| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. நிஸ்ஸாரணீயஸுத்தவண்ணனா
10. Nissāraṇīyasuttavaṇṇanā
200. த³ஸமே நிஸ்ஸரந்தீதி நிஸ்ஸரணீயாதி வத்தப்³பே³ தீ³க⁴ங் கத்வா நித்³தே³ஸோ. கத்தரி ஹேஸ அனீய-ஸத்³தோ³ யதா² ‘‘நிய்யானியா’’தி. தேனாஹ ‘‘நிஸ்ஸடா’’தி. குதோ பன நிஸ்ஸடா? யதா²ஸகங் படிபக்க²தோ. நிஜ்ஜீவட்டே²ன தா⁴துயோதி ஆஹ ‘‘அத்தஸுஞ்ஞஸபா⁴வா’’தி. அத்த²தோ பன த⁴ம்மதா⁴துமனோவிஞ்ஞாணதா⁴துவிஸேஸோ . தாதி³ஸஸ்ஸ பி⁴க்கு²னோ கிலேஸவஸேன காமேஸு மனஸிகாரோ நத்தீ²தி ஆஹ ‘‘வீமங்ஸனத்த²’’ந்தி, ‘‘நெக்க²ம்மனியதங் இதா³னி மே சித்தங், கிங் நு கோ² காமவிதக்கோபி உப்பஜ்ஜிஸ்ஸதீ’’தி வீமங்ஸந்தஸ்ஸாதி அத்தோ². பக்க²ந்த³னங் நாம அனுப்பவேஸோ. ஸோ பன தத்த² நத்தீ²தி ஆஹ ‘‘நப்பவிஸதீ’’தி. பஸீத³னங் நாம அபி⁴ருசி. ஸந்திட்ட²னங் பதிட்டா²னங். விமுச்சனங் அதி⁴முச்சனந்தி. தங் ஸப்³ப³ங் படிக்கி²பந்தோ வத³தி ‘‘பஸாத³ங் நாபஜ்ஜதீ’’திஆதி³. ஏவங்பூ⁴தங் பனஸ்ஸ சித்தங் தஸ்ஸ கத²ங் திட்ட²தீதி ஆஹ ‘‘யதா²’’திஆதி³.
200. Dasame nissarantīti nissaraṇīyāti vattabbe dīghaṃ katvā niddeso. Kattari hesa anīya-saddo yathā ‘‘niyyāniyā’’ti. Tenāha ‘‘nissaṭā’’ti. Kuto pana nissaṭā? Yathāsakaṃ paṭipakkhato. Nijjīvaṭṭhena dhātuyoti āha ‘‘attasuññasabhāvā’’ti. Atthato pana dhammadhātumanoviññāṇadhātuviseso . Tādisassa bhikkhuno kilesavasena kāmesu manasikāro natthīti āha ‘‘vīmaṃsanattha’’nti, ‘‘nekkhammaniyataṃ idāni me cittaṃ, kiṃ nu kho kāmavitakkopi uppajjissatī’’ti vīmaṃsantassāti attho. Pakkhandanaṃ nāma anuppaveso. So pana tattha natthīti āha ‘‘nappavisatī’’ti. Pasīdanaṃ nāma abhiruci. Santiṭṭhanaṃ patiṭṭhānaṃ. Vimuccanaṃ adhimuccananti. Taṃ sabbaṃ paṭikkhipanto vadati ‘‘pasādaṃ nāpajjatī’’tiādi. Evaṃbhūtaṃ panassa cittaṃ tassa kathaṃ tiṭṭhatīti āha ‘‘yathā’’tiādi.
தந்தி பட²மஜ்ஜா²னங். அஸ்ஸாதி பி⁴க்கு²னோ. சித்தங் பக்க²ந்த³தீதி பரிகம்மசித்தேன ஸத்³தி⁴ங் ஜா²னசித்தங் ஏகத்தவஸேன ஏகஜ்ஜ²ங் கத்வா வத³தி. கோ³சரே க³தத்தாதி அத்தனோ ஆரம்மணே ஏவ பவத்தத்தா. அஹானபா⁴கி³யத்தாதி டி²திபா⁴கி³யத்தா. ஸுட்டு² விமுத்தந்தி விக்க²ம்ப⁴னவிமுத்தியா ஸம்மதே³வ விமுத்தங். சித்தஸ்ஸ ச காயஸ்ஸ ச விஹனநதோ விகா⁴தோ. து³க்க²ங் பரித³ஹனதோ பரிளாஹோ. காமவேத³னங் ந வேதி³யதி அனுப்பஜ்ஜனதோ. நிஸ்ஸரந்தி ததோதி நிஸ்ஸரணங். கே நிஸ்ஸரந்தி? காமா. ஏவஞ்ச காமானந்தி கத்துஸாமிவசனங் ஸுட்டு² யுஜ்ஜதி. யத³க்³கே³ன காமா ததோ நிஸ்ஸடாதி வுச்சந்தி, தத³க்³கே³ன ஜா²னம்பி காமதோ நிஸ்ஸடந்தி வத்தப்³ப³தங் லப⁴தீதி வுத்தங் ‘‘காமேஹி நிஸ்ஸடத்தா’’தி. ஏவங் விக்க²ம்ப⁴னவஸேன காமனிஸ்ஸரணங் வத்வா இதா³னி ஸமுச்சே²த³வஸேன அச்சந்ததோ நிஸ்ஸரணங் த³ஸ்ஸேதுங் ‘‘யோ பனா’’திஆதி³ வுத்தங். ஸேஸபதே³ஸூதி ஸேஸகொட்டா²ஸேஸு.
