| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
5. நிஸீத³னஸந்த²தஸிக்கா²பத³ங்
5. Nisīdanasanthatasikkhāpadaṃ
565. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ப⁴க³வா பி⁴க்கூ² ஆமந்தேஸி – ‘‘இச்சா²மஹங், பி⁴க்க²வே, தேமாஸங் படிஸல்லீயிதுங். நம்ஹி கேனசி உபஸங்கமிதப்³போ³, அஞ்ஞத்ர ஏகேன பிண்ட³பாதனீஹாரகேனா’’தி. ‘‘ஏவங், ப⁴ந்தே,’’தி கோ² தே பி⁴க்கூ² ப⁴க³வதோ படிஸ்ஸுணித்வா நாஸ்ஸுத⁴ கோசி ப⁴க³வந்தங் உபஸங்கமதி, அஞ்ஞத்ர ஏகேன பிண்ட³பாதனீஹாரகேன. தேன கோ² பன ஸமயேன ஸாவத்தி²யா ஸங்கே⁴ன கதிகா கதா ஹோதி – ‘‘இச்ச²தாவுஸோ, ப⁴க³வா தேமாஸங் படிஸல்லீயிதுங். ந ப⁴க³வா கேனசி உபஸங்கமிதப்³போ³ , அஞ்ஞத்ர ஏகேன பிண்ட³பாதனீஹாரகேன. யோ ப⁴க³வந்தங் உபஸங்கமதி ஸோ பாசித்தியங் தே³ஸாபேதப்³போ³’’தி. அத² கோ² ஆயஸ்மா உபஸேனோ வங்க³ந்தபுத்தோ, ஸபரிஸோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஆசிண்ணங் கோ² பனேதங் பு³த்³தா⁴னங் ப⁴க³வந்தானங் ஆக³ந்துகேஹி பி⁴க்கூ²ஹி ஸத்³தி⁴ங் படிஸம்மோதி³துங். அத² கோ² ப⁴க³வா ஆயஸ்மந்தங் உபஸேனங் வங்க³ந்தபுத்தங் ஏதத³வோச – ‘‘கச்சி வோ, உபஸேன, க²மனீயங் கச்சி யாபனீயங், கச்சித்த² அப்பகிலமதே²ன அத்³தா⁴னங் ஆக³தா’’தி? ‘‘க²மனீயங் , ப⁴க³வா, யாபனீயங், ப⁴க³வா. அப்பகிலமதே²ன ச மயங், ப⁴ந்தே, அத்³தா⁴னங் ஆக³தா’’தி.
565. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Atha kho bhagavā bhikkhū āmantesi – ‘‘icchāmahaṃ, bhikkhave, temāsaṃ paṭisallīyituṃ. Namhi kenaci upasaṅkamitabbo, aññatra ekena piṇḍapātanīhārakenā’’ti. ‘‘Evaṃ, bhante,’’ti kho te bhikkhū bhagavato paṭissuṇitvā nāssudha koci bhagavantaṃ upasaṅkamati, aññatra ekena piṇḍapātanīhārakena. Tena kho pana samayena sāvatthiyā saṅghena katikā katā hoti – ‘‘icchatāvuso, bhagavā temāsaṃ paṭisallīyituṃ. Na bhagavā kenaci upasaṅkamitabbo , aññatra ekena piṇḍapātanīhārakena. Yo bhagavantaṃ upasaṅkamati so pācittiyaṃ desāpetabbo’’ti. Atha kho āyasmā upaseno vaṅgantaputto, sapariso yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā āyasmantaṃ upasenaṃ vaṅgantaputtaṃ etadavoca – ‘‘kacci vo, upasena, khamanīyaṃ kacci yāpanīyaṃ, kaccittha appakilamathena addhānaṃ āgatā’’ti? ‘‘Khamanīyaṃ , bhagavā, yāpanīyaṃ, bhagavā. Appakilamathena ca mayaṃ, bhante, addhānaṃ āgatā’’ti.
