| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. নিস্সারণীযসুত্তং
10. Nissāraṇīyasuttaṃ
২০০. ‘‘পঞ্চিমা , ভিক্খৰে, নিস্সারণীযা 1 ধাতুযো। কতমা পঞ্চ? ইধ, ভিক্খৰে, ভিক্খুনো কামং 2 মনসিকরোতো কামেসু চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি। নেক্খম্মং খো পনস্স মনসিকরোতো নেক্খম্মে চিত্তং পক্খন্দতি পসীদতি সন্তিট্ঠতি ৰিমুচ্চতি। তস্স তং চিত্তং সুগতং 3 সুভাৰিতং সুৰুট্ঠিতং সুৰিমুত্তং সুৰিসংযুত্তং 4 কামেহি; যে চ কামপচ্চযা উপ্পজ্জন্তি আসৰা ৰিঘাতপরিল়াহা, মুত্তো সো তেহি, ন সো তং ৰেদনং ৰেদিযতি। ইদমক্খাতং কামানং নিস্সরণং।
200. ‘‘Pañcimā , bhikkhave, nissāraṇīyā 5 dhātuyo. Katamā pañca? Idha, bhikkhave, bhikkhuno kāmaṃ 6 manasikaroto kāmesu cittaṃ na pakkhandati nappasīdati na santiṭṭhati na vimuccati. Nekkhammaṃ kho panassa manasikaroto nekkhamme cittaṃ pakkhandati pasīdati santiṭṭhati vimuccati. Tassa taṃ cittaṃ sugataṃ 7 subhāvitaṃ suvuṭṭhitaṃ suvimuttaṃ suvisaṃyuttaṃ 8 kāmehi; ye ca kāmapaccayā uppajjanti āsavā vighātapariḷāhā, mutto so tehi, na so taṃ vedanaṃ vediyati. Idamakkhātaṃ kāmānaṃ nissaraṇaṃ.
‘‘পুন চপরং, ভিক্খৰে, ভিক্খুনো ব্যাপাদং মনসিকরোতো ব্যাপাদে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি। অব্যাপাদং খো পনস্স মনসিকরোতো অব্যাপাদে চিত্তং পক্খন্দতি পসীদতি সন্তিট্ঠতি ৰিমুচ্চতি। তস্স তং চিত্তং সুগতং সুভাৰিতং সুৰুট্ঠিতং সুৰিমুত্তং সুৰিসংযুত্তং ব্যাপাদেন; যে চ ব্যাপাদপচ্চযা উপ্পজ্জন্তি আসৰা ৰিঘাতপরিল়াহা, মুত্তো সো তেহি, ন সো তং ৰেদনং ৰেদিযতি। ইদমক্খাতং ব্যাপাদস্স নিস্সরণং।
‘‘Puna caparaṃ, bhikkhave, bhikkhuno byāpādaṃ manasikaroto byāpāde cittaṃ na pakkhandati nappasīdati na santiṭṭhati na vimuccati. Abyāpādaṃ kho panassa manasikaroto abyāpāde cittaṃ pakkhandati pasīdati santiṭṭhati vimuccati. Tassa taṃ cittaṃ sugataṃ subhāvitaṃ suvuṭṭhitaṃ suvimuttaṃ suvisaṃyuttaṃ byāpādena; ye ca byāpādapaccayā uppajjanti āsavā vighātapariḷāhā, mutto so tehi, na so taṃ vedanaṃ vediyati. Idamakkhātaṃ byāpādassa nissaraṇaṃ.
‘‘পুন চপরং, ভিক্খৰে, ভিক্খুনো ৰিহেসং মনসিকরোতো ৰিহেসায চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি। অৰিহেসং খো পনস্স মনসিকরোতো অৰিহেসায চিত্তং পক্খন্দতি পসীদতি সন্তিট্ঠতি ৰিমুচ্চতি। তস্স তং চিত্তং সুগতং সুভাৰিতং সুৰুট্ঠিতং সুৰিমুত্তং সুৰিসংযুত্তং ৰিহেসায; যে চ ৰিহেসাপচ্চযা উপ্পজ্জন্তি আসৰা ৰিঘাতপরিল়াহা, মুত্তো সো তেহি, ন সো তং ৰেদনং ৰেদিযতি। ইদমক্খাতং ৰিহেসায নিস্সরণং।
‘‘Puna caparaṃ, bhikkhave, bhikkhuno vihesaṃ manasikaroto vihesāya cittaṃ na pakkhandati nappasīdati na santiṭṭhati na vimuccati. Avihesaṃ kho panassa manasikaroto avihesāya cittaṃ pakkhandati pasīdati santiṭṭhati vimuccati. Tassa taṃ cittaṃ sugataṃ subhāvitaṃ suvuṭṭhitaṃ suvimuttaṃ suvisaṃyuttaṃ vihesāya; ye ca vihesāpaccayā uppajjanti āsavā vighātapariḷāhā, mutto so tehi, na so taṃ vedanaṃ vediyati. Idamakkhātaṃ vihesāya nissaraṇaṃ.
