| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
5. நிஸீத³னஸந்த²தஸிக்கா²பத³வண்ணனா
5. Nisīdanasanthatasikkhāpadavaṇṇanā
565. பஞ்சமே தத்த² ஸந்தி³ஸ்ஸிஸ்ஸதீதி ஸகாய கதிகாய அயுத்தகாரிதாவஸேன விஞ்ஞூஹி ஸந்தி³ஸ்ஸிஸ்ஸதீதி அத்தோ². அரஞ்ஞகங்கா³தீ³னி தீணி பாளியங் ஸேனாஸனாதி³பச்சயத்தயஸ்ஸ ஆதி³அங்க³வஸேன வுத்தானி, ஸேஸானிபி தே ஸமாதி³யிங்ஸு ஏவாதி வேதி³தப்³ப³ங்.
565. Pañcame tattha sandississatīti sakāya katikāya ayuttakāritāvasena viññūhi sandississatīti attho. Araññakaṅgādīni tīṇi pāḷiyaṃ senāsanādipaccayattayassa ādiaṅgavasena vuttāni, sesānipi te samādiyiṃsu evāti veditabbaṃ.
566. பிஹயந்தாதி பத்த²யந்தா. ஸந்த²தஸ்ஸ அவாயிமத்தா, ஸேனாஸனபரிக்கா²ரத்தா ச சீவரதா, அதி⁴ட்டா²தப்³ப³தா ச நத்தீ²தி ஆஹ ‘‘சதுத்த²சீவரஸஞ்ஞிதாயா’’தி, விபல்லாஸஸஞ்ஞாயாதி அத்தோ². கேசி பன ‘‘இத³ங் நிஸீத³னஸந்த²தங் நாம நவஸு சீவரேஸு நிஸீத³னசீவரமேவ, நாஞ்ஞங். நிஸீத³னஸிக்கா²பதே³பி (பாசி॰ 531 ஆத³யோ) இமஸ்மிங் ஸிக்கா²பதே³ விய ‘நிஸீத³னங் நாம ஸத³ஸங் வுச்சதீ’தி ச அட்ட²கதா²யஞ்சஸ்ஸ ‘ஸந்த²தஸதி³ஸங் ஸந்த²ரித்வா ஏகஸ்மிங் அந்தே ஸுக³தவித³த்தி²யா வித³த்தி²மத்தே பதே³ஸே த்³வீஸு டா²னேஸு பா²லெத்வா திஸ்ஸோ த³ஸா கரீயந்தி, தாஹி த³ஸாஹி ஸத³ஸங் நாம வுச்சதீ’தி (பாசி॰ அட்ட²॰ 531) ச வுத்தத்தா’’தி வத³ந்தி, தங் ந யுத்தங் இத⁴ பமாணனியமஸ்ஸ அவுத்தத்தா, ஸந்த²தஸ்ஸ ச அவாயிமசீவரத்தா, அதி⁴ட்டா²னுபக³த்தாபா⁴வா அட்ட²கதா²யங் அவுத்தத்தா ச. நிஸீத³னசீவரங் பன ச²ன்னங் சீவரானங் க²ண்ட³பிலோதிகானி பமாணயுத்தமேவ ஸந்த²ரித்வா ஸந்த²தங் விய கரொந்தி. தேனேவ ‘‘ஸந்த²தஸதி³ஸ’’ந்தி ஸதி³ஸக்³க³ஹணங் கதங், தஸ்மா ததே³வ சீவரங் அதி⁴ட்டா²னுபக³ஞ்ச, ந இத³ந்தி க³ஹேதப்³ப³ங்.
