| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. நிஸ்ஸாரணீயஸுத்தவண்ணனா
10. Nissāraṇīyasuttavaṇṇanā
200. த³ஸமே நிஸ்ஸாரணீயாதி நிஸ்ஸடா விஸஞ்ஞுத்தா. தா⁴துயோதி அத்தஸுஞ்ஞஸபா⁴வா. காமங் மனஸிகரோதோதி காமங் மனஸிகரொந்தஸ்ஸ, அஸுப⁴ஜ்ஜா²னதோ வுட்டா²ய அக³த³ங் க³ஹெத்வா விஸங் வீமங்ஸந்தோ விய வீமங்ஸனத்த²ங் காமாபி⁴முக²ங் சித்தங் பேஸெந்தஸ்ஸாதி அத்தோ². ந பக்க²ந்த³தீதி நப்பவிஸதி. நப்பஸீத³தீதி பஸாத³ங் நாபஜ்ஜதி. ந ஸந்திட்ட²தீதி நப்பதிட்ட²ஹதி. ந விமுச்சதீதி ந அதி⁴முச்சதி. யதா² பன குக்குடபத்தங் வா ந்ஹாருத³த்³து³லங் வா அக்³கி³ம்ஹி பக்கி²த்தங் படிலீயதி பதிகுடதி பதிவட்டதி ந ஸங்பஸாரீயதி, ஏவங் படிலீயதி ந ஸங்பஸாரீயதி. நெக்க²ம்மங் கோ² பனாதி இத⁴ நெக்க²ம்மங் நாம அஸுபே⁴ஸு பட²மஜ்ஜா²னங், தத³ஸ்ஸ மனஸிகரோதோ சித்தங் பக்க²ந்த³தி. தஸ்ஸ தங் சித்தந்தி தஸ்ஸ தங் அஸுப⁴ஜ்ஜா²னசித்தங். ஸுக³தந்தி கோ³சரே க³தத்தா ஸுட்டு² க³தங். ஸுபா⁴விதந்தி அஹானபா⁴கி³யத்தா ஸுட்டு² பா⁴விதங். ஸுவுட்டி²தந்தி காமதோ வுட்டி²தங். ஸுவிமுத்தந்தி காமேஹி ஸுட்டு² விமுத்தங். காமபச்சயா ஆஸவா நாம காமஹேதுகா சத்தாரோ ஆஸவா. விகா⁴தாதி து³க்கா². பரிளாஹாதி காமராக³பரிளாஹா. ந ஸோ தங் வேத³னங் வேதி³யதீதி ஸோ தங் காமவேத³னங் விகா⁴தபரிளாஹவேத³னஞ்ச ந வேதி³யதி. இத³மக்கா²தங் காமானங் நிஸ்ஸரணந்தி இத³ங் அஸுப⁴ஜ்ஜா²னங் காமேஹி நிஸ்ஸடத்தா காமானங் நிஸ்ஸரணந்தி அக்கா²தங். யோ பன தங் ஜா²னங் பாத³கங் கத்வா ஸங்கா²ரே ஸம்மஸந்தோ ததியமக்³க³ங் பத்வா அனாகா³மிப²லேன நிப்³பா³னங் தி³ஸ்வா ‘‘புன காமா நாம நத்தீ²’’தி ஜானாதி. தஸ்ஸ சித்தங் அச்சந்தனிஸ்ஸரணமேவ. ஸேஸபதே³ஸுபி ஏஸேவ நயோ.
200. Dasame nissāraṇīyāti nissaṭā visaññuttā. Dhātuyoti attasuññasabhāvā. Kāmaṃ manasikarototi kāmaṃ manasikarontassa, asubhajjhānato vuṭṭhāya agadaṃ gahetvā visaṃ vīmaṃsanto viya vīmaṃsanatthaṃ kāmābhimukhaṃ cittaṃ pesentassāti attho. Na pakkhandatīti nappavisati. Nappasīdatīti pasādaṃ nāpajjati. Na santiṭṭhatīti nappatiṭṭhahati. Na vimuccatīti na adhimuccati. Yathā pana kukkuṭapattaṃ vā nhārudaddulaṃ vā aggimhi pakkhittaṃ paṭilīyati patikuṭati pativaṭṭati na saṃpasārīyati, evaṃ paṭilīyati na saṃpasārīyati. Nekkhammaṃ kho panāti idha nekkhammaṃ nāma asubhesu paṭhamajjhānaṃ, tadassa manasikaroto cittaṃ pakkhandati. Tassa taṃ cittanti tassa taṃ asubhajjhānacittaṃ. Sugatanti gocare gatattā suṭṭhu gataṃ. Subhāvitanti ahānabhāgiyattā suṭṭhu bhāvitaṃ. Suvuṭṭhitanti kāmato vuṭṭhitaṃ. Suvimuttanti kāmehi suṭṭhu vimuttaṃ. Kāmapaccayā āsavā nāma kāmahetukā cattāro āsavā. Vighātāti dukkhā. Pariḷāhāti kāmarāgapariḷāhā. Na so taṃ vedanaṃ vediyatīti so taṃ kāmavedanaṃ vighātapariḷāhavedanañca na vediyati. Idamakkhātaṃ kāmānaṃ nissaraṇanti idaṃ asubhajjhānaṃ kāmehi nissaṭattā kāmānaṃ nissaraṇanti akkhātaṃ. Yo pana taṃ jhānaṃ pādakaṃ katvā saṅkhāre sammasanto tatiyamaggaṃ patvā anāgāmiphalena nibbānaṃ disvā ‘‘puna kāmā nāma natthī’’ti jānāti. Tassa cittaṃ accantanissaraṇameva. Sesapadesupi eseva nayo.
