| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
নিস্সগ্গিযকণ্ডো
Nissaggiyakaṇḍo
১. পত্তসন্নিচযসিক্খাপদৰণ্ণনা
1. Pattasannicayasikkhāpadavaṇṇanā
নিস্সগ্গিযেসু আদিৰগ্গস্স তাৰ পঠমে পত্তসন্নিচযং করেয্যাতি পত্তসন্নিধিং করেয্য, একাহং অনধিট্ঠহিত্ৰা ৰা অৰিকপ্পেত্ৰা ৰা অধিট্ঠানুপগং পত্তং ঠপেয্যাতি অত্থো।
Nissaggiyesu ādivaggassa tāva paṭhame pattasannicayaṃ kareyyāti pattasannidhiṃ kareyya, ekāhaṃ anadhiṭṭhahitvā vā avikappetvā vā adhiṭṭhānupagaṃ pattaṃ ṭhapeyyāti attho.
সাৰত্থিযং ছব্বগ্গিযা ভিক্খুনিযো আরব্ভ পত্তসন্নিচযৰত্থুস্মিং পঞ্ঞত্তং, সেসকথামগ্গো ভিক্খুপাতিমোক্খৰণ্ণনাযং ৰুত্তনযেনেৰ ৰেদিতব্বো, তত্র হি দসাহাতিক্কমে আপত্তি, ইধ একাহাতিক্কমেতি এত্তকমেৰ তস্স চ ইমস্স চ নানাকরণং, সেসং তাদিসমেৰাতি।
Sāvatthiyaṃ chabbaggiyā bhikkhuniyo ārabbha pattasannicayavatthusmiṃ paññattaṃ, sesakathāmaggo bhikkhupātimokkhavaṇṇanāyaṃ vuttanayeneva veditabbo, tatra hi dasāhātikkame āpatti, idha ekāhātikkameti ettakameva tassa ca imassa ca nānākaraṇaṃ, sesaṃ tādisamevāti.
পত্তসন্নিচযসিক্খাপদৰণ্ণনা নিট্ঠিতা।
Pattasannicayasikkhāpadavaṇṇanā niṭṭhitā.
২. অকালচীৰরসিক্খাপদৰণ্ণনা
2. Akālacīvarasikkhāpadavaṇṇanā
দুতিযে অকালচীৰরন্তি অত্থতে কথিনে কথিনমাসেহি, অনত্থতে চীৰরমাসতো অঞ্ঞস্মিং কালে উপ্পন্নং, যং ৰা পন কালেপি আদিস্স দিন্নং। আদিস্স দিন্নং নাম ‘‘সম্পত্তা ভাজেন্তূ’’তি ৰত্ৰা ৰা, ‘‘ইদং গণস্স, ইদং তুম্হাকং দম্মী’’তি ৰত্ৰা ৰা, দাতুকামতায পাদমূলে ঠপেত্ৰা ৰা দিন্নং। ইচ্চেতং অকালচীৰরং ‘‘কালচীৰর’’ন্তি অধিট্ঠহিত্ৰা ভাজাপেন্তিযা পযোগে দুক্কটং, যং অত্তনা লদ্ধং, তং নিস্সগ্গিযং হোতি। নিস্সট্ঠং পটিলভিত্ৰাপি যথাদানেযেৰ উপনেতব্বং, অঞ্ঞস্মিম্পি এৰরূপে সিক্খাপদে এসেৰ নযো।
Dutiye akālacīvaranti atthate kathine kathinamāsehi, anatthate cīvaramāsato aññasmiṃ kāle uppannaṃ, yaṃ vā pana kālepi ādissa dinnaṃ. Ādissa dinnaṃ nāma ‘‘sampattā bhājentū’’ti vatvā vā, ‘‘idaṃ gaṇassa, idaṃ tumhākaṃ dammī’’ti vatvā vā, dātukāmatāya pādamūle ṭhapetvā vā dinnaṃ. Iccetaṃ akālacīvaraṃ ‘‘kālacīvara’’nti adhiṭṭhahitvā bhājāpentiyā payoge dukkaṭaṃ, yaṃ attanā laddhaṃ, taṃ nissaggiyaṃ hoti. Nissaṭṭhaṃ paṭilabhitvāpi yathādāneyeva upanetabbaṃ, aññasmimpi evarūpe sikkhāpade eseva nayo.
