| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༥. ནིསཱིདནསནྠཏསིཀྑཱཔདཾ
5. Nisīdanasanthatasikkhāpadaṃ
༥༦༥. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཨཐ ཁོ བྷགཝཱ བྷིཀྑཱུ ཨཱམནྟེསི – ‘‘ཨིཙྪཱམཧཾ, བྷིཀྑཝེ, ཏེམཱསཾ པཊིསལླཱིཡིཏུཾ། ནམྷི ཀེནཙི ཨུཔསངྐམིཏབྦོ, ཨཉྙཏྲ ཨེཀེན པིཎྜཔཱཏནཱིཧཱརཀེནཱ’’ཏི། ‘‘ཨེཝཾ, བྷནྟེ,’’ཏི ཁོ ཏེ བྷིཀྑཱུ བྷགཝཏོ པཊིསྶུཎིཏྭཱ ནཱསྶུདྷ ཀོཙི བྷགཝནྟཾ ཨུཔསངྐམཏི, ཨཉྙཏྲ ཨེཀེན པིཎྜཔཱཏནཱིཧཱརཀེན། ཏེན ཁོ པན སམཡེན སཱཝཏྠིཡཱ སངྒྷེན ཀཏིཀཱ ཀཏཱ ཧོཏི – ‘‘ཨིཙྪཏཱཝུསོ, བྷགཝཱ ཏེམཱསཾ པཊིསལླཱིཡིཏུཾ། ན བྷགཝཱ ཀེནཙི ཨུཔསངྐམིཏབྦོ , ཨཉྙཏྲ ཨེཀེན པིཎྜཔཱཏནཱིཧཱརཀེན། ཡོ བྷགཝནྟཾ ཨུཔསངྐམཏི སོ པཱཙིཏྟིཡཾ དེསཱཔེཏབྦོ’’ཏི། ཨཐ ཁོ ཨཱཡསྨཱ ཨུཔསེནོ ཝངྒནྟཔུཏྟོ, སཔརིསོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨཱཙིཎྞཾ ཁོ པནེཏཾ བུདྡྷཱནཾ བྷགཝནྟཱནཾ ཨཱགནྟུཀེཧི བྷིཀྑཱུཧི སདྡྷིཾ པཊིསམྨོདིཏུཾ། ཨཐ ཁོ བྷགཝཱ ཨཱཡསྨནྟཾ ཨུཔསེནཾ ཝངྒནྟཔུཏྟཾ ཨེཏདཝོཙ – ‘‘ཀཙྩི ཝོ, ཨུཔསེན, ཁམནཱིཡཾ ཀཙྩི ཡཱཔནཱིཡཾ, ཀཙྩིཏྠ ཨཔྤཀིལམཐེན ཨདྡྷཱནཾ ཨཱགཏཱ’’ཏི? ‘‘ཁམནཱིཡཾ , བྷགཝཱ, ཡཱཔནཱིཡཾ, བྷགཝཱ། ཨཔྤཀིལམཐེན ཙ མཡཾ, བྷནྟེ, ཨདྡྷཱནཾ ཨཱགཏཱ’’ཏི།
565. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Atha kho bhagavā bhikkhū āmantesi – ‘‘icchāmahaṃ, bhikkhave, temāsaṃ paṭisallīyituṃ. Namhi kenaci upasaṅkamitabbo, aññatra ekena piṇḍapātanīhārakenā’’ti. ‘‘Evaṃ, bhante,’’ti kho te bhikkhū bhagavato paṭissuṇitvā nāssudha koci bhagavantaṃ upasaṅkamati, aññatra ekena piṇḍapātanīhārakena. Tena kho pana samayena sāvatthiyā saṅghena katikā katā hoti – ‘‘icchatāvuso, bhagavā temāsaṃ paṭisallīyituṃ. Na bhagavā kenaci upasaṅkamitabbo , aññatra ekena piṇḍapātanīhārakena. Yo bhagavantaṃ upasaṅkamati so pācittiyaṃ desāpetabbo’’ti. Atha kho āyasmā upaseno vaṅgantaputto, sapariso yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā āyasmantaṃ upasenaṃ vaṅgantaputtaṃ etadavoca – ‘‘kacci vo, upasena, khamanīyaṃ kacci yāpanīyaṃ, kaccittha appakilamathena addhānaṃ āgatā’’ti? ‘‘Khamanīyaṃ , bhagavā, yāpanīyaṃ, bhagavā. Appakilamathena ca mayaṃ, bhante, addhānaṃ āgatā’’ti.
