| Library / Tipiṭaka / ਤਿਪਿਟਕ • Tipiṭaka / ਦ੍વੇਮਾਤਿਕਾਪਾਲ਼ਿ • Dvemātikāpāḷi |
ਨਿਸ੍ਸਗ੍ਗਿਯਕਣ੍ਡੋ
Nissaggiyakaṇḍo
੧. ਪਤ੍ਤਸਨ੍ਨਿਚਯਸਿਕ੍ਖਾਪਦવਣ੍ਣਨਾ
1. Pattasannicayasikkhāpadavaṇṇanā
ਨਿਸ੍ਸਗ੍ਗਿਯੇਸੁ ਆਦਿવਗ੍ਗਸ੍ਸ ਤਾવ ਪਠਮੇ ਪਤ੍ਤਸਨ੍ਨਿਚਯਂ ਕਰੇਯ੍ਯਾਤਿ ਪਤ੍ਤਸਨ੍ਨਿਧਿਂ ਕਰੇਯ੍ਯ, ਏਕਾਹਂ ਅਨਧਿਟ੍ਠਹਿਤ੍વਾ વਾ ਅવਿਕਪ੍ਪੇਤ੍વਾ વਾ ਅਧਿਟ੍ਠਾਨੁਪਗਂ ਪਤ੍ਤਂ ਠਪੇਯ੍ਯਾਤਿ ਅਤ੍ਥੋ।
Nissaggiyesu ādivaggassa tāva paṭhame pattasannicayaṃ kareyyāti pattasannidhiṃ kareyya, ekāhaṃ anadhiṭṭhahitvā vā avikappetvā vā adhiṭṭhānupagaṃ pattaṃ ṭhapeyyāti attho.
ਸਾવਤ੍ਥਿਯਂ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਆਰਬ੍ਭ ਪਤ੍ਤਸਨ੍ਨਿਚਯવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਕਥਾਮਗ੍ਗੋ ਭਿਕ੍ਖੁਪਾਤਿਮੋਕ੍ਖવਣ੍ਣਨਾਯਂ વੁਤ੍ਤਨਯੇਨੇવ વੇਦਿਤਬ੍ਬੋ, ਤਤ੍ਰ ਹਿ ਦਸਾਹਾਤਿਕ੍ਕਮੇ ਆਪਤ੍ਤਿ, ਇਧ ਏਕਾਹਾਤਿਕ੍ਕਮੇਤਿ ਏਤ੍ਤਕਮੇવ ਤਸ੍ਸ ਚ ਇਮਸ੍ਸ ਚ ਨਾਨਾਕਰਣਂ, ਸੇਸਂ ਤਾਦਿਸਮੇવਾਤਿ।
Sāvatthiyaṃ chabbaggiyā bhikkhuniyo ārabbha pattasannicayavatthusmiṃ paññattaṃ, sesakathāmaggo bhikkhupātimokkhavaṇṇanāyaṃ vuttanayeneva veditabbo, tatra hi dasāhātikkame āpatti, idha ekāhātikkameti ettakameva tassa ca imassa ca nānākaraṇaṃ, sesaṃ tādisamevāti.
ਪਤ੍ਤਸਨ੍ਨਿਚਯਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Pattasannicayasikkhāpadavaṇṇanā niṭṭhitā.
੨. ਅਕਾਲਚੀવਰਸਿਕ੍ਖਾਪਦવਣ੍ਣਨਾ
2. Akālacīvarasikkhāpadavaṇṇanā
ਦੁਤਿਯੇ ਅਕਾਲਚੀવਰਨ੍ਤਿ ਅਤ੍ਥਤੇ ਕਥਿਨੇ ਕਥਿਨਮਾਸੇਹਿ, ਅਨਤ੍ਥਤੇ ਚੀવਰਮਾਸਤੋ ਅਞ੍ਞਸ੍ਮਿਂ ਕਾਲੇ ਉਪ੍ਪਨ੍ਨਂ, ਯਂ વਾ ਪਨ ਕਾਲੇਪਿ ਆਦਿਸ੍ਸ ਦਿਨ੍ਨਂ। ਆਦਿਸ੍ਸ ਦਿਨ੍ਨਂ ਨਾਮ ‘‘ਸਮ੍ਪਤ੍ਤਾ ਭਾਜੇਨ੍ਤੂ’’ਤਿ વਤ੍વਾ વਾ, ‘‘ਇਦਂ ਗਣਸ੍ਸ, ਇਦਂ ਤੁਮ੍ਹਾਕਂ ਦਮ੍ਮੀ’’ਤਿ વਤ੍વਾ વਾ, ਦਾਤੁਕਾਮਤਾਯ ਪਾਦਮੂਲੇ ਠਪੇਤ੍વਾ વਾ ਦਿਨ੍ਨਂ। ਇਚ੍ਚੇਤਂ ਅਕਾਲਚੀવਰਂ ‘‘ਕਾਲਚੀવਰ’’ਨ੍ਤਿ ਅਧਿਟ੍ਠਹਿਤ੍વਾ ਭਾਜਾਪੇਨ੍ਤਿਯਾ ਪਯੋਗੇ ਦੁਕ੍ਕਟਂ, ਯਂ ਅਤ੍ਤਨਾ ਲਦ੍ਧਂ, ਤਂ ਨਿਸ੍ਸਗ੍ਗਿਯਂ ਹੋਤਿ। ਨਿਸ੍ਸਟ੍ਠਂ ਪਟਿਲਭਿਤ੍વਾਪਿ ਯਥਾਦਾਨੇਯੇવ ਉਪਨੇਤਬ੍ਬਂ, ਅਞ੍ਞਸ੍ਮਿਮ੍ਪਿ ਏવਰੂਪੇ ਸਿਕ੍ਖਾਪਦੇ ਏਸੇવ ਨਯੋ।
