| Library / Tipiṭaka / ਤਿਪਿਟਕ • Tipiṭaka / ਖੁਦ੍ਦਸਿਕ੍ਖਾ-ਮੂਲਸਿਕ੍ਖਾ • Khuddasikkhā-mūlasikkhā |
੩. ਨਿਸ੍ਸਗ੍ਗਿਯਨਿਦ੍ਦੇਸવਣ੍ਣਨਾ
3. Nissaggiyaniddesavaṇṇanā
੧੭. ਇਦਾਨਿ ਚੀવਰવਿਧਿਂ ਦਸ੍ਸੇਤੁਂ ‘‘વਿਕਪ੍ਪਨ’’ਨ੍ਤ੍ਯਾਦਿਮੁਦ੍ਧਟਂ। ਯੋ ਭਿਕ੍ਖੁ ਅਕਾਲਚੀવਰਂ વਿਕਪ੍ਪਨਞ੍ਚ ਅਧਿਟ੍ਠਾਨਞ੍ਚ ਅਕਤ੍વਾ ਦਸਾਹਂ ਅਤਿਕ੍ਕਾਮੇਤਿ, ਤਸ੍ਸ ਭਿਕ੍ਖੁਨੋ ਨਿਸ੍ਸਗ੍ਗਿਯਂ ਸਿਯਾਤਿ ਪਿਣ੍ਡਤ੍ਥੋ। ਤਤ੍ਥ ਅਕਾਲਚੀવਰਨ੍ਤਿ ਅਕਾਲੇ ਚੀવਰਂ, ਖੋਮਂ ਕਪ੍ਪਾਸਿਕਂ ਕੋਸੇਯ੍ਯਂ ਕਮ੍ਬਲਂ ਸਾਣਂ ਭਙ੍ਗਨ੍ਤਿ ਜਾਤਿਤੋ ਛ ਚੀવਰਾਨਿ, ਦੁਕੂਲਂ ਪਟ੍ਟੁਣ੍ਣਂ ਸੋਮਾਰਪਟ੍ਟਂ ਚੀਨਪਟ੍ਟਂ ਇਦ੍ਧਿਜਂ ਦੇવਦਿਨ੍ਨਨ੍ਤਿ ਇਮਾਨਿ ਪਨ ਛ ਅਨੁਲੋਮਚੀવਰਾਨਿ। ਤੇਸੁ ਦੁਕੂਲਂ ਸਾਣਸ੍ਸ ਅਨੁਲੋਮਂ વਾਕਮਯਤ੍ਤਾ। ਪਟ੍ਟੁਣ੍ਣਾਦੀਨਿ ਤੀਣਿ ਕੋਸੇਯ੍ਯਸ੍ਸ ਅਨੁਲੋਮਾਨਿ ਪਾਣਕੇਹਿ ਕਤਸੁਤ੍ਤਮਯਤ੍ਤਾ। ਇਦ੍ਧਿਜਾਦੀਨਿ ਦ੍વਯਾਨਿ ਖੋਮਾਦੀਨਂ ਅਨੁਲੋਮਾਨਿ ਤੇਸਮਞ੍ਞਤਰਭਾવਤੋ । ਇਮੇਸਂ ਛਨ੍ਨਂ ਚੀવਰਾਨਂ ਅਞ੍ਞਤਰਂ ਅਕਾਲਚੀવਰਂ।
17. Idāni cīvaravidhiṃ dassetuṃ ‘‘vikappana’’ntyādimuddhaṭaṃ. Yo bhikkhu akālacīvaraṃ vikappanañca adhiṭṭhānañca akatvā dasāhaṃ atikkāmeti, tassa bhikkhuno nissaggiyaṃ siyāti piṇḍattho. Tattha akālacīvaranti akāle cīvaraṃ, khomaṃ kappāsikaṃ koseyyaṃ kambalaṃ sāṇaṃ bhaṅganti jātito cha cīvarāni, dukūlaṃ paṭṭuṇṇaṃ somārapaṭṭaṃ cīnapaṭṭaṃ iddhijaṃ devadinnanti imāni pana cha anulomacīvarāni. Tesu dukūlaṃ sāṇassa anulomaṃ vākamayattā. Paṭṭuṇṇādīni tīṇi koseyyassa anulomāni pāṇakehi katasuttamayattā. Iddhijādīni dvayāni khomādīnaṃ anulomāni tesamaññatarabhāvato . Imesaṃ channaṃ cīvarānaṃ aññataraṃ akālacīvaraṃ.
વਿਕਪ੍ਪਨਮਧਿਟ੍ਠਾਨਨ੍ਤਿ ਏਤ੍ਥ ਪਨ વਿਕਪ੍ਪਨੂਪਗਂ ਅਧਿਟ੍ਠਾਨੂਪਗਞ੍ਚ ਏવਂ વੇਦਿਤਬ੍ਬਂ। ਤਤ੍ਰਾਯਂ ਪਾਲ਼ਿ – ‘‘ਅਨੁਜਾਨਾਮਿ, ਭਿਕ੍ਖવੇ, ਆਯਾਮੇਨ ਅਟ੍ਠਙ੍ਗੁਲਂ ਸੁਗਤਙ੍ਗੁਲੇਨ ਚਤੁਰਙ੍ਗੁਲવਿਤ੍ਥਤਂ ਪਚ੍ਛਿਮਚੀવਰਂ વਿਕਪ੍ਪੇਤੁ’’ਨ੍ਤਿ (ਮਹਾવ॰ ੩੫੮)। ਮਜ੍ਝਿਮਸ੍ਸ ਪੁਰਿਸਸ੍ਸ ਦੀਘਸੋ ਦ੍વੇ વਿਦਤ੍ਥਿਯੋ, ਤਿਰਿਯਂ વਿਦਤ੍ਥਿ। ਦ੍વੇ વਿਕਪ੍ਪਨਾ ਸਮ੍ਮੁਖਾવਿਕਪ੍ਪਨਾ ਚ ਪਰਮ੍ਮੁਖਾવਿਕਪ੍ਪਨਾ ਚ। ਕਥਂ? ‘‘ਇਮਂ ਚੀવਰਂ ਤੁਯ੍ਹਂ વਿਕਪ੍ਪੇਮੀ’’ਤਿ વਤ੍ਤਬ੍ਬਂ, ਅਯਂ ਸਮ੍ਮੁਖਾવਿਕਪ੍ਪਨਾ। ‘‘ਮਯ੍ਹਂ ਸਨ੍ਤਕਂ ਪਰਿਭੁਞ੍ਜ વਾ વਿਸ੍ਸਜ੍ਜੇਹਿ વਾ ਯਥਾਪਚ੍ਚਯਂ વਾ ਕਰੋਹੀ’’ਤਿ, ਏਕਸ੍ਸ ਸਨ੍ਤਿਕੇ ‘‘ਇਮਂ ਚੀવਰਂ ਤਿਸ੍ਸਸ੍ਸ ਭਿਕ੍ਖੁਨੋ વਿਕਪ੍ਪੇਮੀ’’ਤਿ વਤ੍ਤਬ੍ਬਂ, ਅਯਂ ਅਪਰਾਪਿ ਸਮ੍ਮੁਖਾવਿਕਪ੍ਪਨਾ। ਤੇਨ ਭਿਕ੍ਖੁਨਾ ‘‘ਤਿਸ੍ਸਸ੍ਸ ਭਿਕ੍ਖੁਨੋ ਸਨ੍ਤਕਂ ਪਰਿਭੁਞ੍ਜ વਾ વਿਸ੍ਸਜ੍ਜੇਹਿ વਾ ਯਥਾਪਚ੍ਚਯਂ વਾ ਕਰੋਹੀ’’ਤਿ, ‘‘ਇਮਂ ਚੀવਰਂ ਤੁਯ੍ਹਂ વਿਕਪ੍ਪਨਤ੍ਥਾਯ ਦਮ੍ਮੀ’’ਤਿ વਤ੍ਤਬ੍ਬਂ, ਤੇਨ વਤ੍ਤਬ੍ਬੋ ‘‘ਕੋ ਤੇ ਮਿਤ੍ਤੋ વਾ ਸਨ੍ਦਿਟ੍ਠੋ વਾ ਸਮ੍ਭਤ੍ਤੋ વਾ’’ਤਿ, ਤਤੋ ਇਤਰੇਨ ‘‘ਤਿਸ੍ਸੋ ਭਿਕ੍ਖੂ’’ਤਿ વਤ੍ਤਬ੍ਬਂ, ਪੁਨ ਤੇਨ ‘‘ਅਹਂ ਤਿਸ੍ਸਸ੍ਸ ਭਿਕ੍ਖੁਨੋ ਦਮ੍ਮੀ’’ਤਿ વਤ੍ਤਬ੍ਬਂ, ਅਯਂ ਪਰਮ੍ਮੁਖਾવਿਕਪ੍ਪਨਾ। ‘‘ਤਿਸ੍ਸਸ੍ਸ ਭਿਕ੍ਖੁਨੋ ਸਨ੍ਤਕਂ ਪਰਿਭੁਞ੍ਜ વਾ વਿਸ੍ਸਜ੍ਜੇਹਿ વਾ ਯਥਾਪਚ੍ਚਯਂ વਾ ਕਰੋਹੀ’’ਤਿ વੁਤ੍ਤੇ ਪਚ੍ਚੁਦ੍ਧਾਰੋ ਨਾਮ ਹੋਤਿ। ਬਹੁਕੇ ‘‘ਇਮਾਨੀ’’ਤਿ, ਅਹਤ੍ਥਪਾਸੇ ‘‘ਏਤਂ, ਏਤਾਨੀ’’ਤਿ વਾ। ਏવਂ વਿਕਪ੍ਪਨਞ੍ਚ ਅਕਤ੍વਾਤਿ ਅਤ੍ਥੋ।
