Library / Tipiṭaka / ತಿಪಿಟಕ • Tipiṭaka / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā

೩. ನಿಸ್ಸಗ್ಗಿಯಕಣ್ಡಂ (ಭಿಕ್ಖುನೀವಿಭಙ್ಗವಣ್ಣನಾ)

3. Nissaggiyakaṇḍaṃ (bhikkhunīvibhaṅgavaṇṇanā)

೭೩೩. ನಿಸ್ಸಗ್ಗಿಯೇಸು ಪಠಮಂ ಉತ್ತಾನಮೇವ।

733. Nissaggiyesu paṭhamaṃ uttānameva.

೭೪೦. ದುತಿಯೇ ‘‘ಅಯ್ಯಾಯ ದಮ್ಮೀತಿ ಏವಂ ಪಟಿಲದ್ಧನ್ತಿ ನಿಸ್ಸಟ್ಠಪಟಿಲದ್ಧಂ। ತೇನೇವ ಮಾತಿಕಾಟ್ಠಕಥಾಯಮ್ಪಿ ‘‘ನಿಸ್ಸಟ್ಠಂ ಪಟಿಲಭಿತ್ವಾಪಿ ಯಥಾದಾನೇಯೇವ ಉಪನೇತಬ್ಬ’’ನ್ತಿ ವುತ್ತಂ। ಯಥಾದಾನೇಯೇವ ಉಪನೇತಬ್ಬನ್ತಿ ಯಥಾ ದಾಯಕೇನ ದಿನ್ನಂ, ತಥಾ ಉಪನೇತಬ್ಬಂ, ಅಕಾಲಚೀವರಪಕ್ಖೇಯೇವ ಠಪೇತಬ್ಬನ್ತಿ ವುತ್ತಂ ಹೋತಿ। ಏತ್ಥ ಚ ಭಾಜಾಪಿತಾಯ ಲದ್ಧಚೀವರಮೇವ ನಿಸ್ಸಗ್ಗಿಯಂ ಹೋತಿ, ತಂ ವಿನಯಕಮ್ಮಂ ಕತ್ವಾಪಿ ಅತ್ತನಾ ನ ಲಭತಿ। ಸೇಸಮೇತ್ಥ ಉತ್ತಾನಮೇವ। ಅಕಾಲಚೀವರತಾ, ತಥಾಸಞ್ಞಿತಾ, ಕಾಲಚೀವರನ್ತಿ ಅಧಿಟ್ಠಾಯ ಲೇಸೇನ ಭಾಜಾಪನಂ, ಪಟಿಲಾಭೋತಿ ಇಮಾನಿ ಪನೇತ್ಥ ಚತ್ತಾರಿ ಅಙ್ಗಾನಿ।

740. Dutiye ‘‘ayyāya dammīti evaṃ paṭiladdhanti nissaṭṭhapaṭiladdhaṃ. Teneva mātikāṭṭhakathāyampi ‘‘nissaṭṭhaṃ paṭilabhitvāpi yathādāneyeva upanetabba’’nti vuttaṃ. Yathādāneyeva upanetabbanti yathā dāyakena dinnaṃ, tathā upanetabbaṃ, akālacīvarapakkheyeva ṭhapetabbanti vuttaṃ hoti. Ettha ca bhājāpitāya laddhacīvarameva nissaggiyaṃ hoti, taṃ vinayakammaṃ katvāpi attanā na labhati. Sesamettha uttānameva. Akālacīvaratā, tathāsaññitā, kālacīvaranti adhiṭṭhāya lesena bhājāpanaṃ, paṭilābhoti imāni panettha cattāri aṅgāni.

