| Library / Tipiṭaka / तिपिटक • Tipiṭaka / विनयविनिच्छय-उत्तरविनिच्छय • Vinayavinicchaya-uttaravinicchaya |
निस्सग्गियकथा
Nissaggiyakathā
५५१.
551.
खोमं कप्पासकोसेय्यं, साणं भङ्गञ्च कम्बलं।
Khomaṃ kappāsakoseyyaṃ, sāṇaṃ bhaṅgañca kambalaṃ;
चीवरं छब्बिधं वुत्तं, जातितो पन कप्पियं॥
Cīvaraṃ chabbidhaṃ vuttaṃ, jātito pana kappiyaṃ.
५५२.
552.
दुकूलञ्चेव पत्तुण्णं, चिनं सोमारपट्टकं।
Dukūlañceva pattuṇṇaṃ, cinaṃ somārapaṭṭakaṃ;
इद्धिजं देवदिन्नञ्च, तस्सेतं अनुलोमिकं॥
Iddhijaṃ devadinnañca, tassetaṃ anulomikaṃ.
५५३.
553.
तिचीवरं परिक्खार-चोळञ्च मुखपुञ्छनं।
Ticīvaraṃ parikkhāra-coḷañca mukhapuñchanaṃ;
निसीदनमधिट्ठेय्य, पच्चत्थरणमेव च॥
Nisīdanamadhiṭṭheyya, paccattharaṇameva ca.
५५४.
554.
एकाहम्पि विना भिक्खु, न वसेय्य तिचीवरं।
Ekāhampi vinā bhikkhu, na vaseyya ticīvaraṃ;
न वसेय्य तथाधिट्ठा, चातुमासं निसीदनं॥
Na vaseyya tathādhiṭṭhā, cātumāsaṃ nisīdanaṃ.
५५५.
555.
रजित्वा कप्पियं बिन्दुं, दत्वा तत्थ तिचीवरं।
Rajitvā kappiyaṃ binduṃ, datvā tattha ticīvaraṃ;
उपपन्नं पमाणेन, अधिट्ठातब्बमेव तं॥
Upapannaṃ pamāṇena, adhiṭṭhātabbameva taṃ.
५५६.
556.
पच्छिमन्तेन सङ्घाटि, दीघसो मुट्ठिपञ्चका।
Pacchimantena saṅghāṭi, dīghaso muṭṭhipañcakā;
मुट्ठित्तिका च तिरियं, उत्तमन्तेन सा पन॥
Muṭṭhittikā ca tiriyaṃ, uttamantena sā pana.
५५७.
557.
सत्थुनो चीवरूनापि, वट्टतीति पकासिता।
Satthuno cīvarūnāpi, vaṭṭatīti pakāsitā;
इदमेवुत्तरासङ्गे, पमाणं परिदीपितं॥
Idamevuttarāsaṅge, pamāṇaṃ paridīpitaṃ.
५५८.
558.
मुट्ठिपञ्चकं दीघन्तं, पमाणं तिरियन्ततो।
Muṭṭhipañcakaṃ dīghantaṃ, pamāṇaṃ tiriyantato;
अड्ढतेय्यं द्विहत्थं वा, सेसे अन्तरवासके॥
Aḍḍhateyyaṃ dvihatthaṃ vā, sese antaravāsake.
५५९.
559.
अहताहतकप्पानं, सङ्घाटि दिगुणा मता।
Ahatāhatakappānaṃ, saṅghāṭi diguṇā matā;
एकपट्टुत्तरासङ्गो, एवमन्तरवासको॥
Ekapaṭṭuttarāsaṅgo, evamantaravāsako.
५६०.
560.
उतुद्धटानं पन चीवरानं।
Utuddhaṭānaṃ pana cīvarānaṃ;
सङ्घाटि भिक्खुस्स चतुग्गुणा वा।
Saṅghāṭi bhikkhussa catugguṇā vā;
दुवेपि सेसा दिगुणाव वुत्ता।
Duvepi sesā diguṇāva vuttā;
यथासुखं वट्टति पंसुकूलं॥
Yathāsukhaṃ vaṭṭati paṃsukūlaṃ.
५६१.
561.
तीणिपि द्वेपि चेकं वा, छिन्दितब्बं पहोति चे।
Tīṇipi dvepi cekaṃ vā, chinditabbaṃ pahoti ce;
सब्बेसु अप्पहोन्तेसु, देय्यमन्वाधिकम्पि वा॥
Sabbesu appahontesu, deyyamanvādhikampi vā.
५६२.
562.
अच्छिन्नं वा अनादिन्नं, धारेन्तस्स तिचीवरं।
Acchinnaṃ vā anādinnaṃ, dhārentassa ticīvaraṃ;
भिक्खुनो दुक्कटं वुत्तं, दुब्भोगेन च सेवतो॥
Bhikkhuno dukkaṭaṃ vuttaṃ, dubbhogena ca sevato.
५६३.
563.
कुसिं अड्ढकुसिञ्चापि, मण्डलं अड्ढमण्डलं।
Kusiṃ aḍḍhakusiñcāpi, maṇḍalaṃ aḍḍhamaṇḍalaṃ;
विवट्टं अनुविवट्टं, बाहन्तम्पि च भिक्खुनो॥
Vivaṭṭaṃ anuvivaṭṭaṃ, bāhantampi ca bhikkhuno.
५६४.
564.
दस्सेत्वाव विधिं सब्बं, पञ्चकादिप्पभेदकं।
Dassetvāva vidhiṃ sabbaṃ, pañcakādippabhedakaṃ;
छिन्नं समणसारुप्पं, कातब्बं तु तिचीवरं॥
Chinnaṃ samaṇasāruppaṃ, kātabbaṃ tu ticīvaraṃ.
५६५.
565.
दानेनच्छिज्जगाहेन, विस्सासग्गहणेन च।
Dānenacchijjagāhena, vissāsaggahaṇena ca;
हीनायावत्तनेनापि, सिक्खाय च पहानतो॥
Hīnāyāvattanenāpi, sikkhāya ca pahānato.
५६६.
566.
पच्चुद्धारविनासेहि, लिङ्गस्स परिवत्तना।
Paccuddhāravināsehi, liṅgassa parivattanā;
सब्बं भिज्जतिधिट्ठानं, छिद्दभावे तिचीवरं॥
Sabbaṃ bhijjatidhiṭṭhānaṃ, chiddabhāve ticīvaraṃ.
५६७.
567.
कनिट्ठस्सङ्गुलस्सेव , नखपिट्ठिप्पमाणकं।
Kaniṭṭhassaṅgulasseva , nakhapiṭṭhippamāṇakaṃ;
विनिविद्धं पनच्छिद्द-मधिट्ठानविनासनं॥
Vinividdhaṃ panacchidda-madhiṭṭhānavināsanaṃ.
५६८.
568.
एको तन्तुपि अच्छिन्नो, अधिट्ठानं न भिन्दति।
Eko tantupi acchinno, adhiṭṭhānaṃ na bhindati;
सेतभावं करोन्तेन, धोतम्पि रजकेन वा॥
Setabhāvaṃ karontena, dhotampi rajakena vā.
५६९.
569.
पठमं अग्गळं दत्वा, पच्छा छिन्दति रक्खति।
Paṭhamaṃ aggaḷaṃ datvā, pacchā chindati rakkhati;
घटेत्वा कोटियो द्वे वा, पच्छा छिन्दति रक्खति॥
Ghaṭetvā koṭiyo dve vā, pacchā chindati rakkhati.
५७०.
570.
चतुरट्ठङ्गुला ओरं, एकद्विन्नं तिरीयतो।
Caturaṭṭhaṅgulā oraṃ, ekadvinnaṃ tirīyato;
तिण्णम्पि दीघतो छिद्दं, भिन्दतेव विदत्थिया॥
Tiṇṇampi dīghato chiddaṃ, bhindateva vidatthiyā.
५७१.
571.
निसीदनस्स दीघेन, भवन्ति द्वे विदत्थियो।
Nisīdanassa dīghena, bhavanti dve vidatthiyo;
वित्थारेन दियड्ढा च, सुगतस्स विदत्थिया॥
Vitthārena diyaḍḍhā ca, sugatassa vidatthiyā.
५७२.
572.
होन्ति कण्डुप्पटिच्छादि, तिरियं द्वे विदत्थियो।
Honti kaṇḍuppaṭicchādi, tiriyaṃ dve vidatthiyo;
दीघतोपि चतस्सोव, सुगतस्स विदत्थिया॥
Dīghatopi catassova, sugatassa vidatthiyā.
५७३.
573.
दीघतो सुगतस्सेव, भवन्ति छ विदत्थियो।
Dīghato sugatasseva, bhavanti cha vidatthiyo;
वित्थारेनड्ढतेय्याव, सिया वस्सिकसाटिका॥
Vitthārenaḍḍhateyyāva, siyā vassikasāṭikā.
५७४.
574.
मुनिना तीसु एतेसु, करोन्तस्स तदुत्तरिं।
Muninā tīsu etesu, karontassa taduttariṃ;
अधिकच्छेदनं तस्स, पाचित्तियमुदीरितं॥
Adhikacchedanaṃ tassa, pācittiyamudīritaṃ.
५७५.
575.
मुखपुञ्छनचोळस्स, पच्चत्थरणकस्स वा।
Mukhapuñchanacoḷassa, paccattharaṇakassa vā;
पमाणं अप्पमाणेन, न चेव परिदीपितं॥
Pamāṇaṃ appamāṇena, na ceva paridīpitaṃ.
५७६.
576.
सदसं अदसं सब्बं, पच्चत्थरणचीवरं।
Sadasaṃ adasaṃ sabbaṃ, paccattharaṇacīvaraṃ;
महन्तं खुद्दकं एक-मनेकम्पि च वट्टति॥
Mahantaṃ khuddakaṃ eka-manekampi ca vaṭṭati.
५७७.
577.
मुखपुञ्छनचोळेकं, द्वेपि वट्टन्ति सब्बथा।
Mukhapuñchanacoḷekaṃ, dvepi vaṭṭanti sabbathā;
सदसं अदसं वापि, सदसंव निसीदनं॥
Sadasaṃ adasaṃ vāpi, sadasaṃva nisīdanaṃ.
५७८.
578.
अदसा रजितायेव, वट्टतादिन्नकप्पका।
Adasā rajitāyeva, vaṭṭatādinnakappakā;
वुत्ता कण्डुप्पटिच्छादि, तथा वस्सिकसाटिका॥
Vuttā kaṇḍuppaṭicchādi, tathā vassikasāṭikā.
५७९.
579.
गणनं वा पमाणं वा, न परिक्खारचोळके।
Gaṇanaṃ vā pamāṇaṃ vā, na parikkhāracoḷake;
पमाणगणनातीति, भणन्ति पकतञ्ञुनो॥
Pamāṇagaṇanātīti, bhaṇanti pakataññuno.
५८०.
580.
सुगतट्ठङ्गुलायामं, चतुरङ्गुलवित्थतं।
Sugataṭṭhaṅgulāyāmaṃ, caturaṅgulavitthataṃ;
विकप्पनुपगं होति, पच्छिमं नाम चीवरं॥
Vikappanupagaṃ hoti, pacchimaṃ nāma cīvaraṃ.
५८१.
581.
परिस्सावपटं पत्त-पोत्थकत्थविकादिकं।
Parissāvapaṭaṃ patta-potthakatthavikādikaṃ;
अधिट्ठेय्य परिक्खार-चोळं पच्छिमचीवरं॥
Adhiṭṭheyya parikkhāra-coḷaṃ pacchimacīvaraṃ.
५८२.
582.
बहूनि एकतो कत्वा, अधिट्ठातुम्पि वट्टति।
Bahūni ekato katvā, adhiṭṭhātumpi vaṭṭati;
मातुआदीनमत्थाय, ठपिते नत्थि दोसता॥
Mātuādīnamatthāya, ṭhapite natthi dosatā.
५८३.
583.
वस्समासे अधिट्ठेय्य, चतुरो वस्ससाटिकं।
Vassamāse adhiṭṭheyya, caturo vassasāṭikaṃ;
पुन पच्चुद्धरित्वा तं, विकप्पेय्य ततो परं॥
Puna paccuddharitvā taṃ, vikappeyya tato paraṃ.
५८४.
584.
ताव कण्डुप्पटिच्छादिं, याव रोगो न सम्मति।
Tāva kaṇḍuppaṭicchādiṃ, yāva rogo na sammati;
अधिट्ठहित्वा ततो उद्धं, उद्धरित्वा विकप्पये॥
Adhiṭṭhahitvā tato uddhaṃ, uddharitvā vikappaye.
५८५.
585.
‘‘इमं कण्डुप्पटिच्छादिं, इममन्तरवासकं।
‘‘Imaṃ kaṇḍuppaṭicchādiṃ, imamantaravāsakaṃ;
अधिट्ठामी’’तिधिट्ठेय्य, सेसेसुपि अयं नयो॥
Adhiṭṭhāmī’’tidhiṭṭheyya, sesesupi ayaṃ nayo.
५८६.
586.
‘‘इमं कण्डुप्पटिच्छादिं, एत’’न्ति च असम्मुखे।
‘‘Imaṃ kaṇḍuppaṭicchādiṃ, eta’’nti ca asammukhe;
वत्वा पच्चुद्धरेय्येवं, सेसेसुपि विचक्खणो॥
Vatvā paccuddhareyyevaṃ, sesesupi vicakkhaṇo.
५८७.
587.
आभोगं मनसा कत्वा, कायेन फुसनाकतं।
Ābhogaṃ manasā katvā, kāyena phusanākataṃ;
वचसाधिट्ठितञ्चाति, अधिट्ठानं द्विधा मतं॥
Vacasādhiṭṭhitañcāti, adhiṭṭhānaṃ dvidhā mataṃ.
५८८.
588.
इति सब्बमिदं वुत्तं, तेचीवरिकभिक्खुनो।
Iti sabbamidaṃ vuttaṃ, tecīvarikabhikkhuno;
तथा वत्वावधिट्ठेय्य, तं परिक्खारचोळिको॥
Tathā vatvāvadhiṭṭheyya, taṃ parikkhāracoḷiko.
५८९.
589.
तिचीवरं परिक्खार-चोळं कातुम्पि वट्टति।
Ticīvaraṃ parikkhāra-coḷaṃ kātumpi vaṭṭati;
एवं चुदोसिते वुत्तो, परिहारो निरत्थको॥
Evaṃ cudosite vutto, parihāro niratthako.
५९०.
590.
न, तेचीवरिकस्सेव, वुत्तत्ता तत्थ सत्थुना।
Na, tecīvarikasseva, vuttattā tattha satthunā;
तं परिक्खारचोळस्स, तस्मा सब्बम्पि वट्टति॥
Taṃ parikkhāracoḷassa, tasmā sabbampi vaṭṭati.
५९१.
591.
‘‘अधिट्ठेति विकप्पेति, अनापत्ती’’ति एत्थ च।
‘‘Adhiṭṭheti vikappeti, anāpattī’’ti ettha ca;
अधिट्ठातब्बकस्सेव, विकप्पनविधानतो॥
Adhiṭṭhātabbakasseva, vikappanavidhānato.
५९२.
592.
