Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā

3. நிஸ்ஸக்³கி³யகண்ட³ங் (பி⁴க்கு²னீவிப⁴ங்க³வண்ணனா)

3. Nissaggiyakaṇḍaṃ (bhikkhunīvibhaṅgavaṇṇanā)

733. நிஸ்ஸக்³கி³யேஸு பட²மங் உத்தானமேவ.

733. Nissaggiyesu paṭhamaṃ uttānameva.

740. து³தியே ‘‘அய்யாய த³ம்மீதி ஏவங் படிலத்³த⁴ந்தி நிஸ்ஸட்ட²படிலத்³த⁴ங். தேனேவ மாதிகாட்ட²கதா²யம்பி ‘‘நிஸ்ஸட்ட²ங் படிலபி⁴த்வாபி யதா²தா³னேயேவ உபனேதப்³ப³’’ந்தி வுத்தங். யதா²தா³னேயேவ உபனேதப்³ப³ந்தி யதா² தா³யகேன தி³ன்னங், ததா² உபனேதப்³ப³ங், அகாலசீவரபக்கே²யேவ ட²பேதப்³ப³ந்தி வுத்தங் ஹோதி. எத்த² ச பா⁴ஜாபிதாய லத்³த⁴சீவரமேவ நிஸ்ஸக்³கி³யங் ஹோதி, தங் வினயகம்மங் கத்வாபி அத்தனா ந லப⁴தி. ஸேஸமெத்த² உத்தானமேவ. அகாலசீவரதா, ததா²ஸஞ்ஞிதா, காலசீவரந்தி அதி⁴ட்டா²ய லேஸேன பா⁴ஜாபனங், படிலாபோ⁴தி இமானி பனெத்த² சத்தாரி அங்கா³னி.

740. Dutiye ‘‘ayyāya dammīti evaṃ paṭiladdhanti nissaṭṭhapaṭiladdhaṃ. Teneva mātikāṭṭhakathāyampi ‘‘nissaṭṭhaṃ paṭilabhitvāpi yathādāneyeva upanetabba’’nti vuttaṃ. Yathādāneyeva upanetabbanti yathā dāyakena dinnaṃ, tathā upanetabbaṃ, akālacīvarapakkheyeva ṭhapetabbanti vuttaṃ hoti. Ettha ca bhājāpitāya laddhacīvarameva nissaggiyaṃ hoti, taṃ vinayakammaṃ katvāpi attanā na labhati. Sesamettha uttānameva. Akālacīvaratā, tathāsaññitā, kālacīvaranti adhiṭṭhāya lesena bhājāpanaṃ, paṭilābhoti imāni panettha cattāri aṅgāni.

743. ததியே மேதந்தி மே ஏதங். ஸகஸஞ்ஞாய க³ஹிதத்தா பாசித்தியங் து³க்கடஞ்ச வுத்தங். இதரதா² ப⁴ண்ட³க்³கே⁴ன காரேதப்³ப³ங். உபஸம்பன்னதா, பரிவத்திதசீவரஸ்ஸ விகப்பனுபக³தா, ஸகஸஞ்ஞாய அச்சி²ந்த³னங் வா அச்சி²ந்தா³பனங் வாதி இமானி பனெத்த² தீணி அங்கா³னி.

743. Tatiye metanti me etaṃ. Sakasaññāya gahitattā pācittiyaṃ dukkaṭañca vuttaṃ. Itarathā bhaṇḍagghena kāretabbaṃ. Upasampannatā, parivattitacīvarassa vikappanupagatā, sakasaññāya acchindanaṃ vā acchindāpanaṃ vāti imāni panettha tīṇi aṅgāni.

748-752. சதுத்தே² ஆஹடஸப்பிங் த³த்வாதி அத்தனோ த³த்வா. யமகங் பசிதப்³ப³ந்தி ஸப்பிஞ்ச தேலஞ்ச ஏகதோ கத்வா பசிதப்³ப³ங். லேஸேன க³ஹேதுகாமதா, அஞ்ஞஸ்ஸ விஞ்ஞாபனங், படிலாபோ⁴தி இமானி பனெத்த² தீணி அங்கா³னி.

