| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
நிஸ்ஸக்³கி³யகதா²வண்ணனா
Nissaggiyakathāvaṇṇanā
2094-5. ஏவங் ஸத்தரஸஸங்கா⁴தி³ஸேஸே த³ஸ்ஸெத்வா இதா³னி தத³னந்தரானி நிஸ்ஸக்³கி³யானி த³ஸ்ஸேதுமாஹ ‘‘அதி⁴ட்டா²னுபக³ங் பத்த’’ந்திஆதி³. ‘‘அதி⁴ட்டா²னுபக³ங் பத்த’’ந்தி இமினா பதே³ன கேனசி காரணேன அனதி⁴ட்டா²னுபகே³ பத்தே அனாபத்திபா⁴வங் தீ³பேதி. ‘‘தஸ்ஸா’’தி த-ஸத்³தா³பெக்கா²ய பி⁴க்கு²னீதி எத்த² ‘‘யா’’தி லப்³ப⁴தி. பத்தஸன்னிதி⁴காரணாதி அனதி⁴ட்டா²ய, அவிகப்பெத்வா ஏகரத்தம்பி பத்தஸ்ஸ நிக்கி²த்தகாரணா.
2094-5. Evaṃ sattarasasaṅghādisese dassetvā idāni tadanantarāni nissaggiyāni dassetumāha ‘‘adhiṭṭhānupagaṃ patta’’ntiādi. ‘‘Adhiṭṭhānupagaṃ patta’’nti iminā padena kenaci kāraṇena anadhiṭṭhānupage patte anāpattibhāvaṃ dīpeti. ‘‘Tassā’’ti ta-saddāpekkhāya bhikkhunīti ettha ‘‘yā’’ti labbhati. Pattasannidhikāraṇāti anadhiṭṭhāya, avikappetvā ekarattampi pattassa nikkhittakāraṇā.
2096. இத⁴ இமஸ்மிங் ஸிக்கா²பதே³ ஸேஸோ ஸப்³போ³ வினிச்ச²யோ கதா²மக்³கோ³தி யோஜனா, அவஸேஸஸப்³ப³வினிச்ச²யகதா²மக்³கோ³தி அத்தோ². பத்தஸிக்கா²பதே³தி மஹாவிப⁴ங்க³பட²மபத்தஸிக்கா²பதே³.
2096.Idha imasmiṃ sikkhāpade seso sabbo vinicchayo kathāmaggoti yojanā, avasesasabbavinicchayakathāmaggoti attho. Pattasikkhāpadeti mahāvibhaṅgapaṭhamapattasikkhāpade.
2097. விஸேஸோவ விஸேஸதா.
2097. Visesova visesatā.
பட²மங்.
Paṭhamaṃ.
2098. அகாலேதி ‘‘அனத்த²தகதி²னே விஹாரே ஏகாத³ஸ மாஸா, அத்த²தகதி²னே விஹாரே ஸத்த மாஸா’’தி (பாசி॰ 740 அத்த²தோ ஸமானங்) ஏவங் வுத்தே அகாலே. விகப்பந்தரங் த³ஸ்ஸேதுமாஹ ‘‘தி³ன்னங் காலேபி கேனசீ’’திஆதி³. வுத்தவிபரியாயேன காலனியமோ வேதி³தப்³போ³. கேனசி அகாலே யங் சீவரங் தி³ன்னங், காலேபி யங் சீவரங் ஆதி³ஸ்ஸ தி³ன்னங், தங் அகாலசீவரங் நாமாதி யோஜனா. ஆதி³ஸ்ஸ தா³னப்பகாரங் த³ஸ்ஸேதுமாஹ ‘‘ஸம்பத்தா பா⁴ஜெந்தூ’’தி. நியாமிதந்தி ‘‘ஸம்பத்தா பா⁴ஜெந்தூ’’தி ஏவங் வத்வா தி³ன்னஞ்ச ‘‘இத³ங் க³ணஸ்ஸ, இத³ங் துய்ஹங் த³ம்மீ’’தி வத்வா வா தா³துகாமதாய பாத³மூலே ட²பெத்வா வா தி³ன்னஞ்ச ஆதி³ஸ்ஸ தி³ன்னங் நாமாதி அத்தோ². யதா²ஹ ‘‘ஸம்பத்தா பா⁴ஜெந்தூ’தி வத்வா வா ‘இத³ங் க³ணஸ்ஸ, இத³ங் தும்ஹாகங் த³ம்மீ’தி வத்வா வா தா³துகம்யதாய பாத³மூலே ட²பெத்வா வா தி³ன்னம்பி ஆதி³ஸ்ஸ தி³ன்னங் நாம ஹோதீ’’தி (பாசி॰ அட்ட²॰ 740).
2098.Akāleti ‘‘anatthatakathine vihāre ekādasa māsā, atthatakathine vihāre satta māsā’’ti (pāci. 740 atthato samānaṃ) evaṃ vutte akāle. Vikappantaraṃ dassetumāha ‘‘dinnaṃ kālepi kenacī’’tiādi. Vuttavipariyāyena kālaniyamo veditabbo. Kenaci akāle yaṃ cīvaraṃ dinnaṃ, kālepi yaṃ cīvaraṃ ādissa dinnaṃ, taṃ akālacīvaraṃ nāmāti yojanā. Ādissa dānappakāraṃ dassetumāha ‘‘sampattā bhājentū’’ti. Niyāmitanti ‘‘sampattā bhājentū’’ti evaṃ vatvā dinnañca ‘‘idaṃ gaṇassa, idaṃ tuyhaṃ dammī’’ti vatvā vā dātukāmatāya pādamūle ṭhapetvā vā dinnañca ādissa dinnaṃ nāmāti attho. Yathāha ‘‘sampattā bhājentū’ti vatvā vā ‘idaṃ gaṇassa, idaṃ tumhākaṃ dammī’ti vatvā vā dātukamyatāya pādamūle ṭhapetvā vā dinnampi ādissa dinnaṃ nāma hotī’’ti (pāci. aṭṭha. 740).
