| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৫. নিসীদনসন্থতসিক্খাপদৰণ্ণনা
5. Nisīdanasanthatasikkhāpadavaṇṇanā
৫৬৫. পঞ্চমে তত্থ সন্দিস্সিস্সতীতি সকায কতিকায অযুত্তকারিতাৰসেন ৰিঞ্ঞূহি সন্দিস্সিস্সতীতি অত্থো। অরঞ্ঞকঙ্গাদীনি তীণি পাল়িযং সেনাসনাদিপচ্চযত্তযস্স আদিঅঙ্গৰসেন ৰুত্তানি, সেসানিপি তে সমাদিযিংসু এৰাতি ৰেদিতব্বং।
565. Pañcame tattha sandississatīti sakāya katikāya ayuttakāritāvasena viññūhi sandississatīti attho. Araññakaṅgādīni tīṇi pāḷiyaṃ senāsanādipaccayattayassa ādiaṅgavasena vuttāni, sesānipi te samādiyiṃsu evāti veditabbaṃ.
৫৬৬. পিহযন্তাতি পত্থযন্তা। সন্থতস্স অৰাযিমত্তা, সেনাসনপরিক্খারত্তা চ চীৰরতা, অধিট্ঠাতব্বতা চ নত্থীতি আহ ‘‘চতুত্থচীৰরসঞ্ঞিতাযা’’তি, ৰিপল্লাসসঞ্ঞাযাতি অত্থো। কেচি পন ‘‘ইদং নিসীদনসন্থতং নাম নৰসু চীৰরেসু নিসীদনচীৰরমেৰ, নাঞ্ঞং। নিসীদনসিক্খাপদেপি (পাচি॰ ৫৩১ আদযো) ইমস্মিং সিক্খাপদে ৰিয ‘নিসীদনং নাম সদসং ৰুচ্চতী’তি চ অট্ঠকথাযঞ্চস্স ‘সন্থতসদিসং সন্থরিত্ৰা একস্মিং অন্তে সুগতৰিদত্থিযা ৰিদত্থিমত্তে পদেসে দ্ৰীসু ঠানেসু ফালেত্ৰা তিস্সো দসা করীযন্তি, তাহি দসাহি সদসং নাম ৰুচ্চতী’তি (পাচি॰ অট্ঠ॰ ৫৩১) চ ৰুত্তত্তা’’তি ৰদন্তি, তং ন যুত্তং ইধ পমাণনিযমস্স অৰুত্তত্তা, সন্থতস্স চ অৰাযিমচীৰরত্তা, অধিট্ঠানুপগত্তাভাৰা অট্ঠকথাযং অৰুত্তত্তা চ। নিসীদনচীৰরং পন ছন্নং চীৰরানং খণ্ডপিলোতিকানি পমাণযুত্তমেৰ সন্থরিত্ৰা সন্থতং ৰিয করোন্তি। তেনেৰ ‘‘সন্থতসদিস’’ন্তি সদিসগ্গহণং কতং, তস্মা তদেৰ চীৰরং অধিট্ঠানুপগঞ্চ, ন ইদন্তি গহেতব্বং।
566.Pihayantāti patthayantā. Santhatassa avāyimattā, senāsanaparikkhārattā ca cīvaratā, adhiṭṭhātabbatā ca natthīti āha ‘‘catutthacīvarasaññitāyā’’ti, vipallāsasaññāyāti attho. Keci pana ‘‘idaṃ nisīdanasanthataṃ nāma navasu cīvaresu nisīdanacīvarameva, nāññaṃ. Nisīdanasikkhāpadepi (pāci. 531 ādayo) imasmiṃ sikkhāpade viya ‘nisīdanaṃ nāma sadasaṃ vuccatī’ti ca aṭṭhakathāyañcassa ‘santhatasadisaṃ santharitvā ekasmiṃ ante sugatavidatthiyā vidatthimatte padese dvīsu ṭhānesu phāletvā tisso dasā karīyanti, tāhi dasāhi sadasaṃ nāma vuccatī’ti (pāci. aṭṭha. 531) ca vuttattā’’ti vadanti, taṃ na yuttaṃ idha pamāṇaniyamassa avuttattā, santhatassa ca avāyimacīvarattā, adhiṭṭhānupagattābhāvā aṭṭhakathāyaṃ avuttattā ca. Nisīdanacīvaraṃ pana channaṃ cīvarānaṃ khaṇḍapilotikāni pamāṇayuttameva santharitvā santhataṃ viya karonti. Teneva ‘‘santhatasadisa’’nti sadisaggahaṇaṃ kataṃ, tasmā tadeva cīvaraṃ adhiṭṭhānupagañca, na idanti gahetabbaṃ.
৫৬৭. সুগতৰিদত্থিকং অনাদায আদিযন্তিসঞ্ঞায, সুগতৰিদত্থিঊনে অনূনন্তিসঞ্ঞায চ ৰসেনেত্থ অচিত্তকতা ৰেদিতব্বা। ৰিতানাদীনঞ্ঞেৰ অত্থায করণে অনাপত্তিৰচনতো নিপজ্জনত্থায করোতোপি আপত্তি এৰ। পরিভুঞ্জিতুং ন ৰট্টতীতি কোসিযেসু সুদ্ধকাল়কানঞ্চ ৰত্থূনং অকপ্পিযত্তা ৰুত্তং। তেনেৰ পাল়িযং ‘‘অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্সা’’তি (পারা॰ ৫৪৫, ৫৫০) তত্থ তত্থ ৰুত্তং, ইতরেসু পন দ্ৰীসু ‘‘অনাপত্তী’’তি ৰুত্তং। তত্থ চতুত্থে অঞ্ঞস্সত্থায করণেপি অনাপত্তি, পঞ্চমে তত্থ দুক্কটন্তি দট্ঠব্বং। নিস্সট্ঠদানৰচনতো পন গহণে দোসো নত্থি, পরিভুঞ্জনে চ ৰিজটেত্ৰা কপ্পিযৰসেন কতে ন দোসো।
567. Sugatavidatthikaṃ anādāya ādiyantisaññāya, sugatavidatthiūne anūnantisaññāya ca vasenettha acittakatā veditabbā. Vitānādīnaññeva atthāya karaṇe anāpattivacanato nipajjanatthāya karotopi āpatti eva. Paribhuñjituṃ na vaṭṭatīti kosiyesu suddhakāḷakānañca vatthūnaṃ akappiyattā vuttaṃ. Teneva pāḷiyaṃ ‘‘aññena kataṃ paṭilabhitvā paribhuñjati, āpatti dukkaṭassā’’ti (pārā. 545, 550) tattha tattha vuttaṃ, itaresu pana dvīsu ‘‘anāpattī’’ti vuttaṃ. Tattha catutthe aññassatthāya karaṇepi anāpatti, pañcame tattha dukkaṭanti daṭṭhabbaṃ. Nissaṭṭhadānavacanato pana gahaṇe doso natthi, paribhuñjane ca vijaṭetvā kappiyavasena kate na doso.
নিসীদনসন্থতসিক্খাপদৰণ্ণনা নিট্ঠিতা।
Nisīdanasanthatasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৫. নিসীদনসন্থতসিক্খাপদং • 5. Nisīdanasanthatasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৫. নিসীদনসন্থতসিক্খাপদৰণ্ণনা • 5. Nisīdanasanthatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৫. নিসীদনসন্থতসিক্খাপদৰণ্ণনা • 5. Nisīdanasanthatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৫. নিসীদনসন্থতসিক্খাপদৰণ্ণনা • 5. Nisīdanasanthatasikkhāpadavaṇṇanā
