| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
220. нисийд̣̇анаад̣̇иануж̇аананаа
220. Nisīdanādianujānanā
353. д̇зна ко бана самаязна бхигкуу бан̣ийд̇аани бхож̇анаани бхун̃ж̇ид̇ваа мудтассад̇ий асамбаж̇аанаа нид̣̇д̣̇ам̣ оггаманд̇и. д̇зсам̣ мудтассад̇ийнам̣ асамбаж̇аанаанам̣ нид̣̇д̣̇ам̣ оггаманд̇аанам̣ субинанд̇зна асужи мужжад̇и, сзнаасанам̣ асужинаа магкияад̇и. ат̇а ко бхаг̇аваа ааяасмад̇аа аананд̣̇зна бажчаасаман̣зна сзнаасанажааригам̣ аахин̣д̣анд̇о ад̣̇д̣̇аса сзнаасанам̣ асужинаа магкид̇ам̣, д̣̇исваана ааяасманд̇ам̣ аананд̣̇ам̣ ааманд̇зси – ‘‘гим̣ зд̇ам̣, аананд̣̇а, сзнаасанам̣ магкид̇а’’нд̇и? ‘‘зд̇арахи, бханд̇з, бхигкуу бан̣ийд̇аани бхож̇анаани бхун̃ж̇ид̇ваа мудтассад̇ий асамбаж̇аанаа нид̣̇д̣̇ам̣ оггаманд̇и. д̇зсам̣ мудтассад̇ийнам̣ асамбаж̇аанаанам̣ нид̣̇д̣̇ам̣ оггаманд̇аанам̣ субинанд̇зна асужи мужжад̇и; д̇аяид̣̇ам̣, бхаг̇аваа, сзнаасанам̣ асужинаа магкид̇а’’нд̇и. ‘‘звамзд̇ам̣, аананд̣̇а, звамзд̇ам̣, аананд̣̇а. мужжад̇и хи, аананд̣̇а, мудтассад̇ийнам̣ асамбаж̇аанаанам̣ нид̣̇д̣̇ам̣ оггаманд̇аанам̣ субинанд̇зна асужи. яз д̇з, аананд̣̇а, бхигкуу убадтид̇ассад̇ий самбаж̇аанаа нид̣̇д̣̇ам̣ оггаманд̇и, д̇зсам̣ асужи на мужжад̇и. язби д̇з, аананд̣̇а, бут̇уж̇ж̇анаа гаамзсу вийд̇арааг̇аа, д̇зсамби асужи на мужжад̇и. адтаанамзд̇ам̣, аананд̣̇а, анавагаасо яам̣ арахад̇о асужи мужжзяяаа’’д̇и. ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘ид̇хаахам̣, бхигкавз, аананд̣̇зна бажчаасаман̣зна сзнаасанажааригам̣ аахин̣д̣анд̇о ад̣̇д̣̇асам̣ сзнаасанам̣ асужинаа магкид̇ам̣, д̣̇исваана аананд̣̇ам̣ ааманд̇зсим̣ ‘гим̣ зд̇ам̣, аананд̣̇а, сзнаасанам̣ магкид̇а’нд̇и? ‘зд̇арахи, бханд̇з, бхигкуу бан̣ийд̇аани бхож̇анаани бхун̃ж̇ид̇ваа мудтассад̇ий асамбаж̇аанаа нид̣̇д̣̇ам̣ оггаманд̇и. д̇зсам̣ мудтассад̇ийнам̣ асамбаж̇аанаанам̣ нид̣̇д̣̇ам̣ оггаманд̇аанам̣ субинанд̇зна асужи мужжад̇и; д̇аяид̣̇ам̣, бхаг̇аваа, сзнаасанам̣ асужинаа магкид̇а’нд̇и. ‘звамзд̇ам̣, аананд̣̇а, звамзд̇ам̣, аананд̣̇а, мужжад̇и хи, аананд̣̇а, мудтассад̇ийнам̣ асамбаж̇аанаанам̣ нид̣̇д̣̇ам̣ оггаманд̇аанам̣ субинанд̇зна асужи. яз д̇з, аананд̣̇а, бхигкуу убадтид̇ассад̇ий самбаж̇аанаа нид̣̇д̣̇ам̣ оггаманд̇и, д̇зсам̣ асужи на мужжад̇и. язби д̇з, аананд̣̇а, бут̇уж̇ж̇анаа гаамзсу вийд̇арааг̇аа д̇зсамби асужи на мужжад̇и. адтаанамзд̇ам̣, аананд̣̇а, анавагаасо яам̣ арахад̇о асужи мужжзяяаа’’’д̇и.