748-752. Catutthe āhaṭasappiṃ datvāti attano datvā. Yamakaṃ pacitabbanti sappiñca telañca ekato katvā pacitabbaṃ. Lesena gahetukāmatā, aññassa viññāpanaṃ, paṭilābhoti imāni panettha tīṇi aṅgāni.

753. பஞ்சமே ஸாதி து²ல்லனந்தா³. அயந்தி அயங் ஸிக்க²மானா. சேதாபெத்வாதி ஜானாபெத்வா இச்சேவ அத்தோ²தி இத⁴ வுத்தங், மாதிகாட்ட²கதா²யங் (கங்கா²॰ அட்ட²॰ அஞ்ஞசேதாபனஸிக்கா²பத³வண்ணனா) பன ‘‘அஞ்ஞங் சேதாபெத்வாதி அத்தனோ கப்பியப⁴ண்டே³ன இத³ங் நாம ஆஹராதி அஞ்ஞங் பரிவத்தாபெத்வா’’தி வுத்தங், தஸ்மா ‘‘சேதாபெத்வா’’தி இமஸ்ஸ பரிவத்தாபெத்வாதிபி அத்தோ² த³ட்ட²ப்³போ³. அஞ்ஞங் சேதாபெய்யாதி ‘‘ஏவங் மே இத³ங் த³த்வா அஞ்ஞம்பி ஆஹரிஸ்ஸதீ’’தி மஞ்ஞமானா ‘‘ந மே இமினா அத்தோ², இத³ங் நாம மே ஆஹரா’’தி ததோ அஞ்ஞங் சேதாபெய்ய.

753. Pañcame sāti thullanandā. Ayanti ayaṃ sikkhamānā. Cetāpetvāti jānāpetvā icceva atthoti idha vuttaṃ, mātikāṭṭhakathāyaṃ (kaṅkhā. aṭṭha. aññacetāpanasikkhāpadavaṇṇanā) pana ‘‘aññaṃ cetāpetvāti attano kappiyabhaṇḍena idaṃ nāma āharāti aññaṃ parivattāpetvā’’ti vuttaṃ, tasmā ‘‘cetāpetvā’’ti imassa parivattāpetvātipi attho daṭṭhabbo. Aññaṃ cetāpeyyāti ‘‘evaṃ me idaṃ datvā aññampi āharissatī’’ti maññamānā ‘‘na me iminā attho, idaṃ nāma me āharā’’ti tato aññaṃ cetāpeyya.

758. ச²ட்டே² த⁴ம்மகிச்சந்தி புஞ்ஞகம்மங். பாவாரிகஸ்ஸாதி து³ஸ்ஸவாணிஜகஸ்ஸ. யாய சேதாபிதங், தஸ்ஸாயேவ நிஸ்ஸக்³கி³யங் நிஸ்ஸட்ட²படிலாபோ⁴ ச, தஸ்மா தாய பி⁴க்கு²னியா நிஸ்ஸட்ட²ங் படிலபி⁴த்வா யதா²தா³னே உபனேதப்³ப³ங், ந அத்தனா க³ஹேதப்³ப³ங். அஞ்ஞஸ்ஸத்தா²யாதி சீவராதீ³ஸு அஞ்ஞதரஸ்ஸத்தா²ய. அஞ்ஞுத்³தி³ஸிகேனாதி புரிமஸ்ஸேவத்த²தீ³பனங். பரிக்கா²ரேனாதி கப்பியப⁴ண்டே³ன.

758. Chaṭṭhe dhammakiccanti puññakammaṃ. Pāvārikassāti dussavāṇijakassa. Yāya cetāpitaṃ, tassāyeva nissaggiyaṃ nissaṭṭhapaṭilābho ca, tasmā tāya bhikkhuniyā nissaṭṭhaṃ paṭilabhitvā yathādāne upanetabbaṃ, na attanā gahetabbaṃ. Aññassatthāyāti cīvarādīsu aññatarassatthāya. Aññuddisikenāti purimassevatthadīpanaṃ. Parikkhārenāti kappiyabhaṇḍena.