भिक्खुस्सेवं करोन्तस्स, न दोसो उपलब्भति।
Bhikkhussevaṃ karontassa, na doso upalabbhati;
एवञ्च न सिया कस्मा, मुखपुञ्छनकादिकं॥
Evañca na siyā kasmā, mukhapuñchanakādikaṃ.
५९३.
593.
मुखपुञ्छनकादीनं, तेसं किच्चविधानतो।
Mukhapuñchanakādīnaṃ, tesaṃ kiccavidhānato;
अकिच्चस्सामिकस्सस्स, अधिट्ठानं तु युज्जति॥
Akiccassāmikassassa, adhiṭṭhānaṃ tu yujjati.
५९४.
594.
निधानमुखमेतन्ति, महापच्चरियं पन।
Nidhānamukhametanti, mahāpaccariyaṃ pana;
वुत्तत्ता च निसेधेतुं, न सक्का विनयञ्ञुना॥
Vuttattā ca nisedhetuṃ, na sakkā vinayaññunā.
५९५.
595.
चीवरं परिपुण्णन्ति, निदानुप्पत्तितोपि च।
Cīvaraṃ paripuṇṇanti, nidānuppattitopi ca;
निधानमुखमेतन्ति, वेदितब्बं विभाविना॥
Nidhānamukhametanti, veditabbaṃ vibhāvinā.
५९६.
596.
कुसवाकादिचीरानि, कम्बलं केसवालजं।
Kusavākādicīrāni, kambalaṃ kesavālajaṃ;
थुल्लच्चयं धारयतो-लूकपक्खाजिनक्खिपे॥
Thullaccayaṃ dhārayato-lūkapakkhājinakkhipe.
५९७.
597.
कदलेरकदुस्सेसु, अक्कदुस्से च पोत्थके।
Kadalerakadussesu, akkadusse ca potthake;
दुक्कटं तिरिटे वापि, वेठने कञ्चुकेपि च॥
Dukkaṭaṃ tiriṭe vāpi, veṭhane kañcukepi ca.
५९८.
598.
सब्बनीलकमञ्जेट्ठ-कण्हलोहितपीतके ।
Sabbanīlakamañjeṭṭha-kaṇhalohitapītake ;
महानाममहारङ्ग-रत्तेसुपि च दुक्कटं॥
Mahānāmamahāraṅga-rattesupi ca dukkaṭaṃ.
५९९.
599.
अच्छिन्नदसके दीघ-फलपुप्फदसेसु च।
Acchinnadasake dīgha-phalapupphadasesu ca;
अच्छिन्नचीवरस्सेत्थ, नत्थि किञ्चि अकप्पियं॥
Acchinnacīvarassettha, natthi kiñci akappiyaṃ.
६००.
600.
अधिट्ठेति विकप्पेति, विस्सज्जेति विनस्सति।
Adhiṭṭheti vikappeti, vissajjeti vinassati;
अन्तोदसाहं विस्सासे, अनापत्ति पकासिता॥
Antodasāhaṃ vissāse, anāpatti pakāsitā.
६०१.
601.
कथिनं नाम नामेन, समुट्ठानमिदं पन।
Kathinaṃ nāma nāmena, samuṭṭhānamidaṃ pana;
अचित्तमक्रियं वुत्तं, तिचित्तञ्च तिवेदनं॥
Acittamakriyaṃ vuttaṃ, ticittañca tivedanaṃ.
पठमकथिनकथा।
Paṭhamakathinakathā.
६०२.
602.
गामादीसु पदेसेसु, तिपञ्चसु तिचीवरं।
Gāmādīsu padesesu, tipañcasu ticīvaraṃ;
ठपेत्वा एकरत्तम्पि, सङ्घसम्मुतिया विना॥
Ṭhapetvā ekarattampi, saṅghasammutiyā vinā.
६०३.
603.
भिक्खुनो पन तेनस्स, विप्पवत्थुं न वट्टति।
Bhikkhuno pana tenassa, vippavatthuṃ na vaṭṭati;
होति निस्सग्गियं विप्प-वसतो अरुणुग्गमे॥
Hoti nissaggiyaṃ vippa-vasato aruṇuggame.
६०४.
604.
चीवरं निक्खिपित्वान, न्हायन्तस्सेव रत्तियं।
Cīvaraṃ nikkhipitvāna, nhāyantasseva rattiyaṃ;
अरुणे उट्ठिते किं नु, कातब्बं तेन भिक्खुना॥
Aruṇe uṭṭhite kiṃ nu, kātabbaṃ tena bhikkhunā.
६०५.
605.
दुक्कटं मुनिना वुत्तं, निस्सग्गियनिवासने।
Dukkaṭaṃ muninā vuttaṃ, nissaggiyanivāsane;
तब्भया पन सो भिक्खु, नग्गो गच्छति दुक्कटं॥
Tabbhayā pana so bhikkhu, naggo gacchati dukkaṭaṃ.
६०६.
606.
अच्छिन्नचीवरट्ठाने, ठितत्ता पन भिक्खुनो।
Acchinnacīvaraṭṭhāne, ṭhitattā pana bhikkhuno;
न तस्साकप्पियं नाम, चीवरं अत्थि किञ्चिपि॥
Na tassākappiyaṃ nāma, cīvaraṃ atthi kiñcipi.
६०७.
607.
निगासेत्वा गहेत्वा च, गन्त्वा भिक्खुस्स सन्तिकं।
Nigāsetvā gahetvā ca, gantvā bhikkhussa santikaṃ;
निस्सज्जित्वा पनापत्ति, देसेतब्बाव विञ्ञुना॥
Nissajjitvā panāpatti, desetabbāva viññunā.
६०८.
608.
परस्स निस्सज्जित्वा तं, दुक्कटं परिभुञ्जतो।
Parassa nissajjitvā taṃ, dukkaṭaṃ paribhuñjato;
पयोगे च पयोगे च, होति पारुपनादिसु॥
Payoge ca payoge ca, hoti pārupanādisu.
६०९.
609.
अनापत्ति तमञ्ञस्स, भिक्खुनो परिभुञ्जतो।
Anāpatti tamaññassa, bhikkhuno paribhuñjato;
अदेन्तस्स च निस्सट्ठं, दुक्कटं परियापुतं॥
Adentassa ca nissaṭṭhaṃ, dukkaṭaṃ pariyāputaṃ.
६१०.
610.
थेरे च दहरे मग्गं, गच्छन्तेसु उभोसुपि।
There ca dahare maggaṃ, gacchantesu ubhosupi;
पत्तचीवरमादाय, ओहीने दहरे पन॥
Pattacīvaramādāya, ohīne dahare pana.
६११.
611.
असम्पत्ते गरुं तस्मिं, उग्गच्छत्यरुणो यदि।
Asampatte garuṃ tasmiṃ, uggacchatyaruṇo yadi;
होति निस्सग्गियं वत्थं, न पस्सम्भति निस्सयो॥
Hoti nissaggiyaṃ vatthaṃ, na passambhati nissayo.
६१२.
612.
मुहुत्तं विस्समित्वान, गच्छन्ते दहरे पन।
Muhuttaṃ vissamitvāna, gacchante dahare pana;
होति निस्सग्गियं वत्थं, पस्सम्भति च निस्सयो॥
Hoti nissaggiyaṃ vatthaṃ, passambhati ca nissayo.
६१३.
613.
सुता धम्मकथा यस्मिं, उग्गच्छत्यरुणो यदि।
Sutā dhammakathā yasmiṃ, uggacchatyaruṇo yadi;
होति निस्सग्गियं वत्थं, पस्सम्भति च निस्सयो॥
Hoti nissaggiyaṃ vatthaṃ, passambhati ca nissayo.
६१४.
614.
पच्चुद्धारे अनापत्ति, लद्धसम्मुतिकस्सपि।
Paccuddhāre anāpatti, laddhasammutikassapi;
अन्तोयेवारुणे तं वा, विस्सज्जेति विनस्सति॥
Antoyevāruṇe taṃ vā, vissajjeti vinassati.
६१५.
615.
पठमेन समानाव, समुट्ठानादयो नया।
Paṭhamena samānāva, samuṭṭhānādayo nayā;
अपच्चुद्धरणं एत्थ, अक्रियाति विसेसितं॥
Apaccuddharaṇaṃ ettha, akriyāti visesitaṃ.
दुतियकथिनकथा।
Dutiyakathinakathā.
६१६.
616.
अकालचीवरं मास-परमं निक्खिपे सति।
Akālacīvaraṃ māsa-paramaṃ nikkhipe sati;
पच्चासाय ततो उद्धं, ठपेतुं न च वट्टति॥
Paccāsāya tato uddhaṃ, ṭhapetuṃ na ca vaṭṭati.
६१७.
617.
दसाहातिक्कमोयेव।
Dasāhātikkamoyeva;
पठमे कथिने इध।
Paṭhame kathine idha;
मासस्सातिक्कमो वुत्तो।
Māsassātikkamo vutto;
सेसो तेन समो मतो॥
Seso tena samo mato.
ततियकथिनकथा।
Tatiyakathinakathā.
६१८.
618.
भिक्खु भिक्खुनिया भुत्तं, वत्थं अञ्ञातिकाय यो।
Bhikkhu bhikkhuniyā bhuttaṃ, vatthaṃ aññātikāya yo;
धोवापेति रजापेति, आकोटापेति चे ततो॥
Dhovāpeti rajāpeti, ākoṭāpeti ce tato.
६१९.
619.
तस्स निस्सग्गियापत्ति, पठमेन पकासिता।
Tassa nissaggiyāpatti, paṭhamena pakāsitā;
तथा सेसेहि च द्वीहि, दीपितं दुक्कटद्वयं॥
Tathā sesehi ca dvīhi, dīpitaṃ dukkaṭadvayaṃ.
६२०.
620.
सिक्खमानाय वा हत्थे, धोवनत्थाय देति चे।
Sikkhamānāya vā hatthe, dhovanatthāya deti ce;
सा हुत्वा उपसम्पन्ना, पच्छा धोवति सो नयो॥
Sā hutvā upasampannā, pacchā dhovati so nayo.
६२१.
621.
सामणेरनिद्देसेपि, लिङ्गं चे परिवत्तति।
Sāmaṇeraniddesepi, liṅgaṃ ce parivattati;
भिक्खुनीसुपसम्पज्ज, धोते निस्सग्गियं सिया॥
Bhikkhunīsupasampajja, dhote nissaggiyaṃ siyā.
६२२.
622.
दहरानञ्च भिक्खूनं, हत्थे वत्थे निय्यादिते।
Daharānañca bhikkhūnaṃ, hatthe vatthe niyyādite;
परिवत्तितलिङ्गेसु, तेसुपेस नयो मतो॥
Parivattitaliṅgesu, tesupesa nayo mato.
६२३.
623.
तथा भिक्खुनिया हत्थे, दिन्ने ‘‘धोवा’’ति चीवरे।
Tathā bhikkhuniyā hatthe, dinne ‘‘dhovā’’ti cīvare;
परिवत्ते तु लिङ्गस्मिं, सचे धोवति वट्टति॥
Parivatte tu liṅgasmiṃ, sace dhovati vaṭṭati.
६२४.
624.
‘‘धोवा’’ति भिक्खुनी वुत्ता, सचे सब्बं करोति सा।
‘‘Dhovā’’ti bhikkhunī vuttā, sace sabbaṃ karoti sā;
धोवनप्पच्चयायेव, तस्स निस्सग्गियं सिया॥
Dhovanappaccayāyeva, tassa nissaggiyaṃ siyā.
६२५.
625.
‘‘इमस्मिं चीवरे सब्बं, कत्तब्बं त्वं करोहि’’ति।
‘‘Imasmiṃ cīvare sabbaṃ, kattabbaṃ tvaṃ karohi’’ti;
होति निस्सग्गियञ्चेव, वदतो दुक्कटद्वयं॥
Hoti nissaggiyañceva, vadato dukkaṭadvayaṃ.
६२६.
626.
ञातिकाञातिसञ्ञिस्स, पच्चत्थरनिसीदनं।
Ñātikāñātisaññissa, paccattharanisīdanaṃ;
अञ्ञस्स सन्तकं वापि, धोवापेन्तस्स दुक्कटं॥
Aññassa santakaṃ vāpi, dhovāpentassa dukkaṭaṃ.
६२७.
627.
एकतोउपसम्पन्ना, भिक्खुनीनं वसेन या।
Ekatoupasampannā, bhikkhunīnaṃ vasena yā;
ताय धोवापने वापि, होति आपत्ति दुक्कटं॥
Tāya dhovāpane vāpi, hoti āpatti dukkaṭaṃ.
६२८.
628.
अवुत्ता परिभुत्तं वा, अञ्ञं वा यदि धोवति।
Avuttā paribhuttaṃ vā, aññaṃ vā yadi dhovati;
न दोसो, सञ्चरित्तेन, समुट्ठानादयो समा॥
Na doso, sañcarittena, samuṭṭhānādayo samā.
पुराणचीवरधोवापनकथा।
Purāṇacīvaradhovāpanakathā.
६२९.
629.
विकप्पनुपगं किञ्चि, पच्छिमं पन चीवरं।
Vikappanupagaṃ kiñci, pacchimaṃ pana cīvaraṃ;
गण्हतो होति आपत्ति, ठपेत्वा पारिवत्तकं॥
Gaṇhato hoti āpatti, ṭhapetvā pārivattakaṃ.
६३०.
630.
पयोगे गहणत्थाय, दुक्कटं परियापुतं।
Payoge gahaṇatthāya, dukkaṭaṃ pariyāputaṃ;
तस्स निस्सग्गियापत्ति, गहणेन पकासिता॥
Tassa nissaggiyāpatti, gahaṇena pakāsitā.
६३१.
631.
सचे अनुपसम्पन्न-हत्थे पेसेति चीवरं।
Sace anupasampanna-hatthe peseti cīvaraṃ;
अञ्ञत्र पारिवत्तापि, गहेतुं पन वट्टति॥
Aññatra pārivattāpi, gahetuṃ pana vaṭṭati.
६३२.
632.
ञातिकायपि अञ्ञाति-सञ्ञिस्स विमतिस्स वा।
Ñātikāyapi aññāti-saññissa vimatissa vā;
एकतोउपसम्पन्न-हत्था गण्हाति दुक्कटं॥
Ekatoupasampanna-hatthā gaṇhāti dukkaṭaṃ.
६३३.
633.
‘‘दस्सामी’’ति च आभोगं, कत्वा वा पारिवत्तकं।
‘‘Dassāmī’’ti ca ābhogaṃ, katvā vā pārivattakaṃ;
तावकालिकविस्सास-ग्गाहे दोसो न विज्जति॥
Tāvakālikavissāsa-ggāhe doso na vijjati.
६३४.
634.
अञ्ञं पन परिक्खारं, न दोसो होति गण्हतो।
Aññaṃ pana parikkhāraṃ, na doso hoti gaṇhato;
सञ्चरित्तसमुट्ठानं, इदं वुत्तं क्रियाक्रियं॥
Sañcarittasamuṭṭhānaṃ, idaṃ vuttaṃ kriyākriyaṃ.
चीवरपटिग्गहणकथा।
Cīvarapaṭiggahaṇakathā.
६३५.
635.