2099. அகாலசீவரந்தி வுத்தப்பகாரங் அகாலசீவரங்.
2099.Akālacīvaranti vuttappakāraṃ akālacīvaraṃ.
2100. அத்தனா படிலத்³த⁴ந்தி ததோ யங் சீவரங் அத்தனா வஸ்ஸக்³கே³ன படிலத்³த⁴ங். நிஸ்ஸஜ்ஜித்வா படிலத்³த⁴காலே கத்தப்³ப³விதி⁴ங் த³ஸ்ஸேதுமாஹ ‘‘லபி⁴த்வா…பே॰… நியோஜயே’’தி. யதா²தா³னே நியோஜயேதி யதா² தா³யகேன தி³ன்னங், ததா² உபனேதப்³ப³ங், அகாலசீவரபக்கே²யேவ ட²பேதப்³ப³ந்தி வுத்தங் ஹோதி.
2100.Attanā paṭiladdhanti tato yaṃ cīvaraṃ attanā vassaggena paṭiladdhaṃ. Nissajjitvā paṭiladdhakāle kattabbavidhiṃ dassetumāha ‘‘labhitvā…pe… niyojaye’’ti. Yathādāne niyojayeti yathā dāyakena dinnaṃ, tathā upanetabbaṃ, akālacīvarapakkheyeva ṭhapetabbanti vuttaṃ hoti.
2101. தஸ்ஸாதி ‘‘யதா²தா³னே நியோஜயே’’தி வசனஸ்ஸ. வினயகம்மங் கத்வா படிலத்³த⁴ம்பி தங் புன ஸேவிதுங் ந ச வட்டதீதி அயமதி⁴ப்பாயோதி யோஜனா.
2101.Tassāti ‘‘yathādāne niyojaye’’ti vacanassa. Vinayakammaṃ katvā paṭiladdhampi taṃ puna sevituṃ na ca vaṭṭatīti ayamadhippāyoti yojanā.
2102. காலசீவரே அகாலவத்த²ஸஞ்ஞாய து³க்கடந்தி யோஜனா. உப⁴யத்த²பீதி அகாலசீவரேபி காலசீவரேபி. வேமதிகாய ததா² து³க்கடந்தி யோஜனா.
2102. Kālacīvare akālavatthasaññāya dukkaṭanti yojanā. Ubhayatthapīti akālacīvarepi kālacīvarepi. Vematikāya tathā dukkaṭanti yojanā.
2103. உப⁴யத்த²பி சீவரே காலசீவரே ச அகாலசீவரே சாதி உப⁴யசீவரேபி காலசீவரஸஞ்ஞாய பா⁴ஜாபெந்தியா நதோ³ஸோதி யோஜனா. ஸசித்தகஸமுட்டா²னத்தயங் ஸந்தா⁴யாஹ ‘‘திஸமுட்டா²னதா’’தி.
2103.Ubhayatthapicīvare kālacīvare ca akālacīvare cāti ubhayacīvarepi kālacīvarasaññāya bhājāpentiyā nadosoti yojanā. Sacittakasamuṭṭhānattayaṃ sandhāyāha ‘‘tisamuṭṭhānatā’’ti.
து³தியங்.
Dutiyaṃ.
2104. ஸசே ஸயங் அச்சி²ந்த³தி அஞ்ஞாய பி⁴க்கு²னியா ஸத்³தி⁴ங் சீவரங் பரிவத்தெத்வா பச்சா² ‘‘துய்ஹங் சீவரங் த்வமேவ க³ண்ஹ, மய்ஹங் சீவரங் தே³ஹீ’’தி ஏவங் யதி³ ஸயங் அச்சி²ந்த³தி. எத்த² ‘‘ஸகஸஞ்ஞாயா’’தி ஸேஸோ. ஸகஸஞ்ஞாய க³ஹிதத்தா பாசித்தியங், து³க்கடஞ்ச வுத்தங், இதரதா² ப⁴ண்ட³க்³கே⁴ன காரேதப்³போ³.
2104.Sace sayaṃ acchindati aññāya bhikkhuniyā saddhiṃ cīvaraṃ parivattetvā pacchā ‘‘tuyhaṃ cīvaraṃ tvameva gaṇha, mayhaṃ cīvaraṃ dehī’’ti evaṃ yadi sayaṃ acchindati. Ettha ‘‘sakasaññāyā’’ti seso. Sakasaññāya gahitattā pācittiyaṃ, dukkaṭañca vuttaṃ, itarathā bhaṇḍagghena kāretabbo.
2105. இதரேஸூதி அப³ந்த⁴னஞ்ச ஆணத்திப³ஹுத்தஞ்ச ஸங்க³ண்ஹாதி. தேனாஹ ‘‘வத்தூ²னங் பயோக³ஸ்ஸ வஸா ஸியா’’தி.
2105.Itaresūti abandhanañca āṇattibahuttañca saṅgaṇhāti. Tenāha ‘‘vatthūnaṃ payogassa vasā siyā’’ti.