ཏེན ཁོ པན སམཡེན ཨཱཡསྨཏོ ཨུཔསེནསྶ ཝངྒནྟཔུཏྟསྶ སདྡྷིཝིཧཱརིཀོ བྷིཀྑུ བྷགཝཏོ ཨཝིདཱུརེ ནིསིནྣོ ཧོཏི། ཨཐ ཁོ བྷགཝཱ ཏཾ བྷིཀྑུཾ ཨེཏདཝོཙ – ‘‘མནཱཔཱནི ཏེ, བྷིཀྑུ, པཾསུཀཱུལཱནཱི’’ཏི? ‘‘ན ཁོ མེ, བྷནྟེ, མནཱཔཱནི པཾསུཀཱུལཱནཱི’’ཏི། ‘‘ཀིསྶ པན ཏྭཾ, བྷིཀྑུ, པཾསུཀཱུལིཀོ’’ཏི? ‘‘ཨུཔཛ྄ཛྷཱཡོ མེ, བྷནྟེ, པཾསུཀཱུལིཀོ། ཨེཝཾ ཨཧམྤི པཾསུཀཱུལིཀོ’’ཏི། ཨཐ ཁོ བྷགཝཱ ཨཱཡསྨནྟཾ ཨུཔསེནཾ ཝངྒནྟཔུཏྟཾ ཨེཏདཝོཙ – ‘‘པཱསཱདིཀཱ ཁོ ཏྱཱཡཾ, ཨུཔསེན, པརིསཱ། ཀཐཾ ཏྭཾ, ཨུཔསེན, པརིསཾ ཝིནེསཱི’’ཏི? ‘‘ཡོ མཾ, བྷནྟེ, ཨུཔསམྤདཾ ཡཱཙཏི ཏམཧཾ 1 ཨེཝཾ ཝདཱམི – ‘ཨཧཾ ཁོ, ཨཱཝུསོ, ཨཱརཉྙིཀོ པིཎྜཔཱཏིཀོ པཾསུཀཱུལིཀོ། སཙེ ཏྭམྤི ཨཱརཉྙིཀོ བྷཝིསྶསི པིཎྜཔཱཏིཀོ པཾསུཀཱུལིཀོ, ཨེཝཱཧཾ ཏཾ ཨུཔསམྤཱདེསྶཱམཱི’ཏི། སཙེ མེ པཊིསྶུཎཱཏི ཨུཔསམྤཱདེམི, ནོ ཙེ མེ པཊིསྶུཎཱཏི ན ཨུཔསམྤཱདེམི། ཡོ མཾ ནིསྶཡཾ ཡཱཙཏི ཏམཧཾ 2 ཨེཝཾ ཝདཱམི – ‘ཨཧཾ ཁོ, ཨཱཝུསོ, ཨཱརཉྙིཀོ པིཎྜཔཱཏིཀོ པཾསུཀཱུལིཀོ། སཙེ ཏྭམྤི ཨཱརཉྙིཀོ བྷཝིསྶསི པིཎྜཔཱཏིཀོ པཾསུཀཱུལིཀོ, ཨེཝཱཧཾ ཏེ ནིསྶཡཾ དསྶཱམཱི’ཏི། སཙེ མེ པཊིསྶུཎཱཏི ནིསྶཡཾ དེམི, ནོ ཙེ མེ པཊིསྶུཎཱཏི ན ནིསྶཡཾ དེམི། ཨེཝཾ ཁོ ཨཧཾ, བྷནྟེ, པརིསཾ ཝིནེམཱི’’ཏི།
Tena kho pana samayena āyasmato upasenassa vaṅgantaputtassa saddhivihāriko bhikkhu bhagavato avidūre nisinno hoti. Atha kho bhagavā taṃ bhikkhuṃ etadavoca – ‘‘manāpāni te, bhikkhu, paṃsukūlānī’’ti? ‘‘Na kho me, bhante, manāpāni paṃsukūlānī’’ti. ‘‘Kissa pana tvaṃ, bhikkhu, paṃsukūliko’’ti? ‘‘Upajjhāyo me, bhante, paṃsukūliko. Evaṃ ahampi paṃsukūliko’’ti. Atha kho bhagavā āyasmantaṃ upasenaṃ vaṅgantaputtaṃ etadavoca – ‘‘pāsādikā