| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༢༠. ནིསཱིདནཱདིཨནུཛཱནནཱ
220. Nisīdanādianujānanā
༣༥༣. ཏེན ཁོ པན སམཡེན བྷིཀྑཱུ པཎཱིཏཱནི བྷོཛནཱནི བྷུཉྫིཏྭཱ མུཊྛསྶཏཱི ཨསམྤཛཱནཱ ནིདྡཾ ཨོཀྐམནྟི། ཏེསཾ མུཊྛསྶཏཱིནཾ ཨསམྤཛཱནཱནཾ ནིདྡཾ ཨོཀྐམནྟཱནཾ སུཔིནནྟེན ཨསུཙི མུཙྩཏི, སེནཱསནཾ ཨསུཙིནཱ མཀྑིཡཏི། ཨཐ ཁོ བྷགཝཱ ཨཱཡསྨཏཱ ཨཱནནྡེན པཙྪཱསམཎེན སེནཱསནཙཱརིཀཾ ཨཱཧིཎྜནྟོ ཨདྡས སེནཱསནཾ ཨསུཙིནཱ མཀྑིཏཾ, དིསྭཱན ཨཱཡསྨནྟཾ ཨཱནནྡཾ ཨཱམནྟེསི – ‘‘ཀིཾ ཨེཏཾ, ཨཱནནྡ, སེནཱསནཾ མཀྑིཏ’’ནྟི? ‘‘ཨེཏརཧི, བྷནྟེ, བྷིཀྑཱུ པཎཱིཏཱནི བྷོཛནཱནི བྷུཉྫིཏྭཱ མུཊྛསྶཏཱི ཨསམྤཛཱནཱ ནིདྡཾ ཨོཀྐམནྟི། ཏེསཾ མུཊྛསྶཏཱིནཾ ཨསམྤཛཱནཱནཾ ནིདྡཾ ཨོཀྐམནྟཱནཾ སུཔིནནྟེན ཨསུཙི མུཙྩཏི; ཏཡིདཾ, བྷགཝཱ, སེནཱསནཾ ཨསུཙིནཱ མཀྑིཏ’’ནྟི། ‘‘ཨེཝམེཏཾ, ཨཱནནྡ, ཨེཝམེཏཾ, ཨཱནནྡ། མུཙྩཏི ཧི, ཨཱནནྡ, མུཊྛསྶཏཱིནཾ ཨསམྤཛཱནཱནཾ ནིདྡཾ ཨོཀྐམནྟཱནཾ སུཔིནནྟེན ཨསུཙི། ཡེ ཏེ, ཨཱནནྡ, བྷིཀྑཱུ ཨུཔཊྛིཏསྶཏཱི སམྤཛཱནཱ ནིདྡཾ ཨོཀྐམནྟི, ཏེསཾ ཨསུཙི ན མུཙྩཏི། ཡེཔི ཏེ, ཨཱནནྡ, པུཐུཛྫནཱ ཀཱམེསུ ཝཱིཏརཱགཱ, ཏེསམྤི ཨསུཙི ན མུཙྩཏི། ཨཊྛཱནམེཏཾ, ཨཱནནྡ, ཨནཝཀཱསོ ཡཾ ཨརཧཏོ ཨསུཙི མུཙྩེཡྻཱ’’ཏི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨིདྷཱཧཾ, བྷིཀྑཝེ, ཨཱནནྡེན པཙྪཱསམཎེན སེནཱསནཙཱརིཀཾ ཨཱཧིཎྜནྟོ ཨདྡསཾ སེནཱསནཾ ཨསུཙིནཱ མཀྑིཏཾ, དིསྭཱན ཨཱནནྡཾ ཨཱམནྟེསིཾ ‘ཀིཾ ཨེཏཾ, ཨཱནནྡ, སེནཱསནཾ མཀྑིཏ’ནྟི? ‘ཨེཏརཧི, བྷནྟེ, བྷིཀྑཱུ པཎཱིཏཱནི བྷོཛནཱནི བྷུཉྫིཏྭཱ མུཊྛསྶཏཱི ཨསམྤཛཱནཱ ནིདྡཾ ཨོཀྐམནྟི། ཏེསཾ མུཊྛསྶཏཱིནཾ ཨསམྤཛཱནཱནཾ ནིདྡཾ ཨོཀྐམནྟཱནཾ སུཔིནནྟེན ཨསུཙི མུཙྩཏི; ཏཡིདཾ, བྷགཝཱ, སེནཱསནཾ ཨསུཙིནཱ མཀྑིཏ’ནྟི། ‘ཨེཝམེཏཾ, ཨཱནནྡ, ཨེཝམེཏཾ, ཨཱནནྡ, མུཙྩཏི ཧི, ཨཱནནྡ, མུཊྛསྶཏཱིནཾ ཨསམྤཛཱནཱནཾ ནིདྡཾ ཨོཀྐམནྟཱནཾ སུཔིནནྟེན ཨསུཙི། ཡེ ཏེ, ཨཱནནྡ, བྷིཀྑཱུ ཨུཔཊྛིཏསྶཏཱི སམྤཛཱནཱ ནིདྡཾ ཨོཀྐམནྟི, ཏེསཾ ཨསུཙི ན མུཙྩཏི། ཡེཔི ཏེ, ཨཱནནྡ, པུཐུཛྫནཱ ཀཱམེསུ ཝཱིཏརཱགཱ ཏེསམྤི ཨསུཙི ན མུཙྩཏི། ཨཊྛཱནམེཏཾ, ཨཱནནྡ, ཨནཝཀཱསོ ཡཾ ཨརཧཏོ ཨསུཙི མུཙྩེཡྻཱ’’’ཏི།