566.Pihayantāti patthayantā. Santhatassa avāyimattā, senāsanaparikkhārattā ca cīvaratā, adhiṭṭhātabbatā ca natthīti āha ‘‘catutthacīvarasaññitāyā’’ti, vipallāsasaññāyāti attho. Keci pana ‘‘idaṃ nisīdanasanthataṃ nāma navasu cīvaresu nisīdanacīvarameva, nāññaṃ. Nisīdanasikkhāpadepi (pāci. 531 ādayo) imasmiṃ sikkhāpade viya ‘nisīdanaṃ nāma sadasaṃ vuccatī’ti ca aṭṭhakathāyañcassa ‘santhatasadisaṃ santharitvā ekasmiṃ ante sugatavidatthiyā vidatthimatte padese dvīsu ṭhānesu phāletvā tisso dasā karīyanti, tāhi dasāhi sadasaṃ nāma vuccatī’ti (pāci. aṭṭha. 531) ca vuttattā’’ti vadanti, taṃ na yuttaṃ idha pamāṇaniyamassa avuttattā, santhatassa ca avāyimacīvarattā, adhiṭṭhānupagattābhāvā aṭṭhakathāyaṃ avuttattā ca. Nisīdanacīvaraṃ pana channaṃ cīvarānaṃ khaṇḍapilotikāni pamāṇayuttameva santharitvā santhataṃ viya karonti. Teneva ‘‘santhatasadisa’’nti sadisaggahaṇaṃ kataṃ, tasmā tadeva cīvaraṃ adhiṭṭhānupagañca, na idanti gahetabbaṃ.
567. ஸுக³தவித³த்தி²கங் அனாதா³ய ஆதி³யந்திஸஞ்ஞாய, ஸுக³தவித³த்தி²ஊனே அனூனந்திஸஞ்ஞாய ச வஸேனெத்த² அசித்தகதா வேதி³தப்³பா³. விதானாதீ³னஞ்ஞேவ அத்தா²ய கரணே அனாபத்திவசனதோ நிபஜ்ஜனத்தா²ய கரோதோபி ஆபத்தி ஏவ. பரிபு⁴ஞ்ஜிதுங் ந வட்டதீதி கோஸியேஸு ஸுத்³த⁴காளகானஞ்ச வத்தூ²னங் அகப்பியத்தா வுத்தங். தேனேவ பாளியங் ‘‘அஞ்ஞேன கதங் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸா’’தி (பாரா॰ 545, 550) தத்த² தத்த² வுத்தங், இதரேஸு பன த்³வீஸு ‘‘அனாபத்தீ’’தி வுத்தங். தத்த² சதுத்தே² அஞ்ஞஸ்ஸத்தா²ய கரணேபி அனாபத்தி, பஞ்சமே தத்த² து³க்கடந்தி த³ட்ட²ப்³ப³ங். நிஸ்ஸட்ட²தா³னவசனதோ பன க³ஹணே தோ³ஸோ நத்தி², பரிபு⁴ஞ்ஜனே ச விஜடெத்வா கப்பியவஸேன கதே ந தோ³ஸோ.
567. Sugatavidatthikaṃ anādāya ādiyantisaññāya, sugatavidatthiūne anūnantisaññāya ca vasenettha acittakatā veditabbā. Vitānādīnaññeva atthāya karaṇe anāpattivacanato nipajjanatthāya karotopi āpatti eva. Paribhuñjituṃ na vaṭṭatīti kosiyesu suddhakāḷakānañca vatthūnaṃ akappiyattā vuttaṃ. Teneva pāḷiyaṃ ‘‘aññena kataṃ paṭilabhitvā paribhuñjati, āpatti dukkaṭassā’’ti (pārā. 545, 550) tattha tattha vuttaṃ, itaresu pana dvīsu ‘‘anāpattī’’ti vuttaṃ. Tattha catutthe aññassatthāya karaṇepi anāpatti, pañcame tattha dukkaṭanti daṭṭhabbaṃ. Nissaṭṭhadānavacanato pana gahaṇe doso natthi, paribhuñjane ca vijaṭetvā kappiyavasena kate na doso.
நிஸீத³னஸந்த²தஸிக்கா²பத³வண்ணனா நிட்டி²தா.
Nisīdanasanthatasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 5. நிஸீத³னஸந்த²தஸிக்கா²பத³ங் • 5. Nisīdanasanthatasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. நிஸீத³னஸந்த²தஸிக்கா²பத³வண்ணனா • 5. Nisīdanasanthatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. நிஸீத³னஸந்த²தஸிக்கா²பத³வண்ணனா • 5. Nisīdanasanthatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. நிஸீத³னஸந்த²தஸிக்கா²பத³வண்ணனா • 5. Nisīdanasanthatasikkhāpadavaṇṇanā