चीवरं विञ्ञापेन्तस्स, अञ्ञातकाप्पवारितं।
Cīvaraṃ viññāpentassa, aññātakāppavāritaṃ;
होति निस्सग्गियापत्ति, अञ्ञत्र समया पन॥
Hoti nissaggiyāpatti, aññatra samayā pana.
६३६.
636.
तिकपाचित्तियं वुत्तं, तथेव द्विकदुक्कटं।
Tikapācittiyaṃ vuttaṃ, tatheva dvikadukkaṭaṃ;
ञातकेञातिसञ्ञिस्स, तत्थ वेमतिकस्स च॥
Ñātakeñātisaññissa, tattha vematikassa ca.
६३७.
637.
समये विञ्ञापेन्तस्स, ञातके वा पवारिते।
Samaye viññāpentassa, ñātake vā pavārite;
अञ्ञस्सत्थाय वा तस्स, ञातके वा पवारिते॥
Aññassatthāya vā tassa, ñātake vā pavārite.
६३८.
638.
अनापत्तीति ञातब्बं, तथा उम्मत्तकादिनो।
Anāpattīti ñātabbaṃ, tathā ummattakādino;
समुट्ठानादयो सब्बे, सञ्चरित्तसमा मता॥
Samuṭṭhānādayo sabbe, sañcarittasamā matā.
अञ्ञातकविञ्ञत्तिकथा।
Aññātakaviññattikathā.
६३९.
639.
अप्पवारितमञ्ञातिं , चीवरं तु तदुत्तरिं।
Appavāritamaññātiṃ , cīvaraṃ tu taduttariṃ;
होति निस्सग्गियापत्ति, विञ्ञापेन्तस्स भिक्खुनो॥
Hoti nissaggiyāpatti, viññāpentassa bhikkhuno.
६४०.
640.
यस्स तीणिपि नट्ठानि, द्वे वा एकम्पि वा पन।
Yassa tīṇipi naṭṭhāni, dve vā ekampi vā pana;
द्वे वा एकम्पि वा तेन, सादितब्बं न किञ्चिपि॥
Dve vā ekampi vā tena, sāditabbaṃ na kiñcipi.
६४१.
641.
सेसकं आहरन्तस्स, दिन्ने नच्छिन्नकारणा।
Sesakaṃ āharantassa, dinne nacchinnakāraṇā;
सन्तके ञातकादीनं, अत्तनोपि धनेन वा॥
Santake ñātakādīnaṃ, attanopi dhanena vā.
६४२.
642.
अनापत्तीति ञातब्बं, तथा उम्मत्तकादिनो।
Anāpattīti ñātabbaṃ, tathā ummattakādino;
समुट्ठानादयो सब्बे, सञ्चरित्तसमा मता॥
Samuṭṭhānādayo sabbe, sañcarittasamā matā.
ततुत्तरिकथा।
Tatuttarikathā.
६४३.
643.
कल्याणकम्यताहेतु , आपज्जति विकप्पनं।
Kalyāṇakamyatāhetu , āpajjati vikappanaṃ;
चीवरे पन यो तस्स, लाभा निस्सग्गियं भवे॥
Cīvare pana yo tassa, lābhā nissaggiyaṃ bhave.
६४४.
644.
महग्घं दातुकामम्हि, अप्पग्घं विञ्ञापेति यो।
Mahagghaṃ dātukāmamhi, appagghaṃ viññāpeti yo;
सन्तके ञातकादीनं, अनापत्ति पकासिता॥
Santake ñātakādīnaṃ, anāpatti pakāsitā.
६४५.
645.
ञातकेञ्ञातिसञ्ञिस्स, दुक्कटं विमतिस्स च।
Ñātakeññātisaññissa, dukkaṭaṃ vimatissa ca;
सञ्चरित्तसमा वुत्ता, समुट्ठानादयो नया॥
Sañcarittasamā vuttā, samuṭṭhānādayo nayā.
पठमोपक्खटकथा।
Paṭhamopakkhaṭakathā.
६४६.
646.
दुतियोपक्खटे यस्मा, वत्तब्बं नत्थि किञ्चिपि।
Dutiyopakkhaṭe yasmā, vattabbaṃ natthi kiñcipi;
तस्मा अनन्तरेनस्स, सदिसोव विनिच्छयो॥
Tasmā anantarenassa, sadisova vinicchayo.
दुतियोपक्खटकथा।
Dutiyopakkhaṭakathā.
६४७.
647.
रञ्ञा वा राजभोग्गेन, भिक्खुमुद्दिस्समाभतं।
Raññā vā rājabhoggena, bhikkhumuddissamābhataṃ;
अकप्पियं सुवण्णादिं, गहेतुं न च वट्टति॥
Akappiyaṃ suvaṇṇādiṃ, gahetuṃ na ca vaṭṭati.
६४८.
648.
रजतं जातरूपं वा, अत्तनो वा परस्स वा।
Rajataṃ jātarūpaṃ vā, attano vā parassa vā;
अत्थाय गण्हितुं किञ्चि, दीयमानं न वट्टति॥
Atthāya gaṇhituṃ kiñci, dīyamānaṃ na vaṭṭati.
६४९.
649.
अञ्ञस्सत्थाय निद्दिट्ठं, भिक्खुनो पटिग्गण्हतो।
Aññassatthāya niddiṭṭhaṃ, bhikkhuno paṭiggaṇhato;
दुक्कटं तस्स होतीति, महापच्चरियं पन॥
Dukkaṭaṃ tassa hotīti, mahāpaccariyaṃ pana.
६५०.
650.
नेत्वा अकप्पियं भण्डं, इत्थं कोचि सचे वदे।
Netvā akappiyaṃ bhaṇḍaṃ, itthaṃ koci sace vade;
‘‘इदं सङ्घस्स दम्मीति, पुग्गलस्स गणस्स वा॥
‘‘Idaṃ saṅghassa dammīti, puggalassa gaṇassa vā.
६५१.
651.
आरामं वा विहारं वा, चेतियं वा करोहि’’ति।
Ārāmaṃ vā vihāraṃ vā, cetiyaṃ vā karohi’’ti;
न च वट्टति तं वत्थुं, सब्बेसं सम्पटिच्छितुं॥
Na ca vaṭṭati taṃ vatthuṃ, sabbesaṃ sampaṭicchituṃ.
६५२.
652.
अनामसित्वा सङ्घं वा, गणं वा पुग्गलम्पि वा।
Anāmasitvā saṅghaṃ vā, gaṇaṃ vā puggalampi vā;
‘‘चेतियस्स विहारस्स, देमा’’तिपि वदन्ति चे॥
‘‘Cetiyassa vihārassa, demā’’tipi vadanti ce.
६५३.
653.
तं हिरञ्ञं सुवण्णं वा, निसेधेतुं न वट्टति।
Taṃ hiraññaṃ suvaṇṇaṃ vā, nisedhetuṃ na vaṭṭati;
आरामिकानं वत्तब्बं, ‘‘वदन्तेवमिमे’’ति च॥
Ārāmikānaṃ vattabbaṃ, ‘‘vadantevamime’’ti ca.
६५४.
654.
रजतं जातरूपं वा, सङ्घस्स पटिग्गण्हतो।
Rajataṃ jātarūpaṃ vā, saṅghassa paṭiggaṇhato;
होति निस्सग्गियापत्ति, परिभोगे च दुक्कटं॥
Hoti nissaggiyāpatti, paribhoge ca dukkaṭaṃ.
६५५.
655.
तळाकस्स च खेत्तत्ता, सस्सुप्पत्तिनिदानतो।
Taḷākassa ca khettattā, sassuppattinidānato;
गहणं परिभोगो वा, न च वट्टति भिक्खुनो॥
Gahaṇaṃ paribhogo vā, na ca vaṭṭati bhikkhuno.
६५६.
656.
‘‘चत्तारो पच्चये सङ्घो, गणो वा परिभुञ्जतु’’।
‘‘Cattāro paccaye saṅgho, gaṇo vā paribhuñjatu’’;
इच्चेवं पन वत्वा चे, देति सब्बम्पि वट्टति॥
Iccevaṃ pana vatvā ce, deti sabbampi vaṭṭati.
६५७.
657.
कारापेति च केदारे, छिन्दापेत्वा वनं पन।
Kārāpeti ca kedāre, chindāpetvā vanaṃ pana;
केदारेसु पुराणेसु, अतिरेकम्पि गण्हति॥
Kedāresu purāṇesu, atirekampi gaṇhati.
६५८.
658.
अपरिच्छिन्नभागस्मिं, नवसस्सेपि ‘‘एत्तकं।
Aparicchinnabhāgasmiṃ, navasassepi ‘‘ettakaṃ;
भागं देथा’’ति वत्वा चे, उट्ठापेति कहापणे॥
Bhāgaṃ dethā’’ti vatvā ce, uṭṭhāpeti kahāpaṇe.
६५९.
659.
वत्वा अकप्पियं वाचं, ‘‘कसथ वपथा’’ति च।
Vatvā akappiyaṃ vācaṃ, ‘‘kasatha vapathā’’ti ca;
उप्पादितञ्च सब्बेसं, होति सब्बमकप्पियं॥
Uppāditañca sabbesaṃ, hoti sabbamakappiyaṃ.
६६०.
660.
‘‘एत्तको नाम भागोति, एत्तिकाय च भूमिया’’।
‘‘Ettako nāma bhāgoti, ettikāya ca bhūmiyā’’;
पतिट्ठापेति यो भूमिं, अवत्वा कसथादिकं॥
Patiṭṭhāpeti yo bhūmiṃ, avatvā kasathādikaṃ.
६६१.
661.
सयमेव पमाणस्स, जाननत्थं तु भूमिया।
Sayameva pamāṇassa, jānanatthaṃ tu bhūmiyā;
रज्जुया वापि दण्डेन, खेत्तं मिनाति यो पन॥
Rajjuyā vāpi daṇḍena, khettaṃ mināti yo pana.
६६२.
662.
खले वा रक्खति ठत्वा, खलतोपि ततो पुन।
Khale vā rakkhati ṭhatvā, khalatopi tato puna;
नीहरापेति वा वीही, तस्सेवेतमकप्पियं॥
Nīharāpeti vā vīhī, tassevetamakappiyaṃ.
६६३.
663.
‘‘एत्तकेहि च वीहीहि, इदं आहरथा’’ति च।
‘‘Ettakehi ca vīhīhi, idaṃ āharathā’’ti ca;
आहरन्ति सचे वुत्ता, तस्सेवेतमकप्पियं॥
Āharanti sace vuttā, tassevetamakappiyaṃ.
६६४.
664.
‘‘एत्तकेन हिरञ्ञेन, इदमाहरथा’’ति च।
‘‘Ettakena hiraññena, idamāharathā’’ti ca;
आहरन्ति च यं वुत्ता, सब्बेसं तमकप्पियं॥
Āharanti ca yaṃ vuttā, sabbesaṃ tamakappiyaṃ.
६६५.
665.
पेसकारकदासं वा, अञ्ञं वा रजकादिसु।
Pesakārakadāsaṃ vā, aññaṃ vā rajakādisu;
आरामिकानं नामेन, देन्ते वट्टति गण्हितुं॥
Ārāmikānaṃ nāmena, dente vaṭṭati gaṇhituṃ.
६६६.
666.
‘‘गावो देमा’’ति वुत्तेपि, गहेतुं न च वट्टति।
‘‘Gāvo demā’’ti vuttepi, gahetuṃ na ca vaṭṭati;
पञ्चगोरसभोगत्थं, वुत्ते देमाति वट्टति॥
Pañcagorasabhogatthaṃ, vutte demāti vaṭṭati.
६६७.
667.
अजिकादीसु एसेव, नयो ञेय्यो विभाविना।
Ajikādīsu eseva, nayo ñeyyo vibhāvinā;
कप्पियेन च वाक्येन, सब्बं वट्टति गण्हितुं॥
Kappiyena ca vākyena, sabbaṃ vaṭṭati gaṇhituṃ.
६६८.
668.
हत्थिं वा महिसं अस्सं, गोणं कुक्कुटसूकरं।
Hatthiṃ vā mahisaṃ assaṃ, goṇaṃ kukkuṭasūkaraṃ;
देन्तेसु च मनुस्सेसु, न च वट्टति गण्हितुं॥
Dentesu ca manussesu, na ca vaṭṭati gaṇhituṃ.
६६९.
669.
पटिसिद्धेपि सङ्घस्स, दत्वा गच्छति चे पन।
Paṭisiddhepi saṅghassa, datvā gacchati ce pana;
मूलं दत्वा च सङ्घस्स, केचि गण्हन्ति वट्टति॥
Mūlaṃ datvā ca saṅghassa, keci gaṇhanti vaṭṭati.
६७०.
670.
‘‘खेत्तं वत्थुं तळाकं वा, देम गोअजिकादिकं।
‘‘Khettaṃ vatthuṃ taḷākaṃ vā, dema goajikādikaṃ;
विहारस्सा’’ति वुत्तेपि, निसेधेतुं न वट्टति॥
Vihārassā’’ti vuttepi, nisedhetuṃ na vaṭṭati.
६७१.
671.
तिक्खत्तुं चोदना वुत्ता, छक्खत्तुं ठानमब्रवि।
Tikkhattuṃ codanā vuttā, chakkhattuṃ ṭhānamabravi;
यदि चोदेतियेव छ, चोदना दिगुणा ठिति॥
Yadi codetiyeva cha, codanā diguṇā ṭhiti.
६७२.
672.
अनापत्ति अचोदेत्वा, लद्धे उम्मत्तकादिनो।
Anāpatti acodetvā, laddhe ummattakādino;
समुट्ठानादयो सब्बे, सञ्चरित्तसमा मता॥
Samuṭṭhānādayo sabbe, sañcarittasamā matā.
राजसिक्खापदकथा।
Rājasikkhāpadakathā.
चीवरवग्गो पठमो।
Cīvaravaggo paṭhamo.
६७३.
673.
एकेनापि च मिस्सेत्वा, सन्थतं कोसियंसुना।
Ekenāpi ca missetvā, santhataṃ kosiyaṃsunā;
होति निस्सग्गियापत्ति, कारापेन्तस्स भिक्खुनो॥
Hoti nissaggiyāpatti, kārāpentassa bhikkhuno.
६७४.
674.
परत्थाय करोन्तस्स, कारापेन्तस्स सन्थतं।
Paratthāya karontassa, kārāpentassa santhataṃ;
अञ्ञेन च कतं लद्धा, सेवमानस्स दुक्कटं॥
Aññena ca kataṃ laddhā, sevamānassa dukkaṭaṃ.
६७५.
675.
अनापत्ति वितानं वा, भूमत्थरणमेव वा।
Anāpatti vitānaṃ vā, bhūmattharaṇameva vā;
भिसि बिब्बोहनं वापि, करोन्तस्सादिकम्मिनो॥
Bhisi bibbohanaṃ vāpi, karontassādikammino.
कोसियकथा।
Kosiyakathā.
६७६.
676.
काळकेळकलोमानं, सुद्धानं सन्थतं सचे।
Kāḷakeḷakalomānaṃ, suddhānaṃ santhataṃ sace;
करेय्यापत्ति होतिस्स, सेसं तु पठमूपमं॥
Kareyyāpatti hotissa, sesaṃ tu paṭhamūpamaṃ.