Vikappanamadhiṭṭhānanti ettha pana vikappanūpagaṃ adhiṭṭhānūpagañca evaṃ veditabbaṃ. Tatrāyaṃ pāḷi – ‘‘anujānāmi, bhikkhave, āyāmena aṭṭhaṅgulaṃ sugataṅgulena caturaṅgulavitthataṃ pacchimacīvaraṃ vikappetu’’nti (mahāva. 358). Majjhimassa purisassa dīghaso dve vidatthiyo, tiriyaṃ vidatthi. Dve vikappanā sammukhāvikappanā ca parammukhāvikappanā ca. Kathaṃ? ‘‘Imaṃ cīvaraṃ tuyhaṃ vikappemī’’ti vattabbaṃ, ayaṃ sammukhāvikappanā. ‘‘Mayhaṃ santakaṃ paribhuñja vā vissajjehi vā yathāpaccayaṃ vā karohī’’ti, ekassa santike ‘‘imaṃ cīvaraṃ tissassa bhikkhuno vikappemī’’ti vattabbaṃ, ayaṃ aparāpi sammukhāvikappanā. Tena bhikkhunā ‘‘tissassa bhikkhuno santakaṃ paribhuñja vā vissajjehi vā yathāpaccayaṃ vā karohī’’ti, ‘‘imaṃ cīvaraṃ tuyhaṃ vikappanatthāya dammī’’ti vattabbaṃ, tena vattabbo ‘‘ko te mitto vā sandiṭṭho vā sambhatto vā’’ti, tato itarena ‘‘tisso bhikkhū’’ti vattabbaṃ, puna tena ‘‘ahaṃ tissassa bhikkhuno dammī’’ti vattabbaṃ, ayaṃ parammukhāvikappanā. ‘‘Tissassa bhikkhuno santakaṃ paribhuñja vā vissajjehi vā yathāpaccayaṃ vā karohī’’ti vutte paccuddhāro nāma hoti. Bahuke ‘‘imānī’’ti, ahatthapāse ‘‘etaṃ, etānī’’ti vā. Evaṃ vikappanañca akatvāti attho.
ਤਿਚੀવਰਸ੍ਸ ਪਨ ਪਮਾਣਂ ਉਕ੍ਕਟ੍ਠਪਰਿਚ੍ਛੇਦੇਨ ਸੁਗਤਚੀવਰਤੋ ਊਨਕਂ વਟ੍ਟਤਿ, ਲਾਮਕਪਰਿਚ੍ਛੇਦੇਨ ਸਙ੍ਘਾਟਿਯਾ, ਉਤ੍ਤਰਾਸਙ੍ਗਸ੍ਸ ਚ ਦੀਘਤੋ ਮੁਟ੍ਠਿਪਞ੍ਚਕਂ, ਤਿਰਿਯਂ ਮੁਟ੍ਠਿਤ੍ਤਿਕਂ, ਅਨ੍ਤਰવਾਸਕੋ ਦੀਘਤੋ ਮੁਟ੍ਠਿਪਞ੍ਚਕੋ, ਤਿਰਿਯਂ ਦ੍વਿਹਤ੍ਥੋਪਿ ਅਡ੍ਢਤੇਯ੍ਯੋ વਾ વਟ੍ਟਤਿ। વੁਤ੍ਤਪ੍ਪਮਾਣਤੋ ਅਧਿਕਞ੍ਚ ਊਨਕਞ੍ਚ ‘‘ਪਰਿਕ੍ਖਾਰਚੋਲ਼’’ਨ੍ਤਿ ਅਧਿਟ੍ਠਾਤਬ੍ਬਂ। ਦ੍વੇ ਚੀવਰਸ੍ਸ ਅਧਿਟ੍ਠਾਨਾ ਕਾਯੇਨ વਾ ਅਧਿਟ੍ਠੇਤਿ, વਾਚਾਯ વਾ ਅਧਿਟ੍ਠੇਤਿ। ਤਿਚੀવਰਂ ਅਧਿਟ੍ਠਹਨ੍ਤੇਨ ਰਜਿਤ੍વਾ ਕਪ੍ਪਬਿਨ੍ਦੁਂ ਦਤ੍વਾ ਪੁਰਾਣਸਙ੍ਘਾਟਿਂ ‘‘ਇਮਂ ਸਙ੍ਘਾਟਿਂ ਪਚ੍ਚੁਦ੍ਧਰਾਮੀ’’ਤਿ ਪਚ੍ਚੁਦ੍ਧਰਿਤ੍વਾ ਨવਂ ਸਙ੍ਘਾਟਿਂ ਹਤ੍ਥੇਨ ਗਹੇਤ੍વਾ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਚਿਤ੍ਤੇਨ ਆਭੋਗਂ ਕਤ੍વਾ ਕਾਯવਿਕਾਰਂ ਕਰੋਨ੍ਤੇਨ ਕਾਯੇਨ ਅਧਿਟ੍ਠਾਤਬ੍ਬਾ, ਇਦਂ ਕਾਯੇਨ ਅਧਿਟ੍ਠਾਨਂ। ਤਂ ਯੇਨ ਕੇਨਚਿ ਸਰੀਰਾવਯવੇਨ ਅਫੁਸਨ੍ਤਸ੍ਸ ਨ વਟ੍ਟਤਿ। વਾਚਾਯ ਅਧਿਟ੍ਠਾਨਂ ਪਨ વਚੀਭੇਦਂ ਕਤ੍વਾ વਾਚਾਯ ਅਧਿਟ੍ਠਾਤਬ੍ਬਂ, ਸਚੇ ਹਤ੍ਥਪਾਸੇ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ, ਸਚੇ ਅਹਤ੍ਥਪਾਸੇ ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍વਾ ‘‘ਏਤਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ વਾਚਾ ਭਿਨ੍ਦਿਤਬ੍ਬਾ । ਏਸ ਨਯੋ ਉਤ੍ਤਰਾਸਙ੍ਗੇ, ਅਨ੍ਤਰવਾਸਕੇ ਚ। ਤਿਚੀવਰਾਦੀਨਿ ਸਬ੍ਬਾਨਿ ਏਕਤੋ ਕਤ੍વਾ ‘‘ਇਮਾਨਿ ਚੀવਰਾਨਿ ਪਰਿਕ੍ਖਾਰਚੋਲ਼ਾਨਿ ਅਧਿਟ੍ਠਾਮੀ’’ਤਿ ਅਧਿਟ੍ਠਾਤੁਮ੍ਪਿ વਟ੍ਟਤੀਤਿ। ਏવਂ ਅਧਿਟ੍ਠਾਨਞ੍ਚ ਅਕਤ੍વਾਤਿ ਅਤ੍ਥੋ।