সাৰত্থিযং থুল্লনন্দং আরব্ভ অকালচীৰরং ‘‘কালচীৰর’’ন্তি অধিট্ঠহিত্ৰা ভাজনৰত্থুস্মিং পঞ্ঞত্তং, অকালচীৰরে ৰেমতিকায, কালচীৰরে অকালচীৰরসঞ্ঞায চেৰ ৰেমতিকায চ দুক্কটং। উভোসু কালচীৰরসঞ্ঞায, উম্মত্তিকাদীনঞ্চ অনাপত্তি। অকালচীৰরতা, তথাসঞ্ঞিতা, ‘‘কালচীৰর’’ন্তি অধিট্ঠায লেসেন ভাজাপনং, পটিলাভোতি ইমানেত্থ চত্তারি অঙ্গানি। সমুট্ঠানাদীনি অদিন্নাদানসদিসানীতি।
Sāvatthiyaṃ thullanandaṃ ārabbha akālacīvaraṃ ‘‘kālacīvara’’nti adhiṭṭhahitvā bhājanavatthusmiṃ paññattaṃ, akālacīvare vematikāya, kālacīvare akālacīvarasaññāya ceva vematikāya ca dukkaṭaṃ. Ubhosu kālacīvarasaññāya, ummattikādīnañca anāpatti. Akālacīvaratā, tathāsaññitā, ‘‘kālacīvara’’nti adhiṭṭhāya lesena bhājāpanaṃ, paṭilābhoti imānettha cattāri aṅgāni. Samuṭṭhānādīni adinnādānasadisānīti.
অকালচীৰরসিক্খাপদৰণ্ণনা নিট্ঠিতা।
Akālacīvarasikkhāpadavaṇṇanā niṭṭhitā.
৩. চীৰরপরিৰত্তনসিক্খাপদৰণ্ণনা
3. Cīvaraparivattanasikkhāpadavaṇṇanā
ততিযে হন্দাতি গণ্হ। অচ্ছিন্দেয্যাতি সযং অচ্ছিন্দন্তিযা বন্ধিত্ৰা ঠপিতেসু বহূসুপি একাপত্তি, ইতরেসু ৰত্থুগণনায আপত্তিযো। অচ্ছিন্দাপনে পন একায আণত্তিযা বহূসু অচ্ছিন্নেসুপি একাৰাপত্তি।
Tatiye handāti gaṇha. Acchindeyyāti sayaṃ acchindantiyā bandhitvā ṭhapitesu bahūsupi ekāpatti, itaresu vatthugaṇanāya āpattiyo. Acchindāpane pana ekāya āṇattiyā bahūsu acchinnesupi ekāvāpatti.
সাৰত্থিযং থুল্লনন্দং আরব্ভ চীৰরং পরিৰত্তেত্ৰা অচ্ছিন্দনৰত্থুস্মিং পঞ্ঞত্তং, সাণত্তিকং, তিকপাচিত্তিযং, অঞ্ঞস্মিং পরিক্খারে তিকদুক্কটং, অনুপসম্পন্নায চীৰরেপি তিকদুক্কটমেৰ। যা পন তায ৰা দিয্যমানং, তস্সা ৰা ৰিস্সাসং গণ্হাতি, তস্সা, উম্মত্তিকাদীনঞ্চ অনাপত্তি। উপসম্পন্নতা, পরিৰত্তিতচীৰরস্স ৰিকপ্পনুপগতা, সকসঞ্ঞায অচ্ছিন্দনং ৰা অচ্ছিন্দাপনং ৰাতি ইমানেত্থ তীণি অঙ্গানি। সমুট্ঠানাদীনি অদিন্নাদানসদিসানি, ইদং পন দুক্খৰেদনন্তি।
Sāvatthiyaṃ thullanandaṃ ārabbha cīvaraṃ parivattetvā acchindanavatthusmiṃ paññattaṃ, sāṇattikaṃ, tikapācittiyaṃ, aññasmiṃ parikkhāre tikadukkaṭaṃ, anupasampannāya cīvarepi tikadukkaṭameva. Yā pana tāya vā diyyamānaṃ, tassā vā vissāsaṃ gaṇhāti, tassā, ummattikādīnañca anāpatti. Upasampannatā, parivattitacīvarassa vikappanupagatā, sakasaññāya acchindanaṃ vā acchindāpanaṃ vāti imānettha tīṇi aṅgāni. Samuṭṭhānādīni adinnādānasadisāni, idaṃ pana dukkhavedananti.
