| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
32. நிஸ்ஸயனித்³தே³ஸவண்ணனா
32. Nissayaniddesavaṇṇanā
230. ப்³யத்தஸ்ஸாதி ‘‘காரிய’’ந்தி கிதகயோகே³ கத்தரி ச²ட்டீ². ப்³யத்தோ ச நாம ‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ங், ஆபத்திங் ஜானாதி, அனாபத்திங் ஜானாதி, லஹுகங் ஆபத்திங் ஜானாதி, க³ருகங் ஆபத்திங் ஜானாதி, உப⁴யானி கோ² பனஸ்ஸ பாதிமொக்கா²னி வித்தா²ரேன ஸ்வாக³தானி ஹொந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ. இமேஹி கோ², பி⁴க்க²வே, பஞ்சஹி அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³’’ந்தி (மஹாவ॰ 103) ஏவங் வுத்தப்³யத்தோ ச ப³ஹுஸ்ஸுதப்³யத்தோ ச வேதி³தப்³போ³.
230.Byattassāti ‘‘kāriya’’nti kitakayoge kattari chaṭṭhī. Byatto ca nāma ‘‘pañcahi, bhikkhave, aṅgehi samannāgatena bhikkhunā anissitena vatthabbaṃ, āpattiṃ jānāti, anāpattiṃ jānāti, lahukaṃ āpattiṃ jānāti, garukaṃ āpattiṃ jānāti, ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso. Imehi kho, bhikkhave, pañcahi aṅgehi samannāgatena bhikkhunā anissitena vatthabba’’nti (mahāva. 103) evaṃ vuttabyatto ca bahussutabyatto ca veditabbo.
தத்த² ஸுவிப⁴த்தானீதி ஸுட்டு² விப⁴த்தானி பத³பச்சாப⁴ட்ட²ஸங்கரதோ³ஸவிரஹிதானி. ஸுப்பவத்தீனீதி பகு³ணானி வாசுக்³க³தானி. ஸுவினிச்சி²தானி ஸுத்தஸோதி க²ந்த⁴கபரிவாரதோ ஆஹரிதப்³ப³ஸுத்தவஸேன ஸுட்டு² வினிச்சி²தானி. அனுப்³யஞ்ஜனஸோதி அக்க²ரபத³பாரிபூரியா ஸுவினிச்சி²தானி அக்க²ண்டா³னி அவிபரீதக்க²ரானி. ஏதேன அட்ட²கதா² தீ³பிதா. அட்ட²கதா²தோ ஹி ஏஸ வினிச்ச²யோ ஹோதீதி. ப³ஹுஸ்ஸுதப்³யத்தோ பன யேன ஸப்³ப³ந்திமேன பரிச்சே²தே³ன த்³வே மாதிகா பகு³ணா வாசுக்³க³தா, பக்க²தி³வஸேஸு த⁴ம்மஸவனத்தா²ய ஸுத்தந்ததோ சத்தாரோ பா⁴ணவாரா, ஸம்பத்தானங் பரிஸானங் பரிகத²னத்தா²ய அந்த⁴கவிந்த³மஹாராஹுலோவாத³அம்ப³ட்ட²ஸதி³ஸோ ஏகோ கதா²மக்³கோ³, ஸங்க⁴ப⁴த்தமங்க³லாமங்க³லேஸு அனுமோத³னத்தா²ய திஸ்ஸோ அனுமோத³னா, உபோஸத²ப்பவாரணாதி³ஜானநத்த²ங் கம்மாகம்மவினிச்ச²யோ, ஸமணத⁴ம்மகரணத்த²ங் ஸமாதி⁴வஸேன விபஸ்ஸனாவஸேன வா அரஹத்தமக்³க³பரியோஸானமேகங் கம்மட்டா²னங் எத்தகங் உக்³க³ஹிதங், ஸ்வாயங் வுச்சதி. நத்தி² நிஸ்ஸாய காரியந்தி ஆசரியாதி³ங் நிஸ்ஸாய வாஸேன கத்தப்³ப³ங் நத்தி². ‘‘நிஸ்ஸயகாரிய’’ந்தி வா பாடோ², நிஸ்ஸயேன காரியந்தி ஸமாஸோ. ஜீவஸ்ஸ யத்தகோ பரிச்சே²தோ³ யாவஜீவங்.