தேன கோ² பன ஸமயேன ஆயஸ்மதோ உபஸேனஸ்ஸ வங்க³ந்தபுத்தஸ்ஸ ஸத்³தி⁴விஹாரிகோ பி⁴க்கு² ப⁴க³வதோ அவிதூ³ரே நிஸின்னோ ஹோதி. அத² கோ² ப⁴க³வா தங் பி⁴க்கு²ங் ஏதத³வோச – ‘‘மனாபானி தே, பி⁴க்கு², பங்ஸுகூலானீ’’தி? ‘‘ந கோ² மே, ப⁴ந்தே, மனாபானி பங்ஸுகூலானீ’’தி. ‘‘கிஸ்ஸ பன த்வங், பி⁴க்கு², பங்ஸுகூலிகோ’’தி? ‘‘உபஜ்ஜா²யோ மே, ப⁴ந்தே, பங்ஸுகூலிகோ. ஏவங் அஹம்பி பங்ஸுகூலிகோ’’தி. அத² கோ² ப⁴க³வா ஆயஸ்மந்தங் உபஸேனங் வங்க³ந்தபுத்தங் ஏதத³வோச – ‘‘பாஸாதி³கா கோ² த்யாயங், உபஸேன, பரிஸா. கத²ங் த்வங், உபஸேன, பரிஸங் வினேஸீ’’தி? ‘‘யோ மங், ப⁴ந்தே, உபஸம்பத³ங் யாசதி தமஹங் 1 ஏவங் வதா³மி – ‘அஹங் கோ², ஆவுஸோ, ஆரஞ்ஞிகோ பிண்ட³பாதிகோ பங்ஸுகூலிகோ. ஸசே த்வம்பி ஆரஞ்ஞிகோ ப⁴விஸ்ஸஸி பிண்ட³பாதிகோ பங்ஸுகூலிகோ, ஏவாஹங் தங் உபஸம்பாதெ³ஸ்ஸாமீ’தி. ஸசே மே படிஸ்ஸுணாதி உபஸம்பாதே³மி, நோ சே மே படிஸ்ஸுணாதி ந உபஸம்பாதே³மி. யோ மங் நிஸ்ஸயங் யாசதி தமஹங் 2 ஏவங் வதா³மி – ‘அஹங் கோ², ஆவுஸோ, ஆரஞ்ஞிகோ பிண்ட³பாதிகோ பங்ஸுகூலிகோ. ஸசே த்வம்பி ஆரஞ்ஞிகோ ப⁴விஸ்ஸஸி பிண்ட³பாதிகோ பங்ஸுகூலிகோ, ஏவாஹங் தே நிஸ்ஸயங் த³ஸ்ஸாமீ’தி. ஸசே மே படிஸ்ஸுணாதி நிஸ்ஸயங் தே³மி, நோ சே மே படிஸ்ஸுணாதி ந நிஸ்ஸயங் தே³மி. ஏவங் கோ² அஹங், ப⁴ந்தே, பரிஸங் வினேமீ’’தி.
Tena kho pana samayena āyasmato upasenassa vaṅgantaputtassa saddhivihāriko bhikkhu bhagavato avidūre nisinno hoti. Atha kho bhagavā taṃ bhikkhuṃ etadavoca – ‘‘manāpāni te, bhikkhu, paṃsukūlānī’’ti? ‘‘Na kho me, bhante, manāpāni paṃsukūlānī’’ti. ‘‘Kissa pana tvaṃ, bhikkhu, paṃsukūliko’’ti? ‘‘Upajjhāyo me, bhante, paṃsukūliko. Evaṃ ahampi paṃsukūliko’’ti. Atha kho bhagavā āyasmantaṃ upasenaṃ vaṅgantaputtaṃ etadavoca – ‘‘pāsādikā kho tyāyaṃ, upasena, parisā. Kathaṃ tvaṃ, upasena, parisaṃ vinesī’’ti? ‘‘Yo maṃ, bhante, upasampadaṃ yācati tamahaṃ 3 evaṃ vadāmi – ‘ahaṃ kho, āvuso, āraññiko piṇḍapātiko paṃsukūliko. Sace tvampi āraññiko bhavissasi piṇḍapātiko paṃsukūliko, evāhaṃ taṃ upasampādessāmī’ti. Sace me paṭissuṇāti upasampādemi, no ce me paṭissuṇāti na upasampādemi. Yo maṃ nissayaṃ yācati tamahaṃ 4 evaṃ vadāmi – ‘ahaṃ kho, āvuso, āraññiko piṇḍapātiko paṃsukūliko. Sace tvampi āraññiko bhavissasi piṇḍapātiko paṃsukūliko, evāhaṃ te nissayaṃ dassāmī’ti. Sace me paṭissuṇāti nissayaṃ demi, no ce me paṭissuṇāti na nissayaṃ demi. Evaṃ kho ahaṃ, bhante, parisaṃ vinemī’’ti.
‘‘ஸாது⁴ ஸாது⁴, உபஸேன. ஸாது⁴ கோ² த்வங், உபஸேன, பரிஸங் வினேஸி . ஜானாஸி பன த்வங், உபஸேன, ஸாவத்தி²யா ஸங்க⁴ஸ்ஸ கதிக’’ந்தி? ‘‘ந கோ² அஹங், ப⁴ந்தே, ஜானாமி ஸாவத்தி²யா ஸங்க⁴ஸ்ஸ கதிக’’ந்தி. ‘‘ஸாவத்தி²யா கோ², உபஸேன, ஸங்கே⁴ன கதிகா கதா – ‘இச்ச²தாவுஸோ, ப⁴க³வா தேமாஸங் படிஸல்லீயிதுங். ந ப⁴க³வா கேனசி உபஸங்கமிதப்³போ³, அஞ்ஞத்ர ஏகேன பிண்ட³பாதனீஹாரகேன. யோ ப⁴க³வந்தங் உபஸங்கமதி ஸோ பாசித்தியங் தே³ஸாபேதப்³போ³’தி. ‘‘பஞ்ஞாயிஸ்ஸதி, ப⁴ந்தே, ஸாவத்தி²யா ஸங்கோ⁴ ஸகாய கதிகாய, ந மயங் அபஞ்ஞத்தங் பஞ்ஞபெஸ்ஸாம பஞ்ஞத்தங் வா ந ஸமுச்சி²ந்தி³ஸ்ஸாம, யதா²பஞ்ஞத்தேஸு ஸிக்கா²பதே³ஸு ஸமாதா³ய வத்திஸ்ஸாமா’’தி. ‘‘ஸாது⁴ ஸாது⁴, உபஸேன, அபஞ்ஞத்தங் ந பஞ்ஞபேதப்³ப³ங், பஞ்ஞத்தங் வா ந ஸமுச்சி²ந்தி³தப்³ப³ங், யதா²பஞ்ஞத்தேஸு ஸிக்கா²பதே³ஸு ஸமாதா³ய வத்திதப்³ப³ங். அனுஜானாமி, உபஸேன, யே தே பி⁴க்கூ² ஆரஞ்ஞிகா பிண்ட³பாதிகா பங்ஸுகூலிகா யதா²ஸுக²ங் மங் த³ஸ்ஸனாய உபஸங்கமந்தூ’’தி.
‘‘Sādhu sādhu, upasena. Sādhu kho tvaṃ, upasena, parisaṃ vinesi . Jānāsi pana tvaṃ, upasena, sāvatthiyā saṅghassa katika’’nti? ‘‘Na kho ahaṃ, bhante, jānāmi sāvatthiyā saṅghassa katika’’nti. ‘‘Sāvatthiyā kho, upasena, saṅghena katikā katā – ‘icchatāvuso, bhagavā temāsaṃ paṭisallīyituṃ. Na bhagavā kenaci upasaṅkamitabbo, aññatra ekena piṇḍapātanīhārakena. Yo bhagavantaṃ upasaṅkamati so pācittiyaṃ desāpetabbo’ti. ‘‘Paññāyissati, bhante, sāvatthiyā saṅgho sakāya katikāya, na mayaṃ apaññattaṃ paññapessāma paññattaṃ vā na samucchindissāma, yathāpaññattesu sikkhāpadesu samādāya vattissāmā’’ti. ‘‘Sādhu sādhu, upasena, apaññattaṃ na paññapetabbaṃ, paññattaṃ vā na samucchinditabbaṃ, yathāpaññattesu sikkhāpadesu samādāya vattitabbaṃ. Anujānāmi, upasena, ye te bhikkhū āraññikā piṇḍapātikā paṃsukūlikā yathāsukhaṃ maṃ dassanāya upasaṅkamantū’’ti.
566. தேன கோ² பன ஸமயேன ஸம்ப³ஹுலா பி⁴க்கூ² ப³ஹித்³வாரகொட்ட²கே டி²தா ஹொந்தி – ‘‘மயங் ஆயஸ்மந்தங் உபஸேனங் வங்க³ந்தபுத்தங் பாசித்தியங் தே³ஸாபெஸ்ஸாமா’’தி . அத² கோ² ஆயஸ்மா உபஸேனோ வங்க³ந்தபுத்தோ ஸபரிஸோ உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி. அத² கோ² தே பி⁴க்கூ² ஆயஸ்மந்தங் உபஸேனங் வங்க³ந்தபுத்தங் ஏதத³வோசுங் – ‘‘ஜானாஸி த்வங், ஆவுஸோ உபஸேன, ஸாவத்தி²யா ஸங்க⁴ஸ்ஸ கதிக’’ந்தி. ‘‘ப⁴க³வாபி மங், ஆவுஸோ, ஏவமாஹ – ‘ஜானாஸி பன த்வங், உபஸேன, ஸாவத்தி²யா ஸங்க⁴ஸ்ஸ கதிக’ந்தி? ந கோ² அஹங், ப⁴ந்தே, ஜானாமி ஸாவத்தி²யா ஸங்க⁴ஸ்ஸ கதிக’’ந்தி. ‘‘ஸாவத்தி²யா கோ², உபஸேன, ஸங்கே⁴ன கதிகா கதா – இச்ச²தாவுஸோ, ப⁴க³வா தேமாஸங் படிஸல்லீயிதுங். ந ப⁴க³வா கேனசி உபஸங்கமிதப்³போ³, அஞ்ஞத்ர ஏகேன பிண்ட³பாதனீஹாரகேன. யோ ப⁴க³வந்தங் உபஸங்கமதி ஸோ பாசித்தியங் தே³ஸாபேதப்³போ³’’தி. ‘‘பஞ்ஞாயிஸ்ஸதி, ப⁴ந்தே, ஸாவத்தி²யா ஸங்கோ⁴ ஸகாய கதிகாய, ந மயங் அபஞ்ஞத்தங் பஞ்ஞபெஸ்ஸாம பஞ்ஞத்தங் வா ந ஸமுச்சி²ந்தி³ஸ்ஸாம, யதா²பஞ்ஞத்தேஸு ஸிக்கா²பதே³ஸு ஸமாதா³ய வத்திஸ்ஸாமாதி. அனுஞ்ஞாதாவுஸோ, ப⁴க³வதா – ‘யே தே பி⁴க்கூ² ஆரஞ்ஞிகா பிண்ட³பாதிகா பங்ஸுகூலிகா யதா²ஸுக²ங் மங் த³ஸ்ஸனாய உபஸங்கமந்தூ’’’தி.