চীৰরপরিৰত্তনসিক্খাপদৰণ্ণনা নিট্ঠিতা।
Cīvaraparivattanasikkhāpadavaṇṇanā niṭṭhitā.
৪. অঞ্ঞৰিঞ্ঞাপনসিক্খাপদৰণ্ণনা
4. Aññaviññāpanasikkhāpadavaṇṇanā
চতুত্থে ৰিঞ্ঞাপেত্ৰাতি জানাপেত্ৰা, ‘‘ইদং নাম আহরা’’তি যাচিত্ৰা ৰা। অঞ্ঞং ৰিঞ্ঞাপেয্যাতি যং পুব্বে ‘‘কিন্তে, অয্যে, অফাসু, কিং আহরিযতূ’’তি ৰুত্তায ৰিঞ্ঞাপিতং, তং পটিক্খিপিত্ৰা তঞ্চেৰ অঞ্ঞঞ্চ গহেতুকামা ততো অঞ্ঞং ৰিঞ্ঞাপেয্য, তস্সা ৰিঞ্ঞত্তিযা দুক্কটং, পটিলাভেন নিস্সগ্গিযং হোতি।
Catutthe viññāpetvāti jānāpetvā, ‘‘idaṃ nāma āharā’’ti yācitvā vā. Aññaṃ viññāpeyyāti yaṃ pubbe ‘‘kinte, ayye, aphāsu, kiṃ āhariyatū’’ti vuttāya viññāpitaṃ, taṃ paṭikkhipitvā tañceva aññañca gahetukāmā tato aññaṃ viññāpeyya, tassā viññattiyā dukkaṭaṃ, paṭilābhena nissaggiyaṃ hoti.
সাৰত্থিযং থুল্লনন্দং আরব্ভ অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপনৰত্থুস্মিং পঞ্ঞত্তং, তিকপাচিত্তিযং, অনঞ্ঞে দ্ৰিকদুক্কটং। অনঞ্ঞে অনঞ্ঞসঞ্ঞায পন, তস্মিং অপ্পহোন্তে পুন তঞ্ঞেৰ, অঞ্ঞেনপি অত্থে সতি তেন সদ্ধিং অঞ্ঞঞ্চ, যঞ্চ ৰিঞ্ঞত্তং, ততো চে অঞ্ঞং সমগ্ঘতরং হোতি, ইমং আনিসংসং দস্সেত্ৰা সুদ্ধং অঞ্ঞমেৰ চ ৰিঞ্ঞাপেন্তিযা, উম্মত্তিকাদীনঞ্চ অনাপত্তি। লেসেন গহেতুকামতা, অঞ্ঞস্স ৰিঞ্ঞাপনং, পটিলাভোতি ইমানেত্থ তীণি অঙ্গানি। সমুট্ঠানাদীনি সঞ্চরিত্তসদিসানীতি।
Sāvatthiyaṃ thullanandaṃ ārabbha aññaṃ viññāpetvā aññaṃ viññāpanavatthusmiṃ paññattaṃ, tikapācittiyaṃ, anaññe dvikadukkaṭaṃ. Anaññe anaññasaññāya pana, tasmiṃ appahonte puna taññeva, aññenapi atthe sati tena saddhiṃ aññañca, yañca viññattaṃ, tato ce aññaṃ samagghataraṃ hoti, imaṃ ānisaṃsaṃ dassetvā suddhaṃ aññameva ca viññāpentiyā, ummattikādīnañca anāpatti. Lesena gahetukāmatā, aññassa viññāpanaṃ, paṭilābhoti imānettha tīṇi aṅgāni. Samuṭṭhānādīni sañcarittasadisānīti.