Tanti paṭhamajjhānaṃ. Assāti bhikkhuno. Cittaṃ pakkhandatīti parikammacittena saddhiṃ jhānacittaṃ ekattavasena ekajjhaṃ katvā vadati. Gocare gatattāti attano ārammaṇe eva pavattattā. Ahānabhāgiyattāti ṭhitibhāgiyattā. Suṭṭhu vimuttanti vikkhambhanavimuttiyā sammadeva vimuttaṃ. Cittassa ca kāyassa ca vihananato vighāto. Dukkhaṃ paridahanato pariḷāho. Kāmavedanaṃ na vediyati anuppajjanato. Nissaranti tatoti nissaraṇaṃ. Ke nissaranti? Kāmā. Evañca kāmānanti kattusāmivacanaṃ suṭṭhu yujjati. Yadaggena kāmā tato nissaṭāti vuccanti, tadaggena jhānampi kāmato nissaṭanti vattabbataṃ labhatīti vuttaṃ ‘‘kāmehi nissaṭattā’’ti. Evaṃ vikkhambhanavasena kāmanissaraṇaṃ vatvā idāni samucchedavasena accantato nissaraṇaṃ dassetuṃ ‘‘yo panā’’tiādi vuttaṃ. Sesapadesūti sesakoṭṭhāsesu.
அயங் பன விஸேஸோதி விஸேஸங் வத³ந்தேன தங் ஜா²னங் பாத³கங் கத்வாதிஆதி³கோ அவிஸேஸோதி கத்வா து³தியததியவாரேஸு ஸப்³ப³ஸோ அனாமட்டோ², சதுத்த²வாரே பன அயம்பி விஸேஸோதி த³ஸ்ஸேதுங் ‘‘அச்சந்தனிஸ்ஸரணஞ்செத்த² அரஹத்தப²லங் யோஜேதப்³ப³’’ந்தி வுத்தங். யஸ்மா அரூபஜ்ஜா²னங் பாத³கங் கத்வா அக்³க³மக்³க³ங் அதி⁴க³ந்த்வா அரஹத்தே டி²தஸ்ஸ சித்தங் ஸப்³ப³ஸோ ரூபேஹி நிஸ்ஸடங் நாம ஹோதி. தஸ்ஸ ஹி ப²லஸமாபத்திதோ வுட்டா²ய வீமங்ஸனத்த²ங் ரூபாபி⁴முக²ங் சித்தங் பேஸெந்தஸ்ஸ. இத³மக்கா²தந்தி ஸமத²யானிகானங் வஸேன ஹெட்டா² சத்தாரோ வாரா க³ஹிதா. இத³ங் பன ஸுக்க²விபஸ்ஸகஸ்ஸ வஸேனாதி ஆஹ ‘‘ஸுத்³த⁴ஸங்கா²ரே’’திஆதி³. ‘‘புன ஸக்காயோ நத்தீ²’’தி உப்பன்னந்தி ‘‘இதா³னி மே ஸக்காயப்பப³ந்தோ⁴ நத்தீ²’’தி வீமங்ஸந்தஸ்ஸ உப்பன்னங்.
Ayaṃ pana visesoti visesaṃ vadantena taṃ jhānaṃ pādakaṃ katvātiādiko avisesoti katvā dutiyatatiyavāresu sabbaso anāmaṭṭho, catutthavāre pana ayampi visesoti dassetuṃ ‘‘accantanissaraṇañcettha arahattaphalaṃ yojetabba’’nti vuttaṃ. Yasmā arūpajjhānaṃ pādakaṃ katvā aggamaggaṃ adhigantvā arahatte ṭhitassa cittaṃ sabbaso rūpehi nissaṭaṃ nāma hoti. Tassa hi phalasamāpattito vuṭṭhāya vīmaṃsanatthaṃ rūpābhimukhaṃ cittaṃ pesentassa. Idamakkhātanti samathayānikānaṃ vasena heṭṭhā cattāro vārā gahitā. Idaṃ pana sukkhavipassakassa vasenāti āha ‘‘suddhasaṅkhāre’’tiādi. ‘‘Puna sakkāyo natthī’’ti uppannanti ‘‘idāni me sakkāyappabandho natthī’’ti vīmaṃsantassa uppannaṃ.
நிஸ்ஸாரணீயஸுத்தவண்ணனா நிட்டி²தா.
Nissāraṇīyasuttavaṇṇanā niṭṭhitā.
ப்³ராஹ்மணவக்³க³வண்ணனா நிட்டி²தா.
Brāhmaṇavaggavaṇṇanā niṭṭhitā.
சதுத்த²பண்ணாஸகங் நிட்டி²தங்.
Catutthapaṇṇāsakaṃ niṭṭhitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. நிஸ்ஸாரணீயஸுத்தங் • 10. Nissāraṇīyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. நிஸ்ஸாரணீயஸுத்தவண்ணனா • 10. Nissāraṇīyasuttavaṇṇanā
