| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
11. நிஸ்ஸக்³கி³யனித்³தே³ஸவண்ணனா
11. Nissaggiyaniddesavaṇṇanā
116-7. இதா³னி அச்சோளாரிகானங் வஸேன த³ஸ்ஸேதுங் ‘‘அரூபிய’’ந்திஆதி³ ஆரத்³த⁴ங். அஞ்ஞதா²பி யுத்தி பரியேஸிதப்³பா³. தத்தா²யங் ஸங்கே²பத்தோ² (பாரா॰ 591; பாரா॰ அட்ட²॰ 2.589; கங்கா²॰ அட்ட²॰ ஜாதருபஸிக்கா²பத³வண்ணனா) – யோ ரூபியேன அரூபியஞ்ச பரிவத்தெய்ய, யோ ச இதரேன ச அரூபியேன ரூபியங் பரிவத்தெய்ய, தஸ்ஸ நிஸ்ஸக்³கி³யங் ஹோதீதி.
116-7. Idāni accoḷārikānaṃ vasena dassetuṃ ‘‘arūpiya’’ntiādi āraddhaṃ. Aññathāpi yutti pariyesitabbā. Tatthāyaṃ saṅkhepattho (pārā. 591; pārā. aṭṭha. 2.589; kaṅkhā. aṭṭha. jātarupasikkhāpadavaṇṇanā) – yo rūpiyena arūpiyañca parivatteyya, yo ca itarena ca arūpiyena rūpiyaṃ parivatteyya, tassa nissaggiyaṃ hotīti.
இதா³னி ரூபியஞ்ச அரூபியஞ்ச த³ஸ்ஸேதுங் ‘‘இத⁴ ரூபிய’’ந்திஆதி³ ஆரத்³த⁴ங். எத்த² (பாரா॰ 589; கங்கா²॰ அட்ட²॰ ஜாதருபஸிக்கா²பத³வண்ணனா) ஸஜ்ஜு² ஸிங்கீ³தி ஸஜ்ஜூ²தி ரஜதங். ஸிங்கீ³தி ஸுவண்ணங். தம்ப³லோஹாதீ³ஹி வா தா³ரூஹி வா பண்ணேஹி வா லாகா²ய வா ரூபங் ஸமுட்டா²பெத்வா வா அஸமுட்டா²பெத்வா வா கதங் சம்மபீ³ஜமயம்பியங் யங் தே³ஸே வோஹாரங் க³ச்ச²தி, இத³ங் வோஹாரூபக³மாஸகங் நாம. இத³மித⁴ ரூபியந்தி அதி⁴ப்பேதங். வத்தா²தி³ ச முத்தாதி³ ச வத்த²முத்தாதி³. இதரந்தி அரூபியங் கப்பியவத்து²ஞ்ச து³க்கடவத்து²ஞ்ச. கிங் வுத்தங் ஹோதி? வத்த²ங் ஸுத்தங் பா²லோ படகோ கப்பாஸோ அனேகப்பகாரங் அபரண்ணங் ஸப்பி நவனீதங் தேலங் மது⁴ பா²ணிதாதி³பே⁴ஸஜ்ஜஞ்சாதி இத³ங் கப்பியவத்து² நாம. முத்தா மணி வேளுரியோ ஸங்கோ²ஸிலா பவாளங் லோஹிதங்கோ³ மஸாரக³ல்லங் ஸத்த த⁴ஞ்ஞானி தா³ஸீ தா³ஸோ கெ²த்தங் வத்து² புப்பா²ராமப²லாராமாத³யோதி இத³ங் து³க்கடவத்து² நாம, தது³ப⁴யங் அரூபியங் நாமாதி வுத்தங் ஹோதி.
Idāni rūpiyañca arūpiyañca dassetuṃ ‘‘idha rūpiya’’ntiādi āraddhaṃ. Ettha (pārā. 589; kaṅkhā. aṭṭha. jātarupasikkhāpadavaṇṇanā) sajjhu siṅgīti sajjhūti rajataṃ. Siṅgīti suvaṇṇaṃ. Tambalohādīhi vā dārūhi vā paṇṇehi vā lākhāya vā rūpaṃ samuṭṭhāpetvā vā asamuṭṭhāpetvā vā kataṃ cammabījamayampiyaṃ yaṃ dese vohāraṃ gacchati, idaṃ vohārūpagamāsakaṃ nāma. Idamidha rūpiyanti adhippetaṃ. Vatthādi ca muttādi ca vatthamuttādi. Itaranti arūpiyaṃ kappiyavatthuñca dukkaṭavatthuñca. Kiṃ vuttaṃ hoti? Vatthaṃ suttaṃ phālo paṭako kappāso anekappakāraṃ aparaṇṇaṃ sappi navanītaṃ telaṃ madhu phāṇitādibhesajjañcāti idaṃ kappiyavatthu nāma. Muttā maṇi veḷuriyo saṅkhosilā pavāḷaṃ lohitaṅgo masāragallaṃ satta dhaññāni dāsī dāso khettaṃ vatthu pupphārāmaphalārāmādayoti idaṃ dukkaṭavatthu nāma, tadubhayaṃ arūpiyaṃ nāmāti vuttaṃ hoti.
118. எத்தாவதா ரூபியஸங்வோஹாரங் த³ஸ்ஸெத்வா இதா³னி கயவிக்கயங் த³ஸ்ஸேதுங் ‘‘இமங் க³ஹெத்வா’’திஆதி³மாஹ . தத்த² இமந்தி தண்டு³லாதி³கங் கப்பியப⁴ண்ட³ங் க³ஹெத்வா வா ஓத³னாதி³ங் பு⁴த்வா வா ‘‘இமங் வத்தா²தி³கங் கப்பியப⁴ண்ட³ங் தே³ஹி, இமங் ரஜனபசனாதி³கங் கர, ரஜனகட்டா²தி³மா நய, இமங் வா தவ தே³மி, த்வங் பன இமஞ்ச இமஞ்ச ஆஹர, கர, தே³ஹீ’’தி ஏவங் கயவிக்கயே ஸமாபன்னே நிஸ்ஸக்³கீ³தி ஸம்ப³ந்தோ⁴.