অঞ্ঞৰিঞ্ঞাপনসিক্খাপদৰণ্ণনা নিট্ঠিতা।
Aññaviññāpanasikkhāpadavaṇṇanā niṭṭhitā.
৫. অঞ্ঞচেতাপনসিক্খাপদৰণ্ণনা
5. Aññacetāpanasikkhāpadavaṇṇanā
পঞ্চমে অঞ্ঞং চেতাপেত্ৰাতি অত্তনো কপ্পিযভণ্ডেন ‘‘ইদং নাম আহরা’’তি অঞ্ঞং পরিৰত্তাপেত্ৰা। অঞ্ঞং চেতাপেয্যাতি ‘‘এৰং মে ইদং দত্ৰা অঞ্ঞম্পি আহরিস্সতী’’তি মঞ্ঞমানা ‘‘ন মে ইমিনা অত্থো, ইদং নাম মে আহরা’’তি ততো অঞ্ঞং চেতাপেয্য। তস্সা চেতাপনপ্পযোগে দুক্কটং, পটিলাভেন তেন ৰা অঞ্ঞেন ৰা মূলেন আহটং নিস্সগ্গিযং হোতি, সেসং চতুত্থসদিসমেৰাতি।
Pañcame aññaṃ cetāpetvāti attano kappiyabhaṇḍena ‘‘idaṃ nāma āharā’’ti aññaṃ parivattāpetvā. Aññaṃ cetāpeyyāti ‘‘evaṃ me idaṃ datvā aññampi āharissatī’’ti maññamānā ‘‘na me iminā attho, idaṃ nāma me āharā’’ti tato aññaṃ cetāpeyya. Tassā cetāpanappayoge dukkaṭaṃ, paṭilābhena tena vā aññena vā mūlena āhaṭaṃ nissaggiyaṃ hoti, sesaṃ catutthasadisamevāti.
অঞ্ঞচেতাপনসিক্খাপদৰণ্ণনা নিট্ঠিতা।
Aññacetāpanasikkhāpadavaṇṇanā niṭṭhitā.
৬. পঠমসঙ্ঘিকচেতাপনসিক্খাপদৰণ্ণনা
6. Paṭhamasaṅghikacetāpanasikkhāpadavaṇṇanā
ছট্ঠে অঞ্ঞদত্থিকেনাতি অঞ্ঞস্সত্থায দিন্নেন। অঞ্ঞুদ্দিসিকেনাতি অঞ্ঞং উদ্দিসিত্ৰা দিন্নেন। সঙ্ঘিকেনাতি সঙ্ঘস্স পরিচ্চত্তেন। পরিক্খারেনাতি কপ্পিযভণ্ডেন। অঞ্ঞং চেতাপেয্যাতি ‘‘ইদং নাম পরিভুঞ্জেয্যাথা’’তি যং উদ্দিসিত্ৰা নিযমেত্ৰা যো পরিক্খারো দিন্নো, ততো অঞ্ঞং পরিৰত্তাপেয্য, তস্সা পযোগে দুক্কটং, পটিলাভেন নিস্সগ্গিযং।
Chaṭṭhe aññadatthikenāti aññassatthāya dinnena. Aññuddisikenāti aññaṃ uddisitvā dinnena. Saṅghikenāti saṅghassa pariccattena. Parikkhārenāti kappiyabhaṇḍena. Aññaṃ cetāpeyyāti ‘‘idaṃ nāma paribhuñjeyyāthā’’ti yaṃ uddisitvā niyametvā yo parikkhāro dinno, tato aññaṃ parivattāpeyya, tassā payoge dukkaṭaṃ, paṭilābhena nissaggiyaṃ.