353. Tena kho pana samayena bhikkhū paṇītāni bhojanāni bhuñjitvā muṭṭhassatī asampajānā niddaṃ okkamanti. Tesaṃ muṭṭhassatīnaṃ asampajānānaṃ niddaṃ okkamantānaṃ supinantena asuci muccati, senāsanaṃ asucinā makkhiyati. Atha kho bhagavā āyasmatā ānandena pacchāsamaṇena senāsanacārikaṃ āhiṇḍanto addasa senāsanaṃ asucinā makkhitaṃ, disvāna āyasmantaṃ ānandaṃ āmantesi – ‘‘kiṃ etaṃ, ānanda, senāsanaṃ makkhita’’nti? ‘‘Etarahi, bhante, bhikkhū paṇītāni bhojanāni bhuñjitvā muṭṭhassatī asampajānā niddaṃ okkamanti. Tesaṃ muṭṭhassatīnaṃ asampajānānaṃ niddaṃ okkamantānaṃ supinantena asuci muccati; tayidaṃ, bhagavā, senāsanaṃ asucinā makkhita’’nti. ‘‘Evametaṃ, ānanda, evametaṃ, ānanda. Muccati hi, ānanda, muṭṭhassatīnaṃ asampajānānaṃ niddaṃ okkamantānaṃ supinantena asuci. Ye te, ānanda, bhikkhū upaṭṭhitassatī sampajānā niddaṃ okkamanti, tesaṃ asuci na muccati. Yepi te, ānanda, puthujjanā kāmesu vītarāgā, tesampi asuci na muccati. Aṭṭhānametaṃ, ānanda, anavakāso yaṃ arahato asuci mucceyyā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘idhāhaṃ, bhikkhave, ānandena pacchāsamaṇena senāsanacārikaṃ āhiṇḍanto addasaṃ senāsanaṃ asucinā makkhitaṃ, disvāna ānandaṃ āmantesiṃ ‘kiṃ etaṃ, ānanda, senāsanaṃ makkhita’nti? ‘Etarahi, bhante, bhikkhū paṇītāni bhojanāni bhuñjitvā muṭṭhassatī asampajānā niddaṃ okkamanti. Tesaṃ muṭṭhassatīnaṃ asampajānānaṃ niddaṃ okkamantānaṃ supinantena asuci muccati; tayidaṃ, bhagavā, senāsanaṃ asucinā makkhita’nti. ‘Evametaṃ, ānanda, evametaṃ, ānanda, muccati hi, ānanda, muṭṭhassatīnaṃ asampajānānaṃ niddaṃ okkamantānaṃ supinantena asuci. Ye te, ānanda, bhikkhū upaṭṭhitassatī sampajānā niddaṃ okkamanti, tesaṃ asuci na muccati. Yepi te, ānanda, puthujjanā kāmesu vītarāgā tesampi asuci na muccati. Aṭṭhānametaṃ, ānanda, anavakāso yaṃ arahato asuci mucceyyā’’’ti.
‘‘бан̃жимз, бхигкавз, аад̣̇ийнаваа мудтассад̇исса асамбаж̇аанасса нид̣̇д̣̇ам̣ оггамад̇о – д̣̇угкам̣ субад̇и, д̣̇угкам̣ бадиб̣уж̇жхад̇и, баабагам̣ субинам̣ бассад̇и, д̣̇звад̇аа на рагканд̇и, асужи мужжад̇и. имз ко, бхигкавз, бан̃жа аад̣̇ийнаваа мудтассад̇исса асамбаж̇аанасса нид̣̇д̣̇ам̣ оггамад̇о.
‘‘Pañcime, bhikkhave, ādīnavā muṭṭhassatissa asampajānassa niddaṃ okkamato – dukkhaṃ supati, dukkhaṃ paṭibujjhati, pāpakaṃ supinaṃ passati, devatā na rakkhanti, asuci muccati. Ime kho, bhikkhave, pañca ādīnavā muṭṭhassatissa asampajānassa niddaṃ okkamato.
‘‘бан̃жимз , бхигкавз, аанисам̣саа убадтид̇ассад̇исса самбаж̇аанасса нид̣̇д̣̇ам̣ оггамад̇о – сукам̣ субад̇и, сукам̣ бадиб̣уж̇жхад̇и, на баабагам̣ субинам̣ бассад̇и, д̣̇звад̇аа рагканд̇и, асужи на мужжад̇и. имз ко, бхигкавз, бан̃жа аанисам̣саа убадтид̇ассад̇исса самбаж̇аанасса нид̣̇д̣̇ам̣ оггамад̇о.
‘‘Pañcime , bhikkhave, ānisaṃsā upaṭṭhitassatissa sampajānassa niddaṃ okkamato – sukhaṃ supati, sukhaṃ paṭibujjhati, na pāpakaṃ supinaṃ passati, devatā rakkhanti, asuci na muccati. Ime kho, bhikkhave, pañca ānisaṃsā upaṭṭhitassatissa sampajānassa niddaṃ okkamato.
