| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. நிஸ்ஸாரணீயஸுத்தவண்ணனா
3. Nissāraṇīyasuttavaṇṇanā
13. ததியே நிஸ்ஸாரணீயா தா⁴துயோதி நிஸ்ஸரணதா⁴துயோவ. மெத்தா ஹி கோ² மே சேதோவிமுத்தீதி எத்த² பச்சனீகத⁴ம்மேஹி விமுத்தத்தா திகசதுக்கஜ்ஜா²னிகா மெத்தாவ மெத்தாசேதோவிமுத்தி நாம . பா⁴விதாதி வட்³டி⁴தா. ப³ஹுலீகதாதி புனப்புனங் கதா. யானீகதாதி யுத்தயானஸதி³ஸா கதா. வத்து²கதாதி பதிட்டா² கதா. அனுட்டி²தாதி அதி⁴ட்டி²தா. பரிசிதாதி ஸமந்ததோ சிதா ஆசிதா உபசிதா. ஸுஸமாரத்³தா⁴தி ஸுப்பகு³ணகரணேன ஸுட்டு² ஸமாரத்³தா⁴. பரியாதா³ய திட்ட²தீதி பரியாதி³யித்வா க³ஹெத்வா திட்ட²தி. மா ஹேவந்திஸ்ஸ வசனீயோதி யஸ்மா அபூ⁴தப்³யாகரணங் ப்³யாகரோதி, தஸ்மா ‘‘மா ஏவங் ப⁴ணீ’’தி வத்தப்³போ³. யதி³த³ங் மெத்தாசேதோவிமுத்தீதி யா அயங் மெத்தாசேதோவிமுத்தி, இத³ங் நிஸ்ஸரணங் ப்³யாபாத³ஸ்ஸ, ப்³யாபாத³தோ நிஸ்ஸடாதி அத்தோ². யோ பன மெத்தாய திகசதுக்கஜ்ஜா²னதோ வுட்டி²தோ ஸங்கா²ரே ஸம்மஸித்வா ததியமக்³க³ங் பத்வா ‘‘புன ப்³யாபாதோ³ நத்தீ²’’தி ததியப²லேன நிப்³பா³னங் பஸ்ஸதி, தஸ்ஸ சித்தங் அச்சந்தனிஸ்ஸரணங் ப்³யாபாத³ஸ்ஸ. ஏதேனுபாயேன ஸப்³ப³த்த² அத்தோ² வேதி³தப்³போ³.
13. Tatiye nissāraṇīyā dhātuyoti nissaraṇadhātuyova. Mettā hi kho me cetovimuttīti ettha paccanīkadhammehi vimuttattā tikacatukkajjhānikā mettāva mettācetovimutti nāma . Bhāvitāti vaḍḍhitā. Bahulīkatāti punappunaṃ katā. Yānīkatāti yuttayānasadisā katā. Vatthukatāti patiṭṭhā katā. Anuṭṭhitāti adhiṭṭhitā. Paricitāti samantato citā ācitā upacitā. Susamāraddhāti suppaguṇakaraṇena suṭṭhu samāraddhā. Pariyādāya tiṭṭhatīti pariyādiyitvā gahetvā tiṭṭhati. Mā hevantissa vacanīyoti yasmā abhūtabyākaraṇaṃ byākaroti, tasmā ‘‘mā evaṃ bhaṇī’’ti vattabbo. Yadidaṃ mettācetovimuttīti yā ayaṃ mettācetovimutti, idaṃ nissaraṇaṃ byāpādassa, byāpādato nissaṭāti attho. Yo pana mettāya tikacatukkajjhānato vuṭṭhito saṅkhāre sammasitvā tatiyamaggaṃ patvā ‘‘puna byāpādo natthī’’ti tatiyaphalena nibbānaṃ passati, tassa cittaṃ accantanissaraṇaṃ byāpādassa. Etenupāyena sabbattha attho veditabbo.
அனிமித்தாசேதோவிமுத்தீதி ப³லவவிபஸ்ஸனா. தீ³க⁴பா⁴ணகா பன அரஹத்தப²லஸமாபத்தீதி வத³ந்தி. ஸா ஹி ராக³னிமித்தாதீ³னஞ்சேவ ரூபனிமித்தாதீ³னஞ்ச நிச்சனிமித்தாதீ³னஞ்ச அபா⁴வா அனிமித்தாதி வுத்தா. நிமித்தானுஸாரீதி வுத்தப்பபே⁴த³ங் நிமித்தங் அனுஸரணஸபா⁴வங்.
Animittācetovimuttīti balavavipassanā. Dīghabhāṇakā pana arahattaphalasamāpattīti vadanti. Sā hi rāganimittādīnañceva rūpanimittādīnañca niccanimittādīnañca abhāvā animittāti vuttā. Nimittānusārīti vuttappabhedaṃ nimittaṃ anusaraṇasabhāvaṃ.
அஸ்மீதி அஸ்மிமானோ. அயமஹமஸ்மீதி பஞ்சஸு க²ந்தே⁴ஸு அயங் நாம அஹங் அஸ்மீதி. எத்தாவதா அரஹத்தங் ப்³யாகதங் ஹோதி. விசிகிச்சா²கத²ங்கதா²ஸல்லந்தி விசிகிச்சா²பூ⁴தங் கத²ங்கதா²ஸல்லங். மா ஹேவந்திஸ்ஸ வசனீயோதி ஸசே தே பட²மமக்³க³வஜ்ஜா² விசிகிச்சா² உப்பஜ்ஜதி, அரஹத்தப்³யாகரணங் மிச்சா² ஹோதி, தஸ்மா ‘‘மா அபூ⁴தங் க³ண்ஹீ’’தி வாரேதப்³போ³. அஸ்மீதி மானஸமுக்³கா⁴தோதி அரஹத்தமக்³கோ³. அரஹத்தமக்³க³ப²லவஸேன ஹி நிப்³பா³னே தி³ட்டே² புன அஸ்மிமானோ நத்தீ²தி அரஹத்தமக்³கோ³ ‘‘அஸ்மீதி மானஸமுக்³கா⁴தோ’’தி வுத்தோ. இதி இமஸ்மிங் ஸுத்தே அபூ⁴தப்³யாகரணங் நாம கதி²தங்.
Asmīti asmimāno. Ayamahamasmīti pañcasu khandhesu ayaṃ nāma ahaṃ asmīti. Ettāvatā arahattaṃ byākataṃ hoti. Vicikicchākathaṃkathāsallanti vicikicchābhūtaṃ kathaṃkathāsallaṃ. Mā hevantissa vacanīyoti sace te paṭhamamaggavajjhā vicikicchā uppajjati, arahattabyākaraṇaṃ micchā hoti, tasmā ‘‘mā abhūtaṃ gaṇhī’’ti vāretabbo. Asmītimānasamugghātoti arahattamaggo. Arahattamaggaphalavasena hi nibbāne diṭṭhe puna asmimāno natthīti arahattamaggo ‘‘asmīti mānasamugghāto’’ti vutto. Iti imasmiṃ sutte abhūtabyākaraṇaṃ nāma kathitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. நிஸ்ஸாரணீயஸுத்தங் • 3. Nissāraṇīyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. நிஸ்ஸாரணீயஸுத்தவண்ணனா • 3. Nissāraṇīyasuttavaṇṇanā