সাৰত্থিযং সম্বহুলা ভিক্খুনিযো আরব্ভ তাদিসেন পরিক্খারেন অঞ্ঞং চেতাপনৰত্থুস্মিং পঞ্ঞত্তং, তিকপাচিত্তিযং, অনঞ্ঞদত্থিকে দ্ৰিকদুক্কটং। তস্মিং পন অনঞ্ঞদত্থিকসঞ্ঞায, সেসকং উপনেন্তিযা, ‘‘তুম্হেহি এতদত্থায দিন্নো, অম্হাকঞ্চ ইমিনা নাম অত্থো’’তি সামিকে অপলোকেত্ৰা উপনেন্তিযা, যদা ভিক্খুনিযো ৰিহারম্পি ছড্ডেত্ৰা পক্কমন্তি, এৰরূপাসু আপদাসু উপনেন্তীনং, উম্মত্তিকাদীনঞ্চ অনাপত্তি। সেসং চতুত্থসদিসমেৰাতি।
Sāvatthiyaṃ sambahulā bhikkhuniyo ārabbha tādisena parikkhārena aññaṃ cetāpanavatthusmiṃ paññattaṃ, tikapācittiyaṃ, anaññadatthike dvikadukkaṭaṃ. Tasmiṃ pana anaññadatthikasaññāya, sesakaṃ upanentiyā, ‘‘tumhehi etadatthāya dinno, amhākañca iminā nāma attho’’ti sāmike apaloketvā upanentiyā, yadā bhikkhuniyo vihārampi chaḍḍetvā pakkamanti, evarūpāsu āpadāsu upanentīnaṃ, ummattikādīnañca anāpatti. Sesaṃ catutthasadisamevāti.
পঠমসঙ্ঘিকচেতাপনসিক্খাপদৰণ্ণনা নিট্ঠিতা।
Paṭhamasaṅghikacetāpanasikkhāpadavaṇṇanā niṭṭhitā.
৭. দুতিযসঙ্ঘিকচেতাপনসিক্খাপদৰণ্ণনা
7. Dutiyasaṅghikacetāpanasikkhāpadavaṇṇanā
সত্তমে সঞ্ঞাচিকেনাতি সযং যাচিতকেনাপি। এতদেৰেত্থ নানাকরণং, সেসং ছট্ঠসদিসমেৰাতি।
Sattame saññācikenāti sayaṃ yācitakenāpi. Etadevettha nānākaraṇaṃ, sesaṃ chaṭṭhasadisamevāti.
দুতিযসঙ্ঘিকচেতাপনসিক্খাপদৰণ্ণনা নিট্ঠিতা।
Dutiyasaṅghikacetāpanasikkhāpadavaṇṇanā niṭṭhitā.
৮. পঠমগণিকচেতাপনসিক্খাপদৰণ্ণনা
8. Paṭhamagaṇikacetāpanasikkhāpadavaṇṇanā
অট্ঠমে মহাজনিকেনাতি গণস্স পরিচ্চত্তেন, ইদমেত্থ ছট্ঠতো নানাকরণং।
Aṭṭhame mahājanikenāti gaṇassa pariccattena, idamettha chaṭṭhato nānākaraṇaṃ.
পঠমগণিকচেতাপনসিক্খাপদৰণ্ণনা নিট্ঠিতা।
Paṭhamagaṇikacetāpanasikkhāpadavaṇṇanā niṭṭhitā.
৯. দুতিযগণিকচেতাপনসিক্খাপদৰণ্ণনা
9. Dutiyagaṇikacetāpanasikkhāpadavaṇṇanā
নৰমে সঞ্ঞাচিকেনাতি ইদং অট্ঠমতো অতিরিত্তং, সেসং দ্ৰীসুপি ছট্ঠসিক্খাপদসদিসমেৰাতি।
Navame saññācikenāti idaṃ aṭṭhamato atirittaṃ, sesaṃ dvīsupi chaṭṭhasikkhāpadasadisamevāti.
দুতিযগণিকচেতাপনসিক্খাপদৰণ্ণনা নিট্ঠিতা।
Dutiyagaṇikacetāpanasikkhāpadavaṇṇanā niṭṭhitā.