Ticīvarassa pana pamāṇaṃ ukkaṭṭhaparicchedena sugatacīvarato ūnakaṃ vaṭṭati, lāmakaparicchedena saṅghāṭiyā, uttarāsaṅgassa ca dīghato muṭṭhipañcakaṃ, tiriyaṃ muṭṭhittikaṃ, antaravāsako dīghato muṭṭhipañcako, tiriyaṃ dvihatthopi aḍḍhateyyo vā vaṭṭati. Vuttappamāṇato adhikañca ūnakañca ‘‘parikkhāracoḷa’’nti adhiṭṭhātabbaṃ. Dve cīvarassa adhiṭṭhānā kāyena vā adhiṭṭheti, vācāya vā adhiṭṭheti. Ticīvaraṃ adhiṭṭhahantena rajitvā kappabinduṃ datvā purāṇasaṅghāṭiṃ ‘‘imaṃ saṅghāṭiṃ paccuddharāmī’’ti paccuddharitvā navaṃ saṅghāṭiṃ hatthena gahetvā ‘‘imaṃ saṅghāṭiṃ adhiṭṭhāmī’’ti cittena ābhogaṃ katvā kāyavikāraṃ karontena kāyena adhiṭṭhātabbā, idaṃ kāyena adhiṭṭhānaṃ. Taṃ yena kenaci sarīrāvayavena aphusantassa na vaṭṭati. Vācāya adhiṭṭhānaṃ pana vacībhedaṃ katvā vācāya adhiṭṭhātabbaṃ, sace hatthapāse ‘‘imaṃ saṅghāṭiṃ adhiṭṭhāmī’’ti, sace ahatthapāse ṭhapitaṭṭhānaṃ sallakkhetvā ‘‘etaṃ saṅghāṭiṃ adhiṭṭhāmī’’ti vācā bhinditabbā . Esa nayo uttarāsaṅge, antaravāsake ca. Ticīvarādīni sabbāni ekato katvā ‘‘imāni cīvarāni parikkhāracoḷāni adhiṭṭhāmī’’ti adhiṭṭhātumpi vaṭṭatīti. Evaṃ adhiṭṭhānañca akatvāti attho.
ਦਸ ਅਹਾਨਿ ਦਸਾਹਂ। ਅਤਿਮਾਪੇਤੀਤਿ ਅਤਿਕ੍ਕਾਮੇਤਿ। ਤਸ੍ਸਾਤਿ ਤਸ੍ਸ ਭਿਕ੍ਖੁਨੋ। ਨਿਸ੍ਸਗ੍ਗਿਯਨ੍ਤਿ ਨਿਸ੍ਸਜ੍ਜਨਂ ਨਿਸ੍ਸਗ੍ਗਿਯਂ, ਪੁਬ੍ਬਭਾਗੇ ਕਤ੍ਤਬ੍ਬਸ੍ਸ વਿਨਯਕਮ੍ਮਸ੍ਸੇਤਂ ਨਾਮਂ, ਨਿਸ੍ਸਗ੍ਗਿਯਮਸ੍ਸ ਅਤ੍ਥੀਤਿ ਨਿਸ੍ਸਗ੍ਗਿਯਂ, ਕਿਂ ਤਂ? ਪਾਚਿਤ੍ਤਿਯਂ, ਤਂ ਅਤਿਕ੍ਕਾਮਯਤੋ ਸਹਨਿਸ੍ਸਗ੍ਗਿਯવਿਨਯਕਮ੍ਮਂ ਪਾਚਿਤ੍ਤਿਯਂ ਸਿਯਾ, ਅਯਮੇਤ੍ਥ ਅਤ੍ਥੋ। ਤਂ ਪਨੇਤਂ ਚੀવਰਂ ਯਂ ਦਿવਸਂ ਉਪ੍ਪਨ੍ਨਂ, ਤਸ੍ਸ ਯੋ ਅਰੁਣੋ, ਸੋ ਉਪ੍ਪਨ੍ਨਦਿવਸਨਿਸ੍ਸਿਤੋ, ਤਸ੍ਮਾ ਚੀવਰੁਪ੍ਪਾਦਦਿવਸੇਨ ਸਦ੍ਧਿਂ ਏਕਾਦਸੇ ਅਰੁਣੁਗ੍ਗਮਨੇ ਦਸਾਹਾਤਿਕ੍ਕਮਿਤਂ ਹੋਤੀਤਿ। ਚੀવਰਸ੍ਸ ਅਤ੍ਤਨੋ ਸਨ੍ਤਕਤਾ, ਜਾਤਿਪ੍ਪਮਾਣਯੁਤ੍ਤਤਾ, ਛਿਨ੍ਨਪਲਿਬੋਧਭਾવੋ, ਅਤਿਰੇਕਚੀવਰਤਾ, ਦਸਾਹਾਤਿਕ੍ਕਮੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਪਠਮਕਥਿਨਸਿਕ੍ਖਾਪਦਂ।
Dasa ahāni dasāhaṃ. Atimāpetīti atikkāmeti. Tassāti tassa bhikkhuno. Nissaggiyanti nissajjanaṃ nissaggiyaṃ, pubbabhāge kattabbassa vinayakammassetaṃ nāmaṃ, nissaggiyamassa atthīti nissaggiyaṃ, kiṃ taṃ? Pācittiyaṃ, taṃ atikkāmayato sahanissaggiyavinayakammaṃ pācittiyaṃ siyā, ayamettha attho. Taṃ panetaṃ cīvaraṃ yaṃ divasaṃ uppannaṃ, tassa yo aruṇo, so uppannadivasanissito, tasmā cīvaruppādadivasena saddhiṃ ekādase aruṇuggamane dasāhātikkamitaṃ hotīti. Cīvarassa attano santakatā, jātippamāṇayuttatā, chinnapalibodhabhāvo, atirekacīvaratā, dasāhātikkamoti imānettha pañca aṅgāni. Paṭhamakathinasikkhāpadaṃ.