566. Tena kho pana samayena sambahulā bhikkhū bahidvārakoṭṭhake ṭhitā honti – ‘‘mayaṃ āyasmantaṃ upasenaṃ vaṅgantaputtaṃ pācittiyaṃ desāpessāmā’’ti . Atha kho āyasmā upaseno vaṅgantaputto sapariso uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho te bhikkhū āyasmantaṃ upasenaṃ vaṅgantaputtaṃ etadavocuṃ – ‘‘jānāsi tvaṃ, āvuso upasena, sāvatthiyā saṅghassa katika’’nti. ‘‘Bhagavāpi maṃ, āvuso, evamāha – ‘jānāsi pana tvaṃ, upasena, sāvatthiyā saṅghassa katika’nti? Na kho ahaṃ, bhante, jānāmi sāvatthiyā saṅghassa katika’’nti. ‘‘Sāvatthiyā kho, upasena, saṅghena katikā katā – icchatāvuso, bhagavā temāsaṃ paṭisallīyituṃ. Na bhagavā kenaci upasaṅkamitabbo, aññatra ekena piṇḍapātanīhārakena. Yo bhagavantaṃ upasaṅkamati so pācittiyaṃ desāpetabbo’’ti. ‘‘Paññāyissati, bhante, sāvatthiyā saṅgho sakāya katikāya, na mayaṃ apaññattaṃ paññapessāma paññattaṃ vā na samucchindissāma, yathāpaññattesu sikkhāpadesu samādāya vattissāmāti. Anuññātāvuso, bhagavatā – ‘ye te bhikkhū āraññikā piṇḍapātikā paṃsukūlikā yathāsukhaṃ maṃ dassanāya upasaṅkamantū’’’ti.
அத² கோ² தே பி⁴க்கூ² – ‘‘ஸச்சங் கோ² ஆயஸ்மா உபஸேனோ ஆஹ – ‘ந அபஞ்ஞத்தங் பஞ்ஞபேதப்³ப³ங், பஞ்ஞத்தங் வா ந ஸமுச்சி²ந்தி³தப்³ப³ங், யதா²பஞ்ஞத்தேஸு ஸிக்கா²பதே³ஸு ஸமாதா³ய வத்திதப்³ப³’’’ந்தி. அஸ்ஸோஸுங் கோ² பி⁴க்கூ² – ‘‘அனுஞ்ஞாதா கிர ப⁴க³வதா – ‘யே தே பி⁴க்கூ² ஆரஞ்ஞிகா பிண்ட³பாதிகா பங்ஸுகூலிகா யதா²ஸுக²ங் மங் த³ஸ்ஸனாய உபஸங்கமந்தூ’’’தி. தே ப⁴க³வந்தங் த³ஸ்ஸனங் பிஹெந்தா 5 ஸந்த²தானி உஜ்ஜி²த்வா ஆரஞ்ஞிகங்க³ங் பிண்ட³பாதிகங்க³ங் பங்ஸுகூலிகங்க³ங் ஸமாதி³யிங்ஸு. அத² கோ² ப⁴க³வா ஸம்ப³ஹுலேஹி பி⁴க்கூ²ஹி ஸத்³தி⁴ங் ஸேனாஸனசாரிகங் ஆஹிண்ட³ந்தோ அத்³த³ஸ ஸந்த²தானி தஹங் தஹங் உஜ்ஜி²தானி. பஸ்ஸித்வா பி⁴க்கூ² ஆமந்தேஸி – ‘‘கஸ்ஸிமானி, பி⁴க்க²வே, ஸந்த²தானி தஹங் தஹங் உஜ்ஜி²தானீ’’தி? அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, பி⁴க்கூ²னங் ஸிக்கா²பத³ங் பஞ்ஞபெஸ்ஸாமி த³ஸ அத்த²வஸே படிச்ச – ஸங்க⁴ஸுட்டு²தாய, ஸங்க⁴பா²ஸுதாய,…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