353. Tena kho pana samayena bhikkhū paṇītāni bhojanāni bhuñjitvā muṭṭhassatī asampajānā niddaṃ okkamanti. Tesaṃ muṭṭhassatīnaṃ asampajānānaṃ niddaṃ okkamantānaṃ supinantena asuci muccati, senāsanaṃ asucinā makkhiyati. Atha kho bhagavā āyasmatā ānandena pacchāsamaṇena senāsanacārikaṃ āhiṇḍanto addasa senāsanaṃ asucinā makkhitaṃ, disvāna āyasmantaṃ ānandaṃ āmantesi – ‘‘kiṃ etaṃ, ānanda, senāsanaṃ makkhita’’nti? ‘‘Etarahi, bhante, bhikkhū paṇītāni bhojanāni bhuñjitvā muṭṭhassatī asampajānā niddaṃ okkamanti. Tesaṃ muṭṭhassatīnaṃ asampajānānaṃ niddaṃ okkamantānaṃ supinantena asuci muccati; tayidaṃ, bhagavā, senāsanaṃ asucinā makkhita’’nti. ‘‘Evametaṃ, ānanda, evametaṃ, ānanda. Muccati hi, ānanda, muṭṭhassatīnaṃ asampajānānaṃ niddaṃ okkamantānaṃ supinantena asuci. Ye te, ānanda, bhikkhū upaṭṭhitassatī sampajānā niddaṃ okkamanti, tesaṃ asuci na muccati. Yepi te, ānanda, puthujjanā kāmesu vītarāgā, tesampi asuci na muccati. Aṭṭhānametaṃ, ānanda, anavakāso yaṃ arahato asuci mucceyyā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘idhāhaṃ, bhikkhave, ānandena pacchāsamaṇena senāsanacārikaṃ āhiṇḍanto addasaṃ senāsanaṃ asucinā makkhitaṃ, disvāna ānandaṃ āmantesiṃ ‘kiṃ etaṃ, ānanda, senāsanaṃ makkhita’nti? ‘Etarahi, bhante, bhikkhū paṇītāni bhojanāni bhuñjitvā muṭṭhassatī asampajānā niddaṃ okkamanti. Tesaṃ muṭṭhassatīnaṃ asampajānānaṃ niddaṃ okkamantānaṃ supinantena asuci muccati; tayidaṃ, bhagavā, senāsanaṃ asucinā makkhita’nti. ‘Evametaṃ, ānanda, evametaṃ, ānanda, muccati hi, ānanda, muṭṭhassatīnaṃ asampajānānaṃ niddaṃ okkamantānaṃ supinantena asuci. Ye te, ānanda, bhikkhū upaṭṭhitassatī sampajānā niddaṃ okkamanti, tesaṃ asuci na muccati. Yepi te, ānanda, puthujjanā kāmesu vītarāgā tesampi asuci na muccati. Aṭṭhānametaṃ, ānanda, anavakāso yaṃ arahato asuci mucceyyā’’’ti.
