| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
༥. ནིསཱིདནསནྠཏསིཀྑཱཔདཝཎྞནཱ
5. Nisīdanasanthatasikkhāpadavaṇṇanā
༥༦༥-༦. ནིསཱིདནསནྠཏསིཀྑཱཔདེ པན པཉྙཱཡིསྶཏཱིཏི སཙེ སཱ ཀཏིཀཱ མནཱཔཱ བྷཝིསྶཏི, མནཱཔཏཱཡ བྷིཀྑུསངྒྷོ སནྡིསྶིསྶཏི། སཙེ ཨམནཱཔཱ, ཨམནཱཔཏཱཡ སནྡིསྶིསྶཏཱིཏི ཨདྷིཔྤཱཡོ, ཨཱརཉྙཀངྒཱདཱིནི ཏཱིཎི པཱལི༹ཡཾ པདྷཱནངྒཝསེན ཝུཏྟཱནི, སེསཱནིཔི ཏེ སམཱདིཡིཾསུཡེཝཱཏི ཝེདིཏབྦཾ། ཏེནེཝཱཧ ‘‘སནྠཏེ ཙཏུཏྠཙཱིཝརསཉྙིཏཱཡཱ’’ཏི། ཨུཛ྄ཛྷིཏྭཱཏི ཝིསྶཛྫེཏྭཱ།
565-6. Nisīdanasanthatasikkhāpade pana paññāyissatīti sace sā katikā manāpā bhavissati, manāpatāya bhikkhusaṅgho sandississati. Sace amanāpā, amanāpatāya sandississatīti adhippāyo, āraññakaṅgādīni tīṇi pāḷiyaṃ padhānaṅgavasena vuttāni, sesānipi te samādiyiṃsuyevāti veditabbaṃ. Tenevāha ‘‘santhate catutthacīvarasaññitāyā’’ti. Ujjhitvāti vissajjetvā.
༥༦༧. ནིསཱིདནསནྠཏཏྟཱ ནིཝཱསནཔཱརུཔནཀིཙྩཾ ནཏྠཱིཏི ཨཱཧ ‘‘སཀིཾ ནིསིནྣཉྩེཝ ནིཔནྣཉྩཱ’’ཏི ། ཝིདཏྠིམཏྟནྟི སུགཏཝིདཏྠིཾ སནྡྷཱཡ ཝདཏི། ཨིདཉྩ ཧེཊྛིམཔརིཙྪེདདསྶནཏྠཾ ཝུཏྟཾ། ‘‘ཝིཏཱནཱདཱིནཾཡེཝ ཨཏྠཱཡ ཀརཎེ ཨནཱཔཏྟིཝཙནཏོ སཙེ ནིཔཛྫནཏྠཱཡ ཀརོནྟི, ཨཱཔཏྟིཡེཝཱ’’ཏི ཏཱིསུཔི གཎྛིཔདེསུ ཝུཏྟཾ། ཨཀཔྤིཡཏྟཱ པན ‘‘པརིབྷུཉྫིཏུཾ ན ཝཊྚཏཱི’’ཏི ཝུཏྟཾ། ཨིདཉྩ ནིསཱིདནསནྠཏཾ ནཱམ ནིསཱིདནཙཱིཝརམེཝ, ནཱཉྙནྟི ཝདནྟི། ནིསཱིདནསིཀྑཱཔདེཔི ནིསཱིདནཾ ནཱམ སདསཾ ཝུཙྩཏཱིཏི ཙ ཨཊྛཀཐཱཡཉྩསྶ ‘‘སནྠཏསདིསཾ སནྠརིཏྭཱ ཨེཀསྨིཾ ཨནྟེ སུགཏཝིདཏྠིཡཱ ཝིདཏྠིམཏྟེ པདེསེ དྭཱིསུ ཋཱནེསུ ཕཱལེཏྭཱ ཏིསྶོ དསཱ ཀརཱིཡནྟི, ཏཱཧི དསཱཧི སདསཾ ནཱམ ཝུཙྩཏཱི’’ཏི (པཱཙི॰ ཨཊྛ॰ ༥༣༡) ཝཙནཏོ ཨིདྷཱཔི ‘‘ནིསཱིདནཾ ནཱམ སདསཾ ཝུཙྩཏཱི’’ཏི ཙ ‘‘སནྠཏེ ཙཏུཏྠཙཱིཝརསཉྙིཏཱཡཱ’’ཏི ཙ ཝཙནཏོ ཏཾ ཡུཏྟཾ ཝིཡ དིསྶཏི། ཀེཙི པན ‘‘ནིསཱིདནསནྠཏཾ ཨེལ༹ཀལོམཱནི སནྠརིཏྭཱ སནྠཏཾ ཝིཡ ཀརོནྟི, ཏཾ ཨཝཱཡིམཾ ཨནདྷིཊྛཱནུཔགཾ, ནིསཱིདནཙཱིཝརཾ པན ཚནྣཾ ཙཱིཝརཱནཾ ཨཉྙཏརེན ཀརོཏི ཨདྷིཊྛཱནུཔགཾ, ཏཾ ཀརོནྟཱ ཙ ནནྟཀཱནི སནྠརིཏྭཱ སནྠཏསདིསཾ ཀརོནྟཱི’’ཏི ཝདནྟི, ཝཱིམཾསིཏྭཱ ཡུཏྟཏརཾ གཧེཏབྦཾ།