2106. ‘‘திகபாசித்தீ’’தி இத³மபெக்கி²த்வா ‘‘உத்³தி³ட்டா²’’தி ஸம்ப³ந்த⁴னீயங், உபஸம்பன்னாய உபஸம்பன்னஸஞ்ஞா, வேமதிகா, அனுபஸம்பன்னஸஞ்ஞாதி ஏதாஸங் வஸேன திகபாசித்தி வுத்தாதி அத்தோ². அஞ்ஞஸ்மிங் பரிக்கா²ரேதி உபஸம்பன்னானுபஸம்பன்னானங் அஞ்ஞஸ்மிங் பரிக்கா²ரே. இதரிஸ்ஸாதி அனுபஸம்பன்னாய. திகது³க்கடந்தி அனுபஸம்பன்னாய உபஸம்பன்னஸஞ்ஞாவேமதிகாஅனுபஸம்பன்னஸஞ்ஞானங் வஸேன திகது³க்கடங் உத்³தி³ட்ட²ங்.
2106.‘‘Tikapācittī’’ti idamapekkhitvā ‘‘uddiṭṭhā’’ti sambandhanīyaṃ, upasampannāya upasampannasaññā, vematikā, anupasampannasaññāti etāsaṃ vasena tikapācitti vuttāti attho. Aññasmiṃ parikkhāreti upasampannānupasampannānaṃ aññasmiṃ parikkhāre. Itarissāti anupasampannāya. Tikadukkaṭanti anupasampannāya upasampannasaññāvematikāanupasampannasaññānaṃ vasena tikadukkaṭaṃ uddiṭṭhaṃ.
2107. தாய வா தீ³யமானங் தாய அஞ்ஞாய பி⁴க்கு²னியா து³ட்டா²ய வா துட்டா²ய வா தீ³யமானங் க³ண்ஹந்தியா, தஸ்ஸா விஸ்ஸாஸமேவ வா க³ண்ஹந்தியா அனாபத்தீதி யோஜனா. ‘‘திஸமுட்டா²னதா மதா’’தி இத³ங் வுத்தத்த²மேவ.
2107.Tāya vā dīyamānaṃ tāya aññāya bhikkhuniyā duṭṭhāya vā tuṭṭhāya vā dīyamānaṃ gaṇhantiyā, tassā vissāsameva vā gaṇhantiyā anāpattīti yojanā. ‘‘Tisamuṭṭhānatā matā’’ti idaṃ vuttatthameva.
ததியங்.
Tatiyaṃ.
2108. யா பன பி⁴க்கு²னீ ‘‘கிங் தே, அய்யே, அபா²ஸு, கிங் ஆஹரீயதூ’’தி வுத்தா அஞ்ஞங் விஞ்ஞாபெத்வா தங் ஆஹடங் படிக்கி²பித்வா தஞ்ச அஞ்ஞஞ்ச க³ண்ஹிதுகாமா ஸசே அஞ்ஞங் விஞ்ஞாபேதி, தஸ்ஸா விஞ்ஞத்திது³க்கடங், லாபா⁴ நிஸ்ஸக்³கி³யங் ஸியாதி ஸாதி⁴ப்பாயயோஜனா. விஞ்ஞத்தியா து³க்கடங் விஞ்ஞத்திது³க்கடங்.
2108. Yā pana bhikkhunī ‘‘kiṃ te, ayye, aphāsu, kiṃ āharīyatū’’ti vuttā aññaṃ viññāpetvā taṃ āhaṭaṃ paṭikkhipitvā tañca aññañca gaṇhitukāmā sace aññaṃ viññāpeti, tassā viññattidukkaṭaṃ, lābhā nissaggiyaṃ siyāti sādhippāyayojanā. Viññattiyā dukkaṭaṃ viññattidukkaṭaṃ.
2109-11. திகபாசித்தியங் வுத்தந்தி ‘‘அஞ்ஞே அஞ்ஞஸஞ்ஞா, அஞ்ஞே வேமதிகா, அஞ்ஞே அனஞ்ஞஸஞ்ஞா அஞ்ஞங் விஞ்ஞாபெத்வா அஞ்ஞங் விஞ்ஞாபேதி, நிஸ்ஸக்³கி³யங் பாசித்திய’’ந்தி (பாசி॰ 751) திகபாசித்தியங் வுத்தங். அனஞ்ஞே த்³விகது³க்கடந்தி அனஞ்ஞே அஞ்ஞஸஞ்ஞாய, வேமதிகாய ச வஸேன த்³விகது³க்கடங். ‘‘அனஞ்ஞேனஞ்ஞஸஞ்ஞாயா’’திஆதி³னா அனாபத்திவிஸயோ த³ஸ்ஸிதோ. ‘‘அனஞ்ஞே அனஞ்ஞஸஞ்ஞாயா’’தி பத³ச்சே²தோ³. அனஞ்ஞே அனஞ்ஞஸஞ்ஞாய விஞ்ஞாபெந்தியா அனாபத்தி. தஸ்மிங் பட²மவிஞ்ஞாபிதே அப்பஹொந்தே வா தஞ்ஞேவ வா விஞ்ஞாபெந்தியா அனாபத்தி. அஞ்ஞேனபி அத்தே² ஸதி தேன ஸத்³தி⁴ங் அஞ்ஞங் விஞ்ஞாபெந்தியா அனாபத்தி. இத³ங் வுத்தங் ஹோதி – ஸசே பட²மங் ஸப்பி விஞ்ஞத்தங், ‘‘ஆமகமங்ஸங் பசிதப்³ப³’’ந்தி ச வேஜ்ஜேன வுத்தத்தா தேலேன அத்தோ² ஹோதி, ததோ ‘‘தேலேனாபி மே அத்தோ²’’தி ஏவங் அஞ்ஞஞ்ச விஞ்ஞாபேதீதி. ஆனிஸங்ஸஞ்ச த³ஸ்ஸெத்வா ததோ அஞ்ஞங் விஞ்ஞாபெந்தியாபி அனாபத்தீதி ஞாதப்³ப³ந்தி யோஜனா. இத³ங் வுத்தங் ஹோதி – ஸசே கஹாபணஸ்ஸ ஸப்பி ஆப⁴தங் ஹோதி, இமினா மூலேன தி³கு³ணங் தேலங் லப்³ப⁴தி, தேலேனாபி ச இத³ங் கிச்சங் நிப்பஜ்ஜதி, தஸ்மா தேலமாஹராதி ஏவங் ஆனிஸங்ஸங் த³ஸ்ஸெத்வா விஞ்ஞாபேதீதி.
2109-11.Tikapācittiyaṃ vuttanti ‘‘aññe aññasaññā, aññe vematikā, aññe anaññasaññā aññaṃ viññāpetvā aññaṃ viññāpeti, nissaggiyaṃ pācittiya’’nti (pāci. 751) tikapācittiyaṃ vuttaṃ. Anaññe dvikadukkaṭanti anaññe aññasaññāya, vematikāya ca vasena dvikadukkaṭaṃ. ‘‘Anaññenaññasaññāyā’’tiādinā anāpattivisayo dassito. ‘‘Anaññe anaññasaññāyā’’ti padacchedo. Anaññe anaññasaññāya viññāpentiyā anāpatti. Tasmiṃ paṭhamaviññāpite appahonte vā taññeva vā viññāpentiyā anāpatti. Aññenapi atthe sati tena saddhiṃ aññaṃ viññāpentiyā anāpatti. Idaṃ vuttaṃ hoti – sace paṭhamaṃ sappi viññattaṃ, ‘‘āmakamaṃsaṃ pacitabba’’nti ca vejjena vuttattā telena attho hoti, tato ‘‘telenāpi me attho’’ti evaṃ aññañca viññāpetīti. Ānisaṃsañca dassetvā tato aññaṃ viññāpentiyāpi anāpattīti ñātabbanti yojanā. Idaṃ vuttaṃ hoti – sace kahāpaṇassa sappi ābhataṃ hoti, iminā mūlena diguṇaṃ telaṃ labbhati, telenāpi ca idaṃ kiccaṃ nippajjati, tasmā telamāharāti evaṃ ānisaṃsaṃ dassetvā viññāpetīti.
சதுத்த²ங்.
Catutthaṃ.
2112-3. புப்³ப³ங் அஞ்ஞங் சேதாபெத்வாதி யோஜனா, அத்தனோ கப்பியப⁴ண்டே³ன ‘‘இத³ங் நாம ஆஹரா’’தி புப்³ப³ங் அஞ்ஞங் பரிவத்தாபெத்வாதி அத்தோ². ஏவந்தி எத்த² ‘‘வுத்தே’’தி ஸேஸோ. த⁴னேன நிப்³ப³த்தங் த⁴ஞ்ஞங், அத்தனோ த⁴னேன நிப்பா²தி³தத்தா தேலாதி³ இத⁴ ‘‘த⁴ஞ்ஞ’’ந்தி அதி⁴ப்பேதங், ந வீஹாதி³. ஏவங் வுத்தே மய்ஹங் அஞ்ஞங் த⁴ஞ்ஞங் ஆனெத்வா தே³தி இதி ஸஞ்ஞாய பச்சா² அஞ்ஞங் சேதாபெய்யாதி யோஜனா, ந மே இமினா அத்தோ², அஞ்ஞங் ஆஹராதி வுத்தே இத³ஞ்ச த³த்வா அஞ்ஞஞ்ச ஆஹரித்வா தே³தீதி ஸஞ்ஞாய ‘‘ந மே இத³ங் ருச்சதி, அஞ்ஞங் ஆஹரா’’தி பச்சா² அஞ்ஞங் பரிவத்தாபெய்யாதி அத்தோ². சேதாபனபயோகே³னாதி ஆணத்தாய சேதாபனவஸேன. மூலட்டா²யாதி ஆணாபிகாய. தேன ச அஞ்ஞேன வா மூலேன ஆப⁴தங் ஹோது, தஸ்ஸ லாபே⁴ நிஸ்ஸக்³கி³யங் ஹோதீதி யோஜனா.
2112-3. Pubbaṃ aññaṃ cetāpetvāti yojanā, attano kappiyabhaṇḍena ‘‘idaṃ nāma āharā’’ti pubbaṃ aññaṃ parivattāpetvāti attho. Evanti ettha ‘‘vutte’’ti seso. Dhanena nibbattaṃ dhaññaṃ, attano dhanena nipphāditattā telādi idha ‘‘dhañña’’nti adhippetaṃ, na vīhādi. Evaṃ vutte mayhaṃ aññaṃ dhaññaṃ ānetvā deti iti saññāya pacchā aññaṃ cetāpeyyāti yojanā, na me iminā attho, aññaṃ āharāti vutte idañca datvā aññañca āharitvā detīti saññāya ‘‘na me idaṃ ruccati, aññaṃ āharā’’ti pacchā aññaṃ parivattāpeyyāti attho. Cetāpanapayogenāti āṇattāya cetāpanavasena. Mūlaṭṭhāyāti āṇāpikāya. Tena ca aññena vā mūlena ābhataṃ hotu, tassa lābhe nissaggiyaṃ hotīti yojanā.
2114. ஸேஸந்தி திகபாசித்தியாதி³கங் வினிச்ச²யவிஸேஸங்.
2114.Sesanti tikapācittiyādikaṃ vinicchayavisesaṃ.
பஞ்சமங்.
Pañcamaṃ.
2115-6. அஞ்ஞத³த்தா²ய தி³ன்னேனாதி உபாஸகேஹி ‘‘ஏவரூபங் க³ஹெத்வா பா⁴ஜெத்வா பரிபு⁴ஞ்ஜதா²’’தி அஞ்ஞஸ்ஸத்தா²ய தி³ன்னேன. ‘‘ஸங்கி⁴கேன பரிக்கா²ரேனா’’தி இமினா ஸம்ப³ந்தோ⁴. பரிக்கா²ரேனாதி கப்பியப⁴ண்டே³ன. ஸங்கி⁴கேனாதி ஸங்க⁴ஸ்ஸ பரிச்சத்தேன. இதா⁴தி இமஸ்மிங் ஸாஸனே. தஸ்ஸாதி யாய சேதாபிதங். நிஸ்ஸக்³கி³யங் ஸியாதி எத்த² நிஸ்ஸட்ட²படிலத்³த⁴ங் யதா²தா³னே உபனேதப்³ப³ந்தி வத்தப்³ப³ங். யதா²ஹ ‘‘நிஸ்ஸட்ட²ங் படிலபி⁴த்வா யதா²தா³னே உபனேதப்³ப³’’ந்தி (பாசி॰ 761). இத³ங் ஹெட்டா² வுத்தத்தா²தி⁴ப்பாயமேவ. எத்தா²தி இமஸ்மிங் ஸிக்கா²பதே³. ‘‘அனஞ்ஞத³த்தி²கே அஞ்ஞத³த்தி²கஸஞ்ஞா, ஆபத்தி து³க்கடஸ்ஸ. அனஞ்ஞத³த்தி²கே வேமதிகா, ஆபத்தி து³க்கடஸ்ஸா’’தி வுத்தத்தா ஆஹ ‘‘அனஞ்ஞத³த்தி²கே நித்³தி³ட்ட²ங் த்³விகது³க்கட’’ந்தி. இமினா ச ‘‘அஞ்ஞத³த்தி²கே திகபாசித்திய’’ந்தி இத³ங் வுத்தமேவ. ‘‘அஞ்ஞத³த்தி²கே அஞ்ஞத³த்தி²கஸஞ்ஞா, வேமதிகா, அனஞ்ஞத³த்தி²கஸஞ்ஞா அஞ்ஞங் சேதாபேதி, நிஸ்ஸக்³கி³யங் பாசித்திய’’ந்தி (பாசி॰ 761) ஹி வுத்தங்.
2115-6.Aññadatthāya dinnenāti upāsakehi ‘‘evarūpaṃ gahetvā bhājetvā paribhuñjathā’’ti aññassatthāya dinnena. ‘‘Saṅghikena parikkhārenā’’ti iminā sambandho. Parikkhārenāti kappiyabhaṇḍena. Saṅghikenāti saṅghassa pariccattena. Idhāti imasmiṃ sāsane. Tassāti yāya cetāpitaṃ. Nissaggiyaṃ siyāti ettha nissaṭṭhapaṭiladdhaṃ yathādāne upanetabbanti vattabbaṃ. Yathāha ‘‘nissaṭṭhaṃ paṭilabhitvā yathādāne upanetabba’’nti (pāci. 761). Idaṃ heṭṭhā vuttatthādhippāyameva. Etthāti imasmiṃ sikkhāpade. ‘‘Anaññadatthike aññadatthikasaññā, āpatti dukkaṭassa. Anaññadatthike vematikā, āpatti dukkaṭassā’’ti vuttattā āha ‘‘anaññadatthike niddiṭṭhaṃdvikadukkaṭa’’nti. Iminā ca ‘‘aññadatthike tikapācittiya’’nti idaṃ vuttameva. ‘‘Aññadatthike aññadatthikasaññā, vematikā, anaññadatthikasaññā aññaṃ cetāpeti, nissaggiyaṃ pācittiya’’nti (pāci. 761) hi vuttaṃ.
2117. ஸேஸகந்தி யத³த்தா²ய தி³ன்னங், தங் சேதாபெத்வா ஆஹரித்வா அதிரித்தங் மூலங் அஞ்ஞத³த்தா²ய உபனெந்தியா அனாபத்தீதி யோஜேதப்³ப³ங். ஸாமிகே புச்சி²த்வாதி ‘‘தும்ஹேஹி சீவரத்தா²ய தி³ன்னங், அம்ஹாகஞ்ச சீவரங் ஸங்விஜ்ஜதி, தேலாதீ³ஹி பன அத்தோ²’’தி ஏவங் ஸாமிகே புச்சி²த்வா. தந்தி தங் சேதாபன்னங். ஆபதா³ஸூதி பி⁴க்கு²னீஹி விஹாரங் பஹாய க³மனாரஹமுபத்³த³வோ க³ஹிதோ. யதா²ஹ ‘‘ஆபதா³ஸூதி ததா²ரூபேஸு உபத்³த³வேஸு பி⁴க்கு²னியோ விஹாரங் ச²ட்³டெ³த்வா பக்கமந்தி, ஏவரூபாஸு ஆபதா³ஸு யங் வா தங் வா சேதாபேதுங் வட்டதீ’’தி (பாசி॰ அட்ட²॰ 762).
2117.Sesakanti yadatthāya dinnaṃ, taṃ cetāpetvā āharitvā atirittaṃ mūlaṃ aññadatthāya upanentiyā anāpattīti yojetabbaṃ. Sāmike pucchitvāti ‘‘tumhehi cīvaratthāya dinnaṃ, amhākañca cīvaraṃ saṃvijjati, telādīhi pana attho’’ti evaṃ sāmike pucchitvā. Tanti taṃ cetāpannaṃ. Āpadāsūti bhikkhunīhi vihāraṃ pahāya gamanārahamupaddavo gahito. Yathāha ‘‘āpadāsūti tathārūpesu upaddavesu bhikkhuniyo vihāraṃ chaḍḍetvā pakkamanti, evarūpāsu āpadāsu yaṃ vā taṃ vā cetāpetuṃ vaṭṭatī’’ti (pāci. aṭṭha. 762).
2118. ஸயங் யாசிதகங் வினாதி ‘‘ஸங்யாசிதக’’ந்தி பத³ங் வினா, எத்தகமேவ விஸதி³ஸந்தி வுத்தங் ஹோதி.
2118.Sayaṃ yācitakaṃ vināti ‘‘saṃyācitaka’’nti padaṃ vinā, ettakameva visadisanti vuttaṃ hoti.
ச²ட்ட²ஸத்தமானி.
Chaṭṭhasattamāni.
2119. அதி⁴கவசனங் த³ஸ்ஸேதுமாஹ ‘‘மஹாஜனிகஸஞ்ஞாசிகேனா’’தி. பத³தாதி⁴காதி பத³மேவ பத³தா. மஹாஜனிகேனாதி க³ணஸ்ஸ பரிச்சத்தேன. ஸஞ்ஞாசிகேனாதி ஸயங் யாசிதகேன.
2119. Adhikavacanaṃ dassetumāha ‘‘mahājanikasaññācikenā’’ti. Padatādhikāti padameva padatā. Mahājanikenāti gaṇassa pariccattena. Saññācikenāti sayaṃ yācitakena.
2120. அனந்தரஸமா மதாதி இத⁴ ‘‘புக்³க³லிகேனா’’தி பத³ங் வினா ஸமுட்டா²னாதி³னா ஸத்³தி⁴ங் ஸப்³பே³ வினிச்ச²யா அனந்தரஸிக்கா²பத³ஸதி³ஸா மதாதி அத்தோ². ‘‘யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன புக்³க³லிகேனா’’தி ஹி ஸிக்கா²பத³ங். புக்³க³லிகேனாதி ஏகபி⁴க்கு²னியா பரிச்சத்தேன. ‘‘கிஞ்சிபீ’’தி லிக²ந்தி. ‘‘கோசிபீ’’தி பாடோ² ஸுந்த³ரோ ‘‘விஸேஸோ’’தி இமினா துல்யாதி⁴கரணத்தா.
2120.Anantarasamā matāti idha ‘‘puggalikenā’’ti padaṃ vinā samuṭṭhānādinā saddhiṃ sabbe vinicchayā anantarasikkhāpadasadisā matāti attho. ‘‘Yā pana bhikkhunī aññadatthikena parikkhārena aññuddisikena puggalikenā’’ti hi sikkhāpadaṃ. Puggalikenāti ekabhikkhuniyā pariccattena. ‘‘Kiñcipī’’ti likhanti. ‘‘Kocipī’’ti pāṭho sundaro ‘‘viseso’’ti iminā tulyādhikaraṇattā.
அட்ட²மனவமத³ஸமானி.
Aṭṭhamanavamadasamāni.
பட²மோ வக்³கோ³.
Paṭhamo vaggo.
2121-2. சத்தாரி கங்ஸானி ஸமாஹடானி, சதுன்னங் கங்ஸானங் ஸமாஹாரோ வா சதுக்கங்ஸங், சதுக்கங்ஸதோ அதிரேகங் அதிரேகசதுக்கங்ஸங், தேன அதிரேகசதுக்கங்ஸக்³க⁴னகங் பாவுரணமாஹ, உபசாரேன ‘‘அதிரேகசதுக்கங்ஸ’’ந்தி வுத்தங். கங்ஸபரிமாணங் பனெத்த² ஸயமேவ வக்க²தி ‘‘கஹாபணசதுக்கங் து, கங்ஸோ நாம பவுச்சதீ’’தி. தஸ்மா அதிரேகஸோளஸகஹாபணக்³க⁴னகந்தி அத்தோ². க³ருபாவுரணந்தி ஸீதகாலே பாருபிதப்³ப³பாவுரணங். சேதாபெய்யாதி விஞ்ஞாபெய்ய. சத்தாரி ஸச்சானி ஸமாஹடானி, சதுன்னங் வா ஸச்சானங் ஸமாஹாரோ சதுஸச்சங், தங் பகாஸேதி ஸீலேனாதி சதுஸச்சப்பகாஸீ, தேன, சதுன்னங் அரியஸச்சானங் நித்³தி³ஸகேன ஸம்மாஸம்பு³த்³தே⁴ன. பயோகே³தி ‘‘தே³ஹீ’’தி ஏவங் விஞ்ஞாபனபயோகே³. லாபே⁴தி படிலாபே⁴.
2121-2. Cattāri kaṃsāni samāhaṭāni, catunnaṃ kaṃsānaṃ samāhāro vā catukkaṃsaṃ, catukkaṃsato atirekaṃ atirekacatukkaṃsaṃ, tena atirekacatukkaṃsagghanakaṃ pāvuraṇamāha, upacārena ‘‘atirekacatukkaṃsa’’nti vuttaṃ. Kaṃsaparimāṇaṃ panettha sayameva vakkhati ‘‘kahāpaṇacatukkaṃ tu, kaṃso nāma pavuccatī’’ti. Tasmā atirekasoḷasakahāpaṇagghanakanti attho. Garupāvuraṇanti sītakāle pārupitabbapāvuraṇaṃ. Cetāpeyyāti viññāpeyya. Cattāri saccāni samāhaṭāni, catunnaṃ vā saccānaṃ samāhāro catusaccaṃ, taṃ pakāseti sīlenāti catusaccappakāsī, tena, catunnaṃ ariyasaccānaṃ niddisakena sammāsambuddhena. Payogeti ‘‘dehī’’ti evaṃ viññāpanapayoge. Lābheti paṭilābhe.
சதுன்னங் ஸமூஹோ சதுக்கங், கஹாபணானங் சதுக்கங் கஹாபணசதுக்கங். கஹாபணோ செத்த² தங்தங்காலே, தங்தங்பதே³ஸே ச வோஹாரூபகோ³ க³ஹேதப்³போ³. இமா வுத்தப்பகாரா நிஸ்ஸக்³கி³யாவஸானாபத்தியோ ‘‘ஞாதகானஞ்ச ஸந்தகே’’தி அனாபத்திவிஸயே வக்க²மானத்தா ‘‘யதா³ யேன அத்தோ², ததா³ தங் வதெ³ய்யாதா²’’தி ஏவங் நிச்சபவாரணங் அகத்வா தஸ்மிங் காலே கிஸ்மிஞ்சி கு³ணே பஸீதி³த்வா ‘‘வதெ³ய்யாத² யேன அத்தோ²’’தி ஏவங் பவாரிதட்டா²னே ஸம்ப⁴வந்தீதி த³ட்ட²ப்³பா³.
Catunnaṃ samūho catukkaṃ, kahāpaṇānaṃ catukkaṃ kahāpaṇacatukkaṃ. Kahāpaṇo cettha taṃtaṃkāle, taṃtaṃpadese ca vohārūpago gahetabbo. Imā vuttappakārā nissaggiyāvasānāpattiyo ‘‘ñātakānañca santake’’ti anāpattivisaye vakkhamānattā ‘‘yadā yena attho, tadā taṃ vadeyyāthā’’ti evaṃ niccapavāraṇaṃ akatvā tasmiṃ kāle kismiñci guṇe pasīditvā ‘‘vadeyyātha yena attho’’ti evaṃ pavāritaṭṭhāne sambhavantīti daṭṭhabbā.
2123-5. ஊனகசதுக்கங்ஸே அதிரேகஸஞ்ஞா, ஆபத்தி து³க்கடஸ்ஸ. ஊனகசதுக்கங்ஸே வேமதிகா, ஆபத்தி து³க்கடஸ்ஸா’’தி வுத்தத்தா ஆஹ ‘‘ஊனகே து சதுக்கங்ஸே, உத்³தி³ட்ட²ங் த்³விகது³க்கட’’ந்தி. இமினா ‘‘அதிரேகசதுக்கங்ஸே அதிரேகஸஞ்ஞா, வேமதிகா, ஊனகஸஞ்ஞா சேதாபேதி, நிஸ்ஸக்³கி³யங் பாசித்திய’’ந்தி திகபாசித்தியஞ்ச த³ஸ்ஸிதங் ஹோதி.
2123-5. Ūnakacatukkaṃse atirekasaññā, āpatti dukkaṭassa. Ūnakacatukkaṃse vematikā, āpatti dukkaṭassā’’ti vuttattā āha ‘‘ūnake tu catukkaṃse, uddiṭṭhaṃ dvikadukkaṭa’’nti. Iminā ‘‘atirekacatukkaṃse atirekasaññā, vematikā, ūnakasaññā cetāpeti, nissaggiyaṃ pācittiya’’nti tikapācittiyañca dassitaṃ hoti.
க³ருகந்தி க³ருபாவுரணங். ததூ³னங் வாதி சதுக்கங்ஸதோ ஊனகங் வா. ஞாதகானஞ்சாதி எத்த² ச-ஸத்³தே³ன பவாரிதானங் ஸங்க³ஹோ. யதா²ஹ அனாபத்திவாரே ‘‘ஞாதகானங், பவாரிதான’’ந்தி (பாசி॰ 787). எத்த² ச ‘‘அதிரேகசதுக்கங்ஸம்பீ’’தி வத்தப்³ப³ங் ‘‘ததூ³னங் வா’’தி இமினா சதுக்கங்ஸூனஸ்ஸ வுத்தத்தா. ‘‘அப்பமேவ வா’’தி இமினா அதிரேகசதுக்கங்ஸேபி மஹக்³க⁴தரங் வுத்தந்தி வேதி³தப்³ப³ங்.
Garukanti garupāvuraṇaṃ. Tadūnaṃ vāti catukkaṃsato ūnakaṃ vā. Ñātakānañcāti ettha ca-saddena pavāritānaṃ saṅgaho. Yathāha anāpattivāre ‘‘ñātakānaṃ, pavāritāna’’nti (pāci. 787). Ettha ca ‘‘atirekacatukkaṃsampī’’ti vattabbaṃ ‘‘tadūnaṃ vā’’ti iminā catukkaṃsūnassa vuttattā. ‘‘Appameva vā’’ti iminā atirekacatukkaṃsepi mahagghataraṃ vuttanti veditabbaṃ.
ஏகாத³ஸமங்.
Ekādasamaṃ.
