| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
5. நிஸீத³னஸிக்கா²பத³வண்ணனா
5. Nisīdanasikkhāpadavaṇṇanā
கஸ்மா பனெத்த² ‘‘ஸந்த²தங் பன பி⁴க்கு²னா’’தி ஸிக்கா²பத³ங் அபஞ்ஞபெத்வா ‘‘நிஸீத³னஸந்த²த’’ந்தி பஞ்ஞத்தங், நனு எத்த² காரணேன ப⁴விதப்³ப³ந்தி? அத்தி² காரணங், சீவரஸஞ்ஞிதாய ஸந்த²தானங் உஜ்ஜி²தத்தா தேஸங் அசீவரபா⁴வத³ஸ்ஸனத்த²ங் ததா² பஞ்ஞத்தங் ப⁴க³வதாதி வுத்தங் ஹோதி. தஸ்மா தே பி⁴க்கூ² தேசீவரிகது⁴தங்க³பே⁴த³ப⁴யா ஸந்த²தே சதுத்த²சீவரஸஞ்ஞிதாய ஸந்த²தானி உஜ்ஜி²த்வா தேரஸ து⁴தங்கா³னி ஸமாத³யிங்ஸு, ப⁴க³வா ச தேஸங் ஸந்த²தங் அனுஜானி. ததோ தேஸங் பி⁴க்கூ²னங் ஏவங் ஹோதி ‘‘நிஸீத³னசீவரஸண்டா²னம்பேதங் நிஸீத³னஸந்த²தங் நோ ப⁴க³வதா அனுஞ்ஞாதங் சதுத்த²சீவரபா⁴வேன, பகே³வ கதஸந்த²தங் வா’’தி. ததோ ‘‘ஸந்த²தே தேஸங் சீவரஸஞ்ஞிதா ந ப⁴விஸ்ஸதீ’’தி தத³த்த²ங் ப⁴க³வதா ‘‘ஸந்த²த’’ந்தி அபஞ்ஞபெத்வா ‘‘நிஸீத³னஸந்த²த’’ந்தி பஞ்ஞத்தந்தி அதி⁴ப்பாயோ. இமேஸு பன பஞ்சஸு ஸந்த²தேஸு புரிமானி தீணி வினயகம்மங் கத்வா படிலபி⁴த்வாபி பரிபு⁴ஞ்ஜிதுங் ந வட்டந்தி அகப்பியத்தா, பச்சி²மானி த்³வே வட்டந்தீதி (வஜிர॰ டீ॰ பாராஜிக 566-567) லிகி²தங். கத²ங் பஞ்ஞாயதீதி சே? ‘‘அனாபத்தி அஞ்ஞேன கதங் படிலபி⁴த்வா பரிபு⁴ஞ்ஜதீ’’தி (பாரா॰ 570) வசனதோதி வேதி³தப்³ப³ங்.
Kasmā panettha ‘‘santhataṃ pana bhikkhunā’’ti sikkhāpadaṃ apaññapetvā ‘‘nisīdanasanthata’’nti paññattaṃ, nanu ettha kāraṇena bhavitabbanti? Atthi kāraṇaṃ, cīvarasaññitāya santhatānaṃ ujjhitattā tesaṃ acīvarabhāvadassanatthaṃ tathā paññattaṃ bhagavatāti vuttaṃ hoti. Tasmā te bhikkhū tecīvarikadhutaṅgabhedabhayā santhate catutthacīvarasaññitāya santhatāni ujjhitvā terasa dhutaṅgāni samādayiṃsu, bhagavā ca tesaṃ santhataṃ anujāni. Tato tesaṃ bhikkhūnaṃ evaṃ hoti ‘‘nisīdanacīvarasaṇṭhānampetaṃ nisīdanasanthataṃ no bhagavatā anuññātaṃ catutthacīvarabhāvena, pageva katasanthataṃ vā’’ti. Tato ‘‘santhate tesaṃ cīvarasaññitā na bhavissatī’’ti tadatthaṃ bhagavatā ‘‘santhata’’nti apaññapetvā ‘‘nisīdanasanthata’’nti paññattanti adhippāyo. Imesu pana pañcasu santhatesu purimāni tīṇi vinayakammaṃ katvā paṭilabhitvāpi paribhuñjituṃ na vaṭṭanti akappiyattā, pacchimāni dve vaṭṭantīti (vajira. ṭī. pārājika 566-567) likhitaṃ. Kathaṃ paññāyatīti ce? ‘‘Anāpatti aññena kataṃ paṭilabhitvā paribhuñjatī’’ti (pārā. 570) vacanatoti veditabbaṃ.
நிஸீத³னஸிக்கா²பத³வண்ணனா நிட்டி²தா.
Nisīdanasikkhāpadavaṇṇanā niṭṭhitā.
