| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
32. நிஸ்ஸயனித்³தே³ஸவண்ணனா
32. Nissayaniddesavaṇṇanā
230. ப்³யத்தஸ்ஸாதி எத்த² கித்தாவதா ப்³யத்தோ ஹோதீதி சே? நிஸ்ஸயமுச்சனகேன பன ஸப்³ப³ந்திமேன த⁴ம்மபரிச்சே²தே³ன அத்த²தோ ச ப்³யஞ்ஜனதோ ச த்³வே மாதிகா பகு³ணா வாசுக்³க³தா காதப்³பா³, பக்க²தி³வஸேஸு த⁴ம்மஸ்ஸாவனத்தா²ய ஸுத்தந்ததோ சத்தாரோ பா⁴ணவாரா, ஸம்பத்தானங் பரிஸானங் பரிகத²னத்தா²ய அந்த⁴கவிந்த³மஹாராஹுலோவாத³த⁴ம்மக்க²ந்த⁴ஸதி³ஸோ ஏகோ கதா²மக்³கோ³, ஸங்க⁴ப⁴த்தமங்க³லாமங்க³லேஸு அனுமோத³னத்தா²ய திஸ்ஸோ அனுமோத³னா, உபோஸத²ப்பவாரணாதி³விஜானநத்த²ங் கம்மாகம்மவினிச்ச²யோ , ஸமணத⁴ம்மகரணத்த²ங் ஸமாதி⁴வஸேன வா விபஸ்ஸனாவஸேன வா அரஹத்தபரியோஸானங் ஏகங் கம்மட்டா²னங் எத்தகங் உக்³க³ஹேதப்³ப³ங். எத்தாவதா ப்³யத்தோ நாம ஹோதி சாதுதி³ஸோ, இதரதா² அப்³யத்தோ.
230.Byattassāti ettha kittāvatā byatto hotīti ce? Nissayamuccanakena pana sabbantimena dhammaparicchedena atthato ca byañjanato ca dve mātikā paguṇā vācuggatā kātabbā, pakkhadivasesu dhammassāvanatthāya suttantato cattāro bhāṇavārā, sampattānaṃ parisānaṃ parikathanatthāya andhakavindamahārāhulovādadhammakkhandhasadiso eko kathāmaggo, saṅghabhattamaṅgalāmaṅgalesu anumodanatthāya tisso anumodanā, uposathappavāraṇādivijānanatthaṃ kammākammavinicchayo , samaṇadhammakaraṇatthaṃ samādhivasena vā vipassanāvasena vā arahattapariyosānaṃ ekaṃ kammaṭṭhānaṃ ettakaṃ uggahetabbaṃ. Ettāvatā byatto nāma hoti cātudiso, itarathā abyatto.
231. இதா³னி நிஸ்ஸயக்³க³ஹணாகாரங் த³ஸ்ஸேதுங் ‘‘ஏகங்ஸ’’ந்திஆதி³ வுத்தங். எத்த² (மஹாவ॰ 103) ஆயஸ்மதோதி ஆயஸ்மந்தங்.
231. Idāni nissayaggahaṇākāraṃ dassetuṃ ‘‘ekaṃsa’’ntiādi vuttaṃ. Ettha (mahāva. 103) āyasmatoti āyasmantaṃ.
232. இதா³னி படிப்பஸ்ஸத்³தி⁴விதா⁴னங் த³ஸ்ஸேதுங் ‘‘பக்கந்தே’’திஆதி³ வுத்தங், ‘‘பஞ்சிமா, பி⁴க்க²வே, நிஸ்ஸயப்படிப்பஸ்ஸத்³தி⁴யோ உபஜ்ஜா²யம்ஹா. உபஜ்ஜா²யோ பக்கந்தோ வா ஹோதி விப்³ப⁴ந்தோ வா காலகதோ வா பக்க²ஸங்கந்தோ வா ஆணத்தியேவ பஞ்சமீ’’தி (மஹாவ॰ 83), ‘‘ச²யிமா, பி⁴க்க²வே, நிஸ்ஸயப்படிப்பஸ்ஸத்³தி⁴யோ ஆசரியம்ஹா. ஆசரியோ பக்கந்தோ வா ஹோதி விப்³ப⁴ந்தோ வா காலகதோ வா பக்க²ஸங்கந்தோ வா ஆணத்தியேவ பஞ்சமீ, உபஜ்ஜா²யேன வா ஸமோதா⁴னக³தோ ஹோதீ’’தி இத³ங் பன உப⁴யங் இத⁴ த³ஸ்ஸிதங். ஸசே ஆசரியுபஜ்ஜா²யா ஸாமந்தவிஹாரேஸுபி அபரிக்கி²த்தேஸு லெட்³டு³பாதத்³வயப்³ப⁴ந்தரே வஸந்தி, நிஸ்ஸயோ ந படிப்பஸ்ஸம்ப⁴தி. பரிக்கி²த்தேஸுபி ந படிப்பஸ்ஸம்ப⁴தீதி ஏகே. ஆசரியா பன ந இச்ச²ந்தி. கஸ்மாதி சே? நிஸ்ஸயக்³க³ஹணப்படிப்பஸ்ஸத்³தீ⁴னங் உபசாரஸீமாய பரிச்சி²ன்னத்தா. லெட்³டு³பாதேன உபசாரஸீமாபரிச்சே²தோ³ பன அபரிக்கி²த்தேஸு ஏவ லப்³ப⁴தி, ந பரிக்கி²த்தேஸு. தஸ்மா ஆசரியானங் வினிச்ச²யேவ டா²தப்³ப³ங்.
232. Idāni paṭippassaddhividhānaṃ dassetuṃ ‘‘pakkante’’tiādi vuttaṃ, ‘‘pañcimā, bhikkhave, nissayappaṭippassaddhiyo upajjhāyamhā. Upajjhāyo pakkanto vā hoti vibbhanto vā kālakato vā pakkhasaṅkanto vā āṇattiyeva pañcamī’’ti (mahāva. 83), ‘‘chayimā, bhikkhave, nissayappaṭippassaddhiyo ācariyamhā. Ācariyo pakkanto vā hoti vibbhanto vā kālakato vā pakkhasaṅkanto vā āṇattiyeva pañcamī, upajjhāyena vā samodhānagato hotī’’ti idaṃ pana ubhayaṃ idha dassitaṃ. Sace ācariyupajjhāyā sāmantavihāresupi aparikkhittesu leḍḍupātadvayabbhantare vasanti, nissayo na paṭippassambhati. Parikkhittesupi na paṭippassambhatīti eke. Ācariyā pana na icchanti. Kasmāti ce? Nissayaggahaṇappaṭippassaddhīnaṃ upacārasīmāya paricchinnattā. Leḍḍupātena upacārasīmāparicchedo pana aparikkhittesu eva labbhati, na parikkhittesu. Tasmā ācariyānaṃ vinicchayeva ṭhātabbaṃ.
