| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༡༠. ནིསྶཱརཎཱིཡསུཏྟཾ
10. Nissāraṇīyasuttaṃ
༢༠༠. ‘‘པཉྩིམཱ , བྷིཀྑཝེ, ནིསྶཱརཎཱིཡཱ 1 དྷཱཏུཡོ། ཀཏམཱ པཉྩ? ཨིདྷ, བྷིཀྑཝེ, བྷིཀྑུནོ ཀཱམཾ 2 མནསིཀརོཏོ ཀཱམེསུ ཙིཏྟཾ ན པཀྑནྡཏི ནཔྤསཱིདཏི ན སནྟིཊྛཏི ན ཝིམུཙྩཏི། ནེཀྑམྨཾ ཁོ པནསྶ མནསིཀརོཏོ ནེཀྑམྨེ ཙིཏྟཾ པཀྑནྡཏི པསཱིདཏི སནྟིཊྛཏི ཝིམུཙྩཏི། ཏསྶ ཏཾ ཙིཏྟཾ སུགཏཾ 3 སུབྷཱཝིཏཾ སུཝུཊྛིཏཾ སུཝིམུཏྟཾ སུཝིསཾཡུཏྟཾ 4 ཀཱམེཧི; ཡེ ཙ ཀཱམཔཙྩཡཱ ཨུཔྤཛྫནྟི ཨཱསཝཱ ཝིགྷཱཏཔརིལཱ༹ཧཱ, མུཏྟོ སོ ཏེཧི, ན སོ ཏཾ ཝེདནཾ ཝེདིཡཏི། ཨིདམཀྑཱཏཾ ཀཱམཱནཾ ནིསྶརཎཾ།
200. ‘‘Pañcimā , bhikkhave, nissāraṇīyā 5 dhātuyo. Katamā pañca? Idha, bhikkhave, bhikkhuno kāmaṃ 6 manasikaroto kāmesu cittaṃ na pakkhandati nappasīdati na santiṭṭhati na vimuccati. Nekkhammaṃ kho panassa manasikaroto nekkhamme cittaṃ pakkhandati pasīdati santiṭṭhati vimuccati. Tassa taṃ cittaṃ sugataṃ 7 subhāvitaṃ suvuṭṭhitaṃ suvimuttaṃ suvisaṃyuttaṃ 8 kāmehi; ye ca kāmapaccayā uppajjanti āsavā vighātapariḷāhā, mutto so tehi, na so taṃ vedanaṃ vediyati. Idamakkhātaṃ kāmānaṃ nissaraṇaṃ.
‘‘པུན ཙཔརཾ, བྷིཀྑཝེ, བྷིཀྑུནོ བྱཱཔཱདཾ མནསིཀརོཏོ བྱཱཔཱདེ ཙིཏྟཾ ན པཀྑནྡཏི ནཔྤསཱིདཏི ན སནྟིཊྛཏི ན ཝིམུཙྩཏི། ཨབྱཱཔཱདཾ ཁོ པནསྶ མནསིཀརོཏོ ཨབྱཱཔཱདེ ཙིཏྟཾ པཀྑནྡཏི པསཱིདཏི སནྟིཊྛཏི ཝིམུཙྩཏི། ཏསྶ ཏཾ ཙིཏྟཾ སུགཏཾ སུབྷཱཝིཏཾ སུཝུཊྛིཏཾ སུཝིམུཏྟཾ སུཝིསཾཡུཏྟཾ བྱཱཔཱདེན; ཡེ ཙ བྱཱཔཱདཔཙྩཡཱ ཨུཔྤཛྫནྟི ཨཱསཝཱ ཝིགྷཱཏཔརིལཱ༹ཧཱ, མུཏྟོ སོ ཏེཧི, ན སོ ཏཾ ཝེདནཾ ཝེདིཡཏི། ཨིདམཀྑཱཏཾ བྱཱཔཱདསྶ ནིསྶརཎཾ།
‘‘Puna caparaṃ, bhikkhave, bhikkhuno byāpādaṃ manasikaroto byāpāde cittaṃ na pakkhandati nappasīdati na santiṭṭhati na vimuccati. Abyāpādaṃ kho panassa manasikaroto abyāpāde cittaṃ pakkhandati pasīdati santiṭṭhati vimuccati. Tassa taṃ cittaṃ sugataṃ subhāvitaṃ suvuṭṭhitaṃ suvimuttaṃ suvisaṃyuttaṃ byāpādena; ye ca byāpādapaccayā uppajjanti āsavā vighātapariḷāhā, mutto so tehi, na so taṃ vedanaṃ vediyati. Idamakkhātaṃ byāpādassa nissaraṇaṃ.