அயங் பன விஸேஸோ – து³தியவாரே மெத்தாஜா²னானி ப்³யாபாத³ஸ்ஸ நிஸ்ஸரணங் நாம. ததியவாரே கருணாஜா²னானி விஹிங்ஸாய நிஸ்ஸரணங் நாம. சதுத்த²வாரே அரூபஜ்ஜா²னானி ரூபானங் நிஸ்ஸரணங் நாம. அச்சந்தனிஸ்ஸரணஞ்செத்த² அரஹத்தப²லங் யோஜேதப்³ப³ங். பஞ்சமவாரே ஸக்காயங் மனஸிகரோதோதி ஸுத்³த⁴ஸங்கா²ரே பரிக்³க³ண்ஹித்வா அரஹத்தங் பத்தஸ்ஸ ஸுக்க²விபஸ்ஸகஸ்ஸ ப²லஸமாபத்திதோ வுட்டா²ய வீமங்ஸனத்த²ங் பஞ்சுபாதா³னக்க²ந்தா⁴பி⁴முக²ங் சித்தங் பேஸெந்தஸ்ஸ. இத³மக்கா²தங் ஸக்காயஸ்ஸ நிஸ்ஸரணந்தி இத³ங் அரஹத்தமக்³கே³ன ச ப²லேன ச நிப்³பா³னங் தி³ஸ்வா டி²தஸ்ஸ பி⁴க்கு²னோ ‘‘புன ஸக்காயோ நத்தீ²’’தி உப்பன்னங் அரஹத்தப²லஸமாபத்திசித்தங் ஸக்காயஸ்ஸ நிஸ்ஸரணந்தி அக்கா²தங். இதா³னி ஏவங் ஸக்காயனிஸ்ஸரணங் நிரோத⁴ங் பத்வா டி²தஸ்ஸ கீ²ணாஸவஸ்ஸ வண்ணங் கதெ²ந்தோ தஸ்ஸ காமனந்தீ³பி நானுஸேதீதிஆதி³மாஹ. தத்த² நானுஸேதீதி ந நிப்³ப³த்ததி. அனநுஸயாதி அனிப்³ப³த்தியா. ஸேஸமெத்த² உத்தானத்த²மேவாதி.
Ayaṃ pana viseso – dutiyavāre mettājhānāni byāpādassa nissaraṇaṃ nāma. Tatiyavāre karuṇājhānāni vihiṃsāya nissaraṇaṃ nāma. Catutthavāre arūpajjhānāni rūpānaṃ nissaraṇaṃ nāma. Accantanissaraṇañcettha arahattaphalaṃ yojetabbaṃ. Pañcamavāre sakkāyaṃ manasikarototi suddhasaṅkhāre pariggaṇhitvā arahattaṃ pattassa sukkhavipassakassa phalasamāpattito vuṭṭhāya vīmaṃsanatthaṃ pañcupādānakkhandhābhimukhaṃ cittaṃ pesentassa. Idamakkhātaṃ sakkāyassa nissaraṇanti idaṃ arahattamaggena ca phalena ca nibbānaṃ disvā ṭhitassa bhikkhuno ‘‘puna sakkāyo natthī’’ti uppannaṃ arahattaphalasamāpatticittaṃ sakkāyassa nissaraṇanti akkhātaṃ. Idāni evaṃ sakkāyanissaraṇaṃ nirodhaṃ patvā ṭhitassa khīṇāsavassa vaṇṇaṃ kathento tassa kāmanandīpi nānusetītiādimāha. Tattha nānusetīti na nibbattati. Ananusayāti anibbattiyā. Sesamettha uttānatthamevāti.
ப்³ராஹ்மணவக்³கோ³ பஞ்சமோ.
Brāhmaṇavaggo pañcamo.
சதுத்த²பண்ணாஸகங் நிட்டி²தங்.
Catutthapaṇṇāsakaṃ niṭṭhitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. நிஸ்ஸாரணீயஸுத்தங் • 10. Nissāraṇīyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. நிஸ்ஸாரணீயஸுத்தவண்ணனா • 10. Nissāraṇīyasuttavaṇṇanā