567. Nisīdanasanthatattā nivāsanapārupanakiccaṃ natthīti āha ‘‘sakiṃ nisinnañceva nipannañcā’’ti . Vidatthimattanti sugatavidatthiṃ sandhāya vadati. Idañca heṭṭhimaparicchedadassanatthaṃ vuttaṃ. ‘‘Vitānādīnaṃyeva atthāya karaṇe anāpattivacanato sace nipajjanatthāya karonti, āpattiyevā’’ti tīsupi gaṇṭhipadesu vuttaṃ. Akappiyattā pana ‘‘paribhuñjituṃ na vaṭṭatī’’ti vuttaṃ. Idañca nisīdanasanthataṃ nāma nisīdanacīvarameva, nāññanti vadanti. Nisīdanasikkhāpadepi nisīdanaṃ nāma sadasaṃ vuccatīti ca aṭṭhakathāyañcassa ‘‘santhatasadisaṃ santharitvā ekasmiṃ ante sugatavidatthiyā vidatthimatte padese dvīsu ṭhānesu phāletvā tisso dasā karīyanti, tāhi dasāhi sadasaṃ nāma vuccatī’’ti (pāci. aṭṭha. 531) vacanato idhāpi ‘‘nisīdanaṃ nāma sadasaṃ vuccatī’’ti ca ‘‘santhate catutthacīvarasaññitāyā’’ti ca vacanato taṃ yuttaṃ viya dissati. Keci pana ‘‘nisīdanasanthataṃ eḷakalomāni santharitvā santhataṃ viya karonti, taṃ avāyimaṃ anadhiṭṭhānupagaṃ, nisīdanacīvaraṃ pana channaṃ cīvarānaṃ aññatarena karoti adhiṭṭhānupagaṃ, taṃ karontā ca nantakāni santharitvā santhatasadisaṃ karontī’’ti vadanti, vīmaṃsitvā yuttataraṃ gahetabbaṃ.
ནིསཱིདནསནྠཏསིཀྑཱཔདཝཎྞནཱ ནིཊྛིཏཱ།
Nisīdanasanthatasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༥. ནིསཱིདནསནྠཏསིཀྑཱཔདཾ • 5. Nisīdanasanthatasikkhāpadaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༥. ནིསཱིདནསནྠཏསིཀྑཱཔདཝཎྞནཱ • 5. Nisīdanasanthatasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༥. ནིསཱིདནསནྠཏསིཀྑཱཔདཝཎྞནཱ • 5. Nisīdanasanthatasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༥. ནིསཱིདནསནྠཏསིཀྑཱཔདཝཎྞནཱ • 5. Nisīdanasanthatasikkhāpadavaṇṇanā