Dutiye akālacīvaranti atthate kathine kathinamāsehi, anatthate cīvaramāsato aññasmiṃ kāle uppannaṃ, yaṃ vā pana kālepi ādissa dinnaṃ. Ādissa dinnaṃ nāma ‘‘sampattā bhājentū’’ti vatvā vā, ‘‘idaṃ gaṇassa, idaṃ tumhākaṃ dammī’’ti vatvā vā, dātukāmatāya pādamūle ṭhapetvā vā dinnaṃ. Iccetaṃ akālacīvaraṃ ‘‘kālacīvara’’nti adhiṭṭhahitvā bhājāpentiyā payoge dukkaṭaṃ, yaṃ attanā laddhaṃ, taṃ nissaggiyaṃ hoti. Nissaṭṭhaṃ paṭilabhitvāpi yathādāneyeva upanetabbaṃ, aññasmimpi evarūpe sikkhāpade eseva nayo.
ਸਾવਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਅਕਾਲਚੀવਰਂ ‘‘ਕਾਲਚੀવਰ’’ਨ੍ਤਿ ਅਧਿਟ੍ਠਹਿਤ੍વਾ ਭਾਜਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਕਾਲਚੀવਰੇ વੇਮਤਿਕਾਯ, ਕਾਲਚੀવਰੇ ਅਕਾਲਚੀવਰਸਞ੍ਞਾਯ ਚੇવ વੇਮਤਿਕਾਯ ਚ ਦੁਕ੍ਕਟਂ। ਉਭੋਸੁ ਕਾਲਚੀવਰਸਞ੍ਞਾਯ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਅਕਾਲਚੀવਰਤਾ, ਤਥਾਸਞ੍ਞਿਤਾ, ‘‘ਕਾਲਚੀવਰ’’ਨ੍ਤਿ ਅਧਿਟ੍ਠਾਯ ਲੇਸੇਨ ਭਾਜਾਪਨਂ, ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ।
Sāvatthiyaṃ thullanandaṃ ārabbha akālacīvaraṃ ‘‘kālacīvara’’nti adhiṭṭhahitvā bhājanavatthusmiṃ paññattaṃ, akālacīvare vematikāya, kālacīvare akālacīvarasaññāya ceva vematikāya ca dukkaṭaṃ. Ubhosu kālacīvarasaññāya, ummattikādīnañca anāpatti. Akālacīvaratā, tathāsaññitā, ‘‘kālacīvara’’nti adhiṭṭhāya lesena bhājāpanaṃ, paṭilābhoti imānettha cattāri aṅgāni. Samuṭṭhānādīni adinnādānasadisānīti.
ਅਕਾਲਚੀવਰਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Akālacīvarasikkhāpadavaṇṇanā niṭṭhitā.
੩. ਚੀવਰਪਰਿવਤ੍ਤਨਸਿਕ੍ਖਾਪਦવਣ੍ਣਨਾ
3. Cīvaraparivattanasikkhāpadavaṇṇanā
ਤਤਿਯੇ ਹਨ੍ਦਾਤਿ ਗਣ੍ਹ। ਅਚ੍ਛਿਨ੍ਦੇਯ੍ਯਾਤਿ ਸਯਂ ਅਚ੍ਛਿਨ੍ਦਨ੍ਤਿਯਾ ਬਨ੍ਧਿਤ੍વਾ ਠਪਿਤੇਸੁ ਬਹੂਸੁਪਿ ਏਕਾਪਤ੍ਤਿ, ਇਤਰੇਸੁ વਤ੍ਥੁਗਣਨਾਯ ਆਪਤ੍ਤਿਯੋ। ਅਚ੍ਛਿਨ੍ਦਾਪਨੇ ਪਨ ਏਕਾਯ ਆਣਤ੍ਤਿਯਾ ਬਹੂਸੁ ਅਚ੍ਛਿਨ੍ਨੇਸੁਪਿ ਏਕਾવਾਪਤ੍ਤਿ।
Tatiye handāti gaṇha. Acchindeyyāti sayaṃ acchindantiyā bandhitvā ṭhapitesu bahūsupi ekāpatti, itaresu vatthugaṇanāya āpattiyo. Acchindāpane pana ekāya āṇattiyā bahūsu acchinnesupi ekāvāpatti.
ਸਾવਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਚੀવਰਂ ਪਰਿવਤ੍ਤੇਤ੍વਾ ਅਚ੍ਛਿਨ੍ਦਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਞ੍ਞਸ੍ਮਿਂ ਪਰਿਕ੍ਖਾਰੇ ਤਿਕਦੁਕ੍ਕਟਂ, ਅਨੁਪਸਮ੍ਪਨ੍ਨਾਯ ਚੀવਰੇਪਿ ਤਿਕਦੁਕ੍ਕਟਮੇવ। ਯਾ ਪਨ ਤਾਯ વਾ ਦਿਯ੍ਯਮਾਨਂ, ਤਸ੍ਸਾ વਾ વਿਸ੍ਸਾਸਂ ਗਣ੍ਹਾਤਿ, ਤਸ੍ਸਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਉਪਸਮ੍ਪਨ੍ਨਤਾ, ਪਰਿવਤ੍ਤਿਤਚੀવਰਸ੍ਸ વਿਕਪ੍ਪਨੁਪਗਤਾ, ਸਕਸਞ੍ਞਾਯ ਅਚ੍ਛਿਨ੍ਦਨਂ વਾ ਅਚ੍ਛਿਨ੍ਦਾਪਨਂ વਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖવੇਦਨਨ੍ਤਿ।
Sāvatthiyaṃ thullanandaṃ ārabbha cīvaraṃ parivattetvā acchindanavatthusmiṃ paññattaṃ, sāṇattikaṃ, tikapācittiyaṃ, aññasmiṃ parikkhāre tikadukkaṭaṃ, anupasampannāya cīvarepi tikadukkaṭameva. Yā pana tāya vā diyyamānaṃ, tassā vā vissāsaṃ gaṇhāti, tassā, ummattikādīnañca anāpatti. Upasampannatā, parivattitacīvarassa vikappanupagatā, sakasaññāya acchindanaṃ vā acchindāpanaṃ vāti imānettha tīṇi aṅgāni. Samuṭṭhānādīni adinnādānasadisāni, idaṃ pana dukkhavedananti.
ਚੀવਰਪਰਿવਤ੍ਤਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Cīvaraparivattanasikkhāpadavaṇṇanā niṭṭhitā.
੪. ਅਞ੍ਞવਿਞ੍ਞਾਪਨਸਿਕ੍ਖਾਪਦવਣ੍ਣਨਾ
4. Aññaviññāpanasikkhāpadavaṇṇanā
ਚਤੁਤ੍ਥੇ વਿਞ੍ਞਾਪੇਤ੍વਾਤਿ ਜਾਨਾਪੇਤ੍વਾ, ‘‘ਇਦਂ ਨਾਮ ਆਹਰਾ’’ਤਿ ਯਾਚਿਤ੍વਾ વਾ। ਅਞ੍ਞਂ વਿਞ੍ਞਾਪੇਯ੍ਯਾਤਿ ਯਂ ਪੁਬ੍ਬੇ ‘‘ਕਿਨ੍ਤੇ, ਅਯ੍ਯੇ, ਅਫਾਸੁ, ਕਿਂ ਆਹਰਿਯਤੂ’’ਤਿ વੁਤ੍ਤਾਯ વਿਞ੍ਞਾਪਿਤਂ, ਤਂ ਪਟਿਕ੍ਖਿਪਿਤ੍વਾ ਤਞ੍ਚੇવ ਅਞ੍ਞਞ੍ਚ ਗਹੇਤੁਕਾਮਾ ਤਤੋ ਅਞ੍ਞਂ વਿਞ੍ਞਾਪੇਯ੍ਯ, ਤਸ੍ਸਾ વਿਞ੍ਞਤ੍ਤਿਯਾ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ।
Catutthe viññāpetvāti jānāpetvā, ‘‘idaṃ nāma āharā’’ti yācitvā vā. Aññaṃ viññāpeyyāti yaṃ pubbe ‘‘kinte, ayye, aphāsu, kiṃ āhariyatū’’ti vuttāya viññāpitaṃ, taṃ paṭikkhipitvā tañceva aññañca gahetukāmā tato aññaṃ viññāpeyya, tassā viññattiyā dukkaṭaṃ, paṭilābhena nissaggiyaṃ hoti.
ਸਾવਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਅਞ੍ਞਂ વਿਞ੍ਞਾਪੇਤ੍વਾ ਅਞ੍ਞਂ વਿਞ੍ਞਾਪਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨਞ੍ਞੇ ਦ੍વਿਕਦੁਕ੍ਕਟਂ। ਅਨਞ੍ਞੇ ਅਨਞ੍ਞਸਞ੍ਞਾਯ ਪਨ, ਤਸ੍ਮਿਂ ਅਪ੍ਪਹੋਨ੍ਤੇ ਪੁਨ ਤਞ੍ਞੇવ, ਅਞ੍ਞੇਨਪਿ ਅਤ੍ਥੇ ਸਤਿ ਤੇਨ ਸਦ੍ਧਿਂ ਅਞ੍ਞਞ੍ਚ, ਯਞ੍ਚ વਿਞ੍ਞਤ੍ਤਂ, ਤਤੋ ਚੇ ਅਞ੍ਞਂ ਸਮਗ੍ਘਤਰਂ ਹੋਤਿ, ਇਮਂ ਆਨਿਸਂਸਂ ਦਸ੍ਸੇਤ੍વਾ ਸੁਦ੍ਧਂ ਅਞ੍ਞਮੇવ ਚ વਿਞ੍ਞਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਲੇਸੇਨ ਗਹੇਤੁਕਾਮਤਾ, ਅਞ੍ਞਸ੍ਸ વਿਞ੍ਞਾਪਨਂ, ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੀਤਿ।
Sāvatthiyaṃ thullanandaṃ ārabbha aññaṃ viññāpetvā aññaṃ viññāpanavatthusmiṃ paññattaṃ, tikapācittiyaṃ, anaññe dvikadukkaṭaṃ. Anaññe anaññasaññāya pana, tasmiṃ appahonte puna taññeva, aññenapi atthe sati tena saddhiṃ aññañca, yañca viññattaṃ, tato ce aññaṃ samagghataraṃ hoti, imaṃ ānisaṃsaṃ dassetvā suddhaṃ aññameva ca viññāpentiyā, ummattikādīnañca anāpatti. Lesena gahetukāmatā, aññassa viññāpanaṃ, paṭilābhoti imānettha tīṇi aṅgāni. Samuṭṭhānādīni sañcarittasadisānīti.
ਅਞ੍ਞવਿਞ੍ਞਾਪਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Aññaviññāpanasikkhāpadavaṇṇanā niṭṭhitā.
੫. ਅਞ੍ਞਚੇਤਾਪਨਸਿਕ੍ਖਾਪਦવਣ੍ਣਨਾ
5. Aññacetāpanasikkhāpadavaṇṇanā
ਪਞ੍ਚਮੇ ਅਞ੍ਞਂ ਚੇਤਾਪੇਤ੍વਾਤਿ ਅਤ੍ਤਨੋ ਕਪ੍ਪਿਯਭਣ੍ਡੇਨ ‘‘ਇਦਂ ਨਾਮ ਆਹਰਾ’’ਤਿ ਅਞ੍ਞਂ ਪਰਿવਤ੍ਤਾਪੇਤ੍વਾ। ਅਞ੍ਞਂ ਚੇਤਾਪੇਯ੍ਯਾਤਿ ‘‘ਏવਂ ਮੇ ਇਦਂ ਦਤ੍વਾ ਅਞ੍ਞਮ੍ਪਿ ਆਹਰਿਸ੍ਸਤੀ’’ਤਿ ਮਞ੍ਞਮਾਨਾ ‘‘ਨ ਮੇ ਇਮਿਨਾ ਅਤ੍ਥੋ, ਇਦਂ ਨਾਮ ਮੇ ਆਹਰਾ’’ਤਿ ਤਤੋ ਅਞ੍ਞਂ ਚੇਤਾਪੇਯ੍ਯ। ਤਸ੍ਸਾ ਚੇਤਾਪਨਪ੍ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਤੇਨ વਾ ਅਞ੍ਞੇਨ વਾ ਮੂਲੇਨ ਆਹਟਂ ਨਿਸ੍ਸਗ੍ਗਿਯਂ ਹੋਤਿ, ਸੇਸਂ ਚਤੁਤ੍ਥਸਦਿਸਮੇવਾਤਿ।
Pañcame aññaṃ cetāpetvāti attano kappiyabhaṇḍena ‘‘idaṃ nāma āharā’’ti aññaṃ parivattāpetvā. Aññaṃ cetāpeyyāti ‘‘evaṃ me idaṃ datvā aññampi āharissatī’’ti maññamānā ‘‘na me iminā attho, idaṃ nāma me āharā’’ti tato aññaṃ cetāpeyya. Tassā cetāpanappayoge dukkaṭaṃ, paṭilābhena tena vā aññena vā mūlena āhaṭaṃ nissaggiyaṃ hoti, sesaṃ catutthasadisamevāti.
ਅਞ੍ਞਚੇਤਾਪਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Aññacetāpanasikkhāpadavaṇṇanā niṭṭhitā.
੬. ਪਠਮਸਙ੍ਘਿਕਚੇਤਾਪਨਸਿਕ੍ਖਾਪਦવਣ੍ਣਨਾ
6. Paṭhamasaṅghikacetāpanasikkhāpadavaṇṇanā
ਛਟ੍ਠੇ ਅਞ੍ਞਦਤ੍ਥਿਕੇਨਾਤਿ ਅਞ੍ਞਸ੍ਸਤ੍ਥਾਯ ਦਿਨ੍ਨੇਨ। ਅਞ੍ਞੁਦ੍ਦਿਸਿਕੇਨਾਤਿ ਅਞ੍ਞਂ ਉਦ੍ਦਿਸਿਤ੍વਾ ਦਿਨ੍ਨੇਨ। ਸਙ੍ਘਿਕੇਨਾਤਿ ਸਙ੍ਘਸ੍ਸ ਪਰਿਚ੍ਚਤ੍ਤੇਨ। ਪਰਿਕ੍ਖਾਰੇਨਾਤਿ ਕਪ੍ਪਿਯਭਣ੍ਡੇਨ। ਅਞ੍ਞਂ ਚੇਤਾਪੇਯ੍ਯਾਤਿ ‘‘ਇਦਂ ਨਾਮ ਪਰਿਭੁਞ੍ਜੇਯ੍ਯਾਥਾ’’ਤਿ ਯਂ ਉਦ੍ਦਿਸਿਤ੍વਾ ਨਿਯਮੇਤ੍વਾ ਯੋ ਪਰਿਕ੍ਖਾਰੋ ਦਿਨ੍ਨੋ, ਤਤੋ ਅਞ੍ਞਂ ਪਰਿવਤ੍ਤਾਪੇਯ੍ਯ, ਤਸ੍ਸਾ ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ।
Chaṭṭhe aññadatthikenāti aññassatthāya dinnena. Aññuddisikenāti aññaṃ uddisitvā dinnena. Saṅghikenāti saṅghassa pariccattena. Parikkhārenāti kappiyabhaṇḍena. Aññaṃ cetāpeyyāti ‘‘idaṃ nāma paribhuñjeyyāthā’’ti yaṃ uddisitvā niyametvā yo parikkhāro dinno, tato aññaṃ parivattāpeyya, tassā payoge dukkaṭaṃ, paṭilābhena nissaggiyaṃ.
ਸਾવਤ੍ਥਿਯਂ ਸਮ੍ਬਹੁਲਾ ਭਿਕ੍ਖੁਨਿਯੋ ਆਰਬ੍ਭ ਤਾਦਿਸੇਨ ਪਰਿਕ੍ਖਾਰੇਨ ਅਞ੍ਞਂ ਚੇਤਾਪਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਅਨਞ੍ਞਦਤ੍ਥਿਕੇ ਦ੍વਿਕਦੁਕ੍ਕਟਂ। ਤਸ੍ਮਿਂ ਪਨ ਅਨਞ੍ਞਦਤ੍ਥਿਕਸਞ੍ਞਾਯ, ਸੇਸਕਂ ਉਪਨੇਨ੍ਤਿਯਾ, ‘‘ਤੁਮ੍ਹੇਹਿ ਏਤਦਤ੍ਥਾਯ ਦਿਨ੍ਨੋ, ਅਮ੍ਹਾਕਞ੍ਚ ਇਮਿਨਾ ਨਾਮ ਅਤ੍ਥੋ’’ਤਿ ਸਾਮਿਕੇ ਅਪਲੋਕੇਤ੍વਾ ਉਪਨੇਨ੍ਤਿਯਾ, ਯਦਾ ਭਿਕ੍ਖੁਨਿਯੋ વਿਹਾਰਮ੍ਪਿ ਛਡ੍ਡੇਤ੍વਾ ਪਕ੍ਕਮਨ੍ਤਿ, ਏવਰੂਪਾਸੁ ਆਪਦਾਸੁ ਉਪਨੇਨ੍ਤੀਨਂ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਸੇਸਂ ਚਤੁਤ੍ਥਸਦਿਸਮੇવਾਤਿ।
Sāvatthiyaṃ sambahulā bhikkhuniyo ārabbha tādisena parikkhārena aññaṃ cetāpanavatthusmiṃ paññattaṃ, tikapācittiyaṃ, anaññadatthike dvikadukkaṭaṃ. Tasmiṃ pana anaññadatthikasaññāya, sesakaṃ upanentiyā, ‘‘tumhehi etadatthāya dinno, amhākañca iminā nāma attho’’ti sāmike apaloketvā upanentiyā, yadā bhikkhuniyo vihārampi chaḍḍetvā pakkamanti, evarūpāsu āpadāsu upanentīnaṃ, ummattikādīnañca anāpatti. Sesaṃ catutthasadisamevāti.