೭೪೩. ತತಿಯೇ ಮೇತನ್ತಿ ಮೇ ಏತಂ। ಸಕಸಞ್ಞಾಯ ಗಹಿತತ್ತಾ ಪಾಚಿತ್ತಿಯಂ ದುಕ್ಕಟಞ್ಚ ವುತ್ತಂ। ಇತರಥಾ ಭಣ್ಡಗ್ಘೇನ ಕಾರೇತಬ್ಬಂ। ಉಪಸಮ್ಪನ್ನತಾ, ಪರಿವತ್ತಿತಚೀವರಸ್ಸ ವಿಕಪ್ಪನುಪಗತಾ, ಸಕಸಞ್ಞಾಯ ಅಚ್ಛಿನ್ದನಂ ವಾ ಅಚ್ಛಿನ್ದಾಪನಂ ವಾತಿ ಇಮಾನಿ ಪನೇತ್ಥ ತೀಣಿ ಅಙ್ಗಾನಿ।

743. Tatiye metanti me etaṃ. Sakasaññāya gahitattā pācittiyaṃ dukkaṭañca vuttaṃ. Itarathā bhaṇḍagghena kāretabbaṃ. Upasampannatā, parivattitacīvarassa vikappanupagatā, sakasaññāya acchindanaṃ vā acchindāpanaṃ vāti imāni panettha tīṇi aṅgāni.

೭೪೮-೭೫೨. ಚತುತ್ಥೇ ಆಹಟಸಪ್ಪಿಂ ದತ್ವಾತಿ ಅತ್ತನೋ ದತ್ವಾ। ಯಮಕಂ ಪಚಿತಬ್ಬನ್ತಿ ಸಪ್ಪಿಞ್ಚ ತೇಲಞ್ಚ ಏಕತೋ ಕತ್ವಾ ಪಚಿತಬ್ಬಂ। ಲೇಸೇನ ಗಹೇತುಕಾಮತಾ, ಅಞ್ಞಸ್ಸ ವಿಞ್ಞಾಪನಂ, ಪಟಿಲಾಭೋತಿ ಇಮಾನಿ ಪನೇತ್ಥ ತೀಣಿ ಅಙ್ಗಾನಿ।

748-752. Catutthe āhaṭasappiṃ datvāti attano datvā. Yamakaṃ pacitabbanti sappiñca telañca ekato katvā pacitabbaṃ. Lesena gahetukāmatā, aññassa viññāpanaṃ, paṭilābhoti imāni panettha tīṇi aṅgāni.

೭೫೩. ಪಞ್ಚಮೇ ಸಾತಿ ಥುಲ್ಲನನ್ದಾ। ಅಯನ್ತಿ ಅಯಂ ಸಿಕ್ಖಮಾನಾ। ಚೇತಾಪೇತ್ವಾತಿ ಜಾನಾಪೇತ್ವಾ ಇಚ್ಚೇವ ಅತ್ಥೋತಿ ಇಧ ವುತ್ತಂ, ಮಾತಿಕಾಟ್ಠಕಥಾಯಂ (ಕಙ್ಖಾ॰ ಅಟ್ಠ॰ ಅಞ್ಞಚೇತಾಪನಸಿಕ್ಖಾಪದವಣ್ಣನಾ) ಪನ ‘‘ಅಞ್ಞಂ ಚೇತಾಪೇತ್ವಾತಿ ಅತ್ತನೋ ಕಪ್ಪಿಯಭಣ್ಡೇನ ಇದಂ ನಾಮ ಆಹರಾತಿ ಅಞ್ಞಂ ಪರಿವತ್ತಾಪೇತ್ವಾ’’ತಿ ವುತ್ತಂ, ತಸ್ಮಾ ‘‘ಚೇತಾಪೇತ್ವಾ’’ತಿ ಇಮಸ್ಸ ಪರಿವತ್ತಾಪೇತ್ವಾತಿಪಿ ಅತ್ಥೋ ದಟ್ಠಬ್ಬೋ। ಅಞ್ಞಂ ಚೇತಾಪೇಯ್ಯಾತಿ ‘‘ಏವಂ ಮೇ ಇದಂ ದತ್ವಾ ಅಞ್ಞಮ್ಪಿ ಆಹರಿಸ್ಸತೀ’’ತಿ ಮಞ್ಞಮಾನಾ ‘‘ನ ಮೇ ಇಮಿನಾ ಅತ್ಥೋ, ಇದಂ ನಾಮ ಮೇ ಆಹರಾ’’ತಿ ತತೋ ಅಞ್ಞಂ ಚೇತಾಪೇಯ್ಯ।