सुद्धकाळककथा।
Suddhakāḷakakathā.
६७७.
677.
अनापत्ति तुलं वापि, बहुं वा सब्बमेव वा।
Anāpatti tulaṃ vāpi, bahuṃ vā sabbameva vā;
करोन्तस्स गहेत्वान, ओदातं कपिलम्पि वा॥
Karontassa gahetvāna, odātaṃ kapilampi vā.
६७८.
678.
अनुक्कमेन एतानि, सन्थतानि च तीणिपि।
Anukkamena etāni, santhatāni ca tīṇipi;
निस्सज्जित्वापि लद्धानि, सेवमानस्स दुक्कटं॥
Nissajjitvāpi laddhāni, sevamānassa dukkaṭaṃ.
६७९.
679.
समुट्ठानादयो सब्बे, सञ्चरित्तसमा मता।
Samuṭṭhānādayo sabbe, sañcarittasamā matā;
इमेसं पन तिण्णम्पि, ततियं तु क्रियाक्रियं॥
Imesaṃ pana tiṇṇampi, tatiyaṃ tu kriyākriyaṃ.
द्वेभागकथा।
Dvebhāgakathā.
६८०.
680.
छन्नं ओरेन वस्सानं, करोन्तस्स च सन्थतं।
Channaṃ orena vassānaṃ, karontassa ca santhataṃ;
होति निस्सग्गियापत्ति, ठपेत्वा भिक्खुसम्मुतिं॥
Hoti nissaggiyāpatti, ṭhapetvā bhikkhusammutiṃ.
६८१.
681.
अनापत्ति परत्थाय, कारापेति करोति वा।
Anāpatti paratthāya, kārāpeti karoti vā;
कतं वा पन अञ्ञेन, लभित्वा परिभुञ्जतो॥
Kataṃ vā pana aññena, labhitvā paribhuñjato.
६८२.
682.
छब्बस्सानि करोन्तस्स, तदुद्धम्पि च सन्थतं।
Chabbassāni karontassa, taduddhampi ca santhataṃ;
विताने साणिपाकारे, निस्सज्जित्वा कतेपि च॥
Vitāne sāṇipākāre, nissajjitvā katepi ca.
छब्बस्सकथा।
Chabbassakathā.
६८३.
683.
अनापत्ति अनादाय, असन्ते सन्थते पन।
Anāpatti anādāya, asante santhate pana;
अञ्ञस्सत्थाय कारेतुं, कतञ्च परिभुञ्जितुं॥
Aññassatthāya kāretuṃ, katañca paribhuñjituṃ.
६८४.
684.
अनादानवसेनस्स, सुगतस्स विदत्थिया।
Anādānavasenassa, sugatassa vidatthiyā;
करणेन च सत्थारा, वुत्तमेतं क्रियाक्रियं॥
Karaṇena ca satthārā, vuttametaṃ kriyākriyaṃ.
६८५.
685.
समुट्ठानादयो सब्बे, सञ्चरित्तसमा मता।
Samuṭṭhānādayo sabbe, sañcarittasamā matā;
अनन्तरस्सिमस्सापि, विसेसो नुपलब्भति॥
Anantarassimassāpi, viseso nupalabbhati.
निसीदनसन्थतकथा।
Nisīdanasanthatakathā.
६८६.
686.
गच्छन्ते पन याने वा, हत्थिअस्सादिकेसु वा।
Gacchante pana yāne vā, hatthiassādikesu vā;
ठपेति यदि लोमानि, सामिकस्स अजानतो॥
Ṭhapeti yadi lomāni, sāmikassa ajānato.
६८७.
687.
तियोजनमतीतेसु, तेसु आपत्ति भिक्खुनो।
Tiyojanamatītesu, tesu āpatti bhikkhuno;
अगच्छन्तेसु तेस्वेव, ठपितेसुप्ययं नयो॥
Agacchantesu tesveva, ṭhapitesupyayaṃ nayo.
६८८.
688.
याने पन अगच्छन्ते, अस्से वा हत्थिपिट्ठियं।
Yāne pana agacchante, asse vā hatthipiṭṭhiyaṃ;
ठपेत्वा अभिरूहित्वा, सचे सारेति वट्टति॥
Ṭhapetvā abhirūhitvā, sace sāreti vaṭṭati.
६८९.
689.
न वट्टतीति निद्दिट्ठं, कुरुन्दट्ठकथाय हि।
Na vaṭṭatīti niddiṭṭhaṃ, kurundaṭṭhakathāya hi;
तं पनञ्ञं हरापेति, वचनेन विरुज्झति॥
Taṃ panaññaṃ harāpeti, vacanena virujjhati.
६९०.
690.
कण्णच्छिद्देसु लोमानि, पक्खिपित्वापि गच्छतो।
Kaṇṇacchiddesu lomāni, pakkhipitvāpi gacchato;
होतियेव किरापत्ति, लोमानं गणनावसा॥
Hotiyeva kirāpatti, lomānaṃ gaṇanāvasā.
६९१.
691.
सुत्तकेन च बन्धित्वा, ठपितं पन वट्टति।
Suttakena ca bandhitvā, ṭhapitaṃ pana vaṭṭati;
वेणिं कत्वा हरन्तस्स, आपत्ति परिदीपिता॥
Veṇiṃ katvā harantassa, āpatti paridīpitā.
६९२.
692.
सुङ्कघातं अनुप्पत्वा, चोरादीहि उपद्दुतो।
Suṅkaghātaṃ anuppatvā, corādīhi upadduto;
यो चञ्ञविहितो वापि, आपत्ति यदि गच्छति॥
Yo caññavihito vāpi, āpatti yadi gacchati.
६९३.
693.
तियोजनं हरन्तस्स, ऊनकं वा तियोजनं।
Tiyojanaṃ harantassa, ūnakaṃ vā tiyojanaṃ;
तथा पच्चाहरन्तस्स, तानियेव तियोजनं॥
Tathā paccāharantassa, tāniyeva tiyojanaṃ.
६९४.
694.
निवासत्थाय वा गन्त्वा, हरन्तस्स ततो परं।
Nivāsatthāya vā gantvā, harantassa tato paraṃ;
अच्छिन्नं वापि निस्सट्ठं, लभित्वा हरतोपि च॥
Acchinnaṃ vāpi nissaṭṭhaṃ, labhitvā haratopi ca.
६९५.
695.
हरापेन्तस्स अञ्ञेन, हरतो कतभण्डकं।
Harāpentassa aññena, harato katabhaṇḍakaṃ;
तथा उम्मत्तकादीनं, अनापत्ति पकासिता॥
Tathā ummattakādīnaṃ, anāpatti pakāsitā.
६९६.
696.
इदं पन समुट्ठानं, कायतो कायचित्ततो।
Idaṃ pana samuṭṭhānaṃ, kāyato kāyacittato;
अचित्तं कायकम्मञ्च, तिचित्तञ्च तिवेदनं॥
Acittaṃ kāyakammañca, ticittañca tivedanaṃ.
एळकलोमकथा।
Eḷakalomakathā.
६९७.
697.
समुट्ठानादिना सद्धिं, लोमधोवापनम्पि च।
Samuṭṭhānādinā saddhiṃ, lomadhovāpanampi ca;
चीवरस्स पुराणस्स, धोवापनसमं मतं॥
Cīvarassa purāṇassa, dhovāpanasamaṃ mataṃ.
एळकलोमधोवापनकथा।
Eḷakalomadhovāpanakathā.
६९८.
698.
गण्हेय्य वा गण्हापेय्य, रजतं जातरूपकं।
Gaṇheyya vā gaṇhāpeyya, rajataṃ jātarūpakaṃ;
निस्सज्जित्वा पनापत्ति, देसेतब्बाव भिक्खुना॥
Nissajjitvā panāpatti, desetabbāva bhikkhunā.
६९९.
699.
रजतं जातरूपञ्च, उभिन्नं मासकोपि च।
Rajataṃ jātarūpañca, ubhinnaṃ māsakopi ca;
एतं चतुब्बिधं वत्थु, होति निस्सग्गियावहं॥
Etaṃ catubbidhaṃ vatthu, hoti nissaggiyāvahaṃ.
७००.
700.
मुत्ता मणि सिला सङ्खो, पवाळं लोहितङ्कको।
Muttā maṇi silā saṅkho, pavāḷaṃ lohitaṅkako;
मसारगल्लं धञ्ञानि, सत्त गोमहिसादिकं॥
Masāragallaṃ dhaññāni, satta gomahisādikaṃ.
७०१.
701.
खेत्तं वत्थुं तळाकञ्च, दासिदासादिकं पन।
Khettaṃ vatthuṃ taḷākañca, dāsidāsādikaṃ pana;
दुक्कटस्सेव वत्थूनि, दीपितानि महेसिना॥
Dukkaṭasseva vatthūni, dīpitāni mahesinā.
७०२.
702.
मुग्गमासादिकं सब्बं, सप्पिआदीनि तण्डुला।
Muggamāsādikaṃ sabbaṃ, sappiādīni taṇḍulā;
सुत्तं वत्थं हलं फालं, कप्पियं एवमादिकं॥
Suttaṃ vatthaṃ halaṃ phālaṃ, kappiyaṃ evamādikaṃ.
७०३.
703.
तत्थत्तनो पनत्थाय, वत्थुं निस्सग्गियस्स हि।
Tatthattano panatthāya, vatthuṃ nissaggiyassa hi;
सम्पटिच्छति यो भिक्खु, तस्स निस्सग्गियं सिया॥
Sampaṭicchati yo bhikkhu, tassa nissaggiyaṃ siyā.
७०४.
704.
सङ्घादीनं तमत्थाय, गण्हतो दुक्कटं तथा।
Saṅghādīnaṃ tamatthāya, gaṇhato dukkaṭaṃ tathā;
दुक्कटस्स च वत्थुम्पि, सब्बत्थाय च दुक्कटं॥
Dukkaṭassa ca vatthumpi, sabbatthāya ca dukkaṭaṃ.
७०५.
705.
सचे कहापणादीनं, सहस्सं पटिगण्हति।
Sace kahāpaṇādīnaṃ, sahassaṃ paṭigaṇhati;
वत्थूनं गणनायस्स, आपत्तिगणना सिया॥
Vatthūnaṃ gaṇanāyassa, āpattigaṇanā siyā.
७०६.
706.
तथा सिथिलबद्धेसु, थविकादीसु रूपतो।
Tathā sithilabaddhesu, thavikādīsu rūpato;
आपत्तिगणना वुत्ता, महापच्चरियं पन॥
Āpattigaṇanā vuttā, mahāpaccariyaṃ pana.
७०७.
707.
‘‘इदं अय्यस्स होतू’’ति, वुत्ते वा पन केनचि।
‘‘Idaṃ ayyassa hotū’’ti, vutte vā pana kenaci;
सचे गण्हितुकामोपि, निसेधेतब्बमेव च॥
Sace gaṇhitukāmopi, nisedhetabbameva ca.
७०८.
708.
पटिक्खित्तेपि तं वत्थुं, ठपेत्वा यदि गच्छति।
Paṭikkhittepi taṃ vatthuṃ, ṭhapetvā yadi gacchati;
तथा गोपायितब्बं तं, यथा तं न विनस्सति॥
Tathā gopāyitabbaṃ taṃ, yathā taṃ na vinassati.
७०९.
709.
‘‘आहरेदमिदं गण्ह, इदं देहीध निक्खिप’’।
‘‘Āharedamidaṃ gaṇha, idaṃ dehīdha nikkhipa’’;
इच्चेवं भिक्खुनो वत्तुं, न वट्टति अकप्पियं॥
Iccevaṃ bhikkhuno vattuṃ, na vaṭṭati akappiyaṃ.
७१०.
710.
ठपेत्वा रूपियग्गाहं, निस्सट्ठपरिवत्तितं।
Ṭhapetvā rūpiyaggāhaṃ, nissaṭṭhaparivattitaṃ;
सब्बेहि परिभोत्तब्बं, भाजेत्वा सप्पिआदिकं॥
Sabbehi paribhottabbaṃ, bhājetvā sappiādikaṃ.
७११.
711.
अत्तनो पत्तभागम्पि, पटिग्गाहकभिक्खुनो।
Attano pattabhāgampi, paṭiggāhakabhikkhuno;
गहेतुं अञ्ञतो लद्धं, भुञ्जितुं वा न वट्टति॥
Gahetuṃ aññato laddhaṃ, bhuñjituṃ vā na vaṭṭati.
७१२.
712.
यं किञ्चि पन सम्भूतं, पच्चयं वत्थुतो ततो।
Yaṃ kiñci pana sambhūtaṃ, paccayaṃ vatthuto tato;
भिक्खुनो सेवमानस्स, होति आपत्ति दुक्कटं॥
Bhikkhuno sevamānassa, hoti āpatti dukkaṭaṃ.
७१३.
713.
अज्झारामे अनापत्ति, तमज्झावसथेपि वा।
Ajjhārāme anāpatti, tamajjhāvasathepi vā;
गहेत्वा वा गहापेत्वा, निक्खिपन्तस्स भिक्खुनो॥
Gahetvā vā gahāpetvā, nikkhipantassa bhikkhuno.
७१४.
714.
तिकपाचित्तियं वुत्तं, रूपियन्ति अरूपिये।
Tikapācittiyaṃ vuttaṃ, rūpiyanti arūpiye;
सञ्ञिनो विमतिस्सापि, होति आपत्ति दुक्कटं॥
Saññino vimatissāpi, hoti āpatti dukkaṭaṃ.
७१५.
715.
समुट्ठानादयो सब्बे, सञ्चरित्तसमा मता।
Samuṭṭhānādayo sabbe, sañcarittasamā matā;
क्रियाक्रियमिदं वुत्तं, अयमेव विसेसता॥
Kriyākriyamidaṃ vuttaṃ, ayameva visesatā.
रूपियपटिग्गहणकथा।
Rūpiyapaṭiggahaṇakathā.
७१६.
716.
वत्थुं निस्सग्गियस्सापि, वत्थुं वा दुक्कटस्स च।
Vatthuṃ nissaggiyassāpi, vatthuṃ vā dukkaṭassa ca;
कप्पियस्स च वत्थुं वा, यो निस्सग्गियवत्थुना॥
Kappiyassa ca vatthuṃ vā, yo nissaggiyavatthunā.
७१७.
717.
वत्थुना दुक्कटस्सापि, वत्थुं निस्सग्गियस्स वा।
Vatthunā dukkaṭassāpi, vatthuṃ nissaggiyassa vā;
परिवत्तेति आपत्ति, कप्पियेन च वत्थुना॥
Parivatteti āpatti, kappiyena ca vatthunā.
७१८.
718.
दुक्कटस्स च वत्थुं वा, वत्थुं वा कप्पियस्स च।
Dukkaṭassa ca vatthuṃ vā, vatthuṃ vā kappiyassa ca;
वत्थुना दुक्कटस्सेव, परिवत्तेति दुक्कटं॥
Vatthunā dukkaṭasseva, parivatteti dukkaṭaṃ.
७१९.
719.
वत्थुना कप्पियस्सापि, तथा दुक्कटवत्थुकं।
Vatthunā kappiyassāpi, tathā dukkaṭavatthukaṃ;
परिवत्तेति यो तस्स, होति आपत्ति दुक्कटं॥
Parivatteti yo tassa, hoti āpatti dukkaṭaṃ.