kho tyāyaṃ, upasena, parisā. Kathaṃ tvaṃ, upasena, parisaṃ vinesī’’ti? ‘‘Yo maṃ, bhante, upasampadaṃ yācati tamahaṃ 3 evaṃ vadāmi – ‘ahaṃ kho, āvuso, āraññiko piṇḍapātiko paṃsukūliko. Sace tvampi āraññiko bhavissasi piṇḍapātiko paṃsukūliko, evāhaṃ taṃ upasampādessāmī’ti. Sace me paṭissuṇāti upasampādemi, no ce me paṭissuṇāti na upasampādemi. Yo maṃ nissayaṃ yācati tamahaṃ 4 evaṃ vadāmi – ‘ahaṃ kho, āvuso, āraññiko piṇḍapātiko paṃsukūliko. Sace tvampi āraññiko bhavissasi piṇḍapātiko paṃsukūliko, evāhaṃ te nissayaṃ dassāmī’ti. Sace me paṭissuṇāti nissayaṃ demi, no ce me paṭissuṇāti na nissayaṃ demi. Evaṃ kho ahaṃ, bhante, parisaṃ vinemī’’ti.
‘‘སཱདྷུ སཱདྷུ, ཨུཔསེན། སཱདྷུ ཁོ ཏྭཾ, ཨུཔསེན, པརིསཾ ཝིནེསི ། ཛཱནཱསི པན ཏྭཾ, ཨུཔསེན, སཱཝཏྠིཡཱ སངྒྷསྶ ཀཏིཀ’’ནྟི? ‘‘ན ཁོ ཨཧཾ, བྷནྟེ, ཛཱནཱམི སཱཝཏྠིཡཱ སངྒྷསྶ ཀཏིཀ’’ནྟི། ‘‘སཱཝཏྠིཡཱ ཁོ, ཨུཔསེན, སངྒྷེན ཀཏིཀཱ ཀཏཱ – ‘ཨིཙྪཏཱཝུསོ, བྷགཝཱ ཏེམཱསཾ པཊིསལླཱིཡིཏུཾ། ན བྷགཝཱ ཀེནཙི ཨུཔསངྐམིཏབྦོ, ཨཉྙཏྲ ཨེཀེན པིཎྜཔཱཏནཱིཧཱརཀེན། ཡོ བྷགཝནྟཾ ཨུཔསངྐམཏི སོ པཱཙིཏྟིཡཾ དེསཱཔེཏབྦོ’ཏི། ‘‘པཉྙཱཡིསྶཏི, བྷནྟེ, སཱཝཏྠིཡཱ སངྒྷོ སཀཱཡ ཀཏིཀཱཡ, ན མཡཾ ཨཔཉྙཏྟཾ པཉྙཔེསྶཱམ པཉྙཏྟཾ ཝཱ ན སམུཙྪིནྡིསྶཱམ, ཡཐཱཔཉྙཏྟེསུ སིཀྑཱཔདེསུ སམཱདཱཡ ཝཏྟིསྶཱམཱ’’ཏི། ‘‘སཱདྷུ སཱདྷུ, ཨུཔསེན, ཨཔཉྙཏྟཾ ན པཉྙཔེཏབྦཾ, པཉྙཏྟཾ ཝཱ ན སམུཙྪིནྡིཏབྦཾ, ཡཐཱཔཉྙཏྟེསུ སིཀྑཱཔདེསུ སམཱདཱཡ ཝཏྟིཏབྦཾ། ཨནུཛཱནཱམི, ཨུཔསེན, ཡེ ཏེ བྷིཀྑཱུ ཨཱརཉྙིཀཱ པིཎྜཔཱཏིཀཱ པཾསུཀཱུལིཀཱ ཡཐཱསུཁཾ མཾ དསྶནཱཡ ཨུཔསངྐམནྟཱུ’’ཏི།