১০. পুগ্গলিকচেতাপনসিক্খাপদৰণ্ণনা
10. Puggalikacetāpanasikkhāpadavaṇṇanā
দসমে পুগ্গলিকেনাতি একভিক্খুনিযা পরিচ্চত্তেন। সঞ্ঞাচিকেনাতি সযং যাচিতকেন চ। অঞ্ঞং চেতাপেয্যাতি যং উদ্দিসিত্ৰা দিন্নং, ততো অঞ্ঞং চেতাপেন্তিযা পযোগে দুক্কটং, পটিলাভেন নিস্সগ্গিযং হোতি।
Dasame puggalikenāti ekabhikkhuniyā pariccattena. Saññācikenāti sayaṃ yācitakena ca. Aññaṃ cetāpeyyāti yaṃ uddisitvā dinnaṃ, tato aññaṃ cetāpentiyā payoge dukkaṭaṃ, paṭilābhena nissaggiyaṃ hoti.
সাৰত্থিযং থুল্লনন্দং আরব্ভ তাদিসেন পরিক্খারেন অঞ্ঞং চেতাপনৰত্থুস্মিং পঞ্ঞত্তং, সেসং ছট্ঠসদিসমেৰাতি।
Sāvatthiyaṃ thullanandaṃ ārabbha tādisena parikkhārena aññaṃ cetāpanavatthusmiṃ paññattaṃ, sesaṃ chaṭṭhasadisamevāti.
পুগ্গলিকচেতাপনসিক্খাপদৰণ্ণনা নিট্ঠিতা।
Puggalikacetāpanasikkhāpadavaṇṇanā niṭṭhitā.
পত্তৰগ্গো পঠমো।
Pattavaggo paṭhamo.
১১. গরুপাৰুরণসিক্খাপদৰণ্ণনা
11. Garupāvuraṇasikkhāpadavaṇṇanā
দুতিযস্স পঠমে গরুপাৰুরণন্তি সীতকালে পাৰুরণং। চতুক্কংসপরমন্তি কংসো নাম চতুক্কহাপণিকো হোতি, তস্মা সোল়সকহাপণগ্ঘনকং। চেতাপেতব্বন্তি ঠপেত্ৰা সহধম্মিকে চ ঞাতকপ্পৰারিতে চ অঞ্ঞেন কিস্মিঞ্চিদেৰ গুণে পরিতুট্ঠেন ‘‘ৰদেথায্যে, যেনত্থো’’তি ৰুত্তায ৰিঞ্ঞাপেতব্বং। ততো চে উত্তরীতি ততুত্তরি ৰিঞ্ঞাপেন্তিযা দুক্কটং, পটিলদ্ধং নিস্সগ্গিযং হোতি।
Dutiyassa paṭhame garupāvuraṇanti sītakāle pāvuraṇaṃ. Catukkaṃsaparamanti kaṃso nāma catukkahāpaṇiko hoti, tasmā soḷasakahāpaṇagghanakaṃ. Cetāpetabbanti ṭhapetvā sahadhammike ca ñātakappavārite ca aññena kismiñcideva guṇe parituṭṭhena ‘‘vadethāyye, yenattho’’ti vuttāya viññāpetabbaṃ. Tato ce uttarīti tatuttari viññāpentiyā dukkaṭaṃ, paṭiladdhaṃ nissaggiyaṃ hoti.