७२०.
720.
वत्थुनो दुक्कटस्सापि, तथा निस्सग्गियस्स च।
Vatthuno dukkaṭassāpi, tathā nissaggiyassa ca;
गहणं वारितं पुब्बे, इमिना परिवत्तनं॥
Gahaṇaṃ vāritaṃ pubbe, iminā parivattanaṃ.
७२१.
721.
रूपियन्ति च सञ्ञिस्स, विमतिस्स अरूपिये।
Rūpiyanti ca saññissa, vimatissa arūpiye;
तेन द्वे दुक्कटा होन्ति, चेतापेन्तस्स रूपियं॥
Tena dve dukkaṭā honti, cetāpentassa rūpiyaṃ.
७२२.
722.
अरूपियन्ति सञ्ञिस्स, अनापत्ति अरूपिये।
Arūpiyanti saññissa, anāpatti arūpiye;
‘‘इदं गहेत्वा देही’’ति, वदतोपि च पञ्चहि॥
‘‘Idaṃ gahetvā dehī’’ti, vadatopi ca pañcahi.
७२३.
723.
सेसं अनन्तरेनेव, समुट्ठानादिकं समं।
Sesaṃ anantareneva, samuṭṭhānādikaṃ samaṃ;
इदं क्रियसमुट्ठानं, अयमेव विसेसता॥
Idaṃ kriyasamuṭṭhānaṃ, ayameva visesatā.
रूपियसंवोहारकथा।
Rūpiyasaṃvohārakathā.
७२४.
724.
कप्पियं कप्पियेनेव, परिवत्तयतो पन।
Kappiyaṃ kappiyeneva, parivattayato pana;
होति निस्सग्गियापत्ति, ठपेत्वा सहधम्मिके॥
Hoti nissaggiyāpatti, ṭhapetvā sahadhammike.
७२५.
725.
अकप्पियस्स वत्थुस्स, तेनेव परिवत्तनं।
Akappiyassa vatthussa, teneva parivattanaṃ;
न गच्छतीति निद्दिट्ठं, कयविक्कयसङ्गहं॥
Na gacchatīti niddiṭṭhaṃ, kayavikkayasaṅgahaṃ.
७२६.
726.
तस्मा मातापितूनम्पि, वत्थुं यं किञ्चि कप्पियं।
Tasmā mātāpitūnampi, vatthuṃ yaṃ kiñci kappiyaṃ;
‘‘इमं देहिमिना ही’’ति, वदतो पन दुक्कटं॥
‘‘Imaṃ dehiminā hī’’ti, vadato pana dukkaṭaṃ.
७२७.
727.
सकं वा देति चे भण्डं, एवं वत्वान मातुया।
Sakaṃ vā deti ce bhaṇḍaṃ, evaṃ vatvāna mātuyā;
मातुया वा तथा भण्डं, सयं गण्हाति दुक्कटं॥
Mātuyā vā tathā bhaṇḍaṃ, sayaṃ gaṇhāti dukkaṭaṃ.
७२८.
728.
सहत्थं परभण्डस्मिं, परहत्थञ्च अत्तनो।
Sahatthaṃ parabhaṇḍasmiṃ, parahatthañca attano;
भण्डके पन सम्पत्ते, निस्सग्गियमुदीरितं॥
Bhaṇḍake pana sampatte, nissaggiyamudīritaṃ.
७२९.
729.
‘‘गहेत्वा वा इदं नाम, भुञ्जित्वा ओदनं इमं।
‘‘Gahetvā vā idaṃ nāma, bhuñjitvā odanaṃ imaṃ;
इदं नाम करोही’’ति, वत्तुं पन न वट्टति॥
Idaṃ nāma karohī’’ti, vattuṃ pana na vaṭṭati.
७३०.
730.
विघासादमथञ्ञं वा, ‘‘भुञ्जित्वा ओदनं इमं।
Vighāsādamathaññaṃ vā, ‘‘bhuñjitvā odanaṃ imaṃ;
छल्लिं वा पन वल्लिं वा, कट्ठं वा दारुमेव वा॥
Challiṃ vā pana valliṃ vā, kaṭṭhaṃ vā dārumeva vā.
७३१.
731.
आहरा’’ति वदन्तस्स, वत्थूनं गणनावसा।
Āharā’’ti vadantassa, vatthūnaṃ gaṇanāvasā;
होन्ति आपत्तियो तस्स, भिक्खुनो कयविक्कये॥
Honti āpattiyo tassa, bhikkhuno kayavikkaye.
७३२.
732.
‘‘इमञ्च यागुं पिव भुञ्ज भत्तं।
‘‘Imañca yāguṃ piva bhuñja bhattaṃ;
भुत्तोसि भुञ्जिस्ससि भुञ्जसीदं।
Bhuttosi bhuñjissasi bhuñjasīdaṃ;
भत्तं, इमं नाम करोहि कम्मं’’।
Bhattaṃ, imaṃ nāma karohi kammaṃ’’;
इच्चेव वत्तुं पन वट्टतेव॥
Icceva vattuṃ pana vaṭṭateva.
७३३.
733.
भूमिया सोधने वापि, लिम्पने वत्थधोवने।
Bhūmiyā sodhane vāpi, limpane vatthadhovane;
एत्थ किञ्चापि नत्थञ्ञं, भण्डं निस्सज्जितब्बकं॥
Ettha kiñcāpi natthaññaṃ, bhaṇḍaṃ nissajjitabbakaṃ.
७३४.
734.
निस्सग्गिये च वत्थुम्हि, नट्ठे भुत्तेपि वा यथा।
Nissaggiye ca vatthumhi, naṭṭhe bhuttepi vā yathā;
देसेतब्बाव आपत्ति, देसेतब्बा तथा अयं॥
Desetabbāva āpatti, desetabbā tathā ayaṃ.
७३५.
735.
‘‘इमिनाव इमं नाम, गहेत्वा देहि मे’’इति।
‘‘Imināva imaṃ nāma, gahetvā dehi me’’iti;
आचिक्खति अनापत्ति, ठपेत्वा भण्डसामिकं॥
Ācikkhati anāpatti, ṭhapetvā bhaṇḍasāmikaṃ.
७३६.
736.
‘‘इदं ममत्थि अत्थो मे, इमिना’’ति च भासतो।
‘‘Idaṃ mamatthi attho me, iminā’’ti ca bhāsato;
सेसं अनन्तरेनेव, समुट्ठानादिकं समं॥
Sesaṃ anantareneva, samuṭṭhānādikaṃ samaṃ.
कयविक्कयकथा।
Kayavikkayakathā.
कोसियवग्गो दुतियो।
Kosiyavaggo dutiyo.
७३७.
737.
मत्तिकायोमया पत्ता, कप्पिया जातितो दुवे।
Mattikāyomayā pattā, kappiyā jātito duve;
तयो पत्तस्स वण्णा तु, उक्कट्ठो मज्झिमोमको॥
Tayo pattassa vaṇṇā tu, ukkaṭṭho majjhimomako.
७३८.
738.
द्विन्नं तण्डुलनाळीनं, भत्तं मगधनाळिया।
Dvinnaṃ taṇḍulanāḷīnaṃ, bhattaṃ magadhanāḷiyā;
खादनञ्च चतुब्भागं, ब्यञ्जनञ्च तदूपियं॥
Khādanañca catubbhāgaṃ, byañjanañca tadūpiyaṃ.
७३९.
739.
उक्कट्ठो नाम सो पत्तो, यो तं सब्बं तु गण्हति।
Ukkaṭṭho nāma so patto, yo taṃ sabbaṃ tu gaṇhati;
मज्झिमो तस्सुपड्ढो च, तदुपड्ढो च ओमको॥
Majjhimo tassupaḍḍho ca, tadupaḍḍho ca omako.
७४०.
740.
उक्कट्ठस्स च उक्कट्ठो, तस्सेवोमकमज्झिमा।
Ukkaṭṭhassa ca ukkaṭṭho, tassevomakamajjhimā;
एवं मज्झिमओमेसु, नव पत्ता भवन्ति हि॥
Evaṃ majjhimaomesu, nava pattā bhavanti hi.
७४१.
741.
उक्कट्ठुक्कट्ठको तेसु, अपत्तो ओमकोमको।
Ukkaṭṭhukkaṭṭhako tesu, apatto omakomako;
तस्मा नापि अधिट्ठानं, न गच्छन्ति विकप्पनं॥
Tasmā nāpi adhiṭṭhānaṃ, na gacchanti vikappanaṃ.
७४२.
742.
सेसं सत्तविधं पत्तं, पत्तलक्खणसंयुतं।
Sesaṃ sattavidhaṃ pattaṃ, pattalakkhaṇasaṃyutaṃ;
अधिट्ठाय विकप्पेत्वा, परिभुञ्जेय्य पण्डितो॥
Adhiṭṭhāya vikappetvā, paribhuñjeyya paṇḍito.
७४३.
743.
दसाहपरमं कालं, धारेय्य अतिरेकतो।
Dasāhaparamaṃ kālaṃ, dhāreyya atirekato;
अतिक्कमयतो पत्तं, तञ्हि निस्सग्गियं सिया॥
Atikkamayato pattaṃ, tañhi nissaggiyaṃ siyā.
७४४.
744.
यं पत्तं न विकप्पेति, यं नाधिट्ठेति वा पन।
Yaṃ pattaṃ na vikappeti, yaṃ nādhiṭṭheti vā pana;
विनयञ्ञूहि सो पत्तो, अतिरेकोति वण्णितो॥
Vinayaññūhi so patto, atirekoti vaṇṇito.
७४५.
745.
वत्तब्बं तु ‘‘इमं पत्तं, अधिट्ठामी’’ति सम्मुखे।
Vattabbaṃ tu ‘‘imaṃ pattaṃ, adhiṭṭhāmī’’ti sammukhe;
‘‘एतं पत्त’’न्ति दूरस्मिं, पच्चुद्धारेप्ययं नयो॥
‘‘Etaṃ patta’’nti dūrasmiṃ, paccuddhārepyayaṃ nayo.
७४६.
746.
आभोगं मनसा कत्वा, कत्वा कायविकारकं।
Ābhogaṃ manasā katvā, katvā kāyavikārakaṃ;
कायेनपि च पत्तस्स, अधिट्ठानं पकासितं॥
Kāyenapi ca pattassa, adhiṭṭhānaṃ pakāsitaṃ.
७४७.
747.
पत्तो जहतिधिट्ठानं, दानभेदकनासतो।
Patto jahatidhiṭṭhānaṃ, dānabhedakanāsato;
विब्भमुद्धारपच्चक्ख-परिवत्तनगाहतो॥
Vibbhamuddhārapaccakkha-parivattanagāhato.
७४८.
748.
कङ्गुसित्थप्पमाणेन, खेनाधिट्ठानमुज्झति।
Kaṅgusitthappamāṇena, khenādhiṭṭhānamujjhati;
पिदहित्वा अधिट्ठेय्य, अयोचुण्णेन वाणिया॥
Pidahitvā adhiṭṭheyya, ayocuṇṇena vāṇiyā.
७४९.
749.
यो हि निस्सग्गियं पत्तं, अनिस्सज्जेव भुञ्जति।
Yo hi nissaggiyaṃ pattaṃ, anissajjeva bhuñjati;
दुक्कटं तस्स निद्दिट्ठं, भुत्वा धोवनधोवने॥
Dukkaṭaṃ tassa niddiṭṭhaṃ, bhutvā dhovanadhovane.
७५०.
750.
सुवण्णमणिपत्तो च, वेळुरियफलिकुब्भवो।
Suvaṇṇamaṇipatto ca, veḷuriyaphalikubbhavo;
कंसकाचमयो पत्तो, तिपुसीसमयोपि च॥
Kaṃsakācamayo patto, tipusīsamayopi ca.
७५१.
751.
तथा दारुमयो पत्तो, तम्बसज्झुमयोपि च।
Tathā dārumayo patto, tambasajjhumayopi ca;
एकादसविधो पत्तो, वुत्तो दुक्कटवत्थुको॥
Ekādasavidho patto, vutto dukkaṭavatthuko.
७५२.
752.
घटसीसकटाहो च, तुम्बं चस्सानुलोमिकं।
Ghaṭasīsakaṭāho ca, tumbaṃ cassānulomikaṃ;
तम्बलोहमयं तत्थ, थालकं पन वट्टति॥
Tambalohamayaṃ tattha, thālakaṃ pana vaṭṭati.
७५३.
753.
फलिककाचकंसानं, तट्टिकादीनि कानिचि।
Phalikakācakaṃsānaṃ, taṭṭikādīni kānici;
पुग्गलस्स न वट्टन्ति, वट्टन्ति गिहिसङ्घिका॥
Puggalassa na vaṭṭanti, vaṭṭanti gihisaṅghikā.
७५४.
754.
यं किञ्चि सोदकं पत्तं, पटिसामेय्य दुक्कटं।
Yaṃ kiñci sodakaṃ pattaṃ, paṭisāmeyya dukkaṭaṃ;
साधुकं वोदकं कत्वा, पटिसामेय्य पण्डितो॥
Sādhukaṃ vodakaṃ katvā, paṭisāmeyya paṇḍito.
७५५.
755.
भिक्खुनो सोदकं पत्तं, ओतापेतुं न वट्टति।
Bhikkhuno sodakaṃ pattaṃ, otāpetuṃ na vaṭṭati;
उण्हे न निदहेतब्बो, निदहन्तस्स दुक्कटं॥
Uṇhe na nidahetabbo, nidahantassa dukkaṭaṃ.
७५६.
756.
मिड्ढन्ते परिभण्डन्ते, ठपेतुं न च वट्टति।
Miḍḍhante paribhaṇḍante, ṭhapetuṃ na ca vaṭṭati;
मिड्ढिया परिभण्डे वा, वित्थिण्णे पन वट्टति॥
Miḍḍhiyā paribhaṇḍe vā, vitthiṇṇe pana vaṭṭati.
७५७.
757.
दारुआधारके पत्ते, द्वे ठपेतुम्पि वट्टति।
Dāruādhārake patte, dve ṭhapetumpi vaṭṭati;
अयमेव नयो दण्ड-भूमिआधारकेसुपि॥
Ayameva nayo daṇḍa-bhūmiādhārakesupi.
७५८.
758.
तट्टिकायपि चोळे वा, पोत्थके कटसारके।
Taṭṭikāyapi coḷe vā, potthake kaṭasārake;
परिभण्डकतायापि, भूमियं वालुकासु वा॥
Paribhaṇḍakatāyāpi, bhūmiyaṃ vālukāsu vā.
७५९.
759.
तथारूपासु सुद्धासु, ठपेतुं पन वट्टति।
Tathārūpāsu suddhāsu, ṭhapetuṃ pana vaṭṭati;
सरजाय ठपेन्तस्स, दुक्कटं खरभूमिया॥
Sarajāya ṭhapentassa, dukkaṭaṃ kharabhūmiyā.
७६०.
760.
दण्डे वा नागदन्ते वा, लग्गेतुम्पि न वट्टति।
Daṇḍe vā nāgadante vā, laggetumpi na vaṭṭati;
छत्तङ्गमञ्चपीठेसु, ठपेन्तस्स च दुक्कटं॥
Chattaṅgamañcapīṭhesu, ṭhapentassa ca dukkaṭaṃ.