‘‘Sādhu sādhu, upasena. Sādhu kho tvaṃ, upasena, parisaṃ vinesi . Jānāsi pana tvaṃ, upasena, sāvatthiyā saṅghassa katika’’nti? ‘‘Na kho ahaṃ, bhante, jānāmi sāvatthiyā saṅghassa katika’’nti. ‘‘Sāvatthiyā kho, upasena, saṅghena katikā katā – ‘icchatāvuso, bhagavā temāsaṃ paṭisallīyituṃ. Na bhagavā kenaci upasaṅkamitabbo, aññatra ekena piṇḍapātanīhārakena. Yo bhagavantaṃ upasaṅkamati so pācittiyaṃ desāpetabbo’ti. ‘‘Paññāyissati, bhante, sāvatthiyā saṅgho sakāya katikāya, na mayaṃ apaññattaṃ paññapessāma paññattaṃ vā na samucchindissāma, yathāpaññattesu sikkhāpadesu samādāya vattissāmā’’ti. ‘‘Sādhu sādhu, upasena, apaññattaṃ na paññapetabbaṃ, paññattaṃ vā na samucchinditabbaṃ, yathāpaññattesu sikkhāpadesu samādāya vattitabbaṃ. Anujānāmi, upasena, ye te bhikkhū āraññikā piṇḍapātikā paṃsukūlikā yathāsukhaṃ maṃ dassanāya upasaṅkamantū’’ti.
༥༦༦. ཏེན ཁོ པན སམཡེན སམྦཧུལཱ བྷིཀྑཱུ བཧིདྭཱརཀོཊྛཀེ ཋིཏཱ ཧོནྟི – ‘‘མཡཾ ཨཱཡསྨནྟཾ ཨུཔསེནཾ ཝངྒནྟཔུཏྟཾ པཱཙིཏྟིཡཾ དེསཱཔེསྶཱམཱ’’ཏི ། ཨཐ ཁོ ཨཱཡསྨཱ ཨུཔསེནོ ཝངྒནྟཔུཏྟོ སཔརིསོ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི། ཨཐ ཁོ ཏེ བྷིཀྑཱུ ཨཱཡསྨནྟཾ ཨུཔསེནཾ ཝངྒནྟཔུཏྟཾ ཨེཏདཝོཙུཾ – ‘‘ཛཱནཱསི ཏྭཾ, ཨཱཝུསོ ཨུཔསེན, སཱཝཏྠིཡཱ སངྒྷསྶ ཀཏིཀ’’ནྟི། ‘‘བྷགཝཱཔི མཾ, ཨཱཝུསོ, ཨེཝམཱཧ – ‘ཛཱནཱསི པན ཏྭཾ, ཨུཔསེན, སཱཝཏྠིཡཱ སངྒྷསྶ ཀཏིཀ’ནྟི? ན ཁོ ཨཧཾ, བྷནྟེ, ཛཱནཱམི སཱཝཏྠིཡཱ སངྒྷསྶ ཀཏིཀ’’ནྟི། ‘‘སཱཝཏྠིཡཱ ཁོ, ཨུཔསེན, སངྒྷེན ཀཏིཀཱ ཀཏཱ – ཨིཙྪཏཱཝུསོ, བྷགཝཱ ཏེམཱསཾ པཊིསལླཱིཡིཏུཾ། ན བྷགཝཱ ཀེནཙི