| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༨. ནིསྶཡཔཙྩཡནིདྡེསཝཎྞནཱ
8. Nissayapaccayaniddesavaṇṇanā
༨. ནིསྶཡཔཙྩཡནིདྡེསེ སཧཛཱཏཔཙྩཡནིདྡེསསྶ པུརིམཱནཾ པཉྩནྣཾ ཀོཊྛཱསཱནཾ ཝསེན སཧཛཱཏནིསྶཡནཡཾ དསྶེཏྭཱ པུན ཚཊྛེན ཀོཊྛཱསེན པུརེཛཱཏནིསྶཡནཡཾ དསྶེཏུཾ ཙཀྑཱཡཏནཾ ཙཀྑུཝིཉྙཱཎདྷཱཏུཡཱཏིཨཱདི ཨཱརདྡྷཾ། ཏཏྠ ཡཾ རཱུཔཾ ནིསྶཱཡཱཏི ཝཏྠུརཱུཔཾ སནྡྷཱཡ ཝུཏྟཾ། ཏཉྷི ནིསྶཱཡ ཏིཝིདྷཱ མནོདྷཱཏུ, ཋཔེཏྭཱ ཨརཱུཔཝིཔཱཀཾ དྭཱསཏྟཏིཝིདྷཱ མནོཝིཉྙཱཎདྷཱཏཱུཏི ཨིམཱནི པཉྩསཏྟཏི ཙིཏྟཱནི ཝཏྟནྟཱིཏི ཨཡཾ ཏཱཝེཏྠ པཱལི༹ཝཎྞནཱ། ཨཡམྤི ནིསྶཡཔཙྩཡོ ཛཱཏིཝསེན ཀུསལཱདིབྷེདཏོ པཉྩདྷཱཝ བྷིཛྫཏི། ཏཏྠ ཀུསལོ བྷཱུམིཏོ ཙཏུབྦིདྷོཝ ཨཀུསལོ ཨེཀཝིདྷོ ཝིཔཱཀོ ཙཏུབྦིདྷོ, ཀིརིཡསངྑཱཏོ ཏིཝིདྷོ, རཱུཔཾ ཨེཀཝིདྷམེཝཱཏི ཨེཝམེཏྠ ནཱནཔྤཀཱརབྷེདཏོ ཝིཉྙཱཏབྦོ ཝིནིཙྪཡོ།
8. Nissayapaccayaniddese sahajātapaccayaniddesassa purimānaṃ pañcannaṃ koṭṭhāsānaṃ vasena sahajātanissayanayaṃ dassetvā puna chaṭṭhena koṭṭhāsena purejātanissayanayaṃ dassetuṃ cakkhāyatanaṃ cakkhuviññāṇadhātuyātiādi āraddhaṃ. Tattha yaṃ rūpaṃ nissāyāti vatthurūpaṃ sandhāya vuttaṃ. Tañhi nissāya tividhā manodhātu, ṭhapetvā arūpavipākaṃ dvāsattatividhā manoviññāṇadhātūti imāni pañcasattati cittāni vattantīti ayaṃ tāvettha pāḷivaṇṇanā. Ayampi nissayapaccayo jātivasena kusalādibhedato pañcadhāva bhijjati. Tattha kusalo bhūmito catubbidhova akusalo ekavidho vipāko catubbidho, kiriyasaṅkhāto tividho, rūpaṃ ekavidhamevāti evamettha nānappakārabhedato viññātabbo vinicchayo.
ཨེཝཾ བྷིནྣེ པནེཏྠ ཙཏུབྷཱུམཀམྤི ཀུསལཾ པཉྩཝོཀཱརེ སམྤཡུཏྟཀྑནྡྷཱནཉྩེཝ ཙིཏྟསམུཊྛཱནརཱུཔསྶ ཙ ནིསྶཡཔཙྩཡེན པཙྩཡོ ཧོཏི། ཏཐཱ ཨཀུསལཾ ། ཡཾ པནེཏྠ ཨཱརུཔྤེ ཨུཔྤཛྫཏི, ཏཾ ཨརཱུཔདྷམྨཱནཉྙེཝ ནིསྶཡཔཙྩཡོ ཧོཏི། ཀཱམཱཝཙརརཱུཔཱཝཙརཝིཔཱཀཾ པཝཏྟེ སམྤཡུཏྟདྷམྨཱནཉྩེཝ ཙིཏྟསམུཊྛཱནརཱུཔསྶ ཙ, པཊིསནྡྷིཡཾ ཀཊཏྟཱརཱུཔསྶཱཔི ནིསྶཡཔཙྩཡོ ཧོཏི། ཨརཱུཔཱཝཙརཝིཔཱཀཾ སམྤཡུཏྟཀྑནྡྷཱནཾཡེཝ ཧོཏི། ལོཀུཏྟརཝིཔཱཀཾ པཉྩཝོཀཱརེ; སམྤཡུཏྟཀཱནཉྩེཝ ཙིཏྟསམུཊྛཱནརཱུཔསྶ ཙ, ཙཏུཝོཀཱརེ ཨརཱུཔསྶེཝ ནིསྶཡཔཙྩཡོ ཧོཏི། ཀཱམཱཝཙརཨརཱུཔཱཝཙརཀིརིཡཱ པཉྩཝོཀཱརེ སམྤཡུཏྟཀཱནཉྩེཝ ཙིཏྟསམུཊྛཱནརཱུཔསྶ ཙ ནིསྶཡཔཙྩཡོ ཧོཏི, ཙཏུཝོཀཱརེ ཨརཱུཔཱནཉྙེཝ། རཱུཔཱཝཙརཀིརིཡཱ སམྤཡུཏྟཀཱནཉྩེཝ ཙིཏྟསམུཊྛཱནརཱུཔསྶ ཙ ཨེཀནྟེན ནིསྶཡཔཙྩཡོ ཧོཏི།