‘‘পুন চপরং, ভিক্খৰে, ভিক্খুনো রূপং মনসিকরোতো রূপে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি। অরূপং খো পনস্স মনসিকরোতো অরূপে চিত্তং পক্খন্দতি পসীদতি সন্তিট্ঠতি ৰিমুচ্চতি। তস্স তং চিত্তং সুগতং সুভাৰিতং সুৰুট্ঠিতং সুৰিমুত্তং সুৰিসংযুত্তং রূপেহি; যে চ রূপপচ্চযা উপ্পজ্জন্তি আসৰা ৰিঘাতপরিল়াহা, মুত্তো সো তেহি, ন সো তং ৰেদনং ৰেদিযতি। ইদমক্খাতং রূপানং নিস্সরণং।
‘‘Puna caparaṃ, bhikkhave, bhikkhuno rūpaṃ manasikaroto rūpe cittaṃ na pakkhandati nappasīdati na santiṭṭhati na vimuccati. Arūpaṃ kho panassa manasikaroto arūpe cittaṃ pakkhandati pasīdati santiṭṭhati vimuccati. Tassa taṃ cittaṃ sugataṃ subhāvitaṃ suvuṭṭhitaṃ suvimuttaṃ suvisaṃyuttaṃ rūpehi; ye ca rūpapaccayā uppajjanti āsavā vighātapariḷāhā, mutto so tehi, na so taṃ vedanaṃ vediyati. Idamakkhātaṃ rūpānaṃ nissaraṇaṃ.
‘‘পুন চপরং, ভিক্খৰে, ভিক্খুনো সক্কাযং মনসিকরোতো সক্কাযে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি। সক্কাযনিরোধং খো পনস্স মনসিকরোতো সক্কাযনিরোধে চিত্তং পক্খন্দতি পসীদতি সন্তিট্ঠতি ৰিমুচ্চতি। তস্স তং চিত্তং সুগতং সুভাৰিতং সুৰুট্ঠিতং সুৰিমুত্তং সুৰিসংযুত্তং সক্কাযেন; যে চ সক্কাযপচ্চযা উপ্পজ্জন্তি আসৰা ৰিঘাতপরিল়াহা, মুত্তো সো তেহি, ন সো তং ৰেদনং ৰেদিযতি। ইদমক্খাতং সক্কাযস্স নিস্সরণং।
‘‘Puna caparaṃ, bhikkhave, bhikkhuno sakkāyaṃ manasikaroto sakkāye cittaṃ na pakkhandati nappasīdati na santiṭṭhati na vimuccati. Sakkāyanirodhaṃ kho panassa manasikaroto sakkāyanirodhe cittaṃ pakkhandati pasīdati santiṭṭhati vimuccati. Tassa taṃ cittaṃ sugataṃ subhāvitaṃ suvuṭṭhitaṃ suvimuttaṃ suvisaṃyuttaṃ sakkāyena; ye ca sakkāyapaccayā uppajjanti āsavā vighātapariḷāhā, mutto so tehi, na so taṃ vedanaṃ vediyati. Idamakkhātaṃ sakkāyassa nissaraṇaṃ.
‘‘তস্স কামনন্দীপি নানুসেতি, ব্যাপাদনন্দীপি নানুসেতি, ৰিহেসানন্দীপি নানুসেতি , রূপনন্দীপি নানুসেতি, সক্কাযনন্দীপি নানুসেতি (সো) 9 কামনন্দিযাপি অননুসযা, ব্যাপাদনন্দিযাপি অননুসযা, ৰিহেসানন্দিযাপি অননুসযা, রূপনন্দিযাপি অননুসযা, সক্কাযনন্দিযাপি অননুসযা। অযং ৰুচ্চতি, ভিক্খৰে, ভিক্খু নিরনুসযো, অচ্ছেচ্ছি 10 তণ্হং, ৰিৰত্তযি 11 সংযোজনং, সম্মা মানাভিসমযা অন্তমকাসি দুক্খস্স। ইমা খো, ভিক্খৰে, পঞ্চ নিস্সারণীযা ধাতুযো’’তি। দসমং।
‘‘Tassa kāmanandīpi nānuseti, byāpādanandīpi nānuseti, vihesānandīpi nānuseti , rūpanandīpi nānuseti, sakkāyanandīpi nānuseti (so) 12 kāmanandiyāpi ananusayā, byāpādanandiyāpi ananusayā, vihesānandiyāpi ananusayā, rūpanandiyāpi ananusayā, sakkāyanandiyāpi ananusayā. Ayaṃ vuccati, bhikkhave, bhikkhu niranusayo, acchecchi 13 taṇhaṃ, vivattayi 14 saṃyojanaṃ, sammā mānābhisamayā antamakāsi dukkhassa. Imā kho, bhikkhave, pañca nissāraṇīyā dhātuyo’’ti. Dasamaṃ.
ব্রাহ্মণৰগ্গো পঞ্চমো।
Brāhmaṇavaggo pañcamo.
তস্সুদ্দানং –
Tassuddānaṃ –
সোণো দোণো সঙ্গারৰো, কারণপালী চ পিঙ্গিযানী।
Soṇo doṇo saṅgāravo, kāraṇapālī ca piṅgiyānī;
সুপিনা চ ৰস্সা ৰাচা, কুলং নিস্সারণীযেন চাতি॥
Supinā ca vassā vācā, kulaṃ nissāraṇīyena cāti.
চতুত্থংপণ্ণাসকং সমত্তো।
Catutthaṃpaṇṇāsakaṃ samatto.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. নিস্সারণীযসুত্তৰণ্ণনা • 10. Nissāraṇīyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. নিস্সারণীযসুত্তৰণ্ণনা • 10. Nissāraṇīyasuttavaṇṇanā