Tattha suvibhattānīti suṭṭhu vibhattāni padapaccābhaṭṭhasaṅkaradosavirahitāni. Suppavattīnīti paguṇāni vācuggatāni. Suvinicchitānisuttasoti khandhakaparivārato āharitabbasuttavasena suṭṭhu vinicchitāni. Anubyañjanasoti akkharapadapāripūriyā suvinicchitāni akkhaṇḍāni aviparītakkharāni. Etena aṭṭhakathā dīpitā. Aṭṭhakathāto hi esa vinicchayo hotīti. Bahussutabyatto pana yena sabbantimena paricchedena dve mātikā paguṇā vācuggatā, pakkhadivasesu dhammasavanatthāya suttantato cattāro bhāṇavārā, sampattānaṃ parisānaṃ parikathanatthāya andhakavindamahārāhulovādaambaṭṭhasadiso eko kathāmaggo, saṅghabhattamaṅgalāmaṅgalesu anumodanatthāya tisso anumodanā, uposathappavāraṇādijānanatthaṃ kammākammavinicchayo, samaṇadhammakaraṇatthaṃ samādhivasena vipassanāvasena vā arahattamaggapariyosānamekaṃ kammaṭṭhānaṃ ettakaṃ uggahitaṃ, svāyaṃ vuccati. Natthi nissāya kāriyanti ācariyādiṃ nissāya vāsena kattabbaṃ natthi. ‘‘Nissayakāriya’’nti vā pāṭho, nissayena kāriyanti samāso. Jīvassa yattako paricchedo yāvajīvaṃ.
231. தேன நிஸ்ஸாய வஸந்தேன ஏவங் நிஸ்ஸயோ க³ஹேதப்³போ³தி த³ஸ்ஸேதுங் ‘‘ஏகங்ஸ’’ந்திஆதி³ வுத்தங். ஏகங்ஸந்தி ஏகோ அங்ஸோ அஸ்ஸ சீவரஸ்ஸாதி விக்³க³ஹோ. கிரியாவிஸேஸனங் வா பு⁴ம்மத்தே² வா உபயோக³வசனங், ஏகஸ்மிங் அங்ஸேதி அத்தோ². அஞ்ஜலி கரபுடோ. யாவததியகங் வதே³தி உபஸம்பதா³ய ஸட்டி²வஸ்ஸேன ஸத்ததிவஸ்ஸேன வாபி ப்³யத்தஸ்ஸ நவகஸ்ஸ ஸந்திகே யாவததியகங் வசனங் கரெய்ய. யாவததியோ வாரோ அஸ்ஸாதி கிரியாவிஸேஸனஸமாஸோ. ஆயஸ்மதோதி ஆயஸ்மந்தங். வச்சா²மீதி வஸாமி. உபஜ்ஜ²ங் க³ண்ஹந்தேனாபி ‘‘உபஜ்ஜா²யோ மே, ப⁴ந்தே, ஹோஹீ’’தி க³ஹேதப்³ப³ங். தங் பன ‘‘ஆசரியோ’’தி எத்த² ‘‘உபஜ்ஜா²யோ’’தி வசனங் விஸேஸோதி எத்த² வாசாபே⁴த³தோ ந விஸுங் வுத்தங். ந கேவலமெத்த² நிஸ்ஸயுபஜ்ஜா²யக³ஹணே, கா³மப்பவேஸனாதீ³ஸுபி ஏவமேவ கத்வா ‘‘அஹங் ஆவுஸோ’’தி வா ‘‘ப⁴ந்தே’’தி வா வத்வா ‘‘கா³மப்பவேஸனங் ஆபுச்சா²மீ’’திஆதி³னா வத்தப்³ப³ங்.
231. Tena nissāya vasantena evaṃ nissayo gahetabboti dassetuṃ ‘‘ekaṃsa’’ntiādi vuttaṃ. Ekaṃsanti eko aṃso assa cīvarassāti viggaho. Kiriyāvisesanaṃ vā bhummatthe vā upayogavacanaṃ, ekasmiṃ aṃseti attho. Añjali karapuṭo. Yāvatatiyakaṃ vadeti upasampadāya saṭṭhivassena sattativassena vāpi byattassa navakassa santike yāvatatiyakaṃ vacanaṃ kareyya. Yāvatatiyo vāro assāti kiriyāvisesanasamāso. Āyasmatoti āyasmantaṃ. Vacchāmīti vasāmi. Upajjhaṃ gaṇhantenāpi ‘‘upajjhāyo me, bhante, hohī’’ti gahetabbaṃ. Taṃ pana ‘‘ācariyo’’ti ettha ‘‘upajjhāyo’’ti vacanaṃ visesoti ettha vācābhedato na visuṃ vuttaṃ. Na kevalamettha nissayupajjhāyagahaṇe, gāmappavesanādīsupi evameva katvā ‘‘ahaṃ āvuso’’ti vā ‘‘bhante’’ti vā vatvā ‘‘gāmappavesanaṃ āpucchāmī’’tiādinā vattabbaṃ.
232. நிஸ்ஸயபடிப்பஸ்ஸத்³தி⁴ங் த³ஸ்ஸேதி ‘‘பக்கந்தே’’திஆதி³னா. பக்கந்தேதி உபஜ்ஜா²யே ஆசரியே ஸத்³தி⁴விஹாரிகே அந்தேவாஸிகே ச கா³மாதீ³ஸு யத்த² கத்த²சி ஆபுச்சி²த்வா வா அனாபுச்சி²த்வா வா க³தே. தேஸு யேன கேனசி ‘‘அஸுகங் நாம கா³மங் க³ச்சா²மீ’’தி வுத்தே தேஸுயேவ யேன கேனசி ‘‘ஸாதூ⁴’’தி ஸம்படிச்சி²தேபி தங் தங் நியமங் அதிக்கமித்வா பக்கந்தேபி அனாபுச்சா² பன உபசாரஸீமாதிக்கமேன பக்கந்தேபி நிஸ்ஸயோ ஸம்மதி படிப்பஸ்ஸம்ப⁴தி. பக்க²ஸங்கந்தேதி தித்தி²யபக்க²ஸங்கந்தே சாபி விப்³ப⁴ந்தே சாபி மரணேன ச தங்க²ணஞ்ஞேவ படிப்பஸ்ஸம்ப⁴தி. ஆணத்தி நாம ‘‘பணாமேமி த’’ந்தி வா ‘‘மா இத⁴ பவிஸா’’திஆதி³கா நிஸ்ஸயப்பணாமனா. தாய பணாமிதேன ஆசரியுபஜ்ஜா²யா க²மாபேதப்³பா³. அக²மந்தேஸு த³ண்ட³கம்மங் கத்வா தஸ்மிங் விஹாரே மஹாதே²ரே க³ஹெத்வாபி ஸாமந்தவிஹாரே பி⁴க்கூ² க³ஹெத்வாபி க²மாபேதப்³பா³. ந க²மந்தி சே, ஆசரியுபஜ்ஜா²யானங் ஸபா⁴கா³னங் ஸந்திகே வஸிதப்³ப³ங். யேன கேனசி காரணேன ந ஸக்கா ஹோதி தத்ர ஆசரியுபஜ்ஜா²யானங் ஸபா⁴கா³னங் ஸந்திகே வஸிதுங், தங்யேவ விஹாரங் ஆக³ந்த்வா அஞ்ஞஸ்ஸ ஸந்திகே நிஸ்ஸயங் க³ஹெத்வா வஸிதப்³ப³ங். தத்த² ‘‘பஞ்சஹி, பி⁴க்க²வே, அங்கே³ஹி ஸமன்னாக³தங் ஸத்³தி⁴விஹாரிகங் அப்பணாமெந்தோ உபஜ்ஜா²யோ ஸாதிஸாரோ ஹோதி, பணாமெந்தோ அனதிஸாரோ ஹோதி. உபஜ்ஜா²யம்ஹி நாதி⁴மத்தங் பேமங் ஹோதி, நாதி⁴மத்தோ பஸாதோ³ ஹோதி, நாதி⁴மத்தா ஹிரீ ஹோதி, நாதி⁴மத்தோ கா³ரவோ ஹோதி, நாதி⁴மத்தா பா⁴வனா ஹோதி. இமேஹி கோ², பி⁴க்க²வே, பஞ்சஹங்கே³ஹி…பே॰… ஹோதி (மஹாவ॰ 68). பஞ்சஹி, பி⁴க்க²வே , அங்கே³ஹி ஸமன்னாக³தங் அந்தேவாஸிகங் அப்பணாமெந்தோ ஆசரியோ…பே॰… ஹோதீ’’தி (மஹாவ॰ 81) வுத்தத்தா பன அஸம்மாவத்தந்தே அந்தேவாஸிகஸத்³தி⁴விஹாரிகே அப்பணாமெந்தா ஆசரியுபஜ்ஜா²யா து³க்கடங் ஆபஜ்ஜந்தீதி வேதி³தப்³ப³ங். பா⁴வனாதி மெத்தாபா⁴வனா. உபஜ்ஜா²யஸமோதா⁴னங் பன தஸ்ஸ த³ஸ்ஸனஸவனவஸேன வேதி³தப்³ப³ங்.
232. Nissayapaṭippassaddhiṃ dasseti ‘‘pakkante’’tiādinā. Pakkanteti upajjhāye ācariye saddhivihārike antevāsike ca gāmādīsu yattha katthaci āpucchitvā vā anāpucchitvā vā gate. Tesu yena kenaci ‘‘asukaṃ nāma gāmaṃ gacchāmī’’ti vutte tesuyeva yena kenaci ‘‘sādhū’’ti sampaṭicchitepi taṃ taṃ niyamaṃ atikkamitvā pakkantepi anāpucchā pana upacārasīmātikkamena pakkantepi nissayo sammati paṭippassambhati. Pakkhasaṅkanteti titthiyapakkhasaṅkante cāpi vibbhante cāpi maraṇena ca taṅkhaṇaññeva paṭippassambhati. Āṇatti nāma ‘‘paṇāmemi ta’’nti vā ‘‘mā idha pavisā’’tiādikā nissayappaṇāmanā. Tāya paṇāmitena ācariyupajjhāyā khamāpetabbā. Akhamantesu daṇḍakammaṃ katvā tasmiṃ vihāre mahāthere gahetvāpi sāmantavihāre bhikkhū gahetvāpi khamāpetabbā. Na khamanti ce, ācariyupajjhāyānaṃ sabhāgānaṃ santike vasitabbaṃ. Yena kenaci kāraṇena na sakkā hoti tatra ācariyupajjhāyānaṃ sabhāgānaṃ santike vasituṃ, taṃyeva vihāraṃ āgantvā aññassa santike nissayaṃ gahetvā vasitabbaṃ. Tattha ‘‘pañcahi, bhikkhave, aṅgehi samannāgataṃ saddhivihārikaṃ appaṇāmento upajjhāyo sātisāro hoti, paṇāmento anatisāro hoti. Upajjhāyamhi nādhimattaṃ pemaṃ hoti, nādhimatto pasādo hoti, nādhimattā hirī hoti, nādhimatto gāravo hoti, nādhimattā bhāvanā hoti. Imehi kho, bhikkhave, pañcahaṅgehi…pe… hoti (mahāva. 68). Pañcahi, bhikkhave , aṅgehi samannāgataṃ antevāsikaṃ appaṇāmento ācariyo…pe… hotī’’ti (mahāva. 81) vuttattā pana asammāvattante antevāsikasaddhivihārike appaṇāmentā ācariyupajjhāyā dukkaṭaṃ āpajjantīti veditabbaṃ. Bhāvanāti mettābhāvanā. Upajjhāyasamodhānaṃ pana tassa dassanasavanavasena veditabbaṃ.
233. அலஜ்ஜிந்தி –
233.Alajjinti –
‘‘ஸஞ்சிச்ச ஆபத்திங் ஆபஜ்ஜதி;
‘‘Sañcicca āpattiṃ āpajjati;
ஆபத்திங் பரிகூ³ஹதி;
Āpattiṃ parigūhati;
அக³திக³மனஞ்ச க³ச்ச²தி;
Agatigamanañca gacchati;
ஏதி³ஸோ வுச்சதி அலஜ்ஜிபுக்³க³லோ’’தி. (பரி॰ 359) –
Ediso vuccati alajjipuggalo’’ti. (pari. 359) –
ஏவங் வுத்தலக்க²ணங் அலஜ்ஜிங். நிஸ்ஸயங் தெ³ந்தேனாபி லஜ்ஜினோயேவ தா³தப்³ப³ங். ‘‘ந பி⁴க்க²வே அலஜ்ஜீனங் நிஸ்ஸயோ தா³தப்³போ³. யோ த³தெ³ய்ய, ஆபத்தி து³க்கடஸ்ஸா’’தி (மஹாவ॰ 120) ஹி வுத்தங். அதி³ட்ட²புப்³ப³ஸ்ஸ கதிபாஹங் ஆசாரங் உபபரிக்கி²த்வா தா³தப்³ப³ங். அபுப்³ப³ந்தி எத்த² ஸம்ப³ந்தி⁴ஸத்³த³த்தா புப்³ப³-ஸத்³தே³ன புப்³ப³வாஸோ க³ஹிதோ, நத்தி² புப்³போ³ அஸ்ஸாதி அபுப்³ப³ங், நவந்தி வுத்தங் ஹோதி. சத்தாரி பஞ்ச வா பரிமாணமேதேஸந்தி விக்³க³ஹோ. எத்த² பன பரிமாண-ஸத்³த³ஸன்னிதா⁴னேன ஸங்க்²யெய்யவாசினோபிதே ஸங்க்²யாமத்தவாசினோ ஹொந்தீதி சதுபஞ்சஸங்க்²யாபரிமாணமேவ ஸங்க்²யெய்யமாஹ, தஸ்மா விக்³க³ஹபத³த்தே²ஹி பி⁴ன்னோ அஞ்ஞபத³த்தோ² ஸம்ப⁴வதீதி ஸமாஸோ. வா-ஸத்³த³ஸ்ஸ யோ விகப்பத்தோ², தத்த² சாயங் ஸமாஸோ, சத்தாரி வா பஞ்ச வா, சதுபஞ்ச அஹானி, தேஸங் அஹானங் ஸமாஹாரோ சதுபஞ்சாஹங். பி⁴க்கு²ஸபா⁴க³தந்தி ஸமானோ பா⁴கோ³ லஜ்ஜிதாஸங்கா²தோ கொட்டா²ஸோ யேஸங், பி⁴க்கூ²ஹி ஸபா⁴கா³, தேஸங் பா⁴வோ பி⁴க்கு²ஸபா⁴க³தா, தங், பேஸலபா⁴வந்தி அத்தோ². ‘‘தே²ரோ லஜ்ஜீ’’தி ஜானந்தேன பன பகதியா நிஸ்ஸயதா³னட்டா²னங் க³தேன ச தத³ஹேவ க³ஹேதப்³போ³, ஏகதி³வஸம்பி பரிஹாரோ நத்தி². ஸசே ‘‘ஓகாஸே அலப⁴ந்தே பச்சூஸஸமயே க³ஹெஸ்ஸாமீ’’தி ஸயதி, அருணங் உக்³க³தம்பி ந ஜானாதி, அனாபத்தி. லத்³த⁴பரிஹாரேனாபி வஸிதுங் வட்டதீதி.
Evaṃ vuttalakkhaṇaṃ alajjiṃ. Nissayaṃ dentenāpi lajjinoyeva dātabbaṃ. ‘‘Na bhikkhave alajjīnaṃ nissayo dātabbo. Yo dadeyya, āpatti dukkaṭassā’’ti (mahāva. 120) hi vuttaṃ. Adiṭṭhapubbassa katipāhaṃ ācāraṃ upaparikkhitvā dātabbaṃ. Apubbanti ettha sambandhisaddattā pubba-saddena pubbavāso gahito, natthi pubbo assāti apubbaṃ, navanti vuttaṃ hoti. Cattāri pañca vā parimāṇametesanti viggaho. Ettha pana parimāṇa-saddasannidhānena saṅkhyeyyavācinopite saṅkhyāmattavācino hontīti catupañcasaṅkhyāparimāṇameva saṅkhyeyyamāha, tasmā viggahapadatthehi bhinno aññapadattho sambhavatīti samāso. Vā-saddassa yo vikappattho, tattha cāyaṃ samāso, cattāri vā pañca vā, catupañca ahāni, tesaṃ ahānaṃ samāhāro catupañcāhaṃ. Bhikkhusabhāgatanti samāno bhāgo lajjitāsaṅkhāto koṭṭhāso yesaṃ, bhikkhūhi sabhāgā, tesaṃ bhāvo bhikkhusabhāgatā, taṃ, pesalabhāvanti attho. ‘‘Thero lajjī’’ti jānantena pana pakatiyā nissayadānaṭṭhānaṃ gatena ca tadaheva gahetabbo, ekadivasampi parihāro natthi. Sace ‘‘okāse alabhante paccūsasamaye gahessāmī’’ti sayati, aruṇaṃ uggatampi na jānāti, anāpatti. Laddhaparihārenāpi vasituṃ vaṭṭatīti.
234. ‘‘லப்³ப⁴தீ’’தி கம்மனி நிப்ப²ன்னத்தா அவுத்தகத்தாதி ‘‘அத்³தி⁴கஸ்ஸா’’திஆதீ³ஸு கத்தரி ஸாமிவசனங், ‘‘அத்³தி⁴கேனா’’ திஆதி³ வுத்தங் ஹோதி. ‘‘ஸல்லக்கெ²ந்தேனா’’தி பன ஸரூபேனேவ நித்³தி³ட்ட²ங். வஸிதுந்தி வுத்தகம்மங். பா⁴வே ஹி துங்-பச்சயோ, வாஸோதி அத்தோ². யாசிதஸ்ஸாதி ‘‘கி³லானுபட்டா²கஸ்ஸ சா’’தி எத்த² விஸேஸனங். ஸசே பன ‘‘யாசாஹி ம’’ந்தி வுச்சமானோபி கி³லானோ மானேன ந யாசதி, க³ந்தப்³ப³ங். அரஞ்ஞே வா ஸல்லக்கெ²ந்தேன பா²ஸுகந்தி யத்த² வஸந்தஸ்ஸ படிலத்³த⁴தருணஸமத²விபஸ்ஸனாவிஸேஸபா⁴கி³தாவஸேன பா²ஸு ஹோதி, தஸ்மிங் அரஞ்ஞே தாதி³ஸங் பா²ஸுவிஹாரங் ஸல்லக்கெ²ந்தேன ஆரஞ்ஞகேன. தா³யகே அஸந்தேதி பத³ச்சே²தோ³. தாவாதி அவதி⁴ம்ஹி, அத்³தி⁴காதீ³ஹி யாவ நிஸ்ஸயதா³யகோ லப்³ப⁴தி, தாவ, ஆரஞ்ஞகேன பன ‘‘படிரூபே நிஸ்ஸயதா³யகே ஸதி நிஸ்ஸாய வஸிஸ்ஸாமீ’’தி ஆபோ⁴க³ங் கத்வா யாவ ஆஸாள்ஹிபுண்ணமா, தாவாதி அத்தோ². ‘‘ஸசே பன ஆஸாள்ஹிமாஸே ஆசரியோ நாக³ச்ச²தி, யத்த² நிஸ்ஸயோ லப்³ப⁴தி, தத்த² க³ந்தப்³ப³ங் (மஹாவ॰ அட்ட²॰ 121). அந்தோவஸ்ஸே பன நிப³த்³த⁴வாஸங் வஸிதப்³ப³ங், நிஸ்ஸயோ ச க³ஹேதப்³போ³’’தி (மஹாவ॰ அட்ட²॰ 121) ஹி அட்ட²கதா²யங் வுத்தங்.
234. ‘‘Labbhatī’’ti kammani nipphannattā avuttakattāti ‘‘addhikassā’’tiādīsu kattari sāmivacanaṃ, ‘‘addhikenā’’ tiādi vuttaṃ hoti. ‘‘Sallakkhentenā’’ti pana sarūpeneva niddiṭṭhaṃ. Vasitunti vuttakammaṃ. Bhāve hi tuṃ-paccayo, vāsoti attho. Yācitassāti ‘‘gilānupaṭṭhākassa cā’’ti ettha visesanaṃ. Sace pana ‘‘yācāhi ma’’nti vuccamānopi gilāno mānena na yācati, gantabbaṃ. Araññe vā sallakkhentena phāsukanti yattha vasantassa paṭiladdhataruṇasamathavipassanāvisesabhāgitāvasena phāsu hoti, tasmiṃ araññe tādisaṃ phāsuvihāraṃ sallakkhentena āraññakena. Dāyake asanteti padacchedo. Tāvāti avadhimhi, addhikādīhi yāva nissayadāyako labbhati, tāva, āraññakena pana ‘‘paṭirūpe nissayadāyake sati nissāya vasissāmī’’ti ābhogaṃ katvā yāva āsāḷhipuṇṇamā, tāvāti attho. ‘‘Sace pana āsāḷhimāse ācariyo nāgacchati, yattha nissayo labbhati, tattha gantabbaṃ (mahāva. aṭṭha. 121). Antovasse pana nibaddhavāsaṃ vasitabbaṃ, nissayo ca gahetabbo’’ti (mahāva. aṭṭha. 121) hi aṭṭhakathāyaṃ vuttaṃ.