‘‘པུན ཙཔརཾ, བྷིཀྑཝེ, བྷིཀྑུནོ ཝིཧེསཾ མནསིཀརོཏོ ཝིཧེསཱཡ ཙིཏྟཾ ན པཀྑནྡཏི ནཔྤསཱིདཏི ན སནྟིཊྛཏི ན ཝིམུཙྩཏི། ཨཝིཧེསཾ ཁོ པནསྶ མནསིཀརོཏོ ཨཝིཧེསཱཡ ཙིཏྟཾ པཀྑནྡཏི པསཱིདཏི སནྟིཊྛཏི ཝིམུཙྩཏི། ཏསྶ ཏཾ ཙིཏྟཾ སུགཏཾ སུབྷཱཝིཏཾ སུཝུཊྛིཏཾ སུཝིམུཏྟཾ སུཝིསཾཡུཏྟཾ ཝིཧེསཱཡ; ཡེ ཙ ཝིཧེསཱཔཙྩཡཱ ཨུཔྤཛྫནྟི ཨཱསཝཱ ཝིགྷཱཏཔརིལཱ༹ཧཱ, མུཏྟོ སོ ཏེཧི, ན སོ ཏཾ ཝེདནཾ ཝེདིཡཏི། ཨིདམཀྑཱཏཾ ཝིཧེསཱཡ ནིསྶརཎཾ།
‘‘Puna caparaṃ, bhikkhave, bhikkhuno vihesaṃ manasikaroto vihesāya cittaṃ na pakkhandati nappasīdati na santiṭṭhati na vimuccati. Avihesaṃ kho panassa manasikaroto avihesāya cittaṃ pakkhandati pasīdati santiṭṭhati vimuccati. Tassa taṃ cittaṃ sugataṃ subhāvitaṃ suvuṭṭhitaṃ suvimuttaṃ suvisaṃyuttaṃ vihesāya; ye ca vihesāpaccayā uppajjanti āsavā vighātapariḷāhā, mutto so tehi, na so taṃ vedanaṃ vediyati. Idamakkhātaṃ vihesāya nissaraṇaṃ.
‘‘པུན ཙཔརཾ, བྷིཀྑཝེ, བྷིཀྑུནོ རཱུཔཾ མནསིཀརོཏོ རཱུཔེ ཙིཏྟཾ ན པཀྑནྡཏི ནཔྤསཱིདཏི ན སནྟིཊྛཏི ན ཝིམུཙྩཏི། ཨརཱུཔཾ ཁོ པནསྶ མནསིཀརོཏོ ཨརཱུཔེ ཙིཏྟཾ པཀྑནྡཏི པསཱིདཏི སནྟིཊྛཏི ཝིམུཙྩཏི། ཏསྶ ཏཾ ཙིཏྟཾ སུགཏཾ སུབྷཱཝིཏཾ སུཝུཊྛིཏཾ སུཝིམུཏྟཾ སུཝིསཾཡུཏྟཾ རཱུཔེཧི; ཡེ ཙ རཱུཔཔཙྩཡཱ ཨུཔྤཛྫནྟི ཨཱསཝཱ ཝིགྷཱཏཔརིལཱ༹ཧཱ, མུཏྟོ སོ ཏེཧི, ན སོ ཏཾ ཝེདནཾ ཝེདིཡཏི། ཨིདམཀྑཱཏཾ རཱུཔཱནཾ ནིསྶརཎཾ།
‘‘Puna caparaṃ, bhikkhave, bhikkhuno rūpaṃ manasikaroto rūpe cittaṃ na pakkhandati nappasīdati na santiṭṭhati na vimuccati. Arūpaṃ kho panassa manasikaroto arūpe cittaṃ pakkhandati pasīdati santiṭṭhati vimuccati. Tassa taṃ cittaṃ sugataṃ subhāvitaṃ suvuṭṭhitaṃ suvimuttaṃ suvisaṃyuttaṃ rūpehi; ye ca rūpapaccayā uppajjanti āsavā vighātapariḷāhā, mutto so tehi, na so taṃ vedanaṃ vediyati. Idamakkhātaṃ rūpānaṃ nissaraṇaṃ.