‘‘ануж̇аанаами, бхигкавз, гааяаг̇уд̇д̇ияаа жийвараг̇уд̇д̇ияаа сзнаасанаг̇уд̇д̇ияаа нисийд̣̇ана’’нд̇и.
‘‘Anujānāmi, bhikkhave, kāyaguttiyā cīvaraguttiyā senāsanaguttiyā nisīdana’’nti.
д̇зна ко бана самаязна ад̇икуд̣̇д̣̇агам̣ нисийд̣̇анам̣ на саб̣б̣ам̣ сзнаасанам̣ сам̣г̇обзд̇и. бхаг̇авад̇о зд̇амад̇т̇ам̣ аарожзсум̣. ануж̇аанаами, бхигкавз, яаавамаханд̇ам̣ бажжад̇т̇аран̣ам̣ ааган̇кад̇и д̇аавамаханд̇ам̣ бажжад̇т̇аран̣ам̣ гаад̇унд̇и.
Tena kho pana samayena atikhuddakaṃ nisīdanaṃ na sabbaṃ senāsanaṃ saṃgopeti. Bhagavato etamatthaṃ ārocesuṃ. Anujānāmi, bhikkhave, yāvamahantaṃ paccattharaṇaṃ ākaṅkhati tāvamahantaṃ paccattharaṇaṃ kātunti.
354. д̇зна ко бана самаязна ааяасмад̇о аананд̣̇асса убаж̇жхааяасса ааяасмад̇о б̣зладтасийсасса т̇уллагажчааб̣аад̇хо ход̇и. д̇асса ласигааяа жийвараани гааяз лаг̇г̇анд̇и. д̇аани бхигкуу уд̣̇агзна д̇змзд̇ваа д̇змзд̇ваа абагад̣дханд̇и. ад̣̇д̣̇асаа ко бхаг̇аваа сзнаасанажааригам̣ аахин̣д̣анд̇о д̇з бхигкуу д̇аани жийвараани уд̣̇агзна д̇змзд̇ваа д̇змзд̇ваа абагад̣дханд̇з, д̣̇исваана язна д̇з бхигкуу д̇знубасан̇гами, убан̇гамид̇ваа д̇з бхигкуу зд̇ад̣̇авожа – ‘‘гим̣ имасса, бхигкавз, бхигкуно ааб̣аад̇хо’’д̇и? ‘‘имасса, бханд̇з, ааяасмад̇о т̇уллагажчааб̣аад̇хо. ласигааяа жийвараани гааяз лаг̇г̇анд̇и. д̇аани маяам̣ уд̣̇агзна д̇змзд̇ваа д̇змзд̇ваа абагад̣дхаамаа’’д̇и. ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘ануж̇аанаами, бхигкавз, яасса ган̣д̣у ваа бил̣агаа ваа ассааво ваа т̇уллагажчу ваа ааб̣аад̇хо ган̣д̣уббадижчаад̣̇и’’нд̇и.
354. Tena kho pana samayena āyasmato ānandassa upajjhāyassa āyasmato belaṭṭhasīsassa thullakacchābādho hoti. Tassa lasikāya cīvarāni kāye lagganti. Tāni bhikkhū udakena temetvā temetvā apakaḍḍhanti. Addasā kho bhagavā senāsanacārikaṃ āhiṇḍanto te bhikkhū tāni cīvarāni udakena temetvā temetvā apakaḍḍhante, disvāna yena te bhikkhū tenupasaṅkami, upaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato thullakacchābādho. Lasikāya cīvarāni kāye lagganti. Tāni mayaṃ udakena temetvā temetvā apakaḍḍhāmā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, yassa kaṇḍu vā piḷakā vā assāvo vā thullakacchu vā ābādho kaṇḍuppaṭicchādi’’nti.
