| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
22. நிஸ்ஸயபடிப்பஸ்ஸத்³தி⁴கதா²
22. Nissayapaṭippassaddhikathā
ஆணத்திவினிச்ச²யோ
Āṇattivinicchayo
83. ‘‘நிஸ்ஸயபடிபஸ்ஸத்³தீ⁴ஸூ’’தி ஸமூஹாதா⁴ரோ. ‘‘உபஜ்ஜா²யோ பக்கந்தோ வாதிஆதீ³ஸூ’’தி அவயவாதா⁴ரோ. ‘‘விப்பவஸிதுகாமோ’’தி இமினா நிராலயபா⁴வங் த³ஸ்ஸேதி. ஏவங் க³தேதி ஏவங் உபஜ்ஜா²யே க³தேதி யோஜனா. அஞ்ஞதா³பீதி அஞ்ஞஸ்மிம்பி காலே. உபஜ்ஜா²யேன பவாஸிதகாலேதி அத்தோ². ஏகஸம்போ⁴க³பரிபோ⁴கோ³தி அத்தனா வா உபஜ்ஜா²யேன வா ஏகோ பச்சயஸம்போ⁴கோ³ ச த⁴ம்மபரிபோ⁴கோ³ ச. ஏகதி³வஸம்பீதி பிஸத்³தோ³ க³ரஹத்தோ², த்³விஹாதி³கங் பன பகே³வாதி அத்தோ². பரிஹாரோ நத்தீ²தி ஆபத்திபரிஹாரோ நத்தி², ஆபத்தியா பரிஹரணங் அபனயனங் நத்தீ²தி அதி⁴ப்பாயோ. லஜ்ஜீ பேஸலோதி லஜ்ஜீ ஹுத்வா பியஸீலோ பி⁴க்கூ²தி ஸம்ப³ந்தோ⁴. தத³ஹேவாதி தஸ்மிங் உபஜ்ஜா²யஸ்ஸ பக்கந்தஅஹனி ஏவ. ததா²தி யதா² ‘‘உபஜ்ஜா²யோ லஹுங் ஆக³மிஸ்ஸதீ’’தி புச்ச²தி, ததா² ‘‘அஹங் லஹுங் ஆக³மிஸ்ஸாமீ’’தி வுத்தந்தி அத்தோ². ஸசே வத³தீதி ஸசே ஆசரியோ வத³தீதி யோஜனா. அஸ்ஸாதி பி⁴க்கு²ஸ்ஸ. ஸபா⁴க³தந்தி லஜ்ஜிபேஸலபா⁴வங்.
83. ‘‘Nissayapaṭipassaddhīsū’’ti samūhādhāro. ‘‘Upajjhāyo pakkanto vātiādīsū’’ti avayavādhāro. ‘‘Vippavasitukāmo’’ti iminā nirālayabhāvaṃ dasseti. Evaṃ gateti evaṃ upajjhāye gateti yojanā. Aññadāpīti aññasmimpi kāle. Upajjhāyena pavāsitakāleti attho. Ekasambhogaparibhogoti attanā vā upajjhāyena vā eko paccayasambhogo ca dhammaparibhogo ca. Ekadivasampīti pisaddo garahattho, dvihādikaṃ pana pagevāti attho. Parihāro natthīti āpattiparihāro natthi, āpattiyā pariharaṇaṃ apanayanaṃ natthīti adhippāyo. Lajjī pesaloti lajjī hutvā piyasīlo bhikkhūti sambandho. Tadahevāti tasmiṃ upajjhāyassa pakkantaahani eva. Tathāti yathā ‘‘upajjhāyo lahuṃ āgamissatī’’ti pucchati, tathā ‘‘ahaṃ lahuṃ āgamissāmī’’ti vuttanti attho. Sace vadatīti sace ācariyo vadatīti yojanā. Assāti bhikkhussa. Sabhāgatanti lajjipesalabhāvaṃ.
யாவ ஆக³மனாதி உபஜ்ஜா²யஸ்ஸ யாவ ஆக³மனா. நந்தி உபஜ்ஜா²யங். ‘‘வாஸெந்தியேவா’’திபதே³ காரிதகம்மங். தத்தா²தி உபஜ்ஜா²யஸ்ஸ க³தட்டா²னே. தேனாதி உபஜ்ஜா²யேன. பவத்தீதி பவத்தனங். நதீ³பூரேன வா உபத்³து³தோதி ஸம்ப³ந்தோ⁴. நதீ³பூரத்தா உத³கோஸக்கனங் ஆக³மேதி, சோராதீ³னங் உபத்³து³தத்தா ஸஹாயே பரியேஸதி. ஸோதி உபஜ்ஜா²யோ.
Yāva āgamanāti upajjhāyassa yāva āgamanā. Nanti upajjhāyaṃ. ‘‘Vāsentiyevā’’tipade kāritakammaṃ. Tatthāti upajjhāyassa gataṭṭhāne. Tenāti upajjhāyena. Pavattīti pavattanaṃ. Nadīpūrena vā upaddutoti sambandho. Nadīpūrattā udakosakkanaṃ āgameti, corādīnaṃ upaddutattā sahāye pariyesati. Soti upajjhāyo.
‘‘நிஸ்ஸயபணாமனா’’தி இமினா ஆணாபனங் ஆணத்தீதி வசனத்தே²ன நிஸ்ஸயபணாமனா ஆணத்தீதி வுச்சதீதி த³ஸ்ஸேதி. நிஸ்ஸயபணாமனாதி நிஸ்ஸயஸ்ஸ உபஜ்ஜா²சரியஸ்ஸ பணாமனா. தஸ்மா பணாமிதோ ஹோதீதி ஸம்ப³ந்தோ⁴. ‘‘ஆபுச்சீ²திஆதி³னா’’தி எத்த² ஆதி³ஸத்³தே³ன ‘‘மா மங் ஸுஸானக³மனங் ஆபுச்சீ²’’திஆத³யோ ஸங்க³ண்ஹாதி. தேனாதி ஸத்³தி⁴விஹாரிகேன. க²மாபேதப்³போ³தி திதிக்கா²பேதப்³போ³.
‘‘Nissayapaṇāmanā’’ti iminā āṇāpanaṃ āṇattīti vacanatthena nissayapaṇāmanā āṇattīti vuccatīti dasseti. Nissayapaṇāmanāti nissayassa upajjhācariyassa paṇāmanā. Tasmā paṇāmito hotīti sambandho. ‘‘Āpucchītiādinā’’ti ettha ādisaddena ‘‘mā maṃ susānagamanaṃ āpucchī’’tiādayo saṅgaṇhāti. Tenāti saddhivihārikena. Khamāpetabboti titikkhāpetabbo.
தாவாதி மஹாதே²ரேஹி, மஹாதே²ரானங் வா பட²மங். அஞ்ஞத்தா²தி உபஜ்ஜா²யஸ்ஸ விஹாரதோ அஞ்ஞங் விஹாரங். அப்பேவாதி அபி ஏவ நாம க²மெய்யாதி யோஜனா. தத்ரேவாதி அஞ்ஞத்தே²வ. து³ப்³பி⁴க்கா²தி³தோ³ஸேனாதி எத்த² ஆதி³ஸத்³தே³ன ஞாதிவியோகா³தி³தோ³ஸோ க³ஹேதப்³போ³. தங்யேவாதி அத்தனா வஸிதங் தமேவ டா²னங். அஞ்ஞஸ்ஸாதி உபஜ்ஜா²யதோ அஞ்ஞஸ்ஸ பி⁴க்கு²ஸ்ஸாதி ஸம்ப³ந்தோ⁴. இமினா உபஜ்ஜா²யேன பரிச்சத்தத்தா உபஜ்ஜா²யஸமோதா⁴னே நிஸ்ஸயபடிப்பஸ்ஸத்³தி⁴ நத்தீ²தி தீ³பேதி.
Tāvāti mahātherehi, mahātherānaṃ vā paṭhamaṃ. Aññatthāti upajjhāyassa vihārato aññaṃ vihāraṃ. Appevāti api eva nāma khameyyāti yojanā. Tatrevāti aññattheva. Dubbhikkhādidosenāti ettha ādisaddena ñātiviyogādidoso gahetabbo. Taṃyevāti attanā vasitaṃ tameva ṭhānaṃ. Aññassāti upajjhāyato aññassa bhikkhussāti sambandho. Iminā upajjhāyena pariccattattā upajjhāyasamodhāne nissayapaṭippassaddhi natthīti dīpeti.
ஸமோதா⁴னவினிச்ச²யோ
Samodhānavinicchayo
ஆபுச்சி²த்வாதி =00 அந்தேவாஸிகங் ஆபுச்சி²த்வா. தத்ராபீதி ஆசரியந்தேவாஸிகேஸுபி. கதா³தி கஸ்மிங் காலே. ஸாயன்ஹே வா ரத்திங்வாதி அஜ்ஜ ஸாயன்ஹே வா ரத்திங் வா. தங்க²ணேயேவாதி தஸ்மிங் ஸம்படிச்ச²னக்க²ணேயேவ.
Āpucchitvāti =00 antevāsikaṃ āpucchitvā. Tatrāpīti ācariyantevāsikesupi. Kadāti kasmiṃ kāle. Sāyanhe vā rattiṃvāti ajja sāyanhe vā rattiṃ vā. Taṃkhaṇeyevāti tasmiṃ sampaṭicchanakkhaṇeyeva.
ஸோ சாதி அந்தேவாஸிகோ ச. ததோதி கா³மதோ. ஸுக³தோதி ஸுட்டு² க³தோ, நிஸ்ஸயோ படிப்பஸ்ஸம்ப⁴தீதி அதி⁴ப்பாயோ. அதா²பீதி புன ச பரங். ஆபுச்சி²த்வா பக்கமனே வினிச்ச²யங் த³ஸ்ஸெத்வா ஆபுச்சி²த்வா பக்கமனே தங் த³ஸ்ஸெந்தோ ஆஹ ‘‘ஆசரியங் அனாபுச்சா²’’திஆதி³. உபசாரஸீமாதிக்கமேதி உபசாரஸீமாய அதிக்கமே ஸதி, அதிக்கமனஹேது வாதி யோஜனா. எத்த² ச உபசாரஸீமா நாம பரிக்கி²த்தஸ்ஸ விஹாரஸ்ஸ பரிக்கே²போயேவ, அபரிக்கி²த்தஸ்ஸ பரிக்கே²பாரஹட்டா²னங்.
So cāti antevāsiko ca. Tatoti gāmato. Sugatoti suṭṭhu gato, nissayo paṭippassambhatīti adhippāyo. Athāpīti puna ca paraṃ. Āpucchitvā pakkamane vinicchayaṃ dassetvā āpucchitvā pakkamane taṃ dassento āha ‘‘ācariyaṃ anāpucchā’’tiādi. Upacārasīmātikkameti upacārasīmāya atikkame sati, atikkamanahetu vāti yojanā. Ettha ca upacārasīmā nāma parikkhittassa vihārassa parikkhepoyeva, aparikkhittassa parikkhepārahaṭṭhānaṃ.
ஸாயன்ஹே வா ரத்திபா⁴கே³ வாதி அஜ்ஜ ஸாயன்ஹே வா ரத்திபா⁴கே³ வா. ஸ்வேதி ஸுவே.
Sāyanhe vā rattibhāge vāti ajja sāyanhe vā rattibhāge vā. Sveti suve.
ப³ஹிஸீமந்தி உபசாரஸீமதோ ப³ஹி. ததோதி ப³ஹிஸீமதோ. த்³வின்னங் லெட்³டு³பாதானந்தி அந்தேவாஸிகதோ த்³வின்னங் லெட்³டு³பாதானங். அதிக்கமித்வாதி உபசாரஸீமதோ ப³ஹி அந்தேவாஸிகஸத்³தி⁴விஹாரிகானங் வஸனட்டா²னதோ அதிக்கமித்வா.
Bahisīmanti upacārasīmato bahi. Tatoti bahisīmato. Dvinnaṃ leḍḍupātānanti antevāsikato dvinnaṃ leḍḍupātānaṃ. Atikkamitvāti upacārasīmato bahi antevāsikasaddhivihārikānaṃ vasanaṭṭhānato atikkamitvā.
முச்சிதுகாமோதி அந்தேவாஸிகம்ஹா முச்சிதுகாமோ ஏவ. பணாமேதீதி காயவாசாஹி பணாமேதி. ஸாலயோதி ஆசரியே ஸாபெக்கோ². ‘‘நிராலயோ’’தி வத்வா தஸ்ஸ அத்த²ங் த³ஸ்ஸேதுங் வுத்தங் ‘‘ந தா³னீ’’திஆதி³. ஏவம்பீதி து⁴ரே நிக்கி²த்தேபி. உபி⁴ன்னங் து⁴ரனிக்கே²பே ஸதி, து⁴ரனிக்கே²பஹேது வா படிப்பஸ்ஸம்ப⁴தீதி யோஜனா. பணாமிதேன படிபஜ்ஜிதப்³ப³ந்தி ஸம்ப³ந்தோ⁴.
Muccitukāmoti antevāsikamhā muccitukāmo eva. Paṇāmetīti kāyavācāhi paṇāmeti. Sālayoti ācariye sāpekkho. ‘‘Nirālayo’’ti vatvā tassa atthaṃ dassetuṃ vuttaṃ ‘‘na dānī’’tiādi. Evampīti dhure nikkhittepi. Ubhinnaṃ dhuranikkhepe sati, dhuranikkhepahetu vā paṭippassambhatīti yojanā. Paṇāmitena paṭipajjitabbanti sambandho.
வுத்தமேவத்த²ங் வித்தா²ரெந்தோ ஆஹ ‘‘ஸசே ஹீ’’திஆதி³. ஆசரியந்தி நிஸ்ஸயாசரியங். சேதியங் வா வந்த³ந்தங் உபஜ்ஜா²யந்தி ஸம்ப³ந்தோ⁴, மக்³க³ப்படிபன்னங் வா உபஜ்ஜா²யந்தி யோஜனா. தூ³ரத்தாதி தூ³ரபா⁴வதோ. உபரிபாஸாதே³தி பாஸாத³ஸ்ஸ உபரி. தந்தி உபஜ்ஜா²யங். நிஸின்னங் உபஜ்ஜா²யந்தி ஸம்ப³ந்தோ⁴.
Vuttamevatthaṃ vitthārento āha ‘‘sace hī’’tiādi. Ācariyanti nissayācariyaṃ. Cetiyaṃ vā vandantaṃ upajjhāyanti sambandho, maggappaṭipannaṃ vā upajjhāyanti yojanā. Dūrattāti dūrabhāvato. Uparipāsādeti pāsādassa upari. Tanti upajjhāyaṃ. Nisinnaṃ upajjhāyanti sambandho.
ஸவனவஸேன ஸமோதா⁴னே வினிச்ச²யோ ஏவங் வேதி³தப்³போ³தி யோஜனா. உபஜ்ஜா²யஸ்ஸ ஸத்³த³ந்தி ஸம்ப³ந்தோ⁴.
Savanavasena samodhāne vinicchayo evaṃ veditabboti yojanā. Upajjhāyassa saddanti sambandho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 22. நிஸ்ஸயபடிப்பஸ்ஸத்³தி⁴கதா² • 22. Nissayapaṭippassaddhikathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / நிஸ்ஸயபடிப்பஸ்ஸத்³தி⁴கதா² • Nissayapaṭippassaddhikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / நிஸ்ஸயபடிப்பஸ்ஸத்³தி⁴கதா²வண்ணனா • Nissayapaṭippassaddhikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / நிஸ்ஸயபடிப்பஸ்ஸத்³தி⁴கதா²வண்ணனா • Nissayapaṭippassaddhikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / நிஸ்ஸயபடிப்பஸ்ஸத்³தி⁴கதா²வண்ணனா • Nissayapaṭippassaddhikathāvaṇṇanā