‘‘པཉྩིམེ, བྷིཀྑཝེ, ཨཱདཱིནཝཱ མུཊྛསྶཏིསྶ ཨསམྤཛཱནསྶ ནིདྡཾ ཨོཀྐམཏོ – དུཀྑཾ སུཔཏི, དུཀྑཾ པཊིབུཛ྄ཛྷཏི, པཱཔཀཾ སུཔིནཾ པསྶཏི, དེཝཏཱ ན རཀྑནྟི, ཨསུཙི མུཙྩཏི། ཨིམེ ཁོ, བྷིཀྑཝེ, པཉྩ ཨཱདཱིནཝཱ མུཊྛསྶཏིསྶ ཨསམྤཛཱནསྶ ནིདྡཾ ཨོཀྐམཏོ།
‘‘Pañcime, bhikkhave, ādīnavā muṭṭhassatissa asampajānassa niddaṃ okkamato – dukkhaṃ supati, dukkhaṃ paṭibujjhati, pāpakaṃ supinaṃ passati, devatā na rakkhanti, asuci muccati. Ime kho, bhikkhave, pañca ādīnavā muṭṭhassatissa asampajānassa niddaṃ okkamato.
‘‘པཉྩིམེ , བྷིཀྑཝེ, ཨཱནིསཾསཱ ཨུཔཊྛིཏསྶཏིསྶ སམྤཛཱནསྶ ནིདྡཾ ཨོཀྐམཏོ – སུཁཾ སུཔཏི, སུཁཾ པཊིབུཛ྄ཛྷཏི, ན པཱཔཀཾ སུཔིནཾ པསྶཏི, དེཝཏཱ རཀྑནྟི, ཨསུཙི ན མུཙྩཏི། ཨིམེ ཁོ, བྷིཀྑཝེ, པཉྩ ཨཱནིསཾསཱ ཨུཔཊྛིཏསྶཏིསྶ སམྤཛཱནསྶ ནིདྡཾ ཨོཀྐམཏོ།
‘‘Pañcime , bhikkhave, ānisaṃsā upaṭṭhitassatissa sampajānassa niddaṃ okkamato – sukhaṃ supati, sukhaṃ paṭibujjhati, na pāpakaṃ supinaṃ passati, devatā rakkhanti, asuci na muccati. Ime kho, bhikkhave, pañca ānisaṃsā upaṭṭhitassatissa sampajānassa niddaṃ okkamato.
‘‘ཨནུཛཱནཱམི, བྷིཀྑཝེ, ཀཱཡགུཏྟིཡཱ ཙཱིཝརགུཏྟིཡཱ སེནཱསནགུཏྟིཡཱ ནིསཱིདན’’ནྟི།
‘‘Anujānāmi, bhikkhave, kāyaguttiyā cīvaraguttiyā senāsanaguttiyā nisīdana’’nti.
ཏེན ཁོ པན སམཡེན ཨཏིཁུདྡཀཾ ནིསཱིདནཾ ན སབྦཾ སེནཱསནཾ སཾགོཔེཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཡཱཝམཧནྟཾ པཙྩཏྠརཎཾ ཨཱཀངྑཏི ཏཱཝམཧནྟཾ པཙྩཏྠརཎཾ ཀཱཏུནྟི།
Tena kho pana samayena atikhuddakaṃ nisīdanaṃ na sabbaṃ senāsanaṃ saṃgopeti. Bhagavato etamatthaṃ ārocesuṃ. Anujānāmi, bhikkhave, yāvamahantaṃ paccattharaṇaṃ ākaṅkhati tāvamahantaṃ paccattharaṇaṃ kātunti.