ਪਠਮਸਙ੍ਘਿਕਚੇਤਾਪਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Paṭhamasaṅghikacetāpanasikkhāpadavaṇṇanā niṭṭhitā.
੭. ਦੁਤਿਯਸਙ੍ਘਿਕਚੇਤਾਪਨਸਿਕ੍ਖਾਪਦવਣ੍ਣਨਾ
7. Dutiyasaṅghikacetāpanasikkhāpadavaṇṇanā
ਸਤ੍ਤਮੇ ਸਞ੍ਞਾਚਿਕੇਨਾਤਿ ਸਯਂ ਯਾਚਿਤਕੇਨਾਪਿ। ਏਤਦੇવੇਤ੍ਥ ਨਾਨਾਕਰਣਂ, ਸੇਸਂ ਛਟ੍ਠਸਦਿਸਮੇવਾਤਿ।
Sattame saññācikenāti sayaṃ yācitakenāpi. Etadevettha nānākaraṇaṃ, sesaṃ chaṭṭhasadisamevāti.
ਦੁਤਿਯਸਙ੍ਘਿਕਚੇਤਾਪਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Dutiyasaṅghikacetāpanasikkhāpadavaṇṇanā niṭṭhitā.
੮. ਪਠਮਗਣਿਕਚੇਤਾਪਨਸਿਕ੍ਖਾਪਦવਣ੍ਣਨਾ
8. Paṭhamagaṇikacetāpanasikkhāpadavaṇṇanā
ਅਟ੍ਠਮੇ ਮਹਾਜਨਿਕੇਨਾਤਿ ਗਣਸ੍ਸ ਪਰਿਚ੍ਚਤ੍ਤੇਨ, ਇਦਮੇਤ੍ਥ ਛਟ੍ਠਤੋ ਨਾਨਾਕਰਣਂ।
Aṭṭhame mahājanikenāti gaṇassa pariccattena, idamettha chaṭṭhato nānākaraṇaṃ.
ਪਠਮਗਣਿਕਚੇਤਾਪਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Paṭhamagaṇikacetāpanasikkhāpadavaṇṇanā niṭṭhitā.
੯. ਦੁਤਿਯਗਣਿਕਚੇਤਾਪਨਸਿਕ੍ਖਾਪਦવਣ੍ਣਨਾ
9. Dutiyagaṇikacetāpanasikkhāpadavaṇṇanā
ਨવਮੇ ਸਞ੍ਞਾਚਿਕੇਨਾਤਿ ਇਦਂ ਅਟ੍ਠਮਤੋ ਅਤਿਰਿਤ੍ਤਂ, ਸੇਸਂ ਦ੍વੀਸੁਪਿ ਛਟ੍ਠਸਿਕ੍ਖਾਪਦਸਦਿਸਮੇવਾਤਿ।
Navame saññācikenāti idaṃ aṭṭhamato atirittaṃ, sesaṃ dvīsupi chaṭṭhasikkhāpadasadisamevāti.
ਦੁਤਿਯਗਣਿਕਚੇਤਾਪਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Dutiyagaṇikacetāpanasikkhāpadavaṇṇanā niṭṭhitā.
੧੦. ਪੁਗ੍ਗਲਿਕਚੇਤਾਪਨਸਿਕ੍ਖਾਪਦવਣ੍ਣਨਾ
10. Puggalikacetāpanasikkhāpadavaṇṇanā
ਦਸਮੇ ਪੁਗ੍ਗਲਿਕੇਨਾਤਿ ਏਕਭਿਕ੍ਖੁਨਿਯਾ ਪਰਿਚ੍ਚਤ੍ਤੇਨ। ਸਞ੍ਞਾਚਿਕੇਨਾਤਿ ਸਯਂ ਯਾਚਿਤਕੇਨ ਚ। ਅਞ੍ਞਂ ਚੇਤਾਪੇਯ੍ਯਾਤਿ ਯਂ ਉਦ੍ਦਿਸਿਤ੍વਾ ਦਿਨ੍ਨਂ, ਤਤੋ ਅਞ੍ਞਂ ਚੇਤਾਪੇਨ੍ਤਿਯਾ ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ।
Dasame puggalikenāti ekabhikkhuniyā pariccattena. Saññācikenāti sayaṃ yācitakena ca. Aññaṃ cetāpeyyāti yaṃ uddisitvā dinnaṃ, tato aññaṃ cetāpentiyā payoge dukkaṭaṃ, paṭilābhena nissaggiyaṃ hoti.
ਸਾવਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਤਾਦਿਸੇਨ ਪਰਿਕ੍ਖਾਰੇਨ ਅਞ੍ਞਂ ਚੇਤਾਪਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਛਟ੍ਠਸਦਿਸਮੇવਾਤਿ।
Sāvatthiyaṃ thullanandaṃ ārabbha tādisena parikkhārena aññaṃ cetāpanavatthusmiṃ paññattaṃ, sesaṃ chaṭṭhasadisamevāti.
ਪੁਗ੍ਗਲਿਕਚੇਤਾਪਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Puggalikacetāpanasikkhāpadavaṇṇanā niṭṭhitā.
ਪਤ੍ਤવਗ੍ਗੋ ਪਠਮੋ।
Pattavaggo paṭhamo.
੧੧. ਗਰੁਪਾવੁਰਣਸਿਕ੍ਖਾਪਦવਣ੍ਣਨਾ
11. Garupāvuraṇasikkhāpadavaṇṇanā
ਦੁਤਿਯਸ੍ਸ ਪਠਮੇ ਗਰੁਪਾવੁਰਣਨ੍ਤਿ ਸੀਤਕਾਲੇ ਪਾવੁਰਣਂ। ਚਤੁਕ੍ਕਂਸਪਰਮਨ੍ਤਿ ਕਂਸੋ ਨਾਮ ਚਤੁਕ੍ਕਹਾਪਣਿਕੋ ਹੋਤਿ, ਤਸ੍ਮਾ ਸੋਲ਼ਸਕਹਾਪਣਗ੍ਘਨਕਂ। ਚੇਤਾਪੇਤਬ੍ਬਨ੍ਤਿ ਠਪੇਤ੍વਾ ਸਹਧਮ੍ਮਿਕੇ ਚ ਞਾਤਕਪ੍ਪવਾਰਿਤੇ ਚ ਅਞ੍ਞੇਨ ਕਿਸ੍ਮਿਞ੍ਚਿਦੇવ ਗੁਣੇ ਪਰਿਤੁਟ੍ਠੇਨ ‘‘વਦੇਥਾਯ੍ਯੇ, ਯੇਨਤ੍ਥੋ’’ਤਿ વੁਤ੍ਤਾਯ વਿਞ੍ਞਾਪੇਤਬ੍ਬਂ। ਤਤੋ ਚੇ ਉਤ੍ਤਰੀਤਿ ਤਤੁਤ੍ਤਰਿ વਿਞ੍ਞਾਪੇਨ੍ਤਿਯਾ ਦੁਕ੍ਕਟਂ, ਪਟਿਲਦ੍ਧਂ ਨਿਸ੍ਸਗ੍ਗਿਯਂ ਹੋਤਿ।
Dutiyassa paṭhame garupāvuraṇanti sītakāle pāvuraṇaṃ. Catukkaṃsaparamanti kaṃso nāma catukkahāpaṇiko hoti, tasmā soḷasakahāpaṇagghanakaṃ. Cetāpetabbanti ṭhapetvā sahadhammike ca ñātakappavārite ca aññena kismiñcideva guṇe parituṭṭhena ‘‘vadethāyye, yenattho’’ti vuttāya viññāpetabbaṃ. Tato ce uttarīti tatuttari viññāpentiyā dukkaṭaṃ, paṭiladdhaṃ nissaggiyaṃ hoti.
ਸਾવਤ੍ਥਿਯਂ ਥੁਲ੍ਲਨਨ੍ਦਂ ਆਰਬ੍ਭ ਰਾਜਾਨਂ ਕਮ੍ਬਲਂ વਿਞ੍ਞਾਪਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਤਿਕਪਾਚਿਤ੍ਤਿਯਂ, ਊਨਕਚਤੁਕ੍ਕਂਸੇ ਦ੍વਿਕਦੁਕ੍ਕਟਂ। ਤਸ੍ਮਿਂ ਪਨ ਊਨਕਸਞ੍ਞਾਯ, ਚਤੁਕ੍ਕਂਸਪਰਮਂ ਚੇਤਾਪੇਨ੍ਤਿਯਾ, ਞਾਤਕਪ੍ਪવਾਰਿਤੇ વਾ, ਅਞ੍ਞਸ੍ਸ વਾ ਅਤ੍ਥਾਯ, ਅਤ੍ਤਨੋ વਾ ਧਨੇਨ, ਮਹਗ੍ਘਂ ਚੇਤਾਪੇਨ੍ਤਂ ਅਪ੍ਪਗ੍ਘਂ ਚੇਤਾਪੇਨ੍ਤਿਯਾ, ਉਮ੍ਮਤ੍ਤਿਕਾਦੀਨਞ੍ਚ ਅਨਾਪਤ੍ਤਿ। ਗਰੁਪਾવੁਰਣਤਾ, ਅਤਿਰੇਕਚਤੁਕ੍ਕਂਸਤਾ, ਅਨਨੁਞ੍ਞਾਤਟ੍ਠਾਨੇ વਿਞ੍ਞਤ੍ਤਿ, ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੀਤਿ।
Sāvatthiyaṃ thullanandaṃ ārabbha rājānaṃ kambalaṃ viññāpanavatthusmiṃ paññattaṃ, tikapācittiyaṃ, ūnakacatukkaṃse dvikadukkaṭaṃ. Tasmiṃ pana ūnakasaññāya, catukkaṃsaparamaṃ cetāpentiyā, ñātakappavārite vā, aññassa vā atthāya, attano vā dhanena, mahagghaṃ cetāpentaṃ appagghaṃ cetāpentiyā, ummattikādīnañca anāpatti. Garupāvuraṇatā, atirekacatukkaṃsatā, ananuññātaṭṭhāne viññatti, paṭilābhoti imānettha cattāri aṅgāni. Samuṭṭhānādīni sañcarittasadisānīti.
ਗਰੁਪਾવੁਰਣਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Garupāvuraṇasikkhāpadavaṇṇanā niṭṭhitā.
੧੨. ਲਹੁਪਾવੁਰਣਸਿਕ੍ਖਾਪਦવਣ੍ਣਨਾ
12. Lahupāvuraṇasikkhāpadavaṇṇanā
ਦੁਤਿਯੇ ਲਹੁਪਾવੁਰਣਨ੍ਤਿ ਉਣ੍ਹਕਾਲੇ ਪਾવੁਰਣਂ। ਅਡ੍ਢਤੇਯ੍ਯਕਂਸਪਰਮਨ੍ਤਿ ਦਸਕਹਾਪਣਗ੍ਘਨਕਂ, ਸੇਸਂ ਪਠਮਸਦਿਸਮੇવਾਤਿ।
Dutiye lahupāvuraṇanti uṇhakāle pāvuraṇaṃ. Aḍḍhateyyakaṃsaparamanti dasakahāpaṇagghanakaṃ, sesaṃ paṭhamasadisamevāti.
ਲਹੁਪਾવੁਰਣਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Lahupāvuraṇasikkhāpadavaṇṇanā niṭṭhitā.
ਇਤੋ ਪਰਾਨਿ ਇਮਸ੍ਮਿਂ વਗ੍ਗੇ ਅਟ੍ਠ, ਤਤਿਯવਗ੍ਗੇ ਦਸਾਤਿ ਇਮਾਨਿ ਅਟ੍ਠਾਰਸ ਸਿਕ੍ਖਾਪਦਾਨਿ ਭਿਕ੍ਖੁਪਾਤਿਮੋਕ੍ਖવਣ੍ਣਨਾਯਂ વੁਤ੍ਤਨਯੇਨੇવ વੇਦਿਤਬ੍ਬਾਨੀਤਿ।
Ito parāni imasmiṃ vagge aṭṭha, tatiyavagge dasāti imāni aṭṭhārasa sikkhāpadāni bhikkhupātimokkhavaṇṇanāyaṃ vuttanayeneva veditabbānīti.
ਜਾਤਰੂਪવਗ੍ਗੋ ਤਤਿਯੋ।
Jātarūpavaggo tatiyo.
ਉਦ੍ਦਿਟ੍ਠਾ ਖੋ ਅਯ੍ਯਾਯੋ ਤਿਂਸ ਨਿਸ੍ਸਗ੍ਗਿਯਾ ਪਾਚਿਤ੍ਤਿਯਾ ਧਮ੍ਮਾਤਿ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਾ ਸਾਧਾਰਣਾ ਅਟ੍ਠਾਰਸ, ਅਸਾਧਾਰਣਾ ਦ੍વਾਦਸਾਤਿ ਏવਂ ਤਿਂਸ। ਸੇਸਂ ਸਬ੍ਬਤ੍ਥ ਉਤ੍ਤਾਨਮੇવਾਤਿ।
Uddiṭṭhā kho ayyāyo tiṃsa nissaggiyā pācittiyā dhammāti bhikkhū ārabbha paññattā sādhāraṇā aṭṭhārasa, asādhāraṇā dvādasāti evaṃ tiṃsa. Sesaṃ sabbattha uttānamevāti.
ਕਙ੍ਖਾવਿਤਰਣਿਯਾ ਪਾਤਿਮੋਕ੍ਖવਣ੍ਣਨਾਯ ਭਿਕ੍ਖੁਨਿਪਾਤਿਮੋਕ੍ਖੇ
Kaṅkhāvitaraṇiyā pātimokkhavaṇṇanāya bhikkhunipātimokkhe
ਨਿਸ੍ਸਗ੍ਗਿਯਪਾਚਿਤ੍ਤਿਯવਣ੍ਣਨਾ ਨਿਟ੍ਠਿਤਾ।
Nissaggiyapācittiyavaṇṇanā niṭṭhitā.