੧੮. ਇਦਾਨਿ ਦੁਤਿਯਂ ਦਸ੍ਸੇਤੁਂ ‘‘ਭਿਕ੍ਖੁਸਮ੍ਮੁਤਿਯਾ’’ਤ੍ਯਾਦਿਮਾਰਦ੍ਧਂ। ਯੋ ਭਿਕ੍ਖੁਸਮ੍ਮੁਤਿਂ વਜ੍ਜੇਤ੍વਾ ਕਾਲਞ੍ਚ વਿਨਾ ਅਧਿਟ੍ਠਿਤਂ ਤਿਚੀવਰਂ ਏਕਾਹਂ ਅਤਿਕ੍ਕਮਾਪੇਤਿ, ਤਸ੍ਸ ਨਿਸ੍ਸਗ੍ਗਿਯਂ ਸਿਯਾਤਿ ਸਮ੍ਬਨ੍ਧੋ। ਤਤ੍ਥ ਭਿਕ੍ਖੁਸਮ੍ਮੁਤਿਯਾਞ੍ਞਤ੍ਰਾਤਿ ਯਂ ਸਙ੍ਘੋ ਗਿਲਾਨਸ੍ਸ ਭਿਕ੍ਖੁਨੋ ਤਿਚੀવਰੇਨ વਿਪ੍ਪવਾਸਸਮ੍ਮੁਤਿਂ ਦੇਤਿ , ਤਂ ਠਪੇਤ੍વਾ। ਤਿਚੀવਰਮਧਿਟ੍ਠਿਤਨ੍ਤਿ ਕਰਣਤ੍ਥੇ ਉਪਯੋਗવਚਨਂ, ਤੇਨ ਤਿਚੀવਰਾਧਿਟ੍ਠਾਨਨਯੇਨ ਅਧਿਟ੍ਠਿਤੇਸੁ ਸਙ੍ਘਾਟਿਆਦੀਸੁ ਯੇਨ ਕੇਨਚਿ ਚੀવਰੇਨ। ਏਕਾਹਨ੍ਤਿ ਏਕਰਤ੍ਤਂ। ਅਤਿਮਾਪੇਤੀਤਿ વਿਪ੍ਪવਸਤਿ, વਿਯੁਤ੍ਤੋ વਸਤੀਤਿ ਅਤ੍ਥੋ। ਤਸ੍ਸ ਅਲਦ੍ਧਸਮ੍ਮੁਤਿਕਸ੍ਸ ਭਿਕ੍ਖੁਨੋ ਏਕਰਤ੍ਤਮ੍ਪਿ ਚੀવਰੇਨ વਿਪ੍ਪવਾਸਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ। ਸਮਯਂ વਿਨਾਤਿ ਚੀવਰਕਾਲਂ વਜ੍ਜੇਤ੍વਾ। ਅਧਿਟ੍ਠਿਤਚੀવਰਤਾ, ਅਨਤ੍ਥਤਕਥਿਨਤਾ, ਅਲਦ੍ਧਸਮ੍ਮੁਤਿਤਾ, ਰਤ੍ਤਿવਿਪ੍ਪવਾਸੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ। ਦੁਤਿਯਕਥਿਨਸਿਕ੍ਖਾਪਦਂ।
18. Idāni dutiyaṃ dassetuṃ ‘‘bhikkhusammutiyā’’tyādimāraddhaṃ. Yo bhikkhusammutiṃ vajjetvā kālañca vinā adhiṭṭhitaṃ ticīvaraṃ ekāhaṃ atikkamāpeti, tassa nissaggiyaṃ siyāti sambandho. Tattha bhikkhusammutiyāññatrāti yaṃ saṅgho gilānassa bhikkhuno ticīvarena vippavāsasammutiṃ deti , taṃ ṭhapetvā. Ticīvaramadhiṭṭhitanti karaṇatthe upayogavacanaṃ, tena ticīvarādhiṭṭhānanayena adhiṭṭhitesu saṅghāṭiādīsu yena kenaci cīvarena. Ekāhanti ekarattaṃ. Atimāpetīti vippavasati, viyutto vasatīti attho. Tassa aladdhasammutikassa bhikkhuno ekarattampi cīvarena vippavāsato nissaggiyaṃ pācittiyaṃ siyāti attho. Samayaṃ vināti cīvarakālaṃ vajjetvā. Adhiṭṭhitacīvaratā, anatthatakathinatā, aladdhasammutitā, rattivippavāsoti imānettha cattāri aṅgāni. Dutiyakathinasikkhāpadaṃ.
੧੯. ਇਦਾਨਿ ਪੁਰਾਣਚੀવਰਂ ਦਸ੍ਸੇਤੁਂ ‘‘ਅਞ੍ਞਾਤਿਕਾ’’ਤ੍ਯਾਦਿ ਆਰਦ੍ਧਂ। ਤਤ੍ਥ ਅਞ੍ਞਾਤਿਕਾਤਿ ਅਞ੍ਞਾਤਿਕਾਯ ‘‘ਪਟਿਸਙ੍ਖਾ ਯੋਨਿਸੋ’’ਤਿਆਦੀਸੁ વਿਯ, ਅਞ੍ਞਾਤਿਕਾਯ ਨੇવ ਮਾਤੁਸਮ੍ਬਨ੍ਧੇਨ ਨ ਪਿਤੁਸਮ੍ਬਨ੍ਧੇਨ ਸਮ੍ਬਦ੍ਧਾਯਾਤਿ વੁਤ੍ਤਂ ਹੋਤਿ। ਭਿਕ੍ਖੁਨਿਯਾਤਿ ਅਟ੍ਠવਾਚਿਕਕਮ੍ਮੇਨ ਉਪਸਮ੍ਪਨ੍ਨਾਯ। ਆਕੋਟਾਪੇਤੀਤਿ ਪਹਰਾਪੇਤਿ। ਤਨ੍ਤਿ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ ਭવੇਯ੍ਯਾਤਿ ਅਤ੍ਥੋ। ਪੁਰਾਣਚੀવਰਤਾ, ਉਪਚਾਰੇ ਠਤ੍વਾ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਆਣਾਪਨਂ, ਤਸ੍ਸਾ ਧੋવਨਾਦੀਨਿ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਪੁਰਾਣਚੀવਰਸਿਕ੍ਖਾਪਦਂ।
19. Idāni purāṇacīvaraṃ dassetuṃ ‘‘aññātikā’’tyādi āraddhaṃ. Tattha aññātikāti aññātikāya ‘‘paṭisaṅkhā yoniso’’tiādīsu viya, aññātikāya neva mātusambandhena na pitusambandhena sambaddhāyāti vuttaṃ hoti. Bhikkhuniyāti aṭṭhavācikakammena upasampannāya. Ākoṭāpetīti paharāpeti. Tanti nissaggiyaṃ pācittiyaṃ bhaveyyāti attho. Purāṇacīvaratā, upacāre ṭhatvā aññātikāya bhikkhuniyā āṇāpanaṃ, tassā dhovanādīni cāti imānettha tīṇi aṅgāni. Purāṇacīvarasikkhāpadaṃ.
੨੦. ਕਿਞ੍ਚਿ ਮੂਲਕਨ੍ਤਿ ਕਿਞ੍ਚਿ ਪਾਭਤਂ। ਚੀવਰਾਦਾਨੇਤਿ ਚੀવਰਸ੍ਸ ਆਦਾਨੇ ਚੀવਰਪ੍ਪਟਿਗ੍ਗਹਣੇ। વਿਕਪ੍ਪਨੂਪਗਚੀવਰਤਾ, ਪਾਰਿવਤ੍ਤਕਾਭਾવੋ, ਅਞ੍ਞਾਤਿਕਾਯ ਹਤ੍ਥਤੋ ਗਹਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਚੀવਰਪ੍ਪਟਿਗ੍ਗਹਣਸਿਕ੍ਖਾਪਦਂ।
20.Kiñci mūlakanti kiñci pābhataṃ. Cīvarādāneti cīvarassa ādāne cīvarappaṭiggahaṇe. Vikappanūpagacīvaratā, pārivattakābhāvo, aññātikāya hatthato gahaṇanti imānettha tīṇi aṅgāni. Cīvarappaṭiggahaṇasikkhāpadaṃ.
