| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. நிஸ்ஸாரணீயஸுத்தவண்ணனா
3. Nissāraṇīyasuttavaṇṇanā
13. ததியே வட்³டி⁴தாதி பா⁴வனாபாரிபூரிவஸேன பரிப்³ரூஹிதா. புனப்புனங் கதாதி பா⁴வனாய ப³ஹுலீகரணேன அபராபரங் பவத்திதா. யுத்தயானஸதி³ஸா கதாதி யதா² யுத்தமாஜஞ்ஞயானங் சே²கேன ஸாரதி²னா அதி⁴ட்டி²தங் யதா²ருசி பவத்ததி, ஏவங் யதா²ருசி பவத்திரஹங் க³ஹிதா. வத்து²கதாதி வா அதி⁴ட்டா²னட்டே²ன வத்து² விய கதா, ஸப்³ப³ஸோ உபக்கிலேஸவிஸோத⁴னேன இத்³தி⁴விஸேஸதாய பவத்திட்டா²னபா⁴வதோ ஸுவிஸோதி⁴தபரிஸ்ஸயவத்து² விய கதாதி வுத்தங் ஹோதி. அதி⁴ட்டி²தாதி படிபக்க²தூ³ரீபா⁴வதோ ஸுபா⁴விதபா⁴வேன தங்தங்அதி⁴ட்டா²னயொக்³யதாய ட²பிதா. ஸமந்ததோ சிதாதி ஸப்³ப³பா⁴கே³ன பா⁴வனூபசயங் க³மிதா. தேனாஹ ‘‘உபசிதா’தி. ஸுட்டு² ஸமாரத்³தா⁴தி இத்³தி⁴பா⁴வனாஸிகா²ப்பத்தியா ஸம்மதே³வ ஸம்பா⁴விதா. அபூ⁴தப்³யாகரணங் ப்³யாகரோதீதி ‘‘மெத்தா ஹி கோ² மே சேதோவிமுத்தி பா⁴விதா’’திஆதி³னா அத்தனி அவிஜ்ஜமானகு³ணாபி⁴ப்³யாஹாரங் ப்³யாஹரதி. சேதோவிமுத்திஸத்³த³ங் அபெக்கி²த்வா ‘‘நிஸ்ஸடா’’தி வுத்தங். புன ப்³யாபாதோ³ நத்தீ²தி இதா³னி மம ப்³யாபாதோ³ நாம ஸப்³ப³ஸோ நத்தீ²தி ஞத்வா.
13. Tatiye vaḍḍhitāti bhāvanāpāripūrivasena paribrūhitā. Punappunaṃ katāti bhāvanāya bahulīkaraṇena aparāparaṃ pavattitā. Yuttayānasadisā katāti yathā yuttamājaññayānaṃ chekena sārathinā adhiṭṭhitaṃ yathāruci pavattati, evaṃ yathāruci pavattirahaṃ gahitā. Vatthukatāti vā adhiṭṭhānaṭṭhena vatthu viya katā, sabbaso upakkilesavisodhanena iddhivisesatāya pavattiṭṭhānabhāvato suvisodhitaparissayavatthu viya katāti vuttaṃ hoti. Adhiṭṭhitāti paṭipakkhadūrībhāvato subhāvitabhāvena taṃtaṃadhiṭṭhānayogyatāya ṭhapitā. Samantato citāti sabbabhāgena bhāvanūpacayaṃ gamitā. Tenāha ‘‘upacitā’ti. Suṭṭhu samāraddhāti iddhibhāvanāsikhāppattiyā sammadeva sambhāvitā. Abhūtabyākaraṇaṃ byākarotīti ‘‘mettā hi kho me cetovimutti bhāvitā’’tiādinā attani avijjamānaguṇābhibyāhāraṃ byāharati. Cetovimuttisaddaṃ apekkhitvā ‘‘nissaṭā’’ti vuttaṃ. Puna byāpādo natthīti idāni mama byāpādo nāma sabbaso natthīti ñatvā.