७६१.
761.
अटनीसु हि बन्धित्वा, ओलम्बेतुम्पि वट्टति।
Aṭanīsu hi bandhitvā, olambetumpi vaṭṭati;
बन्धित्वा पन मञ्चस्स, ठपेतुंपरि वट्टति॥
Bandhitvā pana mañcassa, ṭhapetuṃpari vaṭṭati.
७६२.
762.
मञ्चपीठट्टके पत्तं, ठपेतुं पन वट्टति।
Mañcapīṭhaṭṭake pattaṃ, ṭhapetuṃ pana vaṭṭati;
भत्तपूरोपि वा छत्ते, ठपेतुं न च वट्टति॥
Bhattapūropi vā chatte, ṭhapetuṃ na ca vaṭṭati.
तयो भाणवारा निट्ठिता।
Tayo bhāṇavārā niṭṭhitā.
७६३.
763.
कवाटं न पणामेय्य, पत्तहत्थो सचे पन।
Kavāṭaṃ na paṇāmeyya, pattahattho sace pana;
येन केनचि अङ्गेन, पणामेय्यस्स दुक्कटं॥
Yena kenaci aṅgena, paṇāmeyyassa dukkaṭaṃ.
७६४.
764.
न नीहरेय्य पत्तेन, चलकानट्ठिकानि वा।
Na nīhareyya pattena, calakānaṭṭhikāni vā;
उच्छिट्ठमुदकं वापि, नीहरन्तस्स दुक्कटं॥
Ucchiṭṭhamudakaṃ vāpi, nīharantassa dukkaṭaṃ.
७६५.
765.
पत्तं पटिग्गहं कत्वा, धोवितुं हत्थमेव वा।
Pattaṃ paṭiggahaṃ katvā, dhovituṃ hatthameva vā;
मुखतो नीहटं पत्ते, ठपेतुं न च वट्टति॥
Mukhato nīhaṭaṃ patte, ṭhapetuṃ na ca vaṭṭati.
७६६.
766.
अनापत्ति दसाहस्स, अन्तोयेव च यो पन।
Anāpatti dasāhassa, antoyeva ca yo pana;
अधिट्ठेति विकप्पेति, विस्सज्जेति विनस्सति॥
Adhiṭṭheti vikappeti, vissajjeti vinassati.
७६७.
767.
पठमस्स हि पत्तस्स, पठमेन महेसिना।
Paṭhamassa hi pattassa, paṭhamena mahesinā;
समुट्ठानादयो सब्बे, कथिनेन समा मता॥
Samuṭṭhānādayo sabbe, kathinena samā matā.
पठमपत्तकथा।
Paṭhamapattakathā.
७६८.
768.
पञ्चबन्धनऊनस्मिं, पत्ते सति च यो पन।
Pañcabandhanaūnasmiṃ, patte sati ca yo pana;
विञ्ञापेय्य नवं पत्तं, तस्स निस्सग्गियं सिया॥
Viññāpeyya navaṃ pattaṃ, tassa nissaggiyaṃ siyā.
७६९.
769.
बन्धनं एकमुद्दिट्ठं, द्वङ्गुलाय च राजिया।
Bandhanaṃ ekamuddiṭṭhaṃ, dvaṅgulāya ca rājiyā;
बन्धनानि च चत्तारि, तथाट्ठङ्गुलराजिया॥
Bandhanāni ca cattāri, tathāṭṭhaṅgularājiyā.
७७०.
770.
पञ्च वा राजियो यस्स, एका वापि दसङ्गुला।
Pañca vā rājiyo yassa, ekā vāpi dasaṅgulā;
अपत्तो नामयं पत्तो, विञ्ञापेय्य ततो परं॥
Apatto nāmayaṃ patto, viññāpeyya tato paraṃ.
७७१.
771.
अयोपत्तो अनेकेहि, लोहमण्डलकेहि वा।
Ayopatto anekehi, lohamaṇḍalakehi vā;
बद्धो वट्टति मट्ठो चे, अयोचुण्णेन वाणिया॥
Baddho vaṭṭati maṭṭho ce, ayocuṇṇena vāṇiyā.
७७२.
772.
पत्तं सङ्घस्स निस्सट्ठं, तस्स निस्सग्गियं पन।
Pattaṃ saṅghassa nissaṭṭhaṃ, tassa nissaggiyaṃ pana;
अनुकम्पाय तं तस्मिं, अगण्हन्तस्स दुक्कटं॥
Anukampāya taṃ tasmiṃ, agaṇhantassa dukkaṭaṃ.
७७३.
773.
दीयमाने तु पत्तस्मिं, यस्स सो न च रुच्चति।
Dīyamāne tu pattasmiṃ, yassa so na ca ruccati;
अप्पिच्छताय वा पत्तं, तं न गण्हाति वट्टति॥
Appicchatāya vā pattaṃ, taṃ na gaṇhāti vaṭṭati.
७७४.
774.
अपत्तस्स तु भिक्खुस्स।
Apattassa tu bhikkhussa;
न दातब्बोति दीपितो।
Na dātabboti dīpito;
तत्थ यो पत्तपरियन्तो।
Tattha yo pattapariyanto;
सो देय्यो तस्स भिक्खुनो॥
So deyyo tassa bhikkhuno.
७७५.
775.
सचे सो तं जिगुच्छन्तो, अप्पदेसे ठपेति वा।
Sace so taṃ jigucchanto, appadese ṭhapeti vā;
विस्सज्जेति अभोगेन, परिभुञ्जति दुक्कटं॥
Vissajjeti abhogena, paribhuñjati dukkaṭaṃ.
७७६.
776.
नट्ठे भिन्नेपि वा पत्ते, अनापत्ति पकासिता।
Naṭṭhe bhinnepi vā patte, anāpatti pakāsitā;
अत्तनो ञातकादीनं, गण्हतो वा धनेन वा॥
Attano ñātakādīnaṃ, gaṇhato vā dhanena vā.
७७७.
777.
सञ्चरित्तसमुट्ठानं , क्रियं पण्णत्तिवज्जकं।
Sañcarittasamuṭṭhānaṃ , kriyaṃ paṇṇattivajjakaṃ;
कायकम्मं वचीकम्मं, तिचित्तञ्च तिवेदनं॥
Kāyakammaṃ vacīkammaṃ, ticittañca tivedanaṃ.
दुतियपत्तकथा।
Dutiyapattakathā.
७७८.
778.
सप्पिआदिं पुरेभत्तं, भेसज्जं पटिगय्ह हि।
Sappiādiṃ purebhattaṃ, bhesajjaṃ paṭigayha hi;
सामिसम्पि पुरेभत्तं, परिभुञ्जति वट्टति॥
Sāmisampi purebhattaṃ, paribhuñjati vaṭṭati.
७७९.
779.
ततो पट्ठाय सत्ताहं, तं वट्टति निरामिसं।
Tato paṭṭhāya sattāhaṃ, taṃ vaṭṭati nirāmisaṃ;
सत्ताहातिक्कमे तस्स, निस्सग्गियमुदीरितं॥
Sattāhātikkame tassa, nissaggiyamudīritaṃ.
७८०.
780.
पच्छाभत्तम्पि गण्हित्वा, कत्वा सन्निधिकारकं।
Pacchābhattampi gaṇhitvā, katvā sannidhikārakaṃ;
सायतो पन सत्ताहं, वट्टतेव निरामिसं॥
Sāyato pana sattāhaṃ, vaṭṭateva nirāmisaṃ.
७८१.
781.
पुरेभत्तम्पि पच्छा वा, सयमुग्गहितं पन।
Purebhattampi pacchā vā, sayamuggahitaṃ pana;
सरीरभोगे नेतब्बं, सायितुं न च वट्टति॥
Sarīrabhoge netabbaṃ, sāyituṃ na ca vaṭṭati.
७८२.
782.
नवनीतं पुरेभत्तं, भिक्खुना गहितं सचे।
Navanītaṃ purebhattaṃ, bhikkhunā gahitaṃ sace;
तापेत्वानुपसम्पन्नो, देति वट्टति सामिसं॥
Tāpetvānupasampanno, deti vaṭṭati sāmisaṃ.
७८३.
783.
सयं तापेति चे भिक्खु, सत्ताहम्पि निरामिसं।
Sayaṃ tāpeti ce bhikkhu, sattāhampi nirāmisaṃ;
तापनं नवनीतस्स, सामपाको न होति सो॥
Tāpanaṃ navanītassa, sāmapāko na hoti so.
७८४.
784.
पच्छाभत्तं गहेत्वा चे, येन केनचि तापितं।
Pacchābhattaṃ gahetvā ce, yena kenaci tāpitaṃ;
वट्टतेव च तं सप्पि, सत्ताहम्पि निरामिसं॥
Vaṭṭateva ca taṃ sappi, sattāhampi nirāmisaṃ.
७८५.
785.
खीरं दधिं चापि पटिग्गहेत्वा।
Khīraṃ dadhiṃ cāpi paṭiggahetvā;
सयं पुरेभत्तमथो करोति।
Sayaṃ purebhattamatho karoti;
सप्पिं पुरेभत्तकमेव तस्स।
Sappiṃ purebhattakameva tassa;
निरामिसं वट्टति भिक्खुनो तं॥
Nirāmisaṃ vaṭṭati bhikkhuno taṃ.
७८६.
786.
पच्छाभत्तकतो उद्धं, तं न वट्टति सायितुं।
Pacchābhattakato uddhaṃ, taṃ na vaṭṭati sāyituṃ;
सवत्थुकस्स सप्पिस्स, गहितत्ताव भिक्खुनो॥
Savatthukassa sappissa, gahitattāva bhikkhuno.
७८७.
787.
सत्ताहातिक्कमेपिस्स , न दोसो कोचि विज्जति।
Sattāhātikkamepissa , na doso koci vijjati;
‘‘पटिग्गहेत्वा तानी’’ति, वुत्तत्ता हि महेसिना॥
‘‘Paṭiggahetvā tānī’’ti, vuttattā hi mahesinā.
७८८.
788.
यथा कप्पियसप्पिम्हि, निस्सग्गियमुदीरितं।
Yathā kappiyasappimhi, nissaggiyamudīritaṃ;
तथाकप्पियसप्पिम्हि, दुक्कटं परिदीपितं॥
Tathākappiyasappimhi, dukkaṭaṃ paridīpitaṃ.
७८९.
789.
सब्बाकप्पियमंसानं , वज्जेत्वा मंसमेव च।
Sabbākappiyamaṃsānaṃ , vajjetvā maṃsameva ca;
खीरं दधि च सप्पि च, नवनीतञ्च वट्टति॥
Khīraṃ dadhi ca sappi ca, navanītañca vaṭṭati.
७९०.
790.
‘‘येसं कप्पति मंसञ्हि, तेसं सप्पी’’ति किं इदं?
‘‘Yesaṃ kappati maṃsañhi, tesaṃ sappī’’ti kiṃ idaṃ?
पणीतभोजनस्सापि, तथा सत्ताहकालिके॥
Paṇītabhojanassāpi, tathā sattāhakālike.
७९१.
791.
निस्सग्गियस्स वत्थूनं, परिच्छेदनियामनं।
Nissaggiyassa vatthūnaṃ, paricchedaniyāmanaṃ;
न चाकप्पियमंसानं, सप्पिआदि निवारितं॥
Na cākappiyamaṃsānaṃ, sappiādi nivāritaṃ.
७९२.
792.
नवनीतेपि सप्पिम्हि, गहितुग्गहितादिके।
Navanītepi sappimhi, gahituggahitādike;
सब्बो वुत्तनयेनेव, वेदितब्बो विनिच्छयो॥
Sabbo vuttanayeneva, veditabbo vinicchayo.
७९३.
793.
तेलभिक्खाय भिक्खूनं, पविट्ठानं उपासका।
Telabhikkhāya bhikkhūnaṃ, paviṭṭhānaṃ upāsakā;
तेलं वा नवनीतं वा, सप्पिं वा आकिरन्ति हि॥
Telaṃ vā navanītaṃ vā, sappiṃ vā ākiranti hi.
७९४.
794.
भत्तसित्थानि वा तत्थ, तण्डुला वा भवन्ति चे।
Bhattasitthāni vā tattha, taṇḍulā vā bhavanti ce;
आदिच्चपक्कसंसट्ठं, होति सत्ताहकालिकं॥
Ādiccapakkasaṃsaṭṭhaṃ, hoti sattāhakālikaṃ.
७९५.
795.
तिलसासपतेलं वा, मधुकेरण्डतेलकं।
Tilasāsapatelaṃ vā, madhukeraṇḍatelakaṃ;
गहितं तु पुरेभत्तं, सामिसम्पि निरामिसं॥
Gahitaṃ tu purebhattaṃ, sāmisampi nirāmisaṃ.
७९६.
796.
पच्छाभत्तकतो उद्धं, सायितब्बं निरामिसं।
Pacchābhattakato uddhaṃ, sāyitabbaṃ nirāmisaṃ;
सत्ताहातिक्कमे तेसं, वसा निस्सग्गियं सिया॥
Sattāhātikkame tesaṃ, vasā nissaggiyaṃ siyā.
७९७.
797.
एरण्डमधुकट्ठीनि, सासपादीनि चत्तना।
Eraṇḍamadhukaṭṭhīni, sāsapādīni cattanā;
गहेत्वा कततेलम्पि, होति सत्ताहकालिकं॥
Gahetvā katatelampi, hoti sattāhakālikaṃ.
७९८.
798.
यावजीविकवत्थुत्ता, तेसं तिण्णम्पि भिक्खुनो।
Yāvajīvikavatthuttā, tesaṃ tiṇṇampi bhikkhuno;
सवत्थुगहणे तस्स, काचापत्ति न विज्जति॥
Savatthugahaṇe tassa, kācāpatti na vijjati.
७९९.
799.
अत्तना यं कतं तेलं, तं वट्टति निरामिसं।
Attanā yaṃ kataṃ telaṃ, taṃ vaṭṭati nirāmisaṃ;
सत्ताहातिक्कमेनस्स, होति निस्सग्गियं पन॥
Sattāhātikkamenassa, hoti nissaggiyaṃ pana.
८००.
800.
दुक्कटं सासपादीनं, तेलत्थायेव भिक्खुना।
Dukkaṭaṃ sāsapādīnaṃ, telatthāyeva bhikkhunā;
गहेत्वा ठपितानं तु, सत्ताहातिक्कमे सिया॥
Gahetvā ṭhapitānaṃ tu, sattāhātikkame siyā.
८०१.
801.
नाळिकेरकरञ्जानं, तेलं कुरुवकस्स च।
Nāḷikerakarañjānaṃ, telaṃ kuruvakassa ca;
निम्बकोसम्बकानञ्च, तेलं भल्लातकस्स च॥
Nimbakosambakānañca, telaṃ bhallātakassa ca.
८०२.
802.
इच्चेवमादिकं सब्बं, अवुत्तं पाळियं पन।
Iccevamādikaṃ sabbaṃ, avuttaṃ pāḷiyaṃ pana;
गहेत्वा निक्खिपन्तस्स, दुक्कटं समयच्चये॥
Gahetvā nikkhipantassa, dukkaṭaṃ samayaccaye.