੨੧. ਅਪ੍ਪવਾਰਿਤਨ੍ਤਿ ‘‘વਦੇਯ੍ਯਾਥ, ਭਨ੍ਤੇ, ਯੇਨ ਅਤ੍ਥੋ’’ਤਿ ਇਚ੍ਛਾਪਿਤਂ ਇਚ੍ਛਂ ਰੁਚਿਂ ਉਪ੍ਪਾਦਿਤਂ, ਨ ਪવਾਰਿਤਨ੍ਤਿ ਅਪ੍ਪવਾਰਿਤਂ। વਿਞ੍ਞਾਪੇਨ੍ਤਸ੍ਸਾਤਿ ਯਾਚਨ੍ਤਸ੍ਸ। ਅਞ੍ਞਤ੍ਰ ਸਮਯਾਤਿ ਨਟ੍ਠਚੀવਰਕਾਲਂ ਠਪੇਤ੍વਾ। વਿਕਪ੍ਪਨੂਪਗਚੀવਰਤਾ, ਸਮਯਾਭਾવੋ, ਅਞ੍ਞਾਤਕવਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ। ਅਞ੍ਞਾਤਕવਿਞ੍ਞਤ੍ਤਿਸਿਕ੍ਖਾਪਦਂ।
21.Appavāritanti ‘‘vadeyyātha, bhante, yena attho’’ti icchāpitaṃ icchaṃ ruciṃ uppāditaṃ, na pavāritanti appavāritaṃ. Viññāpentassāti yācantassa. Aññatra samayāti naṭṭhacīvarakālaṃ ṭhapetvā. Vikappanūpagacīvaratā, samayābhāvo, aññātakaviññatti, tāya ca paṭilābhoti imānettha cattāri aṅgāni. Aññātakaviññattisikkhāpadaṃ.
੨੨. ਰਜਤਨ੍ਤਿ ਰੂਪਿਯਂ। ਜਾਤਰੂਪਨ੍ਤਿ ਸੁવਣ੍ਣਂ। ਮਾਸਕਨ੍ਤਿ ਤਯੋ ਮਾਸਕਾ ਲੋਹਮਾਸਕੋ ਦਾਰੁਮਾਸਕੋ ਜਤੁਮਾਸਕੋਤਿ। ਤਤ੍ਥ ਲੋਹਮਾਸਕੋਤਿ ਤਮ੍ਬਲੋਹਾਦੀਹਿ ਕਤਮਾਸਕੋ। ਦਾਰੁਮਾਸਕੋਤਿ ਸਾਰਦਾਰੁਨਾ વਾ વੇਲ਼ੁਪੇਸਿਕਾਯ વਾ ਅਨ੍ਤਮਸੋ ਤਾਲਪਣ੍ਣੇਨਪਿ ਰੂਪਂ ਛਿਨ੍ਦਿਤ੍વਾ ਕਤਮਾਸਕੋ। ਜਤੁਮਾਸਕੋਤਿ ਲਾਖਾਯ વਾ ਨਿਯ੍ਯਾਸੇਨ વਾ ਰੂਪਂ ਸਮੁਟ੍ਠਾਪੇਤ੍વਾ ਕਤਮਾਸਕੋ। ਕਹਾਪਣਨ੍ਤਿ ਸੁવਣ੍ਣਮਯਂ વਾ ਰੂਪਿਯਮਯਂ વਾ ਪਾਕਤਿਕਂ વਾ। ਗਣ੍ਹੇਯ੍ਯਾਤਿ ਅਤ੍ਤਨੋ ਅਤ੍ਥਾਯ ਦੀਯਮਾਨਂ વਾ ਕਤ੍ਥਚਿ ਠਿਤਂ વਾ ਨਿਪ੍ਪਰਿਗ੍ਗਹਂ ਦਿਸ੍વਾ ਸਯਂ ਗਣ੍ਹੇਯ੍ਯ। ਗਣ੍ਹਾਪੇਯ੍ਯਾਤਿ ਤਦੇવ ਅਞ੍ਞੇਨ ਗਾਹਾਪੇਯ੍ਯ। ਨਿਸ੍ਸਗ੍ਗੀਤਿ ਗਹਣਾਦੀਸੁ ਯਂ ਕਿਞ੍ਚਿ ਕਰੋਨ੍ਤਸ੍ਸ ਅਘਨਬਦ੍ਧੇਸੁ વਤ੍ਥੁਗਣਨਾਯ ਨਿਸ੍ਸਗ੍ਗਿ ਸਿਯਾਤਿ ਅਤ੍ਥੋ। ਸਾਦਿਯੇਯ੍ਯ વਾਤਿ ਕਾਯવਾਚਾਹਿ ਅਪ੍ਪਟਿਕ੍ਖਿਪਿਤ੍વਾ ਚਿਤ੍ਤੇਨ ਅਧਿવਾਸੇਯ੍ਯ। ਜਾਤਰੂਪਰਜਤਭਾવੋ, ਅਤ੍ਤੁਦ੍ਦੇਸਿਕਤਾ, ਗਹਣਾਦੀਸੁ ਅਞ੍ਞਤਰਭਾવੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਰੂਪਿਯਪ੍ਪਟਿਗ੍ਗਹਣਸਿਕ੍ਖਾਪਦਂ।
22.Rajatanti rūpiyaṃ. Jātarūpanti suvaṇṇaṃ. Māsakanti tayo māsakā lohamāsako dārumāsako jatumāsakoti. Tattha lohamāsakoti tambalohādīhi katamāsako. Dārumāsakoti sāradārunā vā veḷupesikāya vā antamaso tālapaṇṇenapi rūpaṃ chinditvā katamāsako. Jatumāsakoti lākhāya vā niyyāsena vā rūpaṃ samuṭṭhāpetvā katamāsako. Kahāpaṇanti suvaṇṇamayaṃ vā rūpiyamayaṃ vā pākatikaṃ vā. Gaṇheyyāti attano atthāya dīyamānaṃ vā katthaci ṭhitaṃ vā nippariggahaṃ disvā sayaṃ gaṇheyya. Gaṇhāpeyyāti tadeva aññena gāhāpeyya. Nissaggīti gahaṇādīsu yaṃ kiñci karontassa aghanabaddhesu vatthugaṇanāya nissaggi siyāti attho. Sādiyeyya vāti kāyavācāhi appaṭikkhipitvā cittena adhivāseyya. Jātarūparajatabhāvo, attuddesikatā, gahaṇādīsu aññatarabhāvoti imānettha tīṇi aṅgāni. Rūpiyappaṭiggahaṇasikkhāpadaṃ.
੨੩. ਰਜਤਾਦਿਚਤੁਬ੍ਬਿਧਂ ਅਕਪ੍ਪਿਯਂ ਕਪ੍ਪਿਯੇਨਾਪਿ ਪਰਿવਤ੍ਤੇਯ੍ਯ ਸਹਧਮ੍ਮਿਕੇ ਠਪੇਤ੍વਾ, ਨਿਸ੍ਸਗ੍ਗਿਯਂ ਸਿਯਾਤਿ ਸਮ੍ਬਨ੍ਧੋ। ਤਤ੍ਥ ਅਕਪ੍ਪਿਯਨ੍ਤਿ ਅਕਪ੍ਪਿਯવਤ੍ਥੁਂ। ਕਪ੍ਪਿਯੇਨਾਤਿ ਕਪ੍ਪਿਯવਤ੍ਥੁਨਾ। ਸਹਧਮ੍ਮਿਕੇਤਿ ਭਿਕ੍ਖੁਭਿਕ੍ਖੁਨਿਸਾਮਣੇਰਸਾਮਣੇਰਿਸਿਕ੍ਖਮਾਨਸਙ੍ਖਾਤੇ ਪਞ੍ਚ ਸਹਧਮ੍ਮਿਕੇ। ਰੂਪਿਯਭਾવੋ, ਪਰਿવਤ੍ਤਨਞ੍ਚਾਤਿ ਇਮਾਨੇਤ੍ਥ ਦ੍વੇ ਅਙ੍ਗਾਨਿ। ਰੂਪਿਯਪਰਿવਤ੍ਤਨਸਿਕ੍ਖਾਪਦਂ।
23. Rajatādicatubbidhaṃ akappiyaṃ kappiyenāpi parivatteyya sahadhammike ṭhapetvā, nissaggiyaṃ siyāti sambandho. Tattha akappiyanti akappiyavatthuṃ. Kappiyenāti kappiyavatthunā. Sahadhammiketi bhikkhubhikkhunisāmaṇerasāmaṇerisikkhamānasaṅkhāte pañca sahadhammike. Rūpiyabhāvo, parivattanañcāti imānettha dve aṅgāni. Rūpiyaparivattanasikkhāpadaṃ.