‘‘པུན ཙཔརཾ, བྷིཀྑཝེ, བྷིཀྑུནོ སཀྐཱཡཾ མནསིཀརོཏོ སཀྐཱཡེ ཙིཏྟཾ ན པཀྑནྡཏི ནཔྤསཱིདཏི ན སནྟིཊྛཏི ན ཝིམུཙྩཏི། སཀྐཱཡནིརོདྷཾ ཁོ པནསྶ མནསིཀརོཏོ སཀྐཱཡནིརོདྷེ ཙིཏྟཾ པཀྑནྡཏི པསཱིདཏི སནྟིཊྛཏི ཝིམུཙྩཏི། ཏསྶ ཏཾ ཙིཏྟཾ སུགཏཾ སུབྷཱཝིཏཾ སུཝུཊྛིཏཾ སུཝིམུཏྟཾ སུཝིསཾཡུཏྟཾ སཀྐཱཡེན; ཡེ ཙ སཀྐཱཡཔཙྩཡཱ ཨུཔྤཛྫནྟི ཨཱསཝཱ ཝིགྷཱཏཔརིལཱ༹ཧཱ, མུཏྟོ སོ ཏེཧི, ན སོ ཏཾ ཝེདནཾ ཝེདིཡཏི། ཨིདམཀྑཱཏཾ སཀྐཱཡསྶ ནིསྶརཎཾ།
‘‘Puna caparaṃ, bhikkhave, bhikkhuno sakkāyaṃ manasikaroto sakkāye cittaṃ na pakkhandati nappasīdati na santiṭṭhati na vimuccati. Sakkāyanirodhaṃ kho panassa manasikaroto sakkāyanirodhe cittaṃ pakkhandati pasīdati santiṭṭhati vimuccati. Tassa taṃ cittaṃ sugataṃ subhāvitaṃ suvuṭṭhitaṃ suvimuttaṃ suvisaṃyuttaṃ sakkāyena; ye ca sakkāyapaccayā uppajjanti āsavā vighātapariḷāhā, mutto so tehi, na so taṃ vedanaṃ vediyati. Idamakkhātaṃ sakkāyassa nissaraṇaṃ.
‘‘ཏསྶ ཀཱམནནྡཱིཔི ནཱནུསེཏི, བྱཱཔཱདནནྡཱིཔི ནཱནུསེཏི, ཝིཧེསཱནནྡཱིཔི ནཱནུསེཏི , རཱུཔནནྡཱིཔི ནཱནུསེཏི, སཀྐཱཡནནྡཱིཔི ནཱནུསེཏི (སོ) 9 ཀཱམནནྡིཡཱཔི ཨནནུསཡཱ, བྱཱཔཱདནནྡིཡཱཔི ཨནནུསཡཱ, ཝིཧེསཱནནྡིཡཱཔི ཨནནུསཡཱ, རཱུཔནནྡིཡཱཔི ཨནནུསཡཱ, སཀྐཱཡནནྡིཡཱཔི ཨནནུསཡཱ། ཨཡཾ ཝུཙྩཏི, བྷིཀྑཝེ, བྷིཀྑུ ནིརནུསཡོ, ཨཙྪེཙྪི 10 ཏཎྷཾ, ཝིཝཏྟཡི 11 སཾཡོཛནཾ, སམྨཱ མཱནཱབྷིསམཡཱ ཨནྟམཀཱསི དུཀྑསྶ། ཨིམཱ ཁོ, བྷིཀྑཝེ, པཉྩ ནིསྶཱརཎཱིཡཱ དྷཱཏུཡོ’’ཏི། དསམཾ།
‘‘Tassa kāmanandīpi nānuseti, byāpādanandīpi nānuseti, vihesānandīpi nānuseti , rūpanandīpi nānuseti, sakkāyanandīpi nānuseti (so) 12 kāmanandiyāpi ananusayā, byāpādanandiyāpi ananusayā, vihesānandiyāpi ananusayā, rūpanandiyāpi ananusayā, sakkāyanandiyāpi ananusayā. Ayaṃ vuccati, bhikkhave, bhikkhu niranusayo, acchecchi 13 taṇhaṃ, vivattayi 14 saṃyojanaṃ, sammā mānābhisamayā antamakāsi dukkhassa. Imā kho, bhikkhave, pañca nissāraṇīyā dhātuyo’’ti. Dasamaṃ.
བྲཱཧྨཎཝགྒོ པཉྩམོ།
Brāhmaṇavaggo pañcamo.
ཏསྶུདྡཱནཾ –
Tassuddānaṃ –
སོཎོ དོཎོ སངྒཱརཝོ, ཀཱརཎཔཱལཱི ཙ པིངྒིཡཱནཱི།
Soṇo doṇo saṅgāravo, kāraṇapālī ca piṅgiyānī;
སུཔིནཱ ཙ ཝསྶཱ ཝཱཙཱ, ཀུལཾ ནིསྶཱརཎཱིཡེན ཙཱཏི༎
Supinā ca vassā vācā, kulaṃ nissāraṇīyena cāti.
ཙཏུཏྠཾཔཎྞཱསཀཾ སམཏྟོ།
Catutthaṃpaṇṇāsakaṃ samatto.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༠. ནིསྶཱརཎཱིཡསུཏྟཝཎྞནཱ • 10. Nissāraṇīyasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡༠. ནིསྶཱརཎཱིཡསུཏྟཝཎྞནཱ • 10. Nissāraṇīyasuttavaṇṇanā