८०३.
803.
यावकालिकभेदञ्च , यावजीवकमेव च।
Yāvakālikabhedañca , yāvajīvakameva ca;
विदित्वा सेसमेत्थापि, सप्पिना सदिसो नयो॥
Viditvā sesametthāpi, sappinā sadiso nayo.
८०४.
804.
अच्छमच्छवराहानं, सुसुकागद्रभस्स च।
Acchamacchavarāhānaṃ, susukāgadrabhassa ca;
वसानं पन पञ्चन्नं, तेलं पञ्चविधं भवे॥
Vasānaṃ pana pañcannaṃ, telaṃ pañcavidhaṃ bhave.
८०५.
805.
सब्बमेव वसातेलं, कप्पियाकप्पियस्स च।
Sabbameva vasātelaṃ, kappiyākappiyassa ca;
मनुस्सानं वसातेलं, ठपेत्वा पन वट्टति॥
Manussānaṃ vasātelaṃ, ṭhapetvā pana vaṭṭati.
८०६.
806.
वसं पटिग्गहेत्वान, पुरेभत्तं पनत्तना।
Vasaṃ paṭiggahetvāna, purebhattaṃ panattanā;
पक्कं वट्टति संसट्ठं, सत्ताहम्पि निरामिसं॥
Pakkaṃ vaṭṭati saṃsaṭṭhaṃ, sattāhampi nirāmisaṃ.
८०७.
807.
सचे अनुपसम्पन्नो, कत्वा तं देति वट्टति।
Sace anupasampanno, katvā taṃ deti vaṭṭati;
सामिसम्पि पुरेभत्तं, ततो उद्धं निरामिसं॥
Sāmisampi purebhattaṃ, tato uddhaṃ nirāmisaṃ.
८०८.
808.
पटिग्गहेतुं कातुं वा, पच्छाभत्तं न वट्टति।
Paṭiggahetuṃ kātuṃ vā, pacchābhattaṃ na vaṭṭati;
सेसो वुत्तनयेनेव, वेदितब्बो विभाविना॥
Seso vuttanayeneva, veditabbo vibhāvinā.
८०९.
809.
गहितञ्हि पुरेभत्तं, मधुं मधुकरीकतं।
Gahitañhi purebhattaṃ, madhuṃ madhukarīkataṃ;
वट्टतेव पुरेभत्तं, सामिसम्पि निरामिसं॥
Vaṭṭateva purebhattaṃ, sāmisampi nirāmisaṃ.
८१०.
810.
पच्छाभत्तकतो उद्धं, सत्ताहम्पि निरामिसं।
Pacchābhattakato uddhaṃ, sattāhampi nirāmisaṃ;
सत्ताहातिक्कमे दोसो, वत्थूनं गणनावसा॥
Sattāhātikkame doso, vatthūnaṃ gaṇanāvasā.
८११.
811.
उच्छुम्हा पन निब्बत्तं, पक्कापक्कं घनाघनं।
Ucchumhā pana nibbattaṃ, pakkāpakkaṃ ghanāghanaṃ;
रसादि पन तं सब्बं, ‘‘फाणित’’न्ति पवुच्चति॥
Rasādi pana taṃ sabbaṃ, ‘‘phāṇita’’nti pavuccati.
८१२.
812.
फाणितं तु पुरेभत्तं, गहितं पन वट्टति।
Phāṇitaṃ tu purebhattaṃ, gahitaṃ pana vaṭṭati;
सामिसम्पि पुरेभत्तं, ततो उद्धं निरामिसं॥
Sāmisampi purebhattaṃ, tato uddhaṃ nirāmisaṃ.
८१३.
813.
असंसट्ठेन उच्छुस्स, रसेन कतफाणितं।
Asaṃsaṭṭhena ucchussa, rasena kataphāṇitaṃ;
गहितेन पुरेभत्तं, तदहेव निरामिसं॥
Gahitena purebhattaṃ, tadaheva nirāmisaṃ.
८१४.
814.
उच्छुं पटिग्गहेत्वान, कतेपेस नयो मतो।
Ucchuṃ paṭiggahetvāna, katepesa nayo mato;
पच्छाभत्तकतो उद्धं, तं न वट्टति सायितुं॥
Pacchābhattakato uddhaṃ, taṃ na vaṭṭati sāyituṃ.
८१५.
815.
गहितत्ता सवत्थुस्स, सत्ताहातिक्कमेपि च।
Gahitattā savatthussa, sattāhātikkamepi ca;
होति तस्स अनापत्ति, पच्छाभत्तं कतेपि च॥
Hoti tassa anāpatti, pacchābhattaṃ katepi ca.
८१६.
816.
संसट्ठञ्च पुरेभत्तं, गहितं तमुपासको।
Saṃsaṭṭhañca purebhattaṃ, gahitaṃ tamupāsako;
तदहे देति चे कत्वा, सामिसम्पि च वट्टति॥
Tadahe deti ce katvā, sāmisampi ca vaṭṭati.
८१७.
817.
संसट्ठेन पुरेभत्तं, गहितेन सयंकतं।
Saṃsaṭṭhena purebhattaṃ, gahitena sayaṃkataṃ;
पच्छाभत्तं कतञ्चापि, सत्ताहम्पि निरामिसं॥
Pacchābhattaṃ katañcāpi, sattāhampi nirāmisaṃ.
८१८.
818.
कतं मधुकपुप्फानं, फाणितं सीतवारिना।
Kataṃ madhukapupphānaṃ, phāṇitaṃ sītavārinā;
सामिसम्पि पुरेभत्तं, ततो उद्धं निरामिसं॥
Sāmisampi purebhattaṃ, tato uddhaṃ nirāmisaṃ.
८१९.
819.
सत्ताहातिक्कमेपिस्स, दुक्कटं परिदीपितं।
Sattāhātikkamepissa, dukkaṭaṃ paridīpitaṃ;
पक्खिपित्वा कतं खीरं, होति तं यावकालिकं॥
Pakkhipitvā kataṃ khīraṃ, hoti taṃ yāvakālikaṃ.
८२०.
820.
फलानं पन सब्बेसं, यावकालिकसञ्ञिनं।
Phalānaṃ pana sabbesaṃ, yāvakālikasaññinaṃ;
यावकालिकमिच्चेव, फाणितं परिदीपितं॥
Yāvakālikamicceva, phāṇitaṃ paridīpitaṃ.
८२१.
821.
पच्छाभत्तम्पि भिक्खुस्स, पच्चये सति केवलं।
Pacchābhattampi bhikkhussa, paccaye sati kevalaṃ;
कालिका पन वट्टन्ति, पुरेभत्तं यथासुखं॥
Kālikā pana vaṭṭanti, purebhattaṃ yathāsukhaṃ.
८२२.
822.
लभित्वा पन निस्सट्ठं, तं तु सत्ताहकालिकं।
Labhitvā pana nissaṭṭhaṃ, taṃ tu sattāhakālikaṃ;
अरुआदीनि मक्खेतुं, सायितुं वा न वट्टति॥
Aruādīni makkhetuṃ, sāyituṃ vā na vaṭṭati.
८२३.
823.
अञ्ञस्स पन भिक्खुस्स, कायभोगे च वट्टति।
Aññassa pana bhikkhussa, kāyabhoge ca vaṭṭati;
चजित्वा निरपेक्खोव, लभित्वा पुन सायितुं॥
Cajitvā nirapekkhova, labhitvā puna sāyituṃ.
८२४.
824.
अनापत्ति अधिट्ठेति, विस्सज्जेति विनस्सति।
Anāpatti adhiṭṭheti, vissajjeti vinassati;
अच्छिन्दित्वा च विस्सासं, गण्हतुम्मत्तकादिनो॥
Acchinditvā ca vissāsaṃ, gaṇhatummattakādino.
८२५.
825.
समुट्ठानादयो सब्बे, कथिनेन समा मता।
Samuṭṭhānādayo sabbe, kathinena samā matā;
सदाकथिनचित्तेन, पठमेनेव सत्थुना॥
Sadākathinacittena, paṭhameneva satthunā.
भेसज्जसिक्खापदकथा।
Bhesajjasikkhāpadakathā.
८२६.
826.
मासो सेसोति गिम्हानं, परियेसेय्य साटिकं।
Māso sesoti gimhānaṃ, pariyeseyya sāṭikaṃ;
अद्धमासोव सेसोति, कत्वा परिदहे बुधो॥
Addhamāsova sesoti, katvā paridahe budho.
८२७.
827.
कत्वा पन सतुप्पादं, वस्ससाटिकचीवरं।
Katvā pana satuppādaṃ, vassasāṭikacīvaraṃ;
निप्फादेन्तस्स भिक्खुस्स, समये पिट्ठिसम्मते॥
Nipphādentassa bhikkhussa, samaye piṭṭhisammate.
८२८.
828.
होति निस्सग्गियापत्ति, ञातकाञ्ञातकादिनो।
Hoti nissaggiyāpatti, ñātakāññātakādino;
तेसुयेव च विञ्ञत्तिं, कत्वा निप्फादने तथा॥
Tesuyeva ca viññattiṃ, katvā nipphādane tathā.
८२९.
829.
कत्वा पन सतुप्पादं, समये कुच्छिसञ्ञिते।
Katvā pana satuppādaṃ, samaye kucchisaññite;
निप्फादेन्तस्स भिक्खुस्स, वत्थमञ्ञातकादिनो॥
Nipphādentassa bhikkhussa, vatthamaññātakādino.
८३०.
830.
तस्सादिन्नकपुब्बेसु , वत्तभेदेन दुक्कटं।
Tassādinnakapubbesu , vattabhedena dukkaṭaṃ;
करोतो तत्र विञ्ञत्तिं, निस्सग्गियमुदीरितं॥
Karoto tatra viññattiṃ, nissaggiyamudīritaṃ.
८३१.
831.
ओवस्सापेति चे कायं, नग्गो सतिपि चीवरे।
Ovassāpeti ce kāyaṃ, naggo satipi cīvare;
न्हानस्स परियोसाने, दुक्कटं विवटङ्गणे॥
Nhānassa pariyosāne, dukkaṭaṃ vivaṭaṅgaṇe.
८३२.
832.
ऊनके पन मासस्मिं, अतिरेकोति सञ्ञिनो।
Ūnake pana māsasmiṃ, atirekoti saññino;
तत्थ वेमतिकस्सापि, होति आपत्ति दुक्कटं॥
Tattha vematikassāpi, hoti āpatti dukkaṭaṃ.
८३३.
833.
अच्छिन्नचीवरस्सापि, अनापत्तापदासुपि।
Acchinnacīvarassāpi, anāpattāpadāsupi;
न्हानकोट्ठकवापीसु, न्हायन्तस्स च भिक्खुनो॥
Nhānakoṭṭhakavāpīsu, nhāyantassa ca bhikkhuno.
८३४.
834.
सञ्चरित्तसमुट्ठानं , क्रियं पण्णत्तिवज्जकं।
Sañcarittasamuṭṭhānaṃ , kriyaṃ paṇṇattivajjakaṃ;
कायकम्मं वचीकम्मं, तिचित्तञ्च तिवेदनं॥
Kāyakammaṃ vacīkammaṃ, ticittañca tivedanaṃ.
वस्सिकसाटिककथा।
Vassikasāṭikakathā.
८३५.
835.
सामं तु चीवरं दत्वा, अच्छिन्दन्तस्स तं पुन।
Sāmaṃ tu cīvaraṃ datvā, acchindantassa taṃ puna;
सकसञ्ञाय भिक्खुस्स, तस्स निस्सग्गियं सिया॥
Sakasaññāya bhikkhussa, tassa nissaggiyaṃ siyā.
८३६.
836.
एकायेव पनापत्ति, एकमच्छिन्दतो सिया।
Ekāyeva panāpatti, ekamacchindato siyā;
बहूनि एकबद्धानि, अच्छिन्दन्तस्स वा तथा॥
Bahūni ekabaddhāni, acchindantassa vā tathā.
८३७.
837.
विसुं ठितानि एकेक-माहरापयतो पन।
Visuṃ ṭhitāni ekeka-māharāpayato pana;
वत्थानं गणनायस्स, आपत्तिगणना सिया॥
Vatthānaṃ gaṇanāyassa, āpattigaṇanā siyā.
८३८.
838.
‘‘मया दिन्नानि सब्बानि, आहरा’’ति च भासतो।
‘‘Mayā dinnāni sabbāni, āharā’’ti ca bhāsato;
एकेन वचनेनेव, होन्ति आपत्तियो बहू॥
Ekena vacaneneva, honti āpattiyo bahū.
८३९.
839.
आणापेति सचे अञ्ञं, भिक्खुं गण्हाति चीवरं।
Āṇāpeti sace aññaṃ, bhikkhuṃ gaṇhāti cīvaraṃ;
बहूनि गण्हताणत्तो, एकं पाचित्तियं सिया॥
Bahūni gaṇhatāṇatto, ekaṃ pācittiyaṃ siyā.
८४०.
840.
‘‘मया दिन्नानि सब्बानि, गण्हा’’ति वदतो पन।
‘‘Mayā dinnāni sabbāni, gaṇhā’’ti vadato pana;
एकायस्स च वाचाय, होन्ति आपत्तियो बहू॥
Ekāyassa ca vācāya, honti āpattiyo bahū.
८४१.
841.
‘‘सङ्घाटिमुत्तरासङ्गं, गण्ह गण्हा’’ति भासतो।
‘‘Saṅghāṭimuttarāsaṅgaṃ, gaṇha gaṇhā’’ti bhāsato;
होति वाचाय वाचाय, आणापेन्तस्स दुक्कटं॥
Hoti vācāya vācāya, āṇāpentassa dukkaṭaṃ.
८४२.
842.
विकप्पनुपगं किञ्चि, ठपेत्वा पच्छिमं परं।
Vikappanupagaṃ kiñci, ṭhapetvā pacchimaṃ paraṃ;
अञ्ञं पन परिक्खारं, छिन्दापेन्तस्स दुक्कटं॥
Aññaṃ pana parikkhāraṃ, chindāpentassa dukkaṭaṃ.
८४३.
843.
ठपेत्वा उपसम्पन्नं, अञ्ञेसं चीवरादिकं।
Ṭhapetvā upasampannaṃ, aññesaṃ cīvarādikaṃ;
अच्छिन्दतोपि भिक्खुस्स, होति आपत्ति दुक्कटं॥
Acchindatopi bhikkhussa, hoti āpatti dukkaṭaṃ.
८४४.
844.
एवं अनुपसम्पन्ने, उपसम्पन्नसञ्ञिनो।
Evaṃ anupasampanne, upasampannasaññino;
तत्थ वेमतिकस्सापि, अच्छिन्दन्तस्स दुक्कटं॥
Tattha vematikassāpi, acchindantassa dukkaṭaṃ.
८४५.
845.
सो वा देति सचे तुट्ठो, दुट्ठो विस्सासमेव वा।
So vā deti sace tuṭṭho, duṭṭho vissāsameva vā;
गण्हतोपि अनापत्ति, तथा उम्मत्तकादिनो॥
Gaṇhatopi anāpatti, tathā ummattakādino.
८४६.
846.