ཨུཔསངྐམིཏབྦོ, ཨཉྙཏྲ ཨེཀེན པིཎྜཔཱཏནཱིཧཱརཀེན། ཡོ བྷགཝནྟཾ ཨུཔསངྐམཏི སོ པཱཙིཏྟིཡཾ དེསཱཔེཏབྦོ’’ཏི། ‘‘པཉྙཱཡིསྶཏི, བྷནྟེ, སཱཝཏྠིཡཱ སངྒྷོ སཀཱཡ ཀཏིཀཱཡ, ན མཡཾ ཨཔཉྙཏྟཾ པཉྙཔེསྶཱམ པཉྙཏྟཾ ཝཱ ན སམུཙྪིནྡིསྶཱམ, ཡཐཱཔཉྙཏྟེསུ སིཀྑཱཔདེསུ སམཱདཱཡ ཝཏྟིསྶཱམཱཏི། ཨནུཉྙཱཏཱཝུསོ, བྷགཝཏཱ – ‘ཡེ ཏེ བྷིཀྑཱུ ཨཱརཉྙིཀཱ པིཎྜཔཱཏིཀཱ པཾསུཀཱུལིཀཱ ཡཐཱསུཁཾ མཾ དསྶནཱཡ ཨུཔསངྐམནྟཱུ’’’ཏི།
566. Tena kho pana samayena sambahulā bhikkhū bahidvārakoṭṭhake ṭhitā honti – ‘‘mayaṃ āyasmantaṃ upasenaṃ vaṅgantaputtaṃ pācittiyaṃ desāpessāmā’’ti . Atha kho āyasmā upaseno vaṅgantaputto sapariso uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho te bhikkhū āyasmantaṃ upasenaṃ vaṅgantaputtaṃ etadavocuṃ – ‘‘jānāsi tvaṃ, āvuso upasena, sāvatthiyā saṅghassa katika’’nti. ‘‘Bhagavāpi maṃ, āvuso, evamāha – ‘jānāsi pana tvaṃ, upasena, sāvatthiyā saṅghassa katika’nti? Na kho ahaṃ, bhante, jānāmi sāvatthiyā saṅghassa katika’’nti. ‘‘Sāvatthiyā kho, upasena, saṅghena katikā katā – icchatāvuso, bhagavā temāsaṃ paṭisallīyituṃ. Na bhagavā kenaci upasaṅkamitabbo, aññatra ekena piṇḍapātanīhārakena. Yo bhagavantaṃ upasaṅkamati so pācittiyaṃ desāpetabbo’’ti. ‘‘Paññāyissati, bhante, sāvatthiyā saṅgho sakāya katikāya, na mayaṃ apaññattaṃ paññapessāma paññattaṃ vā na samucchindissāma, yathāpaññattesu sikkhāpadesu samādāya vattissāmāti. Anuññātāvuso, bhagavatā – ‘ye te bhikkhū āraññikā piṇḍapātikā paṃsukūlikā yathāsukhaṃ maṃ dassanāya upasaṅkamantū’’’ti.
