatti.
нируд̇д̇ибат̇асуд̇д̇аван̣н̣анаа нидтид̇аа.
Niruttipathasuttavaṇṇanā niṭṭhitā.
убаяаваг̇г̇аван̣н̣анаа нидтид̇аа.
Upayavaggavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 10. нируд̇д̇ибат̇асуд̇д̇ам̣ • 10. Niruttipathasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 10. нируд̇д̇ибат̇асуд̇д̇аван̣н̣анаа • 10. Niruttipathasuttavaṇṇanā