੨੪. ‘‘ਇਮਂ ਪਤ੍ਤਂ ਤੁਯ੍ਹਂ વਿਕਪ੍ਪੇਮੀ’’ਤਿਆਦਿਨਾ વਿਕਪ੍ਪਨਞ੍ਚ ‘‘ਇਮਂ ਪਤ੍ਤਂ ਅਧਿਟ੍ਠਾਮੀ’’ਤਿਆਦਿਨਾ ਅਧਿਟ੍ਠਾਨਞ੍ਚ ਅਕਤ੍વਾਤਿ ਅਤ੍ਥੋ। ਪਮਾਣਿਕਨ੍ਤਿ ਏਤ੍ਥਾਯਂ વਿਨਿਚ੍ਛਯੋ – ਅਨੁਪਹਤਪੁਰਾਣਸਾਲਿਤਣ੍ਡੁਲਾਨਂ ਸੁਕੋਟ੍ਟਿਤਪਰਿਸੁਦ੍ਧਾਨਂ ਦ੍વੇ ਮਗਧਨਾਲ਼ਿਯੋ ਗਹੇਤ੍વਾ ਤੇਹਿ ਤਣ੍ਡੁਲੇਹਿ ਅਨੁਤ੍ਤਣ੍ਡੁਲਮਕਿਲਿਨ੍ਨਮਪਿਣ੍ਡਿਤਂ ਸੁવਿਸਦਂ ਕੁਨ੍ਦਮਕੁਲ਼ਰਾਸਿਸਦਿਸਂ ਅવਸ੍ਸਾવਿਤੋਦਨਂ ਪਚਿਤ੍વਾ ਨਿਰવਸੇਸਂ ਪਤ੍ਤੇ ਪਕ੍ਖਿਪਿਤ੍વਾ ਤਸ੍ਸ ਓਦਨਸ੍ਸ ਚਤੁਤ੍ਥਭਾਗਪ੍ਪਮਾਣੋ ਨਾਤਿਘਨੋ ਨਾਤਿਤਨੁਕੋ ਹਤ੍ਥਹਾਰਿਯੋ ਸਬ੍ਬਸਮ੍ਭਾਰਸਙ੍ਖਤੋ ਮੁਗ੍ਗਸੂਪੋ ਪਕ੍ਖਿਪਿਤਬ੍ਬੋ, ਤਤੋ ਆਲੋਪਸ੍ਸ ਅਨੁਰੂਪਂ ਯਾવਚਰਿਮਾਲੋਪਪ੍ਪਹੋਨਕਂ ਮਚ੍ਛਮਂਸਾਦਿਬ੍ਯਞ੍ਜਨਂ ਪਕ੍ਖਿਪਿਤਬ੍ਬਂ। ਸਪ੍ਪਿਤੇਲਤਕ੍ਕਰਸਕਞ੍ਜਿਕਾਦੀਨਿ ਪਨ ਅਗਣਨੂਪਗਾਨਿ ਹੋਨ੍ਤਿ। ਤਾਨਿ ਹਿ ਓਦਨਗਤਿਕਾਨਿ ਨੇવ ਹਾਪੇਤੁਂ, ਨ વਡ੍ਢੇਤੁਂ ਸਕ੍ਕੋਨ੍ਤਿ। ਏવਮੇਤਂ ਸਬ੍ਬਮ੍ਪਿ ਪਕ੍ਖਿਤ੍ਤਂ ਸਚੇ ਪਨ ਪਤ੍ਤਸ੍ਸ ਮੁਖવਟ੍ਟਿਯਾ ਹੇਟ੍ਠਿਮਰਾਜਿਸਮਂ ਤਿਟ੍ਠਤਿ, ਸੁਤ੍ਤੇਨ વਾ ਹੀਰੇਨ વਾ ਛਿਨ੍ਦਨ੍ਤਸ੍ਸ ਸੁਤ੍ਤਸ੍ਸ વਾ ਹੀਰਸ੍ਸ વਾ ਹੇਟ੍ਠਿਮਨ੍ਤਂ ਫੁਸਤਿ, ਅਯਂ ਉਕ੍ਕਟ੍ਠੋ ਨਾਮ ਪਤ੍ਤੋ। ਸਚੇ ਤਂ ਰਾਜਿਂ ਅਤਿਕ੍ਕਮ੍ਮ ਥੂਪੀਕਤਂ ਤਿਟ੍ਠਤਿ, ਅਯਂ ਉਕ੍ਕਟ੍ਠੋਮਕੋ ਨਾਮ ਪਤ੍ਤੋ। ਸਚੇ ਤਂ ਰਾਜਿਂ ਨ ਸਮ੍ਪਾਪੁਣਾਤਿ, ਅਨ੍ਤੋਗਤਮੇવ ਹੋਤਿ, ਅਯਂ ਉਕ੍ਕਟ੍ਠੁਕ੍ਕਟ੍ਠੋ ਨਾਮ। ਉਕ੍ਕਟ੍ਠਤੋ ਉਪਡ੍ਢਪ੍ਪਮਾਣੋ ਮਜ੍ਝਿਮੋ। ਮਜ੍ਝਿਮਤੋ ਉਪਡ੍ਢਪ੍ਪਮਾਣੋ ਓਮਕੋ। ਤੇਸਮ੍ਪਿ વੁਤ੍ਤਨਯੇਨੇવ ਪਭੇਦੋ વੇਦਿਤਬ੍ਬੋ। ਇਚ੍ਚੇਤੇਸੁ ਉਕ੍ਕਟ੍ਠੁਕ੍ਕਟ੍ਠੋ ਚ ਓਮਕੋਮਕੋ ਚਾਤਿ ਦ੍વੇ ਅਪਤ੍ਤਾ, ਸੇਸਾ ਸਤ੍ਤ ਪਤ੍ਤਾ ਪਮਾਣਯੁਤ੍ਤਾ ਨਾਮਾਤਿ ਏવਂ ਪਮਾਣੇਨ ਯੁਤ੍ਤੋ ਪਮਾਣਿਕੋ, ਤਂ ਪਮਾਣਿਕਂ। ਪਤ੍ਤਨ੍ਤਿ ਸਤ੍ਤਸੁ ਪਤ੍ਤੇਸੁ ਅਞ੍ਞਤਰਂ ਪਤ੍ਤਂ। ਪਤ੍ਤਸ੍ਸ ਅਤ੍ਤਨੋ ਸਨ੍ਤਕਤਾ, ਪਮਾਣਯੁਤ੍ਤਤਾ, ਅਧਿਟ੍ਠਾਨੂਪਗਤਾ, ਅਤਿਰੇਕਪਤ੍ਤਤਾ, ਦਸਾਹਾਤਿਕ੍ਕਮੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਪਠਮਪਤ੍ਤਸਿਕ੍ਖਾਪਦਂ।
24. ‘‘Imaṃ pattaṃ tuyhaṃ vikappemī’’tiādinā vikappanañca ‘‘imaṃ pattaṃ adhiṭṭhāmī’’tiādinā adhiṭṭhānañca akatvāti attho. Pamāṇikanti etthāyaṃ vinicchayo – anupahatapurāṇasālitaṇḍulānaṃ sukoṭṭitaparisuddhānaṃ dve magadhanāḷiyo gahetvā tehi taṇḍulehi anuttaṇḍulamakilinnamapiṇḍitaṃ suvisadaṃ kundamakuḷarāsisadisaṃ avassāvitodanaṃ pacitvā niravasesaṃ patte pakkhipitvā tassa odanassa catutthabhāgappamāṇo nātighano nātitanuko hatthahāriyo sabbasambhārasaṅkhato muggasūpo pakkhipitabbo, tato ālopassa anurūpaṃ yāvacarimālopappahonakaṃ macchamaṃsādibyañjanaṃ pakkhipitabbaṃ. Sappitelatakkarasakañjikādīni pana agaṇanūpagāni honti. Tāni hi odanagatikāni neva hāpetuṃ, na vaḍḍhetuṃ sakkonti. Evametaṃ sabbampi pakkhittaṃ sace pana pattassa mukhavaṭṭiyā heṭṭhimarājisamaṃ tiṭṭhati, suttena vā hīrena vā chindantassa suttassa vā hīrassa vā heṭṭhimantaṃ phusati, ayaṃ ukkaṭṭho nāma