अदिन्नादानतुल्याव, समुट्ठानादयो नया।
Adinnādānatulyāva, samuṭṭhānādayo nayā;
अञ्ञत्र वेदनायेत्थ, होति सा दुक्खवेदना॥
Aññatra vedanāyettha, hoti sā dukkhavedanā.
चीवरच्छिन्दनकथा।
Cīvaracchindanakathā.
८४७.
847.
विञ्ञापेत्वा सचे सुत्तं, छब्बिधं सानुलोमिकं।
Viññāpetvā sace suttaṃ, chabbidhaṃ sānulomikaṃ;
चीवरं तन्तवायेहि, वायापेति न वट्टति॥
Cīvaraṃ tantavāyehi, vāyāpeti na vaṭṭati.
८४८.
848.
सामं विञ्ञापितं सुत्तं, अकप्पियमुदीरितं।
Sāmaṃ viññāpitaṃ suttaṃ, akappiyamudīritaṃ;
तन्तवायोपि विञ्ञत्तो, तथा अञ्ञातकादिको॥
Tantavāyopi viññatto, tathā aññātakādiko.
८४९.
849.
विञ्ञत्ततन्तवायेन, सुत्तेनाकप्पियेन च।
Viññattatantavāyena, suttenākappiyena ca;
चीवरं वायापेन्तस्स, निस्सग्गियमुदीरितं॥
Cīvaraṃ vāyāpentassa, nissaggiyamudīritaṃ.
८५०.
850.
विदत्थिमत्ते दीघेन, हत्थमत्ते तिरीयतो।
Vidatthimatte dīghena, hatthamatte tirīyato;
वीते निस्सग्गियं वुत्तं, फलके फलकेपि च॥
Vīte nissaggiyaṃ vuttaṃ, phalake phalakepi ca.
८५१.
851.
तेनेव कप्पियं सुत्तं, वायापेन्तस्स दुक्कटं।
Teneva kappiyaṃ suttaṃ, vāyāpentassa dukkaṭaṃ;
तथेव तन्तवायेन, कप्पियेन अकप्पियं॥
Tatheva tantavāyena, kappiyena akappiyaṃ.
८५२.
852.
एकन्तरिकतो वापि, दीघतो वा तिरीयतो।
Ekantarikato vāpi, dīghato vā tirīyato;
कप्पियाकप्पियेहेव, वीते सुत्तेहि दुक्कटं॥
Kappiyākappiyeheva, vīte suttehi dukkaṭaṃ.
८५३.
853.
कप्पियाकप्पियेहेव, तन्तवायेहि वे कते।
Kappiyākappiyeheva, tantavāyehi ve kate;
कप्पियाकप्पियं सुत्तं, मिस्सेत्वा तस्स दुक्कटं॥
Kappiyākappiyaṃ suttaṃ, missetvā tassa dukkaṭaṃ.
८५४.
854.
सचे अकप्पियं सुत्तं, वारेनेव विनन्ति ते।
Sace akappiyaṃ suttaṃ, vāreneva vinanti te;
दस्सेत्वाव परिच्छेदं, अकप्पियविते पन॥
Dassetvāva paricchedaṃ, akappiyavite pana.
८५५.
855.
पाचित्तियं पमाणस्मिं, तदूने दुक्कटं सिया।
Pācittiyaṃ pamāṇasmiṃ, tadūne dukkaṭaṃ siyā;
इतरेन विते वत्थे, उभयत्थेव दुक्कटं॥
Itarena vite vatthe, ubhayattheva dukkaṭaṃ.
८५६.
856.
द्वेपि वेमं गहेत्वा वा, एकतो वा विनन्ति चे।
Dvepi vemaṃ gahetvā vā, ekato vā vinanti ce;
फलके फलके तस्स, दुक्कटं परिदीपितं॥
Phalake phalake tassa, dukkaṭaṃ paridīpitaṃ.
८५७.
857.
एतेनेव उपायेन, भेदे सब्बत्थ साधुकं।
Eteneva upāyena, bhede sabbattha sādhukaṃ;
आपत्तिभेदो विञ्ञेय्यो, विञ्ञुना विनयञ्ञुना॥
Āpattibhedo viññeyyo, viññunā vinayaññunā.
८५८.
858.
कप्पियो तन्तवायोपि, सचे सुत्तम्पि कप्पियं।
Kappiyo tantavāyopi, sace suttampi kappiyaṃ;
चीवरं वायापेन्तस्स, अनापत्ति पकासिता॥
Cīvaraṃ vāyāpentassa, anāpatti pakāsitā.
८५९.
859.
अनापत्ति परिस्सावे, आयोगे अंसबद्धके।
Anāpatti parissāve, āyoge aṃsabaddhake;
समुट्ठानादयो सब्बे, सञ्चरित्तसमा मता॥
Samuṭṭhānādayo sabbe, sañcarittasamā matā.
सुत्तविञ्ञत्तिकथा।
Suttaviññattikathā.
८६०.
860.
अप्पवारितञातीनं, तन्तवाये समेच्च चे।
Appavāritañātīnaṃ, tantavāye samecca ce;
विकप्पं चीवरे भिक्खु, आपज्जति न वट्टति॥
Vikappaṃ cīvare bhikkhu, āpajjati na vaṭṭati.
८६१.
861.
दीघायतप्पितत्थाय, सुत्तवड्ढनके कते।
Dīghāyatappitatthāya, suttavaḍḍhanake kate;
भिक्खु निस्सग्गियापत्तिं, आपज्जति न संसयो॥
Bhikkhu nissaggiyāpattiṃ, āpajjati na saṃsayo.
८६२.
862.
भिक्खुनो ञातकादीनं, तन्तवायेसु अत्तनो।
Bhikkhuno ñātakādīnaṃ, tantavāyesu attano;
धनेनञ्ञस्स चत्थाय, अनापत्तिं विनिद्दिसे॥
Dhanenaññassa catthāya, anāpattiṃ viniddise.
८६३.
863.
वायापेन्तस्स अप्पग्घं, महग्घं कत्तुकामिनो।
Vāyāpentassa appagghaṃ, mahagghaṃ kattukāmino;
तथा उम्मत्तकादीनं, सेसं वुत्तमनन्तरे॥
Tathā ummattakādīnaṃ, sesaṃ vuttamanantare.
पेसकारकथा।
Pesakārakathā.
८६४.
864.
वस्संवुट्ठे यमुद्दिस्स, भिक्खू दीयति चीवरं।
Vassaṃvuṭṭhe yamuddissa, bhikkhū dīyati cīvaraṃ;
पवारणाय पुब्बेव, तं होतच्चेकचीवरं॥
Pavāraṇāya pubbeva, taṃ hotaccekacīvaraṃ.
८६५.
865.
पुरे पवारणायेव, भाजेत्वा यदि गय्हति।
Pure pavāraṇāyeva, bhājetvā yadi gayhati;
वस्सच्छेदो न कातब्बो, सङ्घिकं तं करोति चे॥
Vassacchedo na kātabbo, saṅghikaṃ taṃ karoti ce.
८६६.
866.
अनापत्ति अधिट्ठेति, अन्तोसमयमेव तं।
Anāpatti adhiṭṭheti, antosamayameva taṃ;
विस्सज्जेति विकप्पेति, विनस्सति च डय्हति॥
Vissajjeti vikappeti, vinassati ca ḍayhati.
८६७.
867.
तस्सच्चायिकवत्थस्स, कथिने तु अनत्थते।
Tassaccāyikavatthassa, kathine tu anatthate;
परिहारेकमासोव, दसाहपरमो मतो॥
Parihārekamāsova, dasāhaparamo mato.
८६८.
868.
अत्थते कथिने तस्स, पञ्च मासा पकासिता।
Atthate kathine tassa, pañca māsā pakāsitā;
परिहारो मुनिन्देन, दसाहपरमा पन॥
Parihāro munindena, dasāhaparamā pana.
८६९.
869.
समुट्ठानादयो सब्बे, कथिनेन समा मता।
Samuṭṭhānādayo sabbe, kathinena samā matā;
पठमेनाक्रियाचित्तं, तिचित्तञ्च तिवेदनं॥
Paṭhamenākriyācittaṃ, ticittañca tivedanaṃ.
अच्चेकचीवरकथा।
Accekacīvarakathā.
८७०.
870.
वसित्वा पन चे भिक्खु, पुब्बकत्तिकपुण्णमं।
Vasitvā pana ce bhikkhu, pubbakattikapuṇṇamaṃ;
ठपेत्वा चीवरं गामे, पच्चये सति तादिसे॥
Ṭhapetvā cīvaraṃ gāme, paccaye sati tādise.
८७१.
871.
छारत्तपरमं तेन, वसितब्बं विना ततो।
Chārattaparamaṃ tena, vasitabbaṃ vinā tato;
उत्तरिं वसतो दोसो, विना सङ्घस्स सम्मुतिं॥
Uttariṃ vasato doso, vinā saṅghassa sammutiṃ.
८७२.
872.
कत्तिकेयेव मासस्मिं, पठमाय पवारितो।
Kattikeyeva māsasmiṃ, paṭhamāya pavārito;
पच्छिमेन पमाणेन, युत्ते सासङ्कसम्मते॥
Pacchimena pamāṇena, yutte sāsaṅkasammate.
८७३.
873.
सेनासने वसन्तोव, ठपेतुं एकचीवरं।
Senāsane vasantova, ṭhapetuṃ ekacīvaraṃ;
चतुरङ्गसमायोगे, लभतीति पकासितो॥
Caturaṅgasamāyoge, labhatīti pakāsito.
८७४.
874.
यं गामं गोचरं कत्वा, भिक्खु आरञ्ञके वसे।
Yaṃ gāmaṃ gocaraṃ katvā, bhikkhu āraññake vase;
तस्मिं गामे ठपेतुं तं, मासमेकं तु वट्टति॥
Tasmiṃ gāme ṭhapetuṃ taṃ, māsamekaṃ tu vaṭṭati.
८७५.
875.
अञ्ञत्थेव वसन्तस्स, छारत्तपरमं मतं।
Aññattheva vasantassa, chārattaparamaṃ mataṃ;
अयमस्स अधिप्पायो, पटिच्छन्नो पकासितो॥
Ayamassa adhippāyo, paṭicchanno pakāsito.
८७६.
876.
सेनासनमथागन्त्वा, सत्तमं अरुणं पन।
Senāsanamathāgantvā, sattamaṃ aruṇaṃ pana;
उट्ठापेतुं विदूरत्ता, असक्कोन्तस्स भिक्खुनो॥
Uṭṭhāpetuṃ vidūrattā, asakkontassa bhikkhuno.
८७७.
877.
गामसीमम्पि वा गन्त्वा, वसित्वा यत्थ कत्थचि।
Gāmasīmampi vā gantvā, vasitvā yattha katthaci;
चीवरस्स पवत्तिं सो, ञत्वा गच्छति वट्टति॥
Cīvarassa pavattiṃ so, ñatvā gacchati vaṭṭati.
८७८.
878.
एवञ्चापि असक्कोन्तो, ञत्वा तत्थेव पण्डितो।
Evañcāpi asakkonto, ñatvā tattheva paṇḍito;
खिप्पं पच्चुद्धरे ठाने, अतिरेके हि तिट्ठति॥
Khippaṃ paccuddhare ṭhāne, atireke hi tiṭṭhati.
८७९.
879.
विस्सज्जेति अनापत्ति, विनस्सति च डय्हति।
Vissajjeti anāpatti, vinassati ca ḍayhati;
अच्छिन्दने च विस्सासे, भिक्खुसम्मुतियापि वा॥
Acchindane ca vissāse, bhikkhusammutiyāpi vā.
८८०.
880.
समुट्ठानादयो सब्बे, कथिनेन समा मता।
Samuṭṭhānādayo sabbe, kathinena samā matā;
दुतियेन, मुनिन्देन, तेन सासङ्कसम्मते॥
Dutiyena, munindena, tena sāsaṅkasammate.
सासङ्ककथा।
Sāsaṅkakathā.
८८१.
881.
जानं परिणतं लाभं, भिक्खुसङ्घस्स यो पन।
Jānaṃ pariṇataṃ lābhaṃ, bhikkhusaṅghassa yo pana;
अत्तनो परिणामेय्य, तस्स निस्सग्गियं सिया॥
Attano pariṇāmeyya, tassa nissaggiyaṃ siyā.
८८२.
882.
सचे ‘‘अञ्ञस्स देही’’ति, परिणामेति भिक्खुनो।
Sace ‘‘aññassa dehī’’ti, pariṇāmeti bhikkhuno;
सुद्धिकं सुद्धचित्तेन, पाचित्तियमुदीरितं॥
Suddhikaṃ suddhacittena, pācittiyamudīritaṃ.
८८३.
883.
चीवरं वा परस्सेक-मेकं वा पन अत्तनो।
Cīvaraṃ vā parasseka-mekaṃ vā pana attano;
परिणामेय्य चे सद्धिं, द्वे पाचित्तियो सियुं॥
Pariṇāmeyya ce saddhiṃ, dve pācittiyo siyuṃ.
८८४.
884.
सङ्घस्स पन यं दिन्नं, तं गहेतुं न वट्टति।
Saṅghassa pana yaṃ dinnaṃ, taṃ gahetuṃ na vaṭṭati;
सङ्घस्सेव पदातब्बो, अदेन्तस्स पराजयो॥
Saṅghasseva padātabbo, adentassa parājayo.
८८५.
885.
चेतियस्स च सङ्घस्स, पुग्गलस्सपि वा पन।
Cetiyassa ca saṅghassa, puggalassapi vā pana;
अञ्ञस्स पोणमञ्ञस्स, परिणामेय्य दुक्कटं॥
Aññassa poṇamaññassa, pariṇāmeyya dukkaṭaṃ.
८८६.
886.
यो पनन्तमसो भिक्खु, सुनखस्सपि ओणतं।
Yo panantamaso bhikkhu, sunakhassapi oṇataṃ;
सुनखस्स पनञ्ञस्स, परिणामेय्य दुक्कटं॥
Sunakhassa panaññassa, pariṇāmeyya dukkaṭaṃ.
८८७.
887.
इदञ्हि तिसमुट्ठानं, क्रियं सञ्ञाविमोक्खकं।
Idañhi tisamuṭṭhānaṃ, kriyaṃ saññāvimokkhakaṃ;
कायकम्मं वचीकम्मं, तिचित्तञ्च तिवेदनं॥
Kāyakammaṃ vacīkammaṃ, ticittañca tivedanaṃ.
परिणतकथा।
Pariṇatakathā.
पत्तवग्गो ततियो।
Pattavaggo tatiyo.
८८८.
888.
तेनेकवत्थुग्गतरङ्गमालं।
Tenekavatthuggataraṅgamālaṃ;
सीलन्तमापत्तिविपत्तिगाहं।
Sīlantamāpattivipattigāhaṃ;
तरन्ति पञ्ञत्तिमहासमुद्दं।
Taranti paññattimahāsamuddaṃ;
विनिच्छयं ये पनिमं तरन्ति॥
Vinicchayaṃ ye panimaṃ taranti.
इति विनयविनिच्छये निस्सग्गियकथा निट्ठिता।
Iti vinayavinicchaye nissaggiyakathā niṭṭhitā.