সাৰত্থিযং থুল্লনন্দং আরব্ভ রাজানং কম্বলং ৰিঞ্ঞাপনৰত্থুস্মিং পঞ্ঞত্তং, তিকপাচিত্তিযং, ঊনকচতুক্কংসে দ্ৰিকদুক্কটং। তস্মিং পন ঊনকসঞ্ঞায, চতুক্কংসপরমং চেতাপেন্তিযা, ঞাতকপ্পৰারিতে ৰা, অঞ্ঞস্স ৰা অত্থায, অত্তনো ৰা ধনেন, মহগ্ঘং চেতাপেন্তং অপ্পগ্ঘং চেতাপেন্তিযা, উম্মত্তিকাদীনঞ্চ অনাপত্তি। গরুপাৰুরণতা, অতিরেকচতুক্কংসতা, অননুঞ্ঞাতট্ঠানে ৰিঞ্ঞত্তি, পটিলাভোতি ইমানেত্থ চত্তারি অঙ্গানি। সমুট্ঠানাদীনি সঞ্চরিত্তসদিসানীতি।
Sāvatthiyaṃ thullanandaṃ ārabbha rājānaṃ kambalaṃ viññāpanavatthusmiṃ paññattaṃ, tikapācittiyaṃ, ūnakacatukkaṃse dvikadukkaṭaṃ. Tasmiṃ pana ūnakasaññāya, catukkaṃsaparamaṃ cetāpentiyā, ñātakappavārite vā, aññassa vā atthāya, attano vā dhanena, mahagghaṃ cetāpentaṃ appagghaṃ cetāpentiyā, ummattikādīnañca anāpatti. Garupāvuraṇatā, atirekacatukkaṃsatā, ananuññātaṭṭhāne viññatti, paṭilābhoti imānettha cattāri aṅgāni. Samuṭṭhānādīni sañcarittasadisānīti.
গরুপাৰুরণসিক্খাপদৰণ্ণনা নিট্ঠিতা।
Garupāvuraṇasikkhāpadavaṇṇanā niṭṭhitā.
১২. লহুপাৰুরণসিক্খাপদৰণ্ণনা
12. Lahupāvuraṇasikkhāpadavaṇṇanā
দুতিযে লহুপাৰুরণন্তি উণ্হকালে পাৰুরণং। অড্ঢতেয্যকংসপরমন্তি দসকহাপণগ্ঘনকং, সেসং পঠমসদিসমেৰাতি।
Dutiye lahupāvuraṇanti uṇhakāle pāvuraṇaṃ. Aḍḍhateyyakaṃsaparamanti dasakahāpaṇagghanakaṃ, sesaṃ paṭhamasadisamevāti.
লহুপাৰুরণসিক্খাপদৰণ্ণনা নিট্ঠিতা।
Lahupāvuraṇasikkhāpadavaṇṇanā niṭṭhitā.
ইতো পরানি ইমস্মিং ৰগ্গে অট্ঠ, ততিযৰগ্গে দসাতি ইমানি অট্ঠারস সিক্খাপদানি ভিক্খুপাতিমোক্খৰণ্ণনাযং ৰুত্তনযেনেৰ ৰেদিতব্বানীতি।
Ito parāni imasmiṃ vagge aṭṭha, tatiyavagge dasāti imāni aṭṭhārasa sikkhāpadāni bhikkhupātimokkhavaṇṇanāyaṃ vuttanayeneva veditabbānīti.
জাতরূপৰগ্গো ততিযো।
Jātarūpavaggo tatiyo.
উদ্দিট্ঠা খো অয্যাযো তিংস নিস্সগ্গিযা পাচিত্তিযা ধম্মাতি ভিক্খূ আরব্ভ পঞ্ঞত্তা সাধারণা অট্ঠারস, অসাধারণা দ্ৰাদসাতি এৰং তিংস। সেসং সব্বত্থ উত্তানমেৰাতি।
Uddiṭṭhā kho ayyāyo tiṃsa nissaggiyā pācittiyā dhammāti bhikkhū ārabbha paññattā sādhāraṇā aṭṭhārasa, asādhāraṇā dvādasāti evaṃ tiṃsa. Sesaṃ sabbattha uttānamevāti.
কঙ্খাৰিতরণিযা পাতিমোক্খৰণ্ণনায ভিক্খুনিপাতিমোক্খে
Kaṅkhāvitaraṇiyā pātimokkhavaṇṇanāya bhikkhunipātimokkhe
নিস্সগ্গিযপাচিত্তিযৰণ্ণনা নিট্ঠিতা।
Nissaggiyapācittiyavaṇṇanā niṭṭhitā.