2126-7. ‘‘லஹுபாவுரணங் பன பி⁴க்கு²னியா சேதாபெந்தியா அட்³ட⁴தெய்யகங்ஸபரமங் சேதாபேதப்³ப³’’ந்தி (பாசி॰ 789) வசனதோ லஹுபாவுரணந்தி எத்த² ‘‘சேதாபெந்தியா பி⁴க்கு²னியா’’தி ச அட்³ட⁴தெய்யகங்ஸக்³க⁴னந்தி எத்த² ‘‘சேதாபேதப்³ப³’’ந்தி ச ஸேஸோ. லஹுபாவுரணந்தி உண்ஹகாலே பாவுரணங். திண்ணங் பூரணோ தெய்யோ, அட்³டோ⁴ தெய்யோ அஸ்ஸாதி அட்³ட⁴தெய்யோ, அட்³ட⁴தெய்யோ ச ஸோ கங்ஸோ சாதி அட்³ட⁴தெய்யகங்ஸோ, தங் அக்³க⁴தீதி அட்³ட⁴தெய்யகங்ஸக்³க⁴னங், த³ஸகஹாபணக்³க⁴னகந்தி அத்தோ². ததோதி அட்³ட⁴தெய்யகங்ஸக்³க⁴னகதோ. யங் பன பாவுரணங் அட்³ட⁴தெய்யகங்ஸக்³க⁴னகங், தங் லஹுபாவுரணங் . ததோ அட்³ட⁴தெய்யகங்ஸக்³க⁴னகதோ லஹுபாவுரணதோ. உத்தரிந்தி அதிரேகங். அட்³ட⁴தெய்யகங்ஸக்³க⁴னகங் யங் பாவுரணங் யா பி⁴க்கு²னீ சேதாபேதி , தஸ்ஸ பாவுரணஸ்ஸ படிலாபே⁴ தஸ்ஸா பி⁴க்கு²னியா நிஸ்ஸக்³கி³யபாசித்தியா வுத்தாதி யோஜனா.
2126-7. ‘‘Lahupāvuraṇaṃ pana bhikkhuniyā cetāpentiyā aḍḍhateyyakaṃsaparamaṃ cetāpetabba’’nti (pāci. 789) vacanato lahupāvuraṇanti ettha ‘‘cetāpentiyā bhikkhuniyā’’ti ca aḍḍhateyyakaṃsagghananti ettha ‘‘cetāpetabba’’nti ca seso. Lahupāvuraṇanti uṇhakāle pāvuraṇaṃ. Tiṇṇaṃ pūraṇo teyyo, aḍḍho teyyo assāti aḍḍhateyyo, aḍḍhateyyo ca so kaṃso cāti aḍḍhateyyakaṃso, taṃ agghatīti aḍḍhateyyakaṃsagghanaṃ, dasakahāpaṇagghanakanti attho. Tatoti aḍḍhateyyakaṃsagghanakato. Yaṃ pana pāvuraṇaṃ aḍḍhateyyakaṃsagghanakaṃ, taṃ lahupāvuraṇaṃ . Tato aḍḍhateyyakaṃsagghanakato lahupāvuraṇato. Uttarinti atirekaṃ. Aḍḍhateyyakaṃsagghanakaṃ yaṃ pāvuraṇaṃ yā bhikkhunī cetāpeti , tassa pāvuraṇassa paṭilābhe tassā bhikkhuniyā nissaggiyapācittiyā vuttāti yojanā.
‘‘அனந்தரஸமங் ஸேஸ’’ந்தி இத³ங் ஸமத்தே²துமாஹ ‘‘நத்தி² காசி விஸேஸதா’’தி. விஸேஸோயேவ விஸேஸதா.
‘‘Anantarasamaṃ sesa’’nti idaṃ samatthetumāha ‘‘natthi kāci visesatā’’ti. Visesoyeva visesatā.
த்³வாத³ஸமங்.
Dvādasamaṃ.
2128. இதா³னி பாதிமொக்கு²த்³தே³ஸே ஆக³தேஸு ஸமதிங்ஸனிஸ்ஸக்³கி³யேஸு கேஸஞ்சி அத்தனோ அவசனே காரணஞ்ச அவுத்தேஹி ஸத்³தி⁴ங் வுத்தானங் க³ஹணஞ்ச த³ஸ்ஸேதுமாஹ ‘‘ஸாதா⁴ரணானீ’’திஆதி³. ஹி யஸ்மா பி⁴க்கு²னீனங் பி⁴க்கூ²ஹி ஸாதா⁴ரணானி யானி ஸிக்கா²பதா³னி ஸேஸானி இத⁴ வுத்தேஹி அஞ்ஞானி, தானி அட்டா²ரஸ ஸிக்கா²பதா³னி சேவ இத⁴ வுத்தஸரூபானி த்³வாத³ஸ ஸிக்கா²பதா³னி சேதி இச்சேவங் நிஸ்ஸக்³கி³யபாசித்தியஸிக்கா²பதா³னி ஸமதிங்ஸேவ ஹொந்தீதி யோஜனா.
2128. Idāni pātimokkhuddese āgatesu samatiṃsanissaggiyesu kesañci attano avacane kāraṇañca avuttehi saddhiṃ vuttānaṃ gahaṇañca dassetumāha ‘‘sādhāraṇānī’’tiādi. Hi yasmā bhikkhunīnaṃ bhikkhūhi sādhāraṇāni yāni sikkhāpadāni sesāni idha vuttehi aññāni, tāni aṭṭhārasa sikkhāpadāni ceva idha vuttasarūpāni dvādasa sikkhāpadāni ceti iccevaṃ nissaggiyapācittiyasikkhāpadāni samatiṃseva hontīti yojanā.
இதி வினயத்த²ஸாரஸந்தீ³பனியா வினயவினிச்ச²யவண்ணனாய
Iti vinayatthasārasandīpaniyā vinayavinicchayavaṇṇanāya
நிஸ்ஸக்³கி³யகதா²வண்ணனா நிட்டி²தா.
Nissaggiyakathāvaṇṇanā niṭṭhitā.