ཨཐ ཁོ ཏེ བྷིཀྑཱུ – ‘‘སཙྩཾ ཁོ ཨཱཡསྨཱ ཨུཔསེནོ ཨཱཧ – ‘ན ཨཔཉྙཏྟཾ པཉྙཔེཏབྦཾ, པཉྙཏྟཾ ཝཱ ན སམུཙྪིནྡིཏབྦཾ, ཡཐཱཔཉྙཏྟེསུ སིཀྑཱཔདེསུ སམཱདཱཡ ཝཏྟིཏབྦ’’’ནྟི། ཨསྶོསུཾ ཁོ བྷིཀྑཱུ – ‘‘ཨནུཉྙཱཏཱ ཀིར བྷགཝཏཱ – ‘ཡེ ཏེ བྷིཀྑཱུ ཨཱརཉྙིཀཱ པིཎྜཔཱཏིཀཱ པཾསུཀཱུལིཀཱ ཡཐཱསུཁཾ མཾ དསྶནཱཡ ཨུཔསངྐམནྟཱུ’’’ཏི། ཏེ བྷགཝནྟཾ དསྶནཾ པིཧེནྟཱ 5 སནྠཏཱནི ཨུཛ྄ཛྷིཏྭཱ ཨཱརཉྙིཀངྒཾ པིཎྜཔཱཏིཀངྒཾ པཾསུཀཱུལིཀངྒཾ སམཱདིཡིཾསུ། ཨཐ ཁོ བྷགཝཱ སམྦཧུལེཧི བྷིཀྑཱུཧི སདྡྷིཾ སེནཱསནཙཱརིཀཾ ཨཱཧིཎྜནྟོ ཨདྡས སནྠཏཱནི ཏཧཾ ཏཧཾ ཨུཛ྄ཛྷིཏཱནི། པསྶིཏྭཱ བྷིཀྑཱུ ཨཱམནྟེསི – ‘‘ཀསྶིམཱནི, བྷིཀྑཝེ, སནྠཏཱནི ཏཧཾ ཏཧཾ ཨུཛ྄ཛྷིཏཱནཱི’’ཏི? ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཏེན ཧི, བྷིཀྑཝེ, བྷིཀྑཱུནཾ སིཀྑཱཔདཾ པཉྙཔེསྶཱམི དས ཨཏྠཝསེ པཊིཙྩ – སངྒྷསུཊྛུཏཱཡ, སངྒྷཕཱསུཏཱཡ,…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Atha kho te bhikkhū – ‘‘saccaṃ kho āyasmā upaseno āha – ‘na apaññattaṃ paññapetabbaṃ, paññattaṃ vā na samucchinditabbaṃ, yathāpaññattesu sikkhāpadesu samādāya vattitabba’’’nti. Assosuṃ kho bhikkhū – ‘‘anuññātā kira bhagavatā – ‘ye te bhikkhū āraññikā piṇḍapātikā paṃsukūlikā yathāsukhaṃ maṃ dassanāya upasaṅkamantū’’’ti. Te bhagavantaṃ dassanaṃ pihentā 6 santhatāni ujjhitvā āraññikaṅgaṃ piṇḍapātikaṅgaṃ paṃsukūlikaṅgaṃ samādiyiṃsu. Atha kho bhagavā sambahulehi bhikkhūhi saddhiṃ senāsanacārikaṃ āhiṇḍanto addasa santhatāni tahaṃ tahaṃ ujjhitāni. Passitvā bhikkhū āmantesi – ‘‘kassimāni, bhikkhave, santhatāni tahaṃ tahaṃ ujjhitānī’’ti? Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhūnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya, saṅghaphāsutāya,…pe… evañca pana, bhikkhave, imaṃ sikkhāpadaṃ uddiseyyātha –
༥༦༧. ‘‘ནིསཱིདནསནྠཏཾ པན བྷིཀྑུནཱ ཀཱརཡམཱནེན པུརཱཎསནྠཏསྶ སཱམནྟཱ སུགཏཝིདཏྠི ཨཱདཱཏབྦཱ དུབྦཎྞཀརཎཱཡ, ཨནཱདཱ ཙེ བྷིཀྑུ པུརཱཎསནྠཏསྶ སཱམནྟཱ སུགཏཝིདཏྠིཾ ནཝཾ ནིསཱིདནསནྠཏཾ ཀཱརཱཔེཡྻ, ནིསྶགྒིཡཾ པཱཙིཏྟིཡ’’ནྟི།
567.‘‘Nisīdanasanthataṃpana bhikkhunā kārayamānena purāṇasanthatassa sāmantā sugatavidatthi ādātabbā dubbaṇṇakaraṇāya, anādā ce bhikkhu purāṇasanthatassa sāmantā sugatavidatthiṃ navaṃ nisīdanasanthataṃ kārāpeyya, nissaggiyaṃ pācittiya’’nti.
