| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೨೨. ನಿಸ್ಸಯಪಟಿಪ್ಪಸ್ಸದ್ಧಿಕಥಾ
22. Nissayapaṭippassaddhikathā
ಆಣತ್ತಿವಿನಿಚ್ಛಯೋ
Āṇattivinicchayo
೮೩. ‘‘ನಿಸ್ಸಯಪಟಿಪಸ್ಸದ್ಧೀಸೂ’’ತಿ ಸಮೂಹಾಧಾರೋ। ‘‘ಉಪಜ್ಝಾಯೋ ಪಕ್ಕನ್ತೋ ವಾತಿಆದೀಸೂ’’ತಿ ಅವಯವಾಧಾರೋ। ‘‘ವಿಪ್ಪವಸಿತುಕಾಮೋ’’ತಿ ಇಮಿನಾ ನಿರಾಲಯಭಾವಂ ದಸ್ಸೇತಿ। ಏವಂ ಗತೇತಿ ಏವಂ ಉಪಜ್ಝಾಯೇ ಗತೇತಿ ಯೋಜನಾ। ಅಞ್ಞದಾಪೀತಿ ಅಞ್ಞಸ್ಮಿಮ್ಪಿ ಕಾಲೇ। ಉಪಜ್ಝಾಯೇನ ಪವಾಸಿತಕಾಲೇತಿ ಅತ್ಥೋ। ಏಕಸಮ್ಭೋಗಪರಿಭೋಗೋತಿ ಅತ್ತನಾ ವಾ ಉಪಜ್ಝಾಯೇನ ವಾ ಏಕೋ ಪಚ್ಚಯಸಮ್ಭೋಗೋ ಚ ಧಮ್ಮಪರಿಭೋಗೋ ಚ। ಏಕದಿವಸಮ್ಪೀತಿ ಪಿಸದ್ದೋ ಗರಹತ್ಥೋ, ದ್ವಿಹಾದಿಕಂ ಪನ ಪಗೇವಾತಿ ಅತ್ಥೋ। ಪರಿಹಾರೋ ನತ್ಥೀತಿ ಆಪತ್ತಿಪರಿಹಾರೋ ನತ್ಥಿ, ಆಪತ್ತಿಯಾ ಪರಿಹರಣಂ ಅಪನಯನಂ ನತ್ಥೀತಿ ಅಧಿಪ್ಪಾಯೋ। ಲಜ್ಜೀ ಪೇಸಲೋತಿ ಲಜ್ಜೀ ಹುತ್ವಾ ಪಿಯಸೀಲೋ ಭಿಕ್ಖೂತಿ ಸಮ್ಬನ್ಧೋ। ತದಹೇವಾತಿ ತಸ್ಮಿಂ ಉಪಜ್ಝಾಯಸ್ಸ ಪಕ್ಕನ್ತಅಹನಿ ಏವ। ತಥಾತಿ ಯಥಾ ‘‘ಉಪಜ್ಝಾಯೋ ಲಹುಂ ಆಗಮಿಸ್ಸತೀ’’ತಿ ಪುಚ್ಛತಿ, ತಥಾ ‘‘ಅಹಂ ಲಹುಂ ಆಗಮಿಸ್ಸಾಮೀ’’ತಿ ವುತ್ತನ್ತಿ ಅತ್ಥೋ। ಸಚೇ ವದತೀತಿ ಸಚೇ ಆಚರಿಯೋ ವದತೀತಿ ಯೋಜನಾ। ಅಸ್ಸಾತಿ ಭಿಕ್ಖುಸ್ಸ। ಸಭಾಗತನ್ತಿ ಲಜ್ಜಿಪೇಸಲಭಾವಂ।
83. ‘‘Nissayapaṭipassaddhīsū’’ti samūhādhāro. ‘‘Upajjhāyo pakkanto vātiādīsū’’ti avayavādhāro. ‘‘Vippavasitukāmo’’ti iminā nirālayabhāvaṃ dasseti. Evaṃ gateti evaṃ upajjhāye gateti yojanā. Aññadāpīti aññasmimpi kāle. Upajjhāyena pavāsitakāleti attho. Ekasambhogaparibhogoti attanā vā upajjhāyena vā eko paccayasambhogo ca dhammaparibhogo ca. Ekadivasampīti pisaddo garahattho, dvihādikaṃ pana pagevāti attho. Parihāro natthīti āpattiparihāro natthi, āpattiyā pariharaṇaṃ apanayanaṃ natthīti adhippāyo. Lajjī pesaloti lajjī hutvā piyasīlo bhikkhūti sambandho. Tadahevāti tasmiṃ upajjhāyassa pakkantaahani eva. Tathāti yathā ‘‘upajjhāyo lahuṃ āgamissatī’’ti pucchati, tathā ‘‘ahaṃ lahuṃ āgamissāmī’’ti vuttanti attho. Sace vadatīti sace ācariyo vadatīti yojanā. Assāti bhikkhussa. Sabhāgatanti lajjipesalabhāvaṃ.
ಯಾವ ಆಗಮನಾತಿ ಉಪಜ್ಝಾಯಸ್ಸ ಯಾವ ಆಗಮನಾ। ನನ್ತಿ ಉಪಜ್ಝಾಯಂ। ‘‘ವಾಸೇನ್ತಿಯೇವಾ’’ತಿಪದೇ ಕಾರಿತಕಮ್ಮಂ। ತತ್ಥಾತಿ ಉಪಜ್ಝಾಯಸ್ಸ ಗತಟ್ಠಾನೇ। ತೇನಾತಿ ಉಪಜ್ಝಾಯೇನ। ಪವತ್ತೀತಿ ಪವತ್ತನಂ। ನದೀಪೂರೇನ ವಾ ಉಪದ್ದುತೋತಿ ಸಮ್ಬನ್ಧೋ। ನದೀಪೂರತ್ತಾ ಉದಕೋಸಕ್ಕನಂ ಆಗಮೇತಿ, ಚೋರಾದೀನಂ ಉಪದ್ದುತತ್ತಾ ಸಹಾಯೇ ಪರಿಯೇಸತಿ। ಸೋತಿ ಉಪಜ್ಝಾಯೋ।
Yāva āgamanāti upajjhāyassa yāva āgamanā. Nanti upajjhāyaṃ. ‘‘Vāsentiyevā’’tipade kāritakammaṃ. Tatthāti upajjhāyassa gataṭṭhāne. Tenāti upajjhāyena. Pavattīti pavattanaṃ. Nadīpūrena vā upaddutoti sambandho. Nadīpūrattā udakosakkanaṃ āgameti, corādīnaṃ upaddutattā sahāye pariyesati. Soti upajjhāyo.
‘‘ನಿಸ್ಸಯಪಣಾಮನಾ’’ತಿ ಇಮಿನಾ ಆಣಾಪನಂ ಆಣತ್ತೀತಿ ವಚನತ್ಥೇನ ನಿಸ್ಸಯಪಣಾಮನಾ ಆಣತ್ತೀತಿ ವುಚ್ಚತೀತಿ ದಸ್ಸೇತಿ। ನಿಸ್ಸಯಪಣಾಮನಾತಿ ನಿಸ್ಸಯಸ್ಸ ಉಪಜ್ಝಾಚರಿಯಸ್ಸ ಪಣಾಮನಾ। ತಸ್ಮಾ ಪಣಾಮಿತೋ ಹೋತೀತಿ ಸಮ್ಬನ್ಧೋ। ‘‘ಆಪುಚ್ಛೀತಿಆದಿನಾ’’ತಿ ಏತ್ಥ ಆದಿಸದ್ದೇನ ‘‘ಮಾ ಮಂ ಸುಸಾನಗಮನಂ ಆಪುಚ್ಛೀ’’ತಿಆದಯೋ ಸಙ್ಗಣ್ಹಾತಿ। ತೇನಾತಿ ಸದ್ಧಿವಿಹಾರಿಕೇನ। ಖಮಾಪೇತಬ್ಬೋತಿ ತಿತಿಕ್ಖಾಪೇತಬ್ಬೋ।
‘‘Nissayapaṇāmanā’’ti iminā āṇāpanaṃ āṇattīti vacanatthena nissayapaṇāmanā āṇattīti vuccatīti dasseti. Nissayapaṇāmanāti nissayassa upajjhācariyassa paṇāmanā. Tasmā paṇāmito hotīti sambandho. ‘‘Āpucchītiādinā’’ti ettha ādisaddena ‘‘mā maṃ susānagamanaṃ āpucchī’’tiādayo saṅgaṇhāti. Tenāti saddhivihārikena. Khamāpetabboti titikkhāpetabbo.
ತಾವಾತಿ ಮಹಾಥೇರೇಹಿ, ಮಹಾಥೇರಾನಂ ವಾ ಪಠಮಂ। ಅಞ್ಞತ್ಥಾತಿ ಉಪಜ್ಝಾಯಸ್ಸ ವಿಹಾರತೋ ಅಞ್ಞಂ ವಿಹಾರಂ। ಅಪ್ಪೇವಾತಿ ಅಪಿ ಏವ ನಾಮ ಖಮೇಯ್ಯಾತಿ ಯೋಜನಾ। ತತ್ರೇವಾತಿ ಅಞ್ಞತ್ಥೇವ। ದುಬ್ಭಿಕ್ಖಾದಿದೋಸೇನಾತಿ ಏತ್ಥ ಆದಿಸದ್ದೇನ ಞಾತಿವಿಯೋಗಾದಿದೋಸೋ ಗಹೇತಬ್ಬೋ। ತಂಯೇವಾತಿ ಅತ್ತನಾ ವಸಿತಂ ತಮೇವ ಠಾನಂ। ಅಞ್ಞಸ್ಸಾತಿ ಉಪಜ್ಝಾಯತೋ ಅಞ್ಞಸ್ಸ ಭಿಕ್ಖುಸ್ಸಾತಿ ಸಮ್ಬನ್ಧೋ। ಇಮಿನಾ ಉಪಜ್ಝಾಯೇನ ಪರಿಚ್ಚತ್ತತ್ತಾ ಉಪಜ್ಝಾಯಸಮೋಧಾನೇ ನಿಸ್ಸಯಪಟಿಪ್ಪಸ್ಸದ್ಧಿ ನತ್ಥೀತಿ ದೀಪೇತಿ।
Tāvāti mahātherehi, mahātherānaṃ vā paṭhamaṃ. Aññatthāti upajjhāyassa vihārato aññaṃ vihāraṃ. Appevāti api eva nāma khameyyāti yojanā. Tatrevāti aññattheva. Dubbhikkhādidosenāti ettha ādisaddena ñātiviyogādidoso gahetabbo. Taṃyevāti attanā vasitaṃ tameva ṭhānaṃ. Aññassāti upajjhāyato aññassa bhikkhussāti sambandho. Iminā upajjhāyena pariccattattā upajjhāyasamodhāne nissayapaṭippassaddhi natthīti dīpeti.
ಸಮೋಧಾನವಿನಿಚ್ಛಯೋ
Samodhānavinicchayo
ಆಪುಚ್ಛಿತ್ವಾತಿ =೦೦ ಅನ್ತೇವಾಸಿಕಂ ಆಪುಚ್ಛಿತ್ವಾ। ತತ್ರಾಪೀತಿ ಆಚರಿಯನ್ತೇವಾಸಿಕೇಸುಪಿ। ಕದಾತಿ ಕಸ್ಮಿಂ ಕಾಲೇ। ಸಾಯನ್ಹೇ ವಾ ರತ್ತಿಂವಾತಿ ಅಜ್ಜ ಸಾಯನ್ಹೇ ವಾ ರತ್ತಿಂ ವಾ। ತಂಖಣೇಯೇವಾತಿ ತಸ್ಮಿಂ ಸಮ್ಪಟಿಚ್ಛನಕ್ಖಣೇಯೇವ।
Āpucchitvāti =00 antevāsikaṃ āpucchitvā. Tatrāpīti ācariyantevāsikesupi. Kadāti kasmiṃ kāle. Sāyanhe vā rattiṃvāti ajja sāyanhe vā rattiṃ vā. Taṃkhaṇeyevāti tasmiṃ sampaṭicchanakkhaṇeyeva.
ಸೋ ಚಾತಿ ಅನ್ತೇವಾಸಿಕೋ ಚ। ತತೋತಿ ಗಾಮತೋ। ಸುಗತೋತಿ ಸುಟ್ಠು ಗತೋ, ನಿಸ್ಸಯೋ ಪಟಿಪ್ಪಸ್ಸಮ್ಭತೀತಿ ಅಧಿಪ್ಪಾಯೋ। ಅಥಾಪೀತಿ ಪುನ ಚ ಪರಂ। ಆಪುಚ್ಛಿತ್ವಾ ಪಕ್ಕಮನೇ ವಿನಿಚ್ಛಯಂ ದಸ್ಸೇತ್ವಾ ಆಪುಚ್ಛಿತ್ವಾ ಪಕ್ಕಮನೇ ತಂ ದಸ್ಸೇನ್ತೋ ಆಹ ‘‘ಆಚರಿಯಂ ಅನಾಪುಚ್ಛಾ’’ತಿಆದಿ। ಉಪಚಾರಸೀಮಾತಿಕ್ಕಮೇತಿ ಉಪಚಾರಸೀಮಾಯ ಅತಿಕ್ಕಮೇ ಸತಿ, ಅತಿಕ್ಕಮನಹೇತು ವಾತಿ ಯೋಜನಾ। ಏತ್ಥ ಚ ಉಪಚಾರಸೀಮಾ ನಾಮ ಪರಿಕ್ಖಿತ್ತಸ್ಸ ವಿಹಾರಸ್ಸ ಪರಿಕ್ಖೇಪೋಯೇವ, ಅಪರಿಕ್ಖಿತ್ತಸ್ಸ ಪರಿಕ್ಖೇಪಾರಹಟ್ಠಾನಂ।
So cāti antevāsiko ca. Tatoti gāmato. Sugatoti suṭṭhu gato, nissayo paṭippassambhatīti adhippāyo. Athāpīti puna ca paraṃ. Āpucchitvā pakkamane vinicchayaṃ dassetvā āpucchitvā pakkamane taṃ dassento āha ‘‘ācariyaṃ anāpucchā’’tiādi. Upacārasīmātikkameti upacārasīmāya atikkame sati, atikkamanahetu vāti yojanā. Ettha ca upacārasīmā nāma parikkhittassa vihārassa parikkhepoyeva, aparikkhittassa parikkhepārahaṭṭhānaṃ.
ಸಾಯನ್ಹೇ ವಾ ರತ್ತಿಭಾಗೇ ವಾತಿ ಅಜ್ಜ ಸಾಯನ್ಹೇ ವಾ ರತ್ತಿಭಾಗೇ ವಾ। ಸ್ವೇತಿ ಸುವೇ।
Sāyanhe vā rattibhāge vāti ajja sāyanhe vā rattibhāge vā. Sveti suve.
ಬಹಿಸೀಮನ್ತಿ ಉಪಚಾರಸೀಮತೋ ಬಹಿ। ತತೋತಿ ಬಹಿಸೀಮತೋ। ದ್ವಿನ್ನಂ ಲೇಡ್ಡುಪಾತಾನನ್ತಿ ಅನ್ತೇವಾಸಿಕತೋ ದ್ವಿನ್ನಂ ಲೇಡ್ಡುಪಾತಾನಂ। ಅತಿಕ್ಕಮಿತ್ವಾತಿ ಉಪಚಾರಸೀಮತೋ ಬಹಿ ಅನ್ತೇವಾಸಿಕಸದ್ಧಿವಿಹಾರಿಕಾನಂ ವಸನಟ್ಠಾನತೋ ಅತಿಕ್ಕಮಿತ್ವಾ।
Bahisīmanti upacārasīmato bahi. Tatoti bahisīmato. Dvinnaṃ leḍḍupātānanti antevāsikato dvinnaṃ leḍḍupātānaṃ. Atikkamitvāti upacārasīmato bahi antevāsikasaddhivihārikānaṃ vasanaṭṭhānato atikkamitvā.
ಮುಚ್ಚಿತುಕಾಮೋತಿ ಅನ್ತೇವಾಸಿಕಮ್ಹಾ ಮುಚ್ಚಿತುಕಾಮೋ ಏವ। ಪಣಾಮೇತೀತಿ ಕಾಯವಾಚಾಹಿ ಪಣಾಮೇತಿ। ಸಾಲಯೋತಿ ಆಚರಿಯೇ ಸಾಪೇಕ್ಖೋ। ‘‘ನಿರಾಲಯೋ’’ತಿ ವತ್ವಾ ತಸ್ಸ ಅತ್ಥಂ ದಸ್ಸೇತುಂ ವುತ್ತಂ ‘‘ನ ದಾನೀ’’ತಿಆದಿ। ಏವಮ್ಪೀತಿ ಧುರೇ ನಿಕ್ಖಿತ್ತೇಪಿ। ಉಭಿನ್ನಂ ಧುರನಿಕ್ಖೇಪೇ ಸತಿ, ಧುರನಿಕ್ಖೇಪಹೇತು ವಾ ಪಟಿಪ್ಪಸ್ಸಮ್ಭತೀತಿ ಯೋಜನಾ। ಪಣಾಮಿತೇನ ಪಟಿಪಜ್ಜಿತಬ್ಬನ್ತಿ ಸಮ್ಬನ್ಧೋ।
Muccitukāmoti antevāsikamhā muccitukāmo eva. Paṇāmetīti kāyavācāhi paṇāmeti. Sālayoti ācariye sāpekkho. ‘‘Nirālayo’’ti vatvā tassa atthaṃ dassetuṃ vuttaṃ ‘‘na dānī’’tiādi. Evampīti dhure nikkhittepi. Ubhinnaṃ dhuranikkhepe sati, dhuranikkhepahetu vā paṭippassambhatīti yojanā. Paṇāmitena paṭipajjitabbanti sambandho.
ವುತ್ತಮೇವತ್ಥಂ ವಿತ್ಥಾರೇನ್ತೋ ಆಹ ‘‘ಸಚೇ ಹೀ’’ತಿಆದಿ। ಆಚರಿಯನ್ತಿ ನಿಸ್ಸಯಾಚರಿಯಂ। ಚೇತಿಯಂ ವಾ ವನ್ದನ್ತಂ ಉಪಜ್ಝಾಯನ್ತಿ ಸಮ್ಬನ್ಧೋ, ಮಗ್ಗಪ್ಪಟಿಪನ್ನಂ ವಾ ಉಪಜ್ಝಾಯನ್ತಿ ಯೋಜನಾ। ದೂರತ್ತಾತಿ ದೂರಭಾವತೋ। ಉಪರಿಪಾಸಾದೇತಿ ಪಾಸಾದಸ್ಸ ಉಪರಿ। ತನ್ತಿ ಉಪಜ್ಝಾಯಂ। ನಿಸಿನ್ನಂ ಉಪಜ್ಝಾಯನ್ತಿ ಸಮ್ಬನ್ಧೋ।
Vuttamevatthaṃ vitthārento āha ‘‘sace hī’’tiādi. Ācariyanti nissayācariyaṃ. Cetiyaṃ vā vandantaṃ upajjhāyanti sambandho, maggappaṭipannaṃ vā upajjhāyanti yojanā. Dūrattāti dūrabhāvato. Uparipāsādeti pāsādassa upari. Tanti upajjhāyaṃ. Nisinnaṃ upajjhāyanti sambandho.
ಸವನವಸೇನ ಸಮೋಧಾನೇ ವಿನಿಚ್ಛಯೋ ಏವಂ ವೇದಿತಬ್ಬೋತಿ ಯೋಜನಾ। ಉಪಜ್ಝಾಯಸ್ಸ ಸದ್ದನ್ತಿ ಸಮ್ಬನ್ಧೋ।
Savanavasena samodhāne vinicchayo evaṃ veditabboti yojanā. Upajjhāyassa saddanti sambandho.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೨೨. ನಿಸ್ಸಯಪಟಿಪ್ಪಸ್ಸದ್ಧಿಕಥಾ • 22. Nissayapaṭippassaddhikathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ನಿಸ್ಸಯಪಟಿಪ್ಪಸ್ಸದ್ಧಿಕಥಾ • Nissayapaṭippassaddhikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ನಿಸ್ಸಯಪಟಿಪ್ಪಸ್ಸದ್ಧಿಕಥಾವಣ್ಣನಾ • Nissayapaṭippassaddhikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ನಿಸ್ಸಯಪಟಿಪ್ಪಸ್ಸದ್ಧಿಕಥಾವಣ್ಣನಾ • Nissayapaṭippassaddhikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ನಿಸ್ಸಯಪಟಿಪ್ಪಸ್ಸದ್ಧಿಕಥಾವಣ್ಣನಾ • Nissayapaṭippassaddhikathāvaṇṇanā