753. Pañcame sāti thullanandā. Ayanti ayaṃ sikkhamānā. Cetāpetvāti jānāpetvā icceva atthoti idha vuttaṃ, mātikāṭṭhakathāyaṃ (kaṅkhā. aṭṭha. aññacetāpanasikkhāpadavaṇṇanā) pana ‘‘aññaṃ cetāpetvāti attano kappiyabhaṇḍena idaṃ nāma āharāti aññaṃ parivattāpetvā’’ti vuttaṃ, tasmā ‘‘cetāpetvā’’ti imassa parivattāpetvātipi attho daṭṭhabbo. Aññaṃ cetāpeyyāti ‘‘evaṃ me idaṃ datvā aññampi āharissatī’’ti maññamānā ‘‘na me iminā attho, idaṃ nāma me āharā’’ti tato aññaṃ cetāpeyya.

೭೫೮. ಛಟ್ಠೇ ಧಮ್ಮಕಿಚ್ಚನ್ತಿ ಪುಞ್ಞಕಮ್ಮಂ। ಪಾವಾರಿಕಸ್ಸಾತಿ ದುಸ್ಸವಾಣಿಜಕಸ್ಸ। ಯಾಯ ಚೇತಾಪಿತಂ, ತಸ್ಸಾಯೇವ ನಿಸ್ಸಗ್ಗಿಯಂ ನಿಸ್ಸಟ್ಠಪಟಿಲಾಭೋ ಚ, ತಸ್ಮಾ ತಾಯ ಭಿಕ್ಖುನಿಯಾ ನಿಸ್ಸಟ್ಠಂ ಪಟಿಲಭಿತ್ವಾ ಯಥಾದಾನೇ ಉಪನೇತಬ್ಬಂ, ನ ಅತ್ತನಾ ಗಹೇತಬ್ಬಂ। ಅಞ್ಞಸ್ಸತ್ಥಾಯಾತಿ ಚೀವರಾದೀಸು ಅಞ್ಞತರಸ್ಸತ್ಥಾಯ। ಅಞ್ಞುದ್ದಿಸಿಕೇನಾತಿ ಪುರಿಮಸ್ಸೇವತ್ಥದೀಪನಂ। ಪರಿಕ್ಖಾರೇನಾತಿ ಕಪ್ಪಿಯಭಣ್ಡೇನ।

758. Chaṭṭhe dhammakiccanti puññakammaṃ. Pāvārikassāti dussavāṇijakassa. Yāya cetāpitaṃ, tassāyeva nissaggiyaṃ nissaṭṭhapaṭilābho ca, tasmā tāya bhikkhuniyā nissaṭṭhaṃ paṭilabhitvā yathādāne upanetabbaṃ, na attanā gahetabbaṃ. Aññassatthāyāti cīvarādīsu aññatarassatthāya. Aññuddisikenāti purimassevatthadīpanaṃ. Parikkhārenāti kappiyabhaṇḍena.

೭೬೪. ಸತ್ತಮೇ ಸಯಂ ಯಾಚಿತಕೇನಾತಿ ಸಯಂ ಯಾಚಿತಕೇನಾಪೀತಿ ಅತ್ಥೋ। ತೇನೇವ ಪಾಳಿಯಂ ‘‘ತೇನ ಚ ಪರಿಕ್ಖಾರೇನ ಸಯಮ್ಪಿ ಯಾಚಿತ್ವಾ’’ತಿ ವುತ್ತಂ, ತತೋಯೇವ ಮಾತಿಕಾಟ್ಠಕಥಾಯಂ ‘‘ಸಞ್ಞಾಚಿಕೇನಾತಿ ಸಯಂ ಯಾಚಿತಕೇನಾಪೀ’’ತಿ ಅತ್ಥೋ ವುತ್ತೋ।

764. Sattame sayaṃ yācitakenāti sayaṃ yācitakenāpīti attho. Teneva pāḷiyaṃ ‘‘tena ca parikkhārena sayampi yācitvā’’ti vuttaṃ, tatoyeva mātikāṭṭhakathāyaṃ ‘‘saññācikenāti sayaṃ yācitakenāpī’’ti attho vutto.