༥༦༨. ནིསཱིདནཾ ནཱམ སདསཾ ཝུཙྩཏི།
568.Nisīdanaṃ nāma sadasaṃ vuccati.
སནྠཏཾ ནཱམ སནྠརིཏྭཱ ཀཏཾ ཧོཏི ཨཝཱཡིམཾ།
Santhataṃ nāma santharitvā kataṃ hoti avāyimaṃ.
ཀཱརཡམཱནེནཱཏི ཀརོནྟོ ཝཱ ཀཱརཱཔེནྟོ ཝཱ།
Kārayamānenāti karonto vā kārāpento vā.
པུརཱཎསནྠཏཾ ནཱམ སཀིཾ ནིཝཏྠམྤི སཀིཾ པཱརུཏམྤི།
Purāṇasanthataṃ nāma sakiṃ nivatthampi sakiṃ pārutampi.
སཱམནྟཱ སུགཏཝིདཏྠི ཨཱདཱཏབྦཱ དུབྦཎྞཀརཎཱཡཱཏི ཐིརབྷཱཝཱཡ ཝཊྚཾ ཝཱ ཙཏུརསྶཾ ཝཱ ཚིནྡིཏྭཱ ཨེཀདེསེ ཝཱ སནྠརིཏབྦཾ ཝིཛཊེཏྭཱ ཝཱ སནྠརིཏབྦཾ།
Sāmantā sugatavidatthi ādātabbā dubbaṇṇakaraṇāyāti thirabhāvāya vaṭṭaṃ vā caturassaṃ vā chinditvā ekadese vā santharitabbaṃ vijaṭetvā vā santharitabbaṃ.
ཨནཱདཱ ཙེ བྷིཀྑུ པུརཱཎསནྠཏསྶ སཱམནྟཱ སུགཏཝིདཏྠིནྟི ཨནཱདིཡིཏྭཱ པུརཱཎསནྠཏསྶ སཱམནྟཱ སུགཏཝིདཏྠིཾ ནཝཾ ནིསཱིདནསནྠཏཾ ཀརོཏི ཝཱ ཀཱརཱཔེཏི ཝཱ, པཡོགེ དུཀྐཊཾ, པཊིལཱབྷེན ནིསྶགྒིཡཾ ཧོཏི། ནིསྶཛྫིཏབྦཾ སངྒྷསྶ ཝཱ གཎསྶ ཝཱ པུགྒལསྶ ཝཱ། ཨེཝཉྩ པན, བྷིཀྑཝེ, ནིསྶཛྫིཏབྦཾ…པེ॰… ཨིདཾ མེ, བྷནྟེ, ནིསཱིདནསནྠཏཾ ཨནཱདིཡིཏྭཱ པུརཱཎསནྠཏསྶ སཱམནྟཱ སུགཏཝིདཏྠིཾ ཀཱརཱཔིཏཾ ནིསྶགྒིཡཾ། ཨིམཱཧཾ སངྒྷསྶ ནིསྶཛྫཱམཱིཏི…པེ॰… དདེཡྻཱཏི…པེ॰… ཨཱཡསྨཏོ དམྨཱིཏི།
Anādā ce bhikkhu purāṇasanthatassa sāmantā sugatavidatthinti anādiyitvā purāṇasanthatassa sāmantā sugatavidatthiṃ navaṃ nisīdanasanthataṃ karoti vā kārāpeti vā, payoge dukkaṭaṃ, paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, nisīdanasanthataṃ anādiyitvā purāṇasanthatassa sāmantā sugatavidatthiṃ kārāpitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… āyasmato dammīti.