பக்கந்தேதி எத்த² (மஹாவ॰ அட்ட²॰ 83) ஸசே ஆசரியோ அந்தேவாஸிகங் அனாமந்தெத்வாவ உபசாரஸீமங் அதிக்கமதி, நிஸ்ஸயோ படிப்பஸ்ஸம்ப⁴தி. ஸசே உபசாரஸீமங் அனதிக்கமித்வாவ நிவத்ததி, ந படிப்பஸ்ஸம்ப⁴தி. ஆசரியங் அனாமந்தெத்வா அந்தேவாஸிகஸ்ஸ க³மனேபி ஏஸேவ நயோ. ஸசே ஆசரியோ கத்த²சி க³ந்துகாமோ அந்தேவாஸிகங் ஆபுச்ச²தி, அந்தேவாஸிகோபி ‘‘ஸாது⁴ ஸாதூ⁴’’தி ஸம்படிச்ச²தி, தங்க²ணே ஏவ படிப்பஸ்ஸம்ப⁴தி. ஏவங் ஆசரியங் ஆபுச்சி²த்வா அந்தேவாஸிகஸ்ஸ க³மனேபி. த்³வீஸுபி அந்தோவிஹாரேயேவ டி²தேஸு ஆசரியோ வா அந்தேவாஸிகங், அந்தேவாஸிகோ வா ஆசரியங் அனாபுச்சி²த்வாவ ஸசே த்³வே லெட்³டு³பாதே அதிக்கமதி, படிப்பஸ்ஸம்ப⁴தி. பக்க²ஸங்கந்தே வா விப்³ப⁴ந்தே வா காலகதே வா தங்க²ணேயேவ படிப்பஸ்ஸம்ப⁴தி . ஆணத்தி நாம நிஸ்ஸயப்பணாமனா. த³ஸ்ஸனஸவனவஸேன து³வித⁴ங் ஸமோதா⁴னங்.
Pakkanteti ettha (mahāva. aṭṭha. 83) sace ācariyo antevāsikaṃ anāmantetvāva upacārasīmaṃ atikkamati, nissayo paṭippassambhati. Sace upacārasīmaṃ anatikkamitvāva nivattati, na paṭippassambhati. Ācariyaṃ anāmantetvā antevāsikassa gamanepi eseva nayo. Sace ācariyo katthaci gantukāmo antevāsikaṃ āpucchati, antevāsikopi ‘‘sādhu sādhū’’ti sampaṭicchati, taṅkhaṇe eva paṭippassambhati. Evaṃ ācariyaṃ āpucchitvā antevāsikassa gamanepi. Dvīsupi antovihāreyeva ṭhitesu ācariyo vā antevāsikaṃ, antevāsiko vā ācariyaṃ anāpucchitvāva sace dve leḍḍupāte atikkamati, paṭippassambhati. Pakkhasaṅkante vā vibbhante vā kālakate vā taṅkhaṇeyeva paṭippassambhati . Āṇatti nāma nissayappaṇāmanā. Dassanasavanavasena duvidhaṃ samodhānaṃ.
233. அலஜ்ஜிந்தி எத்த² –
233.Alajjinti ettha –
‘‘ஸஞ்சிச்ச ஆபத்திங் ஆபஜ்ஜதி;
‘‘Sañcicca āpattiṃ āpajjati;
ஆபத்திங் பரிகூ³ஹதி;
Āpattiṃ parigūhati;
அக³திக³மனஞ்ச க³ச்ச²தி;
Agatigamanañca gacchati;
ஏதி³ஸோ வுச்சதி அலஜ்ஜிபுக்³க³லோ’’தி. (பரி॰ 359) –
Ediso vuccati alajjipuggalo’’ti. (pari. 359) –
ஏவங் வுத்தங். ‘‘ந பி⁴க்க²வே அலஜ்ஜினங் நிஸ்ஸாய வத்த²ப்³ப³ங். யோ வஸெய்ய, ஆபத்தி து³க்கடஸ்ஸா’’தி (மஹாவ॰ 120) ஹி வுத்தங்.
Evaṃ vuttaṃ. ‘‘Na bhikkhave alajjinaṃ nissāya vatthabbaṃ. Yo vaseyya, āpatti dukkaṭassā’’ti (mahāva. 120) hi vuttaṃ.