Atha kho te bhikkhū – ‘‘saccaṃ kho āyasmā upaseno āha – ‘na apaññattaṃ paññapetabbaṃ, paññattaṃ vā na samucchinditabbaṃ, yathāpaññattesu sikkhāpadesu samādāya vattitabba’’’nti. Assosuṃ kho bhikkhū – ‘‘anuññātā kira bhagavatā – ‘ye te bhikkhū āraññikā piṇḍapātikā paṃsukūlikā yathāsukhaṃ maṃ dassanāya upasaṅkamantū’’’ti. Te bhagavantaṃ dassanaṃ pihentā 6 santhatāni ujjhitvā āraññikaṅgaṃ piṇḍapātikaṅgaṃ paṃsukūlikaṅgaṃ samādiyiṃsu. Atha kho bhagavā sambahulehi bhikkhūhi saddhiṃ senāsanacārikaṃ āhiṇḍanto addasa santhatāni tahaṃ tahaṃ ujjhitāni. Passitvā bhikkhū āmantesi – ‘‘kassimāni, bhikkhave, santhatāni tahaṃ tahaṃ ujjhitānī’’ti? Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhūnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya, saṅghaphāsutāya,…pe… evañca pana, bhikkhave, imaṃ sikkhāpadaṃ uddiseyyātha –
567. ‘‘நிஸீத³னஸந்த²தங் பன பி⁴க்கு²னா காரயமானேன புராணஸந்த²தஸ்ஸ ஸாமந்தா ஸுக³தவித³த்தி² ஆதா³தப்³பா³ து³ப்³ப³ண்ணகரணாய, அனாதா³ சே பி⁴க்கு² புராணஸந்த²தஸ்ஸ ஸாமந்தா ஸுக³தவித³த்தி²ங் நவங் நிஸீத³னஸந்த²தங் காராபெய்ய, நிஸ்ஸக்³கி³யங் பாசித்திய’’ந்தி.
567.‘‘Nisīdanasanthataṃpana bhikkhunā kārayamānena purāṇasanthatassa sāmantā sugatavidatthi ādātabbā dubbaṇṇakaraṇāya, anādā ce bhikkhu purāṇasanthatassa sāmantā sugatavidatthiṃ navaṃ nisīdanasanthataṃ kārāpeyya, nissaggiyaṃ pācittiya’’nti.
568. நிஸீத³னங் நாம ஸத³ஸங் வுச்சதி.
568.Nisīdanaṃ nāma sadasaṃ vuccati.
ஸந்த²தங் நாம ஸந்த²ரித்வா கதங் ஹோதி அவாயிமங்.
Santhataṃ nāma santharitvā kataṃ hoti avāyimaṃ.
காரயமானேனாதி கரொந்தோ வா காராபெந்தோ வா.
Kārayamānenāti karonto vā kārāpento vā.
புராணஸந்த²தங் நாம ஸகிங் நிவத்த²ம்பி ஸகிங் பாருதம்பி.
Purāṇasanthataṃ nāma sakiṃ nivatthampi sakiṃ pārutampi.
ஸாமந்தா ஸுக³தவித³த்தி² ஆதா³தப்³பா³ து³ப்³ப³ண்ணகரணாயாதி தி²ரபா⁴வாய வட்டங் வா சதுரஸ்ஸங் வா சி²ந்தி³த்வா ஏகதே³ஸே வா ஸந்த²ரிதப்³ப³ங் விஜடெத்வா வா ஸந்த²ரிதப்³ப³ங்.
Sāmantā sugatavidatthi ādātabbā dubbaṇṇakaraṇāyāti thirabhāvāya vaṭṭaṃ vā caturassaṃ vā chinditvā ekadese vā santharitabbaṃ vijaṭetvā vā santharitabbaṃ.
அனாதா³ சே பி⁴க்கு² புராணஸந்த²தஸ்ஸ ஸாமந்தா ஸுக³தவித³த்தி²ந்தி அனாதி³யித்வா புராணஸந்த²தஸ்ஸ ஸாமந்தா ஸுக³தவித³த்தி²ங் நவங் நிஸீத³னஸந்த²தங் கரோதி வா காராபேதி வா, பயோகே³ து³க்கடங், படிலாபே⁴ன நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… இத³ங் மே, ப⁴ந்தே, நிஸீத³னஸந்த²தங் அனாதி³யித்வா புராணஸந்த²தஸ்ஸ ஸாமந்தா ஸுக³தவித³த்தி²ங் காராபிதங் நிஸ்ஸக்³கி³யங். இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… ஆயஸ்மதோ த³ம்மீதி.
Anādā ce bhikkhu purāṇasanthatassa sāmantā sugatavidatthinti anādiyitvā purāṇasanthatassa sāmantā sugatavidatthiṃ navaṃ nisīdanasanthataṃ karoti vā kārāpeti vā, payoge dukkaṭaṃ, paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, nisīdanasanthataṃ anādiyitvā purāṇasanthatassa sāmantā sugatavidatthiṃ kārāpitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… āyasmato dammīti.
569. அத்தனா விப்பகதங் அத்தனா பரியோஸாபேதி, நிஸ்ஸக்³கி³யங் பாசித்தியங். அத்தனா விப்பகதங் பரேஹி பரியோஸாபேதி, நிஸ்ஸக்³கி³யங் பாசித்தியங். பரேஹி விப்பகதங் அத்தனா பரியோஸாபேதி, நிஸ்ஸக்³கி³யங் பாசித்தியங். பரேஹி விப்பகதங் பரேஹி பரியோஸாபேதி, நிஸ்ஸக்³கி³யங் பாசித்தியங்.
569. Attanā vippakataṃ attanā pariyosāpeti, nissaggiyaṃ pācittiyaṃ. Attanā vippakataṃ parehi pariyosāpeti, nissaggiyaṃ pācittiyaṃ. Parehi vippakataṃ attanā pariyosāpeti, nissaggiyaṃ pācittiyaṃ. Parehi vippakataṃ parehi pariyosāpeti, nissaggiyaṃ pācittiyaṃ.
அஞ்ஞஸ்ஸத்தா²ய கரோதி வா காராபேதி வா, ஆபத்தி து³க்கடஸ்ஸ.
Aññassatthāya karoti vā kārāpeti vā, āpatti dukkaṭassa.
570. அனாபத்தி – புராணஸந்த²தஸ்ஸ ஸாமந்தா ஸுக³தவித³த்தி²ங் ஆதி³யித்வா கரோதி, அலப⁴ந்தோ தோ²கதரங் ஆதி³யித்வா கரோதி, அலப⁴ந்தோ அனாதி³யித்வா கரோதி, அஞ்ஞேன கதங் படிலபி⁴த்வா பரிபு⁴ஞ்ஜதி, விதானங் வா பூ⁴மத்த²ரணங் வா ஸாணிபாகாரங் வா பி⁴ஸிங் வா பி³ப்³போ³ஹனங் வா கரோதி, உம்மத்தகஸ்ஸ ஆதி³கம்மிகஸ்ஸாதி.
570. Anāpatti – purāṇasanthatassa sāmantā sugatavidatthiṃ ādiyitvā karoti, alabhanto thokataraṃ ādiyitvā karoti, alabhanto anādiyitvā karoti, aññena kataṃ paṭilabhitvā paribhuñjati, vitānaṃ vā bhūmattharaṇaṃ vā sāṇipākāraṃ vā bhisiṃ vā bibbohanaṃ vā karoti, ummattakassa ādikammikassāti.
நிஸீத³னஸந்த²தஸிக்கா²பத³ங் நிட்டி²தங் பஞ்சமங்.
Nisīdanasanthatasikkhāpadaṃ niṭṭhitaṃ pañcamaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. நிஸீத³னஸந்த²தஸிக்கா²பத³வண்ணனா • 5. Nisīdanasanthatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. நிஸீத³னஸந்த²தஸிக்கா²பத³வண்ணனா • 5. Nisīdanasanthatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. நிஸீத³னஸந்த²தஸிக்கா²பத³வண்ணனா • 5. Nisīdanasanthatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. நிஸீத³னஸந்த²தஸிக்கா²பத³வண்ணனா • 5. Nisīdanasanthatasikkhāpadavaṇṇanā