༥༦༩. ཨཏྟནཱ ཝིཔྤཀཏཾ ཨཏྟནཱ པརིཡོསཱཔེཏི, ནིསྶགྒིཡཾ པཱཙིཏྟིཡཾ། ཨཏྟནཱ ཝིཔྤཀཏཾ པརེཧི པརིཡོསཱཔེཏི, ནིསྶགྒིཡཾ པཱཙིཏྟིཡཾ། པརེཧི ཝིཔྤཀཏཾ ཨཏྟནཱ པརིཡོསཱཔེཏི, ནིསྶགྒིཡཾ པཱཙིཏྟིཡཾ། པརེཧི ཝིཔྤཀཏཾ པརེཧི པརིཡོསཱཔེཏི, ནིསྶགྒིཡཾ པཱཙིཏྟིཡཾ།
569. Attanā vippakataṃ attanā pariyosāpeti, nissaggiyaṃ pācittiyaṃ. Attanā vippakataṃ parehi pariyosāpeti, nissaggiyaṃ pācittiyaṃ. Parehi vippakataṃ attanā pariyosāpeti, nissaggiyaṃ pācittiyaṃ. Parehi vippakataṃ parehi pariyosāpeti, nissaggiyaṃ pācittiyaṃ.
ཨཉྙསྶཏྠཱཡ ཀརོཏི ཝཱ ཀཱརཱཔེཏི ཝཱ, ཨཱཔཏྟི དུཀྐཊསྶ།
Aññassatthāya karoti vā kārāpeti vā, āpatti dukkaṭassa.
༥༧༠. ཨནཱཔཏྟི – པུརཱཎསནྠཏསྶ སཱམནྟཱ སུགཏཝིདཏྠིཾ ཨཱདིཡིཏྭཱ ཀརོཏི, ཨལབྷནྟོ ཐོཀཏརཾ ཨཱདིཡིཏྭཱ ཀརོཏི, ཨལབྷནྟོ ཨནཱདིཡིཏྭཱ ཀརོཏི, ཨཉྙེན ཀཏཾ པཊིལབྷིཏྭཱ པརིབྷུཉྫཏི, ཝིཏཱནཾ ཝཱ བྷཱུམཏྠརཎཾ ཝཱ སཱཎིཔཱཀཱརཾ ཝཱ བྷིསིཾ ཝཱ བིབྦོཧནཾ ཝཱ ཀརོཏི, ཨུམྨཏྟཀསྶ ཨཱདིཀམྨིཀསྶཱཏི།
570. Anāpatti – purāṇasanthatassa sāmantā sugatavidatthiṃ ādiyitvā karoti, alabhanto thokataraṃ ādiyitvā karoti, alabhanto anādiyitvā karoti, aññena kataṃ paṭilabhitvā paribhuñjati, vitānaṃ vā bhūmattharaṇaṃ vā sāṇipākāraṃ vā bhisiṃ vā bibbohanaṃ vā karoti, ummattakassa ādikammikassāti.
ནིསཱིདནསནྠཏསིཀྑཱཔདཾ ནིཊྛིཏཾ པཉྩམཾ།
Nisīdanasanthatasikkhāpadaṃ niṭṭhitaṃ pañcamaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༥. ནིསཱིདནསནྠཏསིཀྑཱཔདཝཎྞནཱ • 5. Nisīdanasanthatasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༥. ནིསཱིདནསནྠཏསིཀྑཱཔདཝཎྞནཱ • 5. Nisīdanasanthatasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༥. ནིསཱིདནསནྠཏསིཀྑཱཔདཝཎྞནཱ • 5. Nisīdanasanthatasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༥. ནིསཱིདནསནྠཏསིཀྑཱཔདཝཎྞནཱ • 5. Nisīdanasanthatasikkhāpadavaṇṇanā