355. ат̇а ко висаакаа миг̇аарамаад̇аа мукабун̃чанажол̣ам̣ 1 аад̣̇ааяа язна бхаг̇аваа д̇знубасан̇гами; убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇и. згаманд̇ам̣ нисиннаа ко висаакаа миг̇аарамаад̇аа бхаг̇аванд̇ам̣ зд̇ад̣̇авожа – ‘‘бадиг̇г̇ан̣хаад̇у мз, бханд̇з, бхаг̇аваа мукабун̃чанажол̣ам̣, яам̣ мамасса д̣̇ийгхарад̇д̇ам̣ хид̇ааяа сукааяаа’’д̇и. бадиг̇г̇ахзси бхаг̇аваа мукабун̃чанажол̣ам̣. ат̇а ко бхаг̇аваа висаакам̣ миг̇аарамаад̇арам̣ д̇хаммияаа гат̇ааяа санд̣̇ассзси самаад̣̇абзси самуд̇д̇зж̇зси самбахам̣сзси. ат̇а ко висаакаа миг̇аарамаад̇аа бхаг̇авад̇аа д̇хаммияаа гат̇ааяа санд̣̇ассид̇аа самаад̣̇абид̇аа самуд̇д̇зж̇ид̇аа самбахам̣сид̇аа удтааяаасанаа бхаг̇аванд̇ам̣ абхиваад̣̇зд̇ваа бад̣̇агкин̣ам̣ гад̇ваа баггаами. ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘ануж̇аанаами, бхигкавз, мукабун̃чанажол̣ага’’нд̇и 2.
355. Atha kho visākhā migāramātā mukhapuñchanacoḷaṃ 3 ādāya yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnā kho visākhā migāramātā bhagavantaṃ etadavoca – ‘‘paṭiggaṇhātu me, bhante, bhagavā mukhapuñchanacoḷaṃ, yaṃ mamassa dīgharattaṃ hitāya sukhāyā’’ti. Paṭiggahesi bhagavā mukhapuñchanacoḷaṃ. Atha kho bhagavā visākhaṃ migāramātaraṃ dhammiyā kathāya sandassesi samādapesi samuttejesi sampahaṃsesi. Atha kho visākhā migāramātā bhagavatā dhammiyā kathāya sandassitā samādapitā samuttejitā sampahaṃsitā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, mukhapuñchanacoḷaka’’nti 4.
356. д̇зна ко бана самаязна рож̇о малло ааяасмад̇о аананд̣̇асса сахааяо ход̇и. рож̇асса малласса комабилод̇игаа ааяасмад̇о аананд̣̇асса хад̇т̇з нигкид̇д̇аа ход̇и. ааяасмад̇о жа аананд̣̇асса комабилод̇игааяа ад̇т̇о ход̇и. бхаг̇авад̇о зд̇амад̇т̇ам̣ аарожзсум̣. ануж̇аанаами, бхигкавз, бан̃жахан̇г̇зхи саманнааг̇ад̇асса виссаасам̣ г̇ахзд̇ум̣ – санд̣̇идто жа ход̇и, самбхад̇д̇о жа, аалабид̇о жа, ж̇ийвад̇и жа, ж̇аанаад̇и жа, г̇ахид̇з мз ад̇д̇амано бхависсад̇ийд̇и. ануж̇аанаами, бхигкавз, имзхи бан̃жахан̇г̇зхи саманнааг̇ад̇асса виссаасам̣ г̇ахзд̇унд̇и.
356. Tena kho pana samayena rojo mallo āyasmato ānandassa sahāyo hoti. Rojassa mallassa khomapilotikā āyasmato ānandassa hatthe nikkhittā hoti. Āyasmato ca ānandassa khomapilotikāya attho hoti. Bhagavato etamatthaṃ ārocesuṃ. Anujānāmi, bhikkhave, pañcahaṅgehi samannāgatassa vissāsaṃ gahetuṃ – sandiṭṭho ca hoti, sambhatto ca, ālapito ca, jīvati ca, jānāti ca, gahite me attamano bhavissatīti. Anujānāmi, bhikkhave, imehi pañcahaṅgehi samannāgatassa vissāsaṃ gahetunti.
357. д̇зна ко бана самаязна бхигкуунам̣ барибун̣н̣ам̣ ход̇и д̇ижийварам̣. ад̇т̇о жа ход̇и бариссааванзхиби т̇авигаахиби. бхаг̇авад̇о зд̇амад̇т̇ам̣ аарожзсум̣. ануж̇аанаами, бхигкавз, баригкааражол̣аганд̇и.
357. Tena kho pana samayena bhikkhūnaṃ paripuṇṇaṃ hoti ticīvaraṃ. Attho ca hoti parissāvanehipi thavikāhipi. Bhagavato etamatthaṃ ārocesuṃ. Anujānāmi, bhikkhave, parikkhāracoḷakanti.
нисийд̣̇анаад̣̇иануж̇аананаа нидтид̇аа.
Nisīdanādianujānanā niṭṭhitā.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / ад̇ирзгажийвараад̣̇игат̇аа • Atirekacīvarādikathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / нисийд̣̇анаад̣̇иануж̇аананагат̇ааван̣н̣анаа • Nisīdanādianujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / нисийд̣̇анаад̣̇иануж̇аананагат̇ааван̣н̣анаа • Nisīdanādianujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 218. ад̇ирзгажийвараад̣̇игат̇аа • 218. Atirekacīvarādikathā