೭೬೮-೭೭೩. ಅಟ್ಠಮನವಮದಸಮಾನಿ ಉತ್ತಾನತ್ಥಾನೇವ।

768-773. Aṭṭhamanavamadasamāni uttānatthāneva.

೭೮೪. ಏಕಾದಸಮೇ ಯಸ್ಮಾ ಪವಾರಿತಟ್ಠಾನೇ ವಿಞ್ಞತ್ತಿ ನಾಮ ನ ಪಟಿಸೇಧೇತಬ್ಬಾ, ತಸ್ಮಾ ಭಗವಾ ಧಮ್ಮನಿಮನ್ತನವಸೇನ ಪವಾರಿತಟ್ಠಾನೇ ‘‘ವದೇಯ್ಯಾಸಿ ಯೇನತ್ಥೋ’’ತಿ ವುತ್ತಾಯ ‘‘ಚತುಕ್ಕಂಸಪರಮಂ ವಿಞ್ಞಾಪೇತಬ್ಬ’’ನ್ತಿ ಪರಿಚ್ಛೇದಂ ದಸ್ಸೇತೀತಿ ವೇದಿತಬ್ಬಂ। ತೇನೇವ ಮಾತಿಕಾಟ್ಠಕಥಾಯಂ (ಕಙ್ಖಾ॰ ಅಟ್ಠ॰ ಗರುಪಾವುರಣಸಿಕ್ಖಾಪದವಣ್ಣನಾ) ‘‘ಚೇತಾಪೇತಬ್ಬನ್ತಿ ಠಪೇತ್ವಾ ಸಹಧಮ್ಮಿಕೇ ಚ ಞಾತಕಪವಾರಿತೇ ಚ ಅಞ್ಞೇನ ಕಿಸ್ಮಿಞ್ಚಿದೇವ ಗುಣೇ ಪರಿತುಟ್ಠೇನ ವದೇಯ್ಯಾಸಿ ಯೇನತ್ಥೋತಿ ವುತ್ತಾಯ ವಿಞ್ಞಾಪೇತಬ್ಬ’’ನ್ತಿ ವುತ್ತಂ।

784. Ekādasame yasmā pavāritaṭṭhāne viññatti nāma na paṭisedhetabbā, tasmā bhagavā dhammanimantanavasena pavāritaṭṭhāne ‘‘vadeyyāsi yenattho’’ti vuttāya ‘‘catukkaṃsaparamaṃ viññāpetabba’’nti paricchedaṃ dassetīti veditabbaṃ. Teneva mātikāṭṭhakathāyaṃ (kaṅkhā. aṭṭha. garupāvuraṇasikkhāpadavaṇṇanā) ‘‘cetāpetabbanti ṭhapetvā sahadhammike ca ñātakapavārite ca aññena kismiñcideva guṇe parituṭṭhena vadeyyāsi yenatthoti vuttāya viññāpetabba’’nti vuttaṃ.

೭೮೮. ದ್ವಾದಸಮಂ ಉತ್ತಾನತ್ಥಮೇವ।

788. Dvādasamaṃ uttānatthameva.

ಭಿಕ್ಖುನೀವಿಭಙ್ಗೇ ನಿಸ್ಸಗ್ಗಿಯಪಾಚಿತ್ತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ।

Bhikkhunīvibhaṅge nissaggiyapācittiyasikkhāpadavaṇṇanā niṭṭhitā.

ನಿಸ್ಸಗ್ಗಿಯಕಣ್ಡಂ ನಿಟ್ಠಿತಂ।

Nissaggiyakaṇḍaṃ niṭṭhitaṃ.

Next: ೪. ಪಾಚಿತ್ತಿಯಕಣ್ಡಂ (ಭಿಕ್ಖುನೀವಿಭಙ್ಗವಣ್ಣನಾ) • 4. Pācittiyakaṇḍaṃ (bhikkhunīvibhaṅgavaṇṇanā)

ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೨. ದುತಿಯನಿಸ್ಸಗ್ಗಿಯಾದಿಪಾಚಿತ್ತಿಯಸಿಕ್ಖಾಪದವಣ್ಣನಾ • 2. Dutiyanissaggiyādipācittiyasikkhāpadavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact