| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
11. நிஸ்ஸக்³கி³யனித்³தே³ஸவண்ணனா
11. Nissaggiyaniddesavaṇṇanā
116-7. ரூபியேன அரூபியங் ரூபியஞ்ச இதரேன ரூபியஞ்ச பரிவத்தெய்யாதி ஸம்ப³ந்தோ⁴. தத்த² ரூபியேனாதி ரூபியஸங்கா²தேன நிஸ்ஸக்³கி³யவத்து²னா. அரூபியந்தி அரூபியஸங்கா²தங் து³க்கடவத்து²ங் கப்பியவத்து²ஞ்ச. இதரேனாதி அரூபியேன. நிஸ்ஸக்³கீ³தி நிஸ்ஸஜ்ஜனங் நிஸ்ஸக்³கோ³, புப்³ப³பா⁴கே³ கத்தப்³ப³ஸ்ஸ வினயகம்மஸ்ஸேதங் நாமங். நிஸ்ஸக்³கோ³ அஸ்ஸ அத்தீ²தி நிஸ்ஸக்³கி³, கிங் தங்? பாசித்தியங். ரூபியஸ்ஸ மூலக்³க³ஹணே பன ரூபியப்படிக்³க³ஹணஸிக்கா²பதே³ன நிஸ்ஸக்³கி³யங் பாசித்தியங்.
116-7. Rūpiyena arūpiyaṃ rūpiyañca itarena rūpiyañca parivatteyyāti sambandho. Tattha rūpiyenāti rūpiyasaṅkhātena nissaggiyavatthunā. Arūpiyanti arūpiyasaṅkhātaṃ dukkaṭavatthuṃ kappiyavatthuñca. Itarenāti arūpiyena. Nissaggīti nissajjanaṃ nissaggo, pubbabhāge kattabbassa vinayakammassetaṃ nāmaṃ. Nissaggo assa atthīti nissaggi, kiṃ taṃ? Pācittiyaṃ. Rūpiyassa mūlaggahaṇe pana rūpiyappaṭiggahaṇasikkhāpadena nissaggiyaṃ pācittiyaṃ.
இதா³னி ரூபியாதி³ங் த³ஸ்ஸேதுங் ‘‘இதா⁴’’திஆதி³ ஆரத்³த⁴ங். தத்த² கஹா…பே॰… மாஸகங் இத⁴ ரூபியந்தி ஸம்ப³ந்தோ⁴. தத்த² கஹாபணோ நாம ஸுவண்ணமயோ வா ரஜதமயோ வா ஏதரஹி பகதிகஹாபணோ வா. ஸஜ்ஜூ²தி ரஜதங். ஸிங்கீ³தி ஸுவண்ணபே⁴தோ³, ததா²பி செத்த² ஸாமஞ்ஞேன ஸுவண்ணமதி⁴ப்பேதங். வோஹாரூபக³மாஸகந்தி வோஹாரங் கயவிக்கயங் உபக³ச்ச²தீதி வோஹாரூபக³ங், தஞ்ச தங் மாஸகஞ்ச. தங் பன ஸமுட்டா²பிதரூபஞ்ச அஸமுட்டா²பிதரூபஞ்ச லோஹதா³ருஆதி³மயங் வுச்சதி. இத⁴ ரூபியந்தி இமஸ்மிங் ஸிக்கா²பதே³ ரூபியங் நாமாதி அத்தோ². வத்த²முத்தாதி³ கப்பங் து³க்கடவத்து²ஞ்ச இதரந்தி யோஜனா. தத்த² வத்த²ஞ்ச முத்தா ச ஆதி³ யஸ்ஸாதி ஸமாஸோ. ஆதி³-ஸத்³தோ³ பச்சேகங் யோஜேதப்³போ³ ‘‘வத்தா²தி³ முத்தாதீ³’’தி. தத்த² பட²மேன ஆதி³-ஸத்³தே³ன கப்பாஸஸுத்தாபரண்ணாதி³கங் யங் கிஞ்சி கப்பியவத்து²ங், து³தியேன மணி ஸங்கோ² ஸிலா பவாளங் லோஹிதங்கோ மஸாரக³ல்லங் ஸத்தத⁴ஞ்ஞானி தா³ஸிதா³ஸகெ²த்தவத்து²புப்பா²ராமப²லாராமாத³யோதி இத³ங் து³க்கடவத்து²ங் ஸங்க³ண்ஹாதி. வத்தா²தி³கப்பியவத்து²ங், முத்தாதி³து³க்கடவத்து²ஞ்ச இதரங் அஞ்ஞங் அரூபியங் நாமாதி அத்தோ².
Idāni rūpiyādiṃ dassetuṃ ‘‘idhā’’tiādi āraddhaṃ. Tattha kahā…pe… māsakaṃ idha rūpiyanti sambandho. Tattha kahāpaṇo nāma suvaṇṇamayo vā rajatamayo vā etarahi pakatikahāpaṇo vā. Sajjhūti rajataṃ. Siṅgīti suvaṇṇabhedo, tathāpi cettha sāmaññena suvaṇṇamadhippetaṃ. Vohārūpagamāsakanti vohāraṃ kayavikkayaṃ upagacchatīti vohārūpagaṃ, tañca taṃ māsakañca. Taṃ pana samuṭṭhāpitarūpañca asamuṭṭhāpitarūpañca lohadāruādimayaṃ vuccati. Idha rūpiyanti imasmiṃ sikkhāpade rūpiyaṃ nāmāti attho. Vatthamuttādi kappaṃ dukkaṭavatthuñca itaranti yojanā. Tattha vatthañca muttā ca ādi yassāti samāso. Ādi-saddo paccekaṃ yojetabbo ‘‘vatthādi muttādī’’ti. Tattha paṭhamena ādi-saddena kappāsasuttāparaṇṇādikaṃ yaṃ kiñci kappiyavatthuṃ, dutiyena maṇi saṅkho silā pavāḷaṃ lohitaṅko masāragallaṃ sattadhaññāni dāsidāsakhettavatthupupphārāmaphalārāmādayoti idaṃ dukkaṭavatthuṃ saṅgaṇhāti. Vatthādikappiyavatthuṃ, muttādidukkaṭavatthuñca itaraṃ aññaṃ arūpiyaṃ nāmāti attho.
118. எத்தாவதா ரூபியஸங்வோஹாரங் த³ஸ்ஸெத்வா இதா³னி கப்பியப⁴ண்டே³ கயவிக்கயங் த³ஸ்ஸேதுமாஹ ‘‘இம’’ந்திஆதி³. தத்த² ‘‘இமங் க³ஹெத்வா இமங் தே³ஹி, இமங் கர, இமங் ஆனயா’’தி வா ‘‘இமங் பு⁴த்வா இமங் தே³ஹி, இமங் கர, இமங் ஆனயா’’தி வா ‘‘இமங் தே³மி, இமங் தே³ஹி, இமங் கர, இமங் ஆனயா’’தி வா கயவிக்கயே ஸமாபன்னே நிஸ்ஸக்³கீ³தி யோஜனா. தத்த² இமந்தி தண்டு³லாதி³ங். பு⁴த்வாதி ஓத³னாதி³ங் பு⁴ஞ்ஜித்வா. இமங் தே³ஹீதி ஏதங் வத்தா²தி³கங் தே³ஹி. இமங் கராதி ஏதங் ரஜனபசனாதி³ங் கரோஹி. இமங் ஆனயாதி ஏதங் ரஜனகட்டா²தி³ங் ஆனேஹி. இமங் தே³மீதி ஏதங் வத்தா²தி³கங் தவ தே³மி. ஸமாபன்னேதி கதே. தஸ்மா கப்பியங் ப⁴ண்ட³ங் பரிவத்தெந்தேன அஞ்ஞாதகேஹி ஸத்³தி⁴ங் ‘‘இமங் தே³ஹீ’’தி வத³தோ விஞ்ஞத்தி, ‘‘இமங் க³ண்ஹாஹீ’’தி வத³தோ ஸத்³தா⁴தெ³ய்யவினிபாதனங், ‘‘இமினா இமங் தே³ஹீ’’தி வத³தோ கயவிக்கயந்தி வுத்தா திஸ்ஸோ ஆபத்தியோ. மாதாபிதூஹி பன ஸத்³தி⁴ங் கயவிக்கயமத்தங் மோசெந்தேன பரிவத்தேதப்³ப³ங். அயஞ்ஹி கயவிக்கயோ ட²பெத்வா பஞ்சஸஹத⁴ம்மிகே அவஸேஸேஹி கி³ஹிபப்³ப³ஜிதேஹி ந வட்டதி. ஸசே பன நவகம்மானி காரேதி, அட்ட²கதா²பமாணேன பாசித்தியமத்தங் தே³ஸேதப்³ப³ங்.
118. Ettāvatā rūpiyasaṃvohāraṃ dassetvā idāni kappiyabhaṇḍe kayavikkayaṃ dassetumāha ‘‘ima’’ntiādi. Tattha ‘‘imaṃ gahetvā imaṃ dehi, imaṃ kara, imaṃ ānayā’’ti vā ‘‘imaṃ bhutvā imaṃ dehi, imaṃ kara, imaṃ ānayā’’ti vā ‘‘imaṃ demi, imaṃ dehi, imaṃ kara, imaṃ ānayā’’ti vā kayavikkaye samāpanne nissaggīti yojanā. Tattha imanti taṇḍulādiṃ. Bhutvāti odanādiṃ bhuñjitvā. Imaṃ dehīti etaṃ vatthādikaṃ dehi. Imaṃ karāti etaṃ rajanapacanādiṃ karohi. Imaṃ ānayāti etaṃ rajanakaṭṭhādiṃ ānehi. Imaṃ demīti etaṃ vatthādikaṃ tava demi. Samāpanneti kate. Tasmā kappiyaṃ bhaṇḍaṃ parivattentena aññātakehi saddhiṃ ‘‘imaṃ dehī’’ti vadato viññatti, ‘‘imaṃ gaṇhāhī’’ti vadato saddhādeyyavinipātanaṃ, ‘‘iminā imaṃ dehī’’ti vadato kayavikkayanti vuttā tisso āpattiyo. Mātāpitūhi pana saddhiṃ kayavikkayamattaṃ mocentena parivattetabbaṃ. Ayañhi kayavikkayo ṭhapetvā pañcasahadhammike avasesehi gihipabbajitehi na vaṭṭati. Sace pana navakammāni kāreti, aṭṭhakathāpamāṇena pācittiyamattaṃ desetabbaṃ.