ப³லவவிபஸ்ஸனாதி ப⁴யதுபட்டா²னே ஞாணங், ஆதீ³னவானுபஸ்ஸனே ஞாணங் முச்சிதுகம்யதாஞாணங், ப⁴ங்க³ஞாணந்தி சதுன்னங் ஞாணானங் அதி⁴வசனங். யேஸங் நிமித்தானங் அபா⁴வேன அரஹத்தப²லஸமாபத்தியா அனிமித்ததா, தங் த³ஸ்ஸேதுங் ‘‘ஸா ஹீ’’திஆதி³ வுத்தங். தத்த² ராக³ஸ்ஸ நிமித்தங், ராகோ³ ஏவ வா நிமித்தங் ராக³னிமித்தங். ஆதி³-ஸத்³தே³ன தோ³ஸனிமித்தாதீ³னங் ஸங்க³ஹோ த³ட்ட²ப்³போ³. ரூபவேத³னாதி³ஸங்கா²ரனிமித்தங் ரூபனிமித்தாதி³. தேஸங்யேவ நிச்சாதி³வஸேன உபட்டா²னங் நிச்சனிமித்தாதி³. தயித³ங் நிமித்தங் யஸ்மா ஸப்³பே³ன ஸப்³ப³ங் அரஹத்தப²லே நத்தி², தஸ்மா வுத்தங் ‘‘ஸா ஹி…பே॰… அனிமித்தா’’தி. நிமித்தங் அனுஸ்ஸரதி அனுக³ச்ச²தி ஆரப்³ப⁴ பவத்ததி ஸீலேனாதி நிமித்தானுஸாரீ. தேனாஹ ‘‘வுத்தப்பபே⁴த³ங் நிமித்தங் அனுஸரணஸபா⁴வ’’ந்தி.
Balavavipassanāti bhayatupaṭṭhāne ñāṇaṃ, ādīnavānupassane ñāṇaṃ muccitukamyatāñāṇaṃ, bhaṅgañāṇanti catunnaṃ ñāṇānaṃ adhivacanaṃ. Yesaṃ nimittānaṃ abhāvena arahattaphalasamāpattiyā animittatā, taṃ dassetuṃ ‘‘sā hī’’tiādi vuttaṃ. Tattha rāgassa nimittaṃ, rāgo eva vā nimittaṃ rāganimittaṃ. Ādi-saddena dosanimittādīnaṃ saṅgaho daṭṭhabbo. Rūpavedanādisaṅkhāranimittaṃ rūpanimittādi. Tesaṃyeva niccādivasena upaṭṭhānaṃ niccanimittādi. Tayidaṃ nimittaṃ yasmā sabbena sabbaṃ arahattaphale natthi, tasmā vuttaṃ ‘‘sā hi…pe… animittā’’ti. Nimittaṃ anussarati anugacchati ārabbha pavattati sīlenāti nimittānusārī. Tenāha ‘‘vuttappabhedaṃ nimittaṃ anusaraṇasabhāva’’nti.
அஸ்மிமானோதி ‘‘அஸ்மீ’’தி பவத்தோ அத்தவிஸயோ மானோ. அயங் நாம அஹமஸ்மீதி ரூபலக்க²ணோ வேத³னாதீ³ஸு வா அஞ்ஞதரலக்க²ணோ அயங் நாம அத்தா அஹங் அஸ்மீதி. அஸ்மிமானோ ஸமுக்³கா⁴தீயதி ஏதேனாதி அஸ்மிமானஸமுக்³கா⁴தோ, அரஹத்தமக்³கோ³. புன அஸ்மிமானோ நத்தீ²தி தஸ்ஸ அனுப்பத்தித⁴ம்மதாபாத³னங் கித்தெந்தோ ஸமுக்³கா⁴தத்தமேவ விபா⁴வேதி.
Asmimānoti ‘‘asmī’’ti pavatto attavisayo māno. Ayaṃ nāma ahamasmīti rūpalakkhaṇo vedanādīsu vā aññataralakkhaṇo ayaṃ nāma attā ahaṃ asmīti. Asmimāno samugghātīyati etenāti asmimānasamugghāto, arahattamaggo. Puna asmimāno natthīti tassa anuppattidhammatāpādanaṃ kittento samugghātattameva vibhāveti.
நிஸ்ஸாரணீயஸுத்தவண்ணனா நிட்டி²தா.
Nissāraṇīyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. நிஸ்ஸாரணீயஸுத்தங் • 3. Nissāraṇīyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. நிஸ்ஸாரணீயஸுத்தவண்ணனா • 3. Nissāraṇīyasuttavaṇṇanā