அம்ஹாகங் பன கேசி அந்தேவாஸிகத்தே²ரா ‘‘ந பி⁴க்க²வே வஸ்ஸங் ந உபக³ந்தப்³ப³ங். யோ ந உபக³ச்செ²ய்ய, ஆபத்தி து³க்கடஸ்ஸா’தி (மஹாவ॰ 186) ச ‘ந பி⁴க்க²வே தத³ஹு வஸ்ஸூபனாயிகாய வஸ்ஸங் அனுபக³ந்துகாமேன ஸஞ்சிச்ச ஆவாஸோ அதிக்கமிதப்³போ³. யோ அதிக்கமெய்ய, ஆபத்தி து³க்கடஸ்ஸா’தி (மஹாவ॰ 186) பாளிவசனதோ கேனசி காரணேன நிஸ்ஸயங் அலப⁴மானேனபி ந ஸக்கா அந்தோவஸ்ஸே வஸ்ஸங் அனுபக³ந்துங். ‘அந்தோவஸ்ஸே பனா’திஆதீ³ஸு பன ச-ஸத்³தோ³ அன்வாசயத்தோ², தஸ்மா தேனாபி வஸ்ஸங் உபக³ந்தப்³ப³மேவா’’தி வதி³ங்ஸு.
Amhākaṃ pana keci antevāsikattherā ‘‘na bhikkhave vassaṃ na upagantabbaṃ. Yo na upagaccheyya, āpatti dukkaṭassā’ti (mahāva. 186) ca ‘na bhikkhave tadahu vassūpanāyikāya vassaṃ anupagantukāmena sañcicca āvāso atikkamitabbo. Yo atikkameyya, āpatti dukkaṭassā’ti (mahāva. 186) pāḷivacanato kenaci kāraṇena nissayaṃ alabhamānenapi na sakkā antovasse vassaṃ anupagantuṃ. ‘Antovasse panā’tiādīsu pana ca-saddo anvācayattho, tasmā tenāpi vassaṃ upagantabbamevā’’ti vadiṃsu.
மயங் பனெத்த² ஏவமவோசும்ஹ ‘‘ப⁴க³வதா அனுபக³மனே து³க்கடங் அனந்தராயிகஸ்ஸேவ வுத்தங், தேனேவ ‘கேனசி அந்தராயேன புரிமிகங் அனுபக³தேன பச்சி²மிகா உபக³ந்தப்³பா³’தி அட்ட²கதா²யங் (மஹாவ॰ அட்ட²॰ 185) வுத்தங். அந்தராயோ ச நாம அந்தரா வேமஜ்ஜே² ஏதீதி அந்தராயோ, யோ கோசி பா³த⁴கப்பச்சயதாய அதி⁴ப்பேதோ வுச்சதி ‘ந லப⁴ந்தி பதிரூபங் உபட்டா²கங், ஏஸேவ அந்தராயோதி பக்கமிதப்³ப³’ந்திஆதீ³ஸு (மஹாவ॰ 201) விய, தஸ்மா பா³த⁴கப்பச்சயதா அதி⁴ப்பேதா . நிஸ்ஸயாலாபோ⁴பி அந்தராயொத்வேவ விஞ்ஞாயதி. ஸக்கா ஹி வத்துங் ‘அந்தராயோ வஸ்ஸூபக³மோ ஸன்னிஸ்ஸயத்தா தருணஸமத²விபஸ்ஸனாலாபீ⁴னங் கதோகாஸோ வியா’தி. தருணஸமத²விபஸ்ஸனாலாபீ⁴னம்பி ஹி கதோகாஸேபி ‘ஸசே பன ஆஸாள்ஹிமாஸே ஆசரியோ நாக³ச்ச²தி, யத்த² நிஸ்ஸயோ லப்³ப⁴தி, தத்த² க³ந்தப்³ப³’ந்தி த³ள்ஹங் கத்வா அட்ட²கதா²யங் (மஹாவ॰ அட்ட²॰ 121) வுத்தங். அம்ஹாகங் க³ரூஹி ச ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.121) ‘ஆசரியங் ஆக³மெந்தஸ்ஸேவ சே வஸ்ஸூபனாயிகதி³வஸோ ஹோதி, ஹோது, க³ந்தப்³ப³ங் தத்த², யத்த² நிஸ்ஸயதா³யகங் லப⁴தீ’தி வஸ்ஸூபனாயிகதி³வஸேபி நிஸ்ஸயத்தா²ய க³மனமேவ வுத்தங். அத² ச பன மஹாகாருணிகோபி ப⁴க³வா ‘அனுஜானாமி, பி⁴க்க²வே, கி³லானுபட்டா²கேன பி⁴க்கு²னா நிஸ்ஸயங் அலப⁴மானேன யாசியமானேன அனிஸ்ஸிதகேன வத்து²’ந்தி (மஹாவ॰ 121) கி³லானவிஸயேபி நிஸ்ஸயங் க³ருகங் கத்வா பட்ட²பேஸி. யங் பன அனிஸ்ஸயங், தங் அனந்தராயங் நிஸ்ஸயமுத்தகஸ்ஸ வஸ்ஸூபக³மனங் விய. அபிச நாவாய க³ச்ச²ந்தஸ்ஸ பன வஸ்ஸானே ஆக³தேபி நிஸ்ஸயங் அலப⁴ந்தஸ்ஸ அனாபத்தீதி நாவாய