119-120. இதா³னி பரிணாமனவஸேன ஆபத்திபே⁴த³ங் த³ஸ்ஸேதுங் ‘‘அத்தனோ’’திஆதி³ ஆரத்³த⁴ங். தத்தா²யங் பிண்ட³த்தோ² – ஸங்க⁴ஸ்ஸ நதங் லாப⁴ங் அத்தனோ பரிணாமெய்ய, நிஸ்ஸக்³கி³. அஞ்ஞதோ புக்³க³லஸ்ஸ பரிணாமெய்ய, பாசித்தி. அஞ்ஞஸ்ஸ ஸங்க⁴ஸ்ஸ வா சேதியஸ்ஸ வா பரிணாமெய்ய, து³க்கடங். அஞ்ஞஸ்ஸ புக்³க³லஸ்ஸ வா சேதியஸ்ஸ வா நதங் லாப⁴ங் அத்தனோ வா ஸங்க⁴ஸ்ஸ வா அஞ்ஞபுக்³க³லஸ்ஸ வா அஞ்ஞசேதியஸ்ஸ வா பரிணாமெய்ய, து³க்கடந்தி யோஜனா. தத்த² நதந்தி காயேன வா வசஸா வா நின்னங் கதங். லாப⁴ந்தி லபி⁴தப்³ப³ங் சீவராதி³. அஞ்ஞதோ அஞ்ஞஸ்மிங் புக்³க³லே வா சேதியே வா, சேதியே பன து³க்கடங். அஞ்ஞஸ்ஸாதி சேதியாதி³னோ அந்தமஸோ ஸுனக²ஸ்ஸ. அஞ்ஞதோ வாதி சேதியாதி³ம்ஹி வா. ஸங்க⁴ஸ்ஸாதி பன இத³ங் காகக்கி²கோ³ளகஞாயேன ‘‘நதங் பரிணாமெய்யா’’தி உப⁴யத்த² பரிவத்ததி. நிஸ்ஸட்ட²ங் ஸகஸஞ்ஞாய ந த³தெ³ய்ய வா, து³க்கடந்தி ஸம்ப³ந்தோ⁴. அஞ்ஞதா² அஞ்ஞேன பகாரேன, தெ²ய்யஸஞ்ஞாய ந த³தெ³ய்ய சேதி வுத்தங் ஹோதி. இதரந்தி வத்து²வஸேன அஞ்ஞங் பாராஜிகங் து²ல்லச்சயங் து³க்கடஞ்ச ஹோதீதி அத்தோ².
119-120. Idāni pariṇāmanavasena āpattibhedaṃ dassetuṃ ‘‘attano’’tiādi āraddhaṃ. Tatthāyaṃ piṇḍattho – saṅghassa nataṃ lābhaṃ attano pariṇāmeyya, nissaggi. Aññato puggalassa pariṇāmeyya, pācitti. Aññassa saṅghassa vā cetiyassa vā pariṇāmeyya, dukkaṭaṃ. Aññassa puggalassa vā cetiyassa vā nataṃ lābhaṃ attano vā saṅghassa vā aññapuggalassa vā aññacetiyassa vā pariṇāmeyya, dukkaṭanti yojanā. Tattha natanti kāyena vā vacasā vā ninnaṃ kataṃ. Lābhanti labhitabbaṃ cīvarādi. Aññato aññasmiṃ puggale vā cetiye vā, cetiye pana dukkaṭaṃ. Aññassāti cetiyādino antamaso sunakhassa. Aññato vāti cetiyādimhi vā. Saṅghassāti pana idaṃ kākakkhigoḷakañāyena ‘‘nataṃ pariṇāmeyyā’’ti ubhayattha parivattati. Nissaṭṭhaṃ sakasaññāya na dadeyya vā, dukkaṭanti sambandho. Aññathā aññena pakārena, theyyasaññāya na dadeyya ceti vuttaṃ hoti. Itaranti vatthuvasena aññaṃ pārājikaṃ thullaccayaṃ dukkaṭañca hotīti attho.
நிஸ்ஸக்³கி³யனித்³தே³ஸவண்ணனா நிட்டி²தா.
Nissaggiyaniddesavaṇṇanā niṭṭhitā.