༣༥༤. ཏེན ཁོ པན སམཡེན ཨཱཡསྨཏོ ཨཱནནྡསྶ ཨུཔཛ྄ཛྷཱཡསྶ ཨཱཡསྨཏོ བེལཊྛསཱིསསྶ ཐུལླཀཙྪཱབཱདྷོ ཧོཏི། ཏསྶ ལསིཀཱཡ ཙཱིཝརཱནི ཀཱཡེ ལགྒནྟི། ཏཱནི བྷིཀྑཱུ ཨུདཀེན ཏེམེཏྭཱ ཏེམེཏྭཱ ཨཔཀཌྜྷནྟི། ཨདྡསཱ ཁོ བྷགཝཱ སེནཱསནཙཱརིཀཾ ཨཱཧིཎྜནྟོ ཏེ བྷིཀྑཱུ ཏཱནི ཙཱིཝརཱནི ཨུདཀེན ཏེམེཏྭཱ ཏེམེཏྭཱ ཨཔཀཌྜྷནྟེ, དིསྭཱན ཡེན ཏེ བྷིཀྑཱུ ཏེནུཔསངྐམི, ཨུཔངྐམིཏྭཱ ཏེ བྷིཀྑཱུ ཨེཏདཝོཙ – ‘‘ཀིཾ ཨིམསྶ, བྷིཀྑཝེ, བྷིཀྑུནོ ཨཱབཱདྷོ’’ཏི? ‘‘ཨིམསྶ, བྷནྟེ, ཨཱཡསྨཏོ ཐུལླཀཙྪཱབཱདྷོ། ལསིཀཱཡ ཙཱིཝརཱནི ཀཱཡེ ལགྒནྟི། ཏཱནི མཡཾ ཨུདཀེན ཏེམེཏྭཱ ཏེམེཏྭཱ ཨཔཀཌྜྷཱམཱ’’ཏི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཡསྶ ཀཎྜུ ཝཱ པིལ༹ཀཱ ཝཱ ཨསྶཱཝོ ཝཱ ཐུལླཀཙྪུ ཝཱ ཨཱབཱདྷོ ཀཎྜུཔྤཊིཙྪཱདི’’ནྟི།
354. Tena kho pana samayena āyasmato ānandassa upajjhāyassa āyasmato belaṭṭhasīsassa thullakacchābādho hoti. Tassa lasikāya cīvarāni kāye lagganti. Tāni bhikkhū udakena temetvā temetvā apakaḍḍhanti. Addasā kho bhagavā senāsanacārikaṃ āhiṇḍanto te bhikkhū tāni cīvarāni udakena temetvā temetvā apakaḍḍhante, disvāna yena te bhikkhū tenupasaṅkami, upaṅkamitvā te bhikkhū etadavoca – ‘‘kiṃ imassa, bhikkhave, bhikkhuno ābādho’’ti? ‘‘Imassa, bhante, āyasmato thullakacchābādho. Lasikāya cīvarāni kāye lagganti. Tāni mayaṃ udakena temetvā temetvā apakaḍḍhāmā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, yassa kaṇḍu vā piḷakā vā assāvo vā thullakacchu vā ābādho kaṇḍuppaṭicchādi’’nti.
༣༥༥. ཨཐ ཁོ ཝིསཱཁཱ མིགཱརམཱཏཱ མུཁཔུཉྪནཙོལ༹ཾ 1 ཨཱདཱཡ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཱ ཁོ ཝིསཱཁཱ མིགཱརམཱཏཱ བྷགཝནྟཾ ཨེཏདཝོཙ – ‘‘པཊིགྒཎྷཱཏུ མེ, བྷནྟེ, བྷགཝཱ མུཁཔུཉྪནཙོལ༹ཾ, ཡཾ མམསྶ དཱིགྷརཏྟཾ ཧིཏཱཡ སུཁཱཡཱ’’ཏི། པཊིགྒཧེསི བྷགཝཱ མུཁཔུཉྪནཙོལ༹ཾ། ཨཐ ཁོ བྷགཝཱ ཝིསཱཁཾ མིགཱརམཱཏརཾ དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསི། ཨཐ ཁོ ཝིསཱཁཱ མིགཱརམཱཏཱ བྷགཝཏཱ དྷམྨིཡཱ ཀཐཱཡ སནྡསྶིཏཱ སམཱདཔིཏཱ སམུཏྟེཛིཏཱ སམྤཧཾསིཏཱ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, མུཁཔུཉྪནཙོལ༹ཀ’’ནྟི 2།
355. Atha kho visākhā migāramātā mukhapuñchanacoḷaṃ 3 ādāya yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnā kho visākhā migāramātā bhagavantaṃ etadavoca – ‘‘paṭiggaṇhātu me, bhante, bhagavā mukhapuñchanacoḷaṃ, yaṃ mamassa dīgharattaṃ hitāya sukhāyā’’ti. Paṭiggahesi bhagavā mukhapuñchanacoḷaṃ. Atha kho bhagavā visākhaṃ migāramātaraṃ dhammiyā kathāya sandassesi samādapesi samuttejesi sampahaṃsesi. Atha kho visākhā migāramātā bhagavatā dhammiyā kathāya sandassitā samādapitā samuttejitā sampahaṃsitā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, mukhapuñchanacoḷaka’’nti 4.
༣༥༦. ཏེན ཁོ པན སམཡེན རོཛོ མལློ ཨཱཡསྨཏོ ཨཱནནྡསྶ སཧཱཡོ ཧོཏི། རོཛསྶ མལླསྶ ཁོམཔིལོཏིཀཱ ཨཱཡསྨཏོ ཨཱནནྡསྶ ཧཏྠེ ནིཀྑིཏྟཱ ཧོཏི། ཨཱཡསྨཏོ ཙ ཨཱནནྡསྶ ཁོམཔིལོཏིཀཱཡ ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, པཉྩཧངྒེཧི སམནྣཱགཏསྶ ཝིསྶཱསཾ གཧེཏུཾ – སནྡིཊྛོ ཙ ཧོཏི, སམྦྷཏྟོ ཙ, ཨཱལཔིཏོ ཙ, ཛཱིཝཏི ཙ, ཛཱནཱཏི ཙ, གཧིཏེ མེ ཨཏྟམནོ བྷཝིསྶཏཱིཏི། ཨནུཛཱནཱམི, བྷིཀྑཝེ, ཨིམེཧི པཉྩཧངྒེཧི སམནྣཱགཏསྶ ཝིསྶཱསཾ གཧེཏུནྟི།
356. Tena kho pana samayena rojo mallo āyasmato ānandassa sahāyo hoti. Rojassa mallassa khomapilotikā āyasmato ānandassa hatthe nikkhittā hoti. Āyasmato ca ānandassa khomapilotikāya attho hoti. Bhagavato etamatthaṃ ārocesuṃ. Anujānāmi, bhikkhave, pañcahaṅgehi samannāgatassa vissāsaṃ gahetuṃ – sandiṭṭho ca hoti, sambhatto ca, ālapito ca, jīvati ca, jānāti ca, gahite me attamano bhavissatīti. Anujānāmi, bhikkhave, imehi pañcahaṅgehi samannāgatassa vissāsaṃ gahetunti.
༣༥༧. ཏེན ཁོ པན སམཡེན བྷིཀྑཱུནཾ པརིཔུཎྞཾ ཧོཏི ཏིཙཱིཝརཾ། ཨཏྠོ ཙ ཧོཏི པརིསྶཱཝནེཧིཔི ཐཝིཀཱཧིཔི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, པརིཀྑཱརཙོལ༹ཀནྟི།
357. Tena kho pana samayena bhikkhūnaṃ paripuṇṇaṃ hoti ticīvaraṃ. Attho ca hoti parissāvanehipi thavikāhipi. Bhagavato etamatthaṃ ārocesuṃ. Anujānāmi, bhikkhave, parikkhāracoḷakanti.
ནིསཱིདནཱདིཨནུཛཱནནཱ ནིཊྛིཏཱ།
Nisīdanādianujānanā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཨཏིརེཀཙཱིཝརཱདིཀཐཱ • Atirekacīvarādikathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ནིསཱིདནཱདིཨནུཛཱནནཀཐཱཝཎྞནཱ • Nisīdanādianujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ནིསཱིདནཱདིཨནུཛཱནནཀཐཱཝཎྞནཱ • Nisīdanādianujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༢༡༨. ཨཏིརེཀཙཱིཝརཱདིཀཐཱ • 218. Atirekacīvarādikathā