118. Ettāvatā rūpiyasaṃvohāraṃ dassetvā idāni kayavikkayaṃ dassetuṃ ‘‘imaṃ gahetvā’’tiādimāha . Tattha imanti taṇḍulādikaṃ kappiyabhaṇḍaṃ gahetvā vā odanādiṃ bhutvā vā ‘‘imaṃ vatthādikaṃ kappiyabhaṇḍaṃ dehi, imaṃ rajanapacanādikaṃ kara, rajanakaṭṭhādimā naya, imaṃ vā tava demi, tvaṃ pana imañca imañca āhara, kara, dehī’’ti evaṃ kayavikkaye samāpanne nissaggīti sambandho.
119. இதா³னி பரிணாமவஸேன ஆபத்திபே⁴த³ங் த³ஸ்ஸேதுங் ‘‘அத்தனோ’’திஆதி³ ஆரத்³த⁴ங். தத்ராயங் பிண்ட³த்தோ² (பாரா॰ 659; பாரா॰ அட்ட²॰ 2.658; கங்கா²॰ அட்ட²॰ பரிணதஸிக்கா²பத³வண்ணனா) – ஸங்க⁴ஸ்ஸ வா அஞ்ஞஸ்ஸ வா நதங் பரிணதங் லாப⁴ங் லபி⁴தப்³ப³ங் சீவராதி³பச்சயங் அத்தனோ வா அஞ்ஞஸ்ஸ வா பரிணாமெய்ய, நிஸ்ஸக்³கி³யஆதீ³னி ஹொந்தீதி. கத²ங்? யோ பன மாதுஸந்தகம்பி ஸங்க⁴ஸ்ஸ பரிணதங் அத்தனோ பரிணாமேதி, நிஸ்ஸக்³கி³யங். அஞ்ஞஸ்ஸ புக்³க³லஸ்ஸ பரிணாமேதி, ஸுத்³தி⁴கபாசித்தியங். அஞ்ஞஸ்ஸ ஸங்க⁴ஸ்ஸ வா சேதியஸ்ஸ வா பரிணாமேதி, து³க்கடங். யோ பன அஞ்ஞபுக்³க³லஸ்ஸ வா சேதியஸ்ஸ வா பரிணதங் அத்தனோ வா அஞ்ஞபுக்³க³லஸ்ஸ வா ஸங்க⁴ஸ்ஸ வா அஞ்ஞசேதியஸ்ஸ வா பரிணாமேதி, தஸ்ஸாபி து³க்கடமேவாதி.
119. Idāni pariṇāmavasena āpattibhedaṃ dassetuṃ ‘‘attano’’tiādi āraddhaṃ. Tatrāyaṃ piṇḍattho (pārā. 659; pārā. aṭṭha. 2.658; kaṅkhā. aṭṭha. pariṇatasikkhāpadavaṇṇanā) – saṅghassa vā aññassa vā nataṃ pariṇataṃ lābhaṃ labhitabbaṃ cīvarādipaccayaṃ attano vā aññassa vā pariṇāmeyya, nissaggiyaādīni hontīti. Kathaṃ? Yo pana mātusantakampi saṅghassa pariṇataṃ attano pariṇāmeti, nissaggiyaṃ. Aññassa puggalassa pariṇāmeti, suddhikapācittiyaṃ. Aññassa saṅghassa vā cetiyassa vā pariṇāmeti, dukkaṭaṃ. Yo pana aññapuggalassa vā cetiyassa vā pariṇataṃ attano vā aññapuggalassa vā saṅghassa vā aññacetiyassa vā pariṇāmeti, tassāpi dukkaṭamevāti.
120. யோ பன நிஸ்ஸக்³கி³ங் நிஸ்ஸஜ்ஜிதப்³ப³ங் அனிஸ்ஸஜ்ஜித்வா வினயகம்மங் அகத்வா பரிபு⁴ஞ்ஜெய்ய, தஸ்ஸ து³க்கடங். யோ வா பரேன வினயகம்மத்தா²ய நிஸ்ஸட்ட²ங் ஸகஸஞ்ஞாய ந த³தெ³ய்ய, தஸ்ஸாபி து³க்கடங். அஞ்ஞதே²தரந்தி எத்த² அஞ்ஞதா²தி தெ²ய்யஸஞ்ஞாய ஸசே ந த³தெ³ய்ய, இதரங் தஸ்ஸ அக்³க⁴வஸேன பாராஜிகஞ்ச து²ல்லச்சயஞ்ச து³க்கடஞ்ச ஹோதீதி அத்தோ². நிஸ்ஸக்³கி³யவினிச்ச²யோ.
120. Yo pana nissaggiṃ nissajjitabbaṃ anissajjitvā vinayakammaṃ akatvā paribhuñjeyya, tassa dukkaṭaṃ. Yo vā parena vinayakammatthāya nissaṭṭhaṃ sakasaññāya na dadeyya, tassāpi dukkaṭaṃ. Aññathetaranti ettha aññathāti theyyasaññāya sace na dadeyya, itaraṃ tassa agghavasena pārājikañca thullaccayañca dukkaṭañca hotīti attho. Nissaggiyavinicchayo.
நிஸ்ஸக்³கி³யனித்³தே³ஸவண்ணனா நிட்டி²தா.
Nissaggiyaniddesavaṇṇanā niṭṭhitā.