க³ச்ச²தோயேவ ஆவேணிகா அனாபத்திகதா வுத்தா. தஸ்மா நிஸ்ஸயாலாபோ⁴ பா³த⁴கப்பச்சயோ வஸ்ஸூபக³மனஸ்ஸ, ந வஸ்ஸூபக³மனங் நிஸ்ஸயஸ்ஸாதி அந்தராயோயேவ நிஸ்ஸயாலாபோ⁴. ததோயேவ டீகாயங் ‘அந்தோவஸ்ஸே பன அனிஸ்ஸிதேன வத்து²ங் ந வட்டதீ’தி வுத்தங். தஸ்மாயேவ ச ‘அந்தோவஸ்ஸே பனா’திஆதீ³ஸு நிஸ்ஸயதா³யகே ஸதி நிப³த்³த⁴வாஸங் வஸிதப்³ப³ஞ்ச நிஸ்ஸயோ க³ஹேதப்³போ³ ச ஹோதீதி க³மனகிரியாய கீ²யமானதாவஸேன ச-ஸத்³தோ³ ஸமுச்சயோ க³ஹேதப்³போ³’’தி.
Mayaṃ panettha evamavocumha ‘‘bhagavatā anupagamane dukkaṭaṃ anantarāyikasseva vuttaṃ, teneva ‘kenaci antarāyena purimikaṃ anupagatena pacchimikā upagantabbā’ti aṭṭhakathāyaṃ (mahāva. aṭṭha. 185) vuttaṃ. Antarāyo ca nāma antarā vemajjhe etīti antarāyo, yo koci bādhakappaccayatāya adhippeto vuccati ‘na labhanti patirūpaṃ upaṭṭhākaṃ, eseva antarāyoti pakkamitabba’ntiādīsu (mahāva. 201) viya, tasmā bādhakappaccayatā adhippetā . Nissayālābhopi antarāyotveva viññāyati. Sakkā hi vattuṃ ‘antarāyo vassūpagamo sannissayattā taruṇasamathavipassanālābhīnaṃ katokāso viyā’ti. Taruṇasamathavipassanālābhīnampi hi katokāsepi ‘sace pana āsāḷhimāse ācariyo nāgacchati, yattha nissayo labbhati, tattha gantabba’nti daḷhaṃ katvā aṭṭhakathāyaṃ (mahāva. aṭṭha. 121) vuttaṃ. Amhākaṃ garūhi ca sāratthadīpaniyaṃ (sārattha. ṭī. mahāvagga 3.121) ‘ācariyaṃ āgamentasseva ce vassūpanāyikadivaso hoti, hotu, gantabbaṃ tattha, yattha nissayadāyakaṃ labhatī’ti vassūpanāyikadivasepi nissayatthāya gamanameva vuttaṃ. Atha ca pana mahākāruṇikopi bhagavā ‘anujānāmi, bhikkhave, gilānupaṭṭhākena bhikkhunā nissayaṃ alabhamānena yāciyamānena anissitakena vatthu’nti (mahāva. 121) gilānavisayepi nissayaṃ garukaṃ katvā paṭṭhapesi. Yaṃ pana anissayaṃ, taṃ anantarāyaṃ nissayamuttakassa vassūpagamanaṃ viya. Apica nāvāya gacchantassa pana vassāne āgatepi nissayaṃ alabhantassa anāpattīti nāvāya gacchatoyeva āveṇikā anāpattikatā vuttā. Tasmā nissayālābho bādhakappaccayo vassūpagamanassa, na vassūpagamanaṃ nissayassāti antarāyoyeva nissayālābho. Tatoyeva ṭīkāyaṃ ‘antovasse pana anissitena vatthuṃ na vaṭṭatī’ti vuttaṃ. Tasmāyeva ca ‘antovasse panā’tiādīsu nissayadāyake sati nibaddhavāsaṃ vasitabbañca nissayo gahetabbo ca hotīti gamanakiriyāya khīyamānatāvasena ca-saddo samuccayo gahetabbo’’ti.
நிஸ்ஸயனித்³தே³ஸவண்ணனா நிட்டி²தா.
Nissayaniddesavaṇṇanā niṭṭhitā.