patto. Sace taṃ rājiṃ atikkamma thūpīkataṃ tiṭṭhati, ayaṃ ukkaṭṭhomako nāma patto. Sace taṃ rājiṃ na sampāpuṇāti, antogatameva hoti, ayaṃ ukkaṭṭhukkaṭṭho nāma. Ukkaṭṭhato upaḍḍhappamāṇo majjhimo. Majjhimato upaḍḍhappamāṇo omako. Tesampi vuttanayeneva pabhedo veditabbo. Iccetesu ukkaṭṭhukkaṭṭho ca omakomako cāti dve apattā, sesā satta pattā pamāṇayuttā nāmāti evaṃ pamāṇena yutto pamāṇiko, taṃ pamāṇikaṃ. Pattanti sattasu pattesu aññataraṃ pattaṃ. Pattassa attano santakatā, pamāṇayuttatā, adhiṭṭhānūpagatā, atirekapattatā, dasāhātikkamoti imānettha pañca aṅgāni. Paṭhamapattasikkhāpadaṃ.
੨੫. ਯੋ ਭਿਕ੍ਖੁ ਪਞ੍ਚਬਨ੍ਧਨਤੋ ਊਨਪਤ੍ਤੇ ਸਤਿ ਪਰਂ ਪਨ ਨવਂ ਪਤ੍ਤਂ વਿਞ੍ਞਾਪੇਤਿ, ਤਸ੍ਸਪਿ ਭਿਕ੍ਖੁਨੋ ਨਿਸ੍ਸਗ੍ਗਿਯਂ ਸਿਯਾਤਿ ਸਮ੍ਬਨ੍ਧੋ। ਤਤ੍ਥ ਪਰਨ੍ਤਿ ਅਞ੍ਞਂ, ‘‘ਨવਂ ਪਤ੍ਤ’’ਨ੍ਤਿਮਿਨਾ ਤੁਲ੍ਯਾਧਿਕਰਣਂ। ਅਧਿਟ੍ਠਾਨੂਪਗਪਤ੍ਤਸ੍ਸ ਊਨਪਞ੍ਚਬਨ੍ਧਨਤਾ, ਅਤ੍ਤੁਦ੍ਦੇਸਿਕਤਾ, ਕਤવਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ। ਊਨਪਞ੍ਚਬਨ੍ਧਨਸਿਕ੍ਖਾਪਦਂ।
25. Yo bhikkhu pañcabandhanato ūnapatte sati paraṃ pana navaṃ pattaṃ viññāpeti, tassapi bhikkhuno nissaggiyaṃ siyāti sambandho. Tattha paranti aññaṃ, ‘‘navaṃ patta’’ntiminā tulyādhikaraṇaṃ. Adhiṭṭhānūpagapattassa ūnapañcabandhanatā, attuddesikatā, kataviññatti, tāya ca paṭilābhoti imānettha cattāri aṅgāni. Ūnapañcabandhanasikkhāpadaṃ.
੨੬. ਯੋ ਸਪ੍ਪਿਤੇਲਾਦਿਕਂ ਪਨ ਭੇਸਜ੍ਜਂ ਪਟਿਗ੍ਗਹੇਤ੍વਾ ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਭੁਞ੍ਜਨ੍ਤੋ ਸਤ੍ਤਾਹਂ ਅਤਿਕ੍ਕਾਮੇਤਿ , ਤਸ੍ਸ ਨਿਸ੍ਸਗ੍ਗਿਯਂ ਸਿਯਾਤਿ ਅਤ੍ਥੋ। ਤਤ੍ਥ ਸਪ੍ਪਿਤੇਲਾਦਿਕਨ੍ਤਿ ਏਤ੍ਥ ਆਦਿ-ਸਦ੍ਦੋ ਨવਨੀਤਮਧੁਫਾਣਿਤਂ ਸਙ੍ਗਣ੍ਹਾਤਿ। ਤਤ੍ਥ ਸਪ੍ਪਿ ਨਾਮ ਗવਾਦੀਨਂ ਸਪ੍ਪਿ, ਯੇਸਂ ਮਂਸਂ ਕਪ੍ਪਤਿ, ਤੇਸਂ ਸਪ੍ਪਿ, ਤਥਾ ਨવਨੀਤਂ। ਤੇਲਂ ਨਾਮ ਤਿਲਸਾਸਪਮਧੁਕਏਰਣ੍ਡવਸਾਦੀਹਿ ਨਿਬ੍ਬਤ੍ਤਂ। ਮਧੁ ਨਾਮ ਮਕ੍ਖਿਕਾਮਧੁਮੇવ। ਉਚ੍ਛੁਰਸਂ ਉਪਾਦਾਯ ਪਨ ਅਪਕ੍ਕਾ વਾ ਅવਤ੍ਥੁਕਪਕ੍ਕਾ વਾ ਸਬ੍ਬਾਪਿ ਉਚ੍ਛੁવਿਕਤਿ ਫਾਣਿਤਨ੍ਤਿ વੇਦਿਤਬ੍ਬਂ। ਭੇਸਜ੍ਜવਿਧਾਨਸਿਕ੍ਖਾਪਦਂ।
26. Yo sappitelādikaṃ pana bhesajjaṃ paṭiggahetvā sattāhaparamaṃ sannidhikārakaṃ bhuñjanto sattāhaṃ atikkāmeti , tassa nissaggiyaṃ siyāti attho. Tattha sappitelādikanti ettha ādi-saddo navanītamadhuphāṇitaṃ saṅgaṇhāti. Tattha sappi nāma gavādīnaṃ sappi, yesaṃ maṃsaṃ kappati, tesaṃ sappi, tathā navanītaṃ. Telaṃ nāma tilasāsapamadhukaeraṇḍavasādīhi nibbattaṃ. Madhu nāma makkhikāmadhumeva. Ucchurasaṃ upādāya pana apakkā vā avatthukapakkā vā sabbāpi ucchuvikati phāṇitanti veditabbaṃ. Bhesajjavidhānasikkhāpadaṃ.
੨੭. ਭਿਕ੍ਖੁਸ੍ਸ ਚੀવਰਂ ਦਤ੍વਾ ਪੁਨ ਤਂ ਚੀવਰਂ ਸਕਸਞ੍ਞਾਯ ਅਚ੍ਛਿਨ੍ਦਨ੍ਤਸ੍ਸ વਾ ਅਚ੍ਛਿਨ੍ਦਾਪਯਤੋਪਿ વਾ ਨਿਸ੍ਸਗ੍ਗਿਯਂ ਸਿਯਾਤਿ ਯੋਜਨਾ। ਤਤ੍ਥ ਦਤ੍વਾਤਿ વੇਯ੍ਯਾવਚ੍ਚਾਦੀਨਿ ਪਚ੍ਚਾਸੀਸਮਾਨੋ ਦਤ੍વਾ। ਅਚ੍ਛਿਨ੍ਦਨ੍ਤਸ੍ਸਾਤਿ વੇਯ੍ਯਾવਚ੍ਚਾਦੀਨਿ ਅਕਰੋਨ੍ਤਂ ਦਿਸ੍વਾ ਬਲਕ੍ਕਾਰੇਨ ਗਣ੍ਹਨ੍ਤਸ੍ਸ, ਤਥਾ ਅਚ੍ਛਿਨ੍ਦਾਪਯਤੋਤਿ। વਿਕਪ੍ਪਨੂਪਗਚੀવਰਤਾ, ਸਾਮਂਦਿਨ੍ਨਤਾ, ਸਕਸਞ੍ਞਿਤਾ, ਉਪਸਮ੍ਪਨ੍ਨਤਾ, ਕੋਧવਸੇਨ ਅਚ੍ਛਿਨ੍ਦਨਂ વਾ ਅਚ੍ਛਿਨ੍ਦਾਪਨਂ વਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਅਚ੍ਛਿਨ੍ਦਨਸਿਕ੍ਖਾਪਦਂ।
27. Bhikkhussa cīvaraṃ datvā puna taṃ cīvaraṃ sakasaññāya acchindantassa vā acchindāpayatopi vā nissaggiyaṃ siyāti yojanā. Tattha datvāti veyyāvaccādīni paccāsīsamāno datvā. Acchindantassāti veyyāvaccādīni akarontaṃ disvā balakkārena gaṇhantassa, tathā acchindāpayatoti. Vikappanūpagacīvaratā, sāmaṃdinnatā, sakasaññitā, upasampannatā, kodhavasena acchindanaṃ vā acchindāpanaṃ vāti imānettha pañca aṅgāni. Acchindanasikkhāpadaṃ.
੨੮. ਅਪ੍ਪવਾਰਿਤਂ ਅਞ੍ਞਾਤਿਂ ਗਹਪਤਿਂ ਸੁਤ੍ਤਂ ਯਾਚਿਤ੍વਾ ਞਾਤਿਪ੍ਪવਾਰਿਤੇ વਜ੍ਜੇਤ੍વਾ ਤਨ੍ਤવਾਯੇਹਿ ਚੀવਰਂ વਾਯਾਪੇਨ੍ਤਸ੍ਸ ਨਿਸ੍ਸਗ੍ਗਿਯਂ ਸਿਯਾਤਿ ਪਿਣ੍ਡਤ੍ਥੋ। ਤਤ੍ਥ ਸੁਤ੍ਤਨ੍ਤਿ ਛਬ੍ਬਿਧਂ ਖੋਮਸੁਤ੍ਤਾਦਿਕਂ વਾ ਤੇਸਂ ਅਨੁਲੋਮਂ વਾ। ਯਾਚਿਯਾਤਿ ਚੀવਰਤ੍ਥਾਯ ਯਾਚਿਤ੍વਾ। ਚੀવਰਤ੍ਥਾਯ વਿਞ੍ਞਾਪਿਤਸੁਤ੍ਤਂ, ਅਤ੍ਤੁਦ੍ਦੇਸਿਕਤਾ, ਅਕਪ੍ਪਿਯਤਨ੍ਤવਾਯੇਨ ਅਕਪ੍ਪਿਯવਿਞ੍ਞਤ੍ਤਿਯਾ વਾਯਾਪਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਸੁਤ੍ਤવਿਞ੍ਞਤ੍ਤਿਸਿਕ੍ਖਾਪਦਂ।
28. Appavāritaṃ aññātiṃ gahapatiṃ suttaṃ yācitvā ñātippavārite vajjetvā tantavāyehi cīvaraṃ vāyāpentassa nissaggiyaṃ siyāti piṇḍattho. Tattha suttanti chabbidhaṃ khomasuttādikaṃ vā tesaṃ anulomaṃ vā. Yāciyāti cīvaratthāya yācitvā. Cīvaratthāya viññāpitasuttaṃ, attuddesikatā, akappiyatantavāyena akappiyaviññattiyā vāyāpananti imānettha tīṇi aṅgāni. Suttaviññattisikkhāpadaṃ.
੨੯. ਯੋ ਭਿਕ੍ਖੁ ਸਙ੍ਘਸ੍ਸ ਪਰਿਣਤਂ ਲਾਭਂ ਜਾਨਨ੍ਤੋ ਅਤ੍ਤਨੋ ਪਰਿਣਾਮੇਤਿ, ਤਸ੍ਸ ਨਿਸ੍ਸਗ੍ਗਿਯਂ ਸਿਯਾਤਿ ਅਤ੍ਥੋ। ਤਤ੍ਥ ਜਾਨਨ੍ਤਿ ਜਾਨਨ੍ਤੋ। ਲਾਭਨ੍ਤਿ ਲਭਿਤਬ੍ਬਂ ਚੀવਰਾਦਿવਤ੍ਥੁਂ। ਪਰਿਣਤਨ੍ਤਿ ਸਙ੍ਘਸ੍ਸ ਨਿਨ੍ਨਂ ਸਙ੍ਘਸ੍ਸ ਪੋਣਂ ਸਙ੍ਘਸ੍ਸ ਪਬ੍ਭਾਰਂ ਹੁਤ੍વਾ ਠਿਤਂ। ਅਤ੍ਤਨੋ ਪਰਿਣਾਮੇਤੀਤਿ ‘‘ਮਯ੍ਹਂ ਦੇਥਾ’’ਤਿਆਦੀਨਿ વਦਨ੍ਤੋ ਅਤ੍ਤਨਿ ਨਿਨ੍ਨਂ ਕਰੋਤਿ। ਸਙ੍ਘੇ ਪਰਿਣਤਭਾવੋ, ਤਂ ਞਤ੍વਾ ਅਤ੍ਤਨੋ ਪਰਿਣਾਮਨਂ, ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਪਰਿਣਾਮਨਸਿਕ੍ਖਾਪਦਂ।
29. Yo bhikkhu saṅghassa pariṇataṃ lābhaṃ jānanto attano pariṇāmeti, tassa nissaggiyaṃ siyāti attho. Tattha jānanti jānanto. Lābhanti labhitabbaṃ cīvarādivatthuṃ. Pariṇatanti saṅghassa ninnaṃ saṅghassa poṇaṃ saṅghassa pabbhāraṃ hutvā ṭhitaṃ. Attano pariṇāmetīti ‘‘mayhaṃ dethā’’tiādīni vadanto attani ninnaṃ karoti. Saṅghe pariṇatabhāvo, taṃ ñatvā attano pariṇāmanaṃ, paṭilābhoti imānettha tīṇi aṅgāni. Pariṇāmanasikkhāpadaṃ.
ਨਿਸ੍ਸਗ੍ਗਿਯਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Nissaggiyaniddesavaṇṇanā niṭṭhitā.