Evaṃ bhinne panettha catubhūmakampi kusalaṃ pañcavokāre sampayuttakkhandhānañceva cittasamuṭṭhānarūpassa ca nissayapaccayena paccayo hoti. Tathā akusalaṃ . Yaṃ panettha āruppe uppajjati, taṃ arūpadhammānaññeva nissayapaccayo hoti. Kāmāvacararūpāvacaravipākaṃ pavatte sampayuttadhammānañceva cittasamuṭṭhānarūpassa ca, paṭisandhiyaṃ kaṭattārūpassāpi nissayapaccayo hoti. Arūpāvacaravipākaṃ sampayuttakkhandhānaṃyeva hoti. Lokuttaravipākaṃ pañcavokāre; sampayuttakānañceva cittasamuṭṭhānarūpassa ca, catuvokāre arūpasseva nissayapaccayo hoti. Kāmāvacaraarūpāvacarakiriyā pañcavokāre sampayuttakānañceva cittasamuṭṭhānarūpassa ca nissayapaccayo hoti, catuvokāre arūpānaññeva. Rūpāvacarakiriyā sampayuttakānañceva cittasamuṭṭhānarūpassa ca ekantena nissayapaccayo hoti.
ཙཏུསམུཊྛཱནིཀརཱུཔསྶ ཙ ཀམྨསམུཊྛཱནརཱུཔེ ཨེཀཾ མཧཱབྷཱུཏཾ ཏིཎྞཾ, ཏཱིཎི ཨེཀསྶ, དྭེ དྭིནྣཾ མཧཱབྷཱུཏཱནཾ, མཧཱབྷཱུཏཱ ཨུཔཱདཱརཱུཔཱནཾ, ཝཏྠུརཱུཔཾ པཉྩཝོཀཱརབྷཝེ ཙཏུབྷཱུམཀཀུསལསྶ, ཨཀུསལསྶ, ཋཔེཏྭཱ ཨཱརུཔྤཝིཔཱཀཉྩེཝ དྭེ པཉྩཝིཉྙཱཎཱནི ཙ སེསཏེབྷཱུམཀཝིཔཱཀསྶ, ཏེབྷཱུམཀཀིརིཡསྶཱཏི ཨིམེསཾ ཙཏུནྣཾ དྷམྨརཱསཱིནཾ ནིསྶཡཔཙྩཡོ ཧོཏི། ཙཀྑཱཡཏནཱདཱིནི པཉྩ སསམྤཡུཏྟཱནཾ ཙཀྑུཝིཉྙཱཎཱདཱིནཾ ནིསྶཡཔཙྩཡོ ཧོཏི། ཨུཏུཙིཏྟཱཧཱརསམུཊྛཱནེསུ པན མཧཱབྷཱུཏཱ མཧཱབྷཱུཏཱནཉྩེཝ ཨུཔཱདཱརཱུཔསྶ ཙ ནིསྶཡཔཙྩཡེན པཙྩཡོཏི ཨེཝམེཏྠ པཙྩཡུཔྤནྣཏོཔི ཝིཉྙཱཏབྦོ ཝིནིཙྪཡོཏི།
Catusamuṭṭhānikarūpassa ca kammasamuṭṭhānarūpe ekaṃ mahābhūtaṃ tiṇṇaṃ, tīṇi ekassa, dve dvinnaṃ mahābhūtānaṃ, mahābhūtā upādārūpānaṃ, vatthurūpaṃ pañcavokārabhave catubhūmakakusalassa, akusalassa, ṭhapetvā āruppavipākañceva dve pañcaviññāṇāni ca sesatebhūmakavipākassa, tebhūmakakiriyassāti imesaṃ catunnaṃ dhammarāsīnaṃ nissayapaccayo hoti. Cakkhāyatanādīni pañca sasampayuttānaṃ cakkhuviññāṇādīnaṃ nissayapaccayo hoti. Utucittāhārasamuṭṭhānesu pana mahābhūtā mahābhūtānañceva upādārūpassa ca nissayapaccayena paccayoti evamettha paccayuppannatopi viññātabbo vinicchayoti.
ནིསྶཡཔཙྩཡནིདྡེསཝཎྞནཱ།
Nissayapaccayaniddesavaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / པཊྛཱནཔཱལི༹ • Paṭṭhānapāḷi / (༢) པཙྩཡནིདྡེསོ • (2) Paccayaniddeso
