| Library / Tipiṭaka / তিপিটক • Tipiṭaka / ইতিৰুত্তক-অট্ঠকথা • Itivuttaka-aṭṭhakathā |
৩. নিস্সরণিযসুত্তৰণ্ণনা
3. Nissaraṇiyasuttavaṇṇanā
৭২. ততিযে নিস্সরণিযাতি নিস্সরণপটিসংযুত্তা। ধাতুযোতি সত্তসুঞ্ঞসভাৰা। কামানন্তি কিলেসকামানঞ্চেৰ ৰত্থুকামানঞ্চ। অথ ৰা কামানন্তি কিলেসকামানং। কিলেসকামতো হি নিস্সরণা ৰত্থুকামেহিপি নিস্সরণংযেৰ হোতি, ন অঞ্ঞথা। ৰুত্তঞ্হেতং –
72. Tatiye nissaraṇiyāti nissaraṇapaṭisaṃyuttā. Dhātuyoti sattasuññasabhāvā. Kāmānanti kilesakāmānañceva vatthukāmānañca. Atha vā kāmānanti kilesakāmānaṃ. Kilesakāmato hi nissaraṇā vatthukāmehipi nissaraṇaṃyeva hoti, na aññathā. Vuttañhetaṃ –
‘‘ন তে কামা যানি চিত্রানি লোকে,
‘‘Na te kāmā yāni citrāni loke,
সঙ্কপ্পরাগো পুরিসস্স কামো।
Saṅkapparāgo purisassa kāmo;
তিট্ঠন্তি চিত্রানি তথেৰ লোকে,
Tiṭṭhanti citrāni tatheva loke,
অথেত্থ ধীরা ৰিনযন্তি ছন্দ’’ন্তি॥ (অ॰ নি॰ ৬.৬৩)।
Athettha dhīrā vinayanti chanda’’nti. (a. ni. 6.63);
নিস্সরণন্তি অপগমো। নেক্খম্মন্তি পঠমজ্ঝানং, ৰিসেসতো তং অসুভারম্মণং দট্ঠব্বং। যো পন তং ঝানং পাদকং কত্ৰা সঙ্খারে সম্মসিত্ৰা ততিযমগ্গং পত্ৰা অনাগামিমগ্গেন নিব্বানং সচ্ছিকরোতি, তস্স চিত্তং অচ্চন্তমেৰ কামেহি নিস্সটন্তি ইদং উক্কট্ঠতো কামানং নিস্সরণং ৰেদিতব্বং। রূপানন্তি রূপধম্মানং, ৰিসেসেন সদ্ধিং আরম্মণেহি কুসলৰিপাককিরিযাভেদতো সব্বেসং রূপাৰচরধম্মানং। আরুপ্পন্তি অরূপাৰচরজ্ঝানং। কেচি পন ‘‘কামান’’ন্তি পদস্স ‘‘সব্বেসং কামাৰচরধম্মান’’ন্তি অত্থং ৰদন্তি। ‘‘নেক্খম্ম’’ন্তি চ ‘‘পঞ্চ রূপাৰচরজ্ঝানানী’’তি। তং অট্ঠকথাসু নত্থি, ন যুজ্জতি চ। ভূতন্তি জাতং। সঙ্খতন্তি সমেচ্চ সম্ভুয্য পচ্চযেহি কতং। পটিচ্চসমুপ্পন্নন্তি কারণতো নিব্বত্তং। তীহিপি পদেহি তেভূমকে ধম্মে অনৰসেসতো পরিযাদিযতি। নিরোধোতি নিব্বানং। এত্থ চ পঠমায ধাতুযা কামপরিঞ্ঞা ৰুত্তা, দুতিযায রূপপরিঞ্ঞা, ততিযায সব্বসঙ্খতপরিঞ্ঞা সব্বভৰসমতিক্কমো ৰুত্তো।
Nissaraṇanti apagamo. Nekkhammanti paṭhamajjhānaṃ, visesato taṃ asubhārammaṇaṃ daṭṭhabbaṃ. Yo pana taṃ jhānaṃ pādakaṃ katvā saṅkhāre sammasitvā tatiyamaggaṃ patvā anāgāmimaggena nibbānaṃ sacchikaroti, tassa cittaṃ accantameva kāmehi nissaṭanti idaṃ ukkaṭṭhato kāmānaṃ nissaraṇaṃ veditabbaṃ. Rūpānanti rūpadhammānaṃ, visesena saddhiṃ ārammaṇehi kusalavipākakiriyābhedato sabbesaṃ rūpāvacaradhammānaṃ. Āruppanti arūpāvacarajjhānaṃ. Keci pana ‘‘kāmāna’’nti padassa ‘‘sabbesaṃ kāmāvacaradhammāna’’nti atthaṃ vadanti. ‘‘Nekkhamma’’nti ca ‘‘pañca rūpāvacarajjhānānī’’ti. Taṃ aṭṭhakathāsu natthi, na yujjati ca. Bhūtanti jātaṃ. Saṅkhatanti samecca sambhuyya paccayehi kataṃ. Paṭiccasamuppannanti kāraṇato nibbattaṃ. Tīhipi padehi tebhūmake dhamme anavasesato pariyādiyati. Nirodhoti nibbānaṃ. Ettha ca paṭhamāya dhātuyā kāmapariññā vuttā, dutiyāya rūpapariññā, tatiyāya sabbasaṅkhatapariññā sabbabhavasamatikkamo vutto.
গাথাসু কামনিস্সরণং ঞত্ৰাতি ‘‘ইদং কামনিস্সরণং – এৰঞ্চ কামতো নিস্সরণ’’ন্তি জানিত্ৰা। অতিক্কমতি এতেনাতি অতিক্কমো, অতিক্কমনূপাযো, তং অতিক্কমং আরুপ্পং ঞত্ৰা। সব্বে সঙ্খারা সমন্তি ৰূপসমন্তি এত্থাতি সব্বসঙ্খারসমথো, নিব্বানং, তং ফুসং ফুসন্তো। সেসং হেট্ঠা ৰুত্তনযমেৰ।
Gāthāsu kāmanissaraṇaṃ ñatvāti ‘‘idaṃ kāmanissaraṇaṃ – evañca kāmato nissaraṇa’’nti jānitvā. Atikkamati etenāti atikkamo, atikkamanūpāyo, taṃ atikkamaṃ āruppaṃ ñatvā. Sabbe saṅkhārā samanti vūpasamanti etthāti sabbasaṅkhārasamatho, nibbānaṃ, taṃ phusaṃ phusanto. Sesaṃ heṭṭhā vuttanayameva.
ততিযসুত্তৰণ্ণনা নিট্ঠিতা।
Tatiyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ইতিৰুত্তকপাল়ি • Itivuttakapāḷi / ৩. নিস্সরণিযসুত্তং • 3. Nissaraṇiyasuttaṃ