234. ‘‘அனுஜானாமி, பி⁴க்க²வே, அத்³தா⁴னமக்³க³ப்படிபன்னேன பி⁴க்கு²னா நிஸ்ஸயங் அலப⁴மானேன அனிஸ்ஸிதேன வத்து²’’ந்தி (மஹாவ॰ 121) வுத்தத்தா ‘‘அத்³தி⁴கஸ்ஸா’’தி வுத்தங். கி³லானுபட்டா²கஸ்ஸ ச யாசிதஸ்ஸாதி ஸம்ப³ந்தோ⁴. ‘‘அனுஜானாமி, பி⁴க்க²வே, கி³லானுபட்டா²கேன பி⁴க்கு²னா நிஸ்ஸயங் அலப⁴மானேன யாசியமானேன அனிஸ்ஸிதேன வத்து²’’ந்தி (மஹாவ॰ 121) ஹி வுத்தங். ஸல்லக்கெ²ந்தேன பா²ஸுகந்தி பா²ஸுவிஹாரங் ஸல்லக்கெ²ந்தேன. இத³ங் பன பரிஹாரங் (மஹாவ॰ அட்ட²॰ 121) ஸோதாபன்னாதி³அரியஸாவகோ வா தா²மக³தஸமத²விபஸ்ஸனாலாபீ⁴ வா பா³லபுது²ஜ்ஜனோ வா ந லப⁴தி. யஸ்ஸ கோ² பன ஸமத²விபஸ்ஸனா தருணா ஹோதி, ந தா²மக³தா, அயங் லப⁴தி. அஸந்தே நிஸ்ஸயதா³யகே ‘‘யதா³ படிரூபோ நிஸ்ஸயதா³யகோ ஆக³ச்சி²ஸ்ஸதி, ததா³ தஸ்ஸ நிஸ்ஸாய வஸிஸ்ஸாமீ’’தி ஆபோ⁴க³ங் கத்வா யாவ ஆஸாள்ஹீபுண்ணமா, தாவ வஸிதுங் லப⁴தி. ஸசே பன ஆஸாள்ஹீமாஸே நிஸ்ஸயதா³யகங் ந லப⁴தி, யத்த² அத்தி², தத்த² க³ந்தப்³ப³ங். அந்தோவஸ்ஸே பன அனிஸ்ஸிதேன வத்து²ங் ந வட்டதி. ஸபா⁴கே³ தா³யகே அஸந்தே வஸிதுங் லப்³ப⁴தீதி ஸப்³ப³பதே³ஸு யோஜனா காதப்³பா³. நிஸ்ஸயவினிச்ச²யோ.
234. ‘‘Anujānāmi, bhikkhave, addhānamaggappaṭipannena bhikkhunā nissayaṃ alabhamānena anissitena vatthu’’nti (mahāva. 121) vuttattā ‘‘addhikassā’’ti vuttaṃ. Gilānupaṭṭhākassa ca yācitassāti sambandho. ‘‘Anujānāmi, bhikkhave, gilānupaṭṭhākena bhikkhunā nissayaṃ alabhamānena yāciyamānena anissitena vatthu’’nti (mahāva. 121) hi vuttaṃ. Sallakkhentena phāsukanti phāsuvihāraṃ sallakkhentena. Idaṃ pana parihāraṃ (mahāva. aṭṭha. 121) sotāpannādiariyasāvako vā thāmagatasamathavipassanālābhī vā bālaputhujjano vā na labhati. Yassa kho pana samathavipassanā taruṇā hoti, na thāmagatā, ayaṃ labhati. Asante nissayadāyake ‘‘yadā paṭirūpo nissayadāyako āgacchissati, tadā tassa nissāya vasissāmī’’ti ābhogaṃ katvā yāva āsāḷhīpuṇṇamā, tāva vasituṃ labhati. Sace pana āsāḷhīmāse nissayadāyakaṃ na labhati, yattha atthi, tattha gantabbaṃ. Antovasse pana anissitena vatthuṃ na vaṭṭati. Sabhāge dāyake asante vasituṃ labbhatīti sabbapadesu yojanā kātabbā. Nissayavinicchayo.
நிஸ்ஸயனித்³தே³ஸவண்ணனா நிட்டி²தா.
Nissayaniddesavaṇṇanā niṭṭhitā.