764. ஸத்தமே ஸயங் யாசிதகேனாதி ஸயங் யாசிதகேனாபீதி அத்தோ². தேனேவ பாளியங் ‘‘தேன ச பரிக்கா²ரேன ஸயம்பி யாசித்வா’’தி வுத்தங், ததோயேவ மாதிகாட்ட²கதா²யங் ‘‘ஸஞ்ஞாசிகேனாதி ஸயங் யாசிதகேனாபீ’’தி அத்தோ² வுத்தோ.

764. Sattame sayaṃ yācitakenāti sayaṃ yācitakenāpīti attho. Teneva pāḷiyaṃ ‘‘tena ca parikkhārena sayampi yācitvā’’ti vuttaṃ, tatoyeva mātikāṭṭhakathāyaṃ ‘‘saññācikenāti sayaṃ yācitakenāpī’’ti attho vutto.

768-773. அட்ட²மனவமத³ஸமானி உத்தானத்தா²னேவ.

768-773. Aṭṭhamanavamadasamāni uttānatthāneva.

784. ஏகாத³ஸமே யஸ்மா பவாரிதட்டா²னே விஞ்ஞத்தி நாம ந படிஸேதே⁴தப்³பா³, தஸ்மா ப⁴க³வா த⁴ம்மனிமந்தனவஸேன பவாரிதட்டா²னே ‘‘வதெ³ய்யாஸி யேனத்தோ²’’தி வுத்தாய ‘‘சதுக்கங்ஸபரமங் விஞ்ஞாபேதப்³ப³’’ந்தி பரிச்சே²த³ங் த³ஸ்ஸேதீதி வேதி³தப்³ப³ங். தேனேவ மாதிகாட்ட²கதா²யங் (கங்கா²॰ அட்ட²॰ க³ருபாவுரணஸிக்கா²பத³வண்ணனா) ‘‘சேதாபேதப்³ப³ந்தி ட²பெத்வா ஸஹத⁴ம்மிகே ச ஞாதகபவாரிதே ச அஞ்ஞேன கிஸ்மிஞ்சிதே³வ கு³ணே பரிதுட்டே²ன வதெ³ய்யாஸி யேனத்தோ²தி வுத்தாய விஞ்ஞாபேதப்³ப³’’ந்தி வுத்தங்.

784. Ekādasame yasmā pavāritaṭṭhāne viññatti nāma na paṭisedhetabbā, tasmā bhagavā dhammanimantanavasena pavāritaṭṭhāne ‘‘vadeyyāsi yenattho’’ti vuttāya ‘‘catukkaṃsaparamaṃ viññāpetabba’’nti paricchedaṃ dassetīti veditabbaṃ. Teneva mātikāṭṭhakathāyaṃ (kaṅkhā. aṭṭha. garupāvuraṇasikkhāpadavaṇṇanā) ‘‘cetāpetabbanti ṭhapetvā sahadhammike ca ñātakapavārite ca aññena kismiñcideva guṇe parituṭṭhena vadeyyāsi yenatthoti vuttāya viññāpetabba’’nti vuttaṃ.

788. த்³வாத³ஸமங் உத்தானத்த²மேவ.

788. Dvādasamaṃ uttānatthameva.

பி⁴க்கு²னீவிப⁴ங்கே³ நிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

Bhikkhunīvibhaṅge nissaggiyapācittiyasikkhāpadavaṇṇanā niṭṭhitā.

நிஸ்ஸக்³கி³யகண்ட³ங் நிட்டி²தங்.

Nissaggiyakaṇḍaṃ niṭṭhitaṃ.

Next: 4. பாசித்தியகண்ட³ங் (பி⁴க்கு²னீவிப⁴ங்க³வண்ணனா) • 4. Pācittiyakaṇḍaṃ (bhikkhunīvibhaṅgavaṇṇanā)

டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. து³தியனிஸ்ஸக்³கி³யாதி³பாசித்தியஸிக்கா²பத³வண்ணனா • 2. Dutiyanissaggiyādipācittiyasikkhāpadavